ཕྱི་ལོ་ ༡༩༦༠ ལོའི་གསུམ་བཅུའི་དུས་དྲན་གྱི་གསུང་འཕྲིན།

 

   དེ་རིང་ཕྱི་ལོ་ ༡༩༦༠ ཟླ་ ༣ ཚེས་ ༡༠ འདི་ནི་རང་རེ་བོད་མི་མང་ནས་ལྟ་ལོག་ངན་གཡོའི་ལམ་དུ་ཞུགས་པའི་རྒྱ་དམར་གྱི་སྲིད་དབང་གདུག་རྩུབ་ཅན་ལ་ངོ་རྒོལ་དང༌། བོད་སྒེར་ལངས་རང་དབང་བསྐྱར་གསོའི་དོན་དུ་ལས་འགུལ་ཆེན་པོ་བྱས་ནས་ལོ་གཅིག་འཁོར་བའི་དུས་ཚེས་གཟི་བརྗིད་ཅན་རྗེས་དྲན་བྱེད་འོས་པ་ཞིག་ཡིན་པས་ཚང་མས་དྲན་གསོ་བྱེད་པ་དང་ཆབས་ཅིག་བསམ་དགོས་པ་ནི་འཇིག་རྟེན་འདིར་ཡིག་རིགས་དང༌། ལོ་རྒྱུས་མ་དར་བའི་དུས་སྐབས་ལ་སུ་ཞིག་སུའི་ཁོངས་སུ་གཏོགས་མིན་གྱི་གནས་ལུགས་སུས་ཀྱང་བརྗོད་པར་དཀའ་ཞིང༌། འོལ་ཚོད་དུ་བརྗོད་ཀྱང་རྩ་འཛིན་མི་འཕེར་ལ། ཡིག་རིགས་དང་ལོ་རྒྱུས་ཀྱི་སྲོལ་དར་བ་ནས་བཟུང་ན། ཕྱི་སྣོད་ཀྱི་བཀོད་པ་ས་ཆུ་རི་བྲག་གངས་ཀྱི་རྭ་བ་ལ་སོགས་པའི་ཆགས་ཚུལ་དང༌། ནང་བཅུད་ཀྱི་སེམས་ཅན་གཙོ་བོ་མི་རིགས། སྐད། ཡི་གེ ཆས་གོས། མི་གཤིས། ཆོས་ལུགས་སོགས་སྒོ་ཀུན་ནས་གསལ་པོར་ཤན་ཕྱེ་བའི་རང་རེ་བོད་རིགས་རྣམས་རང་སྲིད་རང་ཉིད་ཀྱིས་སྐྱོང་བའི་རྒྱལ་ཁབ་སྒེར་བཙན་གཙང་མ་ཞིག་ཡིན་པ་ལོ་སྟོང་ཕྲག་གོང་གི་ཆོས་རྒྱལ་ཚོའི་དུས་རབས་ནས་བཟུང་བོད་རྗེ་རིམ་པ་དང༌། ྋརྒྱལ་དབང་སྐུ་ཕྲེང་རིམ་པའི་བར་གྱི་རྒྱལ་རབས་ལོ་རྒྱུས་ནས་གསལ་པོར་རྟོགས་གསལ་ལྟར་མ་ཟད། ལྷག་པར་ཉེ་བའི་ཆར་ཡང༌། རྗེ་གོང་མའི་དུས་སྐབས་སུ་འཛམ་གླིང་རྒྱལ་ཁབ་འགའ་ཤས་དང་མཉམ་དུ་འདྲ་མཉམ་རང་དབང་གི་ཐོག་ནས་ཆིངས་ཡིག་ཁག་བཞག་པ་སོགས་འཛམ་གླིང་ཁྲིམས་སྲོལ་དང་མཐུན་པའི་རང་སྲིད་རང་སྐྱོང་གི་རྒྱལ་ཁབ་རང་བཙན་གཙང་མར་གནས་པའི་ལོ་རྒྱུས་སུས་ཀྱང་བསུབས་མི་ཐུབ་པ་དང༌། ས་ཡུལ་གྱི་བཀོད་པ་སུས་ཀྱང་སྒྲིབ་མི་ཐུབ་པ་དེ་ལྟར་ཡང༌། རྒྱ་ནག་གི་ས་ཁུལ་དུ་དམར་པོས་སྲིད་དབང་བསྒྱུར་བ་ནས་བཟུང་གཞན་སྡེ་དབང་དུ་བསྡུས་པར་ཁྲེལ་གཞུང་ངོ་ཚ་བྲལ་བའི་བསམ་སྦྱོར་དྲག་པོས་སྔར་རྒྱ་ནག་གོང་མ་རིམ་པའི་དུས་སྐབས་སུ་རྒྱ་བོད་མཆོད་ཡོན་ལར་རྒྱའི་འབྲེལ་ལམ་ཆེ་ཆུང་སྣ་ཚོགས་ཤིག་བྱུང་བའི་འབྲེལ་བར་བསྙད་དེ་བོད་རྒྱ་ནག་གི་ཁོངས་གཏོགས་ཡིན་ཚུལ་མི་འདྲ་གྲལ་བསྒྲིགས་ཀྱི་གླེང་མང་ཐོག་༡༩༤༩ ལོ་ནས་བོད་སར་རིམ་འཛུལ་གྱིས་མཐར་༡༩༥༠ བོད་ལྕགས་སྟག་ལོར་ཆབ་མདོར་དྲག་ཤུགས་ཀྱིས་བཙན་འཛུལ་བྱས་ཏེ། ༡༩༥༡ བོད་ལྕགས་ཡོས་ལོར་བཟང་བཙོན་ལྟ་བུའི་དོ་དམ་དུ་གནས་པའི་རང་རེའི་སྐུ་ཚབ་རྣམས་ལ་རྒྱ་དམར་གྱིས་རང་འདོད་ལྟར་བྲིས་པའི་གྲོས་མཐུན་ལ་རང་མིང་བཀོད་དུ་བཅུག་ཅིང༌། རྒྱ་དམར་ཁོ་རང་ཚོས་བཟོས་པའི་རྟགས་ཐེལ་ཞིག་བོད་གཞུང་གི་ཡིན་ཚུལ་དུ་ཕབ་བཅུག

    དེ་ནས་ཐོག་མའི་ཆར་རྒྱ་དམར་གྱིས་བརྗོད་ཚིག་ཏུ་ང་ཚོ་རྒྱ་བོད་མི་རིགས་སྤུན་ཟླ་ཡིན། རྒྱ་རིགས་རྣམས་ནི་བོད་མི་མང་གི་ཞབས་ཞུ་བ་ཡིན་ཟེར་བ་སོགས་སྙན་པའི་གཏམ་བཤད། འཛུམ་པའི་བཞིན་དང༌། དཀར་བའི་སོ་བསྟན་ནས་བློ་ཁྲིད་སྣ་ཚོགས་བྱས། བར་དུ་ཕྲལ་ཕུགས་ཀྱི་ཁེ་གྱོང་ཇི་བཞིན་མི་རྟོགས་པའི་བོད་རིགས་འགའ་ཤས་ལ་ངན་སློབ་དང༌། བོད་མི་མང་པོ་ཞིག་ལ་དངུལ་གྱི་འགྲོ་གྲོན་ཕངས་མེད་བཏང་ནས་གཡོ་སྒྱུའི་ཐབས་ཚུལ་གྱིས་བསླུ་མཁས་དུ་མ་བྱས། མཐར་ཞེ་སྡང་གི་རླུང་ནག་དྲག་པོས་བཅོས་མའི་གདོང་འབག་བུད་དེ་མི་སྡུག་པའི་རང་གདོང་རྗེན་པ་དངོས་སུ་བསྟན་ནས་ཆོས་བྱེད་དགེ་འདུན་གྱི་སྡེ་ལ་སྡང་དགྲའི་གཙོ་བོར་བཟུང་སྟེ་སྟོན་པ་སངས་རྒྱས་དང་བཅས་པ་ཆོས་བྱེད་མཆིས་སོ་ཅོག་ལ་སྐྱོན་བརྗོད་དང༌། ངན་སྨྲས། དགོན་ཁག་བླ་གྲྭ་གཏོར་བཅོམ། སེར་སྐྱ་བསམ་ཡོད་ཕལ་ཆེར་གསོད་བཟུང༌། ཉམ་ཆུང་རྒྱ་ཆེའི་མི་མང་ལ་མིང་འདོགས་སྣ་ཚོགས་ཀྱིས་ལས་དུད་འགྲོ་ལྟ་བུའི་བཀོལ་སྤྱོད། ཟས་ཕྱེད་འགྲངས། བློའི་རྟོགས་དཔྱོད་བྱེད་པའི་ཡོན་ཏན་གྱི་སྒོ་མཐའ་དག་བཀག་སྟེ་དམར་པོ་རིགས་གཅིག་ཁོ་ན་ལས་མཐོང་ཐོས་མི་འཇུག་པའི་རྣ་མིག་གཅིག་པའི་ཤེས་རྨོངས་ཅན་དུ་བསྒྱུར་བ་སོགས་འགྲོ་བ་མི་ཡི་སྤྱོད་ཚུལ་དང༌། བསམ་བརྗོད་ཀྱི་ཡུལ་ལས་འདས་པའི་བྱ་སྤྱོད་མ་རུང་པ་དུ་མ་ཞིག་སྨྱོན་པའམ་ཀླ་ཀློ་ལས་ལྷག་པ་བྱས་དང་བྱེད་འགྱུར་གྱིས་མདོར་ན། བོད་མི་མཆོག་དམན་བར་མ་མཐའ་དག་བདེ་བའི་གོ་སྐབས་སྐད་ཅིག་ཀྱང་མེད་པའི་སྙིང་ནད་སྡུག་བསྔལ་མི་བཟོད་པའི་སྐབས་སུ་གནས་མུར། རྒྱ་དམར་ནས་བོད་ཀྱི་ཡུལ་གོམས་གཤིས་ལུགས་སྤྱི་དང༌། ལྷག་པར་ཆོས་ཕྱོགས་ཀྱི་བྱེད་སྒོར་ཤིན་ཏུ་མི་འདོད་པའི་རྣམ་འགྱུར་ངོ་ལྐོག་མེད་པར་བསྟན་མུས་ཤིག་ལ། སྔ་ལོའི་དུས་ཚོད་ད་ཉིན་ཕྲན་དང༌། ཆོས་སྲིད་ཀྱི་འགོ་གཙོ་གནད་ཡོད་ཁག་དམར་པོའི་དམག་སྒར་ལྟེ་བའི་ནང་ཛ་དྲག་དམིགས་བསལ་ཅན་གྱི་གནས་ཚུལ་འོག་ཆེད་གཉེར་མགྲོན་འབོད་བྱས་པར་བརྟེན་བོད་ཤར་ཕྱོགས་ཁམས་དང༌། ཨ་མདོ་ཁུལ་རྒྱ་དམར་གྱི་བྱ་སྤྱོད་མང་པོ་ཞིག་མངོན་སུམ་དུ་མཐོང་བའི་ཉམས་མྱོང་དང༌། ད་ལམ་གྱི་གནས་ཚུལ་ཡོང་རྐྱེན་སོགས་སྒོ་ཀུན་ནས་ཚུལ་མིན་གྱི་བསམ་སྦྱོར་ངན་གཤོམ་ཡིན་པར་མཐོང་སྟེ་བོད་མི་མང་གི་སྙིང་ལ་རིང་ནས་བསགས་པའི་གཅོང་ནད་ཀྱི་ཟུག་གཟེར་རྣམས་དུས་གཅིག་ཏུ་ལངས་ནས་གྲོང་ཁྱེར་ལྷ་སའི་ཡུལ་མི་མཆོག་དམན་ཚང་མ་བསྡེབས་འཛོམས་འུར་ལངས་ཀྱིས་ངོས་ལ་རྒྱ་མིའི་སར་འགྲོ་ཐལ་མི་ཡོང་བའི་ཞུ་འབོད་དང༌། རྒྱ་དམར་ལ་ཞི་རྒོལ་ཁྲོམ་བསྐོར་བཅས་སྔར་མི་གྲགས་པ་ཞིག་བྱས་ཏེ་རང་རེ་གངས་ཅན་པའི་རྒྱལ་རབས་ཀྱི་དེབ་ཐེར་ནང་རྔམ་བརྗིད་སྙིང་དོན་དང་ལྡན་པའི་ལེའུ་ཞིག་གསར་འགོད་བྱས་པ་རེད།

ས་ཁྱོན་དང༌། མི་འབོར། དྲག་ཆས་ཀྱི་སྟོབས་ཤུགས་བཅས་ཀྱི་མཐུན་རྐྱེན་འཛོམས་པའི་རྒྱ་དམར་གྱི་དྲག་པོའི་སྲིད་དབང་གདུག་རྩུབ་ཅན་དེ་འདྲའི་མདུན་སར་རྡོ་གྲི་ཙམ་ལ་ལག་ཆར་རེ་བའི་བོད་མི་ཉམ་ཆུང་གྲངས་ཉུང་དེ་རྣམས་ནས་ཞུམ་པ་མེད་པའི་སྙིང་སྟོབས་ཀྱིས་རྒྱ་མཚོའི་རྦ་རླབས་དྲག་ཏུ་འཕྱུར་བ་ལྟར་ཞི་བའི་རྒོལ་གླེང་དེ་ལྟ་བུ་བྱས་པ་ནི་ཚོད་དཔག་གི་གནས་ཚད་ལས་ཆེས་ཆེར་བརྒལ་བའི་བོད་མིའི་སྙིང་སྟོབས་ཕུལ་དུ་བྱུང་བའི་རྟགས་མཚན་ཞིག་འགོག་མེད་དུ་བསྟན་པ་མ་ཟད། མི་རིགས་འདྲ་མཉམ་དང༌། རང་དབང་གི་ཆེད་དུ་འཐབ་རྩོད་བྱེད་པའི་འཛམ་གླིང་གི་ལོ་རྒྱུས་ནང་ལའང་གཙོ་ཆེ་བའི་གཟི་བརྗིད་ཅན་གྱི་ལེའུ་ཞིག་གསར་གཏོད་བྱས་པ་དང༌། དེ་དང་དུས་མཚུངས་སུ་འཛམ་གླིང་མི་མང་གི་མདུན་སར་རྒྱ་དམར་གྱི་བྱ་སྤྱོད་ལ་ངོ་སྤྲོད་དང༌། མཛུབ་སྟོན་བྱས་ཏེ་རྒྱ་དམར་ལོག་སྲིད་ཀྱི་ལམ་ཞུགས་རྣམས་བློ་ལྡན་འཛམ་གླིང་མི་མང་གི་གྲལ་ཁྲོད་ནས་རྒྱང་རིང་དུ་བུད་དེ་རང་གདོང་བསྟན་མི་ནུསཔར་སྨྲ་བཅད་ངོ་གནོང་གིས་སྡོད་དགོས་པ་ཞིག་བཟོས་པ་རེད།

