༄༅། །ཕ་རྒྱུད་  སྦྲ་ནག་ར་ལོ་ཚང།

          སྔོན་སོག་པོ་མདའ་གཅིག་གི་སྡེ་ཁྲོད་དུ་མདའ་ཚན་ཧོ་ཞོན་གྱི་བོད་སྡེ་སྦྲ་ནག་ཚོ་བ་ན་ལས་ལ་བརྩོན་ཞིང་གཤིས་རྒྱུད་དྲང་བ། ནང་སྡེ་འབངས་ལ་བྱམས་ཤིང་འཇིག་རྟེན་མི་ཆོས་ལ་མཁས་པའི་རྒད་པོ་དབང་རྒྱལ་ཚེ་རིང་ཟེར་བ་ཞིག་ཡོད། དེ་ལ་བུ་གཉིས་དང་བུ་མོ་གཅིག་ཡོད། བུ་གཉིས་ཀ་ལོ་ན་ཆུང་བའི་དུས་སྔ་གཞུག་ཏུ་གྲྭ་བ་བྱེད་བཅུག བུ་ཆེ་བར་བཤད་སྒྲུབ་དང་ཆུང་བར་འཕྲིན་ལས་ཟེར། དེ་གཉིས་ནར་སོན་པ་ན་ཡང་སྔ་གཞུག་ཏུ་སྐྱ་སར་བབས་པས། ཡུལ་མི་ཚོས་ཁོ་གཉིས་ལ་བཤད་སྒྲུབ་ར་ལོ་དང་ར་འཕྲིན་ཟེར། ར་ལོ་ཟེར་དོན་ནི་མགོ་ན་རལ་བ་མེད་པས་ཡིན།

          ༡༧༨༠ ལོ་ཡས་མས་སུ་ཕྱི་ཇག་རྐུན་གྱི་གནོད་པས་སོག་པོའི་སྡེ་ཁྲོད་དུ་ཕྱོགས་སོ་སོ་ནས་འཁྲུག་གཞི་མང་པོ་ལངས། དེའི་རྒྱུ་མཚན་ནི། སྐབས་དེའི་སོག་པོའི་རྒྱལ་པོ་ངག་དབང་ནས་རང་འོག་གི་སྡེ་བ་སོ་སོར་བཀའ་ཕབ་ནས་ཕྱིའི་ཇག་རྐུན་ལ་ཁ་གཡར་ནས་མི་སྲོག་གཅོད་པའི་ནག་ཉེས་བཟོ་མི་ཆོག་གསུངས་པས་རེད།

          ༡༧༨༤ ལོར་སྦྲ་ནག་ཚོ་བས་ཕྱི་ཇག་ལ་རྒོལ་ལན་དྲག་པོའི་དོན་རྐྱེན་བཟོས་པས་ཝང་ངག་དབང་ཐུགས་རྒྱལ་བཞེངས་ཏེ་ར་འཕྲིན་གྱི་གཙོས་མི་བཅོ་བརྒྱད་ལ་སྲོག་ཁྲིམས་བཅད་པར་སྐྱབས་མཆོག་འཇིགས་མེད་དབང་པོས་ངོ་ཆེན་གནང་ཡང་ཕན་མ་ཐོགས་པར་རེ་རེ་བཞིན་ཐག་པས་བཀྱིགས་ཏེ་ད་ལྟའི་གཡུ་སྒང་ཉིན་གྱི་སྒང་ཁང་ཆག་ཅེས་པར་རྩེ་ཆུའི་ནང་ལ་འཕངས། རྒྱུ་རྐྱེན་དེའི་དབང་གིས་བཤད་སྒྲུབ་ར་ལོས་རང་གི་ནུ་བོ་བསད་པའི་སྙིང་ནད་ཀྱིས་རྒྱལ་པོར་ངོ་རྒོལ་མཐར་ཐུག་བྱས་ཏེ། རང་སྡེའི་ཁྱིམ་འབངས་སུམ་བརྒྱ་ཙམ་ཁྲིད་དེ་འགུ་ལོག་ཕྱོགས་སུ་ཕྱིན་པས་ད་ལྟའི་ཨ་སྐྱོང་རྭ་ལོ་ཞེས་པའི་གཞིས་སྡེ་འདི་ཆགས། བཤད་སྒྲུབ་ལ་བུ་གཉིས་ཡོད་པའི་ཆེ་བར་ལྷ་མགོན་དང་ཆུང་བར་སྐར་མ་ཟེར། ལྷ་མགོན་ནི་སྐབས་དེར་ན་རིན་ཤི་རི་ན་ཡོད་པའི་རུ་སྡེ་བསང་གཞུང་ལ་སོང་ནས་འཇམ་དབྱངས་བཞད་པའི་ལྷ་སྡེ་བྱས་པའི་ཁྲོད་དུ་ཁོ་ཚེའི་ཁྱིམ་ཚང་འགའ་ཡོད་པ་དེའི་གཅིག་ཚང་ལ་མག་པར་བསྡད། དེ་རྗེས་ཁུ་བོའི་ཤ་ལན་རྩོད་ཆེད་ཁྲོ་ཁོ་ཆུ་ཁ་མའི་ས་ཆར་སོང་ནས་ཁྱིམ་གཞི་ཆགས་པས་ཡུལ་དེའི་མི་རྣམས་ཀྱིས་ཁོ་ཚེའི་ལྷ་མགོན་ཟེར།

          ཝང་ངག་དབང་སྐུ་གཤེགས་རྗེས། ཝང་བཀྲ་ཤིས་འབྱུང་གནས་ཀྱིས་ཕྱོགས་སོ་སོར་བང་ཆེན་དང་བཀའ་ཁྱབ་བཏང་སྟེ་སོག་སྡེ་ཁ་འཐོར་རྣམས་ཕྱིར་བསྡུས་ནས་སོ་སོའི་ཐོབ་ཐང་དང་གོ་གནས་གནང་བར་༡༨༢༠ ལོར་བཤད་སྒྲུབ་ཀྱི་བུ་ཆུང་སྐར་མ་ཡང་ཕྱིར་སྦྲ་ནག་ཚོ་བར་ཡོང། སྐར་མ་ལ་བྱིས་པ་མིང་སྲིང་ལྔ་ཡོད། སྐར་མ་ལ་སྦྲ་ནག་སྐར་སེར་ཡང་ཟེར། ཁོའི་བུ་མོ་ལྷ་མཚོ་ལ་བུ་བུ་མོ་བཞི་ཡོད། ཆེ་བ་ཐུབ་བསྟན། མགོན་པོ་མཚོ། བཀྲ་ཤིས་སྐྱབས། ཕྱུག་ཡག་མ་དང་བཞི་ཡིན།

          ཐུབ་བསྟན་ལ་བུ་གསུམ་ཡོད་པའི་ཆེ་བ་རྟ་མགྲིན་སྐྱབས་དང་ངའི་ཨ་མ་ཁོ་མོ་ལགས་གཉིས་དགའ་རོགས་ཆགས་ནས་ང་སྐྱེས། རྗེས་སུ་ལྷ་མཚོའི་བུ་མོ་མགོན་པོ་མཚོའི་བུ་བསྟན་པ་ཟེར་བ་ངའི་ཨ་མའི་མག་པར་གྱུར་པ་ནི་བདག་གི་ཕ་ཡར་མཐོ་རིས་བོ་སྦྲ་ནག་བསྟན་ཀོ་ལགས་སོ།།