གཞུང་གི་དོན་གཉིས་པ་དམ་པའི་ཆོས་ལུགས་སྐོར་གྱི་བསླབ་བྱ་གནད་བསྡུས།

 

          འདི་ལའང་ཐོག་མར་སྲིད་པའི་ལོངས་སྤྱོད་མི་རྟག་པའི་ངང་ཚུལ་གྱིས་འཁོར་བར་ངེས་འབྱུང། ཚོགས་གསོག་དགེ་སྒྲུབ་ལ་འབད་དགོས་པ། ཕར་ཕྱིན་དྲུག རྒྱལ་སྲིད་ཆོས་བཞིན་སྐྱོང་ཚུལ་ལ་གདམས་པ་སོགས་སོ།

          དང་པོལའང༌། ཀ ལྷ་མིའི་གཙོ་བོ་དབང་ཐང་བླ་ན་མེད་པའི་རིགས་སུ་གྱུར་ཡང་ཡིད་བརྟན་མེད་པ་མི་རྟག་པའི་ངང་ཚུལ་ནི།

།འོན་ཏེ་ཚངས་པ་བརྒྱ་བྱིན་འཁོར་ལོས་སྒྱུར།

།ལྷ་མིའི་དཔལ་འབྱོར་ཀུན་ལ་ལོངས་སྤྱད་མཐར།

།སླར་ཡང་ལྕགས་བསྲེག་ས་གཞིར་དམྱལ་བའི་མེ།

།འབར་བའི་བུད་ཤིང་བྱེད་སྲིད་ཡིད་བརྟན་ཅི།

          དེ་ལྟར་གཞན་ཕམ་རང་རྒྱལ་གྱི་གནས་སྐབས་དབང་གྲགས་སོགས་ཐོབ་པ་ཡིན་ན་ཡང། འགྲོ་བ་དྲུག་གི་གཙོ་བོ་ལྷ་ཆེན་པོ་ཚངས་པ་དང། ལྷའི་དབང་བོ་བརྒྱ་བྱིན། གཞན་ཡང་གསེར་དངུལ་ཟངས་ལྕགས་ཀྱི་འཁོར་ལོས་སྒྱུར་བའི་རྒྱལ་པོ་ཆེན་པོ་རྣམས། མདོར་ན་ལྷ་དང་མི་ཡི་དཔལ་དང་འབྱོར་བ་ཕུན་སུམ་ཚོགས་པ་མ་ཚང་བ་མེད་པར་ལོངས་སུ་སྤྱོད་པའི་མཐའ་མར། སླར་ཡང་སྔོན་ཆད་མང་དུ་མྱང་ཟིན་པའི་ལྕགས་སྲེག་གིས་གཞི་ཚ་དམྱལ་མེ་དཔུང་འབར་བའི་ནང་དུ་རང་ལུས་ཀྱིས་བུད་ཤིང་བྱེད་སྲིད་པ་སྟེ་དགེ་བའི་ལས་ཟད་དེ་སྡུག་པའི་ལས་ཚབས་ཆེན་བསགས་པར་གྱུར་ན་དམྱལ་བ་ཚ་གྲང་གི་སྡུག་བསྔལ་མྱོང་བར་འགྱུར་བས་འཇིག་རྟེན་ཆོས་བརྒྱད་དོན་དུ་གཉེར་ཅིང་རང་རྒྱལ་གཞན་ཕམ་གྱི་སྐད་གྲགས་ཇི་ལྟར་ཆོད་ཀྱང་དེ་ལ་ཡིད་བརྟན་དང་སྙིང་བོ་མེད་ཅེས་པའི་དོན་ནོ།

          དེ་བཞིན་དུ་བཤེས་སྤྲིངས་ལས་ཀྱང༌།

།བརྒྱ་བྱིན་འཇིག་རྟེན་མཆོད་འོས་གྱུར་ནས་ནི། །ལས་ཀྱི་དབང་གིས་ཕྱིར་ཡང་ས་སྟེང་ལྷུང༌། །འཁོར་ལོས་བསྒྱུར་བ་ཉིད་དུ་གྱུར་ནས་ཀྱང༌། །འཁོར་བ་དག་ཏུ་ཡང་བྲན་ཉིད་དུ་འགྱུར། ཅེས་གསུངས་སོ།

 

          ཁ། གཟི་བརྗིད་ཀྱི་དཔལ་དུ་གྱུར་ཀྱང་མི་རྟག་པའི་ངང་ཚུལ།

          །འཇིག་རྟེན་གསལ་བར་བྱེད་པའི་ཉི་ཟླ་ཡང།

          །སྔོན་བསགས་བཟང་པོའི་འཕེན་པ་རྫོགས་པའི་མཐར།

          །རང་གི་ལག་པ་བརྐྱང་བསྐུམ་མི་མཐོང་བའི།

          །མུན་པའི་མལ་དུ་ཉལ་འབྱུང་མཆི་མ་དཀུ ཞེས་པ་སྟེ། འཇིག་རྟེན་ཁམས་འདི་གསལ་བར་བྱེད་པའི་རང་གི་དཀྱིལ་འཁོར་འོད་ཀྱིས་ཁེངས་པའི་ཁང་བཟངས་མཆོག་ན་བཞུགས་པའི་ཉི་མ་དང་ཟླ་བའི་ལྷ་དེ་དག་ཀྱང། ཚེ་རབས་སྔོན་མའི་དགེ་བའི་ཚོགས་བསགས་བཟང་པོའི་འཕེན་བྱེད་ཀྱི་ལས་ཟད་དེ་ཚར་བའི་མཐའ་མར་རང་གི་ལག་པ་བརྐྱང་བསྐུམ་རང་གིས་མི་མཐོང་བའི་མུན་པ་སྟུག་པོའི་མལ་དུ་ཉལ་བའམ་ལྷུང་བར་འགྱུར་བ་ནི་སྙིང་རྗེའི་མིག་ཆུ་འབྱུང་བའི་ངང་ཚུལ་ཡིན་ཞེས་པ་འདིས། འཇིག་རྟེན་གྱི་བསོད་ནམས་བླ་ན་མཐོ་བའི་ཉི་ཟླའི་ལྷ་ཡང་མཐར་འཁོར་བའི་མུན་པར་ལྷུང་སྲིད་པས་དེ་ཡང་སྙིང་བོ་མེད་པའི་ལས་ཀྱི་མཐའ་བསྟན་པའོ།

          དེ་ཡང་བཤེས་སྤྲིངས་སུ།

          །ཉི་མ་ཟླ་བ་ཉིད་ཐོབ་རང་ལུས་ཀྱི། །འོད་ཀྱིས་འཇིག་རྟེན་མཐའ་དག་སྣང་བྱས་ཏེ། །སླར་ཡང་མུན་ནག་སྨག་ཏུ་ཕྱིན་གྱུར་ནས། །རང་གི་ལག་པ་བརྐྱང་པའང་མི་མཐོང་འགྱུར། ཅེས་གསུངས་པ་ལྟར་རོ།

 

          ག འཁྲིག་བདེའི་ལོངས་སྤྱོད་མི་རྟག་པའི་ངང་ཚུལ།

          །པད་མའི་འདབ་འདྲའི་གོས་ཀྱི་རེག་བྱས་ཀྱང།

          །ལུས་ལ་རྩུབ་སྙམ་བྱེད་པའི་སྨིན་ལེགས་མ།

          །བདག་པོའི་རོ་དང་ལྷན་ཅིག་སྲེག་ཁང་དུ།

          །རབ་འབར་མེ་ཡིས་བསྲེག་པ་སུ་ཡིས་བཟོད། ཅེས་ཏེ། པད་མའི་འདབ་དང་འདྲ་བའི་དར་གོས་འཇམ་པོའི་རེག་བྱ་དེས་ཀྱང་རང་ལུས་ལ་རྩུབ་སྣང་འཆར་བའི་ལང་ཚོ་སྨིན་པའི་མཛེས་མ་གང་དག་ཀྱང། སྐབས་རེར་རང་གི་བདག་པོའམ་ཁྱོ་ག་གྲོངས་པའི་རོ་དང་ལྷན་ཅིག་རོ་སྲེག་ཁང་དུ་བཅུག་ནས་མེ་ལྕེ་དྲག་ཏུ་འབར་བས་གསོན་པོར་བསྲེག་པར་བྱེད་པའི་ངང་ཚུལ་དེ་ཡང་སྐྱེ་བོ་སུ་ཞིག་ལྟར་བཟོད་དེ་མི་བཟོད་ཅེས་པའོ། རྒྱ་གར་དུ་བལ་ཡུལ་དུ་གནའ་དུས་རྒྱལ་པོ་ཁག་ཅིག་ལ་དེ་འདྲའི་ལུགས་སྲོལ་ཡ་ང་བ་དག་ཡོད་པར་བཤད། འདིས་རེ་ཞིག་མིའི་རྒྱལ་པོའི་བདེ་སྐྱིད་ཆེན་པོ་ཐོབ་ན་ཡང་སྔོན་བསགས་ལས་ཀྱི་མཐུ་ཟད་ན་དམྱལ་བ་ཡང་མི་ཡུལ་རང་དུ་མྱོང་བར་འགྱུར་བའི་ངང་ཚུལ་བསྟན་ནས་དེ་ཡང་སྙིང་བོ་མེད་པར་བསྟན་ཅིང། ལས་ཀྱི་རྣམ་པར་སྨིན་ཚུལ་ནི་བསམ་གྱིས་མི་ཁྱབ་པའི་རང་བཞིན་བསྟན་པའང་ཡིན་ནོ།

