དབྱངས་ཅན་སྒྱུ་འཕྲུལ་དྲ་བ།
ཆབ་བྲག་ཕོ་ཉ
ཀླུ་སྨྱོན་ཧེ་རུ་ཀ
—མདའ་ཚན་པ་མགོན་པོ་ཚེ་རིང་གི་འདས་མཆོད་དུ།
གྱ་ལྔའི་རྡ་སའི་རྒྱལ་ཡོངས་རྩོམ་རིག །ཚོགས་ཐོག་དེ་ནས་ཁྱུག་ཙམ་ཐུག་ཅིང་། །
རྗེས་སུ་གཉན་ཆེན་ཐང་ལྷའི་ངོས་སུ། །ཁྱེད་ཀྱིས་སྙན་རྩོམ་ཡག་པོ་བསྐུར་བྱུང་། །
དེ་རྗེས་ཁ་བརྡའི་དྲ་གྲོང་ཉུལ་དུས། །མགོན་ཕྱག་མིང་ཅན་སྨྱུག་རྩེ་རྣོ་ཞིང་། །
གཏན་ཚིག་སྙན་ཆ་གཉིས་འཛོམས་པས། །རྩོམ་དང་རྩོམ་མཆན་གང་མང་བྲིས་སོང་། །
ལོ་གཅིག་སྔོན་ལ་གྲོགས་པོའི་ངག་ལས། །ཁྱེད་རང་བོད་ནས་ཚུར་འབྱོར་མ་ཐག །
གནམ་ཐང་དེ་ནས་བསྙུང་ཚུལ་བསྟན་ཅིང་། །རིམ་བཞིན་སྡུག་ཏུ་ཕྱིན་ཚུལ་ཐོས་སོང་། །
ཉིན་འགའི་སྔོན་ལ་ངོ་དེབ་ནང་ནས། །ཆབ་བྲག་ཕོ་ཉར་སྐད་ཆ་དྲིས་དུས། །
གསོན་པའི་རེ་བ་ཕྲ་ཚུལ་བརྗོད་པས། །ཨ་ཧོ་དེ་ནི་མ་བཟང་བསམས་སོང་། །
དེ་རིང་ཞོགས་པར་ཁ་བརྡ་ཀློག་དུས། །ཁྱེད་ཉིད་གཤེགས་པའི་གཏམ་ངན་མཐོང་བས། །
གློ་བུར་འཆི་བདག་རྒད་པོའི་གདོང་ལ། །ཁུ་ཚུར་དྲག་པོས་ལན་འགའ་གཞུས་ཡིན། །
འདི་ལྟར་མི་རྟག་འཆི་བའི་ཞགས་ནག །བོད་པ་ཤེས་ལྡན་རེ་རེར་བསྐོན་ནས། །
མི་མཐོང་ཕྱི་མའི་ཡུལ་དུ་འཁྲིད་དུས། །སྙིང་གི་ཚལ་བ་རེ་རེ་གཤགས་འདྲ། །
གསོན་ཚེ་རྩོམ་མཆན་སྡིག་དམོད་ཆར་འབེབ། །ཤི་ཚེ་འགྱོད་པ་བླུན་པོའི་ངང་ཚུལ། །
ཤི་གསོན་བྲལ་བའི་བདེ་བ་ཅན་དེར། །གྲོགས་ཁྱེད་འོད་དཔག་མེད་ཀྱིས་འདྲེན་རོགས། །
ལུག་རྫི་ནོར་རྫི་ཚོང་པ་དགེ་རྒན། །གྲྭ་པ་བླ་མ་རྐུན་མ་ཇག་པ། །
བོད་པ་སུ་ཡང་སྲོག་ལ་གཅེས་མོད། །སྙན་ངག་མཁན་གྱི་སྲོག་འདིར་མི་དོ། །
སྙན་ངག་མཁན་གྱི་ཉི་མ་ནུབ་དུས། །འཇིག་རྟེན་མུན་པའི་རྒྱལ་ཁམས་ཆེན་པོར། །
གསོན་པའི་རེ་བ་ཕྲ་མོ་ཞིག་ནི། །སྙན་ངག་མཁན་ཚོའི་ཤུལ་བཞག་རྩོམ་ཡིག །
