གཉིས་པ་གཞུང་གི་དོན་འཆད་པ་ལ། སྐྱེ་བོ་མཆོག་དམན་དག་གི་རང་གཤིས་དང༌། སྦྱིན་པའི་ཕ་རོལ་ཏུ་ཕྱིན་པར་བསླབ་པ་སོགས་ཕར་ཕྱིན་དྲུག་ལ་སྦྱར་བའི་རབ་བྱེད་བདུན་ནོ།

 

          རབ་བྱེད་དང་པོ་ལའང། ཁོར་ཡུག་གི་བསྔགས་པ་དང། མི་སྣ་ངོ་སྤྲོད་གཉིས། དང་པོ་ལའང། ༡། གནས་ཡུལ་སྤྱིའི་ཁོར་ཡུག་ལ་བསྔགས་པའི་ཚུལ་ནི།

 

          ༼དེ་ཡང་འདི་སྐད་ཐོས་ཏེ། སྔོན་གྱི་ཚེ་སྣ་ཚོགས་འབྱིན་ཞེས་བྱ་བའི་ཡུལ་བདེ་བ། འབྱོར་བ། ལོ་ལེགས་པ། སྐྱེ་བོ་མང་པོས་གང་བ། ལོངས་སྤྱོད་ཕུན་སུམ་ཚོགས་པ་ནི། ལྷའི་འཇིག་རྟེན་ལ་འགྲན་པ་ཞིག་ཡོད་པར་གྱུར་ཏོ། །༽

          རྩོམ་པ་པོས་གཞན་ཞིག་ནས་སྔོན་གྱི་བྱུང་བ་གང་ཞིག་ཐོས་པའི་ཚུལ་དུ་ཐོག་མར་གཞོན་ནུ་དྲུག་གི་གནས་ཡུལ་གྱི་བཀོད་པ་ཕུན་སུམ་ཚོགས་པ་མདོར་བསྟན་ནས་རྩོམ་འགོ་ཚུགས་ཤིང༌། དངོས་དཔེས་བརྒྱན་པའོ། འོག་ཏུ་སླར་ཡང་དེ་དོན་ཚིགས་སུ་བཅད་པས་བསྔགས་པ་ནི།

          ༼ས་འཛིན་ཕྲེང་བས་ཁོར་ཡུག་ཡོངས་སུ་བསྐོར། །ཡངས་པའི་ས་མཆོག་གྲོང་ཁྱེར་རྣམས་ཀྱིས་གང། །སྨན་ལྗོངས་ནགས་ཚལ་འབབ་ཆུ་དུ་མས་བརྒྱན། །ཡུལ་གྱི་མཛེས་པ་གསར་དུ་ཚོགས་པ་བཞིན། །༡ དེ་ན་འཁོད་པའི་མི་རྣམས་ཁྲིམས་ལྡན་ཞིང༌། །ཕུན་སུམ་ཚོགས་པའི་སྐལ་བ་ཅན་ཐོས་ནས། །ནོར་དང་འབྲུ་དང་རིན་ཆེན་སྣ་ཚོགས་པ། །ཡུལ་གཞན་དོར་ནས་ཕྱོགས་དེར་འདུས་པ་བཞིན། །༢ བདེ་དང་འབྱོར་དང་གྲགས་པའི་དཔལ་ཐོབ་ནས། །མཐོ་རིས་བདེ་བ་རྫོགས་པར་ལོངས་སྤྱད་ཕྱིར། །འཇིག་རྟེན་གཞན་དུ་བསོད་ནམས་བྱས་པ་ཡི། །སྐྱེ་བོ་རྣམས་ནི་ལྷན་ཅིག་སྐྱེས་པ་བཞིན། །༣༽

          དོན་ཇི་བཞིན་པ་ནི། རི་བོ་དུ་མས་ཁོར་ཡུག་གི་མཐའ་ཡོངས་སུ་བསྐོར་ཅིང། ཁོད་ཡངས་པའི་ས་གཞི་བཟང་པོར་གྲོང་ཁྱེར་གྱིས་ཁྱབ་པ། སྨན་ལྗོངས་ཏེ་མེ་ཏོག་མང་བའི་སྤང་དང་སྤང་རི་དང༌། ནགས་ཚལ། རྒྱུག་ཆུ་གཙང་མ་དུ་མས་ཕྱོགས་མཚམས་ཀུན་ཏུ་མཛེས་པ། དེར་གནས་པའི་མི་ཚང་མ་ཡང་དགེ་བཅུའི་ཁྲིམས་སྲུང་ཞིང་གཟུགས་བཟང་བ་སོགས་ཡོན་ཏན་ཕུན་སུམ་ཚོགས་པའི་ལས་ཅན་ཤ་སྟག་དང༌། ད་དུང་རྒྱུ་ནོར་དང་འབྲུ་རིགས་ལོ་ཏོག གསེར་དངུལ་སོགས་རིན་ཆེན་སྣ་ཚོགས་པའི་ལོངས་སྤྱོད་འཛོམས་པ། དེ་བས་མི་རྣམས་བདེ་ཞིང་སྐྱིད་པ་དང། རྒྱུ་འབྱོར་ཆེ་བ། སྙན་པའི་གྲགས་པ་རྒྱས་ཏེ་གནས་པ། ཞེས་པའོ།

