ཟླ་4་ཕྱི་ཚེས་ 15 བོད་ནང་གི་ཉིན་གུང་ཆུ་ཚོད་ ༡༢ ཙམ་ལ་དཀར་མཛེས་ཁུལ་རྟའུ་རྫོང་དུ་བོད་མི་འཕྲིན་ལས་རྣམ་རྒྱལ་ཞུ་བ་ཞིག་གིས། རྒྱ་གཞུང་ལ་ཞི་བའི་ངོ་རྒོལ་གྱིས་རང་ལུས་མེར་བསྲེགས་གནང་སྟེ་འདས་གྲོངས་སུ་གྱུར་ཡོད་འདུག

འདི་གར་རྟའུ་བློ་བཟང་སྦྱིན་པ་ལགས་ཀྱིས་བརྗོད་པ་ལྟར་ན། རང་ལུས་མེར་བསྲེགས་གནང་རྗེས། ས་གནས་སེར་སྐྱ་མི་མང་གིས་ཁོང་གི་སྐུ་ཕུང་རང་ཁྱིམ་དུ་གདན་འདྲེན་ཞུས་ཡོད་ཀྱང་། ད་ལྟའི་ཆར་ཉེན་རྟོག་པ་ས་གནས་སུ་སླེབ་ཡོད་མེད་སོགས་ཀྱི་གནས་ཚུལ་ཤེས་རྟོགས་ཐུབ་མི་འདུག

འཕྲིན་ལས་རྣམ་རྒྱལ་ལགས་ནི་རྟའུ་རྫོང་ཁང་སར་ཤང་རྒན་ནད་སྡེ་བའི་ཕ་བདུད་ལོ་དང་མ་དཔལ་ལྷ་གཉིས་ཀྱི་བུ་ཡིན་པ་དང་། ད་ལྟ་རང་ལོ་ ༣༢ ཡིན་འདུག

ཟླ་༣་ཕྱི་ཚེས་ ༢༩ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༣།༠༠ ཡས་མས་སུ། འབའ་ཐང་རྫོང་འབའ་ཆོས་སྡེ་དགོན་པའི་ཉེ་འགྲམ་དུ་འབའ་ཐང་སྤྱི་སྲུང་སྒང་ཞོག་སྡེ་བའི་རང་ལོ་ ༣༡ ཡིན་པའི་བཙུན་མ་སྒྲོལ་མ་ལཊ་ཀྱིས། རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་སྐད་འབོད་གནང་ཡོད་པ་དང་། དེ་མ་ཐག་དགོན་པར་བསྐོར་བ་རྒྱག་མཁན་གྱི་བོད་མི་ཚོས་ཁོ་མོའི་ལུས་སྟེང་གི་མེ་བསད་དེ་འབའ་ཐང་རྫོང་མི་མང་སྨན་ཁང་དུ་འཁྱེར་ཏེ། ད་ལྟའི་ཆར་བཙུན་མ་ཁོང་སྲོག་ཉེན་ལས་ཐར་ཡོད་པའི་གནས་ཚུལ་ཐོན་ཡོད་འདུག

བཙུན་མ་སྒྲོལ་མ་ལགས་ནི། འབའ་ཐང་རྫོང་འབའ་ཐང་སྤྱི་སྲུང་སྒང་ཞོག་གྲོང་སྡེ་ནས་ཡིན་པ་དང་། ཕ་མིང་ལ་ཉི་མ་དང་ཨ་མ་མིང་ལ་དབང་མོ་ཞུ་བཞིན་ཡོད་འདུག ཨ་མ་ལོ་གཅིག་ཙམ་གྱི་སྔོན་འདས་གྲོངས་སུ་ཕྱིན་ཡོད་འདུག ཁོང་མོར་སྤུན་བཙུན་མ་སྤུན་མཆེད་གཉིས་ཡོད་པ་ལས་ཆེ་བ་ཁོང་དང་ཆུང་བའི་མིང་ལ་ཨ་ཆུབ་ཞུ།

རང་ལུས་མེར་བསྲེགས་མ་གནང་གོང་ཁོང་འབའ་ཐང་རྫོང་རི་སྟོད་རྐ་མགོར་ཕྱག་འཚལ་བཞིན་བསྡད་ཡོད་པ་དང་། ཁ་སང་རང་ལུས་མེར་བསྲེཊ་ཀྱི་གནས་ཚུལ་བྱུང་རྗེས་། རྒྱ་གཞུང་གིས་ཉེ་ལམ་ཁོང་དང་མཉམ་དུ་སྡོད་མཁན་གྱི་བཙུན་མ་གསུམ་འཛིན་བཟུང་གིས་གར་ཡོད་མ་ཤེས་པར་ལྷག་ཡོད་འདུག ཁོང་ཚོའི་ཁྲོད་ཀྱི་ཨ་ནེ་གཅིག་དེ་སྔོན་རྒྱ་གར་ནས་ཕྱིར་བོད་ནང་ལོག་མཁན་ཞིག་ཡིན་འདུག

དེ་སྔོན་གྱི་ལོ་རྒྱུས་ལྟར་ན་ཁོང་མོ་འཚར་ལོངས་བྱུང་སའི་སྤྱི་སྲུང་སྒང་ཞོག་སྡེ་བ་དེ་འབའ་ཐང་རྫོང་གི་ཁོངས་གཏོགས་ཡིན་ཡང་། ཕྱིས་སུ་རྒྱ་ནག་གི་ས་ཆ་བགོ་སྐབས་སྨར་ཁམས་ཀྱི་ཁོངས་སུ་བཅུག་ཡོད་འདུག

ད་ཆར་རྒྱ་གཞུང་གིས་ས་གནས་སུ་དམག་མི་འགྲེམས་འཇོག་གིས་དམིགས་བསལ་དམ་དྲག་བྱེད་ཀྱིན་མེད་ཀྱང་། ས་གནས་ཀྱི་དྲ་རྒྱ་ཁག་ལ་ལྟ་མི་ཐུབ་པར་གྱུར་ཡོད་པ་དང་ཁ་པར་སོགས་བརྒྱུད་ལམ་ཁག་ལ་སྟངས་འཛིན་ནན་མོ་བྱེད་ཀྱི་ཡོད་འདུག 

བཞུཊ་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་གནས་ཚུལ་བཏང་འབྱོར་ལྟར་ན། ཚེས་ ༡༦ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༡༡།༤༠ ཙམ་ལ་རྔ་པ་ཀིརྟི་དགོན་གྱི་གྲྭ་བློ་བཟང་དཔལ་ལྡན། རང་ལོ་ ༢༠ ཡས་མས་ཡིན་པ་ཁོང་གིས་རྒྱ་ནག་གཞུང་གིས་བོད་ཐོག་བཟུང་བའི་དྲག་རྩུབ་ཅན་གྱི་སྲིད་ཇུས་ལ་ངོ་རྒོལ་སྐད་འབོད་གནང་བཞིན་སྐུ་ལུས་མེ་རུ་སྒྲོན་ཡོད་འདུག ཁོང་གིས་རྔ་པའི་དཔའ་བོའི་སྲང་ལམ་དུ་ལུས་ལ་ས་སྣུམ་བྱུགས་ནས་མེར་བསྒྲོན་ཏེ་སྐད་འབོད་༼འབོད་ཚིག་གི་ནང་དོན་ཤེས་རྟོགས་མ་བྱུང་༽གནང་བཞིན་གོམ་པ་འགར་ཕེབས་ཡོད་ཀྱང་། དེ་མ་ཐག་རྒྱ་གཞུང་གིས་སྔ་ས་ནས་གྲ་སྒྲིག་བྱས་ནས་ཡོད་པའི་དམིགས་བསལ་ཉེན་རྟོག་པ་སོགས་འབོར་ཆེན་སླེབས་ནས་མེ་བསད་ཅིང་རླངས་འཁོར་ཆུང་བ་སྒམ་ཤིང་ཅན་ཞིག་གི་ནང་བཙན་ཁྲིད་བྱས་ཡོད་པ་དང་། དེའི་རྗེས་ནས་ས་གནས་གང་དུ་ཁྱེར་ཡོད་མེད་དང་ཤི་གསོན་གྱི་གནས་སྟངས་སོགས་གང་ཡང་ཤེས་རྟོགས་མི་ཐུབ་པར་གྱུར་ཡོད།

དམ་པ་ཁོང་ནི་རྔ་པ་རྫོང་རྨེའུ་རུ་མ་ཡུལ་ཚོའི་རུ་ཆེན་གསུམ་པའི་ཨ་ཤེར་ཚང་ཡིན་ཞིང་། མ་མིང་ལ་ནམ་ཁོ་དང་། ཕ་གཡར་གྱི་མིང་ལ་ཤེས་རབ་ཡིན་འདུག མི་ཚང་དེར་རྔ་པ་ཀིརྟི་དགོན་དུ་གྲྭ་པ་སྤུན་གཉིས་ཡོད་པ་ལས་ཆེ་བ་དེ་ཡིན། ཁོང་ཆུང་ཆུང་སྐབས་ནས་རྔ་པ་ཀིརྟི་དགོན་པར་ཆོས་ཞུགས་བྱས་ནས་ད་ལྟ་འཛིན་གྲྭ་བསྡུས་ཆེན་ལ་སླེབས་ཡོད་འདུག དེ་རིང་གནས་ཚུལ་དེ་བྱུང་མ་ཐག་རྔ་པ་རྫོང་མཁར་གྱི་བོད་མིའི་ཟ་ཁང་དང་ཚོང་ཁང་ཚང་མ་སྒོ་བརྒྱབས་ནས་ཁོང་དང་ཁོང་གི་ནང་མིར་གདུང་སེམས་མཉམ་བསྐྱེད་དང་། སྐྱིད་སྡུག་མཉམ་མྱོང་གི་རྣམ་པ་བསྟན་ཡོད་པ་དང་། ད་ལྟའི་རྔ་པའི་ཁྲོམ་གཞུང་དུ་སྒྲིག་ཆས་གྱོན་པ་དང་མ་གྱོན་པའི་ཉེན་རྟོག་པ་མང་པོས་དམ་བསྒྲགས་བྱེད་མུས་ཡིན་འདུག

དེ་རིང་ནི་ཕྱི་ལོ་ ༢༠༠༨ ཟླ་ ༣ ཚེས་ ༡༦ ཉིན་ཨ་མདོ་རྔ་པ་ནས་རང་དབང་གི་འབོད་སྒྲོག་མཁན་གྱི་བོད་མི་སྐྱ་སེར་རྒན་གཞོན་མང་པོ་དམར་གསོད་བཏང་ནས་མི་ལོ་དྲུག་འཁོར་བའི་ཉིན་མོ་ཡིན་ཞིང་། ཕྱི་ལོ་ ༢༠༡༡ ཟླ་ ༣ ཚེས་ ༡༦ ཉིན་རྒྱལ་གཅེས་དཔའ་བོ་བློ་བཟང་ཕུན་ཚོགས་དང་། ཕྱི་ལོ་༢༠༡༢ ཟླ་༣ ཚེས་༡༦ ཉིན་རྒྱལ་གཅེས་དཔའ་བོ་བློ་བཟང་ཚུལ་ཁྲིམས། ཕྱི་ལོ་ ༢༠༡༣ ཟླ་ ༣ ཚེས་ ༡༦ ཉིན་རྒྱལ་གཅེས་དཔའ་བོ་གྲྭ་བློ་བཟང་ཐོགས་མེད་བཅས་ཀྱིས་སྔ་ཕྱིར་ཉིན་མོ་དེ་དྲན་གསོ་ལྟ་བུར་མེ་དཔུང་གི་ཁྲོད་ནས་བོད་ལ་རང་དབང་དགོས་པའི་འབོད་སྒྲ་སྒྲོག་བཞིན་མི་ཡུལ་ལ་ཞལ་གྱེས་གནང་ཡོད་ལ། ད་ལོ་ཡང་འདི་ལྟར་ཁོང་ཅག་དང་འདྲ་བར་དཔའ་བོའི་སྲང་ལམ་ནས་ཚེ་སྲོག་གི་མེ་ལྕེས་རང་དབང་གི་འབོད་སྒྲ་སྒྲོག་བཞིན་ཡོད་འདུག

་

༢༠༡༤ ༠༣ ཕྱི་ཚེས་ ༡༦ ཉིན་གྱི་སྔ་དྲོ་རྨ་ལྷོ་རྩེ་ཁོག་རྫོང་བྱ་དར་ཞང་བྱ་དར་དགོན་པའི་གྲྭ་བ་ཞིག་གིས། དགོན་པའི་གླིང་གི་ཕྱི་རོལ་དུ་རང་ལུས་མེར་བསྲེཊ་ཀྱིས་རྒྱ་གཞུང་གི་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་གནང་ཡོད་འདུག གནས་ཚུལ་བྱུང་རྗེས་རྒྱ་གཞུང་གིས་ས་གནས་ཀྱི་བརྒྱུད་ལམ་ལ་བཀག་སྡོམ་ནན་མོ་བྱས་ཡོད་སྟབས། མེར་བསྲེཊ་གནང་མཁན་གྱི་མཚན་དང་འཆི་གསོན། ས་གནས་ཀྱི་དམ་དྲག་གནས་སྟངས་སོགས་གསལ་བོ་མ་ཤེས་པར་ལྷག་ཡོད།

གནས་ཚུལ་འདིའི་ཐད་ཁ་སང་རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས། ཕྱི་ཚེས་ ༡༦ ཉིན་རྨ་ལྷོ་ཁུལ་རྩེ་ཁོག་རྫོང་དུ་དགེ་འདུན་པ་ཞིག་གིས་རང་ལུས་མེར་བསྲེགས་བཏང་ཡོད་པ་དང། གནས་ཚུལ་དེ་བྱུང་མ་ཐག་ཉེན་རྟོག་པ་ས་གནས་སུ་ཕྱིན་ཡོད་པའི་གནས་ཚུལ་དྲ་ལམ་དུ་བཀོད་འདུག་ལ། ཡང་ཨེ་ཕེ་གསར་ལས་ཁང་ (AP) གིས་དྲ་རྒྱུའི་ཐོག རྨ་ལྷོ་རྩེ་ཁོག་རྫོང་ས་གནས་བདེ་འཇགས་ལྷན་ཁང་གི་ལས་བྱེད་པ་ཞིག་གིས། ཁོང་གི་མིང་དང་ཞིབ་ཕྲའི་གནས་ཚུལ་སོགས་གསལ་བོ་བཤད་མེད་ཀྱང་། ཁ་སང་ས་གནས་སུ་རང་ལུས་མེར་བསྲེགས་ཀྱི་དོན་རྐྱེན་བྱུང་བ་དངོས་ཡོད་ཡིན་ཚུལ་དང་། མེར་བསྲེཊ་གནང་ཡུལ་དགོན་པའི་གླིང་གི་ཕྱི་རོལ་དུ་བྱུང་ཡོད་ཚུལ་ངོ་སྤྲོད་བྱས་ཡོད་སྐོར་བཀོད་འདུག