རི་བོ་སྒང་དྲུག་ཐོལ་གྱིས་གཤགས་ཤིང་། །ཧི་མ་ལ་ཡ་འཕྲེད་ཀྱིས་བརྒལ་བའི། །
སྙན་ངག་མཁན་པོའི་ཞབས་རྗེས་རེ་རེ། །གསེར་གྱིས་བྲིས་པའི་སྙན་ངག་ཡིན་ནོ། །
ཤུལ་དུ་ལུས་པའི་མཛའ་མོ་སྙིང་རྗེ། །གློ་བུར་བསྐྱུར་བའི་ཕྲུ་གུ་ཤ་ཚ། །
རྒྱང་ནས་བཞག་པའི་གྲོགས་པོ་སེམས་སྐྱོ། །སྲིད་པའི་འཁོར་ལོ་འཁོར་སྟངས་འདི་རེད། །
འཆི་བདག་རྒན་པོ་སེམས་ནག་གན་གིས། །སྡིག་ཅན་མི་ཡིས་ས་སྟེང་གང་དུས། །
སྙན་ངག་དབྱངས་ཅན་པི་ཝང་ཐོགས་པའི། །མི་བུ་འདི་ཚོ་རིག་ས་མེད་དོ། །
ཀྱེ་མ་ད་ནི་ཁོ་ཐག་ཆད་དོ། །གྲོགས་པོ་ཁྱེད་ལ་སྐྱེལ་མ་བྱེད་ཆེད། །
འབྲི་མར་སེར་པོའི་མཆོད་མེ་སྦར་ཡོད། །མིག་ཆུས་བརླན་པའི་སྙན་ངག་བྲིས་ཡོད། །
སྐྱེ་བ་རྗེས་མར་དག་དང་མ་དག །ཞིང་ཁམས་གང་ནས་ལྷན་ཅིག་འཛོམས་དུས། །
རྡ་སའི་གྲོང་ནས་འཕྲད་པ་ཇི་བཞིན། །མཛེས་སྡུག་སྙན་ངག་མཉམ་དུ་འབྲི་འོ། །
སྨྱུག་གྲོགས་རྗེས་དྲན་ཞེས་པའི་སྐོར་ལ་མཆན་ ༡༢ བཀོད་འདུག
-
༡༢༽ ཡེ་ཤེས་དཔལ་ནས།
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༦ སྐར་མ་ ༤༢གོང་གི་ཕྲན་གྱི་མཆན་རྩོམ་དེར་གཏགས་ནོར་གང་མང་ཤོར་འདུག་པས་དགོངས་དག་ཞུ།
-
༡༣༽ རྟ་བདུན་དབང་བོ་ནས།
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༢༠ སྐར་མ་ ༥༤བོད་ཀྱི་སྙན་རྩོམ་པ་ཚེ་རིང་མགོན་པོ་སྐུ་གཤེགས་པར་མྱ་ངན་ཞུ་བ་དང་ཆབ་གཅིག། ཁོང་གི་སྐྱེ་བ་ནས་སྐྱེ་བ་ཐམས་ཅད་དུ་དལ་བའི་རྟེན་ཡང་དག་ཞིག་རྙེད་ནས་སེམས་ཅན་ཐམས་ཅད་ལ་ཕན་ཐོགས་པའི་གང་ཟག་ཞིག་ཏུ་སྐྱེ་བར་ཤོག་ཅིག །
༑རོལ་རྩེད་གར་གྱི་ཉམས་ལྡན་རི་དྭགས་མིག།
མིག་གིས་ལྟ་བར་མི་ངོམས་ཡིད་འཕྲོག་མ།།
མ་ལྟར་བརྩེ་བ་ཁྱོད་ཀྱིས་བདག་གི་ངག།
ངག་དབང་ལྷ་མོ་ཉིད་དང་མཚུངས་པར་མཛོད།།