          རྒྱན་ནི། ༡ ཡུལ་ལྗོངས་ལ་བསྔགས་པའི་འབྱུང་མིན་གྱི་དཔེ་སྟེ། དཔེ་ཡུལ་གྲུ་གཞན་དག་གི་མཛེས་སྡུག་མཐའ་དག་འདུས་ཏེ་གསར་དུ་གནས་འདིར་ཚོགས་པ་བཞིན་ཞེས་གོ་འོས། ༢ སྐྱེ་འགྲོ་དང་དེའི་ལོངས་སྤྱོད་ལ་བསྔགས་པ་སྟེ་སེམས་མེད་རབ་རྟོག ༣ ལྷའི་ལོངས་སྤྱོད་དང་ལྡན་པར་བསྔགས་པ་སྟེ་ལྷན་ཅིག་སེམས་ལྡན་རབ་རྟོག་གོ

༢། གྲོང་ཁྱེར་གྱི་བཀོད་པར་བསྔགས་པ།

 

          ༼ཡུལ་དེའི་དབུས་ན་ཚངས་པའི་འབྱུང་གནས་ཞེས་བྱ་བའི་གྲོང་ཁྱེར་ཆེན་པོ་རྒྱ་ཆེ་ཞིང་ལྟ་ན་སྡུག་པ། ཁང་པ་འབུམ་ཕྲག་དུ་མ་ཡོད་པ། ཚོང་འདུས་དང་སྐྱེད་མོས་ཚལ་དང། རྩེད་འཇོའི་ཁང་པ་མང་པོས་བརྒྱན་པ། ལྷའི་གྲོང་ཁྱེར་ལྟ་ན་སྡུག་ལྟ་བུ་ཞིག་ཀྱང་འདུག་གོ །༽

          གྲོང་ཁྱེར་གྱི་བཀོད་པ་མདོར་བསྟན་པ་སྟེ་ཆོས་དཔེའོ།

          ༼ར་བ་སེར་པོས་བསྐོར་བའི་གྲོང་ཁྱེར་ནི། །རྣམ་པར་བཀྲ་བའི་ཁང་པའི་ཚོགས་ཀྱིས་མཛེས། །ཉིན་བྱེད་ཟེར་གྱིས་གསལ་བར་བྱས་པ་ཡི། །པད་མོ་རབ་རྒྱས་གསེར་གྱི་རྫིང་བུ་བཞིན། །༡ དེ་ལ་འདུས་པའི་བུང་བའི་ཚོགས་བཞིན་དུ། །སྐྱེ་བོ་མང་པོ་དེ་ན་འདུ་ཞིང་འཁོད། །འདོད་པའི་ཡུལ་རྣམས་བསྟེན་པས་ཚིམ་པའི་ཡིད། །སྤྲོ་བས་བསྐུལ་ཏེ་དགའ་བས་གླུ་གར་བྱེད། །༢ འབྱོར་བ་དུ་མས་བརྒྱན་པའི་ཚོང་འདུས་དང། །ཡ་མཚན་རྩེད་འཇོའི་གར་ལ་བལྟ་བ་ཡིས། །གཡེངས་པར་གྱུར་པས་ཉིན་མཚན་མི་དྲན་ཏེ། འདོད་པ་རྣམསལ་འདོད་ལྷ་བཞིན་དུ་སྤྱོད། །༣༽

          དོན་ཇི་བཞིན་པ་ནི། ར་བ་སེར་པོས་མཐའ་བསྐོར་བའི་གྲོང་ཁྱེར་དེའི་ནང་དུ་ཁ་དོག་རྣམ་པར་བཀྲ་བའི་ཁང་པ་མང་པོས་མཛེས་པར་བྱས་ཤིང། མི་ཚོགས་ཧ་ཅང་མང་བ། འདོད་པའི་ཡོན་ཏན་ཚང་མར་ལོངས་སུ་སྤྱོད་པས་ཡིད་ཚིམ་ཞིང་དགའ་བས་གླུ་གར་བྱེད་པ། ཅ་དངོས་སྣ་ཚོགས་ལྡན་པའི་ཚོང་ཁང་སོགས་དང། ཡ་མཚན་ཟློས་གར་སོགས་རྩེད་མོའི་རིགས་དུ་མས་མི་རྣམས་ཀྱི་སེམས་གཡེང་བར་བྱེད། ཅེས་པའོ།

          རྒྱན་ནི། ༡ གྲོང་ཁྱེར་ལ་བསྔགས་པའི་ངག་དོན་གྱི་དཔེའོ། ༢ ཕྱེད་སྔ་མ་ཆོས་དཔེ་དང་ཕྱི་མ་ཡོན་ཏན་རང་བཞིན་བརྗོད་པའི་རྒྱན། ༣ ཡོན་ཏན་རང་བཞིན་བརྗོད་པའི་རྒྱན་དང་དངོས་དཔེ་འདྲེས་པ་སྟེ། ཚིགས་བཅད་གོང་མ་དང་འདི་གཉི་གས་འདོད་ཡོན་ལ་སྤྱོད་པར་བསྔགས་ཏེ་སྤྱི་ཚོགས་ཁོར་ཡུག་བཀོད་འབྲི་བྱས་པའོ།

གཉིས་པ་ལའང༌། ༡།གཞོན་ནུ་དྲུག་པོའི་རང་གཤིས་བསྟན་ཚུལ་ནི།

          ༼གྲོང་ཁྱེར་དེ་ན་སྐྱེས་བུ་བླུན་ཞིང་ལེ་ལོའི་རང་བཞིན་ཅན། ཉལ་བ་དང། གཡེང་བ་ལ་དགའ་བ། ལེགས་ཉེས་དཔྱོད་པའི་བློ་དང་བྲལ་བ་ཞིག་ཡོད་པ་སྟེ། ཤེས་པ་མི་གསལ་བ་དེ་ལ་འཇིག་རྟེན་པ་རྣམས་ཀྱིས་མུན་པ་ཅན་ཞེས་བཏགས་སོ། །༽