    དེ་ལྟར་ཞི་རྒོལ་ལས་འགུལ་ཉག་གཅིག་བྱས་དང་བྱེད་སེམས་ཀྱང༌། བོད་མི་མང་གི་རེ་བསམ་དོན་ཐོག་ཏུ་མ་འཁེལ་བར་བརྩེ་མེད་ཀླ་ཀློའི་དཔུང་ཚོགས་ཀྱིས་རྒྱུ་མཚན་ལྡན་པའི་ཞི་བའི་རྒོལ་གླེང་ལ་ཉན་བློ་ཙམ་ཡང་མ་བྱས་པར་དེང་དུས་ཀྱི་འཕྲུལ་ཆས་བེད་སྤྱོད་ཀྱིས་དྲག་གནོན་མི་བཟད་ལག་ཏུ་བླངས་ནས་སྔོ་ནག་དུ་བའི་སྤྲིན་ཕུང་དཀྲིགས་ཏེ་འུར་སྒྲ་དང༌། མེ་འོད་ཀྱི་གློགས་ཞགས་འཁྱུག་པའི་མདེལ་མཚོན་གྱི་ཆར་པའི་འོག་ཏུ་རྒྱུན་དུ་ཡ་རབས་དམ་པའི་ཚུལ་ལུགས་སུ་སྤྱོད་ཅིང༌། རང་རེའི་སྙིང་ནས་མཛའ་བརྩེས་འགྲོགས་པའི་ཤ་ཁྲག་གཅིག་གྱུར་གྱི་ཕ་མ་བུ་ཕྲུག གཅེན་གཅུང་ཕོ་མོ། ཕུ་ཞང་སྲིང་མོ་སོགས་རྒན་བྱིས་ཁྲི་ཕྲག་བརྒལ་བའི་གཅེས་ལུས་དུམ་བུ་བརྒྱ་ཕྲག་ཏུ་འཐོར་ཏེ་གཅེས་པའི་རང་སྲོག་དོར་བ་མ་ཟད། ད་དུང་རྒྱ་ཆེའི་བོད་མི་མང་རྣམས་གདུག་རྩུབ་ཅན་གྱི་བཙན་དབང་མནར་གཅོད་དྲག་པོའི་འོག་གནས་མུས་ཀྱི་བོད་མིའི་ཁྲག་གི་བབས་རྒྱུན་ད་དུང་ཡང་ཆད་མེད་ཅིང༌། དེ་ལྟ་ནའང་དྲག་པོའི་བསམ་སྦྱོར་ངན་པ་ཇི་ཙམ་འཕེལ་བ་དེ་ཙམ་དུ་རྒྱ་ཆེའི་མི་མང་གི་སེམས་ཤུགས་དང༌། སྙིང་སྟོབས་ཀྱང་ཕན་ཚུན་འགྲན་པ་བཞིན་ཇེ་ཆེ་ཇེ་ཟབ་ཏུ་འགྲོ་དང་འགྲོ་མུས་རེད།

    དེས་ན་ང་ཚོས་སངས་རྒྱས་ཀྱི་བསྟན་པ་དང༌། བོད་མི་རིགས་ཀྱི་རང་དབང་བསྐྱར་གསོའི་ཆེད་དུ་ལུས་སྲོག་ཡལ་བར་དོར་བའི་སྤུན་ཟླ་དེ་རྣམས་ཀྱི་བཀའ་དྲིན་རྗེས་དྲན་གྱིས་དྲིན་ལན་དང༌།དྲང་བདེན་རང་དབང་ལ་དགའ་བའི་འཛམ་གླིང་མི་མང་གི་མདུན་སར་ཡ་རབས་སྤྱོད་བཟང་གི་མིག་དཔེར་འགྱུར་ངེས་ཀྱི་སྒོ་གསུམ་ནུས་ཤུགས་གང་ཡོད་གཅིག་ཏུ་བསྒྲིལ་ནས་གཞན་དབང་མནར་གཅོད་རྐྱེན་ངན་གྱི་རྒུད་པ་མཐའ་དག་ལེགས་པར་བསལ་ནས་ཆོས་འབྱོར་བདེ་སྐྱིད་རང་དབང་གི་དཔལ་ཡོན་གང་མྱུར་ཐོབ་ཐུབ་པའི་འབད་བརྩོན་སྐད་ཅིག་ཀྱང་མི་གཡེལ་བ་བྱེད་དགོས། དེ་ལྟར་བྱེད་པའི་འགན་འཁུར་གཙོ་བོ་ནི་རང་རེ་ཁྱིམ་མཚེས་རང་དབང་གི་ཡུལ་ཁག་ཏུ་བྲོས་འབྱོར་བོད་མི་རྣམས་ལ་འཁྲི་བ་ཞིག་ཡིན་ངེས་རེད། དེ་ཡང་རང་རེ་ནང་པ་སངས་རྒྱས་པའི་རྗེས་འཇུག་རྣམས་ཀྱི་ཐུན་མོང་མིན་པའི་ཁྱད་ཆོས་ལྟར་རང་གཞན་འདི་ཕྱི་གཉིས་ཕུང་སྡིག་སྤྱོད་ཀྱི་ལས་ལམ་དུ་མི་འཇུག་པར་ཞི་བདེ་དྲང་བདེན་གྱི་ཐོག་ནས་ཚུལ་དང་མཐུན་པའི་རྩོད་པ་བྱས་ཏེ་རྒྱ་དམར་གྱི་ཚུལ་དང་མི་མཐུན་པའི་བྱ་སྤྱོད་རྣམས་འཛམ་གླིང་མདུན་སར་གསལ་རྗེན་ཁྲོམ་སྟོན་གྱིས་རང་ཕྱོགས་ཀྱི་བདེན་པའི་དག་སྐྱེལ་ཐོག རང་དབང་དྲང་བདེན་ལ་དགའ་བའི་འཛམ་གླིང་རྒྱལ་ཁབ་རྣམས་ཀྱི་ཤུགས་ཆེའི་རྒྱབ་སྐྱོར་ལ་བརྟེན་ནས་རང་རེའི་མཐར་ཐུག་གི་དམིགས་ཡུལ་འགྲུབ་པ་བྱ་དགོས།

    འོ་ན་རང་རེ་རྒྱ་གར་དུ་བྲོས་འབྱོར་བ་རྣམས་ནས་ད་ཕན་ལོ་གཅིག་འཁོར་ཉེའི་རིང་ལས་དོན་དེ་ལྟར་སྒྲུབ་ཨེ་ཡོད་ཅེ་ན། ད་ཕན་རྒྱ་དམར་ནས་མི་བདེན་བདེན་བརྫུ་དང༌། མི་བཟང་བཟང་རྒུའི་དྲིལ་བསྒྲགས་མང་པོ་བྱས་ཏེ་འཛམ་གླིང་གི་མི་མང་པོ་ཐེ་ཚོམ་ཅན་དུ་བསྒྱུར་བ་དེར་ང་ཚོས་རྒྱ་དམར་གྱི་བརྫུན་ཕུགས་གསལ་པོར་བརྟོལ་ཏེ་ད་ཆ་འཛམ་གླིང་གི་མི་མང་རྣམས་ནས་རྒྱ་དམར་ལ་པང་དུ་དུག་སྦྲུལ་བྱུང་བའམ་སྐྱུག་ནད་ཅན་གྱི་ཟས་མཐོང་བ་ལྟ་བུའི་འདུཤེས་སྐྱེས་ཏེ་རྒྱ་དམར་མི་ཡི་གྲལ་མཐར་རིམ་འབུད་བྱེད་བཞིན་ཡིན་ཅིང༌། དེ་ལྟར་ཡིན་པའི་རྒྱུ་མཚན་ནི། རང་རེས་བོད་དོན་མཉམ་འབྲེལ་རྒྱལ་ཚོགས་ནང་ཞུ་སྐབས། རྒྱབ་སྐྱོར། བར་གནས། ངོ་རྒོལ་བྱེད་མཁན་ཕྱོགས་གསུམ་ལས། རང་ཕྱོགས་ལ་རྒྱབ་སྐྱོར་བྱེད་མཁན་རྒྱལ་ཁབ་བཞི་བཅུ་ཞེ་ལྔ་དང༌། རྒྱ་དམར་ལ་རྒྱབ་སྐྱོར་བྱེད་མཁན་དམར་པོའི་རྒྱལ་ཁབ་དགུ་ལས་མེད་པ་དེས་གསལ་པོ་བསྟན་པ་རེད།

   ད་དུང་ནང་གི་གནས་ཚུལ་གསལ་པོ་ཞིག་རྟོགས་ན་རང་དབང་བྲལ་བ་མ་གཏོགས་རྒྱལ་ཁབ་དགུ་པོ་དེའི་མི་མང་རྣམས་ནས་ཀྱང་ངེས་པར་བདེན་པ་དང༌། རང་དབང་ལ་དགའ་ཞེན་ཡོང་རྒྱུར་བརྟེན། སེམས་ཀྱི་གཏིང་ནས་ང་ཚོར་རྒྱབ་སྐྱོར་དང་སེམས་འཁུར་ངེས་པར་ཡོང་གི་རེད། དེས་མ་ཚད་འཛམ་གླིང་རྒྱལ་སྤྱིའི་ཁྲིམས་དཔོན་ཚོགས་པ་ནས་བོད་ཀྱི་གནས་ཚུལ་ལ་རྟོགས་ཞིབ་ལྷན་ཁང་ཟུར་བཙུགས་ཀྱིས་བརྟག་དཔྱད་དང༌། བདེན་པའི་ཕྱོགས་ལ་རྒྱབ་སྐྱོར་གནང་བཞིན་པ་མ་ཟད། བོད་དོན་ལ་ཆེད་དམིགས་ཨེ་ཤ་ཡ་དང༌། ཨ་ཕེ་རི་ཀའི་འཐུས་མི་ཚོགས་འདུ་ཞིག་ཀྱང་རིང་མིན་རྒྱ་གར་དུ་ཚོགས་གཏན་འཁེལ་བ་སོགས་ཞི་བདེ་དྲང་བདེན་ལ་དགའ་བའི་མི་མང་ནས་རྒྱ་དམར་གྱི་བྱ་སྤྱོད་ལ་སྐྱོན་འཛུགས་དང༌། རང་རེའི་བདེན་པ་ལ་ཐུགས་འཁུར་རྒྱབ་སྐྱོར་གནང་དང་གནང་བཞིན་པ་སོགས་ལ་བརྟེན་ནས་ང་ཚོའི་ལས་དོན་ལ་བྱས་རྗེས་དང༌། བདེན་པའི་རྒྱལ་ཁ་མི་ཉུང་བ་ཞིག་ཐོབ་ཡོད།

    འོན་ཀྱང་ད་ལྟའི་ཆར་འཛམ་གླིང་མི་མང་ནས་ང་ཚོར་ཐུགས་འཁུར་རྒྱབ་སྐྱོར་གནང་བའི་འགོ་འཚུགས་པ་ཙམ་དང་རང་རེའི་ལས་དོན་གོམ་རིམ་དང་པོ་བགྲོད་པ་ཙམ་ལས། ང་ཚོའི་མཐར་ཐུག་གི་དམིགས་ཡུལ་རེ་དོན་ཡོངས་རྫོགས་ད་ལྟ་འགྲུབ་མེད་ཅིང༌། འཛམ་གླིང་ནང་ང་ཚོ་བོད་ཀྱི་གནས་སྟངས་དང༌། རྒྱ་དམར་གྱི་བྱ་སྤྱོད་བཟང་ངན་གསལ་པོར་མ་རྟོགས་པའི་རྒྱལ་ཁབ་ཡོད་སྟབས་ང་ཚོས་ད་དུང་མུ་མཐུད་བདེན་རྫུན་གྱི་དག་སྐྱེལ་གསལ་པོར་བྱས་ཏེ་དམིགས་ཡུལ་དེ་མ་འགྲུབ་བར་འབད་བརྩོན་ལྷུར་ལེན་བྱེད་དགོས།