ཤེས་རབ་དང་བྱམས་བརྩེའི་དྭངས་མ། སྒྲ་སྙན་དང་ལང་ཚོའི་ཡང་རྩེར་འཕགས་པས་ན་ལྷ་མོ་དབྱངས་ཅན་མ་སྟེ། སྙན་ངག་དང་སྙན་ངག་པའི་མཚོན་བྱེད་ལ་ཁྱེད་ལས་ལྷག་པ་ཞིག་ཅི། དེ་བས་ངས་རང་གི་བརྩམས་ཆོས་དག་ལ། <<དབྱངས་ཅན་སྤྲུལ་པའི་གླེགས་བམ>>ཞེས་དང། གློག་དྲ་འདིར་ཡང<དབྱངས་ཅན་སྒྱུ་འཕྲུལ་དྲ་བ>ཞེས་འདོགས་དོན་ཡང་སེམས་པའི་མཛེས་སྡུག་ཅིག་གི་འཚོལ་སྙེག་ལས་མ་འདས་ཏེ། དེ་ནི་ཁྱོད་དམ་ཁྱོད་ཀྱི་གོ་འཕང་ཉིད་དོ།
༢༠༠༩་༡༡་༡༦།
བོད་དོན་གསར་འགྱུར་རྩོམ་གསར་སོགས།
དེ་རིང་སྒོ་བྱང་ངོས་ལ་གཟིགས།
གལ་ཆེའི་བཀའ་སློབ་ཡིག་ཆ་སོགས།
རིན་ཆེན་གསང་བའི་གཏེར་ལས་བཞེས།
སྣ་ཚོགས་འདོད་འཇོའི་གླིང་ཕྲན་འདིར།
ལན་ཅིག་ཕེབས་དང་རྒྱང་རིང་གྲོགས།
ངལ་དུབ་སེལ་བའི་ལམ་རྒྱགས་མང།
སྟག་ལོའི་ཚེས་གཅིག་ནས་དྲ་སྒོ་ཕྱེས། བོད་ནང་ལ་ད་དུང་ཡང་ལྟ་ཀློག་ཐུབ་ཀྱིན་ཡོད། དེ་བས་གཅིག་ནས་གཅིག་བརྒྱུད་ཀུན་ཏུ་འགྲེམས་རྒྱུར་སྙིང་ནས་རེ་སྐུལ་དང་སྨོན་ལམ་ཞུ།
https://fajack.com/index.php
་
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༢ སྐར་མ་ ༡༤
སྙན་ངག་པས་སྙན་ངག་པར་མཆི་མ་བྱོ་དུས། ཁོང་གི་སྙན་ངག་གི་ཆུ་ཐིགས་འདི་ཡང་འདིར་གཏོར་བར་རིགས་སོ།
སྙན་ངག
སྙན་ངག ངའི་ཡ་ཁོག་ན་ལྷོག་ལྷོག་ལྡིང་བཞིན་པའི་སྙིང་གི་འཕར་སྒྲ་ཡིན།
སྙན་ངག མོའི་རྩ་ལམ་ན་དལ་མེད་རྒྱུགས་བཞིན་པའི་ཟུངས་ཁྲག་ཁོལ་མ་རེད།
སྙན་ངག ཁྱེད་ཀྱི་ཁ་སྣ་ནས་ཐོལ་ཐོལ་གཏོང་བཞིན་པའི་དབུགས་ཀྱི་འབྱིན་རྔུབ་རེད།
སྙན་ངག ང་ཚོའི་ནང་གི་དུངས་བ་གསལ་བྱེད་ཡ་ཐོད་ཀྱི་སྤྱན་མིག་རེད།
སྙན་ངག ཨ་མའི་སེམས་གཅོང་གི་ན་ཚ་གསོ་བྱེད་རིན་ཆེན་རིལ་བུ་རེད།
སྙན་ངག གསར་སྐྱེས་ཀྱི་གཞོན་ནུ་ཚོའི་མི་ཚེའི་གསོན་ཤུགས་རེད།