          འདི་ནས་མར་འདྲེན་པ་གཞོན་ནུ་དྲུག་པོ་རེ་རེ་བཞིན་ངོ་སྤྲོད་པ་སྟེ། འདི་ནི་སྤུན་རྒན་ཤོས་མུན་པ་ཅན་གྱི་ངང་ཚུལ་ཏེ། མིང་དེ་ལྟར་བཏགས་པ་ནི་གཏི་མུག་མཚོན་བྱེད་དོ། དེ་དོན་སླར་ཡང་ཚིགས་སུ་བཅད་དེ་སྨྲས་པ་ནི།

          ༼གང་ཞིག་ནག་པོ་བརྩེགས་པ་ལྟར་གནག་པའི། །མུན་པས་བློ་མིག་ཡོངས་སུ་བཅིངས་ལྡན་དེ། །རྟག་ཏུ་གཉིད་དང་སྙོམ་ལས་འབའ་ཞིག་གོམས། །བླང་དོར་གནས་ལས་བློ་ནི་ཕྱིར་ཕྱོགས་ནས། །༡ལེགས་པའི་ལས་ནི་གང་གིས་མི་ཤེས་པས། །དེ་ནི་ཉེས་པའི་སྤྱོད་ལ་འཇུག་པར་མཁས། །གཙང་མ་མེད་ཅིང་དམན་པའི་གནས་ལ་དགའ། །གདོལ་བའི་བྲན་བཞིན་དེ་ན་གནས་པར་གྱུར། །༢༽

          རྒྱན་ནི། ༡ རིམ་པ་བཞིན་ཆོས་དཔེ་དང་གཟུགས་ཅན། དེ་ཡང་དཔེ་ཅན་མུན་པ་ཞེས་པ་སྐབས་འདིར་ཕྱིའི་མུན་པ་དང་ནང་གིམུན་པ་མ་རིག་པ་གཉིས་ལ་གོ་དགོས་ཏེ། ཕྱིའི་མུན་པ་ཁ་དོག་ནག་པས་མིག་གི་མཐོང་ལམ་སྒྲིབ་པར་བྱེད་པ་བཞིན་དུ། ནང་རྨོངས་པའི་མུན་པ་ནི་དཔེ་ནག་པོ་བརྩེགས་པའི་དུག་བཞིན་གནག་པའམ་གནོད་པའི་ནུས་པ་ཅན་ཏེ་བློ་རིག་སྐྱོན་གྱིས་བསླད་པར་བྱེད་པ་ཞེས་གོ་དགོས། རྐང་པ་ལྷག་མ་དག་བྱ་བ་རང་བཞིན་བརྗོད་པའི་རྒྱན་ཡིན་པས་རབ་སྤེལ་གྱི་རྒྱན་ནོ། ༢ སྦྱར་བའི་དཔེ་སྟེ། མུན་པ་ཅན་དང་དཔེ་གདོལ་བའི་བྲན་གཉིས་ཀྱི་ཁྱད་ཆོས་རྣམས་མཚུངས་པར་སྦྱར་བའོ། སྙོམ་ལས་འབའ་ཞིག་ནི་ལེ་ལོ་ཁོ་ནའོ། ཕྱིར་ཕྱོགས་པ་ནི་ཁ་ཕྱིར་འཁོར་བའམ་རྒྱབ་བསྟན་པ་སྟེ་འདིར་ལེགས་ཉེས་བླང་དོར་ལ་དཔྱོད་པར་མི་བྱེད་པའི་དོན།

མུན་པ་ཅན་གྱི་ངང་ཚུལ་དེ་དག་གིས་མ་རིག་པའི་སྐྱོན་བསྟན་པའང་གོ་བར་བྱའོ།

          ༼དེའི་སྤུན་གཉིས་པ་ནི་གཞོན་ནུ་འདོད་ལྷའི་བུ་ཞེས་བྱ་བ། གཟུགས་བཟང་ཞིང་བཞིན་རས་མཛེས་པ། འབྲུ་དང་ནོར་བསྲུང་བ་ལ་གོམས་ཤིང། ནོར་རྫས་མང་པོས་འབྱོར་བ། རྟག་ཏུ་གླུ་དང། གར་དང། དགའ་མའི་གཏམ་གྱིས་དུས་འདའ་བ། འདོད་ཡོན་ལ་ལྷག་པར་སྲེད་པས་བརྐམ་པ་དང་སེར་སྣའི་དབང་དུ་གྱུར་ཏེ། སྦྱིན་པ་དང་ཆོག་ཤེས་པ་ལས་རྒྱབ་ཀྱིས་ཕྱོགས་པ་ཞིག་འདུག་གོ་ཞེས་གྲགས་སོ། །༽

          སྤུན་རྒན་པ་གཉིས་པ་འདོད་ལྷའི་བུ་ཞེས་པས་འདོད་ཆགས་མཚོན་པ་ཡིན། དེ་དོན་སླར་ཡང་ཚིགས་སུ་བཅད་པ་ནི།

          ༼གཟུགས་དང་ལང་ཚོ་དྲེགས་པ་རྣམ་རྒྱས་ཤིང།། །རྟག་ཏུ་ནོར་དང་དགའ་མའི་གཏམ་ལ་ཆགས། །སྲེད་པའི་ཆང་གིས་ཀུན་ཏུ་མྱོས་པའི་ཡིད། །བག་མེད་གྱུར་བས་ངོ་ཚའི་གོས་དང་བྲལ། །༡ལུས་ངན་ལྟ་བུའི་ནོར་གྱིས་ཕྱུག་གྱུར་ཀྱང། །ཆོག་ཤེས་མེད་ཅིང་འདོད་ལ་སྲེད་པའི་མིག །གང་གིས་ཡིད་འོང་དངོས་པོ་རྣམས་མཐོང་བ། །དེ་ནི་བདག་གིར་མ་བཟུང་འགའ་ཡང་མེད། །༢༽

