༄༅།།ཆོ་འཕྲུལ་དུས་ཆེན་གྱི་བྱུང་བ།

 

༼བཏུས་ཏེ་བསྒྲིགས་པའོ།༽

 

 དུས་ཚོད།

སྟོན་པ་ཤཱཀྱ་ཐུབ་པ་དགོང་ལོ་ང་བདུན་པ། མེ་ཕོ་འབྲུག་སྤྱི་ལོ་སྔོན་གྱི་ལོ་༥༡༡  ཟླ་དང་བོའི་ཚེས་༡ ནས་ ༡༥

ས་ཆ།

རྒྱ་གར་གྱི་གྲོང་ཁྱེར་རྒྱལ་པོའི་ཁབ་ཀྱི་འོད་མའི་ཚལ་དང་། མཉན་ཡོད། 

འཁོར་སློབ།

དགེ་སློང་གི་དགེ་འདུན་ཆེན་པོ་ཉིས་སྟོང་ལྔ་བརྒྱ་ཐམ་པ་དང་ལྷན་དུ་བཞུགས་པའི་སྐབས།

འགྲན་ཟླ།

མུ་སྟེགས་ཀྱི་དྲུག་སྟེ། སྟོན་པ་རྫོགས་བྱེད། ཀུན་དུ་རྒྱུ་གནག་ལྷས་ཀྱི་བུ། སྨྲ་འདོད་ཀྱི་བུ་ཡང་དག་རྒྱལ་བ་ཅན། མི་ཕམ་སྐྲའི་བུ་ལ་བ་ཅན། ཀ་ཏའི་བུ་ནོག་པོ་ཅན། གཅེར་བུ་པ་གཉེན་གྱི་བུ།

མཆོད་འབུལ་སྦྱིན་བདག

རྒྱལ་པོ་གསལ་རྒྱལ། རྒྱལ་པོ་གཟུགས་ཅན་སྙིང་པོ། རྒྱལ་པོ་ཨུ་ཏྲ་ཡ། ཨིནྡྲ་ཝ་རྨི། ཚངས་སྦྱིན། ཤུན་ཙི། ཁྱིམ་བདག་མགོན་མེད་ཟས་སྦྱིན། ཁྱིམ་བདག་ཙིད་ས། ལྷ་དབང་བརྒྱ་བྱིན། ལྷ་ཆེན་ཚངས་པ། རྒྱལ་ཆེན་བཞི། ཤཱཀྱའི་རིགས་དང་ལི་ཙ་བྱིའི་རིགས་བཅས།

 

སྔོན་འགྲོའི་གླེང་སློང་བ།

  རྒྱལ་པོ་གཟུགས་ཅན་སྙིང་པོས་དད་གུས་སྔར་ལས་ལྷག་པ་སྐྱེས་ཏེ་བཅོམ་ལྡན་འདས་དང་དགེ་སློང་རྣམས་ལ་ཉིན་ལྟར་མཆོད་པ་རྒྱ་ཆེན་པོ་ཕུལ་བ་མ་ཟད། གཡས་གཡོན་གྱི་སྐྱེ་འགྲོ་རྣམས་ལའང་ལས་དགེ་བ་གསོག་རྒྱུར་བསྐུལ་བཞིན་གནས་སོ། 

  རྒྱལ་པོ་ཁོང་ལ་ཕ་གཅིག་པའི་སྤུན་མཆེད་ཀཱ་ལ་ཟེར་བ་ཞིག་ཡོད། ཉིན་གཅིག་ཁོ་ཕོ་བྲང་གི་ཉེ་འཁོར་ནས་འགྲོ་སྐབས་བཙུན་མོས་མེ་ཏོག་གི་ཕྲེང་བ་ལག་པ་ནས་ཤོར་བ་ཁོའི་དཔུང་པའི་སྟེང་དུ་ཟགས་པར་ཁོའི་སྤུན་མཆེད་བར་དཀྲུགས་ཤིང་རྒྱག་མཁན་ཁ་ཤས་ཀྱིས་རྒྱལ་པོའི་བཙུན་མོ་དང་ཀཱ་ལ་གཉིས་ལྐོག་ཏུ་དགའ་པོ་བྱེད་ཀྱི་འདུག་ཅེས་དཀྲོགས་གཏམ་བཤད་པ་རྒྱལ་པོས་ཐོས་པས་བརྟག་དཔྱད་མ་གནང་བར་མི་བཏང་སྟེ་སྤུན་མཆེད་དེའི་རྐང་ལག་བཅད་ནས་ལམ་བཞི་མདོ་ཁར་གཡུགས།

 ཀཱ་ལའི་སྤུན་མཆེད་གཞན་རྣམས་ཀྱིས་དེ་མཐོང་ནས་སྙིང་རྗེ་དང་སེམས་སྡུག་གིས་ངུ་བཞིན་བསྡད་པའི་སྐབས་ཕྱི་པའི་ཆོས་ལུགས་སྤེལ་མཁན་སྟོན་པ་རྣམས་ཡོང་བ་མཐོང་ནས་ཕྱག་འཚལ་ཞིང་།ཐམས་ཅད་མཁྱེན་པ་ཁྱེད་རྣམས་ཀྱིས་ཐུགས་རྗེས་གཟིགས་ནས་ཉེས་མེད་ཁྲིམས་ཆད་ཕོག་པའི་བུ་འདི་སྐྱོབ་རོགས་གནང་ཞེས་ཞུས་པར། སྟོན་པ་དེ་རྣམས་ལ་བུ་དེ་སྐྱོབ་པའི་ནུས་པ་གང་ཡང་མེད་པས་གཡོལ་ནས་ཕྱིན། བཅོམ་ལྡན་འདས་ཀྱིས་དེ་རྣམས་ཀྱི་སྡུག་བསྔལ་མཁྱེན་ཏེ། བུ་དེ་བསྐྱབ་པའི་ཆེད་ཀུན་དགའ་བོ་བཏང་ནས་བདེན་པའི་སྨོན་ལམ་འདེབས་བཞིན་བྱིན་རླབས་ཀྱི་བདུད་རྩིས་བྱུགས་པས་བུ་དེའི་རྐང་ལག་སྔར་བཞིན་སོས་པས་གྲོང་ཁྱེར་གྱི་མི་མང་པོ་ཡ་མཚར་ཅིང་དད་པས་སངས་རྒྱས་ལ་སྐྱབས་སུ་སོང་ཤིང་ཀུན་དགའ་བོས་མུ་སྟེགས་པ་རྣམས་ཕམ་པར་བྱས་སོ། །ཞེས་ཀུན་ཏུ་ཁྱབ།

 

སྔོན་འགྲོའི་རྫུ་འཕྲུལ།

 

  རྒྱལ་པོ་གཟུགས་ཅན་སྙིང་པོའི་གཅུང་པོ་ཞིག་མུ་སྟེགས་ཀྱི་སྟོན་པའི་མགོ་སྐོར་འགོ་ཏུ་ཚུད་ནས་རང་གི་རྒྱུ་ནོར་ལོངས་སྤྱོད་རྣམས་ཕུལ་ཏེ། དེ་དག་ལ་དད་གུས་ཆེན་པོ་བྱེད་བཞིན་པར་ཡབ་རྒྱལ་པོས་ཁོ་ལ་སངས་རྒྱས་ལ་མཆོད་བཀུར་བྱེད་དགོས་པར་བསྐུལ་ཀྱང་མ་ཉན། རྒྱལ་པོ་ཁྱེད་ཀྱི་འདོད་པ་སྲུང་བྱེད་ངས་ཞལ་ལག་གྲ་རྒྱས་པོ་ཞིག་བཤམ་རྒྱུ་ཡིན་པས་དེ་དུས་བཅོམ་ལྡན་འདས་ཕེབས་ན་ནི་ཡག་པོ་རེད།གལ་ཏེ་མ་ཕེབས་ནའང་སྐད་གཏང་རྒྱུ་མིན་ཞེས་གསོལ་ཚིགས་བཤམ་དུས་མུ་སྟེགས་ཀྱི་སྟོན་པ་རྣམས་ཁོའི་ཁྱིམ་དུ་འབྱོར་ནས་བཞུགས་གྲལ་འགོ་ནས་མར་བང་རིམ་བཞིན་བསྡད། རྒྱལ་པོས་གཅུང་པོ་ལ་གལ་ཏེ་ཁྱོད་མ་ཕྱིན་ན་ཡང་གཡོག་པོ་བཏང་སྟེ་བཅོམ་ལྡན་འདས་ངེས་པར་གདན་དྲངས་དགོས་ཞེས་ཡང་ཡང་གསུངས་པས་ཁོས་གཡོག་པ་ཞིག་བཏང་སྟེ་གདན་དྲངས་སོ།