སྙན་ངག དུས་ཚོད་ཀྱིས་རྒས་རྒྱུ་མེད་པའི་གནའ་བོའི་གླུ་གཞས་རེད།
སྙན་ངག དགྲ་ལ་ཐུག་ན་རྣོན་པོའི་མཚོན་ཆ་ཡིན།
སྙན་ངག གྲོགས་ལ་ཐུག་ན་སྒྱུ་རྩལ་གྱི་ལག་རྟགས་ཡིན།
སྙན་ངག མཛའ་མོར་ཐུག་ན་བཅོས་མེད་ཀྱི་བརྩེ་དུངས་ཡིན།
སྙན་ངག བླ་མར་མཇལ་ན་དད་མོས་ཀྱི་འདོན་དབྱངས་ཡིན།
སྙན་ངག བལྟས་ན་མིག་དབང་འཕྲོག་པའི་མཛེས་མ་ཞིག
སྙན་ངག ཉན་ན་སྙན་དབང་གསོ་བའི་གཞས་མ་ཞིག
སྙན་ངག མྱངས་ན་སྒྱུ་རྩལ་རྫོགས་པའི་གཡེམ་མ་ཞིག
སྙན་ངག བསྣམས་ན་པད་མ་ཅན་བཞིན་ཞིམ་པ་ཞིག
སྙན་ངག རེག་ན་འདོད་པ་ཉམས་སུ་མྱོངས་འདྲ་ཞིག
སྙན་ངག བུ་མོ་གཅེར་རུ་ལྟ་བུའི་མཛེས་པ་ཞིག
སྙན་ངག གཅེར་རུའི་ནུ་མ་ལྟ་བུའི་འབུར་བྲིས་ཤིག
སྙན་ངག འབུར་བྲིས་འབུར་འབུར་འགུལ་རྒྱུ་ཡོད་པ་ཞིག
༢ སྙན་ངག་མེད་ན།
སྙན་ངག་མེད་ན་རྣམ་འགྱུར་མེད་པའི་ངོ་གདོང་འདྲ།།
སྙན་ངག་མེད་ན་སྲོག་གིས་མ་བཟུང་བེམ་རོ་འདྲ།།
སྙན་ངག་མེད་ན་སྐྱེ་དངོས་མེད་པའི་བྱེ་ཐང་འདྲ།།
སྙན་ངག་མེད་ན་བྱེ་ཐང་ནང་གི་རྔ་མོང་འདྲ།།
སྙན་ངག་མེད་ན་བྲོ་བ་མེད་པའི་ཟ་མ་འདྲ།།
སྙན་ངག་མེད་ན་དབྱངས་རྟ་མེད་པའི་འཚོ་བ་འདྲ།།
སྙན་ངག་མེད་ན་དགའ་རོགས་མེད་པའི་མི་ཧྲེང་འདྲ།།
སྙན་ངག་མེད་ན་གོ་རྒས་བུ་མོ་གོ་མེད་འདྲ།།
སྙན་ངག་མེད་ན་སེའུ་བཅུ་བའི་ངག་དང་འདྲ།།
སྙན་ངག་མེད་ན་མི་རྒན་འཆོལ་བའི་འཆོལ་གཏམ་འདྲ།།
སྙན་ངག་མེད་ན་སྒྱུ་རྩལ་མེད་པ་ཡིན།།
སྒྱུ་རྩལ་་མེད་ན་གང་ཡང་མེད་པ་ཡིན།།
སྙན་ངག་མེད་ན་ཡིད་སེམས་སྟོང་པ་ཡིན།།
ཡིད་སེམས་སྟོང་ན་འཇིག་རྟེན་སྟོང་པ་ཡིན།
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༢ སྐར་མ་ ༢༢
སྙན་ངག་མཁན་གྱི་མཚན་སྙན་བཟུང་བ་འགར།
སྙན་ངག་ལྷ་མོའི་རིན་ཐང་མ་ཤེས་མང།
སྙན་ངག་ལྷ་མོར་དུངས་ཚུལ་ཐུན་མིན་འདིས།