 ཟླ་འདིའི་ཚེས་ ༥ ཉིན་གྱི་བོད་ནང་གི་དགོང་དྲོའི་ཆུ་ཚོད་ ༩།༣༠ ཡས་མས་སུ། རྨ་ལྷོ་ཁུལ་རྩེ་ཁོག་རྫོང་རྡོ་དཀར་མོ་ཞང་གི་ཉེ་འཁྲིས་པན་ཆེན་ཉིན་སློབ་གྲྭ་གཉིས་པའི་འདབས་སུ། མགོན་ཤུལ་སྒར་བའི་རང་ལོ་ ༢༧ ཡིན་པའི་གཞོན་སྐྱེས་འཕགས་མོ་བསམ་འགྲུབ་ལགས་ཀྱིས། རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་ཡོད་པ་དང་། དེ་མ་ཐག་དམག་མི་འབྱོར་ཏེ་སྐུ་ཕུང་བཙན་འཁྱེར་བྱས་ཡོད་སྟབས། ད་ལྟའི་ཆར་ཁོང་ས་གནས་གང་དུ་འཁྱེར་ཡོད་མེད་དང་འཆི་གསོན་གྱི་གནས་སྟངས་གསལ་བོ་མ་ཤེས་པར་ལྷག་ཡོད་འདུག

འཕགས་པ་སྐྱབས་ལགས་ནི་སྔགས་པ་ཞིག་ཡིན་འདུག་ལ།  ཁོང་དང་བཟའ་ཟླ་གཉིས་ལ་བུ་གཅིག་དང་བུ་མོ་གཅིག་བཅས་བྱིས་པ་གཉིས་ཡོད་འདུག

རང་ལུས་མེར་བསྲེཊ་ཀྱི་གནས་ཚུལ་བྱུང་རྗེས་རྒྱ་གཞུང་གིས་ས་གནས་ཀྱི་བརྒྱུད་ལམ་ཁག་ཚང་མར་དམ་དྲག་སྟངས་འཛིན་བྱས་ཡོད་པ་མ་ཟད། ས་གནས་སུ་དམག་མི་དང་ཉེན་རྟོག་པ་སོགས་འགྲེམས་འཇོག་གིས་མི་མང་ལ་དམ་དྲག་ཤུགས་ཆེར་བྱེད་ཀྱི་ཡོད་འདུག

 ཁོང་གི་ཨ་མའི་མིང་ལ་འབྲུག་མོ་ཟེར་བ་དང་། མགོན་ཤུལ་དམེ་སྐོར་ནས་མགོན་ཤུལ་སྒར་བར་མག་པར་སོང་ཡོད་འདུག འདི་ནི་ཕྱི་ལོ་༢༠༡༤ ལོའི་བོད་ཀྱི་མེར་བསྲེགས་གནང་མཁན་ཐོག་མ་དང་། བོད་ནང་རང་ལུས་མེར་བསྲེགས་གནང་མཁན་༡༢༥ པ་རེབ་གོང་དུ་མེར་བསྲེགས་གནང་མཁན་ཐེངས་བཅོ་ལྔ་པ་ཆགས་འདུག 

སྐུ་མེ་ལ་མཆོད་པའི་དཔའ་རྒོད་ཚོ། ཐུགས་ཞི་བདེར་གཏད་པའི་དཔའ་མོ་ཚོ།

གསུང་བདེན་པ་བསྒྲགས་པའི་དཔང་པོ་ཚོ། ངའི་སྒོ་གསུམ་ཕྱག་གི་མཆོག་གསུམ་ཡིན།

བུ་དཔའ་བོར་དཔའ་བོའི་འཆི་ལུགས་ཤིག བུ་མཛངས་པར་མཛངས་པོའི་བྱེད་ལུགས་རེ།

མ་ངན་རུང་བུ་ཕྲུག་སྐྱོང་སྲོལ་ཞིག འདི་གནའ་ཡང་ཡོད་ལ་ད་ཡང་ཡོད།

ཁ་སང་ཕྱི་ཚེས་ ༣ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༥ ཡས་མས་ལ། ཨ་མདོ་རྔ་པ་ཁུལ་རྔ་པ་རྫོང་དམེ་རུ་མ་ཡུལ་ཚོའི་ཁྲོམ་གཞུང་དུ་དཀོན་མཆོག་ཚེ་བརྟེན་ཞུ་བ་ཞིག་གིས། རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་བཏང་ཡོད་པ་དང་། སྐབས་དེར་ཁོང་གི་ལུས་སྟེང་དུ་མེ་འབར་བཞིན་དུ་ “རྒྱལ་བ་བསྟན་འཛིན་རྒྱ་མཚོ་ཁྲི་ལོར་བརྟན་པར་ཤོག རྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་དགོས། བོད་མི་གཞིས་བྱེས་མཉམ་འཛོམས་ཡོང་དགོས”ཞེས་སྐད་འབོད་གནང་བཞིན་ཡར་རྒྱུག་མར་རྒྱུག་བྱས་རྗེས་སར་འགྱེལ་ཡོད་འདུག

ངྷ་སར་གནས་བཞུགས་ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། གནས་ཚུལ་བྱུང་མ་ཐག་རྒྱ་གཞུང་ཉེན་རྟོག་པ་དང་དམག་མི་བསླེབས་ཏེ་ཁོང་བཙན་འཁྱེར་བྱས་སྐབས། ས་གནས་བོད་མི་ཚོས་བཀག་འགོག་བྱས་པར་བརྟེན་ཡུལ་མི་དང་ཉེན་རྟོག་པའི་བར་རྩོད་རྙོག་བྱུང་སྟེ། ས་གནས་བོད་མི་འགའ་འཛིན་བཟུང་བྱས་ཡོད་པ་དང་། མཐར་ཉེན་རྟོག་པས་ཁོང་བཙན་འཁྱེར་བྱས་ཡོད་པ་མ་ཟད། རྒྱལ་གཅེས་དཔའ་བོ་དཀོན་མཆོག་ཚེ་བརྟན་ལགས་ཀྱི་ཆུང་མ་ནམ་སྣང་ལགས་དང་གཉེན་འབྲེལ་འགའ་ཞིག་ཀྱང་འཛིན་བཟུང་བཙན་འཁྲིད་བྱས་ཡོད་འདུག

དེ་རིང་ནས་བཟུང་དམེ་རུ་མ་ཡུལ་ཚོའི་ཐོག་གི་ཚོང་ཁང་དང་<ཟ་ཁང་ཚང་མ་སྒོ་རྒྱག་ཏུ་བཅུག་ཡོད་པ་མ་ཟད། སྲང་ལམ་དུ་ཁ་པར་རྒྱག་མཁན་རྣམས་ཀྱི་ཁ་པར་ཡང་བཙན་འཕྲོག་བྱས་ཏེ་དམ་དྲག་ཆེན་པོ་བྱེད་བཞིན་ཡོད་སྟབས། ད་ལྟའི་ཆར་ཁོང་ཤི་གསོན་གང་ཡིན་དང་ཁྱིམ་མིའི་གནས་སྟངས་སོགས་གསལ་བོ་ཤེས་རྟོགས་བྱུང་མི་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། ད་ལོའི་དབྱར་ཁར་ཁོང་གིས་སྤུན་མཆེད་ཅིག་ལ། རྒྱ་གཞུང་གི་བཙན་གནོན་འོག་བོད་མི་ཚོས་དཀའ་སྡུག་དང་མནར་གཅོད་གང་མང་མྱོང་བཞིན་པར་ངོ་རྒོལ་ཆེད་རང་ལུས་མེར་བསྲེག་གཏོང་རྒྱུ་ཡིན་ལུགས་བརྗོད་ཡོད་པ་དང་། སྐབས་དེར་སྤུན་མཆེད་དེས་རང་ལུས་མེར་བསྲེག་མ་གཏོང་ཞེས་བསླབ་བྱ་བརྒྱབ་ཡོད་ཀྱང་།ཁོང་གིས་སེམས་ཐག་བཅད་ཟིན་ལུགས་བརྗོད་ཡོད་འདུག

རྒྱལ་གཅེས་དཔའ་བོ་དཀོན་མཆོག་ཚེ་བརྟན་ལགས་ནི་ཀན་སུའུ་ཞིང་ཆེན་ཀན་ལྷོ་ཁུལ་རྨ་ཆུ་རྫོང་ཆུ་ཁ་མ་ཡུལ་ཚོ་རྒྱུ་ལག་རུ་ཆེན་ནས་ཡིན་པ་དང་། ཁོང་གི་ཕ་མིང་ལ་བསམ་ཁོ་དང་ཨ་མ་མིང་ལ་འོ་དགའ། ཆུང་མའི་མིང་ལ་ནམ་སྣང་ཟེར་ཞིང་། ཁོ་མོ་རང་ལོ་ ༢༨ ཡིན་འདུག ཁོང་བཟའ་མི་གཉིས་ལ་བུ་གཉིས་ཡོད་པ་ལས། ཆེ་བ་ཕྱག་རྡོར་སྐྱབས་ལོ་ ༤ དང་། ཆུང་བ་དཔལ་རྩལ་སྐྱབས་ལོ་ ༣ ཡིན་འདུག

དེ་རིང་ཉིན་རྒྱབ་བོད་ཨ་མདོ་བླ་བྲང་བཀྲ་ཤིས་འཁྱིལ་ཨ་མཆོག་དགོན་པའི་གྲྭ་ཚུལ་ཁྲིམས་རྒྱ་མཚོ་ལགས་ཀྱིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེགས་ཀྱིས་སྐུ་གྲོངས་ཡོད་འདུག

ད་ལྟ་རང་རྒྱ་གར་ལྷོ་ཕྱོགས་འབྲས་སྤུངས་དགོན་པའི་གྲྭ་བསོད་ནམས་ལགས་ཀྱིས་གནས་ཚུལ་བཏང་འབྱོར་བྱུང་བར། དེ་རིང་ཉིན་རྒྱབ་བོད་ནང་གི་ཆུ་ཚོད་ ༢།༣༠ སྟེང་། ཀན་ལྷོ་ཁུལ་བསང་ཆུ་རྫོང་ཨ་མཆོག་གྲོང་བརྡལ་དུ། ཨ་མཆོག་དགོན་པའི་གྲྭ་ཚུལ་ཁྲིམས་རྒྱ་མཚོ་ལགས་ཀྱིས། བོད་བསྟན་སྲིད་མི་རིགས་ཆེད་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག དེ་མ་ཐག་ས་གནས་སྐྱ་སེར་མི་མང་གིས་ཁོང་གི་སྐུ་ཕུང་དགོན་པའི་ནང་གདན་འདྲེན་ཞུས་ཏེ། དགོན་པའི་གྲྭ་བ་༤༠༠ ལྷག་གིས་མཆོད་འབུལ་དང་བསྔོ་སྨོན་གསུང་བཞིན་ཡོད་འདུག

ཁོང་གིས་ཞལ་ཆེམས་ཡི་གེ་ཞིག་བཞག་ཡོད་པའི་ནང་། རྒྱ་ནག་གི་བཙན་དབང་ཁྲིམས་འོག་ན་བོད་མི་ཚོས་སྡུག་བསྔལ་མྱོང་གི་ཡོད་ཅིང་། ཁོ་རང་གིས། རྒྱལ་བ་བསྟན་འཛིན་རྒྱ་མཚོ་རང་ཡུལ་དུ་ཕེབས་ཆེད་དང་། པཎ་ཆེན་སྣང་བ་མཐའ་ཡས་བཙོན་གྲོལ་ཐོབ་ཆེད། བོད་མི་ས་ཡ་དྲུག་གི་སྡུག་བསྔལ་སེལ་ཆེད་རང་ལུས་མེར་བསྲེགས་བཏང་བ་ཡིན་ཚུལ་དང་། བོད་མི་ཚོས་མཐུན་སྒྲིལ་བྱེད་དགོས་སྐོར་སོགས་བཀོད་ཡོད་འདུག

རྒྱལ་གཅེས་དཔའ་བོ་གྲྭ་ཚུལ་ཁྲིམས་རྒྱ་མཚོ་ལགས་ཨ་མཆོག་དགོན་པའི་རྒྱུད་པ་གྲྭ་ཚང་གི་གྲྭ་བ་ཡིན་ཞིང་ད་ལྟ་རང་ལོ་ ༤༣ ཡིན་འདུག ཁོང་གི་སྐྱེས་ཡུལ་ཨ་མཆོག་ཉི་མ་ལུང་ཡིན་པ་དང་། ཕ་མིང་ལ་རྟ་མགྲིན་བཀྲ་ཤིས་ཟེར་ཞིང་སྔ་མོ་ནས་འདས་ཟིན་ཞིང་མ་མིང་ལ་ལྷ་མོ་སྐྱིད་ཞུ་བཞིན་ཡོད་འདུག ཁོང་གི་སྤུན་ཆེ་བའི་མིང་ལ་ཚེ་བྷེ་ཟེར་ཞིང་། གཞན། གཅོད་པ་དང་སངས་རྒྱས་སྒྲོལ་མ་ཟེར་བའི་སྲིང་མོ་གཉིས་ཡོད་འདུག ཁོང་ཆོས་དང་རིག་གནས་ཀུན་ལ་ཐུགས་སྣང་ཆེ་ཞིང་། དགོན་པའི་ཆོ་ག་ཕྱག་ལེན་ལ་སྙིང་རུས་ཆེན་པོས་བློར་འཛིན་དང་ཉམས་ལེན་གནང་མཁན་ཞིག་དང་། གཅོད་ཀྱི་གདམས་པ་ཟབ་མོར་ཉམས་ལེན་སྒོམ་སྒྲུབ་དང་ཆུ་མིག་འགྲིམ་ཏེ་དཀའ་ཐུབ་ལ་རྒྱུན་བཞུགས་གནང་མཁན་ཞིག་ཀྱང་ཡིན་འདུག

ཟླ་འདིའི་ཕྱི་ཚེས་ ༡༡ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༥།༤༠ ཡས་མས་སུ། བོད་མདོ་སྨད་མཚོ་སྔོན་མགོ་ལོག་ཁུལ་པདྨ་མ་རྫོང་ཇོ་ནང་ཨ་སྐྱོང་དགོན་པའི་གྲྭ་ཚེ་རིང་རྒྱལ་ལགས་ཀྱིས། པདྨ་རྫོང་ཐོག་ནས་རང་ལུས་མེར་བསྲེགས་ཀྱིས་རྒྱ་ནག་གཞུང་ལ་ངོ་རྒོལ་གནང།

