གནམ་སྔོན་པོའི་འོག་འདིར  - ཐུ་བྷོད

 

མདའ་ཚན་ཚེ་རིང

གནམ་སྔོན་པོའི་འོག་འདིར། གསོན་ཤུགས་ཀྱིས་རྒྱན་པའི་གདོང་དམར་པས

མིའི་རིགས་ལ།       ལན་ཅིག་མིན་པར

བྱམས་བརྩེ་ཡི་འཛུམ་མདངས་འཕྲོ་མྱོང་ཟེར་ལ

གནམ་སྔོན་པོའི་འོག་འདིར  སྐྱོ་ངལ་གྱིས་འཚོ་བའི་གདོང་དམར་པས

མིའི་རིགས་ལ    ལན་ཅིག་མིན་པར

སྙིང་རྗེ་ཡི་མིག་ཆུ་ཡང་གཏོར་མྱོང་ཟེར

 

དེ་རིང

སྟོབས་ཤུགས་དང་ཡིད་ཆེས་ཀྱིས་བཏེགས་པའི

སེམས་རྟེན་དང་གཅེས་ཕྲུག་ཚོའི་རྣམ་ཤེས་གང་དུ་བཞུད

ཕ་མ་དང་ཕུ་ནུ་ཚོའི་རེ་སྒུག་ཇི་ལྟར་གཞལ

དེ་རིང

གནམ་སྔོན་པོའི་འོག་འདིར གདོང་དམར་པའི་སེམས་གཏིང་དུ

མྱ་ངན་དང་སྐྱབས་འཇུག་གིས་ཁེངས

 

ལོ་འདིར།  ཐུ་བྷོད་ཀྱི་ཡུལ་གྲུ་ཀུན་ཏུ

ཆིག་སྒྲིལ་གྱི་མེ་ལྕེ་འབར

ལོ་འདིར། འཇིག་རྟེན་གྱི་ས་སྒང་འདི་རུ

ཞི་དུལ་གྱི་མི་རིགས་ཞིག་གིས

དྲང་བདེན་ལ་འཁྲེང་བའི་འབོད་སྒྲ་ཤུགས་ཀྱིས་བསྒྲགས

རང་དབང་ལ་བཅངས་པའི་དུངས་སེམས་དབྱངས་ལ་གྱེར

 

མདོར་ན།

ལོ་འདིར། བཟོད་སྒོམ་གྱི་མཐའ་ལ་ཐུག་ནས

གཅེས་སྲོག་ཀྱང་འབེན་ལ་བཙུགས་ཏེ

ཐུ་བྷོད་ཀྱི་ལོ་རྒྱུས་སུ 

དཔའ་རྒོལ་ཚོས  ཟུངས་ཁྲག་གི་མཆོད་པ་སླར་ཡང་ཕུལ།

 

༢༠༠༩ལོའི་ལོ་སར་ཉིན་ཡོ་རོབ་ཀྱི་ནུབ་མཐའ་ཞིག་ནས