༄༅།།རྩོམ་གཞུང་མཚོ་བྱུང་རོལ་བའི་རྫིང་བུ།

 

       འདིར་རྩོམ་འབྲི་རིག་པའི་སྐོར་ལ་མཁས་པའི་དགོངས་གཞི་གཞིར་བཞག་ཐོག་འཆར་སྣང་གསར་བ་འགའ་རེ་ཡང་མཉམ་བསྲེས་བྱས་ཀྱི་གཞུང་རྩོམ་གསུམ་ཡོད། རྩོམ་རིག་བརྙན་འཕྲུལ་གྱི་མཇུག་ད་དུང་ཚར་མེད་ལ། བསྐྱར་ཞིབ་ཀྱང་བྱེད་དགོས། འདི་དག་རྩོམ་རིག་སློབ་ཁྲིད་སྐབས་སུ་སློབ་ཁྲིད་གྲ་སྒྲིག་གི་ཟིན་བྲིས་སུ་བྲིས་པ་ཡིན། དེ་བས་བོད་ཀྱི་རྩོམ་རིག་སློབ་གཉེར་པ་ཚོར་རོགས་ཕན་ཅུང་ཐུབ་སྙམ།

རྩོམ་འབྲི་གཞིར་གྱུར་མ།

 

 

རྩོམ་འབྲི་ཀུན་གྱི་གཞིར་གྱུར་བརྡ་སྤྲོད་མཆོག །

ཚུལ་བཞིན་སློབ་པ་རྩོམ་གྱི་རྩ་བ་རུ།།

ལེགས་པར་མཐོང་ནས་འབད་པ་དུ་མ་ཡིས།།

གུས་རྟག་བརྩོན་པས་འཇུག་པར་དམ་བཅའ་འོ།།

 

ལན་ཅིག་རྙེད་པའི་སློབ་སྦྱོང་བཟང་པོ་འདི།།

ཤིན་ཏུ་རྙེད་དཀའ་དོན་ཆེ་ཤེས་གྱུར་ནས།།

ཉིན་མཚན་མེད་པར་འབྲས་བཟང་ལེན་པའི་བློས།།

རྒྱུན་ཆད་མེད་པར་འཇུག་པར་དམ་བཅའ་འོ།།

 

བྱ་དངོས་གཡོ་བ་ཆུ་ཡི་ཆུ་བུར་བཞིན།།

མྱུར་དུ་འགྱུར་བའི་སྣང་ཚུལ་དྲན་པ་དང་།།

སློབ་ཐོན་རྗེས་སུ་ལུས་དང་གྲིབ་མ་བཞིན།།

རྩོམ་དང་འཚོ་བ་ཕྱི་བཞིན་འབྲང་བ་ལ།།

ངེས་པ་བརྟན་པོ་རྙེད་ནས་འཚོ་བའི་རིགས།།

ཕྲ་ཞིང་ཕྲ་མོ་རྣམས་ཀྱང་བརྟག་པ་དང་།།

དཔྱད་གཞི་མཐའ་དག་འཚོལ་སྒྲུབ་བྱེད་པ་ལ།།

རྟག་ཏུ་དོ་སྣང་བྱེད་པར་དམ་བཅའ་འོ།།

 

སྤྱད་པས་མི་ངོམས་འཇིག་རྟེན་འཚོ་བ་དང་།།

ཡིད་བརྟན་མི་རུང་ལྟ་སྤྱོད་འདྲ་མིན་གྱི།།

ཉེས་པ་མཐོང་ནས་རྩོམ་འབྲིའི་བྱ་བ་ལ།།

དོན་གཉེར་ཆེན་པོས་འཇུག་པར་དམ་བཅའ་འོ།།

 

རླབས་ཆེན་བསམ་པ་དེ་ཡིས་དྲངས་པ་ཡི།།

འཚོལ་དང་དཔྱོད་པའི་བློ་སྟོབས་ཆེན་པོ་ཡིས།།

རྩོམ་ལུས་རྩ་བ་སོ་སོའི་ཐབས་ཚུལ་ལ།།

བསམ་གཞིགས་སྙིང་བོར་བྱེད་པར་དམ་བཅའ་འོ།།

 