སྙན་ངག་བྱིན་རླབས་ཞུགས་མིན་ཐེ་ཚོམ་ཅི།
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༢ སྐར་མ་ ༣༠
ཨོཾ་མཎི་པདྨེ་ཧཱུཾ། དམ་པ་ཁོང་ལ་མྱ་ངན་ཞུ།
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༢ སྐར་མ་ ༥༨
ཀླུ་སྨྱོན་པས་སྙན་ངག་པ་ཞིག་གི་ངོས་ནས་འདི་ལྟར་རང་བཞིན་ལྷུག་བརྗོད་ཀྱིས་འདས་མཆོད་སྒྲུབ་རོགས་གནང་བར་སེམས་གཏིང་ནས་བཀའ་དྲིན་ཆེ་ཞུ་དང་འབྲེལ། རྒྱུས་ཡོད་དང་འབྲེལ་ཡོད་གཞན་དག་གིས་ཀྱང་ཆ་ཤས་རེ་ཁ་སྐོང་རྒྱུ་ཐུགས་འགས་འཚལ།
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༣ སྐར་མ་ ༠༠
སྙན་དངགས་པ་ཞིག་ཕྱིན་སོང་ན།
སེམས་པ་དེ་འདྲ་སྐྱོ་དོན་མེད།
གྲྭ་བ་དགེ་བཤེས་ལོག་སོང་ན།
ང་ཡི་སེམས་པ་ཤིན་ཏུ་སྐྱོ།
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༣ སྐར་མ་ ༣༢
སོ་ཇ་སློབ་གྲྭར་ངོ་ཐུག་བྱུང་བའི་།
རྡ་སའི་དཔེ་མཛོད་ཁྱིམ་མཚེས་གྲོགས་པོ།
སྙིང་ཉེའི་གྲོགས་ཀྱི་སྤུན་ཟླ་རྒན་པ།
དེ་རེང་མི་ཡུལ་བྲལ་བ་གོ་དུས།
ས་མཐའ་འདི་ནས་མར་མེའི་ལམ་གྲོ།
མ་ཎི་ཡིག་དྲུག་དང་བཅས་བསྐུར་ཡོད།
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༤ སྐར་མ་ ༤༦
མདའ་ཚན་པ་ཞེས་གོ་མྱོང་ཙམ་ལས། །
མི་ཆུང་ཁོ་བོར་ཆ་རྒྱུས་མེད་ཀྱང་། །
དེ་རིང་ཞོགས་ཀ་ཁ་བརྡར་ཉུལ་དུས། །
གཏམ་ངན་རྩོམ་ཞིག་མིག་ལ་ལྷུང་བྱུང་། །
གཏུམ་དྲག་ཆེ་བའི་གཤིན་རྗེའི་ཕོ་ཉའི། །
རྩུབ་མོའི་ཐག་ནག་སྐེ་ལ་ལྷུང་ན། །
དབང་ཡོད་དབང་མེད་སུ་དང་གང་གིས། །
བསྒྱུར་དུ་མེད་པ་འཇིག་རྟེན་ཆོས་ཉིད། །
མདའ་ཚན་པ་ཡི་སོར་མོའི་གཞུར་ལས། །
ཁ་ལ་འཕྱོ་བའི་མདའ་མོའི་རྗེས་ཤུལ། །
གསོན་དུས་བྲིས་པའི་རྩོམ་ཡིག་ཡིན་ན། །