  བཅོམ་ལྡན་འདས་འཁོར་དང་བཅས་པ་བཞུགས་གྲལ་གྱི་འོག་ཏུ་བཞུགས།མུ་སྟེགས་ཀྱི་སྟོན་པ་རྣམས་མདུན་གྲལ་དུ་བསྡད་ཡོད་ཀྱང་སངས་རྒྱས་ཀྱི་མཐུས་མུ་སྟེགས་པ་རྣམས་རང་བཞིན་གྱིས་རྒྱབ་གྲལ་དུ་ཐེངས་གསུམ་གྱི་བར་འཁོད་པར་གྱུར།

དེ་ནས་སྦྱིན་བདག་གིས་བཅོམ་ལྡན་འདས་ལ་ཕྱག་བསིལ་བྱེད་ཆུ་འབུལ་བས་སྔོན་ལ་སྟོན་པ་དྲུག་ལ་འབུལ་ཅིག་གསུངས་ཏེ།སྟོན་པ་དྲུག་ལ་ཕུལ་བས་ཆུ་སྣོད་ཀྱི་ཁ་འགགས་ཏེ་ཆུ་མ་ཐོན། དེ་ནས་བཅོམ་ལྡན་འདས་ལ་ཕུལ་བས་ཆུ་ཐོན་ཏེ་ཚང་མས་ལག་པ་བཀྲུས།

 ཡང་སྦྱིན་བདག་གིས་སྣོད་ཅིག་ཏུ་ཞལ་ལག་ཀྱི་ཕུད་དེ་ཞུས་ནས་བཅོམ་ལྡན་འདས་ལ་ཕུལ་ཏེ་སྨོན་ལམ་འདོན་རོགས་གནང་ཞུས་པར།བཅོམ་ལྡན་འདས་ཀྱིས་ད་རེས་ཞལ་ལག་འདི་སྟོན་པ་དྲུག་གི་ཆེད་དུ་གྲ་སྒྲིག་བྱས་པས་ཁོང་རྣམས་ལ་སྨོན་ལམ་འདོན་དུ་ཆུགས་གསུངས། སྦྱིན་བདག་གིས་སྟོན་པ་དྲུག་ལ་སྨོན་ལམ་འདོན་རོགས་ཞུས། དེ་རྣམས་ཀྱིས་སྨོན་ལམ་འདོན་གྲབས་བྱེད་དུས་སོ་འཐམས་ནས་ཁ་གདངས་མ་ཐུབ་པས་བཅོམ་ལྡན་འདས་ལ་སྨོན་ལམ་སྐྱོན་རོགས་ཞུས་ཞེས་ལག་བརྡ་བྱས།དེ་ནས་བཅོམ་ལྡན་འདས་ཀྱིས་གསུང་སྐད་སྙན་པོའི་ངང་སྨོན་ལམ་བསྐྱོན། སྦྱིན་བདག་གིས་བཅོམ་ལྡན་འདས་ལ་ཞལ་ལག་དང་པོ་བཀྱག་པས་བཅོམ་ལྡན་འདས་ཀྱིས་སྔོན་ལ་སྟོན་པ་དྲུག་ལ་ཁྱོག་ཅིག་གསུངས། སྟོན་པ་དྲུག་ལ་ཞལ་ལག་བཀྱག་པ་དང་ཞལ་ལག་རྣམས་ཕོར་པ་ལས་ཡར་ཐོན་ཏེ་ནམ་མཁའ་ལ་ལྡིངས་ནས་བསྡད་པས་ཁོང་ཚོས་ཟ་མ་ཐུབ་པར་ལུས། དེ་ནས་སྦྱིན་བདག་གིས་སངས་རྒྱས་བཅོམ་ལྡན་འདས་ལ་བཀྱགས། 

  ཞལ་ལག་མཆོད་ཚར་རྗེས་སྦྱིན་བདག་གིས་བཅོམ་ལྡན་འདས་ལ་ཆོས་གསུངས་རོགས་གནང་ཞུས་པས་བཅོམ་ལྡན་འདས་ཀྱིས་ཁྱོད་ཀྱི་སྟོན་པ་དྲུག་ལ་ཆོས་སྟོན་རོགས་ཞུས།ཞེས་གསུངས་པ་བཞིན་མུ་སྟེགས་ཀྱི་སྟོན་པ་དྲུག་ལ་ཆོས་སྟོན་རོགས་ཞུས། སྟོན་པ་དྲུག་གིས་ཆོས་སྟོན་གྲབས་བྱེད་སྐབས་ཡང་ཁ་གདངས་བཙུམ་མ་ཐུབ་པས་བཅོམ་ལྡན་འདས་ལ་ཆོས་གསུངས་རོགས་ཞུས། དེ་ནས་བཅོམ་ལྡན་འདས་ཀྱིས་གསུངས་སྙན་ཞིང་འཇམ་པའི་ཐོག་ནས་ཆོས་གསུངས། དེར་ཡོད་པའི་མི་རྣམས་དང་ལྷག་པར་རྒྱལ་པོ་གཟུགས་ཅན་སྙིང་པོའི་གཅུང་པོ་ཡང་ཡིད་ཚིམས་ཤིང་དད་པར་གྱུར། 

 

འགྲན་སློང་བ།

 

  དེའི་སྔར་ལོ་ཤིང་ཡོས་ལ་བཅོམ་ལྡན་འདས་འཁོར་དགེ་སློང་སྟོང་ཉིས་བརྒྱ་ལྔ་བཅུའི་དགེ་འདུན་དང་བཅས་པ་རྒྱལ་པོའི་ཁབ་ཀྱི་འོད་མའི་ཚལ་ན་བཞུགས་པའི་ཚེ། མུ་སྟེགས་ཀྱི་སྟོན་པ་དྲུག་ཀྱང་དེར་གནས་པ་ལས་རྒྱལ་པོ་དང་བློན་པོ་དང༌། ཁྱིམ་བདག་དང་ཡུལ་མི་རྣམས་རིམ་གྱིས་སངས་རྒྱས་ལ་དད་དེ་ཞབས་ཏོག་བསྙེན་བཀུར་ཞུ་བ་ཇེ་མང་དང༌། མུ་སྟེགས་ཀྱི་སྟོན་པ་དྲུག་ལ་ཞབས་ཏོག་བསྙེན་བཀུར་བྱེད་པ་ཇེ་ཉུང་དུ་སོང་བས་བཅོམ་ལྡན་འདས་ལ་ཕྲག་དོག་གིས་ཡིད་སྐྱོད་དེ་ཡུལ་དེའི་རྒྱལ་པོ་གཟུགས་ཅན་སྙིང་པོའི་དྲུང་དུ་སོང་སྟེ། བདག་ཅག་སངས་རྒྱས་དང་ཆོ་འཕྲུལ་འགྲན་དུ་ཆུག་ཅིག། ཅེས་ཞུས་པར་རྒྱལ་པོས་བཟློག་ཀྱང་མཉན་པས་སངས་རྒྱས་ལ་ཞུས་པར། སངས་རྒྱས་ཀྱིས་ང་ཉིད་དུས་མཁྱེན་ནོ་ཞེས་ཞལ་གྱིས་བཞེས་ཏེ། སངས་རྒྱས་འཁོར་བཅས་ཡུལ་ཡངས་པ་ཅན། ཀོའུ་ཤམྦི། ཝར་གྱི། ཐིག་ཆ་ཤི་རི། ཝ་ར་ཎ་སི། སེར་སྐྱ་རྣམས་སུ་རིམ་པ་བཞིན་བྱོན་པའི་མཐར་མཉན་ཡོད་དུ་ཕེབས།

མུ་སྟེགས་ཀྱི་སྟོན་པ་དྲུག་འཁོར་བཅས་དང༌། རྒྱལ་པོ་གཟུགས་ཅན་སྙིང་པོ་འཁོར་ཁྲི་ཕྲག་དྲུག་ཅུ།ལི་ཙ་བྱི་འཁོར་ཁྲི་ཕྲག་བདུན།རྒྱལ་པོ་ཨུ་ཏྲ་ཡ་ན་འཁོར་སྟོང་ཕྲག་བརྒྱད་ཁྲི།རྒྱལ་པོ་ཤུན་ཙིད་ལ་འཁོར་ཁྲི་ཕྲག་ལྔ།རྒྱལ་པོ་ཨིནྟྲ་ཝ་རྨི་འཁོར་ཁྲི་ཕྲག་དྲུག།རྒྱལ་པོ་ཚངས་སྦྱིན་འཁོར་ཁྲི་ཕྲག་བརྒྱད་བཅུ།ཤཱཀྱའི་འཁོར་ཁྲི་ཁྲག་དགུ་དང་བཅས་པ་རྣམས་ཀྱང་སངས་རྒྱས་ཀྱི་རྗེས་སུ་འབྲངས་ཏེ་ཤིང་ཡོས་དགུན་ཟླ་ཐ་ཆུང་ལ་མཉན་ཡོད་དུ་འཚོགས།

