བོད་ཀྱི་ཚིགས་བཅད་སྡེབ་སྦྱོར།
ཚིགས་བཅད་རྩོམ་ཡིག་ལ་ཚིག་རྐང་གི་ཚེག་བར་མང་ཉིང་ཅི་རིགས་ཡོད་པར་མ་ཟད། ཚིགས་སུ་བཅད་པ་རེ་ལ་ཚིག་རྐང་མང་ཉུང་ཡང་ཅི་རིགས་ཡོད།
དེ་བས་འདིར་ཐོག་མར་ཚིག་རྐང་རེའི་ཚེག་བར་མང་ཉུང་གི་ཆ་ནས་སྡེ་ཚན་ཆེན་པོ་གསུམ་སྟེ། ཚིག་རྐང་རེར་ཚེག་བར་ཡི་གེ་གསུམ་ཅན་ནས་དགུ་ཅན་བར་གྱི་ཚེག་བར་ཉུང་བའི་ཚགས་བཅད་རིགས་དང་།
ཚིག་རྐང་རེར་ཚེག་བར་བཅུ་ཅན་ནས་ཉེར་བདུན་ཅན་བར་གྱི་ཚེག་བར་འབྲིང་གི་ཚིགས་བཅད་རིགས།
ཚེག་བར་ཉེར་བདུན་ལྷག་གི་ཚེག་བར་མངས་པའི་ཚིགས་བཅད་རིགས་བཅས་གསུམ་མོ། ཚེག་བར་གཅིག་དང་ཡིག་འབྲུ་གཅིག་ནི་དོན་གཅིག་ཡིན།
ཚིགས་སུ་བཅད་པའི་ཚིག་རྐང་དག་གི་ཚེག་བར་ལ་ཡིག་འབྲུ་ཆ་དང་ཡའི་སྡེབ་ཚུལ་གྱི་དབྱེ་བ་མང་དུ་ཡོད་པས།
འདིར་དེ་དག་ལ་དཔེར་བརྗོད་རྩོམ་ཡིག་ལྷན་འགོད་ཀྱིས་ངོ་སྤྲོད་རྒྱས་ཙམ་བྱེད་པ་ལ། དང་པོ། ཚིག་རྐང་ཐུང་བའི་ཚིགས་བཅད་རིགས།
ཀ༽ ཚེག་བར་གསུམ་མམ་ཡིག་འབྲུ་གསུམ་ཅན། ཆ་ཡ་ཅན། དཔེར་ན། བོད་ཀྱི་ མི།
ལྟ་བུ་སྟེ།
ཤར་ཕྱོགས་ཀྱི།། རི་རྩེ་ནས།། དཀར་གསལ་གྱི།། ཟླ་བ་ཤར།།
མ་སྐྱེས་ཀྱི།། ཨ་མའི་ཞལ།། ཡིད་ལ་ནི།། འཁོར་འཁོར་བྱུང་།
ཁ༽ ཚེག་བར་བཞིའི་ཚིགས་བཅད། ཆ་ཟུང་ཅན། དཔེར་ན། བོད་ཀྱི་ སྐད་ཡིག
ལྟ་བུ་སྟེ།
ཤར་ཕྱོགས་རི་རྩེར།། ཟླ་བ་ཤར་དུས།། མ་སྐྱེས་ཨ་མའི།། ཞལ་རས་དྲན་བྱུང་།། ལྟ་བུའོ།།
ག༽ ཚེག་བར་ལྔ་ཅན་གྱི་ཚིགས་བཅད།
འདི་ལ་རིགས་གཉིས།
༡༽ ཆ་ཟུང་ཡ་ཅན། དཔེར་ན། བོད་ཡུལ་ ཆོལ་ཁ་ གསུམ། ལྟ་བུ་སྟེ།
ཤར་གྱི་རི་རྩེ་ནས།། དཀར་གསལ་ཟླ་བ་ཤར།། མ་སྐྱེས་ཨ་མའི་ཞལ།། ཡིད་ལ་འཁོར་འཁོར་བྱུང་།།ལྟ་བུཨོ།།
༢༽ ཡ་ཆ་ཟུང་ཅན། དཔེར་ན། བོད་ ཆོལ་ཁ་ གསུམ་པོ། ལྟ་བུ་སྟེ།