རྒྱལ་གཅེས་དཔའ་བོ་ཚེ་རིང་རྒྱལ་ལགས་ད་ལྟ་རང་ལོ་ ༢༠ ཡིན་འདུག་ལ། ཁོང་གི་ཕ་མིང་ལ་ཤེར་ཕུན་དང་། མའི་མིང་ལ་རིན་སྒྲོན་ཞུ་བཞིན་ཡོད་འདུག

རང་ལུས་མེར་བསྲེགས་དོན་གཞིས་བྱེད་མཉམ་འཛོམས་ཡོང་ཆེད་ཡིན་ཟེར།

དེ་ཉིན་དགོང་མོའི་དུས་ཚོད་བཅུ་བ་ཡས་མས་སུ་རྒྱལ་གཅེས་དཔའ་བོ་ཨ་སྐྱོང་དགོན་པའི་གྲྭ་བ་ཚེ་རིང་རྒྱལ་ལགས་ཟི་ལིང་སྨན་ཁང་དུ་ཁྱེར་བཞིན་པའི་ལམ་བར་ནས་མཚན་མོའི་བོད་ནང་གི་དུས་ཚོད་ ༡༡ ཡས་མས་སུ་སྐུ་གཤེགས་ཡོད་པ་དང་། ཁོང་སྐུ་མ་གཤེགས་པའི་ཡར་སྔོན་དག་དག་ལ་ཁོང་གིས་ “ངས་དེ་རིང་རང་ལུས་མེར་བསྲེགས་བཏང་དོན་ནི་གཞིས་བྱེས་བོད་མི་མཉམ་འཛོམས་ཡོང་བའི་ཆེད་དུ་ཡིན། ཁྱེད་ཅག་གིས་ཀྱང་བོད་མི་ནང་ཁུལ་མཐུན་སྒྲིལ་བྱ་རྒྱུ་དང་། བོད་ཀྱི་སྐད་དང་ཡི་གེ། དེ་བཞིན་དུ་ཡུལ་སྲོལ་གོམ་གཤིས་སོགས་ལ་བདག་པོ་ཡག་པོ་རེ་རྒྱབ་རྒྱུ་ནི་ངའི་རེ་བ་ཉག་ཅིག་ཡིན། དེ་ལྟར་བྱས་ན་གཞིས་བྱེས་བོད་མི་མཉམ་འཛོམས་བྱུང་ཐུབ་གི་རེད།” ཞེས་སོགས་གསུང་ཡོད་འདུག
ཁོང་སྐུ་གྲོངས་བའི་རྗེས་སུ་མཚན་གྱི་དུས་ཚོད་ ༡༢ ཙམ་ལ་སྐུ་ཕུང་རང་དགོན་དུ་གདན་འདྲེན་ཞུ་ཐུབ་པ་བྱུང་འདུག་ལ། ཇོ་ནང་ཨ་སྐྱོང་དགོན་པའི་གྲྭ་བ་དང་། དེ་བཞིན་དུ་པད་ཡག་དགོན་པ་དང་། སྒོ་མང་དགོན་པ་བཅས་ཀྱི་གྲྭ་བ་བཅས་ཁྱོན་གྲྭ་བ་རྒྱ་ཕྲག་གཉིས་ལྷག་ཇོ་ནང་ཨ་སྐྱོང་དགོན་དུ་འཛོམས་ནས་ཕོ་ལུང་དང་བསྔོ་སྨོན་གསུང་བ་དང་། དེ་རིང་ཡང་གྲྭ་བ་བརྒྱ་ཕྲག་ལྷག་ཅིག་གིས་མུ་མཐུད་དུ་ཇོ་ནང་ཨ་སྐྱོང་དགོན་པར་མཆོད་འབུལ་གསུང་དང་གསུང་བཞིན་པ་རེད་འདུག
ཁ་སང་ཁོང་གིས་རང་ལུས་མེར་བསྲེགས་གནང་བཞིན་པའི་སྐབས་སུ་ས་གནས་རང་ནས་མཐོང་མཁན་མི་མི་སྣས་གནས་ཚུལ་མཁོ་སྤྲོད་བྱས་དོན་ལྟར་ན། ཁོང་གིས་པདྨ་རྫོང་གི་དཀྱིལ་དུ་ཨར་འདམས་གྱིས་བཟོས་པའི་མེ་ཏོག་པདྨ་འདབས་བརྒྱད་ཆེན་པོ་ཞིག་ཡོད་དེའི་ཡར་ནང་ནས་རང་ལུས་མེར་བསྲེགས་བཏང་ཏེ་རྫོང་སྲིད་གཞུང་གི་ཕྱོགས་སུ་གོམ་པ་བཅུ་ཙམ་རྒྱུག་ཡོད་པ་དང་། སྐབས་དེར་ཁོང་གིས་“རྒྱལ་བ་བསྟན་འཛིན་རྒྱ་མཚོ་མཁྱེན།” ཞེས་ཐེངས་བཅུ་ཕྲག་ལྷག་ལ་འབོད་ཀྱིན་ཡོད་པ་གསལ་བོ་གོ་སོང་ཟེར། དེ་རིང་མགོ་ལོག་པདྨ་རྫོང་ཐོག་ཏུ་དམག་མི་འགྲེམ་འཇོག་གིས་རྫོང་གི་ཟམ་ཆེན་དང་། སྒོ་ཆེན་སོགས་སུ་དམ་དྲག་ཤུགས་ཆེར་བྱེད་བཞིན་ཡོད་ཀྱང་། ཨ་སྐྱོང་དགོན་པ་སོགས་སུ་ད་སྐབས་ད་དུང་དམ་དྲག་བྱས་མི་འདུག་ཟེར།                                       

ཞི་ཆུང་ལགས་ཀྱིས་སྐུ་སྲོག་མེར་མཆོད།

ཁ་སང་ཚེས་༢༧ནས་བཟུང་རྔ་པ་ཁུལ་རྔ་པ་རྫོང་སྒོ་མང་ཞིང་མཐའ་བ་སྡེ་བའི་མང་ཚོགས་ཚོས་སྡེ་བའི་ཉེ་འཁྲིས་སུ་གུར་བརྒྱབ་སྟེ་ ‘མན་སྟོན’ ཟེར་བའི་དབྱར་སྐྱིད་ལྟ་བུའི་སྟོན་མོ་ཞིག་བྱེད་མགོ་ཚུགས་ཡོད་པ་དང་། ༼ ལོ་ལྟར་མཐའ་བ་སྡེ་བའི་མི་ཚང་རེ་རེ་ནས་མ་ཎི་གསོག་སྒྲུབ་བྱས་པའི་གྲངས་ཀ་བསྡུ་རུབ་དང་མཉམ་དུ་སྡེ་མི་རྣམས་འཛོམས་ཏེ་སྟོན་མོ་ཞིག་བྱེད་ཀྱིན་ཡོད་འདུག ༽ དེ་རིང་ཉིན་གུང་ཞི་ཆུང་ལགས་སྟོན་མོ་བྱེད་ཡུལ་ནས་རང་ཁྱིམ་དུ་ཕྱིན་ཡོད་ཅིང་། ཕྱི་དྲོའི་ཆུ་ཚོད་ ༤།༣༠ ཙམ་ལ་ཁོང་ཚང་གི་སྒོ་ཁ་ནས་གཟུགས་པོར་མེ་བསྒྲོན་ཏེ་སྐད་འབོད་རྒྱག་བཞིན་གཞུང་ལམ་གྱི་ཕྱོགས་སུ་བརྒྱུགས་ཏེ། གཞུང་ལམ་སྟེང་བསླེབ་གྲབས་ཡོད་སྐབས་ས་ལ་འགྱེལ་ཡོད་འདུག དེ་མ་ཐག་ས་གནས་མང་ཚོགས་ཁོའི་གམ་དུ་བཅར་སྐབས་སྐུ་གྲོངས་ཚར་ཡོད་འདུག

མང་ཚོགས་ཀྱིས་སྐུ་ཕུང་ཁྱིམ་དུ་གདན་འདྲེན་ཞུས་སྐབས་རྒྱ་གཞུང་གི་ཉེན་རྟོག་པ་དང་དམག་མི་ ༡༠༠ ལྷག་འབྱོར་ཏེ་མང་ཚོགས་ལ་འཇིགས་སྐུལ་བྱས་ཏེ་ཕུང་བོ་རྩིས་སྤྲོད་བྱེད་དགོས་པའི་བཙན་བཀའ་བཏང་ཡོད་པ་དང་། རིམ་བཞིན་མང་ཚོགས་ཀྱང་ཇེ་མང་དུ་སོང་སྟེ་ཕྱོགས་གཉིས་བར་གདོང་ཐུག་བྱུང་ལ་ཉེ་སྐབས། སྡེ་བའི་རྒན་པོ་ཚོས་མང་ཚོགས་ལ་ཞུ་བ་བྱས་ཏེ་ཛ་དྲག་གི་གནས་ཚུལ་བྱུང་བཅུག་མེད་ཀྱང་འདས་པོའི་སྐུ་ཕུང་རྒྱ་དམག་གིས་བཙན་འཕྲོག་བྱས་ཡོད་འདུག གནས་ཚུལ་དེ་བྱུང་རྗེས་སྡེ་བའི་མན་སྟོན་ཡང་མཚམས་འཇོག་བྱས་ཡོད་འདུག

ཞི་ཆུང་ལགས་རང་ལོ་ ༤༡ ཡིན་པ་དང་། ཁོའི་སྐྱེས་དམན་གྱི་མིང་ལ་བ་ལོ་ཟེར་ཞིང་རང་ལོ་ ༣༩ ཡིན་འདུག ཁོང་བཟའ་མི་གཉིས་ལ་རང་ལོ་ ༡༨ ཅན་གྱི་བུ་མོ་ཚེ་པོ་ཟེར་བ་ཞིག་དང་། རང་ལོ་ ༡༤ ཅན་གྱི་བུ་ཕུན་ཚོགས་ཟེར་བ་ཞིག་བཅས་བྱིས་པ་གཉིས་ཡོད་འདུག

སྒོ་མང་མཐའ་བ་སྡེ་བས་ཁ་སང་མན་སྟོན་གྲ་སྒྲིག་བྱེད་སྐབས། རྒྱ་ནག་གི་དཔོན་རིགས་དང་ཉེན་རྟོག་པ་མང་པོ་ཞིག་ཀྱང་དེར་འབྱོར་ཏེ་ལྟ་རྟོག་བྱེད་ཀྱིན་ཡོད་པ་དང་། སྐབས་དེར་ཞི་ཆུང་ལགས་ཀྱིས་ཁོ་རང་གི་གྲོགས་པོ་ཞིག་ལ། “རྒྱ་རྒན་འདི་དག་གིས་ང་ཚོ་འདུག་གི་འཇུག་ས་མ་རེད། ངས་ཁོ་ཚོའི་གམ་ནས་རང་ལུས་མེར་བསྲེགས་གཏོང་དགོས་ས་རེད” ཅེས་བརྗོད་ཡོད་འདུག

དེ་རིང་ཉིན་གུང་ཞི་ཆུང་ལགས་ཁྱིམ་དུ་སོང་སྟེ་༧གོང་ས་མཆོག་གི་སྐུ་པར་ཞིག་ཞལ་ཕྱེས་པའི་མདུན་དུ་མཆོད་མེ་ཞིག་བསྒྲོན་རྗེས་རང་ལུས་མེར་བསྲེགས་གནང་ཡོད་འདུག

རྒྱ་ནག་གཞུང་གིས་ཁམས་འབྲི་རུ་རྫོང་ཁོངས་སུ་དར་དམར་བསྒྲེངས་འཛུགས་དགོས་པའི་བཙན་བཀའ་བཏང་བར། མི་མང་གིས་དང་ལེན་མ་བྱས་སྟབས་མི་མང་ལ་དམ་དྲག་དང་འཛིན་བཟུང་བྱས་འདུག

ཕྱི་ཟླ་༩ ཚེས་༡༠ ཉིན་ནས་འབྲི་རུ་རྫོང་ལ་བོད་རང་སྐྱོང་ལྗོངས་དང་ནག་ཆུ་ས་གནས་དང་། དེ་བཞིན། ས་གནས་ཁག་གི་རྒྱ་གཞུང་གི་ལས་བྱེད་༡༨༠༠༠ ལྷག་ཙམ་འབྱོར་ཏེ།  ཡུལ་མི་ཚོར་ཏང་དང་རྒྱལ་ཁབ་ལ་དགའ་ཞེན་དགོས་པ་དང་། རྒྱ་ནག་གི་རྒྱལ་དར་ཁང་ཐོག་ལ་བསྒྲེངས་འཛུགས་དགོས་པའི་བཙན་བཀའ་དང་། བསམ་བློའི་སློབ་གསོ་རྒྱག་མགོ་ཚུགས་ནས་མང་ཚོགས་དང་ལས་བྱེད་བར་མི་མཐུན་པའི་འགལ་ཟླ་མགོ་ཚུགས་ཡོད་འདུག

ངག་དབང་ཐར་པ་ལགས་ཀྱིས་གནས་ཚུལ་བཏང་འབྱོར་ལྟར་ན། ཟླ་ ༩ ཚེས་༢༨ ཉིན་བཙན་ཤེད་ཀྱིས་དར་དམར་འཛུགས་དགོས་པའི་བཀའ་ཕབ་ཡོད་ཀྱང་། མོ་བ་གྲོང་ཚོའི་གྲོང་མི་ཚོས་མི་འདོད་པའི་རྣམ་འགྱུར་བསྟན་ཏེ་དར་དམར་ཚང་མ་ཆུ་ལ་གཡུགས་ཡོད་སྟབས། རྒྱ་གཞུང་གིས་ཉེན་རྟོག་པ་དང་དམག་འབོར་ཆེན་འབྱོར་ཏེ་མང་ཚོགས་དང་དམག་མིའི་བར་གདོང་ཐུག་བྱུང་ནས་ཆུ་ཚོད་༣ རིང་ཕན་ཚུན་རྡོ་དང་མེ་མདའི་དྲག་འཐབ་བྱུང་མཐར་མོ་བ་གྲོང་ཚོ་དང་། སྨོན་ཆེན་གྲོང་ཚོ་ཚང་མ་དམག་གིས་བསྐོར་ཡོད་འདུག ཉིན་དེར་ཉེ་འགྲམ་གྱི་སྟག་ལྷས་གྲོང་དང་། བ་རོ། སྣེ་ཤོད། ཕྲ་རིང་བཅས་ནས་དྲག་གནོན་མ་བྱེད་རོགས་ཞེས་འབོད་སྐུལ་ཞུ་མཁན་བོད་མི་༤༠ རྒྱ་གཞུང་གིས་འཛིན་བཟུང་བྱས་ཡོད་པ་མ་ཟད། མང་ཚོགས་ནང་གནས་ཚུལ་བཟོ་མཁན་དང་ངོ་རྒོལ་བྱེད་མཁན་རྣམས་ཀྱི་ཕྲུ་གུ་སློབ་གྲྭར་འགྲོ་མི་ཆོག་པ་དང་། ནད་པ་སྨན་ཁང་དུ་སྨན་བཅོས་བྱེད་མི་ཆོག་པ། རྗེས་སུ་དབྱར་རྩ་དགུན་འབུ་བརྐོ་བར་འགྲོ་མི་ཆོག་བཅས་ཀྱི་བཙན་བཀའ་བཏང་ཡོད་སྟབས། ས་གནས་དེ་གའི་སློབ་མ་མང་པོ་སློབ་གྲྭ་ནས་ཐོན་ནས་སོ་སོའི་ནང་ལ་ལོག་ཡོད་འདུག