          གཞན་ཡང་བཤེས་སྤྲིངས་སུ།

          །མཐོ་རིས་བུ་མོའི་ནུ་མ་རྐེད་པ་ལ། །རེག་པའི་བདེ་བ་ཡུན་རིང་མྱོང་ནས་སླར། །དམྱལ་བར་འཐག་གཅོད་དབད་པའི་འཁྲུལ་འཁོར་གྱིས། །རེག་པ་ཤིན་ཏུ་མི་བཟད་བསྟེན་འཚལ་ལོ། ཞེས་སོགས་གསུངས་པ་བཞིན་ལྷ་དང་མིའི་ཕུན་ཚོགས་འདོད་ཡོན་གང་དག་ཐོབ་ཀྱང་བསོད་ནམས་ཟད་ན་ཚེ་འདི་ཕྱི་གང་རུང་དུ་འབྲས་བུ་སྨིན་པར་འགྱུར་བའོ།

 

          ང༌། རྒྱུ་ནོར་ལོངས་སྤྱོད་མི་རྟག་པའི་ངང་ཚུལ།

          །ནོར་བུའི་གླིང་དུ་བགྲོད་པའི་ཚོང་ཟོག་གིས།

          །རྣམ་ཐོས་བུ་ལ་འགྲན་པའི་དེད་དཔོན་ཡང།

          །འཇུར་འགེགས་གནས་སུ་སྐྱེས་ནས་ཟས་སྐོམ་གྱིས།

          །བཀྲེས་ཤིང་སྐོམ་པའི་ངང་ཚུལ་ཀྱེ་མ་ཧུད། ཅེས་ཏེ། ནོར་བུ་རིན་པོ་ཆེ་དུ་མའི་ཁེངས་པའི་རྒྱ་མཚོའི་གླིང་ཕྲན་དག་ཏུ་དཀའ་བ་དུ་མས་བགྲོད་ཅིང་རྙེད་པའི་ཚོང་ཟོག་དངོས་པོ་རིན་ཐང་ཅན་མང་པོའི་མཛོད་ཀྱིས་རྣམ་ཐོས་བུ་ནོར་ལྷའི་དཔལ་འབྱོར་གྱི་སྟོབས་ལའང་འགྲན་ཐུབ་པ་ལྟ་བུའི་དེད་དཔོན་ནམ་ཚོང་དཔོན་ཆེན་པོ་དག་ཀྱང་བསོད་ནམས་ཟད་རྗེས། འཇུར་འགེགས་གནས་ཏེ་ཡི་དྭགས་ཀྱི་གནས་སུ་སྐྱེས་ནས་ཟས་མ་ཐོབ་པས་བཀྲེས་པའམ་ལྟོགས་ཤིང་སྐོམ་མམ་བཏུང་བ་མ་རྙེད་པས་ཁ་སྐོམ་པའིསྡུག་བསྔལ་དྲག་པོས་མནར་པའི་ངང་ཚུལ་ནི་བསམ་མི་ནུས་པའི་སྙིང་རྗེའི་ཡུལ་ཡིན་པ་སྟེ། ཀྱེ་མ་ཧུད་ཅེས་ཤིན་ཏུ་སྙིང་རྗེས་མ་བཟོད་པའི་སྡུག་སྐད་ཐལ་བའོ།

 

          ཅ། འཆི་བ་མི་རྟག་པའི་ངང་ཚུལ།

          །དགྲ་འདུལ་གཉེན་སྐྱོང་མངའ་ཐང་ལོངས་སྤྱོད་སོགས།

          །བླ་ནས་བླར་འཕེལ་ཕོ་རྒོད་གྲུང་པོ་ཡི།

          །གྲངས་སུ་ཚུད་ཀྱང་ཚེ་ནི་ནམ་མཁའི་གློག

          །རྨི་ལམ་ཙམ་གྱི་བདེ་བས་ཅི་ཞིག་བྱ། ཅེས་ཏེ། ཕྱིའི་དགྲ་བོ་འདུལ་བའི་དམག་འཁྲུག་སོགས་དང་ནང་གཉེན་འཁོར་མི་སེར་བདག་སྐྱོང་བྱས་ནས་རྒྱལ་སྲིད་ཀྱི་མངའ་ཐང་དང་དཔལ་འབྱོར་ལོངས་སྤྱོད། རིག་གནས་ལ་སོགས་གོང་ནས་གོང་དུ་འཕེལ་བའི་ཤེས་འཇོན་ཅན་ཏེ། འཇིག་རྟེན་ན་ཕོ་རྒོད་གྲུང་པོར་བརྩི་བ་རྣམས་ཀྱི་གྲངས་སུ་ཚུད་ན་ཡང༌། སོ་སོའི་མི་ཚེའི་དུས་ཚོད་ནི་སྐད་ཅིག་རེ་རེ་ནས་འཆི་བར་ཉེ་རུ་གྲོ་བའམ་ཡང་ན་འཇིག་རྟེན་པའི་འདུ་འཛི་ལང་ལོང་གྲངས་དང་མཐའ་མེད་དང་བསྡུར་ན་ཚེ་ལོ་བརྒྱ་བ་འདི་ནི་ཆེས་ཐུང་བ་ནམ་མཁའི་སྤྲིན་རུམ་དུ་གཡོ་བའི་གློག་ཞགས་ལྟ་བུ་ཡིན་པས། སྙིང་བོ་མེད་པ་རྨི་ལམ་ལྟ་བུའི་དུས་ཐུང་གི་བདེ་དགའ་དེ་ཙམ་གྱིས་ཅི་ཡང་མི་ཕན་པའོ། ཞེས་འཇིག་རྟེན་པའི་ཚོལ་སྙེག་དང་ཡིད་སྨོན་དུ་བརྩི་བའི་དབང་གྲགས་འབྱོར་བ་ཀུན་ལ་སྙིང་བོ་མེད་ཅིང་མི་ཚེ་དེ་ཡང་ཧ་ཅང་ཐུང་བ་བསྟན་ནས་ཤུགས་སུ་དུས་ཐུང་གི་མི་ཚེ་འདིར་ཚེ་འདིའི་བདེ་དགའ་ཙམ་མ་ཡིན་པར་དེ་ལས་ལྷག་པའི་བདེ་བ་ཆེན་པོའམ་གཏན་འདུན་གྱི་བདེ་བ་འཚོལ་དགོས་པ་གོ་བར་བྱའོ།

          གཞན་ཡང༌། ལེགས་བཤད་རིན་པོ་ཆེའི་གཏར་ལས།

          །མི་རྣམས་ཚེ་ཐུང་དེ་ཡི་ཕྱེད། །མཚན་མོ་གཉིད་ལོག་ཤི་དང་འདྲ། །ན་རྒས་སྡུག་བསྔལ་སྣ་ཚོགས་ཀྱིས། །ཕྱེད་པོ་འང་བདེ་བར་སྤྱད་དུ་མེད། ཅེས་གསུངས་པ་ལྟར། འཆི་བ་མི་རྟག་པའི་ངང་ཚུལ་ནི་སུ་ལའང་གསལ་མོད། ནམ་འཆི་ངེས་མེད་ཀྱི་ཚུལ་ལ་མི་བསམ་པའམ་ང་ད་དུང་མི་འཆི་བསམ་ནས་དུས་ཚོད་གང་མང་ཆུད་ཟོས་སུ་གཏོང་བཞིན་པའང་ཚོར་གྱིན་མེད།

          མདོར་ན། འཆི་བ་མི་རྟག་པའི་ངང་ཚུལ་གཅིག་པུར་ངེས་ཤེས་ཟབ་མོ་ཐོབ་ན་གཞན་དག་བསམ་མི་དགོས་པར་སྙིང་བོ་མེད་ཚུལ་འཆར་ངེས་པས། ང་ཚོས་སྐབས་སུ་བབ་པའི་སློབ་སྦྱོང་དང༌། མི་རིགས་དང༌། སྤྱི་ཚོགས། སྣོད་བཅུད་འགྲོ་བཡོངས་ལ་ཕན་པའི་བྱ་བ་རེ་ཉིན་རེ་བཞིན་དུ་སྒྲུབ་དགོས་པ་ལས་རྗེས་མ་ཞིག་ལ་བསྒྲུབ་ཆོག་སྙམ་ནས་སྡོད་པ་ནི་ཧ་ཅང་བླུན་རྟགས་ཏེ། ས་པཎ་གྱིས།