འབྲེལ་ཡོད་ཚོགས་ཀྱིས་ཕྱོགས་བསྡུར་གནང་རོགས། །
གསོན་པའི་དུས་ན་ཆ་མེད་རྒྱུས་མེད། །
འདས་པའི་ཚེ་ན་གྲོགས་པོ་ཡིན་མདོག །
དེང་གི་མི་ཡི་གཤིས་ཀ་འདི་ལ། །
མི་མངོན་དབྱིངས་ནས་སྐྱོ་བ་མ་གནང་། །
ཕྱི་མའི་འཕྲང་ལམ་ཁེར་རྒྱུ་བྱེད་དུས། །
རྗེ་བཙུན་སྒྲོལ་མས་སྡོངས་གྲོགས་མཛོད་ཅིག །
རྒྱུས་མེད་ཞིང་ཁམས་གང་དུ་སྐྱེས་ཀྱང་། །
ནད་མེད་ཚེ་ཐག་རིང་བའི་སྨོན་ལམ། །
སྙན་ངག་པ་ཞིག་ཡིན་ཚོད་འདུག་ཅིང་། །
ལོ་རྒྱུས་ལ་ཡང་དོ་སྣང་ཡོད་ཚོད། །
རང་གི་རིགས་ལ་དུངས་པ་ཆེ་སྐད། །
མི་བུ་རང་ཚུགས་ཅན་ཞིག་ཡིན་ཚོད། །
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༤ སྐར་མ་ ༥༠
ཚིག་བཅད་རྗེས་མ་བོ་འདི་གཙང་སྤྱོད་ནང་དུ་གཡུག་རོགས་་ཁ་དྲོ་་་བཀྲིས།
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༥ སྐར་མ་ ༡༣
རྒན་མདའ་ཚན་པ་སྐུ་ཚེ་མ་ཟིན་པར་མྱ་ངན་གུས་བཏུས་དང་འབྲེལ་དལ་བརྟེན་རིམ་བརྒྱུད་ཀྱི་བླ་མེད་རྗོགས་བྱང་མྱུར་དུ་འཐོབ་པའི་བསྔོ་སྨོན་འདེབས།
གངས་ཅན་ལྗོངས་ཀྱི་ཆོས་སྲིད་བྱ་བའི་གདུགས།
འདེགས་པའི་སྲིད་ཞུར་གཏོགས་པའི་སྐྱེ་བོ་ཀུན།
ལྷག་བསམ་རྣམ་དག་དཔུང་པ་རབ་བརྟན་ཅིང་།
སྐྱེ་ཀུན་ཕྱག་ན་པདྨོས་རྗེས་བཟུངས་ཤོག།
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༦ སྐར་མ་ ༠༨
(ཁོང་གི་མཆན་འདི་ཟུར་དུ་བཀོད་ཡོད།༵
སྤྱི་ལོ་ ༢༠༡༣ ཟླ་ ༤ ཚེས་ ༧ གི་ཆུ་ཚོད་ ༡༦ སྐར་མ་ ༡༡
གསོན་དུས་མ་ཕན་གཤེ་ཡང་མི་སྐྱོན།
ཤི་དུས་རང་སེམས་རྣལ་ལ་ཕབ་སྟེ།
འཁང་དང་འགྱོད་པའི་སེམས་པ་རྣམ་དག
སྟོན་ཚུལ་འདི་ལ་བདག་ཡིད་རངས་སོ།
ཐ་ན་སྐྱོ་སྣང་ཤས་ཙམ་དག་དང།
ཁ་ཡི་མ་ཎི་ཚར་གཅིག་དག་ཀྱང།
ཕྱི་མའི་ལམ་རྒྱགས་ཆེ་ཆུང་ཅི་སྟེ།
བོད་ཀྱི་དྲི་ཞིག་བྲོ་བ་མིན་ནམ།