   དེའི་ཆ་རྐྱེན་གཙོ་བོ་རང་རེ་ཁྱིམ་མཚེས་ཡུལ་ཁག་ཏུ་འབྱོར་བའི་བོད་ཆོལ་ཁ་གསུམ་གྱི་མི་རིགས་སུ་གཏོགས་ཚད་རྣམས་དམ་ཚིག་དང་བློ་སེམས་གཅིག་སྒྲིལ་བྱེད་གལ་ཤིན་ཏུ་ཆེ་ཞིང༌། དེ་ལྟར་བྱེད་དགོས་པའི་རྒྱུ་མཚན་ཡང་གཞན་ནས་འཚོལ་མ་དགོས་པར་རང་ཅག་བོད་རང་གི་ལོ་རྒྱུས་དང༌། ཉམས་མྱོང་ཐོག་ནས་ངོ་སྤྲོད་ངོས་འཛིན་བྱེད་རྒྱུ་ཡོད་པ། དཔེར་ན། སྔར་ཆོས་རྒྱལ་ཚོའི་དུས་རབས་སུ་བོད་རིགས་ཡོངས་རྫོགས་ཆིག་སྒྲིལ་གྱིས་མང་ཚོགས་ནས་འགོ་འཁྲིད་ཚོར་བློ་གཏད་ཡིད་ཆེས་བྱས་ཤིང༌། འགོ་འཁྲིད་རྣམས་ནས་རང་དོན་མི་སེམས་པར་མང་ཚོགས་ཀྱི་བདེ་དོན་གཙོར་བཟུང་དམ་ཚིག་མདུད་རྒྱ་ལྷོད་མེད་བྱས་སྟབས་དུས་ སྐབས་དེའི་བོད་རྒྱལ་ཁབ་ཀྱི་མངའ་ཐང་དང༌། སྟོབས་ཤུགས་དེ་སུ་ལའང་ཡིད་སྨོན་མ་དགོས་པ་ཞིག་ཡོད་ངེས་ཀྱང༌། དེ་རྗེས་བོད་སིལ་བུར་གྱུར་ཏེ་ཡུལ་ཚོ་ཡུལ་ཚོ་ཁག་བགོས་ཀྱིས་སོང་སྟབས་ཚོ་ཁག་ནང་ཕན་ཚུན་མི་མཐུན་པའི་འཐབ་རྩོད་ཀྱང་ཡང་ཡང་བྱུང་ཞིང༌། ཕྱི་རྒྱལ་ནས་བོད་ཀྱི་ས་མཚམས་ཁག་ཏུ་བཙན་འཛུལ་བྱུང་རིགས་ལའང་བཀག་འགོག་འགན་འཁུར་སྤྱི་ཟོམ་དུ་ལུས་ཏེ་འཐུས་ཤོར་ཇེ་ཆེར་སོང་བའི་གནས་ཚུལ་ཇི་སྙེད་བྱུང་བ་ཚང་མའི་བློ་མངའ་ལྟར་གནས་ཚུལ་དེ་ཚོས་སྙིང་ལ་སྐུལ་ལྕག་བྱེད་ཐུབ་པ་བྱ་དགོས།

   རྒྱ་དམར་ལ་རང་རེས་ངོ་རྒོལ་བྱེད་དགོས་པའི་གནད་དོན་གཅིག་སངས་རྒྱས་ཀྱི་བསྟན་པ་འཇིག་པ་ལ་མི་བཟོད་པར་ཐུག་སྟབས་ཆོས་བྱེད་གྲྭ་རིགས་རྣམས་ནས་རབ་ཏུ་བྱུང་བའི་དགོས་དོན་ཚེ་འདིའི་ལྟོ་གོས་འཕྱིད་ཐབས་ལྟ་བུར་སོང་ནས་བསྟན་འཛིན་གཟུགས་བརྙན་ཙམ་དུ་གྱུར་པ་མ་ཡིན་པར་དུས་ཀྱི་ཡང་མཐར་བསྟན་པའི་སྒོར་ཞུགས་རྣམས་མཁེ་ཉེན་གནས་ཚུལ་དང༌། བོད་མི་སྤུན་ཟླ་ཧ་ཅང་མང་པོ་ཞིག་བསྟན་པ་འདིའི་ཆེད་དུ་ལུས་སྲོག་བློས་བཏང་བྱས་པའི་གནས་ཚུལ་ལ་ཞིབ་ཏུ་བསམས་ཏེ་རང་རང་གི་ཇི་ལྟར་ཁས་བླངས་པའི་སྡོམ་པ་གསུམ་གྱི་བཅས་མཚམས་རྣམས་མིག་གི་འབྲས་བུ་ལྟར་གཅེས་སྲུང་ཐོག་སྡེ་སྣོད་གསུམ་གྱི་འཆད་ཉན་དང༌། བསླབ་པ་གསུམ་གྱི་ཉམས་ལེན་རྒྱུད་སྟེང་དུ་བཀལ་ཏེ་རྒྱལ་བསྟན་འཛིན་སྐྱོང་གི་འཁུར་འགན་ངོ་ལྐོག་མེད་པ་བླངས་ཏེ་ཕྱིན་ཆད་བོད་ཡུལ་མུན་གླིང་དེར་ཆོས་ཀྱི་སྒྲོན་མེ་གསལ་བར་འབར་ཐུབ་པའི་འགན་ལེན་བྱ་དགོས།

 

    དེ་བྱིངས་རྣམས་ནས་སྤྱིར་བཏང་ཀུན་སྤྱོད་ཀྱི་རིམ་པ་རྣམས་ཡུལ་དུས་གནས་ཚུལ་དང་བསྟུན་ཏེ་བོད་མི་རིགས་ཀྱི་རྐང་འདྲེན་མིང་ཤས་སུ་མི་འགྲོ་བའི་བག་ཡོད་ཚུལ་མཐུན་ཡ་རབས་ཀྱི་ལམ་དུ་འཇུག་པ་དང༌། སྒེར་གྱི་ནད་དྲེག་སྤྱིའི་གདོང་པར་མ་བྱུག་པར་སྤྱི་དོན་བསམ་པ་གྲུ་ནང་བཞིན་དགོས་པ་སྨོས་མེད་ཐོག་སོ་སོའི་སྐབས་བབས་ཀྱི་བསྒྲུབ་བྱ། འཕྲལ་སེལ་ལྟོ་གོས་ཀྱི་འཚོ་ཐབས། ཕུགས་ཡུལ་སྤྱི་སྨན་གྱི་ལས་དོན། དེང་དུས་ཀྱི་ཤེས་རིག་སློབ་སྦྱོང་སོགས་བྱེད་སྒོ་གང་ཅིར་ལྷག་བསམ་དུང་ལས་དཀར་ཞིང༌། བཟོད་སྲན་ལྕགས་ལས་སྲ་བའི་འབད་བརྩོན་ལྷུར་ལེན་གྱིས་བསྟན་པ་སྤྱི་དོན་ཐོག་སྲོག་བཏང་བའི་རང་རིགས་གྲོགས་མཆེད་རྣམས་ཀྱི་བཀའ་དྲིན་གསབ་ཐུབ་པ་དང༌། རང་ཡུལ་རྒྱ་ཆེའི་མི་མང་རྣམས་གཞན་དབང་ལས་གྲོལ་བ། རང་གི་ལུང་པར་རང་དབང་རང་རིགས་རང་ཉིད་ཀྱིས་ཅི་བདེར་ལོངས་སུ་སྤྱོད་ཐུབ་པ་བཅས་གང་མྱུར་ཡོང་བའི་འབད་བརྩོན་ལྷོད་མེད་མུ་མཐུད་སྐྱེད་དགོས།།   །།

 

ཕྱི་ལོ་ ༡༩༦༡ ལོའི་གསུམ་བཅུའི་དུས་དྲན་གྱི་གསུང་འཕྲིན།

 

༄༅། །ཕྱི་ལོ་ ༡༩༦༡ ཟླ་ ༣ ཚེས་ ༡༠ ཉིན་མོ་འདི་ནི་རང་རེ་གངས་ཅན་བོད་ཀྱི་རྒྱལ་རབས་ནང་རྨད་བྱུང་རླབས་ཆེའི་སྙིང་པོ་ཅན་གྱི་དུས་ཚེས་ཤིག་ཡིན་ཅིང༌། དེ་ཡང་ཇི་ལྟར་ནུས་ལྡན་འབར་རྫས་ཀྱི་དངོས་པོར་མེ་ལྕེའི་བྱེད་རྐྱེན་དང་འཕྲད་པ་བཞིན། ལོ་ངོ་དགུ་ཙམ་གྱི་རིང་རྒྱ་དམར་གུང་བྲན་ཏང་གི་བཙན་དབང་གཉའ་གནོན་བཟོད་པར་དཀའ་བ་མྱོང་བཞིན་པའི་བོད་མི་མང་གི་སེམས་ཀྱི་ཚ་དྲོད་རྣམས་གུང་བྲན་བསམ་སྦྱོར་མ་རུང་པའི་བྱེད་རྐྱེན་ངན་པའི་རླུང་གིས་བསྐུལ་ནས་བོད་མིའི་སྙིང་སྟོབས་ཀྱི་མེ་ཆེན་ཀུན་ཏུ་འབར་ཏེ་ད་ནས་མི་ལོ་གཉིས་ཀྱི་གོང་ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་བོད་ཀྱི་རྒྱལ་ས་ལྷ་སའི་མི་མང་ནས་གུང་བྲན་ཏང་གི་བཙན་དབང་ལ་ངོ་རྒོལ་ཁྲོམ་བསྐོར་དང་འབྲེལ་རྒྱ་མི་གུང་བྲན་བོད་ནས་ཕྱིར་ལོག་ཅིག་ཅེས་པ་དང༌། བོད་ནི་རང་དབང་རང་བཙན་ཡིན་ཞེས་པའི་སྐད་སྒྲ་ཞིག་ཐོལ་བྱུང་འགོག་མེད་དུ་བསྒྲགས་ཤིང༌། དེ་འདྲའི་དྲང་བདེན་སྙིང་པོ་ཅན་གྱི་སྐད་སྒྲ་དེ་དག་འཛམ་གླིང་འདིའི་ཁྱོན་ལ་གནས་པའི་མི་ཚོགས་དུང་ཕྱུར་སུམ་ཅུར་ཉེ་བ་ཞིག་གི་རྣ་ལམ་དུ་གསལ་བར་ཐོས་པ་མ་ཟད། མི་ཚོགས་དེ་རྣམས་ཀྱི་སེམས་ལ་བོད་ཅེས་བྱ་བའི་ཡུལ་དེ་གཟུགས་ཅན་བཞིན་མངོན་དུ་གྱུར་ཏེ་ཡུལ་དེའི་གནས་ཚུལ་ལ་བརྩེ་བའི་སེམས་ཀྱིས་ལྟ་བཞིན་ཡོད་པ་རེད།

གནས་ཚུལ་དེ་ནི་རྒྱ་མི་གུང་བྲན་གྱི་སྙིང་ལ་འཚེར་མ་ཟུག་པ་ལྟ་བུའི་ཟུག་རྔུར་གྱུར་ཏེ་ཅི་བྱའི་གཏོལ་དང་བྲལ་བ་ན། འཚབ་འཚུབ་དང༌། སྨྱོན་པའི་བརྟུལ་ཞུགས་ལྷུར་བླངས་ཏེ་དྲག་ཅིང་རྩུབ་པའི་དེང་དུས་ཀྱི་མཚོན་ཆའི་རྣམ་གྲངས་དུ་མ་ཞིག་ས་དང་ནམ་མཁའི་འཕྲུལ་འཁོར་གྱི་ཐོག་ནས་བེད་སྤྱོད་ཀྱིས་ཉེས་མེད་བོད་མི་ཁྲི་ཕྲག་བརྒལ་བའི་ལུས་སྲོག་ཉམས་ཉེས་སུ་བྱེད་པ་དང༌། ཤིན་ཏུ་མི་བཟད་པའི་རྣམ་སྨིན་རྩུབ་མོ་མྱོང་ངེས་ཀྱི་ལས་ཚབས་པོ་ཆེ་རྨོངས་བཞིན་དུ་གསོག་པ་དང༌། འཛམ་གླིང་གི་མིག་སྔར་ང་ཚོ་གུང་བྲན་གྱི་ལྟ་སྤྱོད་ནི་འདི་འདྲ་ཡིན་ནོ་ཞེས་ནང་མཚང་ཁྲོམ་འདོན་བྱེད་པ་བཅས་དུས་མཉམ་དུ་བྱས་པ་རེད།

དེ་འདྲའི་དུས་སྐབས་རྗེས་སུ་དྲན་པའི་གནས་སྐབས་འདིར། རང་ཅག་རྣམས་ནས་མཆོག་གསུམ་བླ་མར་འཛིན་ཅིང༌། རྒྱུ་འབྲས་ཀྱི་རྣམ་གཞག་ལ་ཡིད་སྟོན་པའི་དགོས་པ་བསྒྲུབས་ནས་བསྟན་པ་དང༌། བོད་རང་དབང་གི་དོན་དུ་འཇིག་རྟེན་ན་ཆེས་གཅེས་པར་འཛིན་པའི་ལུས་སྲོག་དོར་བའི་འགྲོ་བ་དེ་དག་མི་བཟད་ངན་འགྲོའི་ལྗན་ལྗིན་དུ་མ་བྱིང་བར། མངོན་མཐོའི་གྲུ་ཆེན་མཐུན་པའི་རླུང་དང་འགྲོགས་ཏེ་འཁོར་བ་རྒྱ་མཚོའི་ཕ་རོལ་དུ་བདེ་བར་བགྲོད་པ་དང༌། ལས་ངན་རྔམས་པོ་ཆེར་རྨོངས་བཞིན་འཇུག་པའི་སྐྱེ་བོ་རྣམས་བཟོད་དཀའི་རྣམ་སྨིན་རྩུབ་མོས་མི་བརྫི་བའི་སྨོན་ལམ་སྙིང་ཐག་པ་ནས་འདེབས་དགོས།

