༄༅།།གཞོན་ནུ་དྲུག་གི་རྟོགས་པ་བརྗོད་པའི་

འགྲེལ་ཆུང་དོན་བསྡུས།

 

༑རྒྱལ་སྲིད་འདོད་རྒུའི་དཔག་བསམ་རིང་དུ་དོར།

།རྒྱལ་སྲས་ལམ་བཟང་དཀའ་ཐུབ་དང་བས་བཞེས།

།རྒྱལ་བའི་གོ་འཕང་རབ་བརྙེས་བདུད་རྩིའི་འོད།

།མུན་པའི་གཤེད་དུ་སྤྲོས་པ་གང་དེས་སྐྱོངས།

 

།རྒྱན་བཟང་གོས་ཀྱི་ཁུགས་པ་ན།

།དོན་བཟང་རིན་ཆེན་ཕྲེང་བསྒྲིགས་པ།

།འགྲེལ་བཟང་ལོངས་སུ་སྤྱོད་པ་ལ།

།ཤེས་རབ་ལྷ་ཡིས་གནང་བ་སྩོལ།

 

          སྙན་དངགས་ལ་འཇུག་པའི་ལས་དང་པོ་བ་ཚོའི་བགོ་སྐལ་དུ་དམིགས་ཏེ། ཚིག་དོན་མདོར་བསྡུས་ཤིང༌། ཚིག་རྒྱན་ངོ་སྤྲོད་ཙམ་གཙོ་བོར་བྱས་ཏེ་བཀྲལ་བའོ།

 

          འདི་འཆད་པ་ལ་སྙན་དངགས་ཆེན་པོའི་སྒོ་དང༌། གཞུང་དོན་གཉིས། དང་པོ་ལ་ཡང༌། རྩོམ་གྱི་མཚན་བྱང་དང༌། ཕྱག་འཚལ་ཤིས་བརྗོད། དངོས་པོ་ངེས་བསྟན། བློ་ལྡན་ཉན་སྐུལ་བཅས་ལྔའོ།

 

༼༄༅། །རྒྱ་གར་སྐད་དུ། ཥྜྲཀུམཱརཱཨབཱདྷན།

བོད་སྐད་དུ། གཞོན་ནུ་དྲུག་གི་རྟོགས་པ་བརྗོད་པ།༽

 

          དེ་ལྟར་མཚན་བྱང་ལ་ཧིན་བོད་སྐད་གཉིས་ཤན་སྦྱར་བ་གནང་སྲོལ་འདིར། གང་ནས་བསྒྱུར་བའི་ཁུངས་སྟོན་པ་དང་ཡང་ན་རྟེན་འབྲེལ་གྱི་མཚོན་བྱེད་ཙམ་གཉིས་ཡོད་པ་ལས་འདིར་ནི་ཕྱི་མའོ།

          འདི་ནི་རྣམ་ཐར་རྟོགས་བརྗོད་ངོ་མ་ཞིག་མིན་པར། ཉོན་མོངས་དུག་གསུམ་དང་དེའི་གཉེན་པོ་གསུམ་བཅས་ཀྱི་མཚོན་བྱེད་དུ་གཞོན་ནུ་སྤུན་དྲུག་བཀོད་དེ་འཁོར་བའི་ཉེས་དམིགས་དང་ཐར་བའི་ལམ་ལ་འཇུག་ཚུལ་གྱི་རྣམ་གཞག་སྒྲུང་གི་ཚུལ་གྱིས་མཚོན་པའི་མཚོན་བྱེད་ཅན་དང་འཆར་ཡན་ཅན་ཟུང་འབྲེལ་གྱི་རྟོགས་བརྗོད་སྙན་དངགས་བཟང་པོ་ཞིག་ལགས་སོ།