ཚེས་༢༨ དགོང་མོའི་ཆུ་ཚོད་༧ ཙམ་ནས་རྫོང་སྲིད་གཞུང་གི་སྒོ་འགྲམ་དུ་མང་ཚོགས་༡༠༠༠ ལྷག་ཙམ་གྱིས་ཆུ་ཚོད་ཉེར་བཞིའི་རིང་ཉལ་ནས་ཟས་བཅད་ཞི་རྒོལ་གྱི་ལས་འགུལ་སྤེལ་འདུག  ངོ་རྒོལ་བྱེད་མཁན་གྲོས་ཟླ་བ་གཉིས་ལས་མ་སོན་པའི་ཕྲུ་གུ་དམར་འབྱར་སོགས་ཀྱང་ཁྱེར་ནས་འབྱོར་ཡོད་པ་དང་། ལོ་ན་རྒན་ཤོས་ལོ་༨༣བསླེབས་པ་ཡང་ཡོད་འདུག མཚན་མོ་དེར་རང་སྐྱོང་ལྗོངས་ཀྱི་དབུ་ཁྲིད་ཝུ་དབྱིང་ཅིས་དང་ས་གནས་དབུ་ཁྲིད་རྡོ་ཐོགས་བཅས་བསླེབས་ཏེ། འཛིན་བཟུང་བྱས་པའི་མི་སྣ་དེ་དག་ཀློད་གྲོལ་བཏང་ཡོད་འདུག་ཀྱང་། མི་དེ་དག་གི་མགོ་ལུས་ཡོངས་རྫོགས་ལ་ལྕགས་དབྱུག་གཞུས་ནས་རྨས་སྐྱོན་ཚབས་ཆེན་བཏང་ཡོད་པ་དང་། མར་གཏོང་སྐབས་པར་མང་པོ་བརྒྱབ་པ་མ་ཟད། ལག་རིས་སོགས་ཀྱང་པར་བརྒྱབ་ནས་ཀློད་གྲོལ་བཏང་ཡོད་འདུག འཛིན་བཟུང་བྱས་པའི་མི་དེ་དག་ནི་སྟག་ལྷས་དང་། བ་རོ། སྣེ་ཤོད། ཕྲ་རིང་ས་གནས་བཅས་ནས་ཡིན་འདུག

དེ་བཞིན། མོ་བ་གྲོང་དུ་དམག་སྒར་ཆེ་བ་གཅིག་དང་སྨོན་ཆེན། ཕྲ་རིང་བཅས་ལ་དམག་སྒར་ཆུང་བ་ཁག་གཅིག་དང་ཞིབ་བཤེར་ས་ཚུགས་ཁག་༦ ཙམ་བརྒྱབ་ཡོད་འདུག ཟླ་༡༠ ཚེས་༡ ཉིན་བོད་རང་སྐྱོང་ལྗོངས་ཀྱི་ལྷ་ས་དང་། གཞིས་རྩེ། ལྷོ་ཁ་བཅས་ནས་དམག་མི་སྟོང་ཕྲག་མང་པོ་འབྲི་རུར་ཕྱིན་སོང་ཟེར་གྱི་འདུག

ད་དུང་ཉེན་རྟོག་པས་བོད་མི་མང་པོ་ཞིག་ཉིན་རེ་བཞིན་འཛིན་བཟུང་བཙོན་འཇུག་བྱེད་བཞིན་ཡོད་འདུག་ཀྱང་། ཁ་པར་དང་བརྡ་འཕྲིན་གྱི་བརྒྱུད་ལམ་ཡོངས་རྫོགས་བཀག་ཡོད་སྟབས། མི་དེ་དག་ལ་མནར་གཅོད་གང་འདྲ་གཏོང་གི་ཡོད་མེད་ཤེས་རྟོགས་དཀའ་བ་དང་། གྲོང་པ་ཁག་གཅིག་གི་མི་ཚང་རེ་རེའི་སྒོ་ཁར་དམག་མི་བདུན་ནས་བཅུའི་བར་ཉིན་མཚན་རེས་མོས་བཞིན་སྡོད་བཞིན་འདུག་ཟེར། མ་གཞི་ཛ་དྲག་གི་གནས་ཚུལ་འདི་དག་གྲོང་སྡེ་གཅིག་གཉིས་ཤིག་མ་ཡིན་པར་འབྲི་རུའི་ལུང་པ་སྤྱི་ཡོངས་ལ་དཀའ་ངལ་འཕྲད་ཡོད་འདུག

དེང་སྐབས་ཁམས་འབྲི་རུ་རྫོང་དུ་རྒྱ་དམར་གུང་ཁྲན་ཚང་གིས་རིག་གནས་གསར་བརྗེ་ཆེན་མོའི་ལས་འགུལ་སླར་ཡང་བསླེབས་པ་ལྟ་བུ་འདུག་ཅེས་ས་གནས་མང་ཚོགས་ཀྱོས་རྗོད་བཞིན་ཡོད་འདུག ༢༠༠༨ ལོ་ནས་བཟུང་བོད་ས་ཡོངས་ལ་མང་ཚོགས་ཁྲོད་དུ་བཅའ་སྡོད་ལས་བྱེད་འབོར་ཆེན་བཏང་སྟེ། ཏང་ལ་དགའ་ཞེན་དང་རྒྱལ་ཁབ་ལ་དགའ་ཞེན་དགོས་པའི་ཆབ་སྲིད་ཀྱི་དྲིལ་བསྒྲགས་ཤུགས་ཆེན་སྤེལ་བའི་བརྒྱུད་རིམ་ཁྲོད་འབྲི་རུ་རྫོང་ལ་ད་ལྟའི་བར་གྲུབ་འབྲས་གང་ཡང་ཐོན་ཡོད་མི་འདུག

 བོད་མི་ཚོ། བདེན་པའི་རྒྱབ་ལངས་མཛོད་ཅིག

འདི་ལོའི་ཕྱི་ཟླ་ ༣ པའི་ཚེས་ ༡༣ ཉིན་གྱི་བོད་ནང་གི་དགོང་མོའི་ཆུ་ཚོད་༡༡།༣༠ ཡས་མས་སུ་སི་ཁྲོན་ཆེན་ཞིང་རྔ་པ་ཁུལ་མཛོད་དགེ་རྫོང་སྟག་ཚ་གྲོང་རྡལ་དུ། རང་ལོ་༣༠ ཡིན་པའི་རྒྱལ་གཅེས་དཔའ་མོ་དཀོན་མཆོག་དབང་མོ་ལགས་ཀྱིས། རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་གནང་ནས་སྐུ་གྲོངས་མ་ཐག་མཛོད་དགེ་རྫོང་གི་ཉེན་རྟོག་པ་འབྱོར་ཏེ་སྐུ་ཕུང་བཙན་ཁྱེར་བྱས།

ཕྱི་ཚེས་ ༡༤ ཉིན་རྟོག་པས་མོའི་བཟའ་ཟླ་སྒྲོལ་མ་སྐྱབས་ཉེན་རྟོག་ཁང་དུ་སྐད་བཏང་སྟེ་རུས་ཐལ་ཞིག་རྩིས་སྤྲོད་ཀྱིས་དོན་རྐྱེན་དེ་བཟའ་ཚང་ནང་ཁུལ་གྱི་རྙོག་དྲ་ཡིན་པའི་ཁས་ལེན་བྱ་དགོས་པའི་བཙན་བཀའ་བཏང་བར་སྒྲོལ་བ་སྐྱབས་ལཊ་ཀྱིས་ངོས་ལེན་རྩ་བ་ནས་མ་བྱས་པས་ཁོང་མཛོད་དགེ་རྫོང་བཀག་ཉར་ཁང་བཀག

    ཟླ་༨ ཚེས་ ༡༥ ཉིན་རྔ་པ་ཁུལ་འབྲིང་རིམ་མི་དམངས་ཁྲིམས་ཁང་གིས། རང་ལོ་ ༣༣ ཡིན་པའི་སྒྲོལ་མ་སྐྱབས་ཀྱིས་ཆང་རག་བཏུང་རྗེས། རང་ལོ་ ༢༩ ཡིན་པའི་ཁོང་གི་བཟའ་ཟླ་དཀོན་མཆོག་དབང་མོ་དང་འཁོན་འཛིང་ཤོར་རྗེས་སྐེ་དཀྲིས་ཀྱིས་མོའི་སྐེ་བསྡམས་ཏེ་བསད་རྗེས། ཕུང་པོ་མེར་བསྲེཊ་བཏང་ཡོད་སྐོར་རྫུན་བསྒྲགས་ཀྱིས།  སྒྲོལ་མ་སྐྱབས་ལགས་སུ་ཆེད་དུ་མི་བསད་པའི་ཉེས་མིང་བཙན་འགེལ་གྱིས་སྲོག་ཁྲིམས་བཅད་དེ་ཚེ་གང་ཆབ་སྲིད་ཀྱི་ཁེ་དབང་འཕྲོགས་འདུག

སྒྲོལ་མ་སྐྱབས་ལགས་ཀྱིས། ཐེངས་འདིའི་དྲང་བདེན་མིན་པའི་ཁྲིམས་ཆད་དེ་སི་ཁྲོན་ཞིང་ཆེན་མཐོ་རིམ་མི་དམངས་ཁྲིམས་ཁང་ལ་ཞུ་གཏུག་བྱ་རྒྱུ་ཡིན་ཞེས་བརྗོད་ཡོད་པས། དངོས་ཚུལ་དངོས་མཐོང་གི་བོད་མི་ཚོས་བདེན་པའི་རྒྱབ་དཔུང་བྱེད་པའི་དུས་ལ་བབས། མི་མང་འདུ་འཛོམས་ཀྱིས་བདེན་པའི་ཞི་རྒོལ་བྱེད་པའི་དུས་ལ་བབས་སོ།

   སྒྲོལ་མ་སྐྱབས་ལགས་ཀྱི་སྐྱེས་ཡུལ་སི་ཁྲོན་མཛོད་དགེ་བྱམས་མེ་ཕྱུགས་རྭ་སྡེ་བ་ཡིན་པ་དང་། ཁོང་དང་རྒྱལ་གཅེས་དཔའ་མོ་དཀོན་མཆོག་དབང་མོ་གཉིས་ལ་རང་ལོ་༨ ཙམ་གྱི་བུ་མོ་ཞིག་ཡོད་འདུག

ཟླ་༦་ཚེས་ ༡༡ སྐུ་སྲོག་མེར་བསྲེཊ་གནང་མཁན་གྱི་བཙུན་མ་དབང་ཆེན་སྒྲོལ་མ་ལགས་ཚེས་ ༡༤ ཉིན་གྱི་དགོང་དྲོའི་བོད་ནང་གི་ཆུ་ཚོད་ ༨ཙམ་ལ། དར་མདོའི་སྨན་ཁང་ཞིག་ཏུ་གྲོངས།

སྐུ་ཕུང་ཁྱིམ་མིར་མ་སྤྲད་པར་སྨན་ཁང་དེ་གའི་གློག་གི་རོ་སྲེག་ཁང་ཞིག་ནས་བསྲེགས་འདུག ཉིན་དེར་ས་གནས་སྲིད་གཞུང་གི་མི་སྣ་འདས་པོའི་ཁྱིམ་དུ་ཡོང་ནས་བསྔོ་སྨོན་འདས་མཆོད་དུ་ཕེབས་པའི་ས་གནས་སེར་སྐྱ་ཚོ་ལ་བཀག་འགོག་དང་འདས་པོའི་ཁྱིམ་མི་ཚོའི་འགྲོ་འདུག་ལ་སྟངས་འཛིན་བྱེད་བཞིན་ཡོད་འདུག  

བཙུན་མ་དབང་ཆེན་སྒྲོལ་མ་ལཊ་ནི་ཁམས་རྟའུ་རྫོང་མི་ཉག་འདྲ་པ་བྲག་ཐོག་ཡུལ་ཚོ།བྲག་ཐོག་གྲོང་པའི་རྒྱལ་འབུམ་ཚང་ཟེར་བ་ནས་ཡིན་པ་དང་། ཁོ་མོའི་ཕ་མིང་ལ་བསྟན་འཛིན་དང་མ་མིང་ལ་གཡུ་སྒྲོན་ཟེར་བ་དང་། བཙུན་མ་ཁོང་གི་སྐྱ་མིང་ལ་ཚེ་རིང་སྒྲོལ་དཀར་དང་ཆོས་མིང་ལ་དབང་ཆེན་སྒྲོལ་མ་ཞུ་བ་དང་། རང་ལོ་ ༣༡ ཡིན་འདུག དེ་སྔོན་ཁམས་རྟའུ་སྦར་ཞབས་བྲག་དཀར་ཟེར་བའི་གནས་རི་ཞིག་ཏུ་གྲྭ་བཙུན་གཉིས་ལྡན་གྱི་རྙིང་དགོན་ཞིག་ཡོད་པ་དེར་ཆོས་ཞུགས་གནང་ཡོད་འདུག

