མཐའ་དཔྱོད་ཕྲན་བུ།

 

          རྟོགས་བརྗོད་འདི་ཉིད་མཛད་པ་པོ་སུ་ཡིན་སྐོར་ལ་དོགས་པ་སྔར་ནས་ཡོད་པ་བཞིན་ད་དུང་ཐག་གཅོད་ཐུབ་མེད་ལ། ཐ་ན་འགྱུར་རྩོམ་དང་བོད་རང་གི་མཁས་པས་མཛད་པའི་གསར་རྩོམ་གང་ཡིན་ལའང་བརྡར་ཤ་གཅོད་དཀའ་བའི་ཚུལ་དུ་ལུས་ཡོད་པས། ཕྲན་གྱིས་རྟོགས་བརྗོད་རང་གི་ཁྱད་ཆོས་གཙོ་བོར་བྱས་ཏེ་གསར་རྩོམ་ཡིན་པར་འདོད་དོ།

          ལ་ལས། འདི་ཉིད་འགྱུར་རྩོམ་ཡིན་ཏེ། རྩོམ་བྱང་ལ་སྐད་གཉིས་ཤན་སྦྱར་དང༌། འགྱུར་ཕྱག་ལྟ་བུ་ཡང་ཡོད་པས་ཟེར་ན། དེ་ལ་ངེས་པ་མེད་པ་དེ། ས་སྐྱ་ལེགས་བཤད་དང༌། རྟོགས་བརྗོད་ཟླ་གཞོན་འཛུམ་པའི་ཕོན་པོ་སོགས་སོ། དེ་ནི་དུས་སྔ་ཕྱིའི་ཁྱད་པར་གྱིས་བྱུང་ཚུལ་སོགས་ཟེར་ཡང་མི་འཐད་དེ། ས་པན་ལྟ་བུས་ཆེད་དུ་ལོ་ཙཱ་བའི་ལུགས་སྲོལ་ལས་འགལ་བར་ག་ལ་བྱེད། ཡང་འདི་འགྱུར་ཕྱག་ཡིན་ཏེ་རྟོགས་བརྗོད་འདི་ཉིད་འདུལ་བའི་སྤྱོད་ཚུལ་གཙོ་བོར་བསྟན་ཚུལ་ཟེར་ཡང་མི་འཐད་དེ། འདིའི་རབ་བྱེད་རེ་རེ་ནས་ཕར་ཕྱིན་རེ་རེའི་དོན་བསྟན་པས་བསླབ་པ་གསུམ་ལས་གཅིག་གཙོ་བོར་དགར་དགོས་དོན་མེད་པས་སོ།

          ཡང༌། སྤྱི་ཚོགས་ཀྱི་ཁོར་ཡུག་དང་མི་རིགས་སོགས་ལ་རྒྱ་གར་བའི་ཁྱད་ཆོས་འདུག་པས་ཟེར་ན། དེར་ཡང་ངེས་པ་མེད་དེ། གཞོན་ནུ་ཟླ་མེད་ཀྱི་གཏམ་རྒྱུད་ལྟ་བུའོ། སྤྱིར་བོད་ཀྱི་མཁས་པ་སྔོན་མ་དག་གིས་གཞུང་མེ་ལོང་མ་སྦྱངས་པ་དང་ལྷན་དུ་སྙན་དངགས་ཀྱི་ལྟ་ཀློག་དེབ་ཡང་འགྱུར་རྩོམ་རིགས་ཡིན་པས་ལད་ཟློས་ཀྱི་སྐྱོན་ཆེ་བ་ནི་ཀུན་གྱིས་མཐོང་ཐུབ་བོ།

 

          འགྱུར་རྩོམ་མིན་པའི་བདེན་དཔང་དང་པོ་ནི། རྟོགས་བརྗོད་ཀྱི་རྗོད་བྱེད་ཚིག་གི་སྡེབ་སྦྱོར་ཧ་ཅང་འཚམ་པ་པས་ཀློག་བདེ་གོ་བདེ་བ་མ་ཟད་དོན་སྟོན་གྱི་ཉམས་འགྱུར་ཡང་ཧ་ཅང་བཟང་པ་འདི་འདྲ་འགྱུར་རྩོམ་གཞན་གང་ལ་ཡང་མེད་པ་ནི་ཉམས་མྱོང་ཅན་ཚོས་རྟོགས་སླ།