          ༼༢།ཐམས་ཅད་མཁྱེན་པ་ལ་ཕྱག་འཚལ་ལོ།༽

          འོག་ནས་བརྗོད་པར་བྱ་བ་ནང་པའི་བསྟན་པ་ཡིན་ལ། དེ་བས་ཐོག་མར་བསྟན་པའི་བདག་པོ་སྟོན་པ་ཤཱཀྱ་ཐུབ་པའམ། ཆོས་དོན་ཉམས་སུ་བླངས་པའི་འབྲས་བུ་མཐར་ཐུག་རྣམ་མཁྱེན་ལ་ཕྱག་འཚལ་བའོ། སླར་ཡང་ཚིགས་སུ་བཅད་དེ་ཤིས་པ་བརྗོད་པ་ནི།

          ༼༡གང་ཞིག་སེར་སྐྱར་འཁོར་ལོས་བསྒྱུར་བའི་རིགས་འཁྲུངས་༢གླིང་བཞིའི་རྒྱལ་སྲིད་རྩྭ་བཞིན་དོར་ནས་༣དཀའ་ཐུབ་སྤྱད། །༤ཤིང་མཆོག་དྲུང་དུ་གཅིག་པུས་བདུད་དཔུང་ཀུན་བཅོམ་༥རྙེད་དཀའི་བྱང་ཆུབ་བླ་མེད་དམ་པའི་བདུད་རྩི་བརྙེས། །༦འགྲོ་འདི་ཐེག་གསུམ་ལམ་ལ་རབ་དྲངས་ཉིད་མཚུངས་འགོད་ཕྱིར་ལྟ་ངན་ཀུན་བསལ་འཁོར་ལོ་རྒྱ་ཆེན་བསྐོར། །༧མཛད་པ་མཐའ་དག་རྫོགས་སླད་སཱ་ལའི་ཚལ་དུ་ཞི་བར་རབ་ཞུགས་རྒྱལ་བའི་དབང་པོས་ཁྱེད་ལ་སྲུངས། །༽

          མཆན། ༡ སྐུ་བལྟམས་པའི་ཤུགས་ལས་ལྷུམས་སུ་ཞུགས་པའི་མཛད་པ་གོ་བར་བྱ། ༢ བཙུན་མོས་འཁོར་གྱིས་རོལ་ཞིང་རྒྱལ་སྲིད་བསྐྱངས་པ་དང་དེ་ལས་ངེས་པར་འབྱུང་བ་གཉིས། ༣ སྔོན་ལ་རབ་ཏུ་བྱུང་བའང༌། ༤ བདུད་སྡེ་བཏུལ་བ། ༥ སངས་རྒྱས་པ། ༦ ཆོས་འཁོར་བསྐོར་བ། ༧ མྱ་ངན་ལས་འདས་པ་སྟེ་མདོར་ན། གཤེགས་དང་བལྟམས་དང་རོལ་བ་དང༌། ཁབ་ནས་འབྱུང་དང་དཀའ་བ་སྤྱད། །བྱང་ཆུབ་ཆེ་དང་བདུད་སྡེ་འཇོམས། །ཆོས་ཀྱི་འཁོར་ལོ་སྐོར་བ་དང། །ལྷ་རྣམས་ཀུན་གྱིས་ཞུས་པ་དང༌། །དེ་བཞིན་དུ་ནི་མྱ་ངན་ལས། །འདས་པ་སྟོན་པར་མཛད་པ་ཡིན། །ཞེས་གསུངས་པ་བཞིན་སྟོན་པའི་མཛད་པ་བཅུ་གཉིས་གྱི་སྒོ་ནས་ཤིས་པ་བརྗོད་པ་སྟེ། དེ་ཡང༌། རྩོམ་པ་པོའི་དགོངས་དོན་སྐྱེ་བོ་རྣམས་འཁོར་བ་ལས་ཐར་བའི་ལམ་དུ་འགོད་པའི་དགོས་དམིགས་དང་མཐུན་པར་ཐོག་མར་སྟོན་པ་མཆོག་གིས་ཚུལ་ཇི་ལྟར་བྱང་ཆུབ་གྱི་ལམ་ལ་ཞུགས་པའི་རྣམ་པར་ཐར་པའི་ལམ་སྟོན་དང་བཅས་པའོ། འདི་ནི་བྱ་བ་རང་བཞིན་བརྗོད་པའི་ཤིས་བརྗོད་རྒྱན་ནོ།