ད་དུང་རང་རེས་དེང་དུས་བོད་ནང་གི་གནས་ཚུལ་རྣམས་ཇི་ལྟ་བུར་འགྱུར་བ་ཡང་དྲན་དགོས་ཏེ། རྒྱ་མི་གུང་བྲན་ཏང་ནས་མངའ་བདག་ཆེན་པོ་གསུམ་ལ་ངོ་རྒོལ་གྱིས་རང་དབང་ཡོངས་རྫོགས་མི་མང་ལ་ཐོབ་ཚུལ་བརྗོད་པའི་འབྲས་བུར་མི་མང་གི་ལུས་ཀྱི་འགྲོ་སྡོད་ཀུན་སྤྱོད། ངག་གི་སྨྲ་བརྗོད། ཡིད་ཀྱི་བསམ་ཚུལ་བཅས་སྒོ་གསུམ་གྱི་རང་དབང་ཡོངས་རྫོགས་བྲལ་ཞིང༌། ཁྲལ་ཆག་བཏང་སྟེ་ས་ཞིང་དང༌། ཐོན་སྐྱེད་འབབ་སྒོ་ཡོངས་རྫོགས་འཕྲོག་པ་དང༌། བུན་ཆག་བཏང་སྟེ་རྒྱུ་ནོར་ཡོངས་རྫོགས་བསྡུ་བའི་སྲིད་བྱུས་ལག་ལེན་བྱེད་ཀྱི་ཡོད་པ་དང༌། དཀར་མཛེས་བཀྲག་འོད་ལྡན་པའི་རང་རེའི་ཁང་ཁྱིམ་བཀོད་ལེགས་ཡིད་དུ་འོང་བ་རྣམས་ནི་གྱང་གོག་སེ་ཧྲུལ་དུ་གྱུར། དགེ་འདུན་སྟོང་ཕྲག་མང་པོ་ཆོས་ཀྱིས་དུས་འདའ་བའི་དགོན་ཁག་རྣམས་ནི་བྱ་བྲུན་དང༌། ཐལ་རྡུལ་གྱིས་གཡོགས་པའི་ཁང་སྟོང་གོག་པོར་གྱུར། མར་མེའི་འོད་སྣང་གིས་དུས་ཀུན་ཏུ་གསལ་བའི་ལྷ་ཁང་རྣམས་ནི་མུན་ཁུང་དུ་གྱུར། སྲིད་ན་རིན་ཐང་ཆེ་བའི་སྐུ་གསུང་ཐུགས་རྟེན་རྣམས་ནི་བཤིགས་ཤིང་བསྟོར། ཚེ་འདིའི་མཛའ་གྲོགས་བཟའ་མི་དང༌། བུ་ཕྲུག་དག་ནི་མཐོང་ཐོས་ཙམ་གྱི་སྐལ་བ་མེད་པར་གསོན་བྲལ་བྱས། འཛུམ་ལྡན་བོད་མིས་གང་བའི་གྲོང་ཁྱེར་རྣམས་ནི་བཞིན་གནག་མཚོན་ཆ་ཐོགས་པའི་རྒྱ་མིས་གང༌། འབྱོར་ལྡན་རྣམས་ནི་ཁྱོད་ཚོའི་རྒྱུ་ནོར་གཞུང་དང༌། མི་མང་གི་ཡིན་ཞེས་འཕྲོག་ཅིང་སྡང་བའི་དགྲ་རུ་འཛིན། འབྱོར་ཆུང་རྣམས་ལ་ཁྱེད་ཚོས་དལ་སྡོད་བྱས་པས་ལན་ཟེར་ཕྱུགས་ལས་ལྷག་པར་འདེད་ཅིང་བཀོལ། འབྲིང་པོ་རྣམས་ལ་ནི་རྒྱུ་ནོར་རང་གིས་སྤྱོད་པ་ལས་གཞུང་ལ་ཕུལ་ན་ཕན་ཆེ་བ་དང༌། དེ་ལས་ལྷག་པའི་རྩོལ་བ་བྱས་ན་དེ་ལས་མང་བར་འཕེལ་ཆེ་བའི་སྒྲོ་བཏགས་ནས་སྔོན་ཡོད་འཕྲོག་ཅིང༌། གསར་དུ་འཚོལ་བའི་ངལ་རྩོལ་དུ་བཅུག ཤིན་ཏུ་རང་དབང་ལྡན་པའི་རྒྱ་ཆེའི་བོད་མི་མང་རྣམས་ནི་སྤྱོད་ལམ་ཕྲ་མོ་ཚུན་ལའང་རང་དབང་སྐད་ཅིག་ཙམ་མེད་པའི་ལྕི་ཞིང་བཙན་པའི་ཚེ་གཡོག་ཏུ་ཚུད། མདོར་ན། དགའ་སྤྲོ་དང༌། སྐྱིད་པའི་སྣང་བ་རང་བཞིན་གྱིས་སྐྱེ་བའི་ང་ཚོའི་ཕ་ཡུལ་མཛེས་ལྡན་གངས་ཅན་གྱི་ལྗོངས་དེ་མྱ་ངན་དང་སྨྲེ་ངག་གིས་གང་བའི་ཡུལ་གྲུ་སྐྱོ་ཤས་ཅན་ཞིག་ཏུ་གྱུར་ཡོད་པ་རེད།

འོན་ཀྱང་གནས་ཚུལ་དེ་རྣམས་ནི་ཆོས་ཕྱོགས་ནས་བཤད་ན༑ འདུས་བྱས་མི་རྟག་མི་བརྟན་འགྱུར་བའི་ཆོས་ཅན་དུ་གསུངས་པའི་བདེན་དོན་ཡིན་པ་དང༌། བོད་རིགས་སྤྱི་མཐུན་གྱི་ལས་དང་རྗེས་སུ་འབྲེལ་བ་ཞིག་ཡིན་ཅིང༌། སྲིད་ཕྱོགས་ནས་དེང་དུས་འཛམ་གླིང་གི་སྲིད་དོན་འཐབ་རྩོད་དང་འབྲེལ་ཡོད་ཅིག་ཡིན་པ་མ་ཟད། ཆེན་པོས་ཆུང་ངུ་ཟས་པ་དང༌། མང་པོས་ཉུང་ངུ་མནན་པ་ལ་ཧ་ལས་རྒྱུ་དང༌། ངོ་མཚར་ཆེ་རྒྱུ་མེད་པར་འོས་ཤིང་སྲིད་པའི་བྱ་གཞག་ཅིག་ཡིན་པར་བརྟེན་ང་ཚོས་དེ་ལ་བློ་ཕམ་དང༌། ཡིད་ཞུམ་མི་བྱ་བར་ཐབས་དང༌། མཐུན་རྐྱེན་སྒོ་སྣ་ཚོགས་ནས་བསྒྲུབས་ཏེ་རང་རེའི་སྤུན་ཟླར་གྱུར་པའི་རྒྱ་ཆེའི་བོད་མི་རིགས་རྣམས་དེ་འདྲའི་སྡུག་བསྔལ་དེ་ལྟ་བུ་ལས་མྱུར་དུ་གྲོལ་བ་དང༌། བདེན་འབྲེལ་ཐོབ་ཐང་ཡོད་ངེས་ཀྱི་བོད་མི་རིགས་ཀྱི་རང་དབང་མྱུར་དུ་ལོན་པའི་ཐབས་ཚུལ་ལ་ཚང་མས་འབད་བརྩོན་མུ་མཐུད་བྱ་དགོས།

རྒྱ་མི་གུང་བྲན་ནས་བོད་མི་མང་ལ་དེ་འདྲའི་མནར་གཅོད་སྡུག་སྦྱོང་གཏོང་བཞིན་ཡོད་པ་དེས་ཡིད་མ་ཚིམས་པར་ད་དུང་ང་ཚོ་ཕྱི་རྒྱལ་ས་ཐོག་ཏུ་བསྐྱོད་འཁོད་བོད་མི་རྣམས་ལ་ཞེ་སྡང་གིས་སྙིང་མྱོས་ཏེ་ང་ཚོའི་མཛའ་མཐུན་ལ་དབྱེན་སྦྱོར་དཀྲུག་ཤིང་དང༌། ལས་དོན་ལ་སྟོར་བཤིགས་བཅས་ཐབས་སྣ་ཚོགས་ཀྱིས་བྱེད་བཞིན་ཡོད་པར་བརྟེན་རང་རེ་ཚང་མས་སྤུ་གྲིའི་སོ་ལ་ཆགས་པའི་སྦྲང་རྩི་ལྟ་བུའི་ངག་སྙན་བླུ་བྲིད་ལ་མགོ་བོ་རྨོངས་པར་དགྲ་གྲོགས་ཀྱི་འཛིན་སྟངས་མ་འཛོལ་བ་ངེས་པར་བྱ་དགོས།

མི་འགའི་བསམ་པར། རྒྱ་མི་གུང་བྲན་ནི་མི་འབོར་དང་དྲག་ཤུགས་ཆེ། རང་ཕྱོགས་ནི་མི་རྒྱུའི་ནུས་སྟོབས་ཞན་པས་ད་ཆ་བོད་རང་དབང་གི་དམིགས་ཡུལ་འགྲུབ་པར་དཀའ་འམ་སྙམ་དུ་ཐེ་ཚོམ་དང་སྒྱིད་ལུག་གི་བློ་སྐྱེ་སྲིད་པ་དེ་ནི་ཤིན་ཏུ་ནོར་འཁྲུལ་ཅན་གྱི་བསམ་ཚུལ་ཡིན་ཏེ། འཇིག་རྟེན་འདིར་བྱ་བ་ཆེ་ཆུང་ཇི་འདྲ་ཞིག་སྒྲུབ་ཀྱང་དེའི་གཞི་དེ་བདེན་པ་ལ་བརྟེན་པ་དང༌། མི་མང་ལ་ཁེ་ཕན་དང་རང་དབང་ཡོད་པ། ཚང་མས་དེ་ལ་མོས་ཞེན་ཡོད་པ་བཅས་དགོས་པ་ལས། མཚོན་ཆས་བསྡིགས་པ་གཅིག་པུས་ག་ལ་འགྲུབ། མི་མང་ལ་ཁེ་ཕན་དང་རང་དབང་མེད་པ། དེ་ལ་མོས་ཞེན་མེད་པའི་རྟགས་མཚན་ནི་བོད་མི་ཆེས་མང་པོ་སྲོག་བསྡོས་ཅི་ཐར་བྱས་ནས་ཕྱི་རྒྱལ་དུ་བྲོས་བྱོལ་ཡོང་བ་འདིས་མཚོན་ཐུབ། དཔེར་ན། ཕྱི་ལོ་ ༡༩༥༩ ཟླ་ ༡༠ ཕན་བོད་མི་བཙན་བྱོལ་བའི་གྲངས་འབོར་སྟོང་ཕྲག་ ༢༠ སྐོར་ལས་མེད་པ་ལས་ཕྱི་ལོ་ ༡༩༦༠ ནང་མི་གྲངས་སྟོང་ཕྲག་ ༥༦ ཙམ་ཟིན་ཡོད་པ་རེད། དེས་མ་ཚད་རྒྱ་ནག་རང་གི་ས་ཐོག་ནས་ཀྱང་རྒྱ་རིགས་ཧ་ཅང་འབོར་ཆེན་ཞིག་ཧོང་ཀོང་སོགས་ལ་བྲོས་བྱོལ་རྒྱུན་ཆད་མེད་པར་ཡོང་གི་ཡོད་པ་རེད། ད་དུང་གསལ་པོར་བརྗོད་ན། རྒྱ་མི་གུང་བྲན་ནས་ཤར་ཀྲར་ཀི་སི་ཏན་དང༌། སོག་རིགས་རྣམས་ཁྱུར་མིད་དུ་བྱས། བོད་མི་མང་པུས་མོའི་འོག་ཏུ་མནན། ཁྲག་གིས་སྦགས་པའི་ལག་པ་ཁྱིམ་མཚེས་ཡུལ་གྲུའི་ས་མཚམས་ཁག་ཏུ་བརྐྱངས། ཟ་འདོད་ཅན་གྱི་ཁ་ཨེ་ཤ་ཡའི་གླིང་ལ་གདངས། འདོད་པས་གཟིར་བའི་མིག་འཛམ་གླིང་ཁྱོན་ལ་བལྟ་བའི་སྤྱོད་ཚུལ་དེར་ཤེས་ལྡན་སུ་ཞིག་དགའ་བར་འགྱུར། རྒྱུ་མཚན་དེས་འཇིག་རྟེན་དམོད་པའི་མཆིལ་མའི་ཚོགས་རྒྱ་མི་གུང་བྲན་གྱི་མགོ་ཐོག་ཏུ་མི་འདོད་བཞིན་དུ་འབབ་བཞིན་ཡོད་པ་རེད།

ང་ཚོས་དྲག་ཤུགས་ཀྱིས་བསྡིགས་པ་དང༌། རྒྱུ་བརྔན་གྱི་ཐབས་ཤེས་གང་ཡང་བྱས་པ་མེད་ཀྱང༌། ང་ཚོ་བོད་ཀྱི་དོན་གནད་འདིར་བདེན་པ་ཡོད་པར་བརྟེན་ཞི་བདེ་དྲང་བདེན་ལ་དགའ་བའི་མི་མང་ཚོས་རྒྱབ་སྐྱོར་དང་སེམས་འཁུར་ཆེས་ཆེན་པོ་བྱེད་ཀྱི་ཡོད་པ་དཔེར་ན། རྒྱ་གར་རྒྱལ་ཡོངས་བོད་དོན་ཚོགས་པའི་འབོད་བསྐུལ་འོག་ཨེ་ཤ་ཡ་དང༌། ཨ་ཕེ་རི་ཀའི་རྒྱལ་ཁབ་ཁག་ ༡༩ འཐུས་མི་མི་གྲངས་བརྒྱད་ཅུ་སྐོར་ནས་སྔ་ལོ་ཕྱི་ཟླ་ ༤ ནང་ ལྡི་ལི་གསར་པར་ ལྷན་འཛོམས་ཐོག བོད་ཀྱི་གནད་དོན་ལ་གྲོས་བསྡུར་བྱས་ཏེ་བོད་ལ་རྒྱ་མི་གུང་བྲན་ནས་ཁྲིམས་འགལ་བྱས་པར་ཡིད་ཆེས་ངོས་འཛིན་གྱིས་ཡིག་ཆ་བཀྲམས་པ་དང༌། བོད་དོན་ལ་རྒྱབ་སྐྱོར་རྒྱུན་མཐུད་བྱེད་ཆེད་ནིའུ་ལྡི་ལིར་ལྷན་ཚོགས་དེའི་རྒྱུན་ལས་ལས་ཁུངས་གཏན་འཛུགས་བྱས་པ། མཉམ་འབྲེལ་རྒྱལ་ཚོགས་སུ་བོད་དོན་ཞུ་བསྐུལ་བྱེད་ཆེད་འཐུས་མི་ཆེད་གཏོང་སོགས་ང་ཚོར་ཁ་ཞེ་མེད་པའི་རྒྱབ་སྐྱོར་རོགས་རམ་བྱེད་མུས། དེ་བཞིན་ཕྱི་ལོ་ ༡༩༦༠ ཟླ་ ༧ ནང་རྒྱལ་སྤྱིའི་ཁྲིམས་དཔོན་ཚོགས་ཆེན་ནས། བོད་དང༌། རྒྱ་ནག་མི་མང་སྲིད་གཞུང་ཟེར་བའི་སྙན་དེབ་ཤོག་གྲངས་ ༣༤༠ སྐོར་ཡོད་པ་ཞིག་འགྲེམས་བསྒྲགས་བྱས་པའི་ནང༌། བོད་ཀྱི་གནས་སྟངས་ནི་དངོས་དོན་རང་བཙན་གྱི་རྒྱལ་ཁབ་ཅིག་ཡིན་པ་དང༌། བོད་མི་རྣམས་ནི་ཆོས་དང་འབྲེལ་བའི་ཚོགས་པ་ལྟ་བུ་ཞིག་ཡིན་པ་དེ་རྩ་མེད་གཏོང་རྒྱུའི་ལས་འགུལ་བྱས་ཡོད་སྟབས་མི་རིགས་རྩ་མེད་ཀྱི་ཁྲིམས་ལུགས་འགལ་བ་དང༌། བོད་མི་རྣམས་ལ་མིའི་ཀུན་སྤྱོད་ཀྱི་ཐོབ་ཐང་སྤྱི་དང༌། ལྷག་པར་ལུས་སྲོག་གི་ཐོབ་ཐང་འཕྲོག་པའི་ཁྲིམས་འགལ་བྱུང་བ་སོགས་ཞིབ་གསལ་འགྲེལ་བཤད་མཛུབ་སྟོན་བྱས་ཡོད་ཅིང༌། དེ་ལ་བརྟེན་ནས་འཛམ་གླིང་རྒྱལ་ཁབ་ཁག་དང་མི་མང་ནས་བོད་དོན་གོ་རྟོགས་ཇེ་ཆེ་དང༌། རྒྱབ་སྐྱོར་ཇེ་ཟབ་ཏུ་འགྲོ་ཡི་ཡོད་པ་རེད།

