༄༅། །༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་རྒྱལ་ས་ཝ་ཤིང་ཊོན་དུ་དཔལ་དུས་ ཀྱི་དབང་ཆེན་བཀའ་དྲིན་སྐྱོང་བཞིན་པ་དང་སྟབས་བསྟུན་ཕྱི་ལོ་ ༢༠༡༡ ཟླ་ ༧ ཚེས་ ༩ དང་ ༡༠ ཉིན་གྲངས་གཉིས་རིང་མང་གཙོའི་རྒྱ་ནག་དང་མ་འོངས་པའི་བོད་ཅེས་པའི་བརྗོད་གཞིའི་ ཐོག་བགྲོ་གླེང་གི་ཚོགས་འདུར་ཨ་རི་དང་ཁེ་ཎ་ཌའི་ས་གནས་ཁག་ནས་ཆེད་བཅར་ཞུས་པའི་ རྒྱ་རིགས་མཁས་དབང་དང་རྩོམ་པོ་ཉིས་བརྒྱ་ལྷག་ལྷན་འཛོམས་ཀྱིས་བགྲོ་གླེང་ཚོགས་ ཡོད།

     དེ་ཡང་བགྲོ་གླེང་གི་ཚོགས་འདུ་མཐའ་མ་སྟེ་ཕྱི་ཚེས་ ༡༠ ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་སྔོན་ནས་གསོལ་འདེབས་ཞུས་དོན་ ལྟར་བཀའ་བཞེས་བཟང་པོ་ཐོབ་སྟེ་ཉིན་དེའི་སྔ་དྲོ་ཆུ་ཚོད་ ༡༠ པའི་ཐོག་མགོན་པོ་གང་ཉིད་མཆོག་གིས་བགྲོ་གླེང་ཚོགས་མགོན་དུ་ཆིབས་སྒྱུར་ བསྐྱངས་ཏེ་དེར་འདུས་རྒྱ་རིགས་མཁས་དབང་དང་རྩོམ་པོ་རྣམས་ཀྱིས་གཙོས་མང་ཚོགས་ལ་ བཀའ་སློབ་སྩལ་དོན།      དེ་རིང་རྒྱ་རིགས་གྲོགས་པོ་ཚོ་ཐུག་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང། ང་ཚོ་བོད་དང་རྒྱ་གཉིས་ལོ་ངོ་སྟོང་ཕྲག་རིང་ནས་འབྲེལ་བ་ཡོད་པ་ཞིག་ཡིན། སྐབས་རེ་གཉེན་སྒྲིག་བྱེད་རྒྱུ་དང་ཆོས་ཕྱོགས་ནས་འབྲེལ་བ་བྱེད་རྒྱུ་བཅས་དངོས་ གནས་དྲང་གནས་མཛའ་བརྩེའི་དུས་རབས་དེ་འདྲ་མང་པོ་བྱུང་ཡོད། ཡང་སྐབས་རེ་འཁྲུག་པ་ཕྲན་བུ་རྒྱག་རྒྱུ་ཡང་བྱུང་ཡོད། བར་སྐབས་གུང་ཁྲན་ཏང་གིས་འགོ་ཁྲིད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ ཚུགས་ནས་ཕལ་ཆེར་ ༥༤།༥༥ བར་དངོས་གནས་དྲང་གནས། ལྷག་པར་ངོས་རང་པེ་ཅིང་དུ་འགྲོ་སྐབས་ཕན་ཚུན་གཅིག་གི་གཅིག་ལ་བློ་འཁེལ་རྒྱུའི་ གོ་སྐབས་ཧ་ཅང་ཡག་པོ་བྱུང། དཔེར་ན། ཕྱི་ལོ་ ༡༩༥༥ ལོར་ངོས་རང་པེ་ཅིང་ནས་ཕྱིར་ལོག་ཡོང་སྐབས་ལམ་བར་དུ་ཀྲང་གོ་ཧཱ་དང་ངོས་རང་ཐུག་ བྱུང། སྐབས་དེར་ཀྲང་གོ་ཧཱ་ལྷ་ས་ནས་པེ་ཅིང་ལ་མར་ཡོང་གི་ཡོད་པ་དང་ངོས་རང་ཡར་ལྷ་སར་ ཡོང་གི་ཡོད། ངོས་ཀྱིས་ཀྲང་གོ་ཧཱ་འདི་ལྟར་ལབ་པ་ཡིན། ངོས་རང་ན་ནིང་ལམ་འདི་ནས་མར་ཡོང་སྐབས་སེམས་ནང་དོགས་པ་དང་ཞེད་སྣང་བྱས་ནས་ཡོང་ བ་ཡིན། ད་རེས་སེམས་ནང་ཡིད་ཆེས་བློ་བདེ་འདེང་འཁེལ་བ་བྱས་ནས་ཡར་ཡོང་གི་ཡོད་ཅེས་ བརྗོད་རྒྱུ་བྱུང་། ངོས་རང་པེ་ཅིང་ལ་ཧ་ལམ་ཟླ་བ་ལྔ་དྲུག་རིང་བསྡད་པ་ཡིན། དེའི་རིང་ལ་ངོས་ཀྱི་མར་ཁ་སེ་ལིན་ཉིན་རིང་ལུགས་དང་སྤྱྲི་ཚོགས་རིང་ལུགས་སློབ་ སྦྱོང་ཏོག་ཙམ་སྦྱང་པ་ཡིན། རྒྱལ་སྤྱིའི་རིང་ལུགས་གང་ཙམ་བསླབ་པ་རེད། དེ་རིང་ཁ་སང་ངོས་ཀྱིས་འཛམ་གླིང་སྤྱིའི་སྐོར་ལ་རྟག་པར་བརྗོད་བཞིན་ཡོད། དེ་དུས་རྒྱལ་སྤྱིའི་རིང་ལུགས་པ་སྦྱང་པ་དེས་ཏོག་ཙམ་ཕན་ཡོད། དེ་དུས་མར་ཁ་སེ་རིང་ལུགས་དང་སྤྱི་ཚོགས་རིང་ལུགས་ལ་ངོས་རང་ཧ་ཅང་དགའ་བོ་ཡོད། དེར་བརྟེན་ངོས་རང་གུང་ཁྲན་ཏང་ནང་འཛུལ་ཞུགས་བྱེད་ཀྱི་ཡིན་ཞེས་བརྗོད་པ་ཡིན། དེ་དུས་གུང་ཁྲན་ཏང་ནང་ངོས་ཀྱི་གྲོགས་པོ་གཙོ་བོ་ལེའུ་ཁ་པིན་གྱིས་ངོས་ལ་བྲེལ་ བ་མ་བྱེད་ཅེས་བརྗོད་བྱུང་། ཕལ་ཆེར་གྲོགས་པོ་ལེའུ་ཁ་པིན་གྱིས་ངོས་ལ་གསལ་པོ་མ་བརྗོད་པ་མ་གཏོགས་མ་འོངས་ པར་གུང་ཁྲན་ཏང་ཏན་རང་མེད་པ་དེ་ཁོང་གིས་ཤེས་ཀྱི་ཡོད་ས་རེད། ད་ལྟ་གུང་ཁྲན་ཏང་དེ་སྤྱི་ཚོགས་རིང་ལུགས་ཀྱི་གུང་ཁྲན་ཏང་རེད་འདུག དེ་རིང་ཁ་སང་སྤྱི་ཚོགས་རིང་ལུགས་དེ་ཁག་པོ་འདུག དབུལ་ཕྱུག་གི་ཁྱད་པར་ཆེན་པོ་ཡོད་པ་མ་ཟད། ལྐོག་ཟ་རུལ་སུངས་ཚད་ལས་བརྒལ་བ་ཡོད་པ་རེད། ཕྱི་ལོ་ ༡༩༥༦ ནས་ ༥༧ ལ་ཀྲུང་དབྱང་གི་སྲིད་བྱུས་དེ་ཕལ་ཆེར་གཡོན་ཐལ་ཐོག་ཕྱིན་པའི་རྐྱེན་གྱིས་དཀའ་ ངལ་དེ་འཕྲད་པ་རེད། མཐའ་མ་ཕྱི་ལོ་ ༡༩༥༩ ལོར་གནས་ཚུལ་དེ་བྱུང་བ་རེད། ད་ལྟ་ང་ཚོར་དཀའ་ངལ་ཞིག་འཕྲད་བཞིན་ཡོད། དེ་ཡང་བོད་པ་གཅིག་པུ་མ་རེད། གྲངས་ཉུང་མི་རིགས་གཞན་དག་དང་རྒྱ་མི་རིགས་ཚོར་ཡང་དཀའ་ངལ་འཕྲད་བཞིན་འདུག དེར་བརྟེན་གང་ལྟར་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་གི་དཀའ་ངལ་དེ་དག་མི་ མང་གིས་སེལ་རྒྱུ་རེད་མ་གཏོགས་ཕྱི་ནས་སེལ་མཁན་ཞིག་ཡོང་གི་མ་རེད། ངོས་ཀྱིས་རྟག་པར་འདི་ཤོད་ཀྱི་ཡོད། འཛམ་གླིང་འདི་འཛམ་གླིང་མི་མང་ལ་བདག་ཡོད། དཔེར་ན། རྒྱ་ནག་ལ་ཆ་བཞག་ན་རྒྱ་ནག་མི་མང་ལ་བདག་ཡོད། འགོ་ཁྲིད་རེ་ཟུང་ལ་བདག་མེད་པ་བརྟེན་མཐར་ཐུག་ལུང་པ་དེའི་བདག་པོ་ངོ་མ་དེ་མི་ མང་དེ་དག་རེད། ཀྲུང་གོ་གུང་ཁྲན་ཏང་འགོ་སྟོད་ཕལ་ཆེར་མི་མང་མང་དག་ཅིག་གིས་རྒྱབ་སྐྱོར་ཏན་ཏན་ ཡོད། ལྷག་པར་དུ་ངལ་རྩོལ་མི་མང་གིས་རྒྱབ་སྐྱོར་ཡོད་པ་རེད། དེ་རིང་ཁ་སང་རང་དབང་ལྡན་པའི་ཐོག་ནས་འོས་བསྡུ་བྱས་ནས་གང་འདྲ་ཞིག་ཡོད་ན།  དངོས་གནས་བྱས་ནས་འོས་བསྡུ་བྱེད་དགོས་པ་རེད། ཅེས་སོགས་ཀྱི་བཀའ་སློབ་ཕེབས་ཡོད།
ཐེངས་འདིའི་བགྲོ་གླེང་གི་ཚོགས་འདུར་བདམས་ཐོན་བཀའ་ཁྲི་གསར་པ་མཁས་དབང་བློ་ བཟང་སེང་གེ་མཆོག་དང་བོད་མི་འགའ་ཤས་ནས་ཀྱང་མཉམ་ཞུགས་གནང་ཡོད་པ་བཅས།