ལོ་གསར་བའི་བཀའ་སློབ།

༢༠༡༣ ཟླ་ ༡༢ ཚེས་ ༢༦ རེས་གཟའ་ཕུར་བུ།

༄ ༅། །འདི་གའི་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་སྐལ་བཟང་མཁས་གྲུབ་ ལགས་ཀྱིས་ས་གནས་ནས་བཏང་གནས་ནང་འཁོད་དོན།  ཕྱི་ལོ་ ༢༠༡༣ ཟླ་ ༡༢ ཚེས་ ༢༦ ཉིན་སྔ་དྲོ་ཆུ་ཚོད་ ༨།༤༥ ཐོག་གླིང་མཆོག་སྤྲུལ་རིན་པོ་ཆེ་མཆོག་གི་སྐུ་ཚབ་དགེ་བཤེས་ཐུབ་བསྟན་རབ་རྒྱས་ ལགས་དང་། དགའ་ལྡན་ཤར་རྩེ་མཁན་པོ་དགེ་བཤེས་བྱང་ཆུབ་ཆོས་ལྡན་སོགས་ཀྱིས་སྤོས་སྣེས་སྔོན་ བསུས་ཏེ་སེར་བྱེས་གྲྭ་ཚང་གི་ཆོས་ར་ཆེན་མོའི་བཞུགས་ཁྲི་རིན་པོ་ཆེར་༸ཞབས་སོར་ འཁོད་རྗེས་འབྲས་སྤུངས་སྒོ་མང་གྲྭ་ཚང་གི་མཁན་རིན་པ་ཆེ་མཆོག་དང་ཌོཀ་ཊར་སྦེ་ རི་ལགས་གཉིས་ཀྱིས་མཎྜལ་རྟེན་གསུམ་འདེགས་འབུལ་ཞུས། དེ་རྗེས་༸གོང་ས་མཆོག་གིས་བཀའ་ཆོས་དབུ་འཛུགས་མ་མཛད་གོང་གདན་ས་ཁག་དང་དེ་བཞིན་ བཤད་གྲྭ་ཁག་གི་དགེ་འདུན་པ་རྣམས་ཀྱིས་བསླབ་པ་སློབ་གཉེར་མཐར་ཕྱིན་པ་བྱེད་ དགོས་སྐོར་བཀའ་སློབ་ཕེབས་དོན། དེ་སྔ་གདན་སའི་རྒན་པདྨ་རྒྱལ་མཚན་གྱིས་མཚོན་པའི་རྒན་རབས་པ་ཚོས་དངོས་གནས་ ཐུགས་འཁུར་བསྐྱེད་དེ་ཧུར་ཐག་འབད་ཐག་གནང་སོང་།

སྐབས་ དེ་དུས་དཀའ་ངལ་ཡོད་པ་རེད།  འོན་ཀྱང་ཧུར་ཐག་འབད་ཐག་གནང་ཡོད། དེ་དུས་སློབ་གཉེར་བྱེད་མཁན་དགེ་འདུན་པ་ཧྲག་ཧྲག་ཡོད་པའི་སྐབས་དེར་ངོས་ནས་ སྨྱུག་ཁང་ཞིག་གི་ནང་རུག་རུག་བྱས་ཏེ་ཆོས་འབྲེལ་བྱེད་རྒྱུ་བྱུང་ན་སྙམ་པ་བྱུང་ ལ་ངོས་ནས་དེ་དུས་བརྗོད་རྒྱུ་ཡང་བྱུང་། ཁྱེད་ཚོར་དགེ་རྒན་སྤུས་དག་པོ་འདི་དག་གི་མདུན་ནས་སློབ་གཉེར་སྤུས་དག་པོ་བྱེད་ རྒྱུ་བྱུང་བ་རེད།

དེ་དུས་ངོས་རང་ཡང་དུས་ཚོད་མེད་པ་དང་སྟབས་བདེ་མེད་པ་རེད་མ་གཏོགས་དེར་ བསྡད་དེ་སློབ་གཉེར་ཞིག་བྱས་ན་སྙམ་པ་དྲན་མྱོང་ཡོད། དེ་ནས་མི་རབས་བརྗེ་འགྲོ་གི་ཡོད་པ་བཞིན་མི་རབས་རྗེས་མ་གསར་པ་སླེབ་གིན་སླེབ་ གིན་བྱེད་ཀྱི་ཡོད་ལ་བར་སྐབས་གཞིས་བྱེས་གཉིས་འབྲེལ་བ་གསར་པ་ཞིག་མཐུད་པའི་ རྗེས་ལ་བོད་ནས་གྲྭ་རྒྱུན་མང་པོ་ཞིག་མུ་མཐུད་འབྱོར་ཏེ་དེ་དག་ཚང་མས་ཧུར་ཐག་ འབད་ཐག་གིས་དཔེ་ཆ་བལྟས་ནས་དགེ་བཤེས་ཐོན་ཏེ་དཔེ་ཆ་གང་ཙམ་ཤེས་རྗེས་རང་རང་གི་ ལུང་པར་ཕྱིན་ཏེ་དེ་སྔ་དགོན་པ་དེ་ཚོའི་ནང་གཞུང་ཆེན་སློབ་གཉེར་མེད་མཁན་ཚོར་ གསར་དུ་ཚུགས་ཐུབ་པ་དང་ཡོད་པ་ཚོ་གོང་འཕེལ་གཏོང་རྒྱུ། ཡུལ་པ་ཚོར་ནང་ཆོས་ངོ་སྤྲོད་ཀྱི་མཚོན་པའི་ཁུར་བླངས་ཏེ་བསྟན་པའི་ཞབས་འདེགས་ མིག་མཐོང་ལག་ཟིན་ཡག་པོ་བྱུང་འདུག་པར་རྗེས་སུ་ཡི་རང་ཡོད། ད་ལྟ་སློབ་གཉེར་བྱས་དང་བྱེད་བཞིན་པ་ཁྱེད་རྣམས་སོ་སོའི་མི་ཚེའི་དོན་ཁོ་ན་མ་ རེད། རྗེ་རིན་པོ་ཆེས་ཐུགས་སྨོན་མཛད་ཡོད་པ་ལྟར། བསྟན་པ་རིན་ཆེན་མ་ཁྱབ་པའི་གནས་དང་ཁྱབ་ནས་ཡོད་ཀྱང་དེ་དག་མི་ཉམས་གོང་འཕེལ་ གཏོང་རྒྱུའི་སླད་ལས་འགན་འཁྱེར་མཁན་དེ་ཁྱེད་རྣམས་ཆགས་ཡོད། དེ་ཡང་གདན་སའི་ནང་བསྡད་དེ་དཔེ་ཆ་ལྟ་མཁན་ཁྱེད་རྣམ་པ་དཔེ་མི་སྲིད་པའི་གལ་ཆེན་ པོ་ཆགས་ཡོད། མཁས་གྲུབ་གཉིས་ལྡན་གྱི་དགེ་རྒན་ཧ་ཅང་གལ་ཆེན་པོ་རེད། དུས་རབས་རྫོགས་འགྲོ་གི་ཡོད་ཀྱང་མི་རབས་གསར་པའི་ནང་གི་དཔེ་ཆ་ཤེས་མཁན་ཚོ་རིམ་ བཞིན་ཡོང་གི་ཡོད། ཁྱེད་རང་ཚོ་ཚང་མར་བསྔགས་བརྗོད་ཡོད། ངོས་རང་རྡ་ས་དང་ཕྱི་རྒྱལ་སོགས་སུ་བསྐྱོད་སྐབས་གདན་ས་ཚོའི་ནང་དཔེ་ཆ་ལྟ་མཁན་ ཧ་ཅང་ཡག་པོ་ཡོད་སྙམ་སྟེ་སྤོབས་སེམས་དང་སྤྲོ་སྣང་བསླེབ་རྒྱུ་ཞིག་ཡོང་བཞིན་ འདུག དེར་བརྟེན་ཁྱེད་ཚོས་ད་བར་ཧུར་ཐག་འབད་ཐག་བྱས་ཡོད།

དེ་ ནས་བོད་སྤྱི་པའི་དོན་ལ་ཆ་བཞག་ན། ང་ཚོའི་འཐབ་རྩོད་དེ་ནི་མེ་མདའི་སྟོབས་ཤུགས་དང་བདེན་པའི་སྟོབས་ཤུགས་ཀྱི་འཐབ་ རྩོད་རེད། མེ་མདའི་སྟོབས་ཤུགས་ཟེར་བ་དེར་འཕྲལ་སེལ་གྱི་ཆ་འཇོག་ཆེན་པོ་ཡོང་གི་རེད།  འོན་ཀྱང་ཕུགས་རྒྱང་རིང་པོའི་ཆ་ནས་བདེན་པའི་སྟོབས་ཤུགས་གལ་ཆེ་གི་རེད་མ་ གཏོགས་མེ་མདའི་སྟོབས་ཤུགས་ཟེར་བ་དེ་ཁག་པོ་རེད། ཕྱི་ལོ་ ༡༩༤༩ ། ༡༩༥༠ ནས་བརྩིས་ན་བདེན་པའི་སྟོབས་ཤུགས་དེ་ལོ་ངོ་དྲུག་ཅུ་བརྒལ་འགྲོ་གི་ཡོད། འོན་ཀྱང་བོད་ནང་གི་མི་མང་ཚོ་ཡིན་ནའང་ཧ་ལས་པའི་སེམས་ཤུགས་ཆེན་པོ་རེད། ད་ཆ་བདེན་པའི་སྟོབས་ཤུགས་གསལ་ཏེ་རྒྱ་རིགས་གྲོགས་པོ་ཚོའི་ནང་དུ་ཡིན་ཡང་རྩོམ་ ཡིག་འབྲི་མཁན་དང་སྒྱུ་རྩལ་མཁན། ནང་ཆོས་ལ་དོ་སྣང་ཡོད་མཁན་ཚོ་བཅས་ཀྱི་བོད་ཀྱི་བདེན་དོན་ལ་ཤ་ཚ་དང་སེམས་ཁུར་ བྱེད་མཁན། དཔེར་ན།  འདས་པའི་ལོ་ངོ་གསུམ་ཙམ་ནང་བོད་ཀྱི་གནད་དོན་རྒྱ་ཡིག་ནང་རྩོམ་ཡིག་རྒྱ་ནག་རང་ ནས་རྒྱ་མི་རིགས་ཀྱིས་བྲིས་པའི་རྩོམ་ཡིག་ཉིས་བརྒྱ་ཙམ་དང་།  དེ་བཞིན་ཐེ་ཝན་དང་ཕྱི་རྒྱལ་ཁག་བཅས་ནས་བྲིས་པ་སྟོང་ཕྲག་ལྷག་ཙམ་ཡོད། དེ་དག་ཚང་མའི་ནང་ང་ཚོས་དབུ་མའི་ལམ་ཞེས་པའི་གཉིས་སྨན་རང་རྒྱལ་གཞན་ཕམ་ཟེར་ རྒྱུ་མིན་པའི་སྲིད་བྱུས་དེར་རྒྱབ་སྐྱོར་ཤུགས་ཆེ་གནང་གི་ཡོད་པ་མ་ཟད།  རྒྱ་ནག་གཞུང་གི་སྲིད་བྱུས་ལ་སྐྱོན་བརྗོད་བྱས་ཡོད་པའི་རྩོམ་ཡིག་ང་ཚོས་དོ་ སྣང་བྱུང་བ་སྟོང་ཕྲག་ལྷག་ཙམ་འདུག དེ་དག་ནི་ང་ཚོའི་བདེན་པའི་སྟོབས་ཤུགས་ཀྱི་ནུས་པ་དེ་གསལ་ཡོང་གི་ཡོད། བོད་མིར་བདེན་པའི་སྟོབས་ཤུགས་ཡོད་པར་སོང་ཡུན་རིང་པོའི་ཆ་ནས་དེ་ངེས་པར་དུ་ མཐའ་གསལ་རྒྱུ་རེད། བོད་རྒྱ་ཆེའི་མི་མང་གིས་སྙིང་སྟོབས་དང་སེམས་ཤུགས་དེ་འདྲ་ཞིག་དུས་ད་ལྟ་བར་ དུ་གནས་ཡོད། སོ་སོའི་མི་རིགས་ཀྱི་སྐད་ཡིག་དེའི་ནང་དུ་སངས་རྒྱས་པའི་ཆོས་ཕྱུག་ཤོས་དེ་གནས་ ཡོད། བོད་དབུས་གཙང་མདོ་སྟོད་སྨད་ཀྱི་ས་ཁུལ་ཡོངས་རྫོགས་ནང་སོ་སོའི་མི་རིགས་ཀྱི་ ལར་ཞེན་དང་ལྟ་བ། རང་ཉིད་ཆོས་ལུགས་ལ་དད་པ་མེད་ཀྱང་མི་རིགས་ཀྱི་བསམ་བློ་ཡོད་མཁན་ངོས་ཀྱི་ངོ་ ཤེས་མང་པོ་ཡོད། གུང་ཁྲན་ཏང་ཡོན་འབའ་བ་ཕུགས་ཚོགས་དབང་རྒྱལ་དང་ཡང་གླིང་རྡོ་རྗེས་མཚོན་གུང་ ཁྲན་ཏང་ཡོན་རེད། ཁོ་ཚོ་ཆོས་ལ་དད་པ་མེད་ཀྱང་མི་རིགས་ཀྱི་ཞེན་ཁོག་དང་ལྷག་བསམ་ཧ་ལས་པ་རེད།