ད་དུང་འཛམ་གླིང་གི་ཡུལ་གྲུ་མང་པོའི་ནང་ནས་སྙན་གྲགས་ཅན་གྱི་མི་སྣ་དང༌། མཁས་པ། དགེ་རྒན། སློབ་ཕྲུག བཟོ་རིགས་སོགས་མང་པོས་ང་ཚོར་སེམས་གསོ་དང་རྒྱབ་སྐྱོར་གྱི་ཡི་གེ་རྒྱུན་མ་ཆད་པར་གཏོང་གི་ཡོད་པ་མ་ཟད། མ་བསྐུལ་དྭང་བླང་གི་སྒོ་ནས་ང་ཚོར་ཕན་སེམས་བཟང་པོས་ལས་དོན་བྱེད་མཁན་ཇི་སྙེད་ཅིག་ཡོད་འདུག དེས་ན་ང་ཚོ་གྲོགས་མེད་གཅིག་པུར་ལུས་པ་མ་ཡིན་པར་འཛམ་གླིང་རྒྱ་ཆེའི་མི་མང་གིས་ང་ཚོར་སྙིང་ཐག་པ་ནས་རྒྱབ་སྐྱོར་བྱེད་ཀྱི་ཡོད་པར་བརྟེན་ང་ཚོའི་རང་དབང་གི་དམིགས་ཡུལ་ངེས་པར་འགྲུབ་ཐུབ་པར་ཡིད་ཆེས་བྱས་ཆོག་པ་ཡིན།

དེར་མ་ཟད་དེང་དུས་འཛམ་གླིང་གི་མི་རྣམས་ཤེས་བྱའི་གནས་ཚད་ཇེ་མཐོར་གྱུར་ཏེ་སྟོབས་ཆེན་རྒྱལ་ཁབ་ཚོའི་ཁོངསསུ་མི་ལོ་དུ་མར་གནས་པའི་མི་རིགས་མང་པོ་ལ་འདྲ་མཉམ་དང༌། རང་དབང་གི་ཁེ་དབང་ཐོབ་ཐང་སྤྲོད་ལེན་བྱེད་བཞིན་པས་ད་ཕན་མི་ལོ་གཉིས་ཀྱི་རིང་དུ་ཡང་རྒྱལ་ཁབ་ཆུང་ཁག་ཉི་ཤུ་སྐོར་མཉམ་འབྲེལ་རྒྱལ་ཚོགས་ཀྱི་གདན་གྲལ་དུ་འཁོད་བཞིན་པའི་སྐབས་འདིར་རྒྱ་མི་གུང་བྲན་ནས་སྤྱི་ཚོགས་རྙིང་པ་ལས་ཀྱང་ཆེས་རྙིང་པ་ཀླ་ཀློའི་སྤྱོད་ཚུལ་དུ་ཞུགས་ནས་མི་རིགས་གཞན་ལ་བཙན་གནོན་དང༌། ཟ་འདོད་ཀྱི་བྱ་སྤྱོད་ལྷུར་བླངས་པ་འདིས་གུང་བྲན་ལ་སྟོབས་དང་མི་འབོར་ཆེ་བའི་ང་རྒྱལ་ཇི་ལྟར་བྱས་ཀྱང་ཤེས་ལྡན་བཟང་སྤྱོད་ལྡན་པའི་འཛམ་གླིང་མི་གྲལ་དུ་མ་ཚུད་པ་མ་ཟད། མཉམ་འབྲེལ་རྒྱལ་ཚོགས་ཀྱི་གདན་གྲལ་དུ་ཡང་ཚུད་ཀྱི་མེད་པ་རེད། དཔེར་ན། ཟས་དང་སྨན་ནི་ལུས་འཚོ་ཞིང༌། ནད་སེལ་བའི་ཐབས་ཚུལ་མེད་མི་རུང་བ་ཡིན་ཀྱང༌། སྤྱོད་ཚུལ་ལོག་པ་དང༌། ཚད་ལས་བརྒལ་ན་ནད་སྐྱེ་ཞིང༌། སྲོག་འགག་པའི་རྒྱུ་བྱེད་པ་ལྟར་འཛམ་གླིང་སྤྱི་སྲོལ་དང་མི་མཐུན་པའི་བྱ་སྤྱོད་འདི་དག་བརྟན་ཞིང་ཡུན་དུ་གནས་པའི་ཐབས་ཡོད་པ་མ་ཡིན་ནོ། །

ཡང་ལ་ལའི་བསམ་པར་བོད་དོན་ལ་རྒྱབ་སྐྱོར་བྱེད་མཁན་དེ་ལྟར་ཡོད་ན་མྱུར་དུ་འཁྲུན་ཆོད་ཡོང་དགོས་སྙམ་པར་སྲིད་ཀྱང༌། རང་རེ་བོད་ཀྱི་གནད་དོན་འདི་དོན་རྩ་ཆུང་ངུ་ཞིག་མིན་པ་དང༌། དེ་ཡང་འཛམ་གླིང་ཧྲིལ་པོའི་སྲིད་དོན་གྱི་གནས་ཚུལ་དང་འབྲེལ་ནས་ཡོད་པ། རང་རེའི་དགྲ་ཡ་རྒྱ་མི་གུང་བྲན་གྱི་ལྟ་སྤྱོད་ཤེས་ལྡན་མིའི་སྤྱོད་ཚུལ་ཚད་ཐིག་གི་ཕྱི་རོལ་དུ་གྱུར་པ་བཅས་ཡིན་པས་ན་རང་བཞིན་ལས་སླ་པོར་འཁྲུན་ཆོད་ཡོང་ཐབས་ག་ལ་ཡོད། དེང་དུས་འཛམ་གླིང་ནང་རང་དབང་རང་བཙན་གྱི་རྒྱལ་ཁབ་ཆེས་མང་པོ་ཞིག་མི་ལོ་བརྒྱ་ཉིས་བརྒྱ་ནས། སྟོང་ཕྲག་གི་བར་གཞན་གྱི་བཙན་དབང་འོག་བསྡད་པ་ཤ་སྟག་ཡིན། དཔེར་ན་མི་ཚོགས་དུང་ཕྱུར་དྲུག་ལྷག་ཡོད་ཟེར་བའི་རྒྱ་ནག་གི་ཡུལ་ཡང་ཕྱི་རྒྱལ་དབང་འོག་ལས་གྲོལ་ནས་མི་ལོ་བཅུ་སྐོར་ལས་ཕྱིན་ཡོད་པ་མ་རེད། དེས་ན་ང་ཚོའི་རང་དབང་སྒྲུབ་པ་ལ་མི་ལོ་རེ་གཉིས་ཙམ་ལ་ཡུན་འགོར་སོང་སྙམ་པའི་ངང་ཐུང་དང༌། འདོད་ཐག་ཉེ་པོ་མི་བྱ་བར་དལ་གྱིས་འབབ་པའི་ཆུ་ཆེན་ལྟར་བཟློག་ཏུ་མེད་པའི་བརྩོན་འགྲུས་དང༌། སྙིང་སྟོབས་བརྟན་པོས་ང་ཚོའི་རང་དབང་གི་དམིགས་ཡུལ་འབད་སྒྲུབ་བྱ་དགོས།

གཞན་ཡང་རང་རེས་དོ་གལ་བྱ་དགོས་པ་ཞིག་ལ། བློ་གྲོས་ཀྱི་མིག་མ་རིག་པའི་ལིང་ཏོག་གིས་བསྒྲིབས་པའི་རྒྱ་མི་གུང་བྲན་ནས། འགྲོ་ཀུན་གཏན་བདེ་སྒྲུབ་པའི་ཐབས་ཚུལ་ཟབ་མོ་དམ་པའི་ཆོས་ཞེས་པ་ལ་དོན་དང་སྙིང་པོ་ཡོད་པར་མ་མཐོང་ནས་ཆོས་ཞེས་པ་རྩ་མེད་དུ་གཏོང་བའི་ཐབས་ཚུལ་རྩོམ་བཞིན་པའི་སྐབས་འདིར། ང་ཚོས་སྟོན་པ་ཐུགས་རྗེ་ཅན་གྱིས་ལེགས་པར་གསུངས་པའི་དམ་པའི་ཆོས་འདི་དག་མི་ཉམས་གོང་འཕེལ་དུ་བྱེད་དགོས་ཤིང༌། ད་ཕན་སྦག་ས་དང༌། ཌ་ལ་ཧའོ་སེ་སོགས་ས་གནས་འགའ་ཤས་ལ་རིས་མེད་དགེ་འདུན་མི་ཉུང་ཙམ་ནས་ཐོས་བསམ་བསྐྲུན། ཕྱི་རྒྱལ་སློབ་གྲྭ་དང༌། དཔེ་མཛོད་ཁག་ལ་དགེ་རྒན་ལས་བྱེད་གཏོང་བ་སོགས་ལས་དོན་གང་འཚམས་བྱེད་བཞིན་ཡོད་ཅིང༌། རང་རེའི་ཆོས་འདི་ནི་ཁུངས་དང་རྒྱུ་མཚན་མེད་པ་རྣམ་རྟོག་ཙམ་ཞིག་མ་ཡིན་པར། ཚད་མའི་རིགས་པས་གཏན་ལ་འབེབས་ནུས་ཤིང༌། དངོས་པོའི་གནས་ཚུལ་དང་ཆེས་མཐུན་པའི་བདེན་དོན་ཡང་དག་པ་ཞིག་ཡིན་པར་བརྟེན། ཤེས་ལྡན་གྱི་མི་མང་པོས་འདི་ལ་དོན་གཉེར་དང་དོ་སྣང་ཇེ་ཆེར་གྱུར་ཏེ་དེང་དུས་དམ་པའི་ཆོས་ཀྱི་འོད་ཟེར་རྨད་དུ་བྱུང་བ་ཞིག་རྒྱ་གར་འཕགས་པའི་ཡུལ་ནས་འཛམ་གླིང་གི་ས་ཕྱོགས་མང་པོར་གསར་དུ་འཕྲོས་བཞིན་ཡོད་པ་རེད། གནས་སྐབས་དེ་འདྲའི་དུས་འདིར་རང་རེའི་དགེ་འདུན་རྣམས་ནས་རང་རང་གིས་ཁས་བླང་པའི་དམ་སྡོམ་ལ་གཅེས་སྲུང་ལྷོད་མེད་ཐོག ཐེག་པ་གསུམ་དང༌། རྒྱུད་སྡེ་བཞི་བསྡུས་པའི་ལུང་རྟོགས་ཀྱི་དམ་ཆོས་རིན་པོ་ཆེ་བཤད་སྒྲུབ་ཀྱི་སྒོ་ནས་འཛིན་སྐྱོང་སྤེལ་གསུམ་མཛད་པ་ལ་སྔར་ལས་ལྷག་པའི་འཁུར་བརྩོན་གནང་དགོས་ཀྱི་འདུག

དེ་བཞིན་རྒྱ་གར་ནང་འབྱོར་བའི་བོད་རིགས་བུ་ཕྲུག་ཧ་ཅང་འབོར་ཆེན་ཡོད་པ་རྣམས་ནས་བོད་ཡིག་གཙོ་བོར་གྱུར་པའི་དེང་དུས་ཀྱི་ཤེས་ཡོན་ཚད་ལོངས་སློབ་སྦྱོང་ཐུབ་ཐབས་སློབ་གྲྭ་གསར་འཛུགས་དང༌། ཕྱི་རྒྱལ་ཁག་ཏུ་གཏོང་ཐབས། ད་ཡོད་ཀྱི་སློབ་གྲྭ་འཐོར་གྱར་མ་སོང་བར་གོང་སྤེལ་གཏོང་བ་སོགས་ཐབས་ཤེས་སྒོ་གང་ས་ནས་བྱེད་མུས་ལྟར་བོད་ཕྲུག་ན་ཆུང་རྣམས་ནས་སློབ་སྦྱོང་ལ་འཁུར་བརྩོན་ཆེ་སྐྱེད་བྱས་ཏེ་འཕྲལ་སེལ་རང་རིགས་ཀྱི་ལས་བྱེད་ཤེས་ཡོན་ཅན་མི་ལྡེང་བའི་དཀའ་ངལ་སེལ་བ་དང༌། ཕུགས་ཡུལ་རྒྱ་ཆེའི་བོད་མི་མང་གི་ཞབས་འདེགས་སྒྲུབ་པའི་འགན་འཁུར་ཐུབ་ཐབས་བྱ་དགོས།