          དེ་ལྟར་ཕྱག་འཚལ་ལམ། མཆོད་བརྗོད། ཤིས་བརྗོད་དག་ནི་དགོས་པ་དང་བཅས་པའི་ཡ་རབས་ཀྱི་རྩོམ་སྲོལ་བཟང་པོ་ཞིག་གོ །

 

          ༼༡གང་གི་རྣ་བར་བདུད་རྩིའི་ཟེགས་མ་སྤྲོ་བྱེད་༢མཛེས་སྡུག་རི་མོས་མིག་ནི་ཀུན་དགའ་བསྐྱེད། །༣གང་ཞིག་ཀློག་པའི་ལྕེ་ཡང་སྐལ་བཟང་ལྡན་འགྱུར་༤དོན་སྤྱོད་ཡིད་ལ་རེ་བའི་འབྲས་བུ་སྟེར། །༥ཤེས་ལྡན་བློ་ཡི་བང་མཛོད་རབ་ཏུ་རྒྱས་བྱེད༦་མི་ཤེསསྐྱེ་བོའི་རྨོངས་པ་འཕྲོག་བྱེད་པ། །༧རྨད་བྱུང་དོན་ལྡན་སྙན་དངགས་རྒྱ་ཆེའི་གཏམ་འདི་༨མཁས་པའི་མདུན་སར་ཤིན་ཏུ་བསྔགས་པར་འོས། །༽

          ཞེས་པ་སྟེ། ༡ སྐལ་ལྡན་ཉན་མཁན་གང་གི་རྣ་བར་བརྗོད་བྱ་དང་རྗོད་བྱེད་གཉིས་ཀྱི་ཆ་ནས་སྙན་པ། ༢ དེ་ཡང་ཡི་གེའི་རི་མོར་བཀོད་པའི་སྒྱུ་རྩལ་སྣང་བརྙན་གྱིས་ཀློག་མཁན་གང་དག་གི་མིག་ལའང་མཛེས་པ་སྟེར་ནུས་པ། ༣ ཐ་ན་འདི་ཉིད་ཀློག་པ་པོ་རང་གི་ལྕེ་ཡང་དོན་དང་ལྡན་པ་སྟེ། གསུང་རབ་ཀྱི་སྙིང་བོ་ཅན་ཡིན་པས་དགེ་བ་ཡོད་པའོ། ༤ ཇི་ལྟར་གདམས་པ་བཞིན་གྱི་དོན་བཞིན་སྤྱོད་པ་དག་གི་ཡིད་ལ་འདོད་པའི་འབྲས་བུ་མཆོག་སྟེར་བ། ༥ ཐོས་བསམ་ཤེས་ལྡན་ཅན་དག་གི་བློ་གྲོས་ལྷག་པར་རྒྱས་པར་བྱེད་པ་དང། ༦ དགེ་སྡིག་སོགས་ལ་རྨོངས་པ་རྣམས་ཀྱང་བླང་དོར་གྱི་ལམ་ལ་འགོད་པ། ༧ དེ་ལྟ་བུའི་ཡོན་ཏན་རྨད་བྱུང་ངམ་རྒྱལ་སྲས་སྤྱོད་པའི་དམ་ཆོས་དོན་ལྡན་གྱི་སྲོག་གམ་དགོངས་པ་དང་ལྡན་པའི་བརྗོད་བྱ་རྒྱ་ཆེ་བའི་གཏམ་གཞོན་ནུ་དྲུག་གི་རྟོགས་པ་བརྗོད་པའི་བཅད་ལྷུག་སྤེལ་མའི་སྙན་དངགས་འདི་ལྟ་བུ། ༨ ནང་དོན་རིག་པ་དང་སྙན་དངགས་སྨྲ་བའི་མཁས་པ་དག་རབ་ཏུ་དགྱེས་ཤིང་བསྔགས་པར་འོས་པའི་གཞི་ཉིད་དོ།