          རྒྱན་ནི། ༡ ཡན་ལག་གཉིས་ཅན་གྱི་གཟུགས་རྒྱན་ཏེ། ཡང་ན་རང་བཞིན་བརྗོད་པ་དང་གཟུགས་ཅན་སྤེལ་མའོ། དེ་ཡང་འདོད་ཡོན་ལ་སྲེད་པའི་དབང་གིས་བག་མེད་ངོ་ཚ་དང་བྲལ་བ་ནི་དཔེ་ཆང་གིས་བཟི་ནས་ངོ་ཚ་མེད་པར་གྱུར་བ་དང་མཚུངས་པར་བརྗོད་པས་མཚུངས་ཆོས་དངོས་བསྟན་གྱི་གཟུགས་རྒྱན་ཡིན། ༢ ཐོག་མ་ཆོས་དཔེ་དང་ཐ་མ་རབ་རྟོག་ཕུལ་བྱུང་གི་རྒྱན་དུ་འདོད། ལུས་ངན་ནི་དྲང་སྲོང་རྣམ་ཐོས་ཀྱི་སྲས་ནོར་ལྷའི་མིང་གི་མངོན་བརྗོད་དེ་རྐང་པ་གསུམ་དང་མཆེ་བ་བརྒྱད་ཅན་མི་སྡུག་པ་ཞིག་ཡོད་པར་བཤད་དོ།

          འདོད་ལྷའི་བུའི་ངང་ཚུལ་འདིས་དོན་ལ་འདོད་ཆགས་ཀྱི་ཉེས་དམིགས་བསྟན་པའང་གོ་བར་བྱའོ།

          ༼དེའི་སྤུན་གསུམ་པ་ཞིག་ཤིན་ཏུ་གཏུམ་ཞིང་དྲག་ཤུལ་ཆེ་བ། མདོག་ནག་ཅིང་སྐྲ་དང་ཁ་སྤུ་སེར་བ། བཞིན་འཛུམ་པ་དང་བྲལ་བ། ལུས་རྩལ་ཆེ་ཞིང་མཚོན་ཆ་དང་སྒྱོགས་དང་འཕྲུལ་འཁོར་སོགས་ལ་མཁས་པ། གཞན་ལ་སྡང་ཞིང་བཟོད་པར་དཀའ་བ་དྲག་པོ་ཞེས་བྱ་བ་ཞིག་བྱུང་ངོ། །༽

          སྤུན་རྒན་པ་གསུམ་པ་དྲག་པོ་ཞེས་པས་ཞེ་སྡང་མཚོན། དེ་དོན་སླར་ཡང་ཚིགས་སུ་བཅད་པ་ནི།

          ༼དེ་ནི་ཤིན་ཏུ་འཇིགས་རུང་གཟུགས་འཛིན་པ། །དཔའ་ཞིང་རྟུལ་ཕོད་དགྲ་འཐབ་རྣམས་ལ་མཁས། །ཁྲོ་ཞིང་མི་བཟོད་དྲག་པོའི་ཤུགས་འཆང་བ། །ཚིག་ཙམ་གྱིས་ཀྱང་སྐྱེ་བོ་སྐྲག་པར་འགྱུར། །༡སྐྱེ་བོ་རྣམས་ལ་གཤིན་རྗེའི་ཕོ་ཉ་བཞིན། །སྡིག་ལ་སྲེད་པ་སྲིན་པོ་མངོན་སུམ་བཞིན། །མཐུ་རྩལ་ཆེན་པོ་ལྷ་མིན་དཔའ་བོ་བཞིན། །མ་རུང་རྩོམ་པས་གཞན་ལ་འཚེ་བར་བྱེད། །༢༽

          རྒྱན་ནི། ༡ ཕུལ་བྱུང་ཉམས་ལྡན། ༢ རྐང་པ་ཐོག་མ་གཉིས་དངོས་དཔེ་དང་ཐ་མ་གཉིས་ཆོས་དཔེ་སྟེ་དཔེ་རྒྱན་སྤེལ་མ། འདི་དང་གོང་མ་ལ་དྲག་ཤུལ་དང་འཇིགས་རུང་གི་ཉམས་ཀྱང་ལྡན་ནོ།

          དྲག་པོའི་ངང་ཚུལ་དག་གིས་ཞེ་སྡང་གི་ཉེས་དམིགས་མཚོན་པའང་ཤེས་པར་བྱའོ།

 

          ༼དེའི་སྤུན་བཞི་བ་ནི་སྔ་མ་རྣམས་དང་ཚུལ་མི་འདྲ་སྟེ། དད་པ་དང། བརྩོན་འགྲུས་དང། དྲན་པ་དང་ལྡན་ཞིང་ཡིད་ཤིན་ཏུ་སྐྱོ་བས་འཇིག་རྟེན་གྱི་བྱ་བ་ལ་བློ་མི་འཇུག་པ་དབེན་པ་ལ་དགའ་ཞིང་དཀོན་མཆོག་མཆོད་པ་ལ་བརྩོན་པ། སྡིག་པའི་གོ་སྐབས་མི་འབྱེད་པ། དགེ་བ་ཅན་ཞེས་བྱ་བ་ཞིག་འདུག་གོ །༽