  མུ་སྟེགས་ཀྱི་སྟོན་པ་དྲུག་མཉན་ཡོད་ཀྱི་རྒྱལ་པོ་གསལ་རྒྱལ་གྱི་དྲུང་དུ་སོང་སྟེ། དགེ་སྦྱོང་ཀོའུ་ཏ་མ་དང་བདག་ཅག་ཆོ་འཕྲུལ་འགྲན་པར་དུས་བྱས་པ་ལས་དུས་ལ་བབ་པ་དང་བྱོལ་ཞིང་བྲོས་ཏེ། ད་ནི་འཁོར་མང་པོ་ཡང་རྒྱལ་པོའི་ཡུལ་དུ་འཚོགས་ཀྱི་རྒྱལ་པོ་ཆེན་པོས་བདག་ཅག་འགྲན་དུ་ཆུ་གཅིག །ཅེས་ཞུས་པ་ན་རྒྱལ་པོས་བཟློག་ཀྱང་མ་ཉན་པས་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ། མུ་སྟེགས་སྟོན་པ་དྲུག་གིས་ཆོ་འཕྲུལ་འགྲན་པར་ཡང་ནས་ཡང་ཏུ་བསྐུལ་བར་འདུག་པས། བཅོམ་ལྡན་འདས་ཀྱིས་འདི་དག་ཆོ་འཕྲུལ་གྱིས་ཚར་བཅད་དུ་གསོལ་ཞེས་གསོལ་བས། ང་ཉིད་དུས་མཁྱེན་ནོ། །ཞེས་བཀའ་སྩལ།

གནས་སྟ་གོན།

  དེར་ཆོ་འཕྲུ་འགྲན་པའི་དུས་ལ་བབ་པ་བཞིན་ཡུལ་དེའི་རྒྱལ་པོ་གསལ་རྒྱལ་གྱིས་རང་གི་བློན་པོ་རྣམས་ལ་ཆོ་འཕྲུལ་འགྲན་པའི་ས་ཆ་རྒྱ་ཆེན་པོ་ཞིག་ཏུ་གཙང་སྦྲ་དང་གད་བདར་བྱེད་པ་དང་མེ་ཏོག་དང་སྤོས་ལ་སོགས་པའི་མཆོད་པ་རྣམ་པ་སྣ་ཚོགས་བཤམས་པ་མ་ཟད། སེང་གེའི་བཞུགས་ཁྲི་བརྒྱབ་པ་དང་། རྒྱལ་མཚན་དང་བ་དན་སོགས་རྟེན་འབྲེལ་གྱི་དངོས་པོ་མང་པོས་མཛེས་པར་བརྒྱན་པས་དེར་ལྷ་དང་མི་ཡི་འཁོར་ཚོགས་ཤིན་ཏུ་མང་པོ་འཛོམས། 

འགྲན་སྡུར་དངོས་གཞི།

  དེ་ནས་མེ་འབྲུག་ཟླ་དང་པོའི་ཚེས་གཅིག་ལ་ཐམས་ཅད་འཚོགས་པའི་སར་རྒྱལ་པོ་གསལ་རྒྱལ་གྱིས་སངས་རྒྱས་ལ་ཆོས་སྟོན་དྲང་བའི་ཚེ་ཚེམས་ཤིང་ས་ལ་བཙུག་མ་ཐག་ཏུ།རྩ་བ་དང་སྡོང་པོ་དང་ཡལ་ག་རྣམས་རིན་པོ་ཆེ་སྣ་བདུན་གྱི་རང་བཞིན་ཅན།དཔག་ཚད་ལྔ་བརྒྱའི་དབང་ས་དང་རྒྱ་ཁྱོན་དང་ལྡན་པ་ལོ་འདབ་དང་མེ་ཏོག་ཤིན་དུ་ཡིད་དུ་འོང་ཞིང༌།འབྲས་བུ་བྲེ་ལྔ་ཤོང་བའི་བུམ་པའི་ཚད་དང་ལྡན་པ།ཁ་དོག་དང་འོད་ཟེར་གྱིས་ཉི་ཟླ་ཟིལ་གྱིས་གནོན་ཅིང༑རླུང་གིས་བསྐྱོད་པའི་དྲི་བསུང་དང་སྒྲ་ལས་ཆོས་ཀྱི་སྒྲ་འབྱུང་བ་སྦྲུལ། 

  ཚེས་གཉིས་ལ་རྒྱལ་པོ་ཨུ་ཏྲ་ཡ་ནས་མཆོད་པའི་ཚེ་སྐུའི་གཡས་གཡོན་དུ་རིན་པོ་ཆེའི་རི་མཐོ་ཞིང་བརྗིད་ཆགས་པ།ལྗོན་ཤིང་ཡལ་ག་ལོ་འདབ་དང་མེ་ཏོག་དང་འབྲས་བུ་མཛེས་ཤིང་ཡིད་དུ་འོང་བ་ཅན་གཉིས་ལས།གཡས་ཀྱི་རིལ་མི་རྣམས་འབྲས་བུ་ཕུན་སུམ་ཚོགས་པ་ལ་ལོངས་སྤྱོད་པ་དང༌།གཡོན་གྱི་རིལ་དུད་འགྲོ་རྣམས་རྩ་སྔོ་ལྗང་བཅུད་དང་ལྡན་པ་ལ་བདེ་བར་ལོངས་སྤྱོད་པ་སྦྲུལ། 

  ཚེས་གསུམ་ལ་ཤུན་ཙི་རྒྱལ་པོས་མཆོད་པའི་ཚེ་ཞལ་བཤལ་བའི་ཆུས་ལ་དོར་བ་ལས།ཆུ་ཡན་ལག་བརྒྱད་ལྡན་གྱིས་གང་བའི་རྫིད་བུ་དཔག་ཚད་ཉིས་བརྒྱའི་རྒྱ་ཁྱོན་ཅན།རིན་ཆེན་སྣ་བདུན་གྱིས་བརྒྱན་ཅིང༌།ཤིང་རྟའི་འཕང་ལོ་ཙམ་གྱི་པདྨ་ཁ་དོག་སྣ་ཚོགས་པ་འོད་ཟེར་གྱིས་ཕྱོགས་ཐམས་ཅད་སྣང་བར་བྱེད་པ་མང་པོས་མཛེས་པར་བྱས་བ་སྦྲུལ། 

ཚེས་བཞི་ལ་རྒྱལ་པོ་ཨིནྡྲ་ཝ་རྨིས་མཆོད་པའི་ཚེ་སྔར་ཉིན་སྤྲུལ་པའི་རྫིད་བུའི་ངོས་བཞིན་ཆུ་ཀླུང་ཡུར་བ་བརྒྱད་ཡོད་ལ་འབབ་པ་འཁོར་ཞིང་རྫིང་བུའི་ནང་དུ་འབབ་པའི་སྒྲ་ལས་བྱང་ཆུབ་ཡན་ལག་བདུན།འཕགས་ལམ་ཡན་ལག་བརྒྱད།རྣམ་ཐར་གསུམ།ཕར་ཕྱིན་དྲུག།ཚད་མེད་བཞི་སོགས་ཆོས་ཀྱི་སྒྲ་སྒྲོགས་པ་སྤྲུལ། 

 ཚེས་ལྔ་ལ་རྒྱལ་པོ་ཚངས་སྦྱིན་གྱིས་མཆོད་པའི་ཚེ་བཅོམ་ལྡན་འདས་ཀྱི་ཞལ་གྱི་འཛུམ་ལས་འོད་ཟེར་སྟོང་གསུམ་ཁྱབ་པ་འཕྲོས་པའི་འོད་ཟེར་དེས་ལུས་ལ་རེག་པའི་སྐྱེ་དགུ་རྣམས་དུག་གསུམ་དང་སྒྲིབ་པ་ལྔ་དང་བྲལ་ཏེ།ལུས་སེམས་རབ་ཏུ་བདེ་བ་ལ་བཀོད་པ་སྤྲུལ། 

  ཚེས་དྲུག་ལ་ལི་ཙ་བྱི་རྣམས་ཀྱིས་མཆོད་པའི་ཚེ་འཁོར་འདུས་པ་ཐམས་ཅད་ཀྱིས་གཅིག་གཅིག¶གིས་བསམ་པ་ཤེས་ཤིང་སོ་སོའི་དགེ་བ་དང་མི་དགེ་བའི་ལས་འབྲས་མངོན་དུ་གྱུར་ནས་ལས་འབྲས་ལ་ཡིད་ཆེས་ཀྱི་དད་པས་སྟོན་པའི་ཡོན་ཏན་བརྗོད་ཅིང་དགེ་ཚོགས་རྒྱ་ཆེན་པོ་བསྐྲུན་པ་སྤྲུལ།