          ཞེས་སྟོན་པའི་གསུང་གི་སྙིང་པོ་ཅན་གྱི་སྙན་དངགས་ཀྱི་ཆེ་བ་བརྗོད་ཅིང་བརྗོད་བྱའི་དངོས་པོ་ངེས་པར་བསྟན་པ་དང་ལྷན་རང་ལའང་སྤོབས་པ་བསྐྱེད་པ་གོ་བར་བྱའོ། །

 

          ༼འཁོར་བ་པ་རྣམས་ནི་སྡུག་བསྔལ་དཔག་ཏུ་མེད་པའི་འབྱུང་གནས་ཉོན་མོངས་དུག་གསུམ་རྒྱས་པའི་རང་བཞིན་ཅན་ཡིན་མོད་ཀྱང༌། དེ་བཞིན་གཤེགས་པའི་སྙིང་བོ་རྒྱས་པར་འགྱུར་བའི་རིགས་དད་པ་དང་སྙིང་རྗེ་ཤེས་རབ་མཆོག་དང་ལྡན་པ་དག་ཐེག་པ་ཆེན་པོའི་ལམ་འདིར་ཕ་རོལ་ཏུ་ཕྱིན་པ་དྲུག་ལ་སྤྱད་པས་བླ་ན་མེད་པའི་བྱང་ཆུབ་ཀྱང་རྙེད་པར་དཀའ་བ་མ་ཡིན་ནོ། །དེའི་ཕྱིར་བྱང་ཆུབ་སེམས་དཔའི་སྤྱོད་པ་རྨད་དུ་བྱུང་བ་ལ་ཡོངས་སུ་བསླབ་པར་བྱའོ། །༽

