༄༅།།དཔྱད་བརྗོད་ངང་བའི་བུ་མོའི་གཤོག་རླབས།

       འདིར་རྩོམ་རིག་དང། རིག་གཞུང། སློབ་གསོ། ཆབ་སྲིད་བཅས་ཀྱི་སྐོར་ལ་འཆར་སྣང་གང་བྱུང་ཟིན་ཐོར་བཀོད་པའི་འབོལ་རྩོམ་ཁག་ཅིག་ཡོད། དེ་དག་ནི་གཙོ་བོ་རང་གི་མྱོང་བ་དང་བཅས་པའི་ཚོར་སྣང་དག་ཡིན་ཡང། སྣང་ཚུལ་མི་མཐུན་ས་དང་འདོད་པ་མི་གཅིག་ས་གང་མང་ཡོད་ངེས་པས། བསམ་ཚུལ་བརྗེ་རེས་བྱ་རྒྱུར་དགའ་བསུ་ཞུ།

འབྲུག་དཀར་པོར་ལྕགས་རྩི་ནག་པོ་བྱུགས་པ།

གངས་དཀར་ཕྱོགས་ལས་རྣམ་རྒྱལ་ལས་འབྲུག་དཀར་རྒྱལ་པོ་ཟེར་བ་ཞིག་འཁྲུངས། དེ་བས་འབྲུག་འདིའི་ཁ་དོག་ཀྱང་གངས་རི་དང་འདྲ་ཞིང་སྙིང་ཡང་གངས་ལྟར་དཀར། དེ་ནི་གངས་སེང་དཀར་མོའི་སྐྱེ་རྒྱུད་ཀྱི་རིགས་སྲས་ཤིག དེ་བས་འབྲུག་སྐད་དང་སེང་སྐད་ལྷན་ཅིག་ཏུ་གྲགས། སྐད་གསངས་འདི་ཆེས་རྣ་བར་གཟན་པ་ནི་ནག་ཕྱོགས་པའི་སྡེ་ཁོ་ན་ཡིན། དེ་བས་གངས་རི་སྤར་མཐིལ་ལ་བཟུང་བའི་བཙན་བདུད་ནག་པོ་དེས་འབྲུག་འདི་དམ་ལ་འདོགས་པར། ཐོག་མར་འབྲུག་དཀར་དེ་འབྲུག་ནག་ཅིག་ཏུ་བསྒྱུར་དགོས་བྱུང་། དེ་བས་དེ་ལ་ལྕགས་རྩི་ནག་པོ་ཞིག་བཙན་གྱིས་བྱུགས། མངོན་སུམ་དུ་བྱུགས་ཏེ། སའི་འོག་རིམ་གསུམ་གྱི་དོང་ཞབས་སུ་བཅུག འོན་ཀྱང་སེང་འབྲུག་གི་གད་རྒྱངས་དེ་སའི་འོག་རིམ་ནས་མཆེད་དུ་བར་སྣང་དུ་ཁྱབ།

ངས་འདིར་སྒྲུང་ཞིག་རྩོམ་གྱིན་མེད་ལ་ལྷ་སྒྲུང་ཞིག་དེ་བས་ཀྱང་ཤོད་ཀྱིན་མེད། འདི་ནི་ཁ་སང་རང་བྱུང་མ་ཐག་པའི་དངོས་སྒྲུང་ཞིག་སྟེ། སྐུ་ཞབས་འབྲུག་དཀར་རྒྱལ་ལམ་འབྲུག་ལོ། ཡང་ན་རྩོམ་པ་པོ་ཞོགས་ལྗང་ལགས་ཀྱི་རྒྱལ་གཅེས་ཀྱི་སྙིང་སྟོབས་དང་ལྷག་པར་དྲང་བདེན་སྐྱོང་བའི་དཔའ་ངར་སྙུག་རྩེ་དེ་ནི་འབྲུག་དཀར་ཞིག་བར་སྣང་དུ་འཁྱུག་པ་དང་འདྲ་ལ་སེང་སྐད་ཅིག་རི་ལུང་དུ་ཁྱབ་པ་དང་ཡང་འདྲའོ། དེ་བས་རྒྱལ་གཅེས་པ་འབྲུག་དཀར་ལགས་ལ་རྨ་ལྷོ་ཁུལ་འབྲིང་རིམ་མི་དམངས་ཁྲིམས་ཀྱིས་རྒྱལ་ཁབ་ཁ་བྲལ་ལ་སྐུལ་སློང་བྱས་པའི་ཉེས་འགེལ་གྱིས་ལོ་གསུམ་གྱི་དུས་བཀག་བཙོན་འཇུག་དང་ལོ་གཉིས་ཀྱི་ཆབ་སྲིད་ཐོབ་ཐང་འཕྲོགས།  འདི་ནི་མི་དཀར་པོར་ཞྭ་ནག་པོ་གཡོགས་པའམ། འབྲུག་དཀར་པོ་ལ་ལྕགས་རྩི་ནག་པོ་བྱུགས་པ་ཞིག་མ་ཡིན་ནམ།