ཤར་རི་བོའི་རྩེ་ནས།། དུང་ཟླ་བ་ཤར་བྱུང་།། ངའི་མ་སྐྱེས་ཨ་མའི།། ཞལ་ཡིད་ལ་འཁོར་བྱུང་།། ལྟ་བུའོ།།
ང༽ ཚེག་བར་དྲུག་ཅན་གྱི་ཚིགས་བཅད། རིགས་གཉིས།
༡༽ ཆ་གསུམ་ཅན། དཔེར་ན།
ཤར་ཕྱོགས་རི་བོའི་རྩེ་ནས།།
དཀར་གསལ་ཟླ་བ་ཤར་བྱུང་།།
མ་སྐྱེས་ཨ་མའི་ཞལ་རས།།
ཡིད་ལ་འཁོར་འཁོར་བྱས་བྱུང་། ལྟ་བུའོ།།
ཡང་ན།
ན་ནིང་བྱི་བའི་ལོ་ལ།།
མི་སྲོག་མང་པོ་ཤོར་སོང་།།
ད་ལོ་གླང་གི་ལོ་ལ།།
ནད་མེད་བདེ་སྐྱིད་ལྡན་ཤོག། ལྟ་བུ་སོགས། བོད་ལ་གཞས་ཚིགས་འདི་རིགས་ཧ་ཅང་མང།
༢༽ ཆ་ཡ་དང་ཆ་ཡ་ཅན། དཔེར་ན། འཛམ་གླིང་ ལ་ ཞི་བདེ་ མཁོ།། ལྟ་བུ་སྟེ།
ཤར་ཕྱོགས་ཀྱི་རི་རྩེ་ནས།། དཀར་གསལ་གྱི་ཟླ་བ་ཤར།།
མ་སྐྱེས་པའི་ཨ་མ་ཡི།། ཞལ་རས་ནི་ཡིད་ལ་འཁོར།། ལྟ་བུའོ།།
ཅ༽ ཚེག་བར་བདུན་མའི་ཚིགས་བཅད།
༡༽ ཆ་གསུམ་ཡ་ཅན། དཔེར་ན།
ཤར་ཕྱོགས་རི་བོའི་རྩེ་མོ་ ནས། །དཀར་གསལ་ཟླ་བ་ཤར་བའི་ དུས། །མ་སྐྱེས་ཨ་མའི་ཞལ་རས་དེ། །ཡིད་ལ་ཝ་ལེར་འཁོར་ཡོང་ངོ།།
ཡང་ན།
ལུས་ལ་ནད་མེད་འཕྲོད་བསྟེན་བཟང་། །ཡིད་ལ་སྡུག་མེད་སྣང་བ་སྐྱིད། །བྱ་བ་ལམ་འགྲོ་ཀུན་ལ་ཕན། །བདེ་སྐྱིད་ལྡན་པའི་མི་ཚེ་ཡིན།།
༢༽ ཆ་ཟུང་ཡ་ཆ་ཅན། འདིའི་ཡ་དེ་ཚིག་ཕྲད་ཡིན། དཔེར་ན།
ཤར་ཕྱོགས་རི་བོ་ ཡི་ རྩེ་ནས། །དཀར་གསལ་ཟླ་བ་ དེ་ ཤར་དུས། །མ་སྐྱེས་ཨ་མ་ ཡི་ ཞལ་རས། །ཡིད་ལ་འཁོར་འཁོར་ནི་བྱས་བྱུང་། །
ཡང་ན།
བདག་ནི་མི་ཡུལ་ལ་འཁྱམས་ཏེ། །མི་ལོ་སུམ་ཅུ་ནི་ཕྱིན་སོང་། །ཕ་ཡུལ་དྲན་གདུང་གི་སྐྱོ་གཞས། །ཁུ་བྱུག་སྔོན་མོ་ལ་བསྐུར་ཡོད། །
༣༽ ཆ་ཡ་ཆ་ཟུང་ཅན། འདིའི་ཡ་ཡང་ཚིག་ཕྲད་མང་། དཔེར་ན།