          ཚིག་དོན་ཅུང་ཟད་གསལ་བར་བཏང་ན། ལས་དང་ཉོན་མོངས་པའི་དབང་གིས་འགྲོ་བ་རིགས་དྲུག་ཏུ་རྒྱུན་མི་འཆད་པར་སྐྱེས་ཏེ། དེ་ལས་མི་ཐར་བར་ཡང་དང་ཡང་དུ་འཁོར་བར་འགྱུར་པའི་འཁོར་བ་པའམ་འཇིག་རྟེན་པའི་ཟག་བཅས་ཕུང་བོ་འདི་ནི། འགྱུར་བའི་སྡུག་བསྔལ་གྱི་རིགས་སུ་གྱུར་བས་གདུང་བ་དང༌། སྡུག་བསྔལ་གྱི་སྡུག་བསྔལ་གྱི་རིགས་སུ་གྱུར་བས་མནར་བ། ཁྱབ་པ་འདུ་བྱེདཀྱི་སྡུག་བསྔལ་གྱིས་ཡོངས་སུ་མི་གཏོང་བའི་སྡུག་བསྔལ་དཔག་ཏུ་མེད་པ་འབྱུང་བའི་གནས་དང༌། འདོད་ཆགས་ཞེ་སྡང་གཏི་མུག་གི་ཉོན་མོངས་དུག་ཆེན་གསུམ་པོ་རབ་ཏུ་རྒྱས་པར་འགྱུར་བའི་རང་བཞིན་ཅན་ཡིན་མོད་ཀྱང༌། སེམས་ཅན་ཐམསཅད་ལ་འཚང་རྒྱ་བའི་གཞི་ཁམས་བདེ་གཤེགས་སྙིང་པོ་ཞེས་པ་ཡོད་དེ། དེ་བཞིན་གཤེགས་པའི་སྙིང་པོའི་མདོར། རིགས་ཀྱི་བུ་དག་འདི་ནི་ཆོས་རྣམས་ཀྱི་ཆོས་ཉིད་དེ། དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང༌། སེམས་ཅན་འདི་དག་ནི་རྟག་ཏུ་དེ་བཞིན་གཤེགས་པའི་སྙིང་པོ་ཅན་ཡིན་ནོ། ཞེས་དང༌། ལང་ཀར་གཤེགས་པའི་མདོར། སེམས་ནི་རང་བཞིན་འོད་གསལ་ཏེ། དེ་བཞིན་གཤེགས་པའི་སྙིང་བོ་དགེ །ཞེས་གདོད་ནས་དག་པའི་གཉུག་མའི་སེམས་རང་བཞིན་འོད་གསལ་དགེ་བའི་རང་བཞིན། རྟག་པ་དང༌། ཡང་དག་པ་དང༌། བདེན་པ་དང༌། དགེ་བ་དང༌། རྣམ་པར་དག་པ་དང༌། མཐོང་བ་བཅས་དངོས་པོ་དྲུག་གི་བདག་ཉིད་ཅན་དུ་གནས་ཤིང་སེམས་ཅན་ཐམས་ཅད་ཀྱི་རྒྱུད་ལ་ཁྱབ་པའི་ཆོས་རྣམས་ཀྱི་ཆོས་ཉིད་དོན་དམ་བདེན་པའམ་ཀུན་གཞིའི་རྣམ་ཤེས་ལ་གོ དེ་ལའང་གཉིས་ཏེ། རྒྱུད་བླ་མར། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང༌། །ཡང་དག་བླངས་པ་མཆོག་ཉིད་དོ། །རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་ཡིན། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་པ་དང༌། མདོ་སྡེ་རྒྱན་དུའང༌། རང་བཞིན་དང་ནི་རྒྱས་པ་དང༌། དེ་ནི་རྟེན་དང་བརྟེན་པ་དང༌། ཞེས་དང༌། ཀུན་མཁྱེན་དོལ་པོས། ཆོས་ཉིད་རྣམ་པར་མི་རྟོག་ཅིང་འོད་གསལ་བའི་དབྱིངས་གང་ཡིན་པ་དེ་ནི་རང་བཞིན་གྱི་རིགས་སོ། དེ་ལ་བརྟེན་པ་རྒྱས་པའི་རིགས་ནི་ཐར་བའི་ས་བོན་ཐེབས་ཤིང་བརྟས་པ་ལས་དགེ་བ་ཁྱད་པར་ཅན་ཡང་དག་པར་བླངས་པ་སྟེ། དེ་བཞིན་གཤེགས་པའི་གཟུགས་ཀྱི་སྐུ་སྐྱེད་པར་བྱེད་པའོ། ཞེས་གསུངས། ཡང་དཔལ་ཀྱེ་རྡོ་རྗེར། སེམས་ཅན་རྣམས་ནི་སངས་རྒྱས་ཉིད། འོན་ཀྱང་གློ་བུར་དྲི་མས་བསྒྲིབས། དེ་ཉིད་བསལ་ན་སངས་རྒྱས་ཉིད། ཅེས་གསུངས་པ་ལྟར་རང་བཞིན་འོད་གསལ་ཤེལ་དཀར་ལྟ་བུ་དེ་ལ་གློ་བུར་ཉོན་མོངས་པའི་དྲི་མས་བསྒྲིབས་ཡོད་པས་དེ་ཉིད་བསལ་བའི་ཕྱིར་དུ། བརྟེན་པ་རྒྱས་པར་འགྱུར་བའི་རིགས་དེ་ཉིད་སྔོན་གོམས་དགེ་རྩ་ཅན་ནམ་ཤེས་པའི་མོས་གུས་དད་པ་དང་ལྡན་ཞིང་འགྲོ་ལ་སྙིང་རྗེ་ངང་གིས་སྐྱེ་བ། རྟེན་འབྱུང་སྟོང་བའི་རང་བཞིན་ལ་རྣམ་པར་དཔྱོད་པའི་ཤེས་རབ་མཆོག་དང་ལྡན་པའི་སྐྱེས་བུ་མཆོག་དག ཆེ་བ་བདུན་ལྡན་གྱི་ཐེག་པ་ཆེན་པོའི་ལམ་འདིར་སྦྱིན་པ་དང་ཚུལ་ཁྲིམས་དང་བཟོད་པ་དང་བརྩོན་འགྲུས་དང་བསམ་གཏན་དང་ཤེས་རབ་བཅས་ཕ་རོལ་ཏུ་ཕྱིན་པ་དྲུག་པོ་རེ་རེར་ཡང་ཐབས་ཤེས་ཟུང་ལྡན་དུ་ལེགས་པར་སྤྱད་པས་བླ་ན་མེད་པའི་བྱང་ཆུབ་ཀྱི་གོ་འཕང་མཆོག་ཀྱང་རྙེད་པར་དཀའ་བ་མ་ཡིན་ནོ། དགོས་པ་ཆེན་པོ་དེའི་ཕྱིར་བྱང་ཆུབ་སེམས་དཔའི་སྤྱོད་པ་ཡོན་ཏན་རྨད་དུ་བྱུང་བ་ལ་བརྩོན་པ་ཆེན་པོས་ཡོངས་སུ་བསླབ་པར་བྱའོ། །