          དཔང་རྟགས་གཉིས་པ་ནི་མཇུག་ཏུ་འགྱུར་བྱང་མེད་པ་དེ་ཡིན།ལ་ལས་རྒྱལ་བའི་སྡེས་མཛད་ཅེས་དང༌། ལ་ལས་མཚན་གཞན་ཨུ་མ་པ་ཏི་ཞུ་བ་ཞིག་གིས་ཟེར་མོད། དེ་དག་ནི་ངག་སྒྲོས་ཙམ་ལས་ཁུངས་ཐུབ་འགྱུར་བྱང་དངོས་མིན། ལོ་པཎ་དག་གིས་འགྱུར་གང་ཞིག་ཡིན་ཡང་མཛད་པ་པོ་སུ་ཡིན་སྒྱུར་པ་པོ་སུ་དང་སུ་ཡིན། གང་དུ་བསྒྱུར་སོགས་འགྱུར་བྱང་གསལ་བོར་ངེས་པར་འཁོད་ཀྱིན་ཡོད་ལ། ལྷག་པར་འདི་འདྲའི་སྙན་དངགས་དམ་པ་ཞིག་ལ་འགྱུར་བྱང་མེད་པ་ཅི་ལ་སྲིད། སུ་ཞིག་གིས་བསམ་བཞིན་དུ་བྱས་ན་མ་གཏོགས་འགྱུར་བྱང་གཅིག་པུ་ཆད་པའམ་བརླགས་ཀྱང་དཀའ་བའི་གནས་སོ།

          རྒྱུ་མཚན་གཞན་ཞིག་ནི། བོད་དུ་འགྱུར་བ་གང་ཡིན་ཡང་རྒྱ་གར་བའི་སྔ་མོའི་གྲགས་རྩོམ་རིགས་ཡིན་པས། དེ་དག་དེང་སང་ཡང་རྒྱ་གར་དུ་མང་ཆེ་བ་ཡོད་མོད། གལ་ཏེ་རྒྱ་གཞུང་ཞིག་ཡིན་ན་མ་མཐར་ཡང་འདི་ལྟའི་རྟོགས་བརྗོད་ལེགས་པོ་ཞིག་གི་མིང་ཙམ་ཡོད་དགོས་ཀྱང་མ་ཐོས་སོ།

          འོ་ན་རྩོམ་པ་པོའི་མཚན་ཡང་མེད་པ་ཅི་ཞེ་ན། བདག་གིས་འདི་ལ་དགོས་པ་རྒྱུ་མཚན་ཆེན་པོ་གཞན་ཞིག་མཐོང་སྟེ། གཞན་ཕན་ཁོ་ནའི་ཀུན་ནས་བསླངས་པའི་དམ་པ་རྣམ་གྱིས་བསྟན་བཅོས་འདི་ལྟར་མཛད་ངེས་ཏེ། རི་དྭགས་ཀྱི་གཏམ་ངེས་འབྱུང་གི་ཕོ་ཉ་སོགས་སྔ་རབས་དམ་པའི་གསུང་རྩོམ་མཚན་བྱང་མེད་པ་དག་ཡོད་ལ། ལྷག་པར་རྟོགས་བརྗོད་འདི་ཉིད་དམ་པའི་ཆོས་གསལ་ཕྱིར་སྙན་ངག་བྱའོ། ཞེས་པའི་སྟོན་པས་ནང་པའི་སྙན་དངགས་མཁན་དག་ལ་བསྐུལ་བའི་དགོངས་དོན་དང་ཡོངས་སུ་མཐུན་ཏེ། འཁོར་བའི་སྡུག་བསྔལ་དང་ལམ་གྱི་རིམ་པ་སྒྱུ་རྩོམ་གྱི་ཐབས་ལམ་ནས་ཚང་བར་བསྟན་པའོ། དེ་བས་ན་འདི་འདྲའི་བསྟན་བཅོས་ཀྱི་འཕྲིན་ལས་རྒྱས་ཕྱིར་འདི་ཉིད་རྒྱ་གཞུང་གི་ཚུལ་དུ་མཛད་ཅིང་མཚན་མ་འཁོད་པ་ཡིན་སྙམ། རང་རེའི་བོད་ཀྱི་མཁས་པ་ཆེན་པོ་སུ་ཞིག་གིས་མཛད་ཀྱང་ཆོས་བརྒྱུད་དང་ཕྱོགས་ཞེན་ཆེ་བས་བསྟན་བཅོས་ཀྱི་འགྲོ་དོན་ཡང་རྒྱ་གཞུང་ལྟར་མི་འོང་པ་ནི་ཚང་མས་ཤེས། རྒྱ་གར་བའི་མཁས་པ་ཞིག་གི་རྩོམ་དུ་བྱས་ན་རིས་མེད་ཀྱིས་གལ་ཆེར་བརྩི་བའི་ལུགས་སྲོལ་ལམ་གཤིས་ཀ་འདིར་རྒྱུས་ཡོད་པའི་སྦས་པའི་སྙན་དངགས་མཁན་གང་གིས་ཆེད་དུ་འདི་ལྟར་གནང་བར་བསམས་སོ།