སྐབས་འདིར་ཁོང་གིས་སླར་ཡང<གོང་གཏུག>ཅེས་པའི་རང་ཉིད་དག་སེལ་གྱི་དོན་ཚན་དྲུག་ཅན་གྱི་ཁྲིམས་གཏུགས་སྙན་ཞུ་ཞིག་མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་དུ་ཕུལ་བ་དེ་ཡང་འབྲུག་སྐད་ཅིག་དང་འདྲ་བར་གང་ས་གང་དུ་ཁྱབ་ཀྱིན་འདུག

ཁོང་ལ་གཡོགས་པའི་ཉེས་མིང་གཙོ་བོ་དྲུག་གི་ནང་ནས་གཉིས་ནི་སྐུ་ཞབས་ཝང་ལི་ཞུང་གི<<བོད་ཀྱི་བྱ་གཏོར>>དང་སྐུ་ཞབས་ཞོགས་དུང་གི<<གནམ་ས་གོ་འབྱེད>>གཉིས་ལྟ་ཀློག་དང་ལུང་འདྲེན་བྱས་པ་འདུག་ཟེར་བ་དེ་རེད། དེས་ན་དེའི་རྩོམ་པ་པོ་གཉིས་བཙོན་འཇུག་ཁྲིམས་ཆད་མི་གཏོང་དོན་ཅི་ཡིན་ནམ། མ་གཞི་དེབ་དེ་གཉིས་ནང་ལ་རྒྱལ་ཁབ་ཁ་བྲལ་སྐོར་གྱི་སྐད་ཆ་ཅི་ཡང་བཤད་མེད་པས་འདི་ལྟར་བསྙོན་འཛུགས་དོན་ཅི་ཡིན་ནམ།

དོན་ཚན་གཉིས་ནི་ཉེན་རྟོག་པས་ཁོང་རང་ཉིད་བཙན་བཤེར་བྱས་ཚུལ་གྱི་རྩོམ་ཡིག་ཅིག་དང་དང་ཉེན་རྟོག་པས་རྒྱ་རིགས་མང་ཚོགས་ཁག་ཅིག་ལ་གཅར་རྡུང་བྱས་པའི་དྲ་ལམ་གྱི་བརྙན་ཐུང་ཞིག་བརྒྱུད་བསྐུར་བྱས་འདུག་པ་དེ་རེད། གནད་དོན་འདི་གཉིས་རྒྱལ་ཁབ་ཁ་བྲལ་ལ་སྐུལ་སློང་བྱས་པའི་ཉེས་པར་བགྲངས་པ་ནི་དེ་བས་ཀྱང་གཞི་རྩ་མེད། ༼འོན་ཀྱང་འདིས་རྒྱ་ནག་གི་ཉེན་རྟོག་པ་ཚོའི་སྤྱོད་ངན་ཐེར་འདོན་བྱས་ཡོད་པས་མ་དགའ་བ་ཁག་མེད། ༽

དོན་ཚན་གཞན་ཞིག་ནི་སྐུ་འབུམ་གྱི་མེ་ཏོག་མཆོད་མཇལ་སྐབས་དྲག་ཆས་སྤྲས་པའི་དམག་དཔུང་གིས་བསྐོར་ནས་འཇིགས་སྐུལ་བྱས་པ་དེ་མང་ཚོགས་ཀྱི་ཆོས་དད་རང་དབང་ལ་ཕོག་ཐུག་སོང་ཚུལ་དང་འབྲེལ་ནས་ཆོས་དད་རང་དབང་སྐོར་གྱི་ཁྲིམས་ལུགས་རྒྱུན་ཤེས་རེ་མཁོ་སྤྲོད་བྱས་པའི་རྩོམ་ཡིག་དེ་རེད། ཁྲིམས་བཤད་ན་ཡང་ཁྲིམས་འགལ་དུ་བརྩི་བ་འདི་རྒྱ་ནག་གི་སྒེར་ཁྲིམས་ཤིག་མིན་ནམ། ལྷག་པར་དུའང་རྒྱལ་ཁབ་ཁ་བྲལ་དང་འབྲེལ་བ་ཅི་འདུག ༼དོན་ངོ་མ་མང་ཚོགས་ཀྱིས་ཁྲིམས་ཤེས་སོང་ན་ཁྲིམས་འགལ་གྱིས་ཁྲིམས་ཆད་གཏོང་སྲོལ་དེ་རྒྱུན་འཁྱོངས་དཀའ་བས་མ་དགའ་བ་ལོས་ཡིན།༽