          ཞེས་སྤུན་བཞི་བ་དགེ་བ་ཅན་ཞེས་པས་དད་པ་དང་ཆོག་ཤེས་སོགས་མདོར་ན་ངེས་འབྱུང་མཚོན་པ་ཡིན། དེ་དོན་སླར་ཡང་ཚིགས་སུ་བཅད་པ་ནི།

          ༼ཤིན་ཏུ་སྐྱོ་བར་གྱུར་བའི་ཡིད་ཅན་དེ། །འཁོར་བའི་ཁྱིམ་ནི་བཙོན་ར་ལྟ་བུར་མཐོང། །འདོད་པའི་ལོངས་སྤྱོད་དུག་ཆུ་འདྲར་ཤེས་ནས། །འབྱོར་བ་རྣམས་ལ་ཕྱགས་དར་རྩྭ་བཞིན་ལྟ། །༡ འདུ་འཛིས་འཇིགས་ཤིང་དབེན་པར་གབ་སྟེ་འཁོད། །དད་པའིམཆི་མས་མིག་ནི་ཡོངས་བཀང་སྟེ། །ཉིན་དང་མཚན་དུ་དཀོན་མཆོག་མཆོད་བརྩོན་པ། །བསོད་ནམས་འབྲས་བུ་ངོམས་པ་མེད་པ་འདྲ། །༢༽

          རྒྱན་ནི། ༡ དངོས་དཔེ། ༢ རབ་སྤེལ་རྒྱན་ཏེ། བྱ་བ་རང་བཞིན་བརྗོད་པ་དང་རབ་རྟོག་ཕལ་བ་འདྲེས་ཤིང༌། ནང་ཤེས་བྱེད་ཀྱི་རྒྱུ་ཡང་ངོ། ད་དུང་འདི་གཉིས་ལ་མྱ་ངན་དང་ཞི་བའི་ཉམས་ལྡན་དུ་ཡང་ཤེས་པར་བྱ། འདྲ་སྒྲ་འདི་དཔེ་དོན་མཚུངས་པར་སྟོན་པའི་མཚུངས་སྒྲ་མིན་པར་དགེ་བའི་ལས་ལ་འབད་པའི་ངང་ཚུལ་དེ་ནི་བསོད་ནམས་ཀྱི་འབྲས་བུས་ཡིད་ཚིམ་པ་མེད་པ་དང་འདྲ་བར་སྣང་ངོ་ཞེས་ཕ་རོལ་བའི་ངང་ཚུལ་ལ་དོན་མཐུན་གྱི་རབ་རྟོག་བྱས་པའི་རབ་རྟོག་གསལ་བྱེད་ཀྱི་སྒྲ་ཡིན་ལ། རབ་རྟོག་ཕལ་བ་ཞེས་པ་ནི་འུད་ཆེན་པོས་བརྗོད་པའི་རབ་རྟོག་མ་ཡིན་པ་ལ་གོ་བར་བྱའོ།

          དགེ་བ་ཅན་གྱི་ངང་ཚུལ་འདིས་ཆོག་ཤེས་དང་ངེས་འབྱུང་གི་ཕན་ཡོན་བསྟན་པའང་གོ་བར་བྱའོ།

དེའི་ནུ་བོ་ཞིག དམ་པའི་སྤྱོད་པ་ལ་ལེགས་པར་བསླབ་པ། སྙིང་རྗེ་ཆེན་པོས་ཡིད་བརླན་པ། སེམས་ཅན་རྣམས་ལ་ཕན་པར་བརྩོན་པ། རང་གི་སྲོག་ལའང་མི་ལྟ་བར་གཞན་གྱི་དོན་འབའ་ཞིག་བྱེད་པ་ཞིག་བྱུང་བས་དེ་ལ་སྐྱེ་བོའི་ཚོགས་ཀྱིས་མཉེས་གཤིན་བཟང་པོ་ཞེས་འབོད་ཅིང་ལྷག་པར་དགའ་བར་གྱུར་ཏོ།།

          སྤུན་ལྔ་བ་ནུ་བོ་མཉེས་གཤིན་བཟང་པོས་སྙིང་རྗེ་དང་ལྷག་བསམ། བཟོད་པ་སྟེ་མདོར་ན་བྱང་ཆུབ་ཀྱི་སེམས་མཚོན། དེ་དོན་འདི་སླར་ཡང་ཚིགས་སུ་བཅད་པ་ནི།

          ༼བྱམས་དང་སྙིང་རྗེའི་དབང་དུ་གྱུར་པ་དེ། །དགྲ་བོ་ལ་ཡང་ཕ་མ་བཞིན་དུ་ལྟ། །ཕོངས་པ་རྣམས་ལ་མཉེས་གཤིན་བཟང་པོ་སྟེ། །སྲོག་ལའང་མི་བལྟ་གཞན་ཕན་སྒྲུབ་ལ་འབད། །༡ སྡུག་བསྔལ་གྱུར་བའི་སྐྱེ་བོ་མཐོང་བ་ན། །དེ་ནི་དེ་བས་ལྷག་པའི་སྡུག་བསྔལ་འགྱུར། །གཞན་དག་བདེ་བས་དེ་ཡིད་དགའ་གྱུར་བ། །རང་ཉིད་བདེ་བས་དེ་ཙམ་མགུ་བ་མེད། །༢༽