 

          སྒྱུ་རྩལ་མཚོན་ཐབས་ཀྱི་ཆ་ནས། སྐྱེ་རྒ་ན་འཆིའི་སྡུག་བསྔལ་བཞི་བོ་དུས་བཞིའི་འགྱུར་བས་རིམ་པར་བསྟན་ཞིང༌། ཕར་ཕྱིན་དྲུག་པོ་དོན་གྱི་བྱུང་རིམ་དྲུག་གིས་རིམ་པར་བསྟན་པ། སྤྱིར་སྐྱེ་བོ་རྣམས་ལ་གཏི་མུག་དང་འདོད་ཆགས་ཞེ་སྡང་བཅས་ཤུགས་ཆེ་བས་གཞོན་ནུ་སྤུན་རྒན་པ་གསུམ་གྱིས་མཚོན་ཞིང༌། ངེས་འབྱུང་དང་ལྷག་བསམ། ཤེས་རབ་ཀྱི་ནུས་པ་རང་བཞིན་གྱིས་ཉམ་ཆུང་བས་སྤུན་གཞོན་པ་གསུམ་གྱིས་བསྟན་པ་དང༌། དེ་དག་ཀྱང་འཚོ་བ་དངོས་ཀྱི་གསོན་ཉམས་ཅི་ཐོན་གནང་འདུག་པས། ཆོས་ཀྱི་གཞུང་དོན་མི་གོ་མཁན་སྤྱིར་བཏང་ཀློག་པ་པོ་ཞིག་ལ་མཚོན་ནའང་ཡ་རབས་མ་རབས་དང་དགེ་སྡིག་བླང་དོར་གྱི་ལེགས་ཉེས་གསལ་བར་བསྟན་པ་གོ་ཐུབ་ཅིང་དགེ་བའི་བག་ཆགས་གང་འཚམ་འཇོག་ཐུབ་པ་ཞིག་ཡིན་ལ། ལམ་རིམ་ལྟ་བུའི་གཞུང་དོན་འཆད་ཉན་པ་དག་ལ་མཚོན་ནའང་ངལ་གསོའི་ཀློག་དེབ་ཏུ་ཧ་ཅང་བཟང་སྟེ། སྐྱེ་རྒ་སོགས་ཀྱང་དོན་སྤྱི་ཙམ་མ་ཡིན་པར་གཟུགས་ཅན་བཞིན་དུ་སྣང་བས་བློ་བསྐྱེད་ཐོན་པར་ཡང་ཕན་སྙམ། མ་མཐར་ཡང་གཞུང་དོན་གྱི་གནད་མི་གོ་བ་ཚོར་སྒྲུང་འདི་དང་སྦྱར་ནས་སློབ་ཁྲིད་གནང་ན་སློབ་ཚན་ལ་སུན་སྣང་མི་སྐྱེ་བར་གནས་ལུགས་རགས་པ་རེ་ཅིས་ཀྱང་ངོ་འཕྲོད་ངེས།