ཕྱོགས་ གཅིག་ནས་བསམ་བློ་བཏང་ན་ཆོས་ཕྱོགས་ཀྱི་གནས་ཚུལ་དེས་ཆབ་སྲིད་གནས་ཚུལ་ཐོག་ཕན་ ཐོགས་བྱུང་ཡོད་དམ་བརྗོད་ན། ཆོལ་ཁ་གསུམ་ཡོངས་སུ་རྫོགས་པར་རྡོག་ལ་བསྒྲིལ་ནས་བསྡད་ཐུབ་པ་དེ་སངས་རྒྱས་པའི་ ཆོས་དང་བོད་ཀྱི་སྐད་ཡིག་གིས་ཡིན་འདུག དེར་བརྟེན་ཆབ་སྲིད་གནས་ཚུལ་མ་རེད།  ཆབ་སྲིད་གནད་དོན་ཐོག་ཕན་ཐོགས་ཤུགས་ཆེ་ཡོད་པ་གསལ་པོ་ཆགས་ཡོད། གང་ལྟར་བོད་པའི་ཆེ་མཐོང་ལྟ་བུ་དེ་སངས་རྒྱས་པའི་ལྟ་གྲུབ་རྣམས་ཆགས་ཡོད། ངོས་ཀྱིས་ལྟ་གྲུབ་དང་ཆོས་གཉིས་དབྱེ་བ་འབྱེད་ཀྱི་ཡོད། སངས་རྒྱས་པའི་གཞུང་ནས་གསུངས་པའི་ཚན་རིག་དང་། སངས་རྒྱས་པའི་གཞུང་ནས་གསུངས་པའི་ལྟ་གྲུབ། དེ་ནས་སངས་རྒྱས་པའི་ཆོས་བཅས་དུམ་བུ་གསུམ་ལ་དབྱེ་གི་ཡོད། སངས་རྒྱས་པའི་གཞུང་ནས་གསུངས་པའི་ལྟ་གྲུབ་དང་ཚན་རིག་དེ་དག་སྤྱི་ཡོངས་ཐུན་ མོང་གི་བསྒྲུབ་རྒྱུ་ཞིག་ཡིན། སངས་རྒྱས་པའི་ཆོས་དེ་ནང་པ་ཡོངས་སུ་རྫོགས་པས་བདག་པོ་རྒྱག་དགོས་པ་རེད། དེ་ལྟར་བཀའ་འགྱུར་བསྟན་འགྱུར་པོད་སུམ་བརྒྱ་ཡས་མས་ཡོད་པ་དེ་རྣམས་དུམ་བུ་ གསུམ་དུ་དབྱེ་བ་ཕྱེ་ཡི་ཡོད། ལྟ་གྲུབ་དང་ཚན་རིག ནང་ཆོས་བཅས་དུམ་བུ་གསུམ་ཕྱེ་རྒྱུ་དེ་འགོ་བཙུགས་ཏེ་ཚན་རིག་གི་སྡེ་ཚན་དེ་ལོ་ གསར་པའི་ནང་ཐོན་ཐུབ་རེ་ཡོད་པ་ཡིན།

ཅེས་དང་ཡང་༸གོང་ས་མཆོག་གིས་དེང་རབས་ཀྱི་སློབ་གསོའི་སྐོར་བཀའ་སློབ་ཕེབས་ དོན། སྐུ་མདུན་སྐུ་གོང་མས་བོད་ཕྲུག་གཞུང་ཞབས་གཞོན་པ་ཁག་གཅིག་དབྱིན་ཡུལ་དུ་སློབ་ སྦྱོང་ལ་གཏོང་གནང་མཛད་པ་ལག་ལེན་མཐའ་འཁྱོལ་མེད། གདན་སའི་མཁན་པོ་ཚོའི་ནང་ནས་བསྟན་དགྲ་ཕྱི་གླིང་བའི་སྐད་ཡིག་བསླབ་ན་སངས་རྒྱས་ ཀྱི་བསྟན་པར་གནོད་ཀྱི་རེད།  ཅེས་བརྗོད་ཡོད། འོན་ཀྱང་དེ་རིང་ཁ་སང་མཁན་པོ་ཚོའི་ནང་མང་པོ་ཞིག་ཕྱི་རྒྱལ་ཡུལ་གྲུ་ཁག་ནང་ བརྒྱུགས་དགོས་ཀྱི་འདུག ད་ཆ་ཕྱི་མིག་ལྟ་སྐབས་ནོར་འཁྲུལ་མང་པོ་ཞིག་ང་ཚོས་ལྷོད་གཡེང་དང་འཐུས་ཤོར་ ཕྱིན་ཡོད། ཅེས་སོགས་ཀྱི་བཀའ་སློབ་ཕེབས་རྗེས་བཀའ་ཆོས་ལྷག་འཕྲོ་ནས་ཆོས་འབྲེལ་བཀའ་དྲིན་ ཆེ་བ་སྩལ།།

༢༠༡༣ ཟླ་ ༡༡ ཚེས་ ༢༧ རེས་གཟའ་ལྷག་པ།

༄ ༅། །ཕྱི་ལོ་ ༢༠༡༣ ཟླ་ ༡༡ ཚེས་ ༢༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་དུ་མཛད་འཕྲིན་ཉིན་ མཐའ་མར་ཉི་ཧོང་དུ་གནས་སྡོད་བོད་རིགས་ཁྱོན་མི་གྲངས་ ༡༠༣ ཙམ་ལ་བཀའ་སློབ་བཀའ་དྲིན་ཆེ་བ་སྩལ་དོན། ད་ལྟའི་ཆར་ང་ཚོ་བོད་མི་རྣམས་བོད་ཀྱི་ལོ་རྒྱུས་ནང་དུས་ཚོད་གཉན་འཕྲང་ཧ་ཅང་ཆེ་ བའི་སྐབས་ཤིག་ལ་བསླེབས་ཡོད། དེར་བརྟེན་ཁྱེད་རང་ཚོ་རང་དབང་ལུང་པའི་ནང་གནས་སྡོད་བྱེད་བཞིན་ཡོད་ཀྱང་སོ་སོ་ བོད་པའི་སྙིང་སྟོབས་དེ་ནམ་ཡང་ཞུམ་པ་མེད་པའི་ཐོག་གནས་ཐུབ་དགོས། ང་ཚོས་གཉིས་སྨན་དབུ་མའི་ལམ་གྱི་ལངས་ཕྱོགས་བཟུང་སྟེ་བོད་ཀྱི་དཀའ་རྙོག་སེལ་ རྒྱུའི་རེ་བ་བྱེད་བཞིན་ཡོད། དེང་སྐབས་རྒྱ་ནག་ནང་དུ་ནང་པ་ས་ཡ་ ༤༠༠ ཙམ་ཡོད་པའི་ཁོངས་སུ་མང་ཆེ་བ་ཤེས་ལྡན་པ་དང་བོད་བརྒྱུད་ནང་བསྟན་ལ་དོ་སྣང་ཡོད་ མཁན་ཤ་སྟག་རེད། དེར་བརྟེན་རྒྱ་རིགས་ནང་པ་ཁ་ཤས་རྒྱ་གར་དུ་ཆེད་མངགས་ངོས་རང་ཐུག་ཆེད་ཡོང་སྐབས་ ཁོང་ཚོ་མང་ཆེ་བས་ངོས་དང་ཐུག་སྐབས་མིག་ཆུ་གཏོང་གི་འདུག རྒྱ་ནག་གཞུང་གི་དཔོན་རིགས་ཁག་གཅིག་བསམ་བློ་ཕྲན་བུ་གུ་ཡངས་དང་དངོས་ཡོད་གནས་ ཚུལ་ཁས་ལེན་མཁན་ཡིན་ནའང་གཞན་ཁག་གཅིག་གིས་མཁྲེགས་བཟུང་བྱེད་བཞིན་ཡོད། བོད་མི་ཚོས་ཆོད་སེམས་བརྟན་པོའི་ཐོག་ནས་འཚེ་མེད་ཞི་བའི་ཐབས་ལམ་ལག་བསྟར་བྱས་ དང་བྱེད་མུས་ལ་བརྟེན་ད་ལྟའི་ཆར་རྒྱ་རིགས་ཤེས་ལྡན་མི་སྣའི་ཁྲོད་བོད་དོན་ཐོག་ རྒྱབ་སྐྱོར་གནང་མཁན་ཇེ་མང་དུ་འགྲོ་བཞིན་ཡོད་པ་འདི་ནི་ང་ཚོར་བཟང་ཕྱོགས་ཀྱི་ གྲུབ་འབྲས་ཆེན་པོ་ཞིག་ཐོབ་པར་ངོས་འཛིན་བྱས་ཆོག