ཚེས་༢༦ ཉིན་གྱི་བོད་ནང་གི་ཕྱི་དྲོའི་ཆུ་ཚོད་༧ པ་ཙམ་ལ་བོད་མདོ་སྨད་ཀླུ་ཆུ་རྫོང་རྨོག་རི་དགོན་པའི་གྲྭ་དཀོན་མཆོག་བསྟན་འཛིན་ལགས། རང་ལོ་༢༨ ཡིན་པ་ཁོང་གིས་རྒྱ་གཞུང་གིས་བོད་ཐོག་འཛིན་པའི་དྲག་རྩུབ་ཀྱི་སྲིད་བྱུས་ལ་ངོ་རྒོལ་ཆེད་རྨོག་རི་དགོན་པའི་ཉེ་འདབས་ཀྱི་(འདན་ལུང་མདོ་)སུམ་མདོའི་ལམ་ཆེན་ནས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་ཡོད་པ་དང་། དེ་རྗེས་ཁོང་གི་སྐུ་ཕུང་ཡར་དགོན་ནང་དུ་གདན་འདྲེན་བྱས་ཡོད་ཀྱང་རྒྱ་གཞུང་གིས་བཙན་ཕྲོག་བྱེད་པར་དོགས་ནས་མཚན་མོ་དེ་རང་ལ་ཞུགས་འབུལ་བྱས་ཡོད་འདུག
གནས་ཚུལ་དེ་བྱུང་རྗེས་རྨོག་རི་དགོན་པ་དང་ཉེ་འདབས་ཀྱི་གྲོང་པ་ཁག་ཚང་མར་ཉེན་རྟོག་པ་མང་པོ་འགྲེམས་འཇོག་གིས་དམ་བསྒྲགས་ནན་མོ་བྱས་ཡོད་འདུག 
རྒྱལ་གཅེས་པ་ཁོང་ནི་ཀླུ་ཆུ་རྫོང་ཟམ་ཚ་ཡུལ་ཚོའི་རྨོག་རི་སྡེ་བའི་ཕ་ལྷ་ཁོ་དང་། མ་ལྷ་མོ་འཚོ་གཉིས་ཀྱི་བུ་ཡིན་ཞིང་། ཁོང་ལ་ཕ་གཅིག་པའི་མིང་སྲིང་བདུན་ཡོད་པའི་ནང་གི་ཆུང་ཤོས་དེ་ཁོང་ཡིན་འདུག ཁོང་ཆུང་ཆུང་སྐབས་ནས་རྨོག་རི་དགོན་པར་ཆོས་ཞུགས་བྱས་ཏེ་དགོན་པའི་འཆར་ཅན་གྱི་ཆོ་ག་ཕྱག་ལེན་དང་། འདོན་པ་བློ་འཛིན་སོགས་ཀྱི་རིམ་པ་ཚང་མ་མཐར་ཕྱིན་ཏེ། དེང་སྐབས་ཐུན་མོང་བའི་རིག་གནས་ཁག་དང་། ནང་དོན་རིག་པ་སོགས་ལ་སློབ་སྦྱོང་གནང་མུས་ཡིན་འདུག

    ཕྱི་ཚེས་ ༢༥ ཉིན་གྱི་ཞོགས་པར་བོད་མདོ་སྨད་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་སྐྱིད་ཚང་དམེ་ཤུལ་ཤང་གི་ནགས་ཚལ་ཆེན་མོ་ཞིག་ཡོད་པའི་ཉེ་འདབས་སུ། མིང་ལ་ལྷ་མོ་སྐྱབས་ཞུ་བའི་བོད་མི་ཞིག་གིས། རང་ལུས་མེར་བསྲེཊ་ཀྱིས་རྒྱ་གཞུང་གི་དྲག་གནོན་སྲིད་ཇུས་ལ་ངོ་རྒོལ་གནང་སྟེ་སྐུ་གྲོངས་ཡོད་འདུག

གནས་ཚུལ་ཡོང་ཁུངས་ལྟར་ན། རང་ལོ་  ༤༣ ཡིན་པའི་བོད་མི་ལྷ་མོ་སྐྱབས་ལགས་ནི། བོད་མདོ་སྨད་ཀན་ལྷོ་ཁུལ་བླ་བྲང་བསང་ཆུ་རྫོང་དམེ་ཤུལ་ཤང་མཁར་དམར་ཤུལ་སྡེ་བ་ནས་ཡིན་པ་དང་། ཁོང་ནི་བཟའ་ཟླ་མེད་པའི་ཕོ་ཧྲེང་ཞིག་ཡིན་འདུག  ལོ་དུ་མའི་ཡར་སྔོན་ནས་བཟུང་ཁོང་གིས་ནགས་སྲུང་བའི་ལས་ཀ་བྱས་ཏེ།ཀླུ་ཤོད་ཡུལ་ཚོའི་ནན་པན་སྡེ་བའི་མདུན་གྱི་ནགས་ཚལ་ཆེན་པོ་ཞིག་ཡོད་པ་དེའི་ཉེ་འདབས་སུ་འཚོ་སྡོད་བྱས་ཡོད་འདུག

ཁ་སང་ཞོགས་པ་ནམ་མ་ལངས་གོང་ཁོང་གིས་ཤིང་ཆ་སྤུངས་བ་དང་དེའི་ཁྲོད་ས་སྣུམ་བླུགས་རྗེས་རང་ཉིད་དེའི་ཁྲོད་དུ་གསོན་བསྲེགས་བྱས་ཡོད་འདུག་ལ། ཕྱིས་སུ་སྡེ་མི་ཚོས་ཁོང་གི་སྐུ་ཕུང་མེ་རོར་གྱུར་ཏེ་མགོ་བོ་གཅིག་པུ་མ་གཏོགས་གཞན་ཅི་ཡང་ལྷག་མེད་པ་མཐོང་ཡོད་འདུག

གནས་ཚུལ་བྱུང་རྗེས་ས་གནས་སྲིད་གཞུང་གི་མི་སྣ་དང་ཉེན་རྟོག་པ།  དམག་མི་བཅས་གནས་ཚུལ་བྱུང་ཡུལ་དུ་ཡོང་སྟེ་སྐོར་སྲུང་གིས་ཡུལ་མི་ཚོ་ས་གནས་དེར་ཡོང་བཅུག་མེད་པར་མ་ཟད། ས་གནས་ཡུལ་མི་ཚོའི་འགྲོ་སྐྱོད་རང་དབང་ལ་བཀག་སྡོམ་ནན་མོ་བྱེད་ཀྱི་ཡོད་འདུག

ཕྱི་ལོ་ ༢༠༠༩ ལོ་ནས་ད་བར་བོད་ནང་རང་ལུས་མེར་བསྲེཊ་གནང་མཁན་ ༡༡༡ བྱུང་ཡོད་པ་དང་། དེའི་ཁྲོད་ཀྱི་བོད་མི་ ༩༣ འདས་གྲོངས་སུ་གྱུར་ཡོད

རང་ས་རང་ལ་འཐོབ་སླད་དང། རང་རིགས་ཁྱིམ་གཅིག་འདུ་ཕྱིར་དང། ཆོས་རིག་དར་སྤེལ་ཞི་བདེའི་གཞི། སྟོན་མཛད་དབུ་མའི་སྟོན་པར་འདུད།

ལོ་སྟོང་སྔོན་གྱི་རང་བཙན་དང། ད་ལྟའི་ཆོལ་གསུམ་དུམ་བུ་གཉིས། གནམ་སའི་ཆེ་ཆུང་ཤོར་བ་འདི། སྙོམ་ཐབས་དབུ་མའི་ལམ་བུར་སྐྱོད།

གངས་ལྗོངས་རང་དབང་རང་བཙན་དང། རང་ས་རང་རིགས་སྤྱི་དོན་ཆེད། ལུས་སྲོག་ལོངས་སྤྱོད་འབུལ་མཁན་གྱི། རྒྱལ་གཅེས་དཔའ་བོ་རྣམས་ལ་བསྟོད།

ལ་ལས་དབང་དང་ལ་ལས་རྒྱུ། ལ་ལས་ངག་དང་ལ་ལས་ལག བོད་དོན་རྒྱབ་སྐྱོར་གནང་མཁན་གྱི། རྒྱབ་དཔུང་རྣམས་ལ་བཀའ་དྲིན་ཞུ།

ཁོང་གི་ཞལ་ཆེམས།

      བོད་མི་ས་ཡ་དྲུག་གི་ གཙོས་ རྒྱལ་ཕྱི་ནང་གི་བོད་རིགས་སྤུན་ཟླ་ཡོངས་ལ། དེ་སྔ་འདས་སོང་བའི་དཔའ་བོ་ཐུབ་བསྟན་དངོས་གྲུབ་ཀྱི་གཙོས་རྒྱལ་ཕྱི་ནང་གི་དཔའ་ བོ་དཔའ་མོ་ཐམས་ཅད་ཀྱིས། བོད་མི་ཡ་ས་དྲུག་གི་གཞིས་བྱེས་ལྷན་འཛོམས་ཀྱི་ཆེད་དང་། བོད་ཀྱི་བདེ་དོན་ཆེད་དུ་སྐུ་སྲོག་བཏང་བ་ཡིན་པས་ཁོང་རྣམ་པ་ཚང་མར་བཀའ་དྲིན་ ཆེ་ཞུ་བ་དང་ཆབས་གཅིག་ཏུ། བདག་ལྟ་བུར་མཚོན་ན་ད་ལྟ་ལོ་ན་བཞི་བཅུའི་ནང་དུ་སོན་ཡོད་མོད། ད་བར་དུ་དེ་ལྟ་བུའི་སྙིང་སྟོབས་མ་ཡོད་པར་ལྷག་བསྡད་པ་རེད། ཡིན་ན་ཡང་། བོད་ཀྱི་རིག་གནས་ཆེ་བ་ལྔ་དང་། ཆུང་བ་ལྔ་བཅས་དར་སྤེལ་ཙམ་རེ་བྱས་པ་ཡིན།