          ཁྱོད་ཀྱི་བྱ་བ་ཟིན་ནམ་ཞེས། །འཆི་བདག་སྡོད་པར་མི་འགྱུར་བས། །ངེས་པར་བྱ་དགོས་ཡོད་ན་ནི། །དེ་རིང་ཉིད་དུ་བསྟུན་པར་གྱིས། ཞེས་གསུངས་པ་བཞིན་རང་གཞན་ཀུན་ལ་ཕན་པའི་ལས་རྣམས་ལ་མྱུར་དུ་འཇུག་ཅིང་རྟག་ཏུ་བརྩོན་པར་རིགས་སོ།

 

          ཆ། སྤྱིར་འཁོར་བའི་ངང་ཚུལ་སྡུག་བསྔལ་གྱི་རང་བཞིན་ཅན་ཡིན་པར་སྟོན་པའི་གསུང་དང་རང་གི་མྱོང་བས་རྟོགས་ཚུལ་ནི།

          །བསམ་གྱིན་ནམ་ཡང་རྫུན་ཟོག་མི་གསུང་བ།

          །འོ་སྐོལ་རྣམ་འདྲེན་ཟས་གཙང་སྲས་པོ་དེས།

          །འཁོར་བར་གནས་ཕྱིན་སྡུག་བསྔལ་རང་བཞིན་དུ།

          །བསྟན་ཚུལ་བསམ་ན་སྙིང་ཡང་དུམ་བུར་འགས། ཞེས་ཏེ། དེ་ལྟར་མངོན་མཐོ་ལྷ་མིའི་ལོངས་སྤྱོད་བདེ་དགའ་རྣམས་ཀྱང་མི་བརྟན་ཞིང་ལོངས་སུ་སྤྱོད་ཚུལ་སོགས་མ་ཤེས་ན་ངན་སོང་དུ་སྐྱེ་བའི་རྒྱུར་ཡང་འགྱུར་བ་སོགས་རྒྱུ་ལས་ཉོན་གྱི་དབང་གིས་འབྲས་བུ་སྡུག་བསྔལ་བ་ལ་ལོངས་སུ་སྤྱོད་ཚུལ་གྱི་ལས་འབྲས་མི་བསླུ་བའི་ངང་ཚུལ་དག་ལ་ཡང་ཡང་བསམ་ན། དུས་ནམ་ཡང་རྫུན་ཚིག་དང་གཡོ་སྒྱུའི་སྐད་ཆ་ཙམ་ཡང་མི་གསུང་བ། དོན་དམ་པའི་བདེན་པའི་ལམ་ཟབ་མོ་ནས་བདེ་བ་ཆེན་པོའི་སར་གཤེགས་པའི་འོ་སྐོལ་ལམ་བདག་ཅག་གི་སྟོན་པ་འཁོར་བ་བ་རྣམས་རང་ཉིད་ཇི་ལྟར་བགྲོད་པའི་ལམ་ནས་སངས་རྒྱས་ཀྱི་ས་ལ་རྣམ་པར་འདྲེན་པ་ཆེན་པོ་མང་བཀུར་རིགས་ཀྱི་རྒྱལ་པོ་ཟས་གཙང་མ་ཞེས་བྱ་བ་གང་གི་སྲས་སུ་སྐུ་འཁྲུངས་པའི་གཞོན་ནུ་དོན་ཀུན་གྲུབ་པ་དེ་ཉིད་ཀྱིས། རིགས་དྲུག་གི་སྐྱེ་གནས་ཁམས་གསུམ་འཁོར་བ་གང་ཞིག་ཏུ་གནས་པའི་ཕྱིན་ཆད་ལ། སྡུག་བསྔལ་གྱི་སྡུག་བསྔལ་ལམ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་གསུམ་པོ་གང་རུང་གི་རང་བཞིན་དུ་མ་གནས་པ་མེད་པའི་ལས་འབྲས་ཀྱི་རྣམ་གཞག་བསྟན་པའི་ཚལ་དེ་ལ་ཡང་ཡང་བསམ་ན། རང་གི་སྙིང་དམར་པོ་འདི་ཡང་དུམ་བུ་དུམ་བུར་འགས་ཏེ་འཆི་བར་འགྱུར་རོ། ཞེས་སྡུག་བསྔལ་བསམ་ཞིང་དྲན་ནས་སྡུག་བསྔལ་ལ་འཇིགས་ཤིང་ཞེན་ལོག་ནས་དེ་ལས་ཐར་བའི་ལམ་འཚོལ་དགོས་པའི་གནས་ལུགས་སྟན་པ་ཡང་ངོ།

འདི་བར་གྱིས་སྲིད་པའི་ལོངས་སྤྱོད་མི་རྟག་པའི་ངང་ཚུལ་གྱིས་འཁོར་བར་ངེས་འབྱུང་བསྐྱེད་ཚུལ་བསྟན་ཏོ།

 

          གཉིས་པ་ལའང༌། ཀ སྡུག་བསྔལ་ལས་ཐར་བའི་ཐབས་ལམ་བསླབ་པ་གསུམ་ལ་སློབ་དགོས་པར་གདམས་པ།

          །བཟོད་དཀའི་སྡུག་བསྔལ་འདི་ལས་སླན་ཆད་དུ།

          །མི་ལྡོག་ཐར་བའི་ཁང་པར་འཇུག་པའི་ཐབས།

          །དཀར་ནག་ལས་འབྲས་བསམ་ནས་བླང་དོར་ངོས།

          །བསླབ་པ་རྣམ་གསུམ་ཉམས་ལེན་གྲུང་པོ་ཡིན། ཞེས་ཏེ། དེ་ལྟར་ལན་གྲངས་དུ་མར་མྱོང་དགོས་པའི་བཟོད་བསྲན་དཀའ་བའི་སྐྱེ་རྒ་ན་འཆིའི་སྡུག་བསྔལ་འདི་དག་ལས་སྐྱེ་བོ་འདིའི་སླན་ཆད་དམ་རྗེས་མ་ནས་བཟང་སྟེ། འཁོར་བ་འདིར་ལས་དང་ཉོན་མོངས་དབང་གིས་སླར་ཡང་ཕྱིར་ལྡོག་ནས་ཡོང་བ་མེད་པར་འཁོར་བ་ལས་ཐར་བའི་ཞི་བ་གཏན་བདེའི་ཁང་པ་ལ་འཇུག་ཐབས་ཚུལ་མ་ནོར་བ་དཀར་པོ་དགེ་བའི་ལས་ཀྱི་འབྲས་བུར་བདེ་བ་དང་ནག་པོ་སྡིག་སྡིག་པའི་ལས་ཀྱི་འབྲས་བུར་སྡུག་བསྔལ་འབྱུང་བའི་ཚུལ་ལ་ཡང་ཡང་བསམ་ནས་གནས་ལུགས་གོ་བར་བྱས་ཏེ། སྡིག་སྤང་དགེ་སྒྲུབ་ཀྱི་བླང་དོར་མ་ནོར་བའི་ཐོག་ནས། ཚུལ་ཁྲིམས་དང ་ཏིང་ངེ་འཛིན་དང། ཤེས་རབ་བཅས་ལམ་བསླབ་པ་གསུམ་པོར་ཐོས་བསམ་སྒོམ་གསུམ་སྒོས་ཉམས་ལེན་གཤའ་མ་གནང་ཐུབ་ན། ད་གཟོད་དོན་ངོ་མའི་ཕོ་རྒོད་གྲུང་པོ་ཆགས་པ་ཡིན། ཞེས་པའོ།

 

          ཁ། དད་ཅིང་མཆོད་པས་བསོད་ནམས་གསོག་ཚུལ།

          །སངས་རྒྱས་སྲས་བཅས་མངོན་སུམ་མཐོང་དཀའ་ཡང།

          །དེ་དག་ཞལ་སྐྱིན་གསུང་དང་ཐུགས་རྟེན་ལ།

          །མེ་ཏོག་བདུག་སྤོས་མར་མེ་ལྷ་བཤོས་སྒྲ།

          །འཕན་གདུགས་ཕྱེ་ཕུར་ལ་སོགས་མཆོད་སྤྲིན་དབུལ། ཞེས་ཏེ། འོ་ན། ང་ཚོ་འཇིག་རྟེན་པ་སྤྱི་དང་ལྷག་པར་རྒྱལ་པོ་སོགས་འབྱོར་ལྡན་ཚོས་བསོད་ནམས་ཚོགས་གསོག་བྱེད་སྟངས་ཅི་འདྲ་ཡིན་གང་དག་ནུས་ཤེ་ན། ང་ཚོ་ཕལ་བའི་མི་རྣམས་ཀྱིས་སངས་རྒྱས་དང༌། སངས་རྒྱས་ཀྱི་སྲས་བྱང་ཆུབ་སེམསདཔའི་ཚོགས་རྣམས་མངོན་སུམ་དུ་མཐོང་ཞིང་མཇལ་བར་དཀའ་ན་ཡང། དེ་དག་གི་ཞལ་སྐྱིན་ནམ་སྐུ་ཚབ་སྟེ། གསུང་གི་རྟེན་བཀའ་བསྟན་གྱི་དམ་ཆོས་རྣམས་དང། ཐུགས་ཀྱི་རྟེན་མཆོད་རྟེན་སོགས་དང། སྐུ་བར༼ན་སོགས་སྐུའི་རྟེན་རྣམས་ལ། སངས་རྒྱས་དངོས་ཀྱི་འདུ་ཤེས་ཀྱིས་དྲི་ཞིམ་སྨན་གྱི་མེ་ཏོག་རིགས་དང། བདུག་སྤོས། མར་མེ། ལྷ་བཤོས། སྒྲ་སྙན། འཕན། གདུགས། རྗེ་མ་ཕུར་མ་ལ་སོགས་པ་སྟེ། མདོར་ན་ང་ཚོ་མིའི་ལོངས་སུ་སྤྱོད་པའི་འདོད་ཡོན་སྣ་ལྔའི་མཆོད་པའི་སྤྲིན་ནམ་མཆོད་པ་རྒྱ་ཆེན་པོ་འབུལ་དགོས། ཞེས་སོ།