བོད་མི་བྱིངས་རྣམས་ད་མུས་ལམ་བཟོ་སོགས་སྡོད་ཡུལ་ངེས་མེད་ཀྱི་ལས་རྩོལ་བྱ་རྒྱུ་དཀའ་སྦྱོང་ཆེ་ཁར། འཚོ་ཐབས་དང༌། སྡོད་གནས་གཏན་ཆགས་མེད་པས་བློ་བག་མི་ཕབ་པ་བཅས་ལ་བརྟེན། བོད་མི་ཁྱོན་འབོར་གང་ཆེ་ཞིག་སོ་ནམ་ཐོན་སྐྱེད་ལྟ་བུར་གནས་སྐབས་གཞིས་ཆགས་ཐུབ་པ་དགོས་གལ་ལ། དེང་སྐབསབོད་མི་སུམ་སྟོང་ཐམ་པ་རྒྱ་གར་ལྷོ་ཕྱོགས་མ་ཡེ་སོར་ཁུལ་རིམ་བསྐྱོད་གཞིས་ཆགས་བྱེད་མུས་ལྟར། སྔོན་འབྱོར་ཚོས་བྱ་སྤྱོད་གང་ཅི་བོད་མིའི་མིང་ཤས་སུ་མ་སོང་བ་ཡུལ་མིའི་འདོད་བློར་འབབ་ངེས་བྱུང་ཚེ་ད་དུང་ཁུལ་དེར་བོད་མི་འཕར་སྣོན་བསྐྱོད་རྒྱུའི་ས་ཆ་ཐོབ་པའི་རེ་བ་ཡོད་གཤིས། དེ་རྩིས་སྔོན་འབྱོར་བོད་མི་ཚོས་བྱ་སྤྱོད་རྣམ་འགྱུར་བཟང་པོ་ཡུལ་གཤིས་དང་མཐུན་པ་དགོས་པ་དང༌། བྱིངས་ནས་ཀྱང་མུ་མཐུད་གཞིས་ཆགས་སུ་འགྲོ་རྒྱུའི་གྲ་སྒྲིག་དང་ཡིད་འདུན་བྱ་དགོས།

ངོས་ཀྱི་རེ་འདུན་ལ། ཕྱི་ལོ་ ༡༩༦༠ ཟླ་ ༡༠ ཕན་ལ་རང་གི་ཕ་ཡུལ་དང་བྲལ་ནས་ཕྱི་རྒྱལ་དུ་གྱར་དགོས་བྱུང་བའི་བོད་མི་སྟོང་ཕྲག ༥༦ ཙམ་ཡོད་པའི་ནང་ནས། དགེ་འདུན་རྣམས་ནས་འཕགས་པའི་རིགས་བཞི་ལ་ཚུལ་བཞིན་དུ་གནས་ཏེ་ྋརྒྱལ་བསྟན་རིན་པོ་ཆེ་འཛིན་སྐྱོང་སྤེལ་གསུམ་གནང་ཐུབ་པ་དང༌། ལོ་ ༡༦ མན་གྱི་བོད་ཕྲུག་ཉིས་སྟོང་སྐོར་མཆིས་པ་རྣམས་ནས་རང་གི་ཕ་མེས་ཀྱི་ཤེས་ཡོན་བཟང་པོ་རྣམས་སྨོས་མེད་ཐོག དེང་དུས་རིག་གསར་གྱི་ཤེས་ཡོན་རྣམས་ཀྱང་འཛམ་གླིང་མི་རིགས་སྤྱིའི་ཤེས་ཚད་དང་མཉམ་པར་སློབ་སྦྱོང་བྱེད་རྒྱུ། ལོ་ ༢༠ སྐོར་གྱི་ན་གཞོན་རྣམས་བཟོ་ལས་སྣ་ཚོགས་པའི་སློབ་སྦྱོང་དང༌། ལས་ཀར་ཞུགས་ཐུབ་པ། དེ་ཡན་གྱི་རྒན་པ་རྣམས་ས་ཞིང་ཐོག་གཞིས་ཆགས་སོ་ནམ་གཙོ་གྱུར་གྱི་ཐོན་སྐྱེད་བྱ་རྒྱུ། ལས་ཀ་མི་འཕེར་ངེས་ཅན་གྱི་ལོ་ན་ཆེས་རྒན་པའི་རིགས་དང༌། ནད་གཅོང་རིགས་རྒན་གསོ་ཁང་དུ་འཚོ་སྐྱོང་ཐུབ་ཐབས་བཅས་ཀྱི་རེ་འདུན་དང་འབད་རྩོལ་བྱེད་བཞིན་པ་ཡིན་ན། ཚང་མས་བསམ་ཚུལ་དེ་དག་འགྲུབ་པ་ལ་རང་རང་གི་ངོ་སྐལ་དུ་གྱུར་པའི་འཁུར་ལེན་མཐུན་འགྱུར་ཕྱར་བ་གྲུ་འདེགས་ཀྱིས་སྤྱི་དོན་འགྲུབ་ཐབས་བྱ་དགོས།

དེ་དག་ནི་དེང་དུས་ཀྱི་སྐབས་བབས་ཀྱི་བྱ་བའི་རིམ་པ་མདོ་ཙམ་མཚོན་པ་ཡིན་ཞིང༌། མ་འོངས་པར་རང་རེ་བོད་ཀྱི་ཆབ་སྲིད་སྐྱོང་ཚུལ་སྐོར་ངོས་ཌ་ལ་ཧའོ་སེར་བསྐྱོད་སྐབས་ཀྱི་གླེང་མོལ་ནང་རགས་ཙམ་བརྗོད་པ་ལྟར། ད་ཕན་གྱི་ལུགས་སྲོལ་ཁོ་ནས་མི་འགྲིགས་པར་དགོས་ངེས་ཀྱི་བསྒྱུར་བཅོས་བྱེད་དགོས་པ། དཔེར་ན། གཞུང་གི་ཚོགས་འདུའི་འཐུས་མི་དང༌། ལས་བྱེད་གཙོ་བོའི་རིགས་ལ་ཕོ་མོ་རིགས་རུས་དབྱེར་མེད་དུ་མི་མང་ནས་འདེམས་བསྐོ་བྱེད་པ་དང༌། སྒེར་ཆོས་མི་དྲག་དང༌། གཞུང་རྒྱུགས་པ་དང༌། དུད་ཆུང་པ་སོགས་ཀྱི་དབྱེ་བ་མེད་པར་ས་ཞིང་ཡོངས་རྫོགས་མོས་སྙོམས་ཀྱིས་འདེབས་སྐྱོང་བྱེད་པ། མི་མང་རྣམས་ནས་རང་རང་གི་ནུས་རྩལ་གང་ཡོད་གཞུང་སྟོབས་འབྱོར་མངའ་ཐང་རྒྱས་ཐབས་སུ་འདོན་པ་དང༌། གཞུང་གི་ནུས་སྟོབས་གང་ཡོད་རང་གི་མི་མང་གི་འཚོ་བ་ཡར་རྒྱས་ཀྱི་ཐབས་སུ་འཇུག་པ༑ སྒེར་ལས་གཞུང་གཙོ་བོར་འཛིན་པ་དང་ཉུང་ངུ་ལས་མང་པོ་གཙོ་བོར་འཛིན་པ་སོགས་དེང་དུས་ཡར་ཐོན་ཅན་གྱི་རྒྱལ་ཁབ་ཚོའི་ཆབ་སྲིད་སྐྱོང་ཚུལ་གྱི་ལེགས་ཆ་རྣམས་རང་ཅག་ལ་སྔར་ཡོད་ཆོས་སྲིད་ཟུང་འབྲེལ་དུ་སྐྱོང་བའི་ལུགས་སྲོལ་བཟང་པོ་རྣམས་ཀྱི་ཐོག་ཏུ་མནན་ཏེ། རང་གི་རྒྱལ་ཁབ་སྟོབས་འབྱོར་མངའ་ཐང་ཕུན་སུམ་ཚོགས་པ་དང༌། མི་མང་ལ་དོན་དམ་གྱི་ཁེ་དབང་དང༌། འདི་ཕྱིར་བདེ་སྐྱིད་ཀྱིས་འཚོ་བ་ཞིག་དགོས་པ་ཡིན་ན། ཚུལ་འདི་དག་གི་སྐོར་ལ་ཡང་ད་ལྟ་ནས་བསམ་བློའི་འཁྱེར་སོ་དང༌། གོམས་ཆ་གོང་འཕེལ་དུ་གཏོང་དགོས།

 

མདོར་ན། རང་ཅག་ཆོལ་ཁ་གསུམ་གྱི་བོད་རིགས་སུ་གཏོགས་པ་ཚང་མས་བོད་མི་རིགས་རང་དབང་གི་དོན་དུ་ལུས་སྲོག་བཏང་བ་རྣམས་ཀྱི་བཀའ་དྲིན་དང༌། དེང་སྐབས་མནར་གཅོད་དྲག་པོ་མྱོང་བཞིན་པའི་སྤུན་ཟླ་རྣམས་ཀྱི་སྣང་ཚུལ་མ་བརྗེད་ཡིད་ཀྱི་ཐིག་ལེར་བཀོད་ནས་ལུས་ཀྱི་བྱ་སྤྱོད། ངག་གི་སྨྲ་བརྗོད། ཡིད་ཀྱི་འཁྱེར་སོ་ཅི་བྱས་པའི་དམིགས་ཡུལ་གཏད་སོ་གཅིག་ཏུ་བཟུང་སྟེ། བོད་ཆོས་སྲིད་ཀྱི་རང་དབང་སྐྱར་དུ་སྒྲུབ་པའི་ཐབས་ཚུལ་ལ་ནུས་ཤུགས་ཆིག་སྒྲིལ་གྱིས་འཇུག་དགོས་པ་ཡིན་ནོ།། །།

 

ཕྱི་ལོ་ ༡༩༦༢ ལོའི་གསུམ་བཅུའི་དུས་དྲན་གྱི་གསུང་འཕྲིན།

 

ཕྱི་ལོ་ ༡༩༦༢ ལོ་གསུམ་གོང་གི་དུས་ཚོད་ད་ཉིན། མཚོན་མེད་ཞི་བའི་ལྷ་སའི་མི་མང་གིས་ང་ཚོར་དྲག་ཤུགས་ཀྱིས་གནོན་མཁན་ཚོར་ངོ་རྒོལ་བྱས་ཤིང༌། ཡུལ་དང༌། རང་དབང་སྲུང་སྐྱོབ་ཀྱི་དོན་དུ་གཅེས་པའི་ལུས་སྲོག་ལོངས་སྤྱོད་ཀྱང་དགའ་པོའི་ངང་བློས་བཏང་བ་རེད། འཇིགས་ཟིལ་དངངས་སྐྲག་ཅན་གྱི་དབང་བསྒྱུར་ད་དུང་མུ་མཐུད་བསྡད་ཡོད་པར་བརྟེན་མནར་གཅོད་དེ་ལས་ཐར་བའི་དོན་དུ་ད་ཕན་ཉིན་ཞག་ཇི་ལྟར་སོང་བ་བཞིན་བཙན་བྱོལ་བོད་མི་ཇེ་མང་ཁྱིམ་མཚེས་རྒྱལ་ཁབ་ནང་ཡོང་དགོས་བྱུང་བ་རེད།

    འོན་ཀྱང་མི་མང་གི་སེམས་ཤུགས་ནི་ནམ་ཡང་ཉམས་ཆག་བྱུང་མེད་ལ། ཉམས་ཆག་འགྲོ་ཐུབ་པ་ཡང་མ་ཡིན། དྲག་ཤུགས་ཀྱིས་བཟུང་བའི་བོད་ནང་གི་འགོ་བྱེད་ཚོའི་བྱ་སྤྱོད་ལ་བྲོས་ཐར་མ་ཐུབ་པའི་བོད་མིས་དགའ་མོས་མི་བྱེད་པའི་ཁར། བོད་མི་དཔའ་བོ་ཚོས་འཐབ་རྩོད་ངོ་རྒོལ་ད་དུང་བྱེད་ཀྱི་ཡོད་པ་རེད། ཁོང་ཚོའི་སེམས་ཤུགས་དང་སྙིང་སྟོབས་ཀྱིས་རང་གི་ཁྱིམ་ཚང་ཚོར་ཡང་སྲུང་སྐྱོབ་ཀྱི་ནུས་ཤུགས་ཐོན་པ་དང༌། མ་འོངས་པའི་བོད་ཀྱི་མདུན་ལམ་ལ་གཡོ་འགུལ་མེད་པར་ད་དུང་བློ་སྤོབས་ཆེན་པོའི་ངང་བསྡད་ཡོད་པ་རེད། ད་རིང་གི་དུས་ཚེས་འདིར་བོད་ཀྱི་ཕྱི་ལོགས་སུ་ཡོད་པའི་ང་ཚོ་བོད་མི་ཡོངས་རྫོགས་ནས་ཡིད་ཀྱི་དབང་པོ་ཁོང་ཚོའི་རྗེས་སུ་རང་བཞིན་གྱིས་གཞོལ་བའི་ཐོག ཁོང་ཚོའི་བཀའ་དྲིན་དང༌། གཟི་བྱིན་ལ་རྗེས་དྲན་གུས་འདུད་བྱེད་འོས་པ་ཡིན། ཁོང་ཚོ་བཟོད་དཀའི་ངལ་སྡུག་དྲག་པོས་མ་གཙེས་པར་སྙིང་སྟོབས་དང་གཟི་བྱིན་ཉམས་མེད་དུ་གནས་ཆེད་འཕགས་མཆོག་ཐུགས་རྗེ་ཆེན་པོར་གསོལ་འདེབས་སྨོན་ལམ་དང༌། ཁོང་ཚོར་བྱིན་རླབས་བྱེད་རྒྱུ་ཡིན། 

