ཁ་བཏགས་ཤིག

 

 

རྒན་ཆབ་བྲག་ཕོ་ཉའི་སྐྱེས་སྐར་ལ།

 

 

ཤེད་བུ།

 

 

 

 

 

 

 

 

ཇི་ལྟར་འདྲིས་ཤིང་གཤིབས་ན་དེ་ལྟར་སྙིང་ལ་ཉེ་བའི། །

ཁྱོད་ཀྱི་སྙིང་ཁར་གྲི་རིང་འདོམ་པ་གང་བརྡབས་ན་ཡང་། །

འོ་མ་ཟེའུ་ཏོ་གང་འཕྱོ་བར་ང་ལ་ཡིད་ཆེས་ཡོད། །

ཀྱེ་ངས་བཀུར་བར་འོས་པའི་མི་ཁྱེད་དེ་རིང་སྐྱེས་སམ། །

 

སྙན་ངག་གི་ཐད་ནས་ཀྱང་མཐུན་སྣང་བ་མེད་པའི་ཁྱེད།  །

གྱེན་ལ་གཤགས་ཤིང་ཐད་ཀར་འཐགས་ཀྱང་ཀ་ཡི་རུས་པ།  །

ཀ་ཡི་ཤ་ཀ་ཡི་ཁྲག་ལ་ཐུག་པའི་ཡིད་ཆེས་ཡོད། །

ཁྱེད་ཀྱི་སྐྱེས་སྐར་མི་བསུ་སུ་ཡི་སྐྱེས་སྐར་བསུ་ཨང་། །

 

ཁྱེད་དང་ལྷན་དུ་ཆང་འཐུང་བ་ནི་སྙན་ངག་དང་བོད།  །

གངས་རིའི་ཁོང་གསེང་ནས་སྔོག་པ་དང་ཀུན་ནས་འདྲ་བར། །

ཁུ་ཚུར་གཡུགས་ཀྱང་གངས་རི་ལ་སྙིང་ཁ་སྦྱར་བ་འདྲ། །

ཀྱེ་ས་མཐའི་གངས་རི་ཀ་ཁ་ག་ངའི་ནང་ཁྲོལ་ཅན། །

 

ལྷག་བསམ་གྱི་གོ་དོན་མི་ཤེས་པའི་ལྷག་བསམ་ཅན་ཁྱོད། །

དོན་ཆེན་གནད་ལ་དཔྱད་དུས་ཤེས་རབ་ཀྱི་རྣོ་ཡོད་ལ། །

རིགས་ཀྱི་ཞེན་པ་སྔོག་ན་གཞན་ཕན་གྱི་རྐང་ཡང་ཡོད། །

ཕྱོགས་སྣེ་གང་ནས་བསམ་ཡང་གྲོགས་རྒན་ཁྱོད་རྩིས་ཆེན་ཡིན། །

 

ཁ་བཤད་ཀྱིས་གངས་རི་བཞེངས་པའི་ལབ་རྐྱལ་ཚོའི་ཁྲོད་དུ། །

ཁྱི་འུར་གྱིས་གནམ་ས་བཀད་པའི་སྐྱ་བྷ་ཚོའི་ནང་ན། །

འདམ་ལས་སྐྱེས་ཀྱང་འདམ་གྱིས་མ་གོས་པའི་པད་མ་བཞིན། །

ཁྱོད་ནི་ངའི་ནང་སེམས་ནས་ཁས་ལེན་ཐོབ་པ་དེ་ཡིན། །

 

དེ་རིང་དབྱངས་ཅན་སྤྲུལ་བའི་མི་ཞིག་འཁྲུངས་སོང་མི་ཟེར། །

དེ་རིང་དབྱུག་པ་ཅན་གྱི་བརྡ་སྤྲོད་རྒས་སོང་མི་ཟེར། །

དེ་རིང་རང་སེམས་ཀྱི་རྩིས་ཐང་དཔང་པོ་ལ་བཞག་ནས། །

དེ་རིང་ཁ་བཏགས་ཤིག་གྲོགས་ཁྱོད་སྐྱེས་སྐར་ལ་མངགས་ཡོད།  །

 

 

༢༠༢༠ ། ༡༠ ། ༡༠ ཉིན།