 

          ག དགེ་འདུན་པའི་ཞབས་སུ་སྒྲུབ་པའི་བསོད་ནམས་གསོག་ཚུལ།

          །བསླབ་གསུམ་ལྡན་པའི་དགེ་འདུན་བསྙེན་བཀུར་ནས།

          །ཐུབ་གསུང་སྒྲོག་སོགས་ཆོས་སྤྱོད་རྣམ་བཅུའི་ལས།

          །རྣམ་གསུམ་འཁོར་ལོའི་བྱ་བ་ཆེར་སྤེལ་བའི།

          །བསོད་ནམས་ཚོགས་ཆེན་གསོག་པ་གནད་དུ་ཆེ། ཞེས་ཏེ། བསླབ་པ་གསུམ་ལ་ཐོས་བསམ་སྒོམ་གསུམ་གྱི་ཡོན་ཏན་དང་ལྡན་པའི་འཕགས་པའི་དགེ་འདུན་པའི་ཚོགས་ལ་བསྙེན་བཀུར་བྱས་ནས། སྟོན་པ་ཐུབ་པའི་དབང་བོའི་གསུང་རབ་སྒྲོག་འདོན་བྱེད་འཇུག་པ། རང་གིས་ཁ་ཏོན་བྱེད་པ། ཡི་གེར་འབྲི་བ། བློ་ལ་འཛིན་པ། གཞན་ལ་འཆད་པ། མཆོད་པ་འབུལ་བ། སྦྱིན་པ་གཏོང་བ། གསུང་ཆོས་ལ་ཉན་པ། ཆོས་ཀྱི་དོན་སེམས་པ་དང་དོན་སྒོམ་པ་བཅས་ཆོས་ཀྱི་སྤྱོད་ལམ་རྣམ་པ་བཅུ་བའི་ལས་ལ་བརྩོན་པ་དང། ཀློག་པ་ཐོས་བསམ་དང། སྤོང་བ་སམ་གཏན་དང། བྱ་བ་ལས་ཀྱི་འཁོར་ལོ་སྟེ་རྣམ་གསུམ་འཁོར་ལོའི་བྱ་བ་རྒྱ་ཆེན་པོར་སྤེལ་བའི་བསོད་ནམས་ཀྱི་ཚོགས་རླབས་པོ་ཆེ་གསོག་པ་ནི་གལ་གནད་ཆེའོ། ཞེས་འདི་བར་གྱིས་ཚོགས་གསོག་དགེ་སྒྲུབ་ལ་འབད་དགོས་ཚུལ་བསྟན་ཏོ།

         

          གསུམ་པ་ལའང༌། ཀ སྦྱིན་པས་ཚོགས་་གསོག་ཚུལ།

          །དབུལ་འཕོངས་སྐྱེ་རྒུ་ཀུན་ལ་སྦྱིན་པ་གཏོང།

          །ཉམ་ཐག་ནད་པར་གོས་ཟས་སྨན་གྱིས་བསྐྱང།

          །འཆི་ངེས་དུད་འགྲོ་གསོད་འོས་ནག་ཆེན་མི།

          །སྲོག་བླུ་མི་འཇིགས་སྐྱབས་ཀྱི་སྦྱིན་པ་བྱ། ཞེས་ཏེ། སྤྲང་བོ་སོགས་དབུལ་འཕོངས་སྐྱེ་བོ་སུ་ཞིག་ཡིན་ན་ཡང་ཁྱད་པར་མེད་པར་ཀུན་ལ་སྙིང་རྗེ་ནས་སེར་སྣ་མེད་པའི་སྦྱིན་པ་གཏོང་བ་དང། ཉམ་ཐག་པའི་ནད་པ་ལ་གོས་དང། བཟའ་བཏུང། སྨན་སོགས་གྱིས་ཕན་འདོགས་པ་དང། ངེས་པར་འཆི་ལ་ཉེ་བའི་དུད་འགྲོའིརིགས་ཤིག་མཐོང་ན་སྲོག་བླུ་བ་དང། ཉེས་མེད་ཁྲིམས་གཅོད་ཕོག་པའི་མི་ཞིག་ཡིན་ན་བཤད་ཅི་དགོས། ལག་དམར་སོགས་ཁྲིམས་འགལ་གྱི་ཉེས་ཆེན་པ་གསོད་འོས་པ་ཞིག་ཡིན་ན་ཡང་སྲོག་བླུས་ཏེ། མི་འཇིགས་པའི་སྐྱབས་ཀྱི་སྦྱིན་པས་འཇིགས་ཉེན་ཆེན་པོ་ལས་ཐར་བའི་དགའ་བ་སྦྱིན་པ་ལའང་འབད་པར་བྱ། ཞེས་འཇིག་རྟེན་པ་ཚོས་ནུས་པའི་སྦྱིན་པ་ལ་འབད་པར་གདམས་པའོ།

 

          ཁ། ཚུལ་ཁྲིམས་ཀྱིས་ཚོགས་གསོག་ཚུལ།

          །ལྷ་མིའི་རྟེན་བཟང་ཐོབ་པའི་རྒྱུའི་གཙོ་བོ།

          །བྱ་སླ་ཚེགས་ཆུང་ཡན་ལག་བརྒྱད་པའི་ཁྲིམས།

          །ཉ་སྟོང་བརྒྱད་གསུམ་རྣམས་ལ་ལེགས་བླངས་ནས།

          །དམ་བཅའ་སྡོམ་པ་ཚུལ་བཞིན་སྲུང་བར་མཛོད། ཅེས་ཏེ། བདེ་འགྲོའིགཙོ་བོ་ལྷ་དང་མི་ཡི་ལུས་རྟེན་བཟང་བོ་འདི་འདྲ་ཐོབ་པའི་བསོད་ནམས་ཚོགས་གསོག་གི་རྒྱུ་གཙོ་བོ་ནི། བྱ་སླ་བ་དཀའ་ཚེགས་མེད་པ་ཡན་ལག་བརྒྱད་པའི་ཁྲིམས་ཏེ། སྲཽག་གཅོད་དང། མ་བྱིན་ལེན། ལོག་གཡེམ། རྫུན། ཆང་འཐུང་བ། སྟན་མཐོན་པོར་འདུག་པ། གླུ་གར་བྱེད་པ་སོགས་དང། ཕྱི་དྲོའི་ཟས་བཅས་པ་སྤོང་བའི་ཉིན་ཞག་གཅིག་གི་སྡོམ་པ་སྟེ། དེ་ཡང། ཟླ་བ་ཉ་གང་བའི་ཚས་བཅོ་ལྔ་དང། གནམ་གང། ཚེས་བརྒྱད་གསུམ་ནི་གཟའ་སྐར་གཞན་ལས་ལྷག་པར་དགེ་སྟོབས་འཕེལ་བའི་རྟེན་འབྲེལ་གྱི་དུས་བཟང་ཞིག་ཡིན་པས། བླ་མའམ་རྟེན་གྱི་དྲུང་དུ་དད་པས་སྟན་དམའ་བར་བསྡད་དེ་ཚུལ་བཞིན་ལེགས་པར་བླངས་ནས། གོང་གི་སྤང་བྱ་བརྒྱད་པོ་སྤང་བར་དམ་བཅས་པའི་སྡོམ་པ་ཚུལ་བཞིན་གཙང་མར་སྲུང་བར་མཛོད་ཅིག ཅེས་ཁྱིམ་པ་ཚོས་སྲུང་བའི་སོ་ཐར་གྱི་སྡོམ་པའམ་ཚུལ་ཁྲིམས་སྲུང་བར་གདམས་པའོ། དེ་ཡང་དགེ་བསྙེན་ཕ་མའི་སྡོམ་ཁྲིམས་བཞེས་ཐུབ་ཚེ་སྟོན་པའི་འཁོར་རྣམ་དག་བཞིའི་གྲས་སུ་ཚུད་པ་སྟེ་ཤིན་ཏུ་ཕུན་སུམ་ཚོགས་པའོ།།

 