ཁྱེད་ རང་ཚོས་དུས་རྟག་ཏུ་མི་གཞན་ལ་མགོ་སྐོར་བསླུ་བྲིད་མ་བྱས་པར་ཡ་རབས་བཟང་སྤྱོད་ ལྡན་པའི་ཐོག་ནས་མི་ཚེ་སྐྱེལ་ཐབས་བྱེད་དགོས། བོད་མི་རྣམས་ལ་རང་བཞིན་གྱི་སེམས་པ་བཟང་པོ་བྱ་རྒྱུ་དང་། དྲང་བདེན་བྱ་རྒྱུའི་གོམས་གཤིས་དེ་དག་མུ་མཐུད་རྒྱུན་འཁྱོངས་བྱ་རྒྱུ་ཧ་ཅང་གལ་ ཆེན་པོ་ཡིན། ཉེ་ཆར་ངོས་ཀྱི་ཨ་རིའི་གྲོང་ཁྱེར་ནིའུ་ཡོཀ་ནང་བོད་མི་ཚོར་ཡ་རབས་བཟང་སྤྱོད་ བྱེད་དགོས་སྐོར་ཤོད་སྐབས་ཀྱི་ཉིན་དེ་རང་ལ་བོད་མི་ཞིག་གིས་འཁྲུག་འཛིང་བྱས་ ཏེ་མི་གཅིག་བསད་པའི་གནས་ཚུལ་གོ་བྱུང་། དེ་དག་ཧ་ཅང་བློ་ཕམ་པའི་གནས་ཚུལ་རེད། དེར་བརྟེན་ཁྱེད་ཚོས་ཕྲལ་སེལ་གྱི་ཁེ་ཕན་ཕྲན་བུའི་ཆེད་བོད་མིའི་མཚན་མཐོང་ བློས་མ་བཏང་བར་བོད་མི་རིགས་ཀྱི་སྲོལ་རྒྱུན་ནས་ཡོད་པའི་རྩ་ཆེའི་རིག་གཞུང་ རྒྱུན་འཁྱོངས་ཡོང་ཐབས་བྱེད་དགོས། ཁྱེད་ཚོའི་ཕྲུ་གུ་ཚོས་བོད་སྐད་རྒྱག་རྒྱུ་དང་འབྲི་ཀློག་སྦྱང་རྒྱུ་ཧ་ཅང་གལ་ ཆེན་པོ་ཡིན། ཀ་ཤི་མིར་བོད་རིགས་ཁ་ཆེ་བ་གཞོན་སྐྱེས་རྣམས་ཀྱིས་བོད་སྐད་དང་བོད་ཡིག་སློབ་ གྲྭ་མེད་ཀྱང་ཁོང་ཚོའི་བོད་སྐད་ཧ་ལས་པའི་ཡག་པོ་རྒྱག་བཞིན་འདུག་པ་དེར་ངོས་རང་ ཧ་ལས་བྱུང་། ཁོང་ཚོས་རང་གི་ཕ་མེས་ཡང་མེས་ནས་བོད་སྐད་བཤད་པ་རེད། འོན་ཀྱང་ཨ་རིའི་ནང་བོད་པའི་ནང་མི་གཅིག་གིས་རང་གི་ཕྲུ་གུ་ཚོར་དབྱིན་སྐད་ཁོ་ ན་བེད་སྤྱོད་བྱེད་མཁན་ཞིག་དང་ཐུག་བྱུང་། བོད་མི་གཞོན་སྐྱེས་ཁག་གཅིག་གིས་རང་བཙན་རྩོད་བཞིན་ཡོད། རང་བཙན་དེ་ང་ཚོའི་ཐོབ་ཐང་ཡིན། འོན་ཀྱང་༸གོང་ས་སྐུ་ཕྲེང་ ༡༣ ཆེན་པོའི་སྐབས་ཀྱི་རང་བཙན་དེ་ཆོལ་ཁ་གསུམ་ཆ་ཚང་བ་ཞིག་ཚུད་ཀྱི་མེད། འོན་ཀྱང་དུས་རབས་ ༧ དང་ ༩ སྐབས་ཀྱི་བོད་རང་བཙན་གྱི་གནས་སྟངས་དེ་ང་ཚོ་ཙམ་མ་ཟད། རྒྱ་ནག་གི་ལོ་རྒྱུས་ནང་དུའང་གསལ་པོར་འཁོད་ཡོད། ཁ་ཤས་ཀྱིས་ང་ཚོའི་ལངས་ཕྱོགས་དེ་དབུ་མའི་ལམ་ནས་རང་བཙན་ལ་ཁ་འགྱུར་དགོས་ཀྱི་ འདུག་ཅེས་བསམ་འཆར་འདོན་བཞིན་ཡོད། ང་ཚོ་རང་དབང་ལུང་པའི་ནང་ཡོད་པའི་བོད་མི་ཚོས་རང་བཙན་དགོས་ཞེས་ཨུ་ཚུགས་བརྒྱབ་ པ་དེས་གཞིས་བཞུགས་བོད་མི་ཚོར་དཀའ་ངལ་འཕྲད་རྒྱུ་ཡིན། སྟོབས་ཆེན་རྒྱལ་ཁབ་ཚོས་ཀྱང་རྒྱ་ནག་ལ་བསྟུན་དགོས་ན་ང་ཚོ་དེ་བས་ལོས་བསྟུན་ དགོས། ཕྱི་ལོ་ ༡༩༥༦ དང་ཕྱི་ལོ ༡༩༥༩ ལོ་སོ་སོར་ངོས་ནས་རྒྱ་གར་གྱི་སྲིད་བློན་པན་ཌི་ཏ་ནེ་རུ་མཆོག་དང་མཇལ་འཕྲད་ སྐབས་ཨ་རིས་བོད་དོན་ཆེད་རྒྱ་ནག་དང་དམག་ནམ་ཡང་རྒྱག་རྒྱུ་མ་རེད་ཅེས་གསུངས་ བྱུང་།

ང་ཚོས་རང་བཙན་དགོས་ཞེས་བརྗོད་ན་འབྲས་བུ་གང་ཡང་ཐོབ་རྒྱུ་མེད་ཁར་དོན་མེད་ རྒྱ་ནག་ཁོང་ཁྲོ་སློང་རོགས་རེད། རྒྱ་གར་དང་ཡུ་རོབ་སྤྱི་མཐུན་ཚོགས་པ་གཉིས་ང་ཚོས་མིག་དཔེར་ལེན་ཆོག བོད་པ་ཚོ་ལའང་དཔལ་འབྱོར་འཛུགས་སྐྲུན་ཡར་རྒྱས་དགོས། བོད་པ་ཚོར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་གཅིག་རག་པ་ཡིན་ན་ བདེ་སྲུང་དང་ཕྱི་འབྲེལ་མ་གཏོགས་གཞན་ཤེས་ཡོན་དང་སྐད་ཡིག ཆོས། ཁོར་ཡུག་སོགས་ལ་བོད་པ་རང་གིས་འགན་འཁྱེར་རྒྱུ་ཡོང་གི་རེད། ང་ཚོས་ཞོགས་པ་ཡར་ལངས་པ་དང་སེམས་ཅན་ཐམས་ཅད་བདེ་བ་དང་ལྡན་ཞིང་སྡུག་བསྔལ་དང་ བྲལ་བ་ཤོག ཅེས་སྨོན་ལམ་ནང་རྒྱ་རིགས་ཚོའང་ཚུད་ཡོད། ང་ཚོས་སེམས་ཅན་ཐམས་ཅད་ནང་ནས་རྒྱ་རིགས་ཚོ་ཕུད་ཀྱི་མེད། ཅེས་བཀའ་སློབ་སྩལ་བསྟུན་༸གོང་ས་མཆོག་ན་རི་ཏ་རྒྱལ་སྤྱིའི་གནམ་ཐང་དུ་ཆིབས་ སྒྱུར་བསྐྱངས་ཏེ་རྒྱ་གར་དུ་ཆིབས་ཞལ་བསྒྱུར་ཡོད།།

བོད་གཞུང་དྲ་བ་ལས།

གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གྲོས་ཚོགས་ཀྱི་འཐུས་མི་རྣམས་ལ་བཀའ་སློབ་སྩལ་བ།

༢༠༡༣ ཟླ་ ༡༡ ཚེས་ ༡༩ རེས་གཟའ་མིག་དམར།

༄ ༅། །འདི་གའི་ཆེད་གཉེར་གསར་འགོད་པ་པདྨ་ཚེ་རིང་གིས་ཉི་ཧོང་ནས་བཏང་གནས་ནང་འཁོད་ དོན། ཕྱི་ལོ་ ༢༠༡༣ ཟླ་ ༡༡ ཚེས་ ༡༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཊོག་ཁྱིའོ་མི་ན་ཏོ་ Minato གྲོང་ཁྱེར་ཁུལ་དུ་རྟེན་གཞི་བྱས་པའི་ཛོ་ཇོ་ཇི་ Zojoji Temple ནང་པའི་དགོན་པར་ཆིབས་སྒྱུར་བསྐྱངས་ཡོད། ཉི་ཧོང་ནང་པའི་དགོན་པ་དེར་༸ཞབས་སོར་འཁོད་སྐབས་དགོན་པའི་མཁན་རིན་པོ་ཆེས་ དབུས་དགེ་འདུན་པ་རྣམ་པས་ཕེབས་བསུ་གཟབ་རྒྱས་ཞུས་ཡོད། ༸གོང་ས་མཆོག་དགོན་པའི་ལྷ་ཁང་གཙོ་བོར་༸ཞབས་སོར་འཁོད་རྗེས་མཁན་རིན་པོ་ཆེ་ མཆོག་གིས་འཚམས་འདྲི་ཞུས་པ་དང་སྦྲགས་དགོན་དེར་གནས་གཟིགས་དང་སྨོན་ལམ་གསུང་ འདོན་དབུ་འཛུགས་ཀྱིས་དེག་འདུན་པ་ ༡༥༠ ཙམ་ཡོད་པ་རྣམ་ཀྱིས་སྨོན་ལམ་གསུང་འདོན་གནང་། སྨོན་ལམ་ལས་རིམ་དེ་གྲུབ་མཚམས་༸གོང་ས་མཆོག་གིས་ཉི་ཧོང་གི་དགེ་འདུན་པ་གཉིས་ དང་། མི་སྐྱ་བུད་མེད་གཉིས་བཅས་ལྷན་དུ་བྱམས་བརྩེའི་ལམ་ནས་སྡུག་བསྔལ་ལས་གྲོལ་ཐབས་ དང་འབྲེལ་བའི་བརྗོད་གཞིའི་ཐོག་བཀའ་འདྲི་དགོངས་སྐོར་དང་བཀའ་སློབ་སྩལ།

སྐབས་ དེར་༸གོང་ས་མཆོག་གིས་བཀའ་སློབ་ཕེབས་དོན། འཛམ་གླིང་འདིའི་སྟེང་འགྲོ་བ་མི་གཙོ་བོར་གྱུར་བའི་སྲོག་ཆགས་གྲངས་ལས་འདས་པ་ ཡོད། དེ་ཚོའི་ནང་ནས་སྡུག་བསྔལ་སེལ་རྒྱུའི་ཐབས་ཤེས་གཙོ་བོ་མི་མ་གཏོགས་སྲོག་ཆགས་ གཞན་གྱིས་བྱེད་མི་ཐུབ། མི་རྣམས་ལ་ཤེས་ཡོན་དང་རྣམ་དཔྱོད་ཡོད་པ་ཙམ་གྱི་ཕན་གྱི་མེད། སྐབས་རེ་མིས་སྡུག་བསྔལ་འཕར་མ་བཟོ་བཞིན་ཡོད། གཞན་ཕན་གྱི་བསམ་པ་དེ་རྩ་བར་ཐུག་གི་ཡོད། ཇི་ཙམ་གྱི་གཞན་ཕན་གྱི་བསམ་པ་དང་གཞན་ལ་དངོས་ཤུགས་བརྒྱུད་གསུམ་ནས་ཕན་ཐོགས་ བྱེད་ཐུབ་ན་སོ་སོ་རང་ཉིད་ཡིད་ཚིམ་པོ་དང་མི་ཚེ་དོན་དང་ལྡན་པ་ཡོང་རྒྱུར་ཕན་ ཐོགས་ཡོད་པ་དང་། འཆི་ཁར་ཡང་སེམས་ནང་འདེང་ཚོད་དང་སྤོབས་པ་ལྡན་པའི་ཐོག་ནས་ཤི་རྒྱུ་ཡོང་གི་ཡོད། དེ་འདྲ་ཡིན་དུས་བསྟན་བཅོས་ནང་བསམ་པ་གཞན་དོན་བསམ་ནས་རང་དོན་ཞོར་ལ་གྲུབ་ཡོང་ གི་རེད་ཅེས་གསུངས་ཡོད། རང་དོན་འབའ་ཤིག་བསམས་ནས་བསྡད་ན་སོ་སོར་སེམས་ཁྲལ་མང་བ་དང་དངངས་སྐྲག་ཆེ་རུ་ འགྲོ་གི་ཡོད་པ་མ་ཟད། མ་སྐྱིད་པའང་ཡོང་གི་ཡོད། དེས་རྐྱེན་པས་སོ་སོའི་གཟུགས་པོའང་ནད་ན་ཚ་ཡོང་རྒྱུ་དང་ཚེ་ཐུང་དུ་འགྲོ་རྒྱུ་ ཡོང་གི་ཡོད། དེ་རིང་ཁ་སང་སྨན་བཅོས་ཚན་རིག་པ་ཚོས་སེམས་ལ་དངངས་སྐྲག་ཤུགས་ཆེ་བྱུང་ན་གཟུགས་ པོར་ཧ་ཅང་གནོད་ཀྱི་ཡོད་ཅེས་བརྗོད་ཀྱི་ཡོད། ཡང་སེམས་ལ་ཡིད་ཆེས་དང་སྤོབས་པ་ཡོད་པ་བཅས་བྱས་ན་སེམས་ལ་ཞི་བདེ་ཡོང་གི་ཡོད། དེས་གཟུགས་པོར་ཕན་གྱི་ཡོད།