          རྒྱན་ནི། ༡ དངོས་དཔེ་དང་ཆོས་གཟུགས་འདྲེས་པ། ཆོས་གཟུགས་ཞེས་པ་ནི་ཆོས་དཔེ་ལྟ་བུའི་གཟུགས་ཅན་ཏེ་ནུ་བོ་འདི་ནི་ཕོངས་པའི་སྐྱེ་བོ་རྣམས་མཐོང་དུས་དེ་ལ་རབ་ཏུ་བྱམས་ཤིང་བརྩེ་བའི་གྲོགས་མཆོག་ཡིན། གང་གིས་ཞེ་ན་སྲོག་ལའང་མི་བལྟ་བར་གཞན་ཕན་སྒྲུབ་པའི་མཚུངས་ཆོས་ཀྱི་སྒོ་ནས་སོ་ཞེས་འགྲེལ་དགོས་པས། འདི་ལ་ཁོ་བོས་ཆོས་གཟུགས་ཞེས་མིང་གསར་བས་བསྙད་པ་ལགས། འོནཀྱང་སྐབས་འདི་འདྲར་དཔེ་ཅན་རང་ཉིད་མཉེས་གཤིན་བཟང་པོ་དངོས་ཤིག་ཡིན་པས་དེ་དཔེ་རུ་བཀོད་པ་མིན་པར་འདོད་ཀྱང་ཆོག་མོད། སྐབས་འདིར་གཞོན་ནུ་དེ་ནི་ཕ་རོལ་དགྲ་རྣམས་ལ་མཚོན་ན་གང་འདྲ་ཞིག་ཡིན་ཚུལ་དང། དེ་བཞིན་དབུལ་བོ་རྣམས་ལ་མཚོན་ན་གང་འདྲ་ཞིག་ཡིན་ཚུལ་དཔེའི་སྒོ་ནས་བརྗོད་ཀྱིན་ཡོད་པ་ཡིན་ནོ། ༢ འདི་ལའང་བསྡུར་བའི་དཔེ་ཞེས་བརྗོད་དེ། གཞོན་ནུ་གང་གི་གཞན་དག་གི་བདེ་སྡུག་མཐོང་བ་དེས་རང་ཉིད་ལ་བདེ་སྡུག་གི་ཚོར་བ་གང་འདྲ་ཞིག་ཡོང་གི་ཡོད་པ་དེ་བདེ་སྡུག་དངོས་སུ་མྱོང་བའི་སྐྱེ་བོ་དེ་དག་ལས་ཀྱང་ལྷག་པའོ་ཞེས་དེ་དང་བསྡུར་བའི་ཚུལ་གྱིས་བརྗོད་པ་གསལ་ལོ།

          མཉེས་གཤིན་བཟང་པོའི་ངང་ཚུལ་འདིས་སྙིང་རྗེར་བཅས་པའི་བཟོད་པའི་ཕན་ཡོན་མཚོན་པའང་ཡིན།

 

          ༼སྤུན་དྲུག་གི་ཐ་ཆུང་གཞོན་ནུ་ལེགས་པའི་བློ་གྲོས་བྱ་བ། མཁས་ཤིང་ཡིད་གཞུངས་པ། ཤེས་རབ་དང་སྤོབས་པ་ནི་མཆོག་ཏུ་གྱུར། བླང་བ་དང་དོར་བའི་གནས་བརྟགས་པ་ལ་ནི་མཁས། བཟོའི་གནས་དང་རིག་བྱེད་དང་བསྟན་བཅོས་རྣམས་ནི་བྱང། དྲན་དང་ཤེས་བཞིན་དུ་ནི་སྤྱོད། བྲམ་ཟེ་དང་རྒན་རབས་ལ་ནི་གུས། ཕོངས་པ་དང་མགོན་མེད་པ་རྣམས་ནི་ཡོངས་སུ་སྐྱོང། སྐྱེ་བོ་རྣམས་ལ་ནི་སློབ་དཔོན་དང་འདྲ་བས་གདམས་ངག་སྟོན་པར་བྱེད་དེ། དེ་ལྟ་བུའི་ཡོན་ཏན་མང་པོ་དང་རྟག་ཏུ་འདྲིས་པ་ཞིག་བྱུང་བར་གྱུར་ཏོ། །༽

          སྤུན་ཆུང་ཤོས་ལེགས་པའི་བློ་གྲོས་ཞེས་པ་ནི་ཤེས་རབ་ཀྱི་མཚོན་བྱེད་དུའོ། དེ་དོན་སླར་ཡང་ཚིགས་སུ་བཅད་པ་ནི།