ད་ལྟ་ནི་དུས་རབས་ཉེར་ གཅིག་པ་ཡིན་ལ། ད་ལོ་ནི་སྐུ་སྲོག་བློས་བཏང་བའི་དཔའ་བོ་དཔའ་མོ་མང་པོ་ཞིག་གཤེགས་སོང་བའི་ལོ་ རེད། དེས་ན་ངས་ཁོང་རྣམ་པར་ལུས་ཤ་ཁྲག་གི་མཚོན་བྱེད་ཙམ་ལས། རང་གི་བྱས་རྗེས་དང་གཟི་བརྗིད་ཙམ་གྱི་ཆེད་མ་ཡིན་པར། སྙིང་ཐག་པ་ནས་སོར་བྱང་སྔགས་གསུམ་དང་། སྔགས་ཀྱི་ནང་ནས་སྔགས་ཀྱི་དམ་ཚིག་གི་གཙོ་བོ་རང་རང་གི་ལུས་དང་སྲོག་བཏང་སྟེ་ འགྱོད་བཤགས་བྱེད་རྒྱུ་དེ་རེད། ཁྱད་པར་དུ་རིས་སུ་མ་ཆད་པའི་སེམས་ཅན་ཐམས་ཅད་ཕ་མར་མ་གྱུར་བ་མེད། མཐའ་མེད་པའི་སེམས་ཅན་དེ་དག་ནི་ཀླ་ཀློ་དང་དེ་ལྟ་བའི་ཆོས་མིན་གྱི་དབང་དུ་སོང་ སྟེ། མི་དགེ་བའི་ལས་ཚབས་ཆེན་བསགས་བཞིན་ཡོད་པས། སྙིང་ཐག་པ་ནས་དེ་རྣམས་ཀྱི་ལས་སྒྲིབ་སྦྱང་ཕྱིར་དང་། གཞན་ཡང་ཤིག་དང་སྲོ་མང་ཡན་ཆོད་དབུགས་ལ་བརྟེན་ཚད་དེ་ནམ་མཁས་གར་ཁྱབ་ཀྱི་སེམས་ ཅན་ཐམས་ཅད་ཀྱིས་འཆི་ཁ་མནར་གཅོད་ཀྱི་སྡུག་བསྔལ་མི་མྱོང་བར་མགོན་པོ་འོད་དཔག་ མེད་པའི་སྐུ་དྲུང་དུ་སྐྱེས་ཏེ། རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་ ཕྱིར་དུ། རང་གི་ཚེ་དང་སྲོག་གི་མཆོད་པ་འདི་ཕུལ་བ་ཡིན།
དེ་ནས་༧གོང་ས་ལྷ་ མིའི་ རྣམ་འདྲེན་༧རྒྱལ་དབང་བསྟན་འཛིན་རྒྱ་མཚོ་དབུ་བཞུགས་པའི་བླ་སྤྲུལ་ཡོངས་རྫོགས་ ཀྱི་སྐུ་ཚེ་ཞབས་པད་བརྟན་ཆེད་རང་གི་ལུས་དང་སྲོག་འདི་མཎྜལ་གྱི་ཚུལ་དུ་ཕུལ་བ་ ཡིན། ས་གཞི་སྤོས་ཆུས་བྱུགས་ཤིང་མེ་ཏོག་བཀྲམས།། རི་རབ་གླིང་བཞི་ཉི་ཟླས་བརྒྱན་པ་འདི།། སངས་རྒྱས་ཞིང་ལ་དམིགས་ཏེ་ཕུལ་བ་ཡིས།། འགྲོ་ཀུན་རྣམ་དག་ཞིང་ལ་སྤྱོད་པར་ཤོག། བདག་གཞན་ལུས་ངག་ཡིད་གསུམ་དུས་གསུམ་དགེ་ཚོགས་བཅས།། རིན་ཆེན་མཎྜལ་བཟང་པོ་ཀུན་བཟང་མཆོད་པའི་ཚོགས་བཅས་པ།། བློ་ཡི་དམིགས་ནས་བླ་མ་དཀོན་མཆོག་གསུམ་ལ་འབུལ།། ཐུགས་རྗེའི་དབང་གིས་བཞེས་ནས་བདག་ལ་བྱིན་གྱིས་བརླབ་ཏུ་གསོལ།། ཨེ་དཾ་གུ་རུ་རདྣ་མཎྜ་ལ་ཁཾ་ནིརྱ་ཏ་ཡ་མི།
ད་ང་རང་གི་མི་སྒེར་ གྱི་ དབང་གིས་འདི་ལྟ་བུའི་ལས་བགྱིས་པ་མ་ཡིན་ལ། འདོད་དང་བསྙེན་བཀུར་གྱི་དབང་གིས་ཡང་འདི་ལྟ་བུ་བྱས་པ་མ་ཡིན། རང་གི་བསམ་པ་རྣམ་པར་དག་པའི་སྒོ་ནས་རང་གི་ཚེ་འདི་སྙིང་སྟོབས་ཆེན་པོས་སྟག་མོ་ ལ་ལུས་ཡོངས་སུ་བཏང་བ་ལྟར་བཏང་བ་ཡིན། དེ་བཞིན་དུ་བོད་ཀྱི་དཔའ་བོ་དཔའ་མོ་རྣམས་ཀྱིས་ཀྱང་དེ་བཞིན་སྲོག་བཏང་བ་ཡིན་ མོད། ལག་ལེན་གྱི་ཐོག་ནས་ཞེ་སྡང་ལྟ་བུའི་ངང་ནས་གཤེགས་སོང་བ་ཡིན་པས་ཐར་ལམ་བགྲོད་ ཐུབ་མིན་དཀའ་མོ་རེད། དེར་བརྟེན་དེ་དག་གི་ལམ་སྣ་འདྲེན་པའི་དེད་དཔོན་དང་། འདི་ལྟ་བུའི་མཆོད་པ་ཕུལ་བའི་དགེ་བའི་མཐུ་ལ་བརྟེན་ནས་མ་འོངས་པར་སེམས་ཅན་ཐམས་ ཅད་རྣམ་མཁྱེན་བླ་ན་མེད་པ་སངས་རྒྱས་ཀྱི་སར་བགྲོད་པའི་སྨོན་འདུན་དང་། རྒྱལ་ཕྱི་ནང་གི་བླ་སྤྲུལ་ཡོངས་ཀྱི་སྐུ་ཚེ་བརྟན་པ་དང་། ཁྱད་པར་དུ་༧རྒྱལ་དབང་བསྟན་འཛིན་རྒྱ་མཚོ་མི་འཇིགས་གདོང་ལྔའི་ཁྲི་ལ་མངའ་གསོལ་ ཏེ། བོད་ཀྱི་ཆོས་སྲིད་གཉིས་ཀྱི་མངའ་བདག་ཏུ་བཞུགས་པའི་སྨོན་འདུན་དུ། གངས་རིའི་ར་བས་བསྐོར་བའི་ཞིང་ཁམས་འདིར།། ཕན་དང་བདེ་བ་མ་ལུས་འབྱུང་བའི་གནས།། སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི།། ཞབས་པད་སྲིད་མཐུའི་བར་དུ་བརྟན་གྱུར་ཅིག། འཕྲིན་ལས་ནམ་མཁའ་ལྟ་བུར་ཁྱབ་པར་ཤོག།
སྨོན་ལམ་ལོག་པའི་ རྒྱལ་ བའི་བསྟན་པ་ལ།། འཁུ་བའི་ནག་ཕྱོགས་གཟུགས་ཅན་གཟུགས་མེད་སྡེ།། བསམ་སྦྱོར་ངན་པའི་འཇུག་པ་མ་ལུས་པ།། མཆོག་གསུམ་བདེན་པས་རྩད་ནས་གཅོད་གྱུར་ཅིག། ༼འདི་ལྟར་བགྱིས་པའི་རྣམ་དཀར་སོགས་ཤོ་ལོ་ཀ་གཉིས་དང་། སྨོན་ལམ་རྒྱལ་པོ་འདི་དག་སོགས་ཤོ་ལོ་ཀ་གཅིག འདི་དང་དུས་གསུམ་སོགས་ཤོ་ལོ་ཀ་གཅིག ཏདྱཐ། པཎྩ་ཏྲི་ཡ་ཕྱག་འཚལ་བའི་གཟུངས་ལན་གསུམ་གསུང་འདུག༽
ཡ་དེ་ནས་རྡོ་རྗེའི་ སྤུན་ གྲོགས་རྣམས་དང་། ཕྱོགས་སོ་སོ་ན་ཡོད་པའི་དད་ལྡན་ཡོངས་ལ་ཞུ་རྒྱུ་ཞིག་ལ། ཐམས་ཅད་ཀྱིས་མཐུན་སྒྲིལ་ལག་སྡང་སྤྲེལ་ནས་བོད་མི་རིགས་ཟེར་བ་འདི་མ་འོངས་པར་ འོད་སྟོང་འབར་བའི་གཟི་བྱིན་ཅན་གྱི་རྒྱལ་ཁབ་ཞིག་ཏུ་བསྐྲུན་ཐུབ་རྒྱུ་འདི་དཔའ་ བོ་དཔའ་བོ་རྣམས་ཀྱི་ཐུགས་བཞེད་ཡིན། དེས་ན་ཁྱེད་རྣམས་ཀྱིས་ཁ་མཐུན་གྲོས་ཀྱི་སྒོ་ནས་ནང་ཁུལ་ནས་ས་རྩོད་དང་ཆུ་རྩོད་ ལ་སོགས་པ་མི་དགོས་པའི་བྱ་བ་ངན་རིགས་མི་བྱེད་པར་མཐུན་པའི་ལམ་ནས། ལོ་ཆུང་རྣམས་ཀྱིས་བཅུ་ཕྲག་རིག་གཞུང་ལ་སྦྱང་བརྩོན་དང་གཅེས་སྤྲས་བྱོས། ལོ་ལོན་རྣམས་ཀྱིས་རང་རང་གི་ལུས་ངག་ཡིད་གསུམ་དགེ་བ་ལ་བཀོལ་ཏེ། བོད་མིའི་ཡུལ་སྲོལ་དང་གོམས་གཤིས་དང་། སྐད་ཡིག་སོགས་ཉམ་དུ་མི་འཇུག་པར་བོད་མིའི་ངོ་བོ་རྒྱུན་འཛིན་ཐུབ་པ་དགོས། དེ་བཞིན་དུ་བོད་མིའི་བདེ་དོན་དང་། སེམས་ཅན་ཐམས་ཅད་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་ཆེད་ཆོས་རྣམ་པར་དག་པ་ ཞིག་བསྒྲུབ་རྒྱུ་གལ་ཆེན་པོ་རེད། བཀྲ་ཤིས་བདེ་ལེགས།
དེ་ནས་ང་རང་གི་འཁོར་ སྡེ་ བརྒྱད་དང་། ཡུལ་བ་དང་ཉེ་རིང་ཡོངས་སུ་རྫོགས་པ། གཙོ་བོ་༼མི་ཞིག་གི་མིང་ནས་སྨྲོས་ཀྱང་མི་གསལ།༽སོགས་འདི་དག་ཚང་མར་ཞུ་རྒྱུར། ང་རང་ལ་རྒྱུ་ཁབ་སྐུད་ཙམ་ཡང་མེད། གང་ཡོད་པ་ཚང་མ་སྔོན་མ་ནས་ཆོས་ཕྱོགས་སུ་བཏང་ཚར། རྗེས་སུ་ཅིག་ཅིག་ན་སྒོར་ཁྲི་མང་པོ་ཡོད་ཟེར་བ་དང་། ཅིག་བྱས་པ་རེད་ཉུག་བྱས་པ་རེད་སོགས་བཤད་རྒྱུ་གཏམ་རྒྱུ་གང་ཡང་མེད་པས། ཤ་ཕུ་ནུ། གཉེན་ཉེ་འབྲེལ་ཡོངས་དང་། ཡུལ་སྡེ་ཕྱོགས་སོ་སོ་ན་ཡོད་པའི་སྦྱིན་བདག་ཚང་མས་དེ་དོན་ཡིད་ལ་འཇགས་པར་ཞུ་ ཞུ།
དེ་མིན་བར་འདུག་བྱས་ཡོད་ པ་དང་། བཅའ་དངོས་གཞན་པ་རྣམས་སྦྱིན་བདག་རྣམས་ཀྱིས། ཡུལ་སྡེ་མི་སྡེ། བླ་སྤྲུལ་སུ་ཡིན་ལ་ཡག་པོ་ཞིག་སྤྲོད་རྒྱུ་རེ་བ་ཡིན།
དེ་ནས་རང་གཞན་གཉིས་ ཀྱིས་ དུས་གསུམ་དུ་བསགས་པའི་དགེ་རྩ་ཐམས་ཅད་མ་རྒན་སེམས་ཅན་ཐམས་ཅད་དང་། སྒོས་སུ་དམྱལ་ཁམས་སོགས་ན་སྡུག་བསྔལ་མྱོང་བཞིན་པ་རྣམས་ཐར་བ་ཐོབ་ཕྱིར་བསྔོ་ སྨོན་འདི་ལྟར་མཛོད། ༼སྨོན་ལམ་རྒྱལ་པོ་སོགས་ཤོ་ལོ་ཀ་གཅིག་དང་། འདི་དང་དུས་གསུམ་སོགས་ཤོ་ལོ་གཅིག་གསུང་འདུག༽
ད་རྒྱལ་ཕྱི་ནང་གི་ ཆོས་ གྲོགས་ཕོ་མོ་ཡོངས་ལ་ངས་ཞུ་རྒྱུ་ཞིག་ལ། ཁྱེད་ཅག་གི་ཐུགས་མ་ཕམ། བླ་མ་དགེ་བའི་དགེ་གཉེན་ལ་གསོལ་བ་རྩེ་གཅིག་ཏུ་ཐོབས་དང་། ཇི་སྲིད་བྱང་ཆུབ་མ་ཐོབ་བར་དུ་སྐད་ཅིག་ཙམ་ཡང་འབྲལ་བ་མེད། དེ་བཞིན་དུ་རྒ་རྒས་རྣམས་དང་། མང་ཚོགས་ཚང་མར་དེ་བཞིན་ཡིན། སྐྱིད་ན་སྡུག་ན། ཡག་ན་ཉེས་ན། བཟང་ན་ངན་ན་སྐྱབས་དཀོན་མཆོག་གསུམ་མ་གཏོགས་རེ་ས་ཡོད་ནི་མ་རེད། དེ་ཁྱེད་རྣམས་ཀྱིས་བརྗེད་མི་ཉན། བཀྲ་ཤིས་བདེ་ལེགས།

སྒྲ་ཐག་ལས་ཡི་གེར་ཕབ་མཁན། མཁན་པོ་ངག་དབང་རྡོ་རྗེ།

 སྐྱབས་སུ་མཆི། ངོ་མཚར་རྨད། རྗེས་སུ་ཡི་རང་མངོན་པར་བསྟོད།

ཇི་ལྟར་སྨོན་པ་བཞིན་དུ་འགྲུབ་པར་སྨོན།།

སྐུ་སྲོག་མེར་མཆོད་དཔའ་རྒོད་དགུ་འགྲུབ།

     དེ་རིང་ཟླ་༡༠་ཚེས་༥ སྔ་དྲོའི་བོད་ནང་གི་ཆུ་ཚོད་ ༡༠།༣༠ ཙམ་ལ་བྱང་ནག་ཆུའི་ཁྲོམ་གཞུང་དུ། ནག་ཆུ་འབྲི་རུ་རྫོང་ཤག་ཆུ་གྲོང་བརྡལ་ཡུངས་དཀར་ལྷའི་གྲོང་ནས་ཡིན་པའི་རང་ལོ་ ༤༣ ཡིན་པ་དགུ་འགྲུབ་ཞུ་བ་ཁོང་གིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག

ཁོང་གིས་སྐུ་ལུས་མེར་ལ་བསྒྲོན་ཏེ་"བོད་ལ་རང་དབང་དགོས། རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས "ཞེས་སྐད་འབོད་ཤུགས་ཆེན་པོ་གནང་ཡོད་འདུག་ལ། དེ་མ་ཐག་རྒྱ་གཞུང་གི་ཉེན་རྟོག་པ་བསླེབས་ཏེ་རྩུབ་སྤྱོད་དྲག་པོས་མེ་གསོད་ཐབས་བྱས་ཏེ་སྨན་ཁང་དུ་འཁྱེར་ཡོད་ཀྱང་། ཁོང་གི་གཟུགས་པོའི་མེ་འབར་ཤུགས་ཧ་ཅང་ཆེན་པོ་ཆགས་ཡོད་སྟབས་མྱུར་སྐྱོབ་མ་ཐུབ་པར་སྨན་ཁང་ནས་སྐུ་གྲོངས་ཡོད་པའི་གནས་ཚུལ་ཐོན་འདུག་ལ། ད་སྔ་སྐུ་ཕུང་ཡང་ནང་མིར་རྩིས་སྤྲོད་བྱས་ཡོད་མི་འདུག

དགུ་འགྲུབ་ལགས་ནི་དེ་སྔ་རྒྱ་གར་ནང་ཡོང་སྟེ་སློབ་གཉེར་གནང་མྱོང་ཡོད་འདུག་པ་མ་ཟད་ནམ་རྒྱུན་བོད་པའི་ལ་རྒྱའི་སྐོར་གྱི་རྩོམ་ཡིག་འགའ་རེ་ཡང་སྤེལ་མྱོང་མཁན་ཞིག་ཡིན་འདུག

     ཟླ་༨་ཕྱི་ཚེས་ ༢༧ ཉིན་གྱི་བོད་ནང་གི་ཞོགས་པའི་ཆུ་ཚོད་ ༨།༣༠ ཙམ་ལ་བོད་མདོ་སྨད་རྔ་པ་རྫོང་མཁར་དུ་ཡོད་པའི་ཀིརྟི་དགོན་པའི་ཤར་ཕྱོགས་ཀྱི་སྒོ་ཆེན་འགྲམ་ནས་རྔ་པ་ཀིརྟི་དགོན་པའི་རང་ལོ་ ༡༨ ཡིན་པའི་གྲྭ་བློ་བཟང་སྐལ་བཟང་། རྔ་པ་རྫོང་གཅའ་ཞང་རྭ་རུ་བའི་ཚེ་པོ་ཚང་གི་རང་ལོ་ ༡༧ ཡིན་པའི་བུ་(མི་སྐྱ་)དམ་ཆོས་གཉིས་ཀྱིས་རང་ལུས་མེར་བསྲེགས་བཏང་སྟེ། རྒྱ་གཞུང་གིས་བོད་ཐོག་འཛིན་པའི་མི་རིགས་རྩ་མེད་དུ་གཏོང་རྒྱུའི་སྲིད་བྱུས་ལ་ངོ་རྒོལ་སྐད་འབོད་གནང་ཡོད་འདུག

སྐབས་དེར་ཐག་རིང་ཙམ་ནས་མཐོང་འདུག་པར་ཁོང་གཉིས་གོམ་པ་ ༢༠ ཙམ་ལ་མེ་འབར་བཞིན་དུ་རྒྱུག་ཡོད་པ་དང་། མཐར་ཐང་ལ་འགྱེལ་ཡོད་འདུག མེ་ལྕེའི་དབུས་ནས་ཀི་སྒྲ་ཙམ་ནས་འབོད་ཚིག་ག་རེ་བསྒྲགས་ཡོད་མེད་གསལ་པོ་ཤེས་རྟོགས་མ་ཐུབ། དེ་རྗེས་ཉེན་རྟོག་པ་སོགས་སླེབས་ཏེ་ཁོང་གཉིས་ལུས་ཀྱི་མེ་བསད་ནས་རྔ་པའི་སྨན་ཁང་དུ་ཅུང་ཙམ་རིང་བཞག་རྗེས་འབར་ཁམས་ལ་ཁྲིད་ཡོད་འདུག

དགོང་མོ་ཤེས་རྟོགས་བྱུང་བར་ཁོང་གཉིས་ཀ་འདས་གྲོངས་སུ་གྱུར་ཡོད་པ་དང་། ཁོང་གཉིས་ཀྱི་སྐུ་ཕུང་འབར་ཁམས་ལ་ཁྱེར་ཡོད་ཅིང་ནང་མིར་སྤྲད་ཡོད་མེད་ཤེས་རྟོགས་མ་ཐུབ།