དེར་བརྟེན་ཇི་ཙམ་གྱི་ང་ཞེས་རང་དོན་གཅིག་པུ་བསམ་ནས་བསྡད་ན་དངངས་སྐྲག་ཆེ་ བ་ཡོང་གི་ཡོད། འཛམ་གླིང་འདིའི་སྟེང་གི་ཆོས་ལུགས་ལྟ་གྲུབ་ཡོད་པ་ཚང་མས་བྱམས་པ་དང་བརྩེ་བ་ ཉམས་ལེན་བྱེད་དགོས་པ་གསུང་གི་ཡོད། འོན་ཀྱང་ལྟ་བ་མི་འདྲ་བ་ཡོང་གི་ཡོད། དེ་ག་རེ་རེད་ཟེར་དུས་ས་གནས་དང། གོམས་སྲོལ་མི་འདྲ་བར་བརྟེན་ནས་བྱུང་བ་ཡིན། དེ་འདྲ་ཡིན་དུས་ཁམས་དང་མོད་པ་མི་འདྲ་བ་ལ་བྱམས་བརྩེ་གོང་འཕེལ་གཏོང་རྒྱུར་ ཐབས་ལམ་མི་འདྲ་བ་ཡོང་གི་ཡོད། བྱས་ཙང་ཇི་ཙམ་གྱི་གཞན་ལ་ཕན་བདེ་བསྒྲུབས་ན་བདག་ལ་ཕན་པ་དང་། ཇི་ཙམ་གྱི་གཞན་ལ་གནོད་པ་བྱས་ན་རང་ལ་སྡུག་བསྔལ་ཡོང་གི་རེད། སྡུག་བསྔལ་བྱུང་སྐབས་སེམས་སྐྱོ་ནས་རེ་བ་བྲལ་པ་ལྟ་བུ་བྱས་ཏེ་མ་བསྡད་པར་གདོང་ ལེན་བྱེད་དགོས། ཡང་སྡུག་བསྔལ་ལ་མི་འདོད་པ་བྱེད་པ་ཙམ་གྱི་འགྲིག་གི་མེད། སྡུག་བསྔལ་གྱི་རྒྱུ་གང་ཡིན་རྩད་གཅོད་བྱས་ནས་འགོག་ཐབས་བྱེད་པའི་རྒྱུ་སྡུག་ བསྔལ་སེལ་རྒྱུའི་ཐབས་ཤེས་བྱེད་དགོས་ཅེས་བླང་དོར་བཀའ་སློབ་སྩལ་ཡོད།

ལས་རིམ་དེའི་ནང་གི་གཏམ་བཤད་གནང་མཁན་བུད་མེད་ཏེ་རུ་མི་ཨོ་ཀ་ཀུ་ Terumi Okaku ཁོང་རང་ཉིད་ཀྱི་ཨ་མ་ལགས་དང་བུ་སྤུན་གཉིས་དེ་སྔ་འདས་གྲོངས་སུ་གྱུར་སྟབས་ སྡུག་བསྔལ་ཤུགས་ཆེ་མྱངས་རྗེས་ཁོང་གིས་དེ་འདྲའི་སྡུག་བསྔལ་མནར་མཁན་མི་གཞན་ ལའང་སྙིང་སྟོབས་སྐྱེས་རྒྱུར་ཕན་གྲོགས་གནང་ཆེད་འཚོ་གནས་བྱེད་དགོས། ‘Live On’ཞེས་པའི་ཚོགས་པ་གསར་འཛུགས་ཀྱིས་བྱུང་བའོ་གོད་ཆག་དང་། དམག་འཁྲུག ནད་ཡམས་སོགས་ཀྱི་རྐྱེན་ངན་འོག་ཕ་མ་འདས་གྲོངས་སུ་གྱུར་བའི་དྭ་ཕྲུག་རྣམས་དཀའ་ ངལ་ཧ་ཅང་མྱངས་ནས་རང་ཤི་རྒྱག་འདོད་བྱེད་མཁན་དང་། སེམས་ཤུགས་ཆག་ནས་མྱོས་རྫས་རིགས་ལོངས་སྤྱོད་མཁན་སོགས་ལ་ལམ་སྟོན་རོགས་རམ་གནང་ བཞིན་ཡོད། ༸གོང་ས་མཆོག་ནས་ཀྱང་ཁོ་མོས་རྐྱེན་ངན་བྱུང་བ་དེས་གཞན་ཕན་གྲུབ་རྒྱུའི་སྙིང་ སྟོབས་སུ་གྱུར་ནས་ད་བར་སྡུག་བསྔལ་མནར་མཁན་གཞན་ཚོར་གང་ཐུབ་རོགས་བྱས་པར་ བསྔགས་བརྗོད་ཤུགས་ཆེ་མཛད་ཡོད།

དེ་རྗེས་མང་ཚོགས་ནས་སེམས་ཀྱི་སྡུག་བསྔལ་སྐོར་སོགས་དང་ལྷག་པར་དུ་རང་ལུས་ མེར་སྲེག་སྐོར་གྱི་དྲི་བར་༸གོང་ས་མཆོག་གིས་བཀའ་ལན་སྩལ་དོན། ལུས་སྲོག་བློས་གཏོང་བྱེད་རྒྱུ་ཟེར་བ་དེ་སྔ་མོ་རྒྱ་ནག་ལ་རིག་གནས་གསར་བརྗེའི་ སྐབས་དམར་སྲུང་དམག་གིས་གཏོར་བཤིག་གཏོང་བར་ཡོང་སྐབས་དགོན་པའི་མཁན་པོ་ཡག་པོ་ ཞིག་ཡོད་པ་ཁོང་གིས་སོ་སོ་མེར་སྲེག་བཏང་ཡོད། དེ་ནས་ཝི་ཏི་ནམ་ནང་གང་ཙམ་བྱུང་ཡོད། ད་ཆ་བོད་ནང་ཡོང་གི་འདུག དེ་ཚོ་ནི་སོ་སོ་བློས་གཏོང་བྱེད་ཐུབ་མཁན་ཞིག་གིས་མི་ལ་འཚེ་བ་བྱེད་ཐུབ་ཀྱི་ རེད། ཡིན་ནའང་གཞན་ལ་འཚེ་བ་མ་ཡིན་པར་རང་ལུས་མེར་སྲེག་པ་ཞིག་ཆགས་ཡོད། ཛ་དྲག་དེ་འདྲའི་འོག་གཞན་ལ་འཚེ་བ་མི་བྱེད་པའི་ལག་ལེན་བཀལ་བ་ཞིག་རེད། དེ་ཧ་ཅང་སེམས་སྐྱོ་བོ་རེད། ངོས་རང་བོད་པ་ཞིག་ཡིན་པའི་ཆ་ནས་ཧ་ལས་པའི་སེམས་སྐྱོ་བོ་རེད། ཡིན་ནའང་འདི་ཆབ་སྲིད་ཀྱི་གནས་ཚུལ་ཞིག་རེད། ངས་ཆབ་སྲིད་ཀྱི་ལས་འགན་ཡོངས་རྫོགས་བཞག་ཏེ་ལོ་གཉིས་ཕྱིན་ཡོད་ཅེས་བཀའ་ལན་སྩལ་ ཡོད།      དེ་ཉིན་གྱི་ཕྱེད་ཡོལ་དུ་༸གོང་ས་མཆོག་གིས་བཞུགས་གནས་མགྲོན་ཁང་དུ་བོད་རིག་ པའི་མཁས་དབང་ཉི་ཧོང་བ་གཞོན་སྐྱེས་ ༥༠ ཙམ་ལ་མཇལ་ཁ་དང་བཀའ་སློབ་སྩལ་ཡོད། སྐབས་དེར་༸གོང་ས་མཆོག་གིས་བོད་ཀྱི་རིག་གཞུང་ནི་འཚེ་མེད་ཞི་བའི་རིག་གཞུང་ ཞིག་ཡིན་པ་བཅས་བོད་ཀྱི་ཐུན་མོང་མ་ཡིན་པའི་རིག་གཞུང་སྐོར་ངོ་སྤྲོད་ཡང་མཛད་ ཡོད།

སྤཡིར་ཛོ་ཇོ་ཇི་ Zojoji Temple ནང་པའི་དགོན་པ་འདི་ནི་ཉི་ཧོང་ནང་རྒྱལ་བ་འོད་དཔག་མེད་  Amitabha Buddha ཀྱི་རྗེས་འབྲང་པའི་ནང་པ་ ཇོ་ཌུ་ཤུ་ Jodo shu ཞེས་པ་དེ་ཁོངས་སུ་གཏོགས་པ་ཞིག་ཡིན་འདུག དགོན་པ་འདི་ཕྱག་བཏབས་ནས་ལོ་ངོ་ལྔ་བརྒྱ་ལྷག་ཙམ་ཕྱིན་ཡོད་པ་དང་། འཛམ་གླིང་དམག་ཆེན་སྐབས་དགོན་པ་འདིར་གཏོར་སྐྱོན་ཕོག་པར་བརྟེན་ཐེངས་འདིར་༸ གོང་ས་མཆོག་༸ཞབས་སོར་འཁོད་སའི་ལྷ་ཁང་ཌའི་ཌེན་Daiden ཞེས་པ་འདི་གནའ་དེང་ཟུང་འབྲེལ་གྱི་བཀོད་པ་གཉིས་འཛོམས་ཐོག་ནས་ཕྱི་ལོ་ ༡༩༧༤ ལོར་གསར་དུ་བཞེངས་པ་ཞིག་ཡིན་འདུག

༸གོང་ས་མཆོག་ཉི་ཧོང་དུ་ཆིབས་བསྒྱུར་སྐབས་གསར་འགོད་པས་དྲི་བའི་ལན་དུ་ཁོང་ཉིད་ས་ཆ་གང་དུ་ཕེབས་ཀྱང་། འགྲོ་བ་མིའི་བཟང་སྤྱོད་དང་ཆོས་ལུགས་འཆམ་མཐུན་གོང་མཐོིར་གཏོང་རྒྱུ་ལས་ཆབ་སྲིད་དང་འབྲེལ་བའི་ལས་དོན་གང་ཡང་སྤེལ་གྱི་མེད་ཅེས་གསུངས་འདུག   

ཟླ་འདིའི་ཚེས་ ༡༥ ཉིན་ནས་བཟུང་༧གོང་ས་མཆོག་ཉི་ཧོང་ནང་ཆིབས་བསྒྱུར་བསྐྱངས་ཡོད་པ་དང་། ཉིན་དེར་ཉི་ཧོང་ནཱ་རི་ཏ་རྒྱལ་སྤྱིའི་གནམ་ཐང་དུ་ཞབས་སོར་བཀོད་སྐབས། གསར་འགོད་པ་ཁག་ཅིག་གིས་ཐེངས་འདིར་ཉི་ཧོང་ནང་མཛད་འཕྲིན་གང་འདྲ་ཡོད་མེད་བཅར་འདྲི་ཞུས་པའི་ལན་དུ། ༧གོང་ས་མཆོག་གིས་ཁོང་ཉིད་ས་ཕྱོགས་གང་དུ་ཕེབས་ཀྱང་འགྲོ་བ་མི་དུང་ཕྱུར་བདུན་ཅུའི་ཆ་ཤས་ཤིག་ཡིན་པའི་ཆ་ནས་འགྲོ་བ་མིའི་བཟང་སྤྱོད་ཀྱི་རིན་ཐང་གོང་མཐོར་གཏོང་ཐབས་དང་། ཆོས་པ་ཞིག་ཡིན་པའི་ཆ་ནས་འཛམ་གླིང་གི་ཆོས་ལུགས་འཆམ་མཐུན་གོང་མཐོར་གཏོང་ཐབས་གཉིས་ཀྱི་ལས་འགན་ཐོག་ཤུགས་རྒྱག་གི་ཡོད་པ་དང་། ཐེངས་འདིའི་ཆིབས་བསྒྱུར་ཡང་གནད་དོན་དེ་གཉིས་ལས་ཆབ་སྲིད་དང་འབྲེལ་བ་མེད་པ། ཁོང་གཉིས་ལོ་ ༢ གོང་ནས་བོད་མིའི་ཆབ་སྲིད་ཀྱི་འགན་དབང་ནས་བགྲེས་ཡོལ་ཆ་ཚང་ཞུས་ཟིན་སྟབས། ཆབ་སྲིད་དང་འབྲེལ་བའི་ལས་དོན་གང་ཡང་སྤེལ་གྱི་མེད་ཅེས་གསུངས་ཡོད་འདུག