          ༼བློ་ལྡན་དེ་ནི་མཁསཀྱང་ང་རྒྱལ་མེད། །ཆེན་པོར་གྱུརཀྱང་ཉམ་ཆུང་ཁྱད་མི་གསོད། །གཞོན་ཡང་ལང་ཚོའི་དྲེགས་པས་རྒྱགས་དང་བྲལ། །བདེ་ཞིང་འབྱོར་ཡང་འདོད་པས་མྱོས་མ་གྱུར། །༡ འཇིག་རྟེན་གཙུག་ལག་གཞུང་ལུགས་ཇི་སྙེད་པ། །དེ་ཡི་ཁོང་དུ་མ་ཆུད་ཅི་ཞིག་ཡོད། །ཤིན་ཏུ་སྦྱངས་པས་བླང་དོར་གནས་རྣམས་ཀུན། །བློ་ཡིས་རྟོགས་ཏེ་ལེགས་པའི་ཚུལ་ལ་འཇུག །༢ དྲི་མ་མེད་ཅིང་གསལ་བའི་བློ་གྲོས་ནི། །ཆ་ཤས་ཡོངས་ཛོགས་སྟོན་ཟླའི་དཀྱིལ་འཁོར་བཞིན། །འགྲོ་བ་དག་ལ་ཕན་པའི་ལམ་སྟོན་པ། །སྐྱེ་རྒུ་རྣམསལ་ཉི་མ་ལྟ་བུར་སྣང། །༣ ཀུན་གྱི་རེ་སྐོང་དཔག་བསམ་ལྗོན་པ་བཞིན། །མང་པོས་བཀུར་བས་ས་སྐྱོང་ཆེན་པོ་བཞིན། །ལྷུན་པོ་བཞིན་དུ་འཇིག་རྟེན་འདི་ན་བརྗིད། །འོད་ཟེརསྟོང་ཕྲག་ལྡན་པས་པད་མའི་གཉེན། །༤ ཀུ་མུད་རྒྱས་པའི་ཕྲེང་བས་ཡིད་བཞིན་མཚོ། །ནགས་ཚལ་རྣམསཀྱིས་རི་བོ་བརྒྱན་པ་ལྟར། །ཡོན་ཏན་ཚོགས་ཀྱིས་བློ་ཆེན་འདི་ཉིད་མཛེས། །༥ དེ་ཡི་མིང་ནི་ལེགས་པའི་བློ་གྲོས་ཞེས། །ཤེས་ལྡན་ཀུན་གྱི་རྣ་བའི་རྒྱན་དུ་གྱུར། །ངག་གི་སྲད་བུས་ལེགས་པར་བརྒྱུས་པ་ཡི། །ཡོན་ཏན་གྲགས་པ་རིན་ཆེན་ཕྲེང་བ་བཞིན། །༦༽

          རྒྱན་ནི། ༡ ཡོན་ཏན་འགལ་བའི་རྒྱན། ༢ འདི་ལ་དྲི་བ་ཕུལ་བྱུང་གི་རྒྱན་ཞེས་མིང་འདོགས་པར་བྱ་སྟེ། དེ་ཡང་དྲི་བའི་ཚུལ་དུ་འུད་ཆེན་པོས་བརྗོད་པས་སོ། ༣ ཆོས་དཔེ། ༤ རིམ་བཞིན་ཆོས་དཔེ་དང་རྒྱུ་དཔེ། ཡང་ཆོས་དཔེ་དང་རྒྱུ་དཔེ། ༥ བསྔགས་པའི་དཔེ། ༦ རིམ་བཞིན་གྱུར་བའི་གཟུགས་རྒྱན་དང་མ་བསྡུས་པའི་གཟུགས་ཅན། དངོས་དཔེ་བཅས་སོ། གྱུར་བའི་གཟུགས་རྒྱན་ཞེས་པ་ཡང་ནམ་རྒྱུན་གྱི་ཕྲད་བསྡུས་མ་བསྡུས་པ་དང། རྒྱུའི་གཟུགས་ཅན་དང་ཡང་མི་འདྲ་བར་དཔེ་ཅན་གང་དེ་དཔེ་དེའི་ངོ་བོར་གྱུར་སོང་བའི་ཚུལ་དུ་བརྗོད་པ་ཞིག་ཡིན་པས་འདི་ལྟར་བཏགས་ན་འོས་པར་བསམས་སོ། དེ་ཡང༌། སེན་མོའི་འོད་ཟེར་ནི། མེ་ཏོག་ཏུ་གྱུར་དཔྱིད་ཀྱི་དཔལ། ཞེས་བརྗོད་ཚུལ་དང་འདྲ་ལ། འདི་ནི་འབྲེལ་སྒྲ་བསྡུས་པའི་བརྗོད་ཚུལ་ལས་གཞན་དུ་གྱུར་བས་མིང་ཡང་གསར་བས་བསྙད་ན་དབྱུག་པ་ཅན་གྱི་དགོངས་པ་ལས་འདས་པའི་སྐྱོན་གྱིས་མི་བརྙས་པར་འཚལ།

          ལེགས་པའི་བློ་གྲོསཀྱི་ངང་ཚུལ་འདིས་ཤེས་རབ་ཀྱི་ཕན་ཡོན་བསྟན་པའང་གོ་བར་བྱའོ།

          གཞན་ཡང་སྤྱིར་སྐྱེ་བོ་རྣམས་ལ་སྡིག་པའི་ལས་སམ་ཉོན་མོངས་པ་མང་ཞིང་སྟོབས་ཆེ་བས་སྤུན་རྒན་པ་གསུམ་པོ་མཚོན་བྱེད་དུ་བཀོད་ཅིང༌། དེའི་ཅིག་ཤོས་ལས་ཉོན་གྱི་གཉེན་པོ་བསྟེན་པ་ཉུང་བའམ་ཕྲ་བས་སྤུན་གཞོན་པ་གསུམ་གྱིས་མཚོན་པས་ན་ཕུ་བོ་གསུམ་ལ་དྲང་ཕྱོགས་ཀྱི་མི་སྣ་དང་ཅིག་ཤོས་དག་ལ་ལྡོག་ཕྱོགས་ཀྱི་མི་སྣ་ཞེས་ཀྱང་བྱའོ།

 

ག དམ་པ་དང་དམན་པའི་གཤིས་སྤྱོད་འདྲེས་དཀའ་བའི་ཚུལ།

 

          ༼དེ་ལྟར་གཞོན་ནུར་གྱུར་པ་སྤུན་དྲུག་པོ་དེ་ལྷན་ཅིག་ཏུ་སྤྱོད་ཅིང། འཇིག་རྟེན་གྱི་སྐྱོན་དང་ཡོན་ཏན་གསལ་བར་སྟོན་པའི་མེ་ལོང་བཞིན་དུ་གྲོང་ཁྱེར་དེ་ན་འཁོད་དོ། །༽