གནས་ཚུལ་དེ་བྱུང་རྗེས་གྲྭ་བློ་བཟང་སྐལ་བཟང་ལགས་ཀྱི་ཤག་གཅིག་པ་གྲྭ་བློ་བཟང་དཔལ་ལྡན་ཉེན་རྟོག་པས་འཛིན་བཟུང་བྱས་ཡོད་འདུག བློ་བཟང་སྐལ་བཟང་གི་ཕ་མིང་ལ་ཚེ་ཁོ་རྡོ་རྗེ་དང་། མ་མིང་སངས་རྒྱས་སྒྲོན། སྤུན་ཆེ་བ་ཚེ་ཁོ་བཀྲ་ཤིས་བཅས་ནང་མི་གསུམ་ཡོད་འདུག

གཅའ་ཞང་རྭ་རུ་བའི་ཚེ་པོ་ཚང་གི་དམ་ཆོས་ཀྱི་ཕ་མིང་ལ་མདོ་ཤིས་བློ་བྷེ་དང་། མ་མིང་ལ་ཚེ་པོ་ཡིན་ཞིང་ཕ་མ་གཉིས་ཁ་ཁ་བྱས་ཏེ་ཁོང་ཨ་མ་དང་མཉམ་དུ་ཡོད་ཅིང་། ཤུལ་དུ་ཨ་མ་གཅིག་པུ་ལས་ནང་མི་གཞན་མེད། ཁོང་ནི་གྲྭ་བློ་བཟང་སྐལ་བཟང་གི་ཚ་བོ་དང་། འདི་ལོའི་ཕྱི་ཟླ་ ༢ ཚེས་ ༡༡ ཉིན་རྔ་པའི་མ་མའི་བཙུན་དགོན་ནས་རང་ལུས་མེར་སྲེག་གིས་འདས་གྲོངས་སུ་གྱུར་པའི་རྒྱལ་གཅེས་དཔའ་མོ་བཙུན་མ་བསྟན་འཛིན་ཆོས་སྒྲོན་གྱི་ཕ་མ་གཅིག་པའི་སྤུན་ཆུང་བ་ཡིན་ཞིང་། བསྟན་འཛིན་ཆོས་སྒྲོན་ཨ་ཕའི་ཁྱིམ་དུ་ཡོད་སྟབས་མིང་སྲིང་གཉིས་ཁྱིམ་ཁ་ཁ་བྱས་ནས་ཡོད། ཁོང་དེ་སྔོན་རྔ་པ་ཀིརྟི་དགོན་པར་གྲྭ་པ་བྱས་ཤིང་རྗེས་སུ་སྐྱ་སར་བབ་ནས་ཨ་མ་དང་མཉམ་དུ་འབྲོག་ལས་བྱས་ནས་བསྡད་ཡོད་འདུག

འབྲོག་སྡེ་རྭ་རུ་བ་ནི་རྔ་པ་རྫོང་མཁར་གྱི་ཤར་ཕྱོགས་སུ་སྤྱི་ལེ་ ༧༠ ཙམ་གྱི་སར་ཡོད་ལ། ཕྱི་ལོ་ ༡༩༥༩ ལོའི་ཡར་སྔོན་དུ་རྨེའུ་རུ་གཤོག་ཀ་བདུན་གྱི་ནང་ཚན་གྱི་གཤོག་ཀ་གཅིག་ཡིན་མོད། རྗེ་སུ་རྒྱ་གཞུང་གིས་བཅད་བཟུང་བྱས་རྗེས་གཅའ་ཞང་ཟེར་བའི་ཁོངས་སུ་བསྡུས་ཡོད་པའི་འབྲོག་སྡེ་ཞིག་ཡིན་འདུག

སྐུ་སྲོག་མེར་མཆོད་དཔའ་མོ་སྒྲོལ་དཀར་སྐྱིད།

རང་ལོ་༢༦། གཙོས་རྟ་གསར། ཨ་འབྲུག་རྒྱལ་མཁར། ཨ་སངས་རྒྱས་མཚོ།

དེ་རིང་ཚེས་༠༧་ཉིན་རྒྱབ་བོད་ནང་གི་ཆུ་ཚོད་ ༢།༣༠ ཙམ་ལ་ཨ་མདོ་ཀན་ལྷོ་ཁུལ་གཙོས་གྲོང་ཁྱེར་གྱི་ཉེ་འདབས་སུ་ཡོད་པའི་གཙོས་དགོན་པའི་གཡས་ངོས་ཀྱི་གླིང་སྐོར་ལམ་གྱི་མཆོད་རྟེན་མདུན་དུ་སྐུ་སྲོག་མེར་མཆོད་གནང་ནས་སྐུ་འདས།

 " བུ་མོ་དེས་མེར་བསྲེགས་གཏོང་སྐབས་སྐད་འབོད་ཤུགས་ཆེན་པོ་གནང་གི་འདུག ཉེ་འཁོར་གྱི་མི་ཚོས་བུ་མོ་དེས་༧རྒྱལ་བ་རིན་པོ་ཆེ་བོད་ནང་ཕེབས་འཇུག་དགོས། བོད་མི་རིགས་ལ་རང་དབང་དགོས་ཞེས་སྐད་འབོད་བྱས་སོང་ཟེར། "

སླུ་སྲོག་མེར་མཆོད་དཔའ་རྒོད་བློ་བཟང་ཚུལ་ཁྲིམས་ལགས།

 ལོ་༢༡། རྔ་བ་ཀིརྟི་དགོན་པའི་གྲྭ་བ། 

 ཟླ་༧་ཚེས་༦ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༥ དང་སྐར་མ་ ༥ ཙམ་ལ་ཀིརྟི་དགོན་པའི་ཉེ་འདབས་ཀྱི་དཔའ་བོའི་སྲང་ལམ་ནས་རང་ལུས་མེར་བསྲེས་ཀྱིས་སྐད་འབོད་བྱེད་བཞིན་ཁྲོམ་གཞུང་དུ་རྒྱུགས་སྐབས་དྲག་ཆས་ཉེན་རྟོག་པ་དང་། དམིགས་བསལ་ཉེན་རྟོག་པ་བཅས་ཀྱིས་མེ་གསོད་ཡོ་ཆས་སྤྱད་དེ་ཁོང་གི་ལུས་སྟེང་གི་མེ་བསད་རྗེས་རྔ་པ་རྫོང་སྨན་ཁང་དུ་འཁྱེར་ཅིང་དེ་ནས་ཀྱང་ས་གནས་གཞན་ཞིག་ཏུ་འཁྱེར་ཡོད་འདུག

ཁོང་ནི། རྔ་པ་རྫོང་གཅའ་ཞང་རྭ་རུ་བའི་རྗའ་དར་ཚང་གི་མ་སྒྲོན་དཀར་སྐྱིད་ཀྱི་བུ་ཡིན་འདུག་ལ། ཆུང་བའི་དུས་ནས་རྔ་པ་ཀིརྟི་དགོན་པའི་ཆོས་སྒོར་ཞུགས་ཡོད་པ་དང་།  ༢༠༠༨ ལོར་རྒྱ་གཞུང་ཉེན་རྟོག་པས་དགོན་པའི་ནང་ནས་འཛིན་བཟུང་གིས་གཅར་རྡུང་མནར་གཅོད་དྲག་པོ་བཏང་ཡོད་འདུག ཁོང་ཐོས་བསམ་གླིང་གྲྭ་ཚང་གི་རྟགས་རིགས་འཛིན་གྲྭ་ཡིན་པ་དང་། ཁོང་རྒྱུན་དུ་ལག་རྩེད་སྤོ་ལོ་རྩེད་རྒྱུར་དགའ་མོས་ཆེན་པོ་ཡོད་མཁན་ཞིག་ཡིན་པར་མ་ཟད། རྔ་པའི་ནང་གི་ལག་རྩེད་སྤོ་ལོའི་རུ་ཁག་ཅིག་གི་ཚོགས་མི་ཡང་ཡིན་འདུག

བོད་དོན་ཆེད་སྐུ་ལུས་མེར་བསྲེགས་གཏོང་མཁན་སྤྲུལ་བསོད་བྷའི་ལོ་རྒྱུས་མདོར་བསྡུས།

སྐུ་གཤེགས་པ་སྤྲུལ་སྐུ་བསོད་བྷ་ནི་མགོ་ལོག་ཁུལ་དགའ་བདེ་རྫོང་སྟོང་སྐྱབས་དགོན་པའི་སྐྱ་ཤུལ་ཐུབ་རྒྱམ་གྱི༌ཡང་སྲིད་ཡིན་འདུག་ལ། ༢༠༡༢ལོའི་ཟླ་༡ཚེས་༨ཀྱི་ཞོགས་པ་སྐུ་ཉིད་ཀྱི་རང་ལུས་ལ་མེ་སྦར་ནས་འདས་གྲོངས་སུ་སོང་འདུག ད་ལོ་ཁོང་དགུང་ལོ་༤༢ཡིན་འདུག
ཁོང་གིས་མགོ་ལོག་ཁུལ་དར་ལག་རྫོང་ཐོག་ཏུ་རྒན་བགྲེས་ཕོ་མོ་༢༠༠ལྷག་བདག་པོ་བརྒྱབས་ནས་ཁང་བ་གསར་བ་བརྒྱབས། གོ་སྐབས་ནམ་ཡོད་ལ་ཆོས་བཤད་པ་དང་རོགས་སྐྱོར་བྱས་དང་བྱེད་བཞིན་ཡོད་པར་མ་ཟད། ད་དུང་དར་གྱི་ས་ནག་ཏུ་བགྲེས་སོང་༢༠་སྐོར་ཞིག་ཡང་བདག་པོ་བརྒྱབས་བཞིན་ཡོད་འདུག ༢༠༡༡ལོའི་ཕྱི་ཟླ་༨པའི༌ནང་སྟོང་སྐྱབས་དགོན་ཐོག་ཏུ་སློབ་ཆུང་སློབ་གྲྭ་ཞིག་གསར་འཛུགས་བྱས་ཏེ་བྱིས་པ་བདག་མེད་དང་། སློབ་གྲྭར་གཏོང་བའི་ཆ་རྐྱེན་མེད་པ་རྣམས་ལ་སློབ་སྤྱོང་གི་གོ་སྐབས་ཞིག་ཀྱང་བསྐྲུན་ཡོད་འདུག སྐུ་ཉིད་སྔར་རྒྱ་གར་ལ་ཐེངས་གསུམ་བྱོན་མྱོང་ཡོད་ལ། ད་ལོ་ཡང་དུས་འཁོར་དབང་ཆེན་ལ་ཕེབས་འཆར་ཡོད་ནའང་། དགའ་བདེ་རྫོང་ཉེན་རྟོག་ལས་ཁུངས་ནས་ཆོག་མཆན་སྤྲད་མེད་པར་མ་ཟད་ཐེངས་འགར་བཀག་ཉར་དང་སུན་བཅར་བྱས་འདུག
༢༠༡༢ལོའི་ཕྱི་ཟླ་༡ཚེས་༨ཀྱི་ཞོགས་པར་རང་ལུས་ལ་མེ་སྦར་ཏེ་ལག་པར་བོད་ཀྱི་རྒྱ་དར་བཟུང་ནས་དར་ལག་རྫོང་གི་ཉེན་རྟོག་ལས་ཁུངས་ཀྱི་སྒོར་སོང་ནས་བོད་ལ་རང་བཙན་དགོས། རྒྱལ་བ་རིན་པོ་ཆེ་མྱུར་དུ་བོད་ལ་ཕེབས་དགོས། རྒྱལ་བ་རིན་པོ་ཆེ་ཁྲི་ལོར་བརྟན་པར་ཤོག་ཅེས་ཁ་དབྱངས་སྒྲོག་བཞིན་འདས་གྲོངས་སུ་སོང་ཡོད་འདུག་ལ། སྐབས་དེར་ཉེན་རྟོག་སླེབ་ནས་སྐུ་ཕུང་བཙན་ཁྱེར་བྱས་ཡོད་མོད། དར་ལག་རྫོང་དང་དགའ་བདེ་རྫོང་གི་བོད་མི་ ༥༠༠༠ ཡས་མས་ཤིག་མཉམ་འཛོམས་ཀྱིས་རྫོང་ཉེན་རྟོགས་ལས་ཁུངས་ནས་སྐུ་ཕུང་ཕྱིར་འཕྲོག་འདུག དེའི་རྗེས་སུ་ཤེས་རྟོགས་ལྟར་ན་ད་ལྟའི་བར་དུ་རྫོང་ཉེན་རྟོག་པས་རྩད་གཅོད་བྱས་མི་འདུག

      བཙུན་མ་དཔལ་ལྡན་ཆོས་མཚོ་ལགས་ཀྱིས་ཁམས་རྟའུ་བྱང་ཆུབ་རྣམ་རྒྱལ་མཆོད་རྟེན་གྱི་ཉེ་འགྲམ་དུ་མི་མང་གིས་སྨྱུང་གནས་ཚོགས་ཏེ་གྲོལ་ལ་ཉེ་བ་དང་བསྟུན། ཐོག་མར་སྣུམ་མཆོད་པ་དང་དེ་ནས་ཉེ་སྔོན་རྒྱལ་གཅེས་དཔའ་བོ་རྟའུ་ཚེ་དབང་ནོར་བུ་ ལགས་ཀྱིས་སྐུ་ལུས་ལ་མེར་བསྒྲོན་པའི་ས་ཆ་དེར་ཕྱིན་ཏེ་སྐུ་ལ་མེ་བསྒྲོན་ཏེ་མི་མང་གི་ཁྲོད་དུ། “བོད་ལ་རང་དབང་དགོས། ༸གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག ༸གོང་ས་མཆོག་བོད་ལ་གདན་ཞུ་བྱེད་དགོས”སོགས་ཀྱི་སྐད་འབོད་གནང་ནས་གྲོངས་འདུག

ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཁམས་དཀར་མཛེས་རྟའུ་ཉ་མཚོ་དགོན་པར་ས་གནས་མི་མང་ཆིག་ཁྲི་ཙམ་འཛོམས་ཏེ་མྱ་ངན་ཞུ་བཞིན་ཡོད་འདུག

ས་གནས་དེ་ཁུལ་དུ་ཉིན་འདི་གར་རྒྱ་ནག་གི་ཉེན་རྟོག་པ་དང་དམག་མི་འབོར་ཆེན་འགྲེམས་འཇོག་གིས་དམ་དྲག་ཤུགས་ཆེན་བྱེད་བཞིན་ཡོད་སྟབས། དེ་རིང་ས་གནས་བོད་མི་ཆིག་ཁྲི་ཙམ་འཛོམས་ཏེ་གནས་ཚུལ་ཧ་ཅང་ཛ་དྲག་ཆགས་ཡོད་འདུག