ཚེས་ ༡༦ ཉིན་ཆི་བྷ་འཕྲུལ་རིག་སློབ་གཉེར་ཁང་(Chiba Institute of Technology)དུ་ཆིབས་སྒྱུར་བསྐྱངས་ཏེ། ཉི་ཧོང་གི་གསར་འགོད་མཐུན་ཚོགས་ཀྱི་ཚོགས་གཙོ་ལྕམ་ཡོ་ཤི་ཀོ་ས་ཀུ་རའི་ (Ms. Yoshiko Sakurai)ལགས་ཀྱི་གཙོ་སྐྱོང་འོག དགེ་ལས་སློབ་ཕྲུག་དང་ཉམས་ཞིབ་པ་སོགས་མི་ ༦༠༠ ཙམ་ལ། ནང་ཆོས་ཉམས་ལེན་གནང་མཁན་གྱིས་ཚན་རིག་ཐོག་འཛིན་པའི་ལྟ་ཚུལ་ཞེས་པའི་བརྗོད་གཞིའི་ཐོག འདས་པའི་དུས་རབས་ཉི་ཤུ་པ་དེ་མི་གསོད་ཁྲག་སྦྱོར་གྱི་དུས་རབས་ཤིག་ཆགས་ཡོད་སྟབས། འགྲོ་བ་མིའི་རིགས་ཀྱི་རྒྱུད་ཀྱི་རྣམ་དཔྱོད་དང་ནུས་པས་མ་འོངས་དུས་རབས་དེ་འཚེ་བ་མེད་པ་དང་ཞི་བདེའི་དུས་རབས་ཤིག་བསྐྲུན་ཐུབ་བྱ་རྒྱུར་གཞོན་སྐྱེས་ཚོར་འགན་ཡོད་པ་དང་། སྤྱིར་འཕྲུལ་ཆས་ཀྱིས་མི་ཚེ་ལས་སླ་པོ་བཟོས་ཡོད་ཀྱང་། དོན་དངོས་སུ་དེང་སྐབས་ཚང་མས་ལག་འཁྱེར་ཁ་པར་དང་བརྙན་འཕྲིན་སོགས་ཀྱི་ཐོག་དུས་ཚོད་ཤུགས་ཆེན་འཕྲོ་བརླག་གཏོང་གི་ཡོད་པ། འཕྲུལ་ཆས་ཀྱིས་ཕྱིའི་ལུས་པོར་བདེ་བ་བསྐྲུན་རྒྱུར་ཕན་ཐོགས་ཆེན་པོ་བྱུང་ཡོད་ནའང་ནང་སེམས་ལ་བདེ་སྐྱིད་སྤྲོད་མི་ཐུབ་མ་ཟད། འཕྲུལ་ཆས་ཀྱིས་བདེ་སྐྱིད་ལྡན་པའི་འཛམ་གླིང་ཡང་བསྐྲུན་མི་ཐུབ་ཅེས་སོགས་གསུངས་འདུག

དེའི་རྗེས་ཨ་རིའི་པི་པི་ཨེན་རོལ་དབྱངས་ཚོགས་པའི་གཞས་པ་སྐུ་ཞབས་ཕེ་ཁྲིེར་ཡཱ་རོའུ་ (Peter Yarou) ལགས་ཀྱིས། ༸གོང་ས་མཆོག་གི་གསུང་ལས་གཞས་ཚིག་བཟོས་པའི་སེམས་ཤུཊ་ནམ་ཡང་མ་ཆགས་ (Never Give Up) ཞེས་པའི་གླུ་གཞས་གཟིགས་འབུལ་ཞུས་ཤིང་། ཉིན་རྒྱབ་མིའི་ཚབ་ཏུ་ལས་རིགས་སྣ་ཚོགས་བྱེད་རྒྱུར་བཀོལ་སྤྱོད་ཆོག་པའི་འཕྲུལ་ཆས་ (Robot) ཁག་ཅིག་ལ་གཟིགས་ཞིབ་གནང་ཡོད་འདུག  

ཚེས་ ༡༧ ཉིན་ཉི་ཧོང་སྐུ་ཚབ་དོན་གཅོད་ཁང་གི་གོ་སྒྲིག་འོག རྒྱལ་ས་ཊོག་ཀྱོའོ་ཨོ་ཀོའུ་རཱ་མགྲོན་ཁང་ (Hotel Okura)དུ། ཉི་ཧོང་གི་བརྙན་འཕྲིན་ལས་རིམ་གཙོ་སྐྱོང་བ་དང་གསར་འགོད་པ་སྐུ་ཞབས་ཨི་ཀི་གྷ་མེ་ཨ་ཀེ་ར་ (Prof. Ikegami Akira) ལགས་ཀྱིས་གཙོ་སྐྱོང་འོག ༼ འཇིག་རྟེན་དང་ཚེ་སྲོག ཤེས་ཡོན་ (The Universe, Life and Education)༽ ཞེས་པའི་བརྗོད་གཞིའི་ཐོག་ཚན་རིག་པ་ཁག་ཅིག་དང་བགྲོ་གླེང་གནང་ཡོད་ཅིང་། དེར་ཀོ་ཡྰ་སན་དགོན་པའི་ (Koyasan Monastery)མཁན་རིན་པོ་ཆེ་དང་། ཉི་ཧོང་གི་ཚན་རིག་དང་འཕྲུལ་རིགས། ཆོས་ལུགས་སློབ་གཉེར་ཁང་། གནམ་རིག་ཞིབ་འཇུག་ཁང་སོགས་ཀྱི་ཚན་རིག་པ་དང་ངེས་སྟོན་པ་སོགས་འཛོམས་ཡོད་འདུག སྐབས་དེར་༸གོང་ས་མཆོག་གིས་འདས་པའི་ལོ་སུམ་ཅུ་ལྷག་རིང་ཚན་རིག་པ་དང་ལྷན་དུ་བགྲོ་གླེང་དབུ་འཛུཊ་ཀྱིས། བོད་ཀྱི་ནང་པ་སངས་རྒྱས་པའི་ཆོས་དང་དེང་གི་ཚན་རིག་པའི་བར་ཕན་ཚུན་རོགས་བྱེད་ཐུབ་པ་ཞིག་ཆགས་ཡོད་པ་དང་། ནང་པ་སངས་རྒྱས་པའི་ཆོས་ཀྱི་ལྟ་གྲུབ་སྐོར་ངོ་སྤྲོད་བཅས་གནང་ཡོད་འདུག

ཚེས་ ༡༨ ཉིན་༸གོང་ས་མཆོག་ཉི་ཧོང་གི་རྒྱལ་ས་ཊོག་ཀྱོའོ་མེ་གྷུ་རོ་ (Meguro) གྲོང་ཁྱེར་དུ་ཡོད་པའི་ཡཱ་ཀུ་མོ་བུ་མོའི་སློབ་གྲྭའི་ (Yakumo Girls Hig School) སློབ་སྤྱི་གཙོས་པའི་དགེ་ལས་སློབ་ཕྲུག་དང་ཕ་མ་རྣམས་ཀྱིས་ཕེབས་བསུའི་ཁྲོད་ཆིབས་སྒྱུར་གནང་སྟེ། འཚེ་བ་མེད་པའི་འཛམ་གླིང་ཞིག་བསྐྲུན་ཐབས་སུ་གཞོན་སྐྱེས་ཚོར་འགན་གང་འདྲ་ཡོད་མེད་ཀྱི་བརྗོད་གཞིའི་ཐོག ཉི་ཧོང་དང་འཇར་མན་གཉིས་ཀྱིས་འཛམ་གླིང་དམག་ཆེན་གཉིས་པའི་སྐབས་དཀའ་སྡུག་མྱངས་ཡོད་ཀྱང་། ད་ཆར་དེ་སྔ་དམག་ཆེན་སྐབས་གཏོར་བཤིག་བཏང་བའི་ཤུལ་ཙམ་མཐོང་རྒྱུ་མེད་པ་མ་ཟད། འཛམ་གླིང་ནང་ཆེས་ཡར་ཐོན་ཅན་གྱི་ཁོངས་སུ་ཚུད་ཐུབ་པ་དེ་དཀའ་ངལ་ཇི་འདྲ་ཞིག་འཕྲད་ཀྱང་མིའི་སྙིང་སྟོབས་ནམ་ཡང་མ་ཞུམ་པར་ཆོད་སེམས་བརྟན་པོས་གདོང་ལེན་བྱས་པ་ལ་བརྟེན་ནས་བྱུང་བ་ཞིག་ཡིན་སྟབས། དུས་རབས་ ༢༡ དེ་འཚེ་བ་མེད་པའི་དུས་རབས་ཤིག་ཏུ་འགྱུར་རྒྱུའི་བཟང་ཕྱོགས་ནས་རེ་བ་རྒྱག་མི་ཆོག་པ་གཏན་ནས་མིན་སྐོར་སོགས་གསུངས་ཡོད་འདུག

༸གོང་ས་མཆོག་ཕྱི་ལོ་ ༡༩༦༧ ལོར་ཉི་ཧོང་དུ་ཆིབས་བསྒྱུར་ཐོག་མ་བསྐྱངས་ཡོད་པ་དང་། ཐེངས་འདི་ནི་ཉི་ཧོང་དུ་ཆིབས་སྒྱུར་གནང་ཐེངས་ ༡༩ པ་ཆགས་ཡོད་ཅིང་། ཚན་རིག་པ་དང་བགྲོ་གླེང་གནང་བ་ཐེངས་ ༥ པ་དེ་ཆགས་ཡོད་འདུག ཟླ་འདིའི་ཚེས་ ༢༦ ཉིན་བར་མུ་མཐུད་ཚན་རིག་པ་དང་མཇལ་འཕྲད་ཀྱི་བགྲོ་གླེང་དང་ས་གནས་མང་ཚོགས་བཀའ་སློབ་སོགས་ཀྱི་མཛད་འཕྲིན་ཁག་བསྐྱངས་རྒྱུ་ཡིན་འདུག

གསར་འགོད་པ། དོན་གོ

༢༠༡༣ ཟླ་ ༡༠ ཚེས་ ༢༤ རེས་གཟའ་ཕུར་བུ།

་གསར་འགོད་པ་སྐུ་ཞབས་ཇེག་ཀེཀ་ཛ་ཀོ་ཝས་ཀི་ལགས་ཀྱིས་ཆེད་དོན་དྲི་བར་བཀའ་ལན་མཛད་བཞིན་པ།

༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདས་པའི་གཟའ་འཁོར་གསུམ་ རིང་མེཀ་སི་ཁོ་དང་ཨ་རི་ཁུལ་གྱི་མཛད་འཕྲིན་རྣམས་ཡོངས་སུ་ལེགས་པར་གྲུབ་སྟེ་ ཕྱི་ཚེས་ ༢༢ ཉིན་པོ་ལེན་ཌིའི་རྒྱལ་ས་ཝར་སོའི་གནམ་ཐང་དུ་༸ཞབས་སོར་བདེ་བར་འཁོད་སྐབས་ དབྱིན་ཡུལ་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་དང་། འཕྲོད་བསྟེན་བཀའ་བློན་ཚེ་རིང་དབུང་ཕྱུག་མཆོག་བཅས་ཀྱིས་ཕེབས་བསུ་གཟབ་རྒྱས་ ཞུས་ཡོད། དེ་རྗེས་བཞུགས་གནས་མགྲོན་ཁང་དུཆིབས་སྒྱུར་བསྐྱངས་སྐབས་རྒྱལ་སྒོའི་མདུན་དུ་ བོད་རིགས་དང་སོག་རིགས་གཙོ་བོར་གྱུར་བའི་དད་ལྡན་སེར་སྐྱ་མི་མང་ཁག་གཅིག་གིས་ སྲོལ་རྒྱུན་གྱི་ལམ་ནས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས་ཡོད།