    ཁོང་ཚོར་རྨི་ལམ་ངན་པ་རྨིས་པ་ལྟ་བུའི་དངངས་སྐྲག་དང༌། དཀའ་སྡུག་རྣམས་རིང་མིན་སེལ་ཐུབ་པའི་དོན་དུ་ང་ཚོ་ཕྱོགས་འདིར་གནས་པ་ཚོས་སྨོན་ལམ་འདེབས་རྒྱུ་མ་གཏོགས། རང་གི་དགའ་བརྩེ་བྱེད་ཡུལ་ཚང་མ་རྩ་མེད་གཏོང་བ་མཐོང་མཁན་གྱི་བོད་མི་ཚོར་དངོས་པོའི་རོགས་རམ་བྱེད་མི་ཐུབ་ཀྱང༌། ང་ཚོའི་མི་མང་གི་དཀའ་ངལ་རྣམས་མྱུར་དུ་ཐག་གཅོད་ཐུབ་ཐབས་བྱེད་དགོས་པའི་ལས་འགན་ཆེ་ཞིང་ལྕི་བ་ཞིག་ང་ཚོའི་ཐོག་ཏུ་ཡོད། ཕྱི་རྒྱལ་གྱི་བཙན་གནོན་དང༌། མནར་གཅོད་འོག་ནས་མ་ཐར་བར་ང་ཚོའི་རྗེས་སུ་ལུས་པ་ཚོའི་རེ་དོན་སྒྲུབ་དགོས་པ་དེ་དག་ང་ཚོའི་ལས་འགན་དང་པོ་ཡིན་པ་བརྗེད་མི་རུང༌། ང་ཚོས་སྔར་བཞིན་ཆིག་སྒྲིལ་དམ་ཟབ་བྱེད་དགོས་ཤིང༌། ང་ཚོའི་མདུན་དུ་རྒྱ་ཆེའི་ལས་དོན་ཞིག་བསྡད་ཡོད། 

    ད་ཕན་ལོ་གསུམ་རིང་ངའི་མི་མང་པོ་བཙན་བྱོལ་བྱེད་དགོས་བྱུང་བའི་གནད་དོན་འདི་ཐོག་ཡར་ཐོན་འཛམ་གླིང་གི་བསམ་བློར་གཡོ་འགུལ་ཐེབས་ཡོད་ཅིང༌། ང་ཚོས་བོད་ཀྱི་དཀའ་ངལ་གནས་ཚུལ་མདོ་ཙམ་བརྗོད་པ་ལ་ང་ཚོ་ཙམ་མིན་པར་མཛའ་གྲོགས་རྒྱལ་ཁབ་མང་པོས་ཀྱང་རྒྱབ་སྐྱོར་ཐབས་ཤེས་བྱས་པའི་རྐྱེན་གྱིས་སྔ་ལོ་མཉམ་འབྲེལ་རྒྱལ་ཚོགས་ཚོགས་ཆེན་ནང་གྲོས་ཆོད་ཅིག་གཏན་འབེབས་བྱུང་བ་དང༌། གྲོས་ཆོད་དེས་ང་ཚོའི་དོན་གནད་གོམ་རིམ་གཅིག་བགྲོད་པར་ངོས་འཛིན་བྱེད་འོས། མཉམ་འབྲེལ་རྒྱལ་ཚོགས་ནས་དེང་དུས་བོད་ནང་གི་བྱ་སྤྱོད་ལ་དོ་སྣང་ཆེན་པོ་བྱེད་བཞིན་པ་མ་ཟད། མ་འོངས་པའི་དོན་དུ་དམིགས་ཡུལ་ཆེན་པོ་གཉིས་བསྟན་ཅིང༌། བོད་མིའི་གཞི་རྩའི་ཐོབ་ཐང་དང༌། རང་དབང་རང་འཇགས་ངེས་པར་སྤྲོད་དགོས་པ་གསལ་པོར་བརྗོད་པའི་ཐོག་བོད་མིའི་རང་ཐག་རང་གཅོད་སྐོར་ཡང་ད་ལམ་ཐོག་མར་བརྗོད་འགོད་བྱས་པ་རེད། གྲོས་ཆོད་ཅིག་གཏན་འབེབས་བྱས་མ་ཐག་བཙན་གནོན་གྱི་སྲིད་བྱུས་མཚམས་ཆོད་མི་འབྱུང་བ་ང་ཚོས་ཤེས་ཐུབ་ཀྱང༌། མཉམ་འབྲེལ་རྒྱལ་ཚོགས་ཀྱི་འབོད་བསྐུལ་དེ་ལ་རླབས་ཆེན་རྒྱ་ནག་མི་མང་ཚོས་སྣང་མེད་མི་བྱེད་པའི་རེ་བ་ཡོད། 

    མཉམ་འབྲེལ་རྒྱལ་ཚོགས་ཀྱི་རྩ་ཁྲིམས་དང༌། འགྲོ་བ་མིའི་ཐོབ་ཐང་སྐོར་གསལ་བསྒྲགས་རྩ་དོན་རྣམས་ཨེབ་རོ་ཨེ་ཤན་རྒྱལ་ཁབ་ཚོས་སྦན་ཏུང་ཚོགས་འདུའི་སར་རྩ་འཛིན་ཁས་ལེན་བྱས་པ་དང༌། ཚོགས་འདུ་དེར་རྒྱ་ནག་གཞུང་ཡང་ཞུགས་ཡོད་པ་རེད། མི་མང་ལ་ཕྱི་རྒྱལ་གྱིས་བཙན་གནོན་བེད་སྤྱོད་བྱེད་པ་དེས་གཞི་རྩའི་འགྲོ་བ་མིའི་ཐོབ་ཐང་འཕྲོག་པ་དང༌། མཉམ་འབྲེལ་རྒྱལ་ཚོགས་ཀྱི་རྩ་ཁྲིམས་དང་འགལ་བ། འཛམ་གླིང་ཞི་བདེ་དང་མཉམ་འབྲེལ་གྱི་ལས་དོན་ལ་འགོག་རྐྱེན་དུ་འགྲོ་གི་ཡོད་ཚུལ་སྐབས་དེར་རྒྱ་ནག་གཞུང་རང་གིས་བརྗོད་ཡོད་པ་རེད། གལ་ཏེ་གསལ་བསྒྲགས་དེ་ཚོར་ཕན་ནུས་ཡོད་ཚེ་བོད་ནང་རྒྱ་ནག་གི་སྐུ་ཚབ་ཚོའི་བྱ་སྤྱོད་རྣམས་རྩ་དོན་དེ་དག་དང་རྒྱབ་འགལ་འགྲོ་གི་ཡོད་པ་ཤེས་དགོས་པའི་ཁར། བོད་ནང་བཙན་ཤུགས་ཀྱི་སྲིད་བྱུས་མཚམས་འཇོག་བྱེད་དགོས་པ་ཡང་ངེས་པར་ཤེས་དགོས། བོད་མི་ཚོའི་ཐོབ་ཐང་དང༌། རང་དབང་དང་མཐུན་པར་བོད་ཀྱི་དཀའ་ངལ་ཞི་བའི་ལམ་ནས་སེལ་བ་མ་གཏོགས་ཐབས་ལམ་གཞན་མེད་པ་ཤེས་དགོས་པ་ཡིན། དེར་བརྟེན་བོད་ནང་ངའི་མི་མང་ཚོར་བཙན་དབང་དང༌། མནར་གཅོད་བྱེད་པ་འཕྲལ་དུ་མཚམས་འཇོག་བྱེད་དགོས་ཞེས་སྐབས་འདིར་རྒྱ་ནག་དབང་བསྒྱུར་བ་ཚོར་འབོད་བསྐུལ་བྱེད་རྒྱུ་ཡིན། 

    མཉམ་འབྲེལ་རྒྱལ་ཚོགས་ཀྱི་གྲོས་ཆོད་དེའི་ནང༌། ད་ལམ་གྱི་གྲོས་ཆོད་འདིའི་དོན་གནད་རྣམས་སྒྲུབ་ཆེད་འཐུས་མིའི་རྒྱལ་ཁབ་ཁག་ནས་འོས་ཤིང་འཚམས་པའི་བྱེད་ཐབས་གང་ཡོད་ལག་ལེན་བསྟར་དགོས་ཞེས་འབོད་བསྐུལ་བྱས་འདུག ངའི་འབོད་བསྐུལ་ལ་རྒྱ་ནག་གཞུང་གིས་ཉན་འཇོག་མ་བྱས་ཀྱང༌། ཞི་བདེར་དགའ་བའི་འཛམ་གླིང་རྒྱལ་ཁབ་ཆེ་ཁག་ཚོས་བོད་ནང་གི་བོད་མི་ཉམ་ཐག་ཚོའི་དོན་དུ་བོད་མིའི་རང་དབང་ཞི་བའི་ལམ་ནས་སྒྲུབ་པའི་བར་བཞུགས་ཐེ་ཚོམ་མེད་པར་གནང་བའི་རེ་བ་ཡོད། བོད་མིའི་རང་དབང་བསྐྱར་གསོའི་ཆེད་མཉམ་འབྲེལ་རྒྱལ་ཚོགས་སུ་བོད་དོན་ཞུ་བསྐུལ་དང་རྒྱབ་སྐྱོར་གནང་མཁན་ཚོར་སྙིང་ནས་བཀའ་དྲིན་རྗེས་དྲན་ཞུ་རྒྱུ་མ་ཟད། བོད་ནང་ཞི་བདེ་དང༌། རང་དབང་ཡོང་བའི་ཐབས་ཤེས་སྔར་བཞིན་མུ་མཐུད་གནང་རྒྱུར་ཡིད་ཆེས་བརྟན་པོ་ཡོད། 

 

    ད་བར་རྒྱ་གར་དང༌། འབྲས་ལྗོངས། བལ་ཡུལ། འབྲུག་བཅས་ཀྱི་ནང་བཙན་བྱོལ་བོད་མི་བདུན་ཁྲི་ལྷག་ཙམ་སྐྱབས་བཅོལ་བྱས་པ་དང༌། བོད་ནང་བཙན་བརྗིད་ཤིན་ཏུ་ཆེ་བས་རང་གི་ལུས་སྲོག་རྩ་མེད་འགྲོ་རྒྱུ་ལས་སྐྱོབ་ཆེད་ལམ་བགྲོད་དཀའ་ངལ་འཛེམས་མེད་ཀྱིས་བཙན་བྱོལ་བོད་མི་ཁྱོན་ཆེ་འདི་ལྟར་ཡོང་ལུགས་ཀྱིས་དེང་དུས་བོད་ནང་མི་མང་གི་འཚོ་བ་བཟོད་ཐབས་བྲལ་བ་ཞིག་ཡོད་པ་གསལ་པོར་བསྟན་པ་རེད། བཙན་བྱོལ་བོད་མི་རྣམས་རྒྱ་གར་རམ་ས་ཁུལ་གང་འོས་སར་གཞིས་ཆགས་ཆེད་རོགས་རམ་བྱེད་དགོས་ཤིང༌། དེ་ཡང་མྱུར་དུ་བྱེད་དགོས། རྒྱ་གར་གཞུང་ནས་ད་བར་རོགས་རམ་ཆེན་པོ་གནང་ཡོད་པ་དང༌། དེ་མིན་ཕན་སེམས་ཅན་གྱི་གཞུང་ཁག་དང༌། སྒེར་གྱི་ཚོགས་པ་ཁག་ནས་ཀྱང་རོགས་རམ་གནང་ཡོད་པ་རེད། འོན་ཀྱང་ད་དུང་ལས་འཕྲོ་མང་པོ་བསྡད་པའི་ཁར། བཙན་བྱོལ་བོད་མི་མང་པོ་མུ་མཐུད་ཡོང་བ་དེས་ང་ཚོའི་ལས་དོན་སྣོན་མ་ལྟ་བུར་གྱུར་བ་རེད། ཞི་བདེ་དང༌། རང་དབང་ལ་དགའ་བའི་འཛམ་གླིང་མི་མང་ཕོ་མོ་ཚོས་ངའི་མི་མང་སྡུག་བསྔལ་གྱི་ནང་དུ་ཚུད་པ་ཚོར་དོ་སྣང་སེམས་འཁུར་བྱེད་བཞིན་ཡོད་པ་ལ་ཐེ་ཚོམ་མེད། དེར་བརྟེན་སྡུག་བསྔལ་ཅན་གྱི་བཙན་བྱོལ་བོད་མི་ཚོའི་འཚོ་ཐབས་ཡར་རྒྱས་ཡོང་བའི་རོགས་རམ་གང་ཐུབ་ཡོང་བ་ཞེས་ཡང་བསྐྱར་འབོད་བསྐུལ་ཞུ་རྒྱུ་ཡིན། ཀུན་ལ་དཀོན་མཆོག་གི་བྱིན་རླབས་འཇུག་པ་དང༌། དྲང་བདེན་ཕྱོགས་ཀུན་ཁྱབ་པའི་སྨོན་ལམ་བཅས།།    །།

 

ཕྱི་ལོ་ ༡༩༦༣ ལོའི་གསུམ་བཅུའི་དུས་དྲན་གྱི་གསུང་འཕྲིན།   

 