          འདི་ལ་སྔོན་མེད་དཔེ་རྒྱན་ཞེས་འདོགས་འོས་ཏེ། སྐྱོན་ཡོན་གསལ་བའི་མེ་ལོང་ཡིན་པས་སོ།

          ༼མེ་ཡི་དྲོད་དང་རླུང་གི་ཤུགས་ལྟར་སྐྱོན་དང་ཡོན་ཏན་རྟག་ཏུ་འགྲོགས་ལྡན་གཞོན་ནུ་དེ་དག་ལྷན་ཅིག་གནས་ཀྱང་ཕན་ཚུན་སྤྱོད་པ་མཚུངས་མ་གྱུར། །སྨན་གྱི་ཤིང་དང་དུག་གི་ནགས་ཚལ་ས་གཞིའི་ངོས་ལ་མཉམ་དུ་སྐྱེ་ཡང་ཕན་དང་གནོད་པའི་རང་བཞིན་ཅན་གྱི་ནུས་པ་སོ་སོར་སྨིན་པ་མཐོང། །རང་བཞིན་ནག་པོའི་སོལ་བ་ལ་ནི་ཡན་ལག་བརྒྱད་ལྡན་ཆུ་ཡིས་བཀྲུས་ཤིང་རས་དཀར་བཟང་པོས་ཡང་ཡང་ཕྱིས་ཀྱང་ཁ་དོག་དཀར་པོར་མི་འགྱུར་ཞིང། །འདམ་རྫབ་ལས་སྐྱེས་འདབ་བརྒྱ་ལྡན་པ་འདམ་ནང་གནས་ཀྱང་འདམ་གྱིས་མི་གོས་དྲི་མ་མེད་ཅིང་དཀར་བའི་མདོག་ཅན་ཆུ་གཏེར་རྣམས་ཀྱི་རྒྱན་དུ་གྱུར།།༽

          འདི་ནི་རབ་སྤེལ་གྱི་རྒྱན་ཏེ། དཔེ་རྒྱན་དང་དོན་གཞན་བཀོད་པའི་རྒྱན། འགལ་བའི་རྒྱན་དང་བཅས་པའོ། དེ་ཡང་ཞིབ་ཏུ་དབྱེ་ན་རྐང་པ་དང་པོར་གཞོན་ནུ་སྐྱོན་ཅན་གསུམ་དང་ཡོན་ཏན་ལ་གནས་པ་གསུམ་པོ་དག་མཉམ་གཅིག་ཏུ་གནས་པ་ནི་མེ་ཡི་དྲོད་ནི་རླུང་གི་ཁྲོད་དུ་ལྷན་ཅིག་གནས་པ་འདྲར་བརྗོད་པ་ནི་དཔེ་ཡི་ངག་དོན་དེས་དཔེ་ཅན་གྱི་ངག་དོན་གང་མཚོན་པ་ཡིན་ལ། ཡང་ལྷན་ཅིག་གནས་ན་ཡང་ཕན་ཚུན་སྤྱོད་པའི་རང་བཞིན་མི་མཐུན་འགལ་བར་གྱུར་བས་ན་རང་བཞིན་འགལ་བའི་ངག་དོན་དཔེ་ཞེས་འདོགས་པར་འོས་ཤིང༌། རྐང་པ་གཉིས་པར་སྨན་དང་དུག་གཉིས་ནགས་ཚལ་གཅིག་ཏུ་སྐྱེས་ཀྱང་དེ་དག་གི་ཕན་གནོད་ཡོན་ཏན་སོ་སོར་སྨིན་པར་འགྱུར་བའི་དཔེ་གཞན་བཀོད་པས་ན་གཞི་ཐ་དད་པའི་ཡོན་ཏན་འགལ་བའི་དོན་གཞན་བཀོད་པའི་དཔེ་ཞེས་འདོགས། རྐང་པ་གསུམ་པར་སོལ་བ་བཀྲུས་ཀྱང་དཀར་པོར་མི་འགྱུར་བ་ནི་གཞི་གཅིག་གི་བྱ་ལས་འགལ་བའི་དཔེ་དང། བཞི་བར་པད་མ་འདམ་ལས་སྐྱེས་ཀྱང་འདམ་གྱིས་མི་གོས་པར་དྲི་མེད་དཀར་བ་ཞེས་པ་ནི་གཞི་གཅིག་གི་ཡོན་ཏན་འགལ་བའི་དཔེའོ། འདིར་འགལ་བའི་དཔེ་ཞེས་བཏགས་དོན་ཡང་དོན་ལ་དངོས་པོ་དེ་དང་གཞོན་ནུ་སྐྱོན་ཅན་གསུམ་དང་ཡོན་ཏན་ཅན་གསུམ་པོའི་དཔེ་རུ་བཀོད་པ་ཞིག་ཡིན་མོད། དཔེ་ཅན་ཡང་ཡང་མ་སྨོས་པར་ཐོག་མར་བརྗོད་པ་གཅིག་པུས་གོ་བར་བྱ་དགོས་པས་ན་དཔེ་ཅན་ཤུགས་བསྟན་གྱི་དཔེ་ཡིན་པས་སོ།

 

          ༼དེ་ལྟར་དམ་པ་དང་དམན་པ་རྣམས་ལྷན་ཅིག་ཏུ་སྐྱེས་ཀྱང་ཡུན་རིང་པོར་ལེགས་པ་དང་ཉེས་པའི་སྤྱོད་པ་གོམས་པའི་ཕྱིར་ངང་ཚུལ་མཚུངས་པར་མི་འགྱུར་རོ། །ཞེས་ཤེས་པར་བྱའོ། །རབ་ཏུ་བྱེད་པ་དང་པོའོ།། །།༽