རང་ཉིད་བླང་དོར་གནས་ལ་རྨོངས་པ་བཞིན།།

རྩམ་གཟན་འགྲོ་བ་ཀུན་ཀྱང་དེ་འདྲ་བར།།

མཐོང་ནས་རྩོམ་པས་རྨོངས་སེལ་ཁུར་འཁྱེར་བའི།།

ལྷག་བསམ་སེམས་མཆོག་སྐྱེད་པར་དམ་བཅའ་འོ།།

 

སེམས་ཙམ་བསྐྱེད་ཀྱང་རྩོམ་པའི་ལག་ལེན་ལ།།

གོམས་པ་མེད་ན་རྩོམ་ཡིག་མི་འཁྱོངས་པ།།

ལེགས་པར་མཐོང་ནས་རྩོམ་འབྲིའི་བྱ་བ་ལ།།

བརྩོན་པ་དྲག་པོས་འཇུག་པར་དམ་བཅའ་འོ།།

 

ལོག་པའི་ལྟ་བར་གཡེང་བ་ཞི་བྱེད་ཅིང་།།

ཡང་དག་དོན་ལ་ངེས་ཤེས་ཆེར་སྦྱིན་པའི།།

མཛེས་སྣང་སྒྱུ་རྩལ་ཟུང་དུ་འབྲེལ་བའི་ཐབས།།

མྱུར་དུ་རྟོགས་ནས་རྩོམ་ལ་འཇུག་འཚལ་ལོ།།

 

ཐུན་མོང་རྩོམ་འབྲིའི་སྣོད་ལྡན་གྱུར་བ་ན།།

རྩོམ་རིག་ཀུན་གྱི་མཆོག་གྱུར་སྙན་པའི་དངགས།།

དཔྱོད་ལྡན་སྐྱེ་བོའི་འཇུག་ངོགས་དམ་པ་དེར།།

བདེ་བླག་ཉིད་དུ་འཇུག་པར་བྱིན་གྱིས་རློབས།།

 

དེ་ཚེ་རྩོམ་ལུས་རྣམ་གཉིས་འགྲུབ་པའི་གཞི།།

རྣམ་དག་ཐབས་ཚུལ་གསར་གཏོད་བློས་བསླངས་ལ།།

འཁྲུལ་བ་མེད་པའི་ངེས་ཤེས་རྙེད་གྱུར་ནས།།

སྲོག་གི་སྙིང་བོ་སྦྱིན་པའི་མཐུ་གྲུབ་ཤོག།

 

དེ་ནས་ཕྱི་ནང་སྙན་དངགས་རྣམ་གཉིས་ཀྱི།།

གསང་བའི་གནད་རྣམས་ཇི་བཞིན་རྟོགས་གྱུར་ནས།།

རྨད་བྱུང་སྒྱུ་རྩལ་སྤྱོད་ལས་མི་གཡེལ་བར།།

བློ་ལྡན་ཀུན་དགའ་བསྐྱེད་པར་བདག་གྱུར་ཅིག།

 

དེ་ལྟར་ལམ་བཟང་སྟོན་པའི་རྩོམ་མཁན་དང།།

ཚུལ་བཞིན་ཀློག་པའི་གྲོགས་རྣམས་མཉམ་འབྲེལ་གྱིས།།

ཕྱི་དང་ནང་གི་ལོག་སྨྲའི་བར་གཅོད་ཚོགས།།

ཉེ་བར་ཞི་བར་བྱེད་པས་ཤིས་གྱུར་ཅིག།

 

སྐྱེ་བ་ཀུན་ཏུ་ཡང་དག་ཤེས་རབ་དང་།།

འབྲལ་མེད་རྩོམ་རིག་དཔལ་ལ་ལོངས་སྤྱོད་ཅིང་།།

མཛེས་སྡུག་སྒྱུ་རྩལ་ཁོ་ལག་རྫོགས་པ་ཡིས།།

སྨྲ་བའི་སེང་གེའི་གོ་འཕང་མྱུར་འཐོབ་ཤོག། 

 

༢༠༢༡་༠༡་༠༤་ ལེགས་བཅོས་ཅུང་ཟད་དང་བཅས་འདིར་བཀོད་པའོ།། །།