ཕྱི་ཚེས་ ༢༣ ཉིན་༸གོང་ས་མཆོག་གི་པོ་ལེན་ཌིའི་རྒྱལ་ས་ཝར་སོའི་ Warsaw ནང་འཚོགས་བཞིན་པའི་ནོ་བེལ་ཞི་བདེའི་གཟེངས་རྟགས་བཞེས་མཁན་རྣམ་པའི་ཞི་བདེའི་ ལྷན་ཚོགས་ཐེངས་ ༡༣ པར་ 13th Nobel Peace Laureates’ Summit ཆིབས་བསྒྱུར་བསྐྱངས་ཡོད། དེ་ཡང་མགོན་པོ་གང་ཉིད་མཆོག་ལྷན་ཚོགས་ཚུགས་ཡུལ་ཀྱི་ཚོགས་ཁང་ National Opera House ནང་ཆིབས་སྒྱུར་མ་བསྐྱངས་གོང་ཡུལ་དེའི་རྒྱལ་ཡོངས་རླུང་འཕྲིན་ Polish Television གྱི་གསར་འགོད་པ་སྐུ་ཞབས་ཇེག་ཀེཀ་ཛ་ཀོ་ཝས་ཀི་ Jackec Zakowsk ལགས་ཀྱིས་ཆེད་དོན་དྲི་བར་བཀའ་ལན་མཛད།

དེ་རྗེས་༸གོང་ས་མཆོག་ཞི་བདེའི་ལྷན་ཚོགས་སུ་ཆིབས་སྒྱུར་བསྐྱངས་ཡོད།

དེ་ ཡང་ལྷན་ཚོགས་དེའི་ཚོགས་ཐུན་ལྔ་པའི་སྐབས་༸གོང་ས་མཆོག་གིས་དམག་འཐབ་མེད་པའི་ འཆམ་མཐུན་གྱི་སྤྱི་ཚོགས་ཤིག་ཇི་ལྟར་སྐྲུན་ཐུབ་སྐོར་བཀའ་སློབ་སྩལ། ལྷན་ཚོགས་དེ་བཞིན་ལོ་ལྟར་པོ་ལེན་ཌིའི་སྲིད་འཛིན་ཟུར་པ་ནོ་བེལ་ཞི་བདེའི་ གཟེངས་རྟགས་བཞེས་མྱོང་མཁན་སྐུ་ཞབས་ལི་ཝ་ལེ་ས་(Lea Walesa) མཆོག་གི་ཐེབས་རྩ་ཁང་ནས་འཛམ་གླིང་གི་ཡུལ་གྲུ་འདྲ་མིན་ནང་གོ་སྒྲིག་ཞུ་བཞིན་ ཡོད་ཅིང་། དེ་སྔོན་ཡང་༸གོང་ས་མཆོག་ལྷན་ཚོགས་དེའི་ཐོག་ཆིབས་སྒྱུར་བཀའ་དྲིན་བསྐྱངས་གནང་ མཛད་ཡོད།

ཐེངས་འདིར་ལྷན་ཚོགས་སྐབས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་ སྐུ་བྷེ་ཊི་ཝིལ་ལེམ་སི་ Betty Williams མཆོག་དང་། ༸གོང་ས་མཆོག བྱང་ཕྱོགས་ཨ་ཡིར་ལེན་ཌིའི་ལྕམ་སྐུ་མ་རི་ཌི་མ་གྷུ་ཝེར་ Mairead Maguireམཆོག དེ་བཞིན་པོ་ལེན་ཌིའི་སྲིད་འཛིན་ཟུར་པ་ནོ་བེལ་ཞི་བདེའི་གཟེངས་རྟགས་བཞེས་ མྱོང་མཁན་སྐུ་ཞབས་ལི་ཝ་ལེ་ས་ (Lea Walesa) མཆོག ཨ་རིའི་གློག་བརྙན་འཁྲབ་སྟོན་པ་ལྕམ་སྐུ་ཤེ་རོན་སི་ཊོན་ Sharon Stone ལགས། དེ་བཞིན་ལྷོ་ཨ་ཕི་རི་ཀའི་སྲིད་འཛིན་ཟུར་པ་ནོ་བེལ་ཞི་བདེའི་གཟེངས་རྟགས་བཞེས་ མྱོང་མཁན་སྐུ་ཞབས་ཕེ་རེ་ཌིཀ་ཝིལ་ཡེམ་ཌི་ཀ་ལཀ་ Frederik Willem de Klerkམཆོག་བཅས་ཕེབས་ཡོད།

༢༠༡༣ཟླ་༡༠་ཚེས་ ༦ ཉིན་༸གོང་ས་མཆོག་བཞུགས་སྒར་ནས་ཆིབས་ཐོན་གྱིས་རྒྱ་གར་རྒྱལ་ས་ལྡི་ལིའི་ཉེ་འཁྲིས་སུ་ཡོད་པའི་གྷིར་གྷང་མངའ་སྡེའི་ནང་ཚོགས་བཞིན་པའི་ ༢༠༡༣ ལོའི་གོ་ལའི་འཕྲོད་བསྟེན་ལྷན་ཚོགས་ (Global Spa & Wellness Summit)ཞེས་པའི་སྟེང་བཀའ་སློབ་གནང་ཡོད་པ་དང་། ཕྱི་ཚེས་ ༧ ཉིན་མཁའ་ལམ་བརྒྱུད་ཨ་རིའི་ཇོར་ཇི་ཡ་མངའ་སྡེའི་གྲོང་ཁྱེར་ཨེ་ཌེ་ལན་ཌར་(Atlanta) ནང་གི་ཨེ་མོ་རེ་གཙུག་ལག་སློབ་གཉེར་ཁང་དུ་ཞབས་སོར་བཀོད་ཡོད་འདུག

ཕྱི་ཚེས་༨ཉིན་གྱི་སྔ་དྲོར་ཨེ་མོ་རེ་གཙུག་ལག་སློབ་གཉེར་ཁང་དུ་དུས་རབས་ཉེར་གཅིག་པའི་སྤྱི་ཚོགས་ནང་མི་མང་གི་འགན་འཁྲི་(Pillars of Responsible Citizenship in the 21st Century Global Village) ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད་པ་དང་།སྐབས་དེར་ཁོང་གིས་སྤྱི་ཚོཊ་ནང་བཟང་ཕྱོགས་ཀྱིས་འགྱུར་བ་གཏོང་རྒྱུ་ཧ་ཅང་གལ་ཆེན་ཡིན་པ་དང་། དེ་ལྟར་ཡོང་བར་ཐོག་མར་མི་རང་ཉིད་ནས་བསྒྱུར་བཅོས་གཏོང་རྒྱུ་དང་། མི་རང་ཉིད་ཀྱི་ནང་བསམ་བློར་བསྒྱུར་བཅོས་མ་བཏང་ཚེ། སྤྱི་ཚོགས་ནང་ཞི་བདེ་བརྟན་ལྷིང་མེད་པར་རྙོག་དྲ་ཡོད་སྐོར་ཇི་ཙམ་བཤད་ཀྱང་ཕན་ཐོགས་མེད་པ་དང་། དེ་ལ་འཛམ་གླིང་ཞི་བདེ་ཡོང་བར་ཤོག་ཅེས་སྨོན་ལམ་བརྒྱབ་པས་ཀྱང་མི་ཕན་པར། ཐོག་མར་རང་རྒྱུད་ཀྱི་ཉོན་མོངས་པའི་བསམ་བློ་དེ་དག་ལ་གཉེན་པོ་བསྟེན་ནས་བཏུལ་བ་དང་། གང་ཐུབ་ཀྱིས་གཞན་ཕན་གྱི་བསམ་བློས་ཀུན་ནས་བླངས་ཏེ་གཞན་གྱི་བདེ་དོན་ལ་བསམ་ བློ་མང་ཙམ་གཏོང་རྒྱུ་གལ་ཆེན་ཡིན་པ། མི་སྒེར་གྱི་བསམ་བློར་འགྱུར་བ་བཏང་བ་བརྒྱུད་ནས་ཁྱིམ་ཚང་དང་སྤྱི་ཚོགས། རིམ་གྱིས་འཛམ་གླིང་ནང་དོན་དམ་གྱི་ཞི་བདེ་དང་འཆམ་མཐུན་གྱི་ཁོར་ཡུག་གཅིག་བསྐྲུན་ཐུབ་སྐོར་སོགས་ཀྱི་བཀའ་གནང་ཡོད་འདུག   

ཉིན་དེའི་དྲི་བ་དྲི་ལན་སྐབས་༸གོང་ས་མཆོག་གིས་རང་ལུས་མེར་བསྲེཊ་སྐོར་ལ་“ རང་ལུས་མེར་བསྲེཊ་གྱི་ཐད་ནས་གཅིག་ནས་གནས་ཚུལ་འདི་རྙོག་དྲ་ཚ་པོ་རེད། ནད་རྟགས་ལྟ་བུ་ཞིག་ཆགས་ཡོད། གནས་ཚུལ་ཐབས་སྐྱོ་བོ་དེ་དག་བྱུང་སྐབས་ངོས་ཀྱིས་གསལ་བཤད་འདི་ལྟར་བྱེད་བཞིན་ཡོད། དྲག་གནོན་ཤུགས་ཆེན་འོག་ཧ་ཅང་དཀའ་སྡུག་མྱངས་པའི་ན་ཚ་རྙིང་པ་ཡར་ལངས་པ་ལྟ་བུ་ཆགས་ཡོད། མི་བཟོད་པའི་རྣམ་འགྱུར་བསྟན་པ་ཞིག་ཡིན་པ་གསལ་པོ་རེད། གཉིས་ནས་ལས་འགུལ་དེ་རིགས་འཚེ་བའི་བྱ་སྤྱོད་ཡིན་མིན་དེ་གཙོ་བོ་ཀུན་སློང་ལ་རག་ལུས་ཡོད། དཔེར་ན། རང་ལུས་མེར་བསྲེགས་གཏོང་མཁན་གཅིག་གིས་རང་ཉིད་མ་འཆི་བའི་སྔོན་དུ་བཞག་པའི་ཁ་ཆེམས་ནང་གཞན་ཕན་གྱི་བསམ་བློ་རྒྱ་ཆེན་པོ་བཏང་ཡོད། དེ་དག་ནི་འཚེ་བའི་ལས་རེད་ཅེས་བརྗོད་མི་ཐུབ། ཐོག་མ་ཉིད་ནས་རང་ལུས་མེར་བསྲེགས་བཏང་བ་དེས་ཕན་ཐོགས་ཇི་ཙམ་ཡོང་བཞིན་ཡོད་མེད་ཐོག་ངོས་ལ་ཐེ་ཚོམ་ཡོད་པའི་བསམ་ཚུལ་བརྗོད་ཟིན་པ་མ་ཟད། ད་ཆ་ངོས་རང་བོད་མིའི་ཆབ་སྲིད་ཀྱི་ལས་འགན་ནས་ཡོངས་སུ་བརྒས་ཡོལ་ཞུས་ཟིན་སྟབས། ཆབ་སྲིད་ཐོག་སྐད་ཆ་ཤོད་རྒྱུ་མེད། ལྷག་པར་རྒྱ་ནག་གཞུང་ནས་ངོས་ཀྱི་སྐད་ཆ་དེ་ཚོར་དོ་ནན་པོའི་ཐོག་ནས་ལྟ་བཞིན་ཡོད། ”ཅེས་གསུངས་ཡོད་འདུག