བསྟན་དང་དེ་འཛིན་ཆབ་སྲིད་རང་རིགས་སླད། །

གཅེས་པའི་ལུས་སྲོག་ལོངས་སྤྱོད་ཡོངས་བཏང་སྟེ། །

དཀའ་བ་བརྒྱ་ཕྲག་བསྒྲུབས་པའི་སྐྱེ་བོ་རྣམས། །

གྲུ་འཛིན་མགོན་དེས་ཐུགས་རྗེས་སྐྱོང་བར་མཛོད།

ཡིད་བཞིན་ནོར་བུའི་གསུང།

       ཀྱེ་མ་ཀྱི་ཧུད། ད་ནི་དཔའ་བོའི་ཚེ་སྲོག་གི་མཆོད་སྦྱིན་འདི་མཚམས་འཇོག་རྒྱུ་མིན་པ་འདྲ། གལ་ཏེ་ད་དུང་མུ་མཐུད་འདི་ལྟར་ཚེ་སྲོག་བློས་གཏོང་གནང་ངེས་ན་རང་གི་དགོས་དོན་ དང་རེ་བ་སོགས་གསལ་བོ་ཞིག་བསྒྲགས་རྒྱུ་ཧ་ཅང་གལ་ཆེ། དཔེར་ན་དར་ཡིག་དང་སྦྱར་ཡིག ཡིག་ཆ་གཏོར་བ་བཅས། ད་དུང་པར་རྒྱག་མཁན་ཡང་གྲ་སྒྲིག་དགོས། དེ་འདྲ་བྱུང་ན་རྒྱལ་སྤྱིའི་ཐོག་ལ་གསལ་བསྒྲགས་བྱེད་པར་ཕན་ནུས་ཆེན་པོ་ཐོན་ ཐུབ།

ཕྱི་ཟླ་ ༡༠ པའི་ཚེས་ ༡ ཉིན་ཏེ་རྒྱ་ནགརྒྱལ་ཁབ་དབུ་བརྙེས་པའི་ཉིན་མོ་དང་བསྟུན་ཏེ། དཀར་མཛེས་བོད་རིགས་རང་སྐྱོང་ཁུལ་གསེར་རྟ་རྫོང་ཐོག་ཏུ་བོད་དོན་སྐོར་གྱི་ཡིག་ཆ་གང་མང་ཞིག་འགྲེམས་གཏོར་བྱས་ཡོད་པ་དང་། ཉིན་གུང་ཆུ་ཚོད་ ༡༢ ཙམ་ལ་ས་གནས་བོད་མི་ཞིག་གིས་རྫོང་གི་ཁྲོམ་གཞུང་དུ་ཡིག་ཆ་འགྲེམས་གཏོར་བྱེད་བཞིན། བོད་ལ་རང་དབང་དགོས་པ་དང་། ༧རྒྱལ་བ་རིན་པོ་ཆེ་བོད་ལ་གདན་ཞུ་དགོས་པའི་ཞེས་པའི་སྐད་འབོད་གནང་ཡོད་འདུག ཁོང་གིས་སྐད་འབོད་གནང་སྐབས་ས་གནས་བོད་མི་ ༢༠༠ ལྷག་གིས་ལས་འགུལ་དེར་མཉམ་ཞུགས་བྱས་འདུག

ཟླ་འདིའི་ཕྱི་ཚེས་ ༡ ཉིན་སྟེ། རྒྱ་ནག་གི་རྒྱལ་སྟོན་དུས་ཆེན་དུ་སྟབས་བསྟུན་ཏེ་བཞུགས་སྒར་བོད་ཀྱི་འགྲེམས་སྟོན་ཁང་དུ། སྐུ་མགྲོན་གཙོ་བོར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་དང་དགུ་བཅུ་ལས་འགུལ་ཚོགས་ཚོགས་གཞོན་ཀླུ་མཁར་བྱམས་ལགས་གཉིས་གདན་ཞུའི་ཐོག བོད་ཀྱི་ཆབ་སྲིད་བཙོན་ཟུར་ལྷ་མོ་སྐྱབས་དང་འཇིགས་མེད་རྒྱ་མཚོ། བསྟན་པ་དར་རྒྱས་བཅས་གསུམ་གྱིས་དང་བླངས་ཐོག་བོད་བསྟན་སྲིད་མི་རིགས་ཀྱི་ཆེད་དུ་རང་ལུས་མཆོད་མེར་ཕུལ་བའི་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་དང་གྲྭ་བཀྲ་བྷེ། གྲྭ་བློ་བཟང་ཕུན་ཚོགས། གྲྭ་ཚེ་དབང་ནོར་བུ་བཅས་རྣམ་པ་བཞི་ལ་གདུང་སེམས་མཉམ་སྐྱེད་ཆེད་དབོན་ཞང་རྡོ་རིང་གི་དབྱིབས་སུ་བཟོས་༼ ཁྱོད་དང་བོད། འཐབ་རྩོད་ཀྱི་དྲན་ཤིང་།༽ཞེས་པའི་དྲན་རྟེན་ཞིག་གསར་འགོད་པ་དང་ས་གནས་མི་མང་འདུ་འཛོམས་ཐོག་དབུ་འབྱེད་གནང་།

ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༡ ཟླ་ ༡༠ ཚེས་ ༣ ཉིན་བཏང་གནས་ནང་འཁོད་དོན། བོད་ཀྱི་དཔའ་བོ་དགེ་འདུན་ཚེ་དབང་ནོར་བུ་ལགས་ཀྱིས་བོད་རྒྱལ་ཁབ་དང་མི་རིགས་ཀྱི་ཆེད་རང་ལུས་མེར་སྲེག་བཏང་སྟེ་ཉིན་ཞག་ཞེ་དགུའི་བདུན་ཚིགས་དང་སྟབས་བསྟུན། ཐེ་ཝན་དུ་གནས་སྡོད་བོད་རིགས་ཚོགས་པ་དང་། རྒྱལ་སྤྱིའི་སློབ་ཕྲུག་བོད་དོན་རྒྱབ་སྐྱོར་ཚོགས་པ། ཐེ་ཝན་ཡན་ལག་ས་གནས་བོད་ཀྱི་གཞོན་ནུ་དང་བུད་མེད་ཚོགས་པ་བཅས་མཉམ་འབྲེལ་ཐོག་ཐེ་ཝན་ནང་ཕྱི་ཟླ་ ༡༠ ཚེས་ ༢ ཉིན་བོད་ཀྱི་དཔའ་བོ་རྣམས་ལ་རྗེས་དྲན་གྱི་ལས་འགུལ་རྒྱ་ཆེ་ཞིག་སྤེལ་འདུག

༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༡ ཟླ་ ༡༢ ཚེས་ ༥ ཉིན་བཏང་གནས་ནང་འཁོད་དོན། ཐེ་ཝན་དུ་གནས་སྡོད་བོད་རིགས་ཚོགས་པས་གོ་སྒྲིག་འོག་ས་གནས་བོད་ཀྱི་གཞོན་ནུའི་ ལྷན་ཚོགས་དང་། ཐེ་ཝན་སློབ་ཕྲུག་བོད་དོན་རྒྱབ་སྐྱོར་ཚོགས་པ་ནས་གཞོགས་འདེགས་གནང་སྟེ་ཕྱི་ཟླ་ ༡༢ ཚེས་ ༢ ཉིན་གྱི་དགོང་དྲོ་ཆུ་ཚོད་ ༧ ནས་འགོ་འཛུགས་ཀྱིས་ཁྱོན་ཆུ་ཚོད་ ༤༩ རིང་ཐེ་ཝན་རང་དབང་ཐང་ཆེན་དུ་བོད་ཀྱི་དཔའ་མོ་བཙུན་མ་བསྟན་འཛིན་དབང་མོ་ལགས་ ཀྱི་ཉིན་ཞག་ཞེ་དགུ་དང་སྟབས་བསྟུན་ཏེ། གངས་ལྗོངས་རང་དབང་ཆེད་དུ་རང་ལུས་མེར་སྲེག་དང་། དཔའ་བོའི་སྙིང་སྟོབས་རྒྱུན་འཛིན་ཆེད་ཟས་བཅད་མཆོད་འབུལ་གྱི་ལས་འགུལ་རྒྱ་ཆེ་ ཞིག་གནང་ཡོད་པ་མ་ཟད། ཉེ་ཆར་བོད་ནང་བྱུང་བའི་དོན་རྐྱེན་ཁག་དང་། དཔའ་བོ་རྣམས་ཀྱི་མཛད་རྗེས་དང་འབྲེལ་བའི་དཔར་རིགས་འགྲེམས་སྟོན་ཞིག་ཀྱང་གནང་ འདུག ཐེ་ཝན་དུ་གནས་སྡོད་བོད་རིགས་ཚོགས་པའི་ཚོགས་གཙོ་དགྲ་བཅོམ་པ་ལགས་དང་། རྒྱུན་ལས་སྐལ་བཟང་ལྷུན་གྲུབ་ལགས། རྒྱུན་ལས་དཀོན་མཆོག་ལྷག་པ་ལགས། ས་གནས་བོད་ཀྱི་གཞོན་ནུའི་ཚོགས་གཙོ་བསྟན་འཛིན་ཆོས་འཕེལ་ལགས། ཚོགས་གཞོན་བསྟན་འཛིན་རྣམ་དག་ལགས། ཚོགས་མི་དབང་འདུས་ཚེ་རིང་ལགས་སོགས་ཁྱོན་མི་གྲངས་དྲུག་གིས་ཆུ་ཚོད་ ༤༩ རིང་ཟས་བཅད་གནང་ཞིང་། ཕྱི་ཚེས་ ༣ སྔ་དྲོ་ཆུ་ཚོད་བཅུ་པའི་གསར་འགོད་ལྷན་ཚོགས་ཐོག་ལ་ཐེ་ཝན་དམངས་ཁྲོད་རྩ་ཁྲིམས་ བསྐྱར་བཅོས་སྐུལ་སྤེལ་ཚོགས་པའི་ཚོགས་གཙོ་སྐུ་ཞབས་ལིན་ཕེང་ཀྲང་ལགས་དང་། ཏུང་ཝུ་གཙུག་ལག་སློབ་གྲྭ་ཆེན་མོའི་འགྲོ་བ་མིའི་ཐོབ་ཐང་ལྟེ་གནས་ཀྱི་འགན་ འཛིན་དགེ་རྒན་ཆེན་མོ་ཧོང་མོའོ་ལགས། དམངས་གཙོ་ཡར་ཐོན་ཚོགས་པའི་སྐུ་ཞབས་ཡཱང་གྲན་ཀྲན་ལགས། ཐེ་ཝན་ངལ་རྩོལ་དཔུང་ཁག་གི་དྲུང་ཆེ་སུན་ཡོའོ་ལན་ལགས། གྲོས་ཚོགས་འཐུས་མི་ཟུར་པ་སྐུ་ཞབས་ཇན་ཏཱ་ལགས། ཐེ་ཝན་བོད་རྒྱ་མཐུན་ཚོགས་ཀྱི་ཚོགས་གཙོ་དགེ་རྒན་ཆེན་མོ་སུན་ཀྲེ་བྷན་ལགས་ སོགས་ཀྱིས་བོད་མིར་གདུང་སེམས་མཉམ་སྐྱེ་དང་། རྒྱ་ནག་གཞུང་གི་དྲག་པོའི་སྲིད་བྱུས་ལ་སྐྱོན་བརྗོད། བོད་མིར་མུ་མཐུད་རྒྱབ་སྐྱོར་གནང་རྒྱུའི་གསུང་བཤད་གནང་། ཕྱི་ཚེས་ ༤ ཉིན་ཐེ་ཝན་གྲོས་ཚོགས་འཐུས་མི་ལྕམ་ཐན་ཆིའུ་ཇིན་ལགས་ཆེད་དུ་ཟས་བཅད་གནང་ཡུལ་ དུ་རྒྱབ་སྐྱོར་གནང་བར་ཕེབས་པ་དང་། བོད་ནང་གི་གནས་སྟངས་འགྲེམས་སྟོན་གཟིགས་རྗེས་རང་དབང་མེད་པར་མཆི་མ་ལྷུང་ཞིང་ གནས་ཚུལ་དེ་ཚོ་བསམ་ཡུལ་ལས་འདས་པ་ཞིག་རེད་གསུངས། དེ་ཉིན་རང་དབང་ཐང་ཆེན་དུ་ཉམ་ཆུང་ལྟ་རྟོག་ཚོགས་པའི་ལས་འགུལ་སྐབས། ཟས་བཅད་ངོ་རྒོལ་ལ་རྒྱབ་སྐྱོར་གྱི་ལས་རིམ་གསར་འཇུག་གནང་བ་དང་། དགོང་དྲོ་ཆུ་ཚོད་ ༦ ནས་ ༨ བར་བོད་མི་སྐྱ་སེར་གཉིས་དང་། བོད་མིར་རྒྱབ་སྐྱོར་གནང་མཁན་ཐེ་ཝན་མི་མང་བཅས་མི་གྲངས་བདུན་ཅུ་ལྷག་ནས་མཆོད་ འབུལ་སྨོན་ལམ་གནང་ཡོད། ཆུ་ཚོད་ ༤༩ རིང་གི་ཟས་བཅད་སྨོན་ལམ་གྲུབ་རྗེས། སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ལས་འགུལ་གྲ་སྒྲིག་ནང་མཐུན་འགྱུར་གནང་ མཁན་སློབ་ཕྲུག་ཚོགས་པའི་ཚོགས་མི་གསུམ་ལ་ཐུགས་རྗེ་ཆེ་ཞུའི་མཇལ་དར་གནང་བ་དང་། དེ་བཞིན་ཟས་བཅད་གནང་མཁན་བོད་མི་དྲུག་ལ་མཇལ་དར་གཡོགས་ཏེ་ལས་འགུལ་མཇུག་སྒྲིལ་ གནང་འདུག ཐེངས་འདིའི་ཟས་བཅད་ལས་འགུལ་ད་རེས་གཟའ་སྤེན་པ་དང་ཉི་མ་གཉིས་ལ་འཁེལ་བར་བརྟེན། རང་དབང་ཐང་ཆེན་སྟེང་ལྟ་སྐོར་དུ་ཡོང་མཁན་རྒྱ་ནག་སྐམ་ས་ཆེན་པོའི་མི་མང་ཧ་ཅང་ མང་པོས་ལས་འགུལ་འདི་དངོས་སུ་མཐོང་ཡོད་པ་དང་། ཁག་གཅིག་ཆེད་དུ་འགྲེམས་སྟོན་དཔར་རིགས་ལ་ལྟ་བར་ཕེབས་ཏེ་དཔར་ལེན་བྱས་པ་སོགས་ བོད་དོན་ངོ་སྤྲོད་རྒྱ་ཆེ་ཐུབ་ཡོད་པ་བཅས་སོ།།