  ཚེས་བདུན་ལ་ཤཱཀྱའི་རིགས་རྣམས་ཀྱིས་མཆོད་པའི་ཚེ། སྟོན་པའི་འཁོར་རྣམས་སོ་སོ་ནས་འཁོར་ལོས་བསྒྱུར་བའི་རྒྱལ་པོ་རྒྱལ་སྲིད་སྣ་བདུན་བུ་སྟོང༌། རྒྱལ་ཕྲན་དང་བློན་པོའི་ཚོགས་མང་པོས་བསྐོར་བ་ཀུན་ལ་མངོན་དུ་གྱུར་ནས་ངོ་མཚར་དང་དད་པ་རྨད་དུ་བྱུང་བ་སྐྱེས་ཏེ་ཆོས་ལ་སྦྱར་བ་སྤྲུལ། འདི་དག་གི་ཚེ་མུ་སྟེགས་ཀྱི་སྟོན་པ་དྲུག་ཆོ་འཕྲུལ་སྟོན་པར་འདོད་ཀྱང་ཡན་ལག་རེངས་ཁ་འཐམས། སེམས་ཁོང་དུ་ཆུད་ཅུང་ཟད་ཀྱང་སྟོན་པའི་མཐུ་མེད་པར་གྱུར།

 

འགྲན་ཟླ་མེད་པའི་ཆོ་འཕྲུལ།

   ཚེས་བརྒྱད་ལ་ལྷའི་དབང་པོ་བརྒྱ་བྱིན་གྱིས་སེང་གེའི་ཁྲི་བཤམས་པ་ལ་སྤྱན་དྲངས་ནས་བཞུགས་སུ་གསོལ་ཏེ། ལྷ་ཚངས་པས་གཡས་ནས་མཆོད། བརྒྱ་བྱིན་གྱིས་གཡོན་ནས་མཆོད་པའི་ཚེ་བཅོམ་ལྡན་འདས་ཀྱི་ཕྱག་གཡས་པའི་སོར་རྩེས་ཁྲི་ལ་རེག་པས་སྒྲ་སྐད་ཤིན་ཏུ་ཆེ་བ་ཞིག་བྱུང་བ་དང་མཉམ་དུ་སྲིན་པོ་ལྔ་བྱུང་སྟོན་པ་དྲུག་གི་ཁྲི་བཤིག །ཕྱག་ན་རྡོ་རྗེས་མེ་རབ་ཏུ་འབར་བའི་རྡོ་རྗེས་བསྐྲད། ཁ་ཅིག་སྐྱེངས་ཏེ་ཆུ་ལ་མཆོངས། མུ་སྟེགས་ཀྱི་འཁོར་དགུ་ཁྲི་ཆིག་སྟོང་བཅོམ་ལྡན་འདས་ལ་སྐྱབས་སུ་སོང་ཏེ་རབ་ཏུ་བྱུང་ཞིང་བསྙེན་པར་རྫོགས། ཆོས་བསྟན་པས་དགྲ་བཅོམ་པར་གྱུར་པ་སྤྲུལ། 

 ༼མུ་སྟེགས་སྟོན་པ་དྲུག་ཀྱང་སོ་སོའི་ཁྲི་ལ་འཁོད་ཅིང་། ལྷ་དང་མིའི་ཚོགས་བསམ་གྱིས་མི་ཁྱབ་པ་བསྡུས་ཤིང་། ལྷ་རྣམས་ཀྱིས་ནམ་མཁའ་ནས་རིན་པོ་ཆེ་དང་མེ་ཏོག་གི་ཆར་མཆོད་ཕུལ། བཅོམ་ལྡན་འདས་ཀྱི་སྐུའི་གཟི་བརྗིད་ཀྱིས་མུ་སྟེགས་པ་རྣམས་སྐད་ཆ་ཡང་ཤོད་མི་ཤེས་པ་དང་། ཟས་ཟ་མི་ཤེས་པར་གྱང་ལོགས་སུ་རི་མོ་བྲིས་པ་བཞིན་ལུས་གཡོ་འགུལ་མེད་པར་ལུས་སོ། དེ་ནས་སངས་རྒྱས་ཀྱི་སྐུའི་འགྲམ་ནས་མེ་ཆེན་པོ་ཞིག་འབར་བས་མུ་སྟེགས་པ་རྣམས་རབ་ཏུ་དགའ་ནས། འོ་ཡ། ད་ཆོ་འཕྲུལ་རང་འགྲན་པ། ཁང་པ་ཐམས་ཅད་མེས་ཚིག་གི་འདུག་ཅེས་བཤད་པ་ན། བཅོམ་ལྡན་འདས་ཀྱི་རྫུ་འཕྲུལ་གྱིས་མེ་ལྕེ་དྲག་པོ་རྣམས་ཞི་བ་དང་སངས་རྒྱས་ཀྱི་སྐུ་ཆུའི་ཕུང་པོར་བསྒྱུར་ཏེ། དེ་ནས་བདུད་རྩིའི་འོད་ཟེར་གྱིས་ཁྱབ། སྐུའི་གཟི་བརྗེད་ཉི་མ་ལས་ལྷག་པར་རྒྱས་ཤིང་མདུན་དུ་གསེར་གྱི་མེ་ཏོག་པདྨ་དྲི་བསུང་མངར་མོས་བུང་བའི་ཚོགས་རྣམས་འདུས། པད་སྡོང་ཆེན་པོ་འདིའི་རྩེར་སངས་རྒྱས་ཀྱིས་ཕར་ཚུར་ཕེབས་པ་དང་བཞུགས་པ་དང་།  གཟིམ་པ་སོགས་སྤྱོད་ལམ་སྣ་ཚོགས་སྟོན་ཞིང་། སྐུ་གསེར་གྱི་རི་བོ་ལ་ཉི་ཟླའི་འོད་ཀྱིས་བརྒྱན་པ་ལྟར་འཇིག་རྟེན་བདེ་བར་མཛད་པ་ལ། ནམ་མཁའ་ནས་ལྷ་མོ་རྣམས་ཀྱིས་ལྷ་རྫས་ཀྱི་མཆོད་ཅིང་། མིག་མི་འཛུམ་པར་སངས་རྒྱས་ཀྱི་ཞལ་ལ་བལྟ་བ། ལྷ་དང་དྲི་ཟ་མིའམ་ཅི་དང་ཐུབ་པའི་དབང་པོ་རྣམས་ཀྱིས་ལྷའི་རོལ་དབྱངས་ཀྱིས་བཅོམ་ལྡན་འདས་ལ་བསྟོད་པ་ཕུལ།

 དེ་ནས་བཅོམ་ལྡན་འདས་ཀྱིས་ཞལ་འཛུམ་མདངས་དང་བཅས་ཏེ་ཆོས་གསུངས་པ་སྟེ། སྡིག་སེམས་སྤངས་ན་བསོད་ནམས་ཀྱི་རྩ་བ་ཚུགས་པ་ཡིན། གཞན་ལ་འཁོན་སེམས་མེད་པར་སེམས་ཞི་བར་གནས་དགོས་པ་དང་། ཉོན་མོངས་པའི་དུག་ནད་རྣམས་མེད་པར་བཟོ་དགོས་ཤེས་རབ་སྨན་གྱི་བདུད་རྩེ་འཐུང་བར་བྱ། རྟག་ཏུ་དགེ་བའི་གྲོགས་པོ་བསྟེན་ན་དེ་དག་གི་དགེ་བ་གོང་ནས་གོང་དུ་འཕེལ་བར་བྱེད། རང་རེའི་ལུས་འདི་རིང་པོར་མི་གནས་ནམ་ཞིག་མ་འདོད་བཞིན་དུ་འདོར་རྒྱུ་ཡིན། རྒྱུ་དཔལ་འབྱོར་ནི་མི་རྟག་པའི་རང་བཞིན་ཡིན་པས་འབད་ཀྱང་སྙིང་པོ་མེད། ལང་ཚོ་དེ་ཡང་གཞོན་དུས་མཛེས་ཀྱང་མི་རྟག་རྒས་ཤིང་འཁོགས་པོར་འགྱུར།ལུས་འདི་ནི་སྡུག་བསྔལ་གྱི་རྟེན་མགྲོན་ཁང་ལྟ་བུ་དང་། གྲོགས་པོ་ནི་མགྲོན་པོ་འདྲ་བས་ཡུད་ཙམ་ཡིན། དེ་བས་ཆོས་བྱ་རྒྱུར་རྟག་ཏུ་འབད་པར་བྱོས། ཞེས་སོགས་གསུངས་ཏེ་དེ་རྣམས་ཀྱི་ལྟ་བ་ལོག་པ་རྣམས་བཅོམ་ཞིང་ཡང་དག་པའི་ལྟ་བར་འགོད་པར་མཛད།།