ཉིན་དེའི་ཕྱི་དྲོར་ཚན་རིག་པ་དང་སློབ་གསོའི་མི་སྣ་བཅས་མཁས་དབང་ཁག་དང་ལྷན་དུ་དེང་དུས་ཀྱི་ཤེས་ཡོན་ལམ་ལུགས་ནང་ཆོས་ལུགས་རིས་མེད་ཀྱི་བཟང་པོའི་བསླབ་བྱའི་སློབ་གསོ་སྤྲོད་སྟངས་ཞེས་པའི་བགྲོ་གླེང་སྟེང་མཉམ་ཞུགས་གནང་སྟེ། ད་ཆར་ཚན་རིག་གི་གནས་ཚད་ཧ་ལས་པའི་ཡར་རྒྱས་ཕྱིན་ཏེ། མིའི་ཀླད་པ་ཡར་རྒྱས་གཏོང་བར་གྲུབ་འབྲས་ཐོན་ཡོད་སྟབས། ད་ཆ་ནང་བསམ་བློའི་རྣམ་གཞག་དང་འབྲེལ་བའི་སེམས་ཀྱི་འཕྲོད་བསྟེན་ཐོག་དོ་སྣང་བྱ་རྒྱུ་གལ་ཆེན་ཡིན་པའི་བཀའ་སློབ་གནང་ཡོད་འདུག ཁ་སང་ཚེས་  ༩ ཉིན་མཁས་དབང་ཁག་མཉམ་འཛོམས་ཐོག་ཆོས་ལུགས་དང་མ་འདྲེས་པའི་ཡ་རབས་སྤྱོད་བཟང་གོང་འཕེལ་གཏོང་ཐབས་ཞེས་པའི་བརྗོད་གཞིའི་ཐོག་བགྲོ་གླེང་གནང་ཡོད་ཅིང་། དེ་རིང་ཚེས་ ༡༠ཉིན་མང་ཚོགས་ལ་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་མཛད་པའི་༼དགེ་ལྡན་ཕྱག་རྒྱ་ཆེན་མོ༽ཆོས་འབྲེལ་འཇོག་རྒྱུ་ཡིན་འདུག

ཐེངས་འདིའི་ཉིན་གསུམ་རིང་ཨེ་མོ་རེ་གཙུག་ལག་སློབ་གཉེར་ཁང་གི་མཛད་འཕྲིན་གྲུབ་རྗེས།ཚེས་༡༢ནས་༡༦མེག་སི་ཀོ་ (Mexico) ནང་ཆིབས་བསྒྱུར་གྱིས་བདུན་ཕྲག་གཅིག་རིང་མཛད་འཕྲིན་བསྐྱང་རྒྱུ་ཡིན་པ་དང་།ཚེས་ ༡༨ ནས་  ༢༠བར་ནེའུ་ཡོག་གྲོང་ཁྱེར་དུ་མཛད་འཕྲིན་ཁག་བསྐྱང་རྒྱུ་ཡིན་འདུག

གསར་འགོད་པ།དོན་གོ

༄༅། །ཕྱི་ལོ་ ༢༠༡༣ ཟླ་ ༣ ཚེས་ ༢༤ རེས་གཟའ་ཉི་མའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཊ་ཡིམ་སི་ནའོ་ (Times Now) ཞེས་པའི་རྒྱ་གར་གསར་འགྱུར་བརྙན་འཕྲིན་ལས་ཁང་གི་ཆེད་གཉེར་གསར་འགོད་པའི་ཆེད་དོན་དྲི་བར་བཀའ་ལན་སྩལ་ཡོད།
 

དྲི་བ། སྐུ་ཉིད་མཆོག་གི་འདས་པའི་སྐུ་ཚེའི་ལོ་རྒྱུས་ཀྱི་ལམ་བུའི་ནང་བཟང་ངན་གྱི་གནས་སྟངས་དང་སྐབས་རེ་སྙིང་སྟོབས་ཆེན་པོས་གདོང་ལེན་མཛད་དགོས་པའི་གནས་ཚུལ་འདྲ་མིན་བྱུང་ཡོད། དུས་ཀྱི་འགྱུར་བ་དང་བསྟུན་ནས་སྐུ་ཉིད་མཆོག་གི་སྐུ་ཚེ་སྐྱེལ་སྟངས་དང། དགོངས་པ་བཞེས་ཕྱོགས་ལ་འགྱུར་བ་ཕྱིན་ཡོད་དམ།

བཀའ་ལན། གཞི་རྩའི་ངོས་རང་ནང་ཆོས་ཉམས་ལེན་བྱེད་མཁན་ནང་པའི་དགེ་སློང་ཞིག་ཡིན་པར་བརྟེན། ཆུང་དུས་ནས་འགྲོ་བ་མིའི་རིགས་གཙོ་བོར་གྱུར་བའི་སྐྱེ་འགྲོ་ཀུན་གྱི་དོན་དུ་བསམ་བློ་གཏོང་དགོས་པའི་སློབ་གསོ་ཞིག་ཐེབས་པར་བརྟེན། སྐྱབས་བཅོལ་དུ་འགྲོ་རྒྱུས་མཚོན་མི་ཚེའི་ནང་དཀའ་ངལ་འཕྲད་ཚེ་སེམས་ནང་དེ་ཙམ་དངངས་སྐྲག་ཡོང་གི་མི་འདུག གང་ལ་ཞེ་ན་སྐྱབས་བཅོལ་ལ་འགྲོ་བ་དེ། མི་ཞིག་རང་ཉིད་དང་འདྲ་བའི་མི་གཞན་ཞིག་གི་སར་ཕྱིན་པར་བརྟེན། གཞི་རྩའི་དེ་ཙམ་ཁྱད་པར་མེད། ལྷག་པར་རྒྱ་གར་ལྟ་བུར་ཆ་མཚོན་ན། ལོ་རྒྱུས་ཐོག་ནས་བལྟས་པ་ཡིན་ན། ང་ཚོའི་ཤེས་ཡོན་དེ་དག་རྒྱ་གར་ནས་ཡོང་བར་བརྟེན། སྲོལ་རྒྱུན་ཐོག་ནས་ང་ཚོས་བླ་མར་ངོས་འཛིན་ཞུ་བཞིན་ཡོད། ཕྱོགས་མཚུངས་རྒྱ་གར་ནི་རང་དབང་ཡུལ་ཞིག་ཡིན། ངོས་སྒེར་གྱི་བསམ་བློའི་གནས་སྟངས་ལ་དེ་ཙམ་འགྱུར་བ་མེད། དུས་ཀྱི་གནས་སྟངས་ལ་ཏན་ཏན་འགྱུར་བ་འགྲོ་བཞིན་ཡོད།

དྲི་བ། སྐུ་ཉིད་མཆོག་གིས་ཉེ་ལམ་འཚེ་མེད་ཞི་བ་གལ་ཆེ་ཚུལ་སྐོར་བཀའ་སློབ་སྩལ་བ་ཙམ་མ་ཟད། དངོས་སུ་ལག་བསྟར་མཛད་མཁན་ཞིག་ཀྱང་ཡིན། དེར་བརྟེན་བོད་ནང་དུ་དགེ་འདུན་པ་ཚོས་རང་སྲེག་ལས་འགུལ་སྤེལ་བ་དེ་འཚེ་མེད་ཞི་བའི་ལས་འགུལ་ཞིག་ལ་ངོས་འཛིན་མཛད་བཞིན་ཡོད་དམ། རང་ལུས་མེར་སྲེག་གི་གནས་ཚུལ་དེར་མོས་མཐུན་མཛད་ཀྱི་ཡོད་དམ།

བཀའ་ལན། སྤྱིར་བཏང་རང་ཤི་བརྒྱབ་པ་ནི་གཞི་རྩའི་ཆ་ནས་འཚེ་བ་ལྟ་བུ་རེད། འོན་ཀྱང་བྱེད་ལས་བཟང་ངན་གང་ཡིན་གཙོ་བོ་ཀུན་སློང་དང་དམིགས་ཡུལ་ལ་རག་ལུས་ཡོད། ངོས་ཀྱིས་བསམ་པར་རང་ལུས་མེར་སྲེག་བྱེད་མཁན་ཚོའི་དམིགས་ཡུལ་ལ་ཆ་མཚོན་ན། ཁོང་ཚོ་ར་བཟི་བ་དང། བཟའ་ཚང་གི་དཀའ་ངལ་ཡོད་པ་དེ་འདྲ་མིན་པར་ཁོང་ཚོའི་དམིགས་ཡུལ་ནི་བོད་བསྟན་སྲིད་མི་རིགས་ཀྱི་ཆེད་དུ་ཡིན། འོན་ཀྱང་མཐར་ཐུག་ན་ཁོང་ཚོ་མི་སྒེར་སོ་སོའི་ཀུན་སློང་ལ་རག་ལུས་ཡོད། གལ་ཏེ་ཁོང་ཚོས་ཞེ་སྡང་དང་ཁོང་ཁྲོ་དྲག་པོས་ཀུན་ནས་བླང་པ་ཡིན་ན་མ་རུང་བའི་ལས་ཆགས་ཡོད། དེ་ལས་ལྡོག་སྟེ་ཀུན་སློང་བྱམས་བརྩེ་དང་སེམས་མ་འཁྲུག་པ་ཡིན་ན། བྱ་བ་དེ་དག་སྒྲིག་པ་ཞིག་ཡིན་ཆོག་གི་རེད། འདི་ནི་ནང་ཆོས་ཀྱི་ལྟ་ཚུལ་ཁོ་ནའི་ཐོག་ནས་རེད། བྱ་བ་གང་ཡིན་འཚེ་བ་ཡིན་མིན་ཀུན་སློང་ལ་རག་ལུས་ཡོད།

དྲི་བ། ༸གོང་ས་ཏཱ་ལའི་བླ་མ་མཆོག་གིས་བོད་ནང་རང་ལུས་མེར་སྲེག་གི་ལས་འགུལ་སྤེལ་ཆེད་སེམས་ཤུགས་སྤར་བ་ཙམ་མིན་པར། ད་ཆ་དཔལ་འབྱོར་གྱི་རོགས་རམ་ཡང་སྩོལ་བཞིན་ཡོད་པ་རྒྱ་ནག་གཞུང་ནས་ཁུངས་སྐྱེལ་དཔང་རྟགས་ཡོད་ཚུལ་ཤོད་བཞིན་ཡོད་པ་དེར་སྐུ་ཉིད་མཆོག་གི་བཀའ་ལན་ཞིག་སྩལ་རོགས།

བཀའ་ལན། ཤིན་ཏུ་ལེགས། དེ་ལྟར་ཡིན་ན་རྒྱ་ནག་སྐུ་ཚབ་ཚོས་འདི་ག་རྡ་སར་དངོས་སུ་ཕེབས་ཏེ་ང་ཚོའི་ལས་ཁུངས་ཀྱི་ཡིག་ཆ་ཡོད་ཚད་དང་། ངོས་ཀྱིས་བོད་ནས་གསར་དུ་འབྱོར་བ་རྣམས་ལ་གཏམ་བཤད་བྱས་པ་སོགས་ལ་ཞིབ་འཇུག་མཐིལ་ཕྱིན་པ་གནང་རྒྱུར་དགའ་བསུ་ཞུ་རྒྱུ་ཡིན། ཕྱི་ལོ་ ༢༠༠༨ ལོར་བོད་ནང་དོན་རྐྱེན་འབྱུང་སྐབས་རྒྱ་ནག་གི་སྲིད་བློན་ཟུར་པ་ཝུན་ཅཱ་པའོས་རྙོག་གྲ་དེ་དག་རྒྱ་གར་ནས་བརྒྱུད་སྐུལ་བྱས་སྐོར་བཤད་ནས་ངོས་ཀྱི་མིང་འབོད་ཀྱང་བྱས་ཡོད། སྐབས་དེར་ཡང་ངོས་ཀྱིས་དེ་མཚུངས་རྒྱ་ནག་གཞུང་གི་སྐུ་ཚབ་དང་རྒྱལ་སྤྱིའི་གསར་འགོད་འཐུས་མི་དངོས་སུ་རྡ་སར་ཕེབས་ཏེ་ཞིབ་འཇུག་མཐིལ་ཕྱིན་པ་གནང་རྒྱུར་མཐའ་གཅིག་ཏུ་དགའ་བསུ་ཞུ་རྒྱུ་ཡིན་ཞེས་ཞུ་རྒྱུ་བྱུང། དེ་རྗེས་ཐེངས་འགའ་ཤས་རྒྱ་ནག་གཞུང་གིས་ང་ཚོར་འགན་ཁག་དཀྲི་སྐབས་ཐག་རིང་ནས་ང་ཚོར་སྐྱོན་བརྗོད་བྱས་པ་ལས་དངོས་སུ་རྡ་སར་ཕེབས་ནས་ཞིབ་འཇུག་གནང་ན། ང་ཚོས་སྐུ་མགྲོན་གལ་ཆེ་ཤོས་སུ་ངོས་འཛིན་ཞུ་རྒྱུ་ཡིན།