          ག བཟོད་པས་ཚོགས་གསོག་ཚུལ།

          ཚིག་རྩུབ་མཚོན་ལ་ཅི་མི་སྙམ་པའི་གོ

          བཙན་པོར་གྱོན་ན་རང་རྒྱུད་མི་འཁྲུགས་པས།

          རྣམ་པར་དགེ་བའི་སྲོག་རྩ་མི་གཅོད་ཅིང།

          སྔར་བསགས་འཕེལ་བའི་ཐབས་ཚུལ་འདི་ལ་བརྩོན། ཞེས་ཏེ། གཞན་གྱིས་གཤེ་བ་སོགས་ཚིག་རྩུབ་མོ་མཚོན་ཆ་ལྟ་བུ་གང་ཞིག་ཐོས་ན་ཡང་བྲག་ཅ་ལྟར་ཅི་ཡང་མི་སྙམ་པའི་བཟོད་བསྲན་གྱི་གོ་ཆ་བཙན་པོའམ་ཁྲབ་མཁྲེགས་པོ་དེ་གྱོན་པ་ཡིན་ན། གོ་ཁྲབ་ཀྱིས་གྲི་མདུང་བཀག་ནས་ལུས་ལ་མིགནོད་པ་ཇི་བཞིན་དུ། ཚིག་རྩུབ་དག་གིསཀྱང་རང་རྒྱུད་འཁྲུགས་པར་མི་འགྱུར་བ་སྟེ། རང་སེམས་མ་བདེ་མ་སྐྱིད་པར་འཚིག་པ་ཟ་བ་དང་ཁོང་ཁྲོ་ལང་བར་མི་འགྱུར་བར་བག་ལྷོད་པོར་གནས་ཐུབ་ལ། དེ་ལྟར་ཁོང་ཁྲོ་སྐྱེ་མ་བཅུག་པས་རྣམ་དཀར་དགེ་བའི་སྲོག་རྩ་མི་གཅོད་པ་སྟེ། ཁོང་ཁྲོ་ཆེན་པོས་སྔར་བསགས་དགེ་བ་འཇོམས་པར་འགྱུར་བའི་ཉེས་པ་ཆེན་པོའང་འགོག་ཐུབ་པ་མ་ཟད། སྔར་བསགས་པའི་དགེ་བ་ལྷག་པར་འཕེལ་བར་འགྱུར་བའི་ཐབས་ཚུལ་བཟང་བོ་མཐུ་ལྡན་འདི་ལ་བརྩིན་ཅིག ཅེས་ཁྲོ་བའི་ཉེས་པ་འགོག་པའི་བཟོད་པ་སྒོམ་པ་ལ་གདམས་པའོ།

 

          ང༌། བརྩོན་འགྲུས་ཀྱིས་ཚོགས་གསོག་ཚུལ།

          སྒྱིད་ལུག་ལེ་ལོ་བཏང་སྙོམས་དབང་སོང་ན།

          ལེགས་པའི་ཡོན་ཏན་གང་ཡང་འགྲུབ་དཀའ་བས།

          དལ་མེད་བརྩོན་པ་ཆེན་པོས་འབད་བྱས་ན།

          ཆེས་ཆེར་དཀའ་འི་ལས་ཀྱང་ལྷུན་གྱིས་འགྲུབ། ཅེས་ཏེ། ལས་ཀ་བྱེད་འདོད་མེད་པའི་སྒྱིད་ལུག་དང་རྣམ་པར་གཡེང་བའི་ལེ་ལོ། ཡང་ན་གང་བྱུང་ཡང་བྱུང་ཅི་བྱས་ཀྱང་བྱས་སྙམ་པའི་བཏང་སྙོམས་བཅས་ཀྱི་གཞན་དབང་དུ་སོང་བ་ཡིན་ན། བསོད་ནམས་ཚོགས་གསོག་སོགས་ཀྱི་དགེ་བ་དང། ཡི་གེ་སློབ་པ་སོགས་ཀྱི་ལེགས་པའི་ཡོན་ཏན་གང་ཡང་འགྲུབ་དཀའ་བ་ཡིན་པས། དལ་བའམ་སོས་བདེ་བོར་མི་སྡོད་པར་དགེ་བའི་ལས་ལ་བརྩོན་པ་ཆེན་པོས་འབད་པར་བྱས་ན། ཧ་ཅང་ཀའ་བའི་ལས་ཀ་དག་ཀྱང་རིམ་བཞིན་ངང་གིས་འགྲུབ་པར་འགྱུར་པར་འགྱུར་རོ། ཞེས་བྱ་བ་མཐའ་དག་བརྩོན་པའི་རྗེས་སུའགྲོ་བས་དགེ་བའི་ལས་ལ་བརྩོན་འགྲུས་རྩོམ་པར་གདམས་པའོ།

 

          ཅ། ཏིང་འཛིན་གྱིས་ཚོགས་གསོག་ཚུལ།

          །དེ་བཞིན་གཤེགས་སྐུ་ལ་སོགས་དམིགས་རྟེན་ལ།

          །མ་ཡེངས་གཞོལ་བའི་ཏིང་འཛིན་བརྟན་པོའི་རྒྱུན།

          །ཆད་མེད་བསྟར་ན་ཉོན་མོངས་མངོན་གྱུར་མགོ

          །ཟིལ་གནོན་ལུས་སེམས་ལས་རུང་བསམ་གཏན་རྙེད། ཅེས་ཏེ། དེ་ལྟར་དགེ་ལ་སྤྲོ་བའི་བརྩོན་འགྲུས་ཆེན་པོ་བརྩམས་ཐུབ་པ་ན། བསམ་གཏན་སྒོམ་པ་སོགས་ཀྱང་འགྲུབ་པས་དེདག་ལ་གཞོལ་བར་གདམས་པ་ནི། དེ་བཞིན་གཤེགས་པ་དང་བླ་མ་ཡི་དམ་གང་ཞིག་གི་སྐུ་རྟེན་ལ་དམིགས་པ་གཏད་དེ། སེམས་མ་ཡེངས་པར་དེ་ཉིད་སྒོམ་པ་ལ་གཞོལ་བའམ་བརྩོན་པ་ནས་རིམ་བཞིན་བྱམས་པ་དང་སྙིང་རྗེ་ལ་སོགས་པ་དགེ་བའི་ཆོས་སྒོམ་པའི་ཏིང་འཛིན་བརྟན་པོའི་རྒྱུན་ཡུན་རིང་མཚམས་མ་ཆད་པར་ཉིན་བཞིན་འཕྲོ་བསྟར་ཐུབ་པ་ཡིན་ན། འདོད་ཆགས་ཞེ་སྡང་སོགས་ཉོན་མོངས་མངོན་འགྱུར་རགས་པ་རནམས་ཀྱི་མགོ་ཟིལ་གྱིས་གནོན་ཐུབ་པའི་ལུས་སེམས་ལས་སུ་རུང་བ་སྟེ། ལུས་བདེ་བའི་ངང་རང་སེམས་གང་ལ་རྩེ་གཅིག་ཏུ་འཇུག་པའི་ཁ་ལོ་སྒྱུར་ནུས་པའི་བསམ་གཏན་ར༼ེད་པའམ་ཐོབ་པར་འགྱུར་རོ། ཞེས་ཉོན་མོངས་འགོག་ཅིང་དགེ་བ་དང་ཤེས་རབ་འཕེལ་བའི་ཐབས་མཆོག་ཞི་གནས་སམ་བསམ་གཏན་སྒོམ་པ་གདམས་པའོ།

 

          ཆ། ཤེས་རབ་ཀྱིས་ཚོགས་གསོག་ཚུལ།

          །ཆོས་རྣམས་སོ་སོའི་གདགས་གཞིའི་སྟེང་ཙམ་ན།

          །རྟོག་པས་བཏགས་པ་ལས་གཞན་དོན་དམ་དུ།

          །མ་རྙེད་རྟེན་ཅིང་འབྲེལ་འབྱུང་དབུ་མའི་ལམ།

          །ཤེས་རབ་མཚོན་གྱིས་འཁོར་བའི་རྩ་བ་གཅོད། ཅེས་ཏེ། གང་ཟག་དང་བཅས་པའི་ཆོས་ཐམས་ཅད་སོ་སོའི་མིང་གི་གདགས་གཞིའི་སྟེང་དེ་ཙམ་ན། ང་ཚོས་རྟག་པས་བཏགས་པའི་དགེ་སྐྱོན་སོགས་ཀུན་རྫོབ་བདེན་པ་ལས་གཞན་དུ། རང་ངོས་ནས་གདོད་མ་ནས་གྲུབ་པའི་དོན་དམ་པའི་བདེན་པའི་ཆོས་ཅི་ཡང་རིགས་པས་ར༼ེད་དུ་མེད་པར་རང་བཞིན་གྱིས་སྟོང་བས་རྒྱུ་འབྲས་མེད་པར་ལྟ་བའི་ཆད་པའི་མཐའ་ལ་མ་ལྷུང་བ་དང།  ཆོས་ཐམས་ཅད་སྒྱུ་མ་ལྟར་རྟེན་ཅིང་འབྲེལ་བར་འབྱུང་བའི་སྣང་བའི་རང་བཞིན་ཅན་ཡིན་པས་རྟག་པའི་མཐར་མ་ལྷུང་བའི་དབུ་མའི་ལམ་དེ་ཉིད། འཇོག་སྒོམ་དང་བཅས་པའི་སོ་སོར་དཔྱོད་པའི་ཤེས་རབ་ཀྱི་མཚོན་རྣོན་པོ་དེ། ཏིང་ངེ་འཛིན་གྱི་མཐུ་ལ་བརྟེན་པའི་ཞི་ལྷག་ཟུང་འབྲེལ་གྱི་བདག་མེད་རྟོགས་པའི་ཤེས་རབ་དེ་ཉིད་ཀྱིས། འཁོར་བའི་རྩ་བ་སྟེ་ཉོན་མངས་ཀུན་གྱི་གཞི་རྩ་བདག་འཛིན་མ་རིག་པ་དྲུངས་ནས་འབྱིན་པའམ་གཅོད་པར་བྱེད་དགོས། ཞེས་འཁོར་བ་དོང་ནས་སྤྲུགས་པ་ལ་ཤེས་རབ་ཀྱི་ཕ་རོལ་དུ་ཕྱིན་དགོས་པར་གདམས་པ་ལགས་སོ།