ཤར་ཕྱོགས་ ཀྱི་ རི་བོའི་རྩེ་ནས། །དཀར་གསལ་གྱི་ཟླ་བ་ཤར་དུས། །མ་སྐྱེས་པའི་ཨ་མའི་ཞལ་རས། །བདག་ཡིད་ལ་ཝ་ལེར་འཁོར་ཡོང་།།
ཡང་ན།
མི་ཚེ་ ཡི་ ཉིན་མོ་རེ་རེ། །རྒྱ་མཚོ་ ཡི་ རླབས་ཕྲེང་བཞིན་དུ། །མི་སྡོད་པར་འཆི་བར་ཉེ་བ། །བསམས་ན་ནི་དབུགས་རིང་ཤོར་འགྲོ །
༤༽ ཡ་ཆ་གསུམ་ཅན། དཔེར་ན།
ཤར་ རི་རབ་མཐོན་པོའི་རྩེ་ནས། དུང་ཟླ་བ་ཤར་ཐེངས་རེ་ལ། །ངའི་མ་སྐྱེས་ཨ་མའི་ཞལ་རས། །ཡིད་འདི་ལ་ཡང་ཡང་འཁོར་ཡོང་།།
ཡང་ན།
བོད་གངས་ཅན་ས་གཙང་ཆུ་གཙང་། །ཆོས་མ་ཎིའི་དར་ལྕོག་ལྷབ་ལྷུབ། །མི་རྒན་གཞོན་ཆོས་དད་ཆེན་པོ། །སེམས་བག་ཡངས་འཛུམ་མདངས་ཤིག་ཤིག །
ཆ་གསུམ་ཡ་ཅན་གྱི་ཚིགས་བཅད།
དེར་ལྷ་གཅིག་གིས་ཡབ་ལ་ཕྱག་བཙལ་ཏེ་གསོལ་བར།
"ཡབ་གཅིག་རྒྱལ་པོས་བཀའ་གནང་ངམ། །
ཨ་མ་ཡུམ་གྱིས་གནང་ལགས་སམ། །
ཇོ་ཇོ་མིང་པོས་ཚིག་ཤོར་རམ། །
ཨེ་མ་སྲིད་པ་ངོ་མཚར་ཆེ། །
བོད་ཀྱི་ཡུལ་དེར་བདག་བཏང་ན། །
ཁ་བ་ཅན་གྱི་ཡུལ་ཕྱོགས་དེར། །
བསིལ་ཞིང་གྲང་ལ་ས་བབ་མཐོ། །
གངས་རི་གཅན་གཟན་ཆེས་མང་བ། །
ག་རི་འབྲོང་གི་རྭ་དང་འདྲ། །
འབྲུ་སྣ་མི་སྐྱེས་མུ་གེའི་གནས། །
གདོལ་པ་ཤ་ཟ་སྲིན་པོའི་རིགས། །
སྤྱོད་པ་རྩིངས་པ་ཀླ་ཀློའི་མིང་། །
མཐའ་འཁོབ་སངས་རྒྱས་ཞབས་མི་བཅག །"ཅེས་ཞུས།
ཆ་བཞི་ཡ་ཅན་གྱི་ཚིགས་བཅད།
རྒྱལ་རབས་གསལ་བའི་མེ་ལོང་ལས།
བལ་པོའི་རྒྱལ་པོས་སྲས་མོ་ཁྲི་བཙུན་ལ་འདི་སྐད་དུ།
"ང་ཡི་སྙིང་ནས་བརྩེ་བའི་ལྷ་གཅིག་ཁྱོད། །
རྣ་བ་མ་གཡེང་ཡབ་ཀྱི་ངག་འདིར་ཉོན། །
བོད་རྗེ་སྤྲུལ་པའི་རྒྱལ་པོ་སྲོང་བཙན་དེའི། །
གཏན་གྱི་འདུན་མར་ཁྱོད་ཉིད་འགྲོ་བར་རིགས། །"
ཞེས་གསུངས་པ་དང་ཡབ་ཀྱི་དྲུང་དུ་པུས་མོ་ས་ལ་བཙུགས་ནས།
"བརྩེ་བའི་ཡབ་གཅིག་བུ་མོ་བདག་ལ་གསོན། །
ཁ་བ་ཅན་དེ་ཆོས་མེད་གྲང་ངར་ཆེ། །