 དེའི་ཚེ་བཅོམ་ལྡན་འདས་ཀྱི་སེང་གེའི་ཁྲི་ལས་གླང་པོ་ཆེའི་སྐད་ལྟ་བུའི་སྒྲ་ཆེན་པོ་ཞིག་བྱུང་བ་དང་། དེ་མ་ཐག་སྲིན་པོ་ལྔ་འཐོན་ནས་མུ་སྟེགས་ཀྱི་སྟོན་པ་དྲུག་གི་ཁྲི་རྣམས་རྩ་བ་ནས་བཤིག་པ་དང་། དེ་ནས་ཡང་གནོད་སྦྱིན་ལག་ན་རྡོ་རྗེས། རྡོ་རྗེའི་རྩེ་མོར་མེ་འབར་བ་ཞིག་ཐོགས་ནས་མུ་སྟེགས་པ་རྣམས་ནི་རྟག་ཏུ་བཅོམ་ལྡན་འདས་ཀྱི་མི་མཐུན་པའི་ཕྱོགས་འབའ་ཞིག་ཡིན་ཟེར་ནས་སྟོན་པ་དྲུག་གི་མགོ་ལ་གཏད་ནས་གཞུ་བའི་སྐབས། སྟོན་པ་དྲུག་ནི་ངོ་ཚ་དང་འཇིགས་སྐྲག་གིས་གང་སར་བྲོས་པ་དང་རླུང་འཚུབ་དྲག་པོས་འཁྱེར་ནས་ཁ་ཤས་ནི་ཆུར་མཆོངས་པ་དང་།ཁ་ཤས་ནི་ཤིང་སྡོང་ལ་འཇུ་བ་དང་། ཡང་ཁ་ཤས་ནི་སའི་ཁུང་བུའི་ནང་གབ་པ་སོགས་བྱེད་པའི་སྐབས།

   བཅོམ་ལྡན་འདས་ཀྱིས་དེ་དག་ལ་སྙིང་རྗེས་བཀའ་སྩལ་པ། རི་དང་ནགས་དང་ས་ཁུང་སོགས་ནི་སྙིང་སྟོབས་མེད་པའི་སྡར་མ་རྣམས་ཀྱིས་སྐྱབས་སུ་བསྟེན་པས་དེ་ནི་སྐྱབས་ནོར་བ་ཡིན། སྐྱབས་དེ་དག་གིས་རྟག་ཏུ་འཇིགས་པ་ལས་སྐྱོབ་མི་ཐུབ། དེ་བས་སྔོན་བྱས་ལས་ངན་རྣམས་ལ་འགྱོད་པ་བསྐྱེད་པ་དང་། དངས་ཤིང་དད་པའི་སེམས་ཀྱིས་སངས་རྒྱས་དང་ཆོས་དང་དགེ་འདུན་གསུམ་ལ་སྐྱབས་སུ་སོང་ན་རྟག་ཏུ་འཇིགས་པ་ཐམས་ཅད་ལས་གྲོལ་བ་ཡིན། དེ་གསུམ་ནི་སྡུག་བསྔལ་ལས་གྲོལ་ཞིང་གཏན་གྱི་བདེ་བ་ཆེན་པོ་སྦྱིན་མཁན་སྐྱབས་གནས་ཀྱི་མཆོག་ཡིན་ལ། འཇིག་རྟེན་ཕ་རོལ་གྱི་མུན་པར་འོད་སྣང་སྦྱིན་པའི་ཉི་མ་དང་། གཏི་མུག་གི་གཡང་ས་ལས་ཡར་འདྲེན་བྱེད་པའི་ཤེས་རབ་ཀྱི་ལྕགས་ཀྱུ་ཡིན། ཁྱོད་རྣམས་ལོག་ལྟའི་རབ་རིབ་ཀྱི་མུན་པ་ལེགས་པར་སེལ་ལ་དད་པའི་མིག་ཡངས་པོར་ཕྱེ་ཞིག །ཅེས་གསུངས་པས་མུ་སྟེགས་པའི་འཁོར་ཚོགས་ལྷག་མ་སྟོང་ཕྲག་དགུ་བཅུ་ནི་བཅོམ་ལྡན་འདས་ལ་སྐྱབས་སུ་སོང་བས་ལྷ་མི་ཐམས་ཅད་དགའ་ཞིང་མགུ་བར་གྱུར་ཏོ།༽

 

    ཚེས་དགུ་ལ་ལྷ་ཚངས་པས་མཆོད་པའི་ཚེ། བཅོམ་ལྡན་འདས་ཀྱི་སྐུ་མཉན་ཡོད་ཀྱི་ཁྲི་ལ་བཞུགས་བཞིན་པའི་དབུ་ཚངས་པའི་ཡུལ་སར་བསྙེགས་པ་གནམ་སའི་ཁྱོན་ཀུན་སྒྲིབ་པ་མེད་པར་ཀུན་གྱིས་མངོན་སུམ་དུ་གསལ་བར་མཐོང་པར་བཞུགས་ནས་ཆོས་སྟོན་པ་སྤྲུལ། 

 ཚེས་བཅུ་ལ་རྒྱལ་ཆེན་བཞིས་མཆོད་པའི་ཚེ།སྐུ་ལུས་ཀྱིས་སྲིད་རྩེའི་བར་ཁྱབ་པ༌ཀུན་གྱིས་མཐོང་ཞིང་གསུང་གིས་ཆོས་སྟོན་པ་ཀུན་གྱིས་ཐོས་པ་སྤྲུལ།

 ཚེས་བཅུ་གཅིག་ལ་ཁྱིམ་བདག་མགོན་མེད་ཟས་སྦྱིན་གྱིས་མཆོད་པའི་ཚེ་བཅོམ་ལྡན་འདས་སེང་གེའི་ཁྲི་ལ་བཞུགས་བཞིན་དུ་སྐུ་མི་སྣང་ཞིང་འོད་ཟེར་གྱིས་སྟོང་གསུམ་ཁྱབ་པ་དང་གསུང་གིས་ཆོས་སྟོན་པ་ཐོས་པ་སྤྲུལ། 

   ཚེས་བཅུ་གཉིས་ལ་ཁྱིམ་བདག་ཙིད་ས་མཆོད་པའི་ཚེ་ཏིང་ངེ་འཛིན་གྱི་མཐུས་སྐུ་ལས་གསེར་གྱི་ཁ་དོག་ལྟ་བུའི་འོད་ཟེར་བཀྱེས་པ་སྟོང་གསུམ་གྱི་འཇིག་རྟེན་གྱི་ཁམས་ཀུན་སྣང་བར་བྱས་ནས་འོད་ཀྱིས་རེག་པའི་སེམས་ཅན་ཐམས་ཅད་དུག་གསུམ་གྱི་སེམས་ཞི་ནས་སེམས་ཅན་ཐམས་ཅད་གཅིག་ལ་གཅིག་ཕ་མ་འམ་ཕུ་ནུ་ལྟ་བུར་མཛའ་ཞིང་སྡུག་པའི་སེམས་དང་ལྡན་པར་གྱུར་པ་ལ་ཆོས་སྟོན་པ་སྤྲུལ། 

 ཚེས་བཅུ་གསུམ་ལ་ཤུན་ཅི་རྒྱལ་པོས་མཆོད་པའི་ཚེ།སྐུའི་ལྟེ་བའི་དཀྱིལ་འཁོར་ལས་འོད་ཟེར་གཉིས་འཕྲོས་པ་འདོམ་བདུན་འཕགས།དེའི་སྟེང་དུ་པདྨ་ལ་སྤྲུལ་སྐུ་མཚན་དཔེའི་བརྒྱན་པ་རེ་རེ།དེ་གཉིས་ཀྱི་ལྟེ་བ་ནས་འོད་ཟེར་གཉིས་གཉིས་འཕྲོས་པ་འདོམ་བདུན་དུ་འཕགས་པའི་སྟེང་དུ་པདྨ་ལ་སྤྲུལ་སྐུ་མཚན་དཔེས་བརྒྱན་པར་རེ་རེ།དེ་ལས་ཀྱང་འོད་ཟེར་དང་པདྨ་དང་སྤྲུལ་སྐུ་སྔར་ལྟར་གཅིག་ལས་གཉིས།གཉིས་ལས་བཞི།བཞི་ལས་བརྒྱད།བརྒྱད་ལས་བཅུ་དྲུག་སོགས་གཉིས་གཉིས་འཕྲོས་པས་སྟོང་གསུམ་ཁྱབ་པ་ཀུན་ལ་མངོན་དུ་གྱུར་པ་སྤྲུལ། 

    ཚེས་བཅུ་བཞི་ལ་རྒྱལ་པོ་ཨུ་ཏྲ་ཡ་ནས་མཆོད་པའི་ཚེ།ཨུ་ཏྲ་ཡ་ནས་སངས་རྒྱས་ཀྱི་སྐུ་ལ་མེ་ཏོག་གཏོར་བ་རིན་པོ་ཆེའི་ཤིང་རྟ་ནོར་བུས་སྤྲས་པ་མཐོ་ཁྱད་ཚངས་པའི་འཇིག་རྟེན་གྱི་བར་དུ་འཕགས་པ་བརྒྱ་ཕྲག་ཕྱེད་དང་བཅུ་གསུམ་གྱི་གྲངས་དང་ལྡན་པར་གྱུར་པའི་ཤིང་རྟ་རེ་རེའི་སྟེང་དུ་སྤྲུལ་པའི་སངས་རྒྱས་རེ་རེ་བཞུགས་པའི་འོད་ཀྱིས་སྟོང་གསུམ་ཁྱབ་པ་སྤྲུལ།