 ཞི་བདེར་དགའ་ཞིང་སྙིང་སྟོབས་ལྡན་པའི་ངའི་བོད་མི་ཚོས་སྙིང་རྗེའི་དྲི་ཙམ་མེད་པར་བཙན་གནོན་ཚད་མེད་བྱེད་མཁན་རྣམས་ལ་ངོ་རྒོལ་གྱེན་ལངས་བྱས་པའི་དུས་ཚེས་དེ་ནས་ད་ལྟའི་བར་ཞི་བདེ་དང་རང་དབང་གི་དོན་དུ་འཐབ་རྩོད་བར་མཚམས་མེད་པ་བྱེད་བཞིན་པ་རེད། རྒྱ་དམག་གི་འགོ་བྱེད་རྣམས་ནས་འདོད་རྔམས་ཆེན་པོས་བོད་མི་རྒྱ་ཕྲག་སྣང་ཆུང་བསྡེབས་གསོད་དང༌། ཆོས་ལུགས་ཀྱི་སྤྱོད་ཡུལ་རྩ་ཆེའི་ས་གནས་དག་གཏོར་བཤིགས་སམ། བཙན་གནོན་མནར་གཅོད་ཀྱི་གོ་མཚོན་འཇོག་ཡུལ་དུ་བསྒྱུར། བཀྲེས་སྐོམ་དང་མུ་གེས་ཡུལ་ཁམས་ཁྱབ་སྟེ་གནས་ཡོད་པའི་ཁར། ད་དུང་རྒྱ་བསྐྱེད་དང༌། བཙན་འཛུལ་གྱི་དམིགས་ཡུལ་བཟུང་སྟེ་བོད་ནང་དམག་གི་རྟེན་གཞི་འཛུགས་བསྐྲུན་རྒྱ་ཆེ་བྱེད་ཀྱི་ཡོད་པ་རེད། མི་སྤྱོད་ལས་འདས་པའི་བཙན་དབང་དང༌། མནར་གཅོད་མྱོང་མ་བཟོད་པར་ཁྱིམ་མཚེས་ཡུལ་གྲུར་བཙན་བྱོལ་དུ་འབྱོར་ཟིན་པ་རྣམས་ནས་སྨྲ་བརྗོད་ཀྱི་ཡུལ་ལས་འདས་པའི་སྤྱོད་ཚུལ་ངན་པ་དེར་ཞི་ལམ་བཟུང་ནས་ངོ་རྒོལ་བྱེད་བཞིན་པའི་གནས་ཚུལ་གསལ་པོ་བརྗོད་ཀྱི་འདུག ད་ལྟའི་ཆར་སྤྱོད་ཚུལ་དེ་དག་གི་རེ་འབྲས་མངོན་པར་མ་གྱུར་ཀྱང༌། བོད་ལུས་སྤུན་ཟླ་རྣམས་ནས་ཉིན་གཅིག་ང་ཚོའི་བདེན་པར་རྒྱལ་ཁ་ཐོབ་ངེས་པའི་ཡིད་ཆེས་དེ་ནམ་ཡང་ཉམས་ཆག་མེད་པར་གནས་འདུག ངའི་མི་མང་གི་སྙིང་སྟོབས་ནམ་ཡང་ཉམས་དམས་མི་ཐུབ་པ་དང༌། གདུག་རྩུབ་ཅན་གྱི་སྤྱོད་ངན་དེ་དག་ནམ་ཡང་ཡུན་གནས་མི་ཐུབ་པའི་ཡིད་ཆེས་ཤིན་ཏུ་བརྟན་པོ་ཡོད། རང་རེས་དོན་དམ་འབད་སྒྲུབ་བྱེད་པའི་འཐབ་རྩོད་འདིའི་གྲུབ་འབྲས་རང་དབང་རང་བཙན་ཐོབ་པའི་ཉིན་གདུག་རྩུབ་ཅན་གྱི་ཀླ་ཀློའི་སྤྱོད་ཚུལ་འདི་དག་ཡོངས་སུ་རྫོགས་པར་འགྱུར། དུས་དྲན་གྱི་ཉིན་མོ་འདི་དང༌། གཞན་དག་རྣམས་སུ་དྲག་ཅིང་རྩུབ་པའི་བཙན་དབང་མནར་གཅོད་ལ་ཞི་ལམ་བཟུང་ཞིང་བློ་ཐག་གཙང་བཅད་ཀྱིས་ངོ་རྒོལ་བྱེད་མཁན་ཚོར་སྐྱབས་གྲོགས་མཛད་པའི་དོན་དུ་སྟོན་མཆོག་ཐུབ་པའི་དབང་པོར་རྩེ་གཅིག་ཡིད་ཀྱིས་གསོལ་བ་འདེབས་བཞིན་ཡོད། 

    བོད་སྡོད་རྒྱ་མིའི་སྐུ་ཚབ་ཚོས་གླེན་རྨོངས་དུད་འགྲོའི་སྤྱོད་ཚུལ་ལྷུར་ལེན་གྱིས་འགྲོ་བ་མིའི་རིགས་ཀྱི་ཁེ་དབང་དང༌། འདྲ་མཉམ་གྱི་ཐོབ་ཐང་ཁས་བླངས་མིང་རྟགས་བཀོད་པའི་རྩ་དོན་བརྩི་མེད་རྡོག་རོལ་གཏོང་བའི་སྤྱོད་ཚུལ་རྣམས་རྒྱ་ནག་གཞུང་དང༌། དེང་དུས་རྒྱ་ནག་གི་འགོ་འཁྲིད་ཚོས་ངེས་པར་ཤེས་པ་བྱས་ཏེ་བོད་ནང་བཙན་དབང་མནར་གཅོད་ཀྱི་སྲིད་བྱུས་ལ་བརྟེན་ནས་བྱུང་བའི་འཇིགས་རུང་ཡིད་སྐྱོའི་ལོ་རྒྱུས་རྣམས་མཚམས་འཇོག་ཡོང་བ་ཞེས་ངས་རྒྱ་ནག་གི་སྤུན་ཟླ་ཚོར་ཞུ་འབོད་ཡང་ཡང་བྱས་ཡོད་ཀྱང༌། འཛམ་གླིང་མི་མང་གི་སྐད་སྒྲ་རྣ་འོན་ཅན་གྱིས་མ་ཐོས་ཤིང༌། ངས་ཞུ་འབོད་བྱས་པ་རྣམས་ཀྱང་ལན་མེད་དུ་བཞག་པས་མ་ཚད། ཁོང་ཚོས་གླེན་རྟགས་འདོད་རྔམས་དྲག་པོས་རྒྱུ་མཚན་མེད་པར་རྒྱལ་སྤྱིའི་ཁྲིམས་ལུགས་རྩ་དོན་ལ་བརྩི་མེད་ཀྱིས་ཉེས་སྐྱོན་མེད་པའི་མི་གསོད་གཏོར་བརླག་བྱེད་པའི་དམག་དཔུང་ཆེན་པོ་ཞིག་རྒྱ་གར་ས་ཐོག་ཏུ་བཅུག་པའི་བཙན་འཛུལ་དམར་རྗེན་དེ་དག་ལ་འཛམ་གླིང་ཡོངས་དང༌། གུང་བྲན་ཡུལ་ཁག་ཕལ་མོ་ཆེས་སྐྱོན་བརྗོད་དམའ་འབེབས་བྱས་པའི་རྗེས་འབྲས་ངན་པ་ཇི་བྱུང་ང་ཚོས་དངོས་སུ་མཐོང་ཟིན་པ་ལྟར། རྒྱ་མིའི་འགོ་འཁྲིད་ཚོར་ཡ་ཡུད་ཀྱི་སྤྱོད་ངན་འདི་དག་ནས་བསླབ་བྱ་ཐོབ་པ་དང༌། ཤེས་ལྡན་འགྲོ་བ་མིའི་རིགས་ཀྱི་བློ་སེམས་ཕྲོགས་བསྒྱུར་མི་ཐུབ་པ་ཁོང་ཚོས་ངེས་པར་ཤེས་རྟོགས་ཡོང་བའི་རེ་སྨོན་བྱེད་བཞིན་ཡོད། 

    བོད་ཀྱི་དཀའ་རྙོག་སེལ་ཐབས་ནི། འགྲོ་བ་མིའི་རིགས་ཀྱི་ཐོབ་ཐང་དང༌། བོད་མིའི་རང་དབང་གཞི་རྩར་བཟུང་བའི་ཞི་ལམ་ཁོ་ན་ལས་མེད། དེང་སང་འཛམ་གླིང་གི་ཁྱོན་འདིར་མི་སེར་སྤེལ་ཡུལ་རྩ་མེད་དུ་བཏང་དང་གཏོང་བཞིན་པས་མི་རིགས་ཡོངས་རྫོགས་རང་དབང་དང་འདྲ་མཉམ་གྱི་ཁེ་དབང་ལ་སྤྱོད་པའི་སྐབས་འདིར་བོད་རྒྱ་ནག་གི་ཆ་ཤས་སུ་རེ་བས་བཙན་བཟུང་བྱེད་པ་ནི་ཤིན་ཏུ་ནོར་འཁྲུལ་གྱི་བསམ་ཚུལ་དང་བྱ་སྤྱོད་ཡིན། བཙན་ཤུགས་ཇི་ལྟར་ཆེ་ཡང་གཞན་ཡུལ་ཡུན་རིང་དབང་བསྒྱུར་ནམ་ཡང་མི་ཐུབ་པའི་ར་སྤྲོད་ད་ཕན་འཛམ་གླིང་གི་ལོ་རྒྱུས་མང་པོས་བྱས་ཡོད་པ་རྣམས་ངེས་པར་ཤེས་པར་བྱས་ཏེ་རྒྱ་རིགས་ཡོངས་རྫོགས་བོད་ནས་ཕྱིར་ལོག་ངེས་པར་བྱ་དགོས་ཞེས་ངས་འབོད་བསྐུལ་བྱ་རྒྱུ་ཡིན། 

    དུས་སྐབས་འདིར་བོད་ནང་གི་ཡིད་སྐྱོའི་གནས་ཚུལ་ལ་འཁུར་བཞེས་གནང་མཁན་ཡུལ་ཁག་ཚོ་དང༌། བོད་མིའི་རང་དབང་གི་དོན་དུ་མཉམ་འབྲེལ་རྒྱལ་ཚོགས་ནང་འབོད་བསྐུལ་ཐབས་བརྩོན་གནང་མཁན་ཚོར་ཐུགས་རྗེ་ཆེ་ཞེས་ཞུ་རྒྱུ་ཡིན། མཉམ་འབྲེལ་རྒྱལ་ཚོགས་ཚོགས་ཆེན་གྱི་གྲོས་ཆོད་རྗེས་མ་དེས་བྱེད་ཐབས་ལེགས་ཤོས་དང་ནུས་ཤུགས་ཆེ་ཤོས་ལ་བརྟེན་ནས་བོད་མིའི་ཐོབ་ཐང་དང༌། རང་དབང་འཕྲོག་པའི་སྤྱོད་ཚུལ་མཇུག་སྡུད་བྱེད་དགོས་ཞེས་ཡུལ་ཁག་ཚང་མའི་འཐུས་མི་ཚོར་འབོད་བསྐུལ་གནང་འདུག ཞི་བདེ་ལ་དགའ་བའི་ཡུལ་ཁག་ཚང་མས་ངའི་ཞུ་འབོད་ལ་རྒྱབ་སྐྱོར་བྱེད་རྒྱུར་ཐེ་ཚོམ་མེད་ཅིང༌། ཁོང་ཚོས་ཐབས་ཤེས་བཟང་པོ་ལ་བརྟེན་ནས་ངའི་བོད་མི་རྣམས་ཀྱི་རང་དབང་དང་ཞི་བདེ་བརྩོན་ལེན་བྱེད་ངེས་ཡིན། རྒྱུ་མཚན་དང་གནས་ལུགས་དེ་ལྟ་བུར་གཞིགས་ཏེ་དུས་ཡུན་མི་རིང་བར་ང་ཚོའི་ཡུལ་གྱི་རང་དབང་ཡང་བསྐྱར་ཐོབ་རྒྱུའི་ཉིན་མོ་དེའི་དོན་དུ་ཚང་མས་ཡིད་ཆེས་དང་མ་བྲལ་བར་ལས་དོན་མུ་མཐུད་སྒྲུབ་དགོས། 

 

    ང་ཚོས་མ་འོངས་པའི་ལམ་ཕྱོགས་ཇི་ལྟ་བུར་བགྲོད་དགོས་པའི་སྐོར་ད་ལྟ་ནས་བསམ་ཞིབ་དང་གྲ་སྒྲིག་གིས་རིམ་བགྲོད་བྱེད་དགོས་པ་ནི་ད་ལྟའི་དུས་སྐབས་ཀྱི་རང་རེའི་ལས་འགན་ཡིན་ཞིང༌། དེའི་དོན་ངེད་ནས་མ་འོངས་པའི་བོད་ཀྱི་རྩ་ཁྲིམས་ཟིན་བྲིས་སྔོན་མ་ལས་རྒྱས་ཙམ་ཞིག་ད་ལམ་འགྲེམས་སྤེལ་བྱས་པ་འདིར་བོད་མི་ཚོས་བརྟག་ཞིབ་ནན་ཏན་བྱ་དགོས། རྩ་ཁྲིམས་ཀྱི་ཟིན་བྲིས་འདི་བཞིན་སྟོན་པ་ཐུགས་རྗེ་ཅན་གྱི་བཀའ་དང༌། བོད་རྗེ་ཆོས་རྒྱལ་གོང་དུས་ནས་དར་བའི་རང་རེའི་གོམས་སྲོལ་བཟང་པོ་རྣམས་དང་མི་འགལ་ཞིང༌། འདྲ་མཉམ་དམངས་གཙོའི་སྲོལ་དང་མཐུན་པ། བོད་ཀྱི་ཆོས་སྲིད། དཔལ་འབྱོར། ཤེས་རིག་སོགས་ཡར་རྒྱས་ཀྱི་ལམ་སྒོ་ཡངས་ཤིང་རྒྱ་ཆེ་བ་ཞིག་ལེགས་པར་ཕྱེ་བའི་ཁུལ་དུ་ཡོད་ཀྱང༌། ད་དུང་ཤེས་ལྡན་བོད་མི་ཚོར་ལེགས་ཆའི་བསམ་ཚུལ་ཇི་ཡོད་བསྡུ་གསོག་ཐོག་རྗེས་སུ་བོད་ནང་ཁུལ་གྱི་སྤུན་ཟླ་ཚོར་གོ་བསྡུར་ལེགས་པར་བྱས་ཏེ་དངོས་གཞིའི་གཏན་འབེབས་ལག་ལེན་བྱེད་དགོས། འགྲོ་ཀུན་སངས་རྒྱས་ཀྱི་གོ་འཕང་ཐོབ་པའི་སྨོན་ལམ་བཅས།།    །།