དོན་ཚན་གཞན་ཞིག་ནི་བོད་རང་བཙན་དང་འབྲེལ་མེད་ཀྱི་བོད་ཀྱི་གནད་དོན་དག་ལ་ཀྲུང་དབྱང་གིས་༸གོང་ས་་མཆོག་དང་ལྷན་དུ་གྲོས་མོལ་གནང་ཆོག་ཚུལ་གྱི་ནང་ཁུལ་ཡིག་ཆ་ཞིག་བརྒྱུད་སྐུར་གནང་འདུག་པ་དེ་རེད། འདི་བོད་རྒྱའི་ཆབ་སྲིད་དང་ཐད་ཀར་འབྲེལ་བའི་གནད་དོན་གལ་ཆེན་ཞིག་ཡིན་ན་ཡང་འདིར་བོད་རྒྱ་མཉམ་གནས་བྱ་རྒྱུ་ལས་ཁ་བྲལ་གྱི་ནང་དོན་རྩ་བ་ནས་མེད། གསང་བ་ཕྱི་བསྒྲགས་ཀྱི་ཉེས་པའང་འགེལ་ཐབས་མེད་དེ། འདི་དེ་སྔ་ན་ཏིང་ཞའོ་ཕིང་གིས་གསུངས་ནས་ཕྱི་གསལ་ནང་གསལ་ཆགས་ཚར་བ་ཞིག་རེད། དེ་རྗེས་ནས་རྒྱ་ནག་གཞུང་ཕྱོགས་ནས་བཙན་བྱོལ་བོད་གཞུང་གི་སྐུ་ཚབ་ཚོགས་པ་དང་ཡང་འབྲེལ་མོལ་ཐེངས་འགའ་གནང་ཟིན་པ་ཡོངས་གྲགས་རེད། ༼འོན་ཀྱང་དེང་སང་ཁོ་ཚོས་སྐད་ཆ་དེ་ཁས་ལེན་འདོད་མེད་ལ། རྒྱ་ནག་གི་རྩ་ཁྲིམས་གཞིར་བཟུང་གི་བོད་རང་སྐྱོང་གི་བསམ་འཆར་ཡིག་ཆ་དེ་ཡང་བོད་རང་བཙན་གྱི་ངོ་བོ་ཞིག་ལ་དོགས་འདྲོགས་ཀྱིས་ངོས་ལེན་བྱེད་ཕོད་ཀྱིན་མེད།༽

དེ་ལྟར་ན་ཁོང་གི་ཉེས་འདོགས་དོན་ཚན་དྲུག་པོ་དེ་དག་ནི་རྒྱལ་ཁབ་ཁ་བྲལ་ལ་སྐུལ་སློང་བྱས་པ་ཕར་ཞོག་རྒྱ་ནག་གི་རྩ་ཁྲིམས་ཁྱབ་ཁོངས་ནས་མ་བརྒལ་བའི་གནད་དོན་ཞིག་ཡིན་པ་རྨ་ལྷོ་མི་ཁུལ་མི་དམངས་ཁྲིམས་ཁང་ནས་མ་ཤེས་པ་ཞིག་གཏན་ནས་མིན་པར་ཤེས་བཞིན་དུ་མ་ཉེས་ཁག་དཀྲི་བྱས་པ་ཞིག་རེད། དེས་ན་ཁྲིམས་ཁང་གིས་བསམ་བཞིན་དུ་ཁྲིམས་འགལ་རང་བཞིན་གྱི་ཉེས་ཆད་མངོན་སུམ་འཛེམས་མེད་དུ་གཅོད་དོན་ཅི་ཡིན་ནམ། ཡང་ན་དེའི་དགོས་པ་དང་དམིགས་ཡུལ་ཅི་ཡིན་ནམ། འདི་ནི་ང་ཚོས་སྐབས་སུ་བབས་པའི་བསམ་གཞིགས་གཏོང་དགོས་ས་དང་གླེང་དགོས་པ་དེ་རེད།