མཇུག་གི་ཆོ་འཕྲུལ། 

   ཚེས་བཅོ་ལྔ་ལ་རྒྱལ་པོ་གཟུགས་ཅན་སྙིང་པོས་མཆོད་པའི་ཚེ། ཟོས་ན་ལུས་སེམས་ལ་བདེ་བ་ཁྱད་པར་ཅན་སྐྱེད་པའི་རོ་བརྒྱ་པའི་ཟས་ཀྱིས་སྣོད་ཐམས་ཅད་གང་བར་མཛད་ཅིང༌།ཕྱག་གཡས་ས་ལ་བསྣུམ་མ་ཐག་དམྱལ་ཁམས་བཅོ་བརྒྱད་ཀྱི་སེམས་ཅན་རྣམས་སྨྲེ་སྔགས་སྣ་ཚོགས་འདོན་པ་ཀུན་གྱིས་མངོན་པར་གྱུར་པ་ལ་བརྟེན་ནས་དང་ངས་སྐྲག་དང་སྐྱོ་བ་ཚད་མེད་པ་སྐྱེས་པ་ལ་ཆོས་བསྟན་པས་ལ་ལ་ཤི་འཕོས་ཏེ་ལྷར་སྐྱེས།ལ་ལ་བྱང་ཆུབ་ཏུ་སེམས་བསྐྱེད། ལ་ལས་རྒྱུན་ཞུགས་ནས་དགྲ་བཅོམ་པའི་བར་གྱི་འབྲས་བུ་མངོན་དུ་བྱས་པའི་སྤྲུལ་པ་སྟོན་པར་མཛད། 

༼དེ་ནས་སངས་རྒྱས་བཅོམ་ལྡན་འདས་ཀྱིས་ཕྱག་ས་ལ་བཞག་པས་དམྱལ་ཁམས་བཅོ་བརྒྱད་ཀྱི་གནས་སུ་ལྷུངས་ནས་སྡུག་བསྔལ་བཟོད་གླགས་མེད་པ་མྱོང་བཞིན་པའི་སེམས་ཅན་རྣམས་ཀྱིས་སྨྲེ་སྔགས་འདི་ལྟར་བཏོན།བདག་ཅག་གིས་སྔོན་སྡིག་པའི་ལས་མང་པོ་བསགས་པའི་རྐྱེན་གྱིས་ད་ལྟ་དམྱལ་བའི་ནང་སྡུག་བསྔལ་བཟོད་གླགས་མེད་པ་འདི་ལྟ་བུ་མྱོང་དགོས་བྱུང་སོང་ཞེས་ངུ་འབོད་དྲག་པོས་བཤད་པར།འདིར་འདུས་པའི་ལྷ་དང་མི་ལ་སོགས་པ་ཐམས་ཅད་ཀྱིས་ཐོས་ཤིང་མཐོང་བར་བྱས་ནས།ཐམས་ཅད་དེ་དག་ལ་སྙིང་བརྩེ་བའི་སེམས་བསྐྱེད་པ་དང་འཇིགས་ཤིང་སྐྲག་ནས་ལུས་ཀྱི་བ་སྤུ་ཡང་ལངས་པར་གྱུར་བའི་སྐབས་སངས་རྒྱས་བཅོམ་ལྡན་འདས་ཀྱིས་འཁོར་དེ་དག་ལ་བྱམས་པ་དང་སྙིང་རྗེས་དམ་པའི་ཆོས་བསྟན་ཏེ་དེ་དག་སོ་སོའི་སྡུག་བསྔལ་ལས་གྲོལ་ཞིང་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་དང་།ཡང་ཁ་ཤས་ནི་དགྲ་བཅོམ་པའི་གོ་འཕང་ཐོབ་པ་དང་ལྷ་དང་མིར་སྐྱེ་བའི་དགེ་བའི་རྩ་བ་བསྐྱེད་པ་ཡང་གྲངས་མེད་པར་གྱུར་ཏོ།དེ་ནས་དམྱལ་བར་ལྷུངས་བའི་སེམས་ཅན་རྣམས་ཀྱིས་སངས་རྒྱས་བཅོམ་ལྡན་འདས་མཐོང་ཞིང་ཆོས་ཐོས་པའི་རྐྱེན་གྱིས་རང་རང་གི་མྱོང་བཞིན་པའི་སྡུག་བསྔལ་ལས་སྐད་ཅིག་ལ་ཐར་ནས་ཤིན་ཏུ་དང་བའི་སེམས་བསྐྱེད་པ་དང་དེ་དག་ཚེའི་དུས་བྱས་ནས་ལྷ་དང་མིར་སྐྱེས་སོ།།༽

  དེ་ལྟར་ཉིན་བཅོ་ལྔ་ལ་ཆོ་འཕྲུལ་རེ་རེ་བསྟན་པས་ཉིན་རེ་བཞིན་འཁོར་གྱི་སེམས་ཅན་ལྷར་སྐྱེ། སེམས་སྐྱེད་པ་འབྲས་བུ་ཐོབ་པ་དཔག་ཏུ་མེད་པ་བྱུང་ཞིང་དེ་ཕྱིན་ཆད་དཔྱིད་ར་བའི་ཡར་དོའི་ཚེས་བཅོ་ལྔ་པོ་དུས་ཆེན་དུ་བྱིན་གྱིས་བརླབས་པ་ཡིན། ཐེག་དམན་ལུགས་སུ་ཚེས་བརྒྱད་ཁོ་ན་ཆོ་འཕྲུལ་དུས་ཆེན་དུ་བརྩི།

 

 

ཆོ་འཕྲུལ་མཆོད་པའམ་སྨོན་ལམ།

 

   དེ་ལྟར་ཆོ་འཕྲུལ་ཆེན་མོ་བསྟན་པས་ལྷ་དང་མི་དད་པ་ཅན་དག་གིས་མཉན་ཡོད་ཛེ་ཏཱའི་ཚལ་དུ་མུ་སྟེགས་ཕམ་བྱེད་ཆོ་འཕྲུལ་གྱི་མཆོད་རྟེན་དབྱིབས་གྲུ་བཞི་བང་རིམ་བཞི་པ་ཕྱོགས་རེར་གློ་འབུར་དང་བཅས་པ་བརྩིགས།  ཆོ་འཕྲུལ་མཛད་པའི་ཕྱི་ལོ་དེར་ཆོས་རྒྱལ་མྱ་ངན་མེད་ཀྱིས་མཉན་ཡོད་དུ་ཆོ་འཕྲུལ་ཆེན་མོའི་དུས་ཆེན་གསར་འཛུགས་མཛད་ཅིང་རྒྱ་གར་གྱི་པཎ་གྲུབ་དང་རྒྱལ་པོ་དང་བློན་པོ་དང༌། ཁྱིམ་བདག་དད་པ་ཅན་ལ་སོགས་པས་ཡུལ་སོ་སོར་ཆོ་འཕྲུལ་ཆེན་པོའི་དུས་ཆེན་ལ་མཆོད་པ་དང་དུས་སྟོན་བྱེད་པ་དར་བར་གྱུར། ལོ་རེ་བཞིན་འཕགས་ཡུལ་གྱི་ཆོས་རྒྱལ་རྣམས་ཀྱི་སྐུ་རིང་དུ་བདེ་བར་གཤེགས་པའི་རྟེན་གསུམ་ཁྱད་པར་ཅན་དང་དགེ་འདུན་གྱི་སྡེ་རྣམས་ལ་ཟང་ཟིང་གི་བསྙེན་བཀུར་རྒྱ་ཆེན་པོས་ཆོ་འཕྲུལ་མཆོད་པའི་དུས་ཆེན་ཚུགས་ཡོད་པར་བཤད།