འདི་བར་གྱིས་ཐེག་པ་ཆེན་པོའི་ལམ་ཕ་རོལ་དུ་ཕྱིན་པ་དྲུག་གི་ཐབས་ཤེས་ཟུང་འབྲེལ་བའི་བསོད་ནམས་དང་ཡེ་ཤེས་ཀྱི་ཚོགས་གཉིས་གསོག་ཚུལ་བསྟན།

 

          བཞི་ལའང༌། ཀ བར་གཅོད་བཟློག་ཅིང་མཐུན་རྐྱེན་སྒྲུབ་ཕྱིར་ཡི་དམ་དང་ཆོས་སྐྱོང་བསྟེན་གསོལ་དགོས་པར་གདམས་པ།

          ཡིད་སྲུབ་སྡེ་བཅས་མཐར་བྱེད་གསང་བའི་བདག

          དྲན་པས་འཆི་བདག་དཔུང་འཇོམས་ཚེ་དཔག་མེད།

          བླ་མགོན་དབྱེར་མེད་མྱུར་མཛད་ཕྱག་དྲུག་པ།

          འདི་ཕྱི་བར་དོའི་སྐྱབས་ཡིན་རྟག་ཏུ་བསྟེན། ཞེས་ཏེ། ཡིད་སྲུབ་སྟེ། འདོད་པའི་ཡོན་ཏན་གྱི་འཕྲུལ་གྱིས་འདོད་ལྡན་སྐྱེ་བོའི་ཚོགས་ཀྱི་ཡིད་འཁྲུགས་པར་བྱེད་པའི་འདོད་ལྷ་དགའ་རབ་དབང་ཕྱུག་སྡེ་དང་བཅས་པ་འཇོམས་པར་བྱེད་པའི་གསང་བ་སྔགས་ཀྱི་བདག་པོ་ཕྱག་ན་རྡོ་རྗེ་དང། མཚན་ཙམ་དྲན་པས་ཀྱང་འཆི་བདག་དཔུང་འཇོམས་ཏེ་དུས་མིན་འཆི་བའི་འཇིགས་པ་ལས་སྐྱོབ་པའི་སངས་རྒྱས་ཚེ་དཔག་ཏུ་མེད་པ། རང་གི་རྩ་བའི་བླ་མ་དངམགོན་པོ་དབྱེར་མེད་པ་འཕྲིན་ལས་མཐའ་དག་མྱུར་བར་མཛད་པ་པོ་ཡེ་ཤེས་ཀྱི་སྲུང་མ་མགོན་པོ་ཕྱག་དྲུག་པ་བཅས། ཚེ་འདི་དང་སྐྱེ་བ་ཕྱི་མ། བར་དོའི་གནས་སྐབས་དང་བཅས་པའི་བར་ཆད་ཀུན་སེལ་ཞིང་བསམ་དོན་ཆོས་བཞིན་འགྲུབ་པར་བྱེད་པའི་སྐྱབས་དང་མགོན་ཉིད་ཡིན་པས་རྟག་ཏུ་ཕྱག་འཚལ་དང་འཕྲིན་བཅོལ་གསོལ་འདེབས་དགོས་ཚུལ་བསྟན་པའོ། འདི་དང་འོག་མ་དག་ནི་གཙོ་བོར་བསྐུལ་པ་པོར་དགོངས་ནས་གསུངས་སམ་སྙམ།

 

          ཁ། རྒྱལ་པོས་རྒྱལ་སྲིད་ཆོས་བཞིན་སྐྱོང་རྒྱུ་གལ་ཆེ་བར་གདམས་པ།

          །དེ་ཡང་གནམ་དང་ས་ཡི་དཀྱིལ་འཁོར་ལ།

          །དབང་ཕྱུག་མི་ཡི་རྒྱལ་པོ་ཆེན་པོ་རྣམས།

          །རང་ཉིད་གཅིག་པུར་དགེ་སྦྱོར་ལ་གཞོལ་ལས།

           །བསྟན་འགྲོའི་བདེ་ཐབས་བསྒྲུབ་པ་མཆོག་ཏུ་བསྔགས། ཞེས་ཏེ། དེ་ལྟ་ན་ཡང གནམ་སའི་ཁྱོན་ལ་དབང་སྒྱུར་བའི་སོད་ནམས་དང་མཐུ་སྟོབས་ཀྱི་བདག་པོ་འགྲོ་བ་མིའི་རྒྱལ་པོ་ཆེན་པོ་རྣམས་ཀྱིས། རྒྱལ་སྲིད་སྐྱོང་བའི་བྱ་བ་སྤངས་ཏེ་རང་ཉིད་གཅིག་པུར་གནས་ཤིང་དགེ་སྦྱོར་ལ་བརྩོན་པ་དེ་ལས། སངས་རྒྱས་ཀྱི་བསྟན་པ་རྒྱ་ཆེར་སྤེལ་བ་དང་རང་གི་འབངས་སོགས་འགྲོ་བ་མང་པོའི་བདེ་སྐྱིད་ཀྱི་ཐབས་ཚུལ་བསྒྲུབ་པ་ནི་བྱང་ཆུབ་སེམས་དཔའ་ཆོས་ཀྱི་རྒྱལ་པོ་རྣམས་ཀྱི་མཛད་པ་མཆོག་ཏུ་གྱུར་བར་བསྔགས་སོ། ཞེས་རྒྱལ་སྲིད་ཆོས་སྲིད་ཟུང་འབྲེལ་གྱི་རྒྱལ་སྲིད་སྐྱོང་བ་ལ་གདམས་པའོ།

 

          ག རྒྱལ་ཁབ་ཚང་མ་འཆམ་མཐུན་མཉམ་གནས་དང་སྲིད་ལུགས་བཟང་པོས་རྒྱལ་འབངས་སྐྱོང་བར་གདམས་པ།

          །ཉི་འོག་མི་ཡི་བདག་པོ་ཆེ་རྣམས་དང།

          །ཕན་ཚུན་མཉེས་གཤིན་བྱམས་པའི་སེམས་བཟང་པོས།

          །རང་རང་མངའ་རིས་རྣམས་ཀྱིས་ཆོག་ཤེས་ཤིང།

          །འབངས་ཀུན་བདེ་ཕྱིར་བཟང་པོའི་གཞུང་བཟང་སྤེལ། ཞེས་ཏེ། ཉི་མའི་དཀྱིལ་འཁོར་ཆེན་པོའི་འོག་གམ། ཡང་ན། གནམ་འོག་གི་མི་བདག་རྒྱལ་པོ་ཆེན་པོ་རྣམས་དང། ཕན་ཚུན་ཐུགས་མཉེས་ཤིང་གཤིན་པ་མཛའ་གྲོགས་སུ་བསྡེབས་ཤིང།ཀུན་ལ་བྱམས་པའི་སེམས་པ་བཟང་པོས་རྒྱལ་པ་རང་རང་སོ་སོའི་མངའ་རིས་སམ་མའ་ཐང་ལོངས་སྤྱོད་ཅི་ཙམ་ཡོད་པ་དེས་ཆོག་ཤེས་པ་གནང་ནས། འབངས་མི་རིགས་ཚང་མ་བདེ་ཞིང་སྐྱིད་པའི་ཆེད་དུ། རང་གི་གཞུང་དེ་ཉིད་ཡ་རབས་ཁྲིམས་བཟང་དང་ལྡན་པའི་ངང་ནས་ཡར་རྒྱས་གོང་འཕེལ་གཏོང་དགོས་པའོ།

 