བདག་གིས་དཔྱད་ན། རྒྱ་ནག་གཞུང་ཕྱོགས་དབང་འཛིན་པ་མི་ཉུང་བ་ཞིག་གིས་གྲངས་ཉུང་མི་རིགས་བླུན་པོ་དང་གླེན་པར་བརྩིས་ཏེ་ཐུབ་ཚོད་འདྲ་མིན་གཏོང་གིན་ཡོད་ལ། ཡང་དབང་འཛིན་པ་གང་མང་ཞིག་གིས་བོད་དང་ཡུ་གུར་ལྟ་བུས་མི་རིགས་ཀྱི་ཁེ་དབང་གང་ཞིག་རྩོད་པ་དང་དེའི་ཆེད་དུ་ཞུ་རྒོལ་སོགས་ལས་འགུལ་གང་ཞིག་སྤེལ་ན་ཡང་ཚང་མ་རང་བཙན་ནམ་རྒྱལ་ཁབ་ཁ་བྲལ་གྱི་རྣམ་འགྱུར་དུ་བརྩི་བའི་རྣམ་རྟོག་ཆེན་པོ་ཞིག་གིས་ཀྱང་ཁྲིམས་ཆད་ཅི་ཡང་གཅོད་ཀྱིན་ཡོད།

གཉིས་ནས་རྒྱ་ནག་དམར་གཞུང་ཆེས་སྐྲག་ས་ནི་དམངས་གཙོ་བརྩོན་ལེན་གྱི་ལས་འགུལ་ཡིན། དེའི་རྒྱུ་མཚན་ནི་རྒྱ་ནག་ཁ་ཐོར་དུ་འགྲོ་རྒྱུར་སེམས་ཁྲལ་བྱེད་པ་མིན་པར་ད་ལྟའི་སྲིད་འཛིན་པ་དག་གི་དབང་ཆ་འཆོར་རྒྱུར་སེམས་ཁྲལ་ཆེ་བས་རེད། དེའི་རྒྱུ་མཚན་མི་ཕལ་མོ་ཆེ་དབང་གྲགས་དང་རྒྱུ་འབྱོར་ལ་རྔམས་པས་སྒེར་དོན་ནམ་ཡང་བློས་གཏོང་མི་ནུས། ལྷག་པར་དུ་རྒྱ་ནག་ནི་སྔོན་ཆད་ནས་དབང་ཆ་འཕྲོག་རྩོད་དང་བརྟན་སྲུང་གི་བྱུས་ངན་དེར་གོམས་རྒྱུས་ཡོད་པས་ནད་ཡམས་འདི་ཀུན་ལ་འགོས་ཡོད། དེ་ནི་རྒྱ་ནག་གི་གུང་ཁྲན་ཏང་མི་ཕལ་མོ་ཆེའི་རུལ་སུངས་ཀྱི་བྱ་སྤྱོད་དག་གིས་གསལ་བོར་མཚོན་ཡོད། དེས་ན་གཅིག་རྒྱབ་གཅིག་ལངས་ཀྱིས་དམར་ཤོག་ཚོགས་པ་སྲུང་སྐྱོབ་བྱེད་རྒྱུར་ཁ་གཡར་ནས་ནང་ཁུལ་གྱི་དབང་ཆ་རྩོད་རེས་ཀྱི་ལྐོག་གཡོ་ཡང་གང་མང་ཞིག་བཤམས་དང་གཤོམ་གྱིན་ཡོད། དེ་ཡང་ཁོ་ཚོ་ཐུན་མོང་གི་ཁེ་ཕན་སྲུང་སྐྱོབ་བྱ་རྒྱུར་དམངས་གཙོའི་ཁྱད་ཆོས་གལ་ཆེན་འགའ་ནམ་ཡང་ལག་བསྟར་བྱེད་འཇུག་གིན་མེད་དེ། གཅིག་ཁ་གཏད་ཆབ་སྲིད་ཚོགས་པ་དང་། གཉིས་མི་དམངས་ཀྱིས་ཐད་ཀར་འོས་ཤོག་འཕེན་རྒྱུ། གསུམ་རང་དབང་གསར་འགོད་པ་དང་ཆབ་སྲིད་རྩོམ་པ་པོའི་གཏམ་བཤད་དང་རྩོམ་ཡིག་བཅས་ྣམ་ཡང་སྤེལ་ས་མེད། དེ་བས་དམངས་གཙོ་རྩོད་ལེན་པ་སུ་དང་གང་ཡིན་ཡང་ཁོ་ཚོའི་དགྲ་ཟླ་གཙོ་བོ་ཡིན། འདིའི་ཁ་གཏད་དུ་ཁོ་ཚོས་མངོན་སུམ་འཛེམས་མེད་ཀྱིས་ཞུ་དྲག་གི་ཐབས་ཚུལ་ཅི་ཡང་སྤེལ་དང་སྤེལ་གྱིན་ཡོད། དཔེར་ན་གནམ་བདེ་སྒོ་མོ་ཆེའི་དམར་གསོད་ཆེན་མོ་ནི་འདིའི་དཔེ་མཚོན་གསོན་པོ་དེ་ཡིན།