    དེའི་རྒྱུན་གྱིས་བོད་དུ་ཡང་ཆོས་རྒྱལ་གོང་མ་ནས་བཟུང་སྟེ་བླ་མ་དང་སྦྱིན་བདག་དང་སྟོབས་དང་ལྡན་པ་རྣམས་ཀྱིས་རིམ་པ་ལྟར་ཆོ་འཕྲུལ་གྱི་དུས་ཆེན་ལ་མཆོད་པ་མཛད་པ་མང་དུ་བྱུང་ཞིང༌།ལྷག་པར་འཇམ་དབྱངས་བླ་མ་ཙོང་ཁ་པ་ཆེན་པོས་བསྟན་པ་རིན་ཆེན་ཕྱོགས་བཅུར་རྒྱས་པ་དང་།འཇིག་རྟེན་བདེ་ལེགས་ཆེན་པོས་ཁྱབ་པ་སོགས་ཚད་མེད་པའི་ཐུགས་བསྐྱེད་ཀྱིས་རབ་བྱུང་བཅུ་བདུན་པའི་ས་མོ་གླང་གི་ལོར་རྗེ་ཉིད་དགུང་ལོ་ང་གསུམ་ཕེབས་པ་སྤྱི་ལོ(1409)ལ་ལྷ་ལྡན་ར་ས་འཕྲུལ་སྣང་གི་གཙུག་ལག་ཁང་ཞིག་གསོ་མཛད་ཅིང་།ཁྱད་པར་ཇོ་བོ་ཤཱཀྱ་མུ་ནེའི་སྣང་བརྙན་མ་འོངས་ཀླུ་ཡུལ་དུ་གཤེགས་པའི་ལུང་བསྟན་ཡོད་པར་དེ་ལས་ཕྱིར་བསྲིངས་ཕྱིར་ངེས་པ་ལྔ་ལྡན་གྱི་ལོངས་སྐུར་ཞལ་བསྒྱུར་བའི་གསེར་ཟངས་བཙོ་མ་ལས་གྲུབ་པའི་དབུ་རྒྱན།ཇོ་བོ་མི་བསྐྱོད་རྡོ་རྗེ་དང་བཅུ་གཅིག་ཞལ་ལ་དངུལ་ལས་གྲུབ་པའི་དབུ་རྒྱན་གོང་མཚུངས་ཕུལ་བས་མཚོན་རྟེན་མཆོག་རྣམས་ཀྱི་སྤྱན་སྔར་མཆོད་སྤྲིན་དང་།དགེ་འདུན་ཁྲི་ཕྲག་བརྒལ་བར་ཉིན་ཞག་བཅོ་ལྔའི་རིང་བསྙེན་བཀུར་རྒྱ་ཆེར་མཛད་ནས་ལྷ་ལྡན་སྨོན་ལམ་ཆེན་མོ་ཞེས་འཇིག་རྟེན་ཡོངས་གྲགས་ཀྱི་སྲོལ་བཏོད།

 

     སྨོན་ལམ་གྱི་ཉིན་བཅོ་ལྔའི་རིང་།སྔ་དྲོ་མང་ཇ་དང་།རྣམ་འགྲེལ་དམ་བཅའ།སྐྱེ་རབས་གསུང་ཆོས།དགུང་ཚིགས།དབུ་ཕར་དམ་བཅའ།དུས་བཟང་ཆེན་མོ།དགུང་ཇ།འདུལ་མཛོད་དམ་བཅའ་ཆེན་མོ་བཅས་ཚོགས་ཐེངས་བརྒྱད་ཡོད།འདིའི་སྐབས་གདན་གསུམ་ལྷ་རམས་པ་རྣམས་གྲྭ་སྐོར་དམ་བཅའ་ཕེབས་བཞིན་པ་དང་།རིགས་ལམ་སྨྲ་བ་བརྒྱ་ཕྲག་གིས་གཞུང་ཆེན་པོད་ལྔ་ལ་ཡིད་དབང་འཕྲོག་པའི་བགྲོ་གླེང་གནང་བའི་སྐལ་བཟང་ཞིག་ཀྱང་ངོ།།

 

 

 

IWD 2021 theme: 

 

 

"women in leadership; Achieving an equal future in a covid-19 world."

 

༢༠༢༡རྒྱལ་སྤྱིའི་བུད་མེད་ཉིན་མོའི་བརྗོད་གཞི། 

 

“བུད་མེད་དབུ་ཁྲིད་ཀྱིས་ཏོག་དབྱིབས་ནད་དུག་-༡༩ པའི་འཛམ་གླིང་གི་མ་འོངས་པ་འདྲ་མཉམ་སྒྲུབ་ཐུབ།”

 

 

"A challenged world is an alert world. Individually, we're all responsible for our own thoughts and actions - all day, every day."

 

འགྲན་སློང་གི་འཛམ་གླིང་ནི་ཉེན་བརྡའི་འཛམ་གླིང་ཞིག་ཡིན། ང་ཚོ་མི་རེ་ངོ་རེས་རྟག་ཏུ་ཉིན་རེ་བཞིན་དུ་རང་གི་བསམ་བློ་དང་བྱ་སྤྱོད་ལ་འགན་ཁུར་དགོས།

 

 

"We can all choose to challenge and call out gender bias and inequality. We can all choose to seek out and celebrate women's achievements. Collectively, we can all help create an inclusive world.

 

"ཕོ་མོ་དབྱེ་བ་མེད་པར། འདྲ་མཉམ་མིན་པ་ལ་ཁ་གཏད་གཅོག་རྒྱུ་འདེམས་དགོས། ཚང་མས་བུད་མེད་ཀྱི་གྲུབ་འབྲས་ཟུར་བདམས་ཀྱིས་བརྩི་འཇོག་བྱེད་དགོས་ལ། ཚང་མས་མཉམ་དུ་གུ་ཡངས་པའི་འཛམ་གླིང་ཞིག་སྐྲུན་རོགས་བྱེད་ཐུབ།”

 

 

རྒྱལ་སྤྱིའི་བུད་མེད་དུས་དྲན་དྲྭ་ཚིགས་ལས་ཟུར་འདོན་ཞུས།

https://www.internationalwomensday.com/Theme

 

 

རྒྱལ་སྤྱིའི་བུད་མེད་དུས་དྲན་གྱི་བྱུང་རིམ་སྙིང་བསྡུས།

 

 

༡༨༤༨ ལོའི་ཟླ་༧་ཚེས་༡༩་དང་༢༠ ལ། Elizabeth Cady Stanton and her friend Lucretia Mott. རྣམ་གཉིས་ཀྱིས་དབུ་ཁྲིད་གོ་སྒྲིག་ཞུས་ཏེ། ཨ་རིའི་ནིའུ་ཡོག་སེ་ནེ་ཀལ་ཚོམས་ཁང་དུ་བུད་མེད་ཀྱི་ཐོབ་ཐང་ཚོགས་ཆེན་ཞིག་ཚོགས། དེར་སྐྱེས་ཕོ་མོ་བརྒྱ་ལྷག་འཛོམས་ཤིང་། བུད་མེད་ཀྱི་སྤྱི་ཚོགས་དང་སྤྱི་འབངས་དང་ཆོས་ལུགས་བཅས་ཀྱི་ཆ་རྐྱེན་དང་ཐོབ་ཐང་སྐོར་བགྲོ་གླེང་བྱས་པས་བུད་མེད་ཀྱི་ལས་སྐལ་ལ་བསམ་གཞིགས་ཀྱི་སྐར་ཁུང་བཏོད་ཡོད་སྙམ།

༡༨༥༨ ཟླ་༣ ཚེས་༨ ཉིན། ཨ་རིའི་ནིའུ་ཡོག་ཏུ་བུད་མེད་ལས་བཟོ་བ་ཚོས་ལས་མཚམས་བཞག་སྟེ་ཁྲོམ་ལམ་དུ་བུད་མེད་ཀྱི་ངལ་རྩོལ་ལས་ཤུགས་ཆེ་དྲགས་པ་དང་གླ་ཕོགས་ཉུང་དྲགས་པར་སྐད་འབོད་ངོ་རྒོལ་བྱས། དེ་ནས་ལོ་རེ་བཞིན་དུ་ཉིན་མོ་འདིར་ངོ་རྒོལ་གྱི་ལས་འགུལ་སྣ་ཚོགས་རིམ་པར་བྱས། ལྷག་པར་དུ། ༡༩༠༨ ལོར་བུད་མེད་ལས་བཟོ་བ་ཆིག་ཁྲི་ལྔ་སྟོང་ཨ་མེ་རི་ཀའི་ནེའུ་ཡོག་གྲོང་ཁྱེར་དུ་འཛོམས་ནས། བུད་མེད་ཀྱི་ངལ་རྩོལ་ལས་ཡུན་ཇེ་ཐུང་དང་གླ་ཆ་སྤོར་བ། འོས་འཕེན་ཐོབ་ཐང་དགོས་པ་བཅས་ཀྱི་རེ་བ་བཏོན།

སྤྱི་ལོ་༡༩༠༩ ཟླ་༢ ཚེས་༢༨ ཉིན་ཨ་རིའི་སྤྱི་ཚོགས་ཚོགས་པས་ལོ་རེའི་ཟླ་༢་པའི་མཇུག་མཐའི་གཟའ་ཉི་མ་དེ་བུད་མེད་དུས་ཆེན་ལ་སྲུང་བརྩིའི་ཁྱབ་སྒྲགས་སྤེལ་ཏེ། ༡༩༡༣ བར་དུ་ཨ་རི་རྒྱལ་ཡོངས་སུ་ཉིན་དེར་བུད་མེད་དུས་ཆེན་སྲུང་བརྩི་བྱས།