          ཞེས་པ་སྟེ། གོང་གི་བརྗོད་སྙིང་སླར་ཡང་གསལ་བར་བྱས་ནས་སྐལ་བཟང་བློ་དང་ལྡན་པ་རྣམས་ལ་རབ་ཏུ་མཉན་པར་བསྐུལ་བ་སྟེ། རྟོགས་བརྗོད་འདི་ཉིད་མཛད་པའི་དགོངས་པ་དྲི་མ་མེད་པ་ལགས་ཤིང། སྤྱིར་ནང་པའི་བསྟན་པར་ཞུགས་པའི་ཉིང་དགོས་སམ་ཆེས་མཐར་ཐུག་གི་དམིགས་ཡུལ་དམ་པ་ཡང་ཡིན་པས། ཇི་ལྟར་བསྐུལ་བ་བཞིན་དུ་སྐལ་བཟང་བློ་ལྡན་དག་གིས་དགའ་ཞིང་གུས་པའི་ངང་ནས་མཇལ་བར་རིགས་སོ།

          གོང་གསལ་བདེ་གཤེགས་སྙིང་པོའི་གོ་དོན་ལུང་གིས་ཅུང་ཟད་བསྟན་པའང་སྙན་དངགས་ཆེན་པོ་འདིའི་སྲོག་ཉིད་ཡིན་པས་རྟེན་འབྲེལ་ཙམ་དུ་བཀོད་པ་སྟེ། འདི་དག་གི་དོན་རྒྱས་པར་གཞུང་ཆེན་དག་ལ་མཇལ་བར་ཞུའོ། །

 

          དེ་ཡང༌། དམ་པ་དང་ནི་དམན་པ་ཡི། སྤྱོད་པ་གཉིས་ཀ་གོམས་པའི་ཤུགས། ཞེས་གསུངས་པ་བཞིན་སྤྱིར་ཐོག་མེད་ནས་ཡུན་རིང་གོམས་པའི་རང་གཤིས་དག་ནི་བསྒྱུར་དཀའ་ལ་འདྲེས་དཀའ་བའི་ངང་ཚུལ་བསྟན་པ་སྟེ། རབ་བྱེད་དང་པོའི་བརྗོད་དོན་མདོར་བསྡུས་པའོ།།

 

                   སྨྲས་པ།

 

ཀ་ར་མངར་སྐྱུར་མྱངས་ན་ཤེས། ཁ་དོག་འདྲ་མིན་བལྟས་ན་ཤེས།

ག་ལེར་མ་འགྲོགས་མི་ཤེས་པ། ང་ཅག་མི་ཡི་རང་གཤིས་ཉིད།