འབྲུག་དཀར་རྒྱལ་གྱི་ངར་སྐད་དེ་ནི་དོན་ངོ་མ་དམངས་གཙོའི་ངར་སྐད་ཅིག་ཡིན། དེ་བས་ཁོ་ཚོས་འགྲོ་བ་མིའི་ཐོབ་ཐང་དང་དམངས་གཙོ་རྩོད་ལེན་བྱས་སོང་ཞེས་ཉེས་ཆད་གཅོད་ཐབས་བྲལ། བསྙོན་འདོགས་ས་ཉག་གཅིག་ནི་རྒྱལ་ཁབ་ཁ་བྲལ་གྱི་ནག་ཞྭ་གཡོག་རྒྱུ་དེ་ཉིད་དོ༎

འབྲུག་དཀར་རྒྱལ་གྱིས་རང་ཉིད་འབྲུག་ནག་པོ་ཞིག་མིན་པ་དང་རང་ཉིད་ལ་ཁུལ་ཁྲིམས་ཁང་གིས་ལྕགས་རྩི་ནག་པོ་བྱུགས་ཚུལ་གྱི་ཞུ་གཏུགས་ཤིག་ཞིང་ཆེན་རིམ་པའི་ཁྲིམས་ཁང་དུ་ཕུལ་བ་འདིས་ཁོང་ཉིད་དཀར་འདོན་གནང་སྲིད་དམ། གལ་ཏེ་མ་གནང་ན་ཁོང་གིས་བསྐྱར་དུ་རྒྱ་ནག་དབུས་གཞུང་གི་ཆེས་མཐོའི་མི་དམངས་ཁྲིམས་ཁང་ལ་ཞུ་གཏུགས་འདི་འབུལ་ངེས། དེས་ཀྱང་དཀར་འདོན་མ་གནང་ཚེ། མཐར་རྒྱལ་སྤྱིའི་མཉམ་འབྲེལ་ལྷན་ཚོགས་སུ་ཞུ་གཏུགས་འབུལ་དགོས། དེར་ཡང་རེ་བ་ཅི་ཙམ་ཡོད་དམ། གང་ལྟར་འདི་ནི་ཁོང་གིས་རང་ཉིད་ཀྲུང་གོའི་ཉེས་མེད་སྤྱི་འབངས་ཤིག་ཡིན་པ་གཞིར་བཞག་གིས་ཁྲིམས་མཐུན་རང་བཞིན་གྱི་ཁྲིམས་གཏུགས་གོ་རིམ་ཞིག་ཀྱང་རེད།

ང་ཚོས་གང་ཐུབ་ཀྱིས་དངོས་དོན་འདི་དག་ཐད་ཞུ་གཏུགས་རོགས་རམ་དང་རྒྱ་ཁྱབ་ཏུ་གསལ་བསྒྲགས་བྱེད་དགོས་ལ། ཁོང་ཚོའི་བརྩམས་ཆོས་ཁག་ཀྱང་ཀུན་ཏུ་སྤེལ་དགོས།

གངས་ཀྱི་རི་ལས་བྱོན་པའི་དུང་གི་འབྲུག ལྕགས་རྩི་ནག་པོ་བྱུགས་ཏེ་དོང་དུ་བཅུག 

འོན་ཀྱང་ཁྲིམས་མཐུན་བདེན་སྐྱོང་དུང་གི་སྒྲ། སྤྲིན་ནག་བང་རིམ་གཤགས་ཏེ་མཁའ་ལ་ཁྱབ༎