༡༩༡༠ ལོར་ཌན་མེག་ཏུ་སྐབས་གཉིས་པའི་བུད་མེད་ཚོགས་ཆེན་བསྡུས། རྒྱལ་ཁབ་བཅུ་བདུན་གྱི་བུད་མེད་འཐུས་མི་བརྒྱ་ལྷག་ཚོགས་ཆེན་ལ་ཞུགས། འཇར་མན་གྱི་བུད་མེད་ལས་འགུལ་དབུ་ཁྲིད་པ་དང་དམངས་གཙོ་ཚོགས་པའི་འགན་ཁུར་བ་ཁུ་ལ་རཱ་ཙེ་ཐི་ཀེན་གྱིས་༣ ཚེས་༨ ཉིན་མོ་དེ་རྒྱལ་སྤྱིའི་བུད་མེད་དུས་དྲན་ལ་གཏན་ཁེལ་སྲུང་བརྩི་ཞུ་དགོས་པའི་རེ་འདུན་བཏོན། རྒྱལ་སྤྱིའི་རྒྱ་གྲམ་དམར་པོ་ཚོགས་པས་གཡུལ་སར་ཚུད་པའི་བུད་མེད་དག་གི་དཀའ་ཚེགས་ལ་རྒྱལ་སྤྱིས་སེམས་ཁུར་བྱ་རྒྱུའི་ལས་འགུལ་སྤེལ།

༡༩༡༡ ལོར་ཨོ་སི་ཁྲུ་རི་ཡ་དང་། ཏེན་མག འཇར་མན། སུའེ་སེ་ལེན་བཅས་ཀྱིས་བུད་མེད་དུས་དྲན་ལ་རྟེན་འབྲེལ་ཞུས། ༼ཟླ་༣ ཚེས་༡༩༽ བུད་མེད་དང་སྐྱེས་པ་ས་མི་ས་ཡ་གཅིག་ལྷག་བུད་མེད་ཀྱི་ཐོབ་ཐང་དང་རང་དབང་གི་རྩོད་ལེན་སོགས་ལས་འགུལ་སྣ་ཚོགས་ནང་ལ་མཉམ་ཞུགས་བྱས། གསུམ་པའི་ཚེས་༢༥ ཉིན་ཨ་རིའི་ནིའུ་ཡོག་ཏུ། “ཟུར་གསུམ་མེ་སྐྱོན་ཆེན་པོ” བྱུང་ནས་བུད་མེད་ལས་བཟོ་བ་༡༤༠ ཡི་ཚེ་སྲོག་ཤོར། དེས་ཨ་རིའི་ལས་བཟོའི་ཐད་ལ་ཤུགས་རྐྱེན་ཆེན་པོ་ཐེབས་ཤིང་བུད་མེད་ཀྱི་ལས་ཀའི་མཐུན་རྐྱེན་སྐོར་ལ་གནད་དོན་གསལ་འདོན་གྱི་ནུས་པ་ཐོན།

༡༩༡༣་ལོའི་ཟླ་༢་པའི་ཆེས་མཐའ་མཇུག་གི་གཟའ་ཉི་མར། ཨུ་རུ་སིའི་བུད་མེད་ཀྱིས་དུས་དྲན་ཐོག་མ་བྱས། ཡུ་རོབ་ཀྱ་བུད་མེད་མང་པོས་གསུམ་པའི་ཚེས་བརྒྱད་ཀྱི་སྔ་ཕྱིར་དམག་འཁྲུག་ལ་ངོ་རྒོལ་གྱི་འདུ་འཛོམས་དང་“གཅེན་མོ་དང་གཅུང་མོ” ཞེས་པའི་འབོད་སྒྲ་བསྒྲགས།

༡༩༡༥་ཟླ་༤ ཚེས་༡༥ ལ། དམག་ཆེན་དང་པོའི་མནར་གཅོད་ཚད་མེད་གཏོང་སྐབས་ཧོ་ལན་དུ་རྒྱལ་ཁབ་༡༢ ནས་བུད་མེད་༡༣༠༠ ལྷན་འཛོམས་ཀྱི་ཚོགས་ཆེན་བསྡུས།

༡༩༡༧ ལོའི་ཟླ་༣པའི་ཚེས་༨་ཉིན། འཛམ་གླིང་འཁྲུག་ཆེན་དང་པོའི་ཁྲོད་ཚེ་སྲོག་ཤོར་བའི་ཨུ་རུ་སིའི་བུད་མེད་ས་ཡ་གཉིས་ལྷག་ལ་དྲན་གསོ་ཞུ་ཆེད། ཨུ་རུ་སུའི་བུད་མེད་ཚོས་བག་ལེབ་ལས་མཚམས་བཞག ཨུ་རུ་སུའི་གོང་མ་བཙན་གྱིས་གོ་ས་ནས་མར་འབབ་དུ་བཅུག་པ་དང་བར་བརྒལ་སྲིད་གཞུང་གསར་བས་བུད་མེད་རྣམས་ལ་འོས་འདེམས་ཀྱི་དབང་ཆ་སྤྲད་ཅིང་། སྤྱི་ཟླ་༣ ཚེས་༨ དེ་གསུམ་བརྒྱད་བུད་མེད་ངལ་རྩོལ་དུས་དྲན་ཞེས་གཞུང་འབྲེལ་སྲུང་བརྩི་ཞུས། 

༡༩༢༤་ལོ་ནས་རྒྱ་ནག་ལའང་གསུམ་བརྒྱད་བུད་མེད་དུས་དྲན་བྱུང་།

སྤྱི་ལོ་༡༩༧༥ ལོར་མཉམ་འབྲེལ་རྒྱལ་ཚོགས་ཀྱིས་ཐོག་མར་བུད་མེད་དུས་དྲན་སྲུང་བརྩི་བྱས་ཤིང་། ༡༨༧༧ལོའི་ཟླ་༡༢ པར་ཚོགས་ཆེན་ཐོག་ལོ་རེའི་སྤྱི་ཟླ་༣་ཚེས་༨་ཉིན་མོ་དེ་རྒྱལ་སྤྱིའི་བུད་མེད་ཀྱི་ཐོབ་ཐང་དང་འཛམ་གླིང་ཞི་བདེའི་ཉིན་མོར་གཏན་འཁེལ་གསལ་སྒྲགས་བསྐྱངས།

༢༠༡༡་ལོར་ཨ་རིར་ཐེངས་བརྒྱ་འཁོར་བའི་བུད་མེད་དུས་དྲན་གཞི་རྒྱ་ཆེན་པོ་ཞིག་བྱས། དེར་༡༩༡༡ ལོར་ཐོག་མར་མཉམ་ཞུགས་པ་ཨོ་སི་ཁྲུ་རེ་ཡ་དང་ཊན་མེག འཇར་མ་ཎི། སུད་སི་ལན་ཊི་སོགས་རྒྱལ་ཁབ་བརྒྱ་ལྷག་དུས་དྲན་མཛད་སྒོར་ཞུགས། ཨ་རིའི་སྲིད་འཛིན་ཨོ་པདྨ་ཡིས། ༢༠༡༡ ཟླ་གསུམ་པ་འདི། “བུད་མེད་ཀྱི་ལོ་རྒྱུས་ཟླ་བ” ཡིན་པར་ཁྱབ་བསྒྲགས་གནང་། ཨ་རིའི་རྒྱལ་སྲིད་དྲུང་ཆེ་ལྕམ་སྐུ་ཁི་ལིན་ཊོན་གྱིས་བྱས་རྗེས་ཅན་གྱི་བུད་མེད་བརྒྱ་ཐམ་པ་གདན་དྲངས་ནས་རྒྱལ་སྤྱིའི་སྤྱི་ཚོགས་ནང་བུད་མེད་ཀྱི་རང་འགུལ་ནུས་སྟོབས་གོང་འཕེལ་གྱི་ཐད་ལས་གཞི་གསར་དུ་བཙུགས། ཨོ་སི་ཁྲུ་ལི་ཡའི་གཞུང་གིས་བུད་མེད་དུས་དྲན་སྲུང་བརྩི་ཞུས་ནས་ལོ་ངོ་ཧྲིལ་པོ་100 འཁོར་བའི་མཚོན་རྟགས་ཅན་གྱི་སྐར་ཉི་ཤུའི་དོང་ཙེ་ཞིག་ཀྱང་གསར་བཟོ་བྱས།

དེ་རྗེས་ལོ་རེ་བཞིན་གྲོང་གསེབ་དང་ལུང་ཁུག་ཁག་གི་བུད་མེད་ཀྱི་ནུས་པ་གོང་སྤེལ་དང་བཀྲེས་ལྟོགས་དང་དབུལ་ཕོངས་ཀྱི་གནས་ལས་ཐར་ཐབས། དམག་འཁྲུག་ཁྲོད་ཡུགས་མོར་གྱུར་བའི་བུད་མེད་རྣམས་ལ་དམིགས་བསལ་རོགས་སྐྱོར། དེ་མིན་དཀའ་ངལ་འཕྲད་བཞིན་པའི་བུད་མེད་གཞན་དག་ལ་དཀའ་ཚེགས་འཕར་མ་འགོག་ཐབས་བྱ་རྒྱུ་སོགས་ལོ་རེར་ལས་འགུལ་སྤེལ་བཞིན་ཡོད། 

 

ནོར་ལྷ་ཚང་ནས། ༢༠༢༡ ༣ ༨