          ང༌། ཆོས་ལུགས་རིས་མེད་ཀྱིས་སྲིད་སྐྱོང་བར་གདམས་པ།

          །སངས་རྒྱས་ཐུགས་རྗེ་ཕྱོགས་བྲལ་འགྲོ་བ་ལ།

          །འཇུག་ཕྱིར་ཡང་དག་ཆོས་ལ་རིས་མེད་ཀྱང།

          །གནའ་བོའི་དུས་ནས་དར་བའི་ཡབ་མེས་ཀྱི།

          །ཆོས་ལུགས་གྲུབ་པའི་མཐའ་དེ་ཤིན་ཏུ་ཤིས། ཞེས་ཏེ། སངས་རྒྱས་ཀྱི་ཐུགས་རྗེ་ནི་ཕྱོགས་རིས་བྲལ་བ་འགྲོ་བ་ཀུན་ལ་སྙོམ་པར་འཇུག་པ་ཅན་ཡིན་པས། ཡང་དག་པའི་དམ་པའི་ཆོས་དེ་ཡང་སུ་ཞིག་གིས་འཛིན་སྐྱོང་སྤེལ་བ་གནང་ཆོག་པ་ལས་མི་རིགས་དང་རིགས་རུས་སོགས་ཀྱི་ཁྱད་པར་དང་དབྱེ་བ་ཕྱེ་བའི་ཕྱོགས་རིས་མེད་ན་ཡང། གནའ་བོའི་དུས་ནས་དར་བའི་མི་རིགས་སོ་སོའི་ཡབ་མེས་ཀྱི་ཆོས་ལུགས་མི་འདྲ་བའི་རིགས་ཀྱི་ལྟ་གྲུབ་གང་ཡན་པ་དེ་ནི་ཡུལ་དེའམ་མི་རིགས་དེ་ལ་ཤིན་ཏུ་བཀྲ་ཤིས་པརའགྱུར་པའི་དགེ་མཚན་ཆེའོ། ཞེས་རྒྱལ་པོ་ཚོས་ཆོས་ལུགས་གྲུབ་མཐའ་མི་འདྲ་བ་སོ་སོ་རང་སོར་བཞག་ནས་སྲུང་སྐྱོབ་དགོས་པར་གདམས་སོ།

 

          ཅ། དམིགས་བསལ་སོག་ཡུལ་དུ་དགེ་ལུགས་པའི་ཆོས་བརྒྱུད་དར་ཚུལ་བསྟན་པ།

          །བྱང་ཕྱོགས་ཆེན་པོ་ཧོར་གྱི་རྒྱལ་ཁམས་སུ།

          །ཨལ་ཐན་ཆོས་ཀྱི་རྒྱལ་པོའི་ཏི་ཤི་རིར།

          །བསོད་ནམས་མཚན་ལྡན་ཏཱ་ལའི་བླ་མ་གང།

          །བྱོན་ནས་དེང་བར་ཞྭ་སེར་ཅན་གྱིས་ཁྱབ། ཅེས་ཏེ། སྐབས་སུ་བབ་པ། ལེགས་བཤད་རྩོམ་པར་སྐུལ་བ་བོའི་ཕ་ཡུལ་བོད་གངས་ཅན་གྱི་བྱང་ཕྱོགས་སྟོབས་ཆེན་ཧོར་གྱི་རྒྱལ་ཁམས་སུ། ཨལ་ཐན་ཆོས་རྒྱལ་གྱི་དབུ་བླ་ལ། བསོད་ནམས་རྒྱ་མཚོའི་མཚན་ཅན་ཏཱ་ལའི་བླ་མ་སྐུ་ཕྲེང་གསུམ་པ་དེ་ཉིད་བྱོན་ནས་དམ་པའི་ཆོས་སྤེལ་བ་དེ་ནས་བཟུང་དེང་སང་གི་བར་དུ། འདིར་ལྔ་པ་ཆེན་པོ་རང་གི་སྐབསསོག་ཡུལ་ལ་ཞྭ་སེར་ཅན་རི་བོ་དགེ་ལུགས་པའི་གྲུབ་མཐའ་འཛིན་མཁན་མང་པོ་འབྱུང་བཞིན་པའི་ལོ་རྒྱུས་མདོར་བསྟན་པའོ།

 

          ཆ། དགེ་ལུགས་པའི་ཐུན་མིན་སྲུང་མ་བསྟེན་པར་གདམས་པ།

          །རྒྱུ་མཚན་དེས་ན་འཇམ་མགོན་ཙོང་ཁ་པའི།

          །བསྟན་པ་རིན་ཆེན་བཀུར་ན་ཕྱག་དྲུག་མགོན།

          །ལས་གཤིན་འདོད་ཁམས་མ་སོགས་ཆོས་སྲུང་གིས།

          །རྟག་ཏུ་སྲུང་ཤིང་མངའ་ཐང་བདེ་སྐྱིད་འཕེལ། ཞེས་ཏེ། དོན་དངོས་རྒྱུ་མཚན་དེ་ལ་བརྟེན་ནས། འཇམ་མགོན་བླ་མ་ཙོང་ཁ་བ་ཆེན་པོ་རྗེ་བློ་བཟང་གྲགས་པའི་དཔལ་གྱི་བསྟན་པ་རིན་པོ་ཆེར་གུས་ཤིང་བཀུར་བ་ཡིན་ན། མགོན་པོ་ཕྱག་དྲུག་པ་དང། ལས་གཤིན་དམ་ཆེན་ཆོས་རྒྱལ། འདོད་ཁམས་བདག་མོའམ་དཔལ་ལྡན་ལྷ་མོ། རྣམ་ཐོས་སྲས་སོགས་ནས་རྟག་ཏུ་འགལ་རྐྱེན་དུ་མ་ལས་སྲུང་ཞིང་རྒྱལ་པོའི་མངའ་ཐང་ལངས་སྤྱོད་དག་ཀྱང་འཕེལ་ནས་རྒྱལ་ཁམས་བདེ་ཞིང་སྐྱིད་པར་འགྱུར། ཅེས་པའོ།

          སྐབས་འདིར་ཞོར་དུ་ངེས་པར་གླེང་དགོས་པ་ནི། ཁ་ཅིག་གིས་རི་བོ་དགེ་ལུགས་པའི་ཐུན་མིན་སྲུང་མ་དོལ་རྒྱལ་ཡིན་པར་བསྒྲགས་ཤིང་སྐྱབས་སུ་འགྲོ་བ་ནི། བླ་མ་རེ་འགའི་ནོར་འཁྲུལ་ལམ་བྱས་ཉེས་ཀྱིས་བྱུང་ཞིང༌། རིམ་བཞིན་རྒྱ་དམར་གྱི་སྲིད་དོན་དང་ཉོག་མར་འདྲེས་པའི་བོད་སྤྱིའི་བསྟན་སྲིད་ལ་གནོད་ཚབས་ཆེ་བའི་ནད་ཡམས་ཤིག་ཡིན་ཚུལ། མདོ་སྨད་དབུས་སྤྱི་ཁྱབ་རྒྱུན་ལས་ཁང་ནས་དཔར་འགྲེམས་གནང་བའི<<དོལ་རྒྱལ་གྱི་བྱུང་རིམ་དང་རྙོག་གླེང་ལ་དཔྱད་པ་གཡའ་སེལ་མེ་ལོང>>ཞེས་པར་གཟིགས་དང་ཧ་ཅང་གསལ་ལོ།

 

          ཇ། ཆོས་སྲིད་ཟུང་འབྲེལ་ནི་འདི་ཕྱི་ཀུན་དགེའི་ལུགས་བཟང་ཡིན་པར་གདམས་པ།

          །ལུགས་གཉིས་ཟུང་འབྲེལ་ཡབ་མེས་རྒྱལ་པོའི་ཁྲི།

          །མནན་ནས་ས་ཆེན་འཇམ་དར་ཡུག་གཅིག་དང།

          །ཕ་རོལ་ཕྱིན་དྲུག་སྤྱོད་པ་ཉེར་སྤྱད་པས།

          །འདི་ཕྱི་གཏན་གྱི་འདུན་མ་ལྷུན་གྱིས་འགྲུབ། ཅེས་ཏེ། གནའ་སྔ་མོ་ཞིག་ནས་རྒྱ་དཀར་ནག་དང་བོད་སོག་གཉིས་སུ་སངས་རྒྱས་ཆོས་ལུགས་ཀྱི་དགེ་བཅུའི་་ཁྲིམས་སྲོལ་གྱིས་གཙོས་རྒྱལ་སྲིད་ཆོས་བཞིན་སྐྱོང་ཚུལ་གྱི་ལུགས་གཉིས་སྐྱོང་བར་མཛད་པའི་་ཡབ་མེས་གོང་མ་དག་གི་རྒྱལ་པོའི་སྲིད་ཁྲི་ཞབས་ཀྱིས་མནན་ནས། རང་རང་གི་རྒྱལ་ཁོངས་སྐབས་དོན་གཙོ་བོ་ཆེན་པོ་ཧོརས་ཆེན་པོའི་ཁོར་ཡུག་ཀུན་ཆོས་ཁྲིམས་འཇམ་དར་ཡུག་གཅིག་གིས་ཁེབས་པར་གནང་ཞིང། སྦྱིན་སོགས་གོང་དུ་སྨྲས་པའི་ཕར་ཕྱིན་དྲུག་གི་ཐེག་པ་ཆེན་པོའི་ཆོས་ཀྱང་ལེགས་པར་བསྒྲུབས་ན། དེ་དག་གི་དགེ་བའི་མཐུ་ཆེན་པོས་ཚེ་འདིའི་རྒྱལ་སྲིད་ཀྱི་བྱ་བ་དང༌། ཕྱི་མ་མངོན་མཐོ་དང་ངེས་ལེགས་གཏན་གྱི་འདུན་མ་ཡང་ལྷུན་གྱིས་འགྲུབ། ཞེས་པའོ།