          གཞན་ཡང༌། གཞོན་ནུ་དྲུག་གི་ལྟ་སྤྱོད་ཙམ་ལ་དཔྱད་པ་ནི་ཁ་ཕྱི་བལྟས་ཀྱི་དགེ་སྐྱོན་ལ་གཙོ་བོར་དམིགས་པ་ཡིན། དེ་དང་མཉམ་དུ་གལ་ཆེ་ཤོས་ཁ་ནང་བལྟས་ཀྱིས་སོ་སོའི་ནང་གི་གཞོན་ནུ་དྲུག་སྟེ། འདོད་ཆགས་ཞེ་སྡང་གཏི་མུག་དག་དང༌། དེ་དག་གི་གཉེན་པོ་འདོད་པར་ཞེན་ལོག་གི་ངེས་འབྱུང་དང༌། བྱམས་སྙིང་རྗེ་བཟོད་པ། བསམ་གཏན་དང་ཤེས་རབ་བཅས་ཀྱི་དགྲ་གཉེན་གྱི་མཐུ་གང་ཆེ་དང༌། མགོ་ཇི་ལྟར་གནོན་ཐབས། ཚད་ཇི་འདྲར་སླེབས་མིན་སོགས་ལ་བྱ་ར་དང་བསམ་གཞིགས་ཀྱིས་སྤུན་རྒན་པ་གསུམ་གྱི་མགོ་གནོན་ཐབས་ལ་བརྩོན་འགྲུས་རྩོམ་རྒྱུ་འདི་ནི་གཞོན་ནུ་དྲུག་གི་རྟོགས་བརྗོད་ངོ་མ་རང་ཡིན་པའང་མཁྱེན་ལྡན་རྣམ་པའི་ཐུགས་འཇགས་འཚལ་ལོ།།

།ཧ་ཅང་མཁས་པས་མཛད་པའི་རྟོགས་བརྗོད་འདིར།

།ཧ་ལས་ཁྱད་ཆོས་དུ་མས་ཕྱུག་གྱུར་མོད།

།ཨ་མདོའི་བུ་ལ་ཨ་གསར་ཙམ་ཞིག་ལས།

།ཨཱ་དོན་གསལ་བའི་ནུས་པ་མེད་པས་ནོངས།།

 

།གང་གི་སོར་མོ་འཕྲུལ་གྱི་ཚངས་སྲས་མས།

།ཆོས་ཚུལ་ཟབ་མོའི་སྣང་བརྙན་གླུར་བླངས་པ།

།སླར་ཡང་བདག་སོར་དུས་ཀྱི་ཕོ་ཉ་མོས།

།བློ་ལྡན་རིག་པའི་བུ་ལ་བརྡ་ཞིག་བཏང།

 

།དགེ་ཅན་ཚུལ་གནས་སྦྱིན་པའི་ལག་ཡངས་མས།

།འདོད་ལྷའི་བུ་ལ་ཆགས་བྲལ་འོ་ཡིས་འཁྱུད།

མཉེས་གཤིན་བཟང་པོ་ལྷ་མོ་འཛུམ་ཡག་མས།

དྲག་པོའི་སྙིང་ལ་ཞི་བའི་ངལ་གསོ་སྦྱིན།

 

།ལེགས་པའི་བློ་གྲོས་ཤེས་རབ་ཡུམ་ཆེན་མས།

།མུན་པ་ཅན་ལ་བདེ་ཆེན་སྣང་བས་རོལ།

།དོན་དམ་བདག་ཉིད་འོད་གསལ་རྒྱས་པའི་རིགས།

།བདག་གི་མགོན་ཉིད་ཚུལ་བཞིན་མཇལ་བར་སྨོན།།

 

          བོད་རྒྱལ་ལོ། ༢༡༣༣། ཁྲུམས་སྟོད་དམར་ཕྱོགས་དགའ་བ་གསུམ་པར་བཞུགས་སྒར་ས་རཱ་བོད་ཀྱི་མཐོ་སློབ་ཁང་དུ་མཇུག་རྫོགས་པར་བགྱིས་པ་དགེ་ལེགས་འཕེལ།། །།