དྲི་བ། རྒྱ་ནག་ནང་འགོ་ཁྲིད་གསར་པ་བསླེབས་ཡོད། དེར་བརྟེན་སྐུ་ཉིད་མཆོག་ལ་འབྱུང་འགྱུར་བོད་ཀྱི་གནད་དོན་གང་མགྱོགས་སེལ་རྒྱུའི་ཐུགས་རེ་ཡོད་དམ། ཡང་ན་དམ་བསྒྲགས་མུ་མཐུད་དེ་མུར་གནས་རྒྱུ་ཡིན།

བཀའ་ལན། རྒྱ་ནག་ནི་གཅིག་བསྡུས་དབང་འཛིན་ལམ་ལུགས་ཤིག་ཡིན། ལམ་ལུགས་དེ་འདྲ་ཞིག་ནང་མི་རེ་གཉིས་ཀྱིས་དེ་ཙམ་བྱེད་མི་ཐུབ། འོན་ཀྱང་ཕྱོགས་ཡོངས་ཀྱི་གནས་སྟངས་ལ་བལྟས་ཚེ་འགྱུར་བ་འགྲོ་བཞིན་ཡོད། ལོ་ངོ་སུམ་ཅུ་བཞི་བཅུའི་གོང་གི་རྒྱ་ནག་དང་བསྡུར་བ་ཡིན་ན་འགྱུར་བ་ཧ་ཅང་ཕྱིན་ཡོད། དེ་ནི་འཛམ་གླིང་ཕྱི་ལ་འབྲེལ་བ་ཤུགས་ཆེ་རུ་ཕྱིན་པས་རེད་བསམ་པ་དྲན་གྱི་འདུག ལྷག་པར་རྒྱ་རིགས་སློབ་ཕྲུག་ཧ་ཅང་མང་པོ་ཞིག་ཕྱི་རྒྱལ་དུ་སློབ་སྦྱོང་བྱེད་བཞིན་ཡོད་པ་མ་ཟད། རྒྱ་རིགས་ཚོང་པ་དང་འགོ་ཁྲིད་མང་པོ་ཞིག་གི་ཕྲུ་གུ་རྣམས་ཨ་རི་གཙོ་བོར་གྱུར་བའི་ཕྱི་རྒྱལ་དུ་སློབ་སྦྱོང་ཆེད་གཏོང་བཞིན་ཡོད། རྒྱ་ནག་གཞུང་གིས་དམ་བསྒྲགས་ཇི་ཙམ་བྱས་ཀྱང་དོན་དངོས་རྒྱ་ནག་མི་དམངས་ཀྱི་བསམ་བློ་གུ་ཡངས་འགྲོ་བཞིན་ཡོད། དེ་ནི་གཙོ་བོ་ཏིང་ཞའོ་ཕིང་གིས་དཔལ་འབྱོར་གུ་ཡངས་ཀྱི་སྲིད་བྱུས་ལས་བྱུང་བ་ཞིག་ཡིན་པ་ངོས་ཀྱིས་དྲན་བཞིན་ཡོད། དེར་བརྟེན་གནས་སྟངས་འགྱུར་བ་འགྲོ་བཞིན་ཡོད། འགྱུར་བ་དེ་རྒྱ་ནག་རང་ཉིད་ཆེད་དུ་ཡིན། ངོས་ཀྱི་བསམ་པར་འཛམ་གླིང་ནང་མི་འབོར་མང་ཤོས་ཡིན་པ་དང་དཔལ་འབྱོར་ཡང་ཧ་ཅང་མྱུར་པོའི་ཐོག་ཡར་རྒྱས་འགྲོ་བཞིན་པའི་རྒྱལ་ཁབ་གཅིག་ཡིན་པའི་ཆ་ནས་ཨེ་ཤི་ཡ་དང། རྒྱལ་སྤྱིའི་སྡིངས་ཆའི་ཐོག་ལས་འགན་དེ་བས་གལ་ཆེ་བའི་གནད་དོན་ཐོག་ཞབས་འདེབས་བསྒྲུབ་ཐུབ།

དེ་འདྲ་ཞིག་ཡོང་བར་འཛམ་གླིང་ནང་རྒྱལ་ཁབ་གཞན་གྱིས་གུས་བཀུར་དང་ཡིད་ཆེས་བློས་འགེལ་བྱེད་ཐུབ་པ་ཞིག་དགོས་རྒྱུ་ཧ་ཅང་གལ་ཆེན་པོ་ཆགས་ཡོད་ཀྱང་རྒྱ་ནག་ལ་དེང་སྐབས་དེས་འདང་གི་མེད། རྒྱ་ནག་ཤེས་ལྡན་མི་སྣ་ཚོས་གནས་སྟངས་དེ་རྟོགས་ཐུབ། འོན་ཀྱང་ད་ཆ་རྒྱ་ནག་འགོ་ཁྲིད་ཚོས་དངོས་ཡོད་གནས་སྟངས་དེ་ངོས་འཛིན་གྱིས་ལས་དོན་རྣམས་ཕྱི་གསལ་ནང་གསལ་དང་ཁྲིམས་ཀྱི་ལམ་ལུགས་ཤུགས་ཆེ་རུ་གཏང་སྟེ། གསར་འགྱུར་རང་དབང་སྤྲོད་རྒྱུ་སོགས་ནི་ཧ་ཅང་གལ་ཆེན་པོ་ཆགས་ཡོད། དེ་ལྟར་བྱུང་བ་ཡིན་ན། རྒྱ་ནག་རང་ཉིད་ལ་ཁེ་ཕན་ཡོད། ངོས་ཀྱི་རྒྱུན་དུ་རྒྱ་ནག་མི་དམངས་དུང་ཕྱུར་བཅུ་གསུམ་ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཆ་ཚང་ཡོད་པ་མ་ཟད། དངོས་ཡོད་གནས་ཚུལ་ལ་གཞིགས་པའི་ལེགས་ཉེས་བླང་དོར་འབྱེད་རྒྱུའི་རྣམ་དཔྱོད་ལྡན་ཡོད་པ་བརྗོད་བཞིན་ཡོད། དེར་བརྟེན་རྒྱ་ནག་གཞུང་གིས་དམ་བསྒྲགས་བཀག་སྡོམ་བྱ་རྒྱུ་ནི་བཟང་སྤྱོད་དང་འགལ་བ་ཞིག་ཡིན། གཉིས་ནས་རྒྱ་ནག་ནང་ཁྲིམས་ཀྱི་ལམ་ལུགས་དེ་རྒྱལ་སྤྱིའི་ཁྲིམས་ཀྱི་ལམ་ལུགས་དང་གནས་བབ་གཅིག་མཚུངས་བསླེབ་པ་ཞིག་བྱུང་ན། རྒྱ་རིགས་ཞིང་པ་ཉམ་ཆུང་དང་སྐྱོ་བོ་ཚོར་གཞི་ནས་སྲུང་སྐྱོབ་རག་རྒྱུ་ཡིན། དེ་ལྟར་མིན་ཚེ་གྲོང་གསེབ་ནང་ཞིང་པ་ཉམ་ཐག་ཚོའི་གནས་སྟངས་ཧ་ཅང་ཐབས་སྐྱོ་པོ་འདུག ངོས་ཀྱིས་རྒྱ་རིགས་ཞིང་པ་མང་དག་ཅིག་དང་ཐུག་བྱུང། སྐབས་དེར་ངོས་ཀྱིས་ཁོང་ཚོའི་གནས་སྟངས་སྐོར་འབྲི་སྐབས་གནས་སྟངས་ཧ་ཅང་ཡ་ང་བོ་རེད་འདུག

དྲི་བ། སྐུ་ཉིད་མཆོག་གིས་རང་བཙན་མ་རྩོད་པར་དབུ་མའི་ལམ་གྱི་ཐོག་ནས་རང་སྐྱོང་གི་གནས་བབ་རྩོད་རྒྱུའི་གུ་ཡངས་ཀྱི་སྲིད་བྱུས་འཛིན་བཞིན་ཡོད། འོན་ཀྱང་བོད་མི་གཞོན་སྐྱེས་མང་པོ་ཞིག་གིས་རང་བཙན་རྩོད་བཞིན་ཡོད། དེར་བརྟེན་ལངས་ཕྱོགས་གཉིས་དབར་ཧེ་བབ་ཡོད་པ་མ་ཟད། རང་བཙན་རྩོད་མཁན་གྱི་བསམ་བློ་ཤུགས་ཆེ་རུ་འགྲོ་བཞིན་ཡོད། སྐུ་ཉིད་མཆོག་གིས་འཚེ་མེད་ཞི་བའི་ཐབས་ལམ་དང་ཁོང་ཚོའི་ཐབས་ལམ་དབར་ཁྱད་པར་གཟིགས་ཀྱི་ཡོད་དམ།

བཀའ་ལན། ཕྱི་ལོ་ ༡༩༧༤ ལོ་ནས་བཟུང་ང་ཚོས་དབུ་མའི་ལམ་གྱི་ཆབ་སྲིད་ཀྱི་ལངས་ཕྱོགས་ཤིག་བཟུང་རྒྱུའི་ཐག་གཅོད་བྱས་ཡོད། སྐབས་དེར་རྒྱ་ནག་ནང་རིག་གནས་གསར་བརྗེའི་ལས་འགུལ་སྤེལ་བཞིན་ཡོད། ཕྱི་ལོ་ ༡༩༧༨ ལོ་མཇུག་དང་ཕྱི་ལོ་ ༡༩༧༩ ལོ་འགོར་ང་ཚོར་རྒྱ་ནག་གི་སྲིད་འཛིན་ཏིང་ཞའོ་ཕིང་ནས་བརྡ་ལན་ཞིག་འབྱོར་ཡོད། སྐབས་དེར་ང་ཚོས་གྲ་སྒྲིག་བྱས་ཟིན། རང་བཙན་མ་རྩོད་པར་མིང་དོན་མཚུངས་པའི་རང་སྐྱོང་གི་གནས་བབ་ཅིག་རྩོད་རྒྱུའི་ཐབས་ལམ་བཟུང་ཡོད། ཐབས་ལམ་དེ་ནི་གཉིས་སྨན་གྱི་ཐབས་ལམ་ཞིག་ཡིན། ཕྱི་ལོ་ ༡༩༧༩ ལོའི་ཟླ་བ་གཉིས་པའི་ནང་ངོས་ཀྱི་སྐུ་ཚབ་ཀྱིས་ཏིང་ཞའོ་ཕིང་དང་མཇལ་འཕྲད་གནང་ཡོད། སྐབས་དེར་སྲིད་འཛིན་ཏིང་ཞའོ་ཕིང་གིས་རང་བཙན་མིན་པའི་གནད་དོན་གང་ཞིག་ཡིན་རུང་ང་ཚོས་གྲོས་མོལ་བྱེད་ཆོག་པ་བཤད་ཡོད། དེར་བརྟེན་ང་ཚོའི་བསམ་བློ་དང་ཏིང་ཞའོ་ཕིང་གིས་བཤད་པ་གཉིས་ཏག་ཏག་མཚུངས་ཡོད། དེ་ནས་བཟུང་ང་ཚོ་རྒྱ་ནག་དང་ཐད་ཀར་འབྲེལ་བ་བྱུང་ཡོད། རྒྱ་ནག་སྐམ་སའི་ནང་མཐོ་རིམ་སློབ་མའི་སློབ་ཕྲུག་མང་པོ་ཞིག་གིས་མང་གཙོའི་ལས་འགུལ་སྤེལ་བར་བརྟེན། རྒྱ་ནག་ནང་སྤྱི་ཡོངས་ནས་དམ་བསྒྲགས་ཤུགས་ཆེ་རུ་ཕྱིན་ཡོད། ཧུའུ་ཡོ་པང་གོ་གནས་ནས་གནས་དབྱུང་བཏང་བ་སོགས་གནས་ཚུལ་མང་པོ་བྱུང་ཡོད།