          གོང་གསལ་འདི་དག་གིས་རྒྱལ་སྲིད་ཆོས་བཞིན་སྐྱོང་ཚུལ་ལ་གདམས་སོ།

 

ཐ་མ་མཇུག་གི་གཏམ།

 

          འདི་ལའང། ཀ༽ ཇི་ལྟར་བརྩམས་པའི་ཀུན་སློང། ཁ༽ ཤིས་བར་སྨོན་པ། ག༽ ཞོར་དུ་བསླབ་བྱ་འདི་ཉིད་ཇི་ལྟར་བརྩམས་པའི་ཚུལ་བསྟན་པ་དང་གསུམ་མོ།།

          ཀ༽

          །དེ་ལྟར་ཆོས་སྲིད་བླང་དོར་རང་ཉིད་ལ།

          །མི་ལྡན་ནེ་ཙོའི་བརྗོད་པ་ལྟ་བུའི་ཚིག

          །སྨྲ་ལ་མཁས་རྣམས་ཁྲེལ་ཡང་སྟོན་ཟླ་ལྟར།

          །ཆེས་དཀར་སེམས་བཟང་བ་ལ་ཉེས་པ་མེད། ཅེས་ཏེ། གོང་དུ་ལུགས་གཉིས་ཀྱི་བྱ་བར་གདམས་པ་དེ་ལྟར་ཡང། རྩོམ་པ་པོ་རང་ཉིད་ལ་ཆོས་སྲིད་བླང་དོར་གྱི་མཁྱེན་དཔྱོད་དང་ཡོན་ཏན་ཆེན་པོ་མི་ལྡན་ན་ཡང༌། འཕགས་པ་ཀླུ་སྒྲུབ་དང་ས་པཎ་སོགས་ལུགས་གཉིས་ལ་མཁས་ཤིང་མཛངས་པ་དག་གི་ལེགས་བཤད་གཞིར་བཞག་གིས་ནེ་ཙོའི་ལད་ཟློས་ལྟར་བསྐྱར་དུ་བཟློས་་པ་འདིཙམ་ལ། ལུགས་གཉིས་སྨྲ་བའི་མཁས་དབང་རྣམས་ཁྲེལ་བའམ་འཕྱ་སྨོད་དུ་འགྱུར་ན་ཡང༌། རབ་དཀར་སྟོན་མཚན་གྱི་ཟླ་བ་ཉ་གང་བའི་འོད་ཀྱིས་གངས་ཀྱི་རི་བོ་སོགས་ལྷག་པར་གསལ་ཞིང་མཛེས་པར་འགྱུར་བའི་དཔེ་ལྟར། འདིར་ཡང་རྒྱལ་པོ་གང་གིས་བསྐུལ་ངོ་མ་བཟློག་ཅིང། ཁོང་དང་གཞན་དག རྗེས་རབས་པ་ཚོར་ཡང་ཅུང་ཟད་ཕན་པར་འགྱུར་བར་སྙམ་པའི་ལྷག་བསམ་ཁོ་ནས་སྨྲས་པས་ན། རང་གནོང་གི་ཉེས་པ་ཅི་ཡང་མེད། ཅེས་པའོ།

          དོན་དངོས་སུ། ྋགོང་ས་ལྔ་པ་ཆེན་པོ་ནི་སྐབས་དེའི་རྒྱ་སོག་གི་རྒྱལ་བློན་འབངས་གསུམ་གྱིས་ཀྱང་བརྩི་བཀུར་དང་མན་ངག་ཞུ་སའི་ལུགས་གཉིས་ཀྱི་མཁྱེན་རྩལ་ཕུལ་དུ་བྱུང་ལ་མཛངས་པའི་ཕྱག་རྗེས་ཅན་ཞིག་ཡིན་བཞིན་དུའང་འདི་ལྟར་རང་ཉིད་དམན་སར་འབབ་པ་ནི་དམ་པའི་ཆེ་རྟགས་ཀྱང་ཅི་ལ་མིན།

          ཁ༽

          །འདིས་མཚོན་དགེ་བས་གནམ་བསྐོས་མི་ཡི་བདག

          །བཙུན་མོ་སྲས་བཅས་བློན་འབངས་རབ་བརྟན་ཅིང།

          །མངའ་ཐང་དཔལ་འབྱོར་རྣམ་མང་ཐོས་སྲས་དང།

          །མཚུངས་པའི་སྐལ་བ་བཟང་པོར་འགྱུར་བར་ཤོག །ཅེས་ཏེ། ལེགས་བཤད་འདིས་མཚོན་བདག་གི་དགེ་བ་ཇི་སྙེད་པའི་མཐུས། རྡོ་རྗེའི་ལུང་གིས་ཟིན་པའི་གནམ་བསྐོས་མི་ཡི་བདག་པོ་གུ་ཤྲི་བསྟན་འཛིན་ཆོས་ཀྱི་རྒྱལ་པོ་བཙུན་མོ་སྲས་དང་བཅས་པ་དང། གང་གི་བློན་པོའི་ཚོགས་དང་འབངས་མི་སེར་བཅས་པའི་ཚེ་སྲོག་རབ་ཏུ་བརྟན་ཅིང། སྲིད་ཀྱི་མངའ་ཐང་རྒྱས་ཤིང༌། དཔལ་འབྱོར་ལོངས་སྤྱོད་ནོར་ལྷ་རྣམ་ཐོས་སྲས་དང་མཚུངས་པའི་བདེ་དགའི་སྐལ་བབཟང་པོར་འགྱུར་བར་ཤོག་ཅིག ཅེས་དགེ་བ་བསྔོས་ཏེ་བཀྲ་ཤིས་པར་བརྗོད་པའོ།།

          ག༽

          དེ་ལྟར་ལུགས་གཉིས་དང་འབྲེལ་བའི་བསླབ་བྱའི་རིམ་པ་མུ་ཐི་ལའི་འཕྲེང་བ་འདི་ནི་ཚེ་རིང་གནམ་གྱི་ཤེ་མོང་གིས་སྟོབས་ཀྱི་དབང་ཕྱུག་ཆིང་གིས་རིགས་ལས་ཁལ་ཁ་ཐུ་ཤེ་ཡེ་ཐུ་རྡོ་རྗེ་རྒྱལ་པོས་རི་ཁ་བ་ཅན་གྱི་ལྗོངས་སུ་དཀོན་མཆོག་གསུམ་ལབླ་མར་བཟུང་སྟེ་མཆོད་པར་བྱོན་པའི་ཚེ་རྩོམས་ཤིག་ཅེས་གསུང་གིས་བསྐུལ་བ་ལྟར་ཟ་ཧོར་གྱི་རིགས་ལས་སྡེ་སྣོད་གསུམ་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་ཕོ་བྲང་ཆེན་པོ་པོ་ཏཱ་ལར་སྦྱར་བའི་ཡི་གེ་བ་ནི་འཕྱོངས་རྒྱས་བཀྲས་རབ་ཕུན་ཚོགས་དབང་པོའོ།། །།

 

          ཞེས་རིམ་པ་བཞིན། ༡༽་བསྟན་བཅོས་ཀྱི་མཚན་བྱང་དང། ༢༽ སྐུལ་བ་བོ། ༣༽རྩོམ་པའི་དུས། ༤༽ མཛད་པ་པོ། ༥༽ བརྩམས་པའི་གནས། ༦༽ ཡི་གེ་བ་སུ་ཡིན་དང་བཅས་པས་མཇུག་ཡོངས་སུ་རྫོགས་པའོ། །

          གལ་ཏེ་སྐབས་དེའི་ལོ་རྒྱུས་ཀྱི་གནས་ཚུལ་ཞིབ་པ་ཤེས་འདོད་ན། རང་རྣམ་དཱུ་ཀུ་ལའི་གོས་བཟང་དུ་གསལ་བས་གཟིགས་པར་འཚལ་ལོ།།

སྨྲས་པ།

              །དམ་པ་རྣམས་ཀྱིས་དམ་པར་སྤྱོད་པའི་ལུགས།

              །སྐལ་ལྡན་རྣམས་ལ་སྐལ་དུ་གནངས་པ་འདི།

              །འདི་དང་ཕྱི་མའི་ལམ་ཡིག་ཁོ་ན་སྟེ།

              །ལམ་བུ་གཞན་དག་མུན་པའི་དོང་ལམ་ཉིད།

             །སྔོན་བྱོན་དམ་པའི་རྣམ་པར་ཐར་བའི་ལམ།

             །ལམ་བཟང་བདེ་ལྡན་ཞིང་དུ་མཐོང་བ་དང།

             །དང་བའི་ཡིད་ཀྱིས་དང་ལྷོད་མེད་པའི་ངང།

             །ངང་རིང་འབད་བརྒྱས་ས་ལམ་ཟིན་པར་སྨོན།།