ཡབ་ཡུམ་སྤུན་མཆེད་བྲལ་བས་སེམས་པ་སྐྱོ། །
དེ་འདྲའི་ཡུལ་དུ་བུ་མོ་དགོངས་པ་ཞུ། །"
ཞེས་ཞུས་པ་དང་ཡབ་རྗེས་སླར་ཡང་ལྷ་གཅིག་ལ།
"བུ་མོ་ཁ་བ་ཅན་དུ་མ་ཕྱིན་ན། །
བོད་ཀྱི་རྒྱལ་པོ་ལྷ་ཡི་སྤྲུལ་པ་ཡིན། །
ཁོ་ཡིས་དམག་དྲངས་ང་བསད་རྒྱལ་ཁམས་བཅོམ། །
བུ་མོ་ཁྱོད་ཀྱང་དབང་མེད་འཕྲོག་པར་ངེས། །"
ལྷ་གཅིག་ཁྲི་བཙུན་དེས་སླར་ཡང་འདི་སྐད་དུ།
"ཀྱེ་མ་ཡབ་གཅིག་རྒྱལ་པོ་བདག་ལ་གསོན། །
བོད་དེ་གདོལ་རིགས་མཆོད་པའི་རྟེན་སོགས་མེད། །
ཡབ་ཀྱི་མཆོད་གནས་ཤཱཀྱ་མུ་ནེ་དང་། །
རིན་ཆེན་བང་མཛོད་བདག་ལ་གནང་དུ་གསོལ། །"
ཡབ་ཀྱིས་ཞེས་ཞལ་གྱིས་བཞེས་ཏེ།
"བུ་མོ་ཁ་བ་ཅན་དུ་ཕྱིན་ནས་ཀྱང་། །
ལྟ་སྤྱོད་གཙང་ཞིང་ཆོས་ལ་དད་པ་མཛོད། །
གྲོགས་ལ་གུས་ཞེན་འབངས་ལ་བྱམས་སྐྱོང་དང་། །
ལུས་འཚག་དམ་ཞིང་ལོངས་སྤྱོད་ཤེས་པར་གྱིས། །"ཞེས་གསུངས་སོ།།
ཆོས་རྒྱལ་སྲོང་བཙན་སྒམ་པོས།
"ཨེ་མ་གསོན་དང་ལྷ་གཅིག་ཀོང་ཇོ་སྲས།
།
ཕེབས་ལམ་ཕྱོགས་ལ་འོ་བརྒྱལ་མ་བྱུང་ངམ། །
ལྷ་གཅིག་ཇོ་བོ་དང་བཅས་སྐུ་འཁོར་རྣམས། །
ལམ་འཕྲང་ཆུ་གསུམ་ཇི་ལྟར་བྱས་ཏེ་བརྒལ། །
བར་ཆད་མེད་པར་བོད་དུ་བྱོན་པ་ནི། །"
རྣམ་གཉིས་མཐུ་དཔལ་ཆེ་བས་ངོ་མཚར་ཆེ། ། ཞེས་གསུངས་པ་དང་དེའི་ལན་དུ་ལྷ་གཅིག་ཀོང་ཇོས་འདི་སྐད་ཅེས་གསོལ་ལོ། །
"ཇོ་བོ་ཆེན་པོ་ཤིང་རྟའི་སྟེང་དུ་བཞུགས། །
ལྷ་དགའ་ཀླུ་དགས་ཤིང་རྟ་དྲངས་ནས་འོངས། །
རྒྱ་ཆུ་གྲུས་བཅད་ལྗོན་ཤིང་གཡོན་དུ་བསྒྱེལ། །
སྨག་རུམ་མུན་དུ་ལམ་སྟོན་སྒྲོན་མེ་བཏེག །
ས་ཐག་རིང་ཡང་ཐབས་ཀྱིས་བགྲོད་ནས་འོངས། །
བོད་དུ་བདེ་སྐྱིད་ཕུན་སུམ་ཚོགས་པར་ཤོག །"ཅེས་ཞུས་སོ། །
དབྱངས་ཅན་སྒྱུ་འཕྲུལ་དྲ་བ།
ཆབ་བྲག་ཕོ་ཉ
