༑རོལ་མྱོང་ཐེངས་གཅིག་གི་བཟི་གཏམ་ཐོར་བུ།

 

ཀ

བྲག་རྫོང་ཕུ་ལ་འཕུར་བའི་རྒྱུས་མེད་བྱ།

ས་ཕྱོགས་གང་ནས་འོང་པ་ངས་མ་ཚོར།

ནུས་མེད་སེམས་འདིས་གང་གི་རྐང་བ་ཟུང༌།

འཆིང་བར་མ་ནུས་གར་སོང་འང་ཆ་མ་འཚལ།

 

འདི་ཡང་ལྷ་ཡི་ཕོ་ཉའི་གསུང་འཕྲིན་དེ།

དེ་དོན་ཅི་སྙམ་བདག་གི་སེམས་པའི་བྱ།

བྱ་ལམ་རྗེས་མེད་རྗེས་ལ་འདེད་པ་བཞིན།

པད་དཀར་ལྡུམ་རའི་ཚལ་ཡངས་ཉུལ་ལ་རིངས།

༡

གང་ལས་བྱུང་བ་མ་ཚོར་ཆག་སྒོ་གང༌།

གང་དང་གང་གི་བར་ལ་མཐུན་རྐྱེན་བཞིན།

བྱུང་འདིས་རྒྱུས་མེད་འདབ་ཆགས་འདི་སྙམ་དུ།

བསམས་པའི་འཕྲོ་ལ་དེ་མིན་གཞན་ཞིག་གིས།

སླར་ཡང་རྗེས་མེད་བྱ་ལ་རྗེས་འདེད་བྱས།

༢

མིང་མེད་དྲང་སྲོང་བགྲེས་སོང་ཕེ་རེ་ཤུ

རཱ་དྷ་ར་ནེས་ཡིད་འོང་གཞོན་ནུ་མ།

སྐད་ཆའི་སྒམ་ཆུང་བུ་ཆུང་སཱ་ཏི་ཤ

ལྷག་པར་ཆུང་གྲོགས་དམ་པ་གྷོར་མའོ་ཧན།

དཔྱོད་ལྡན་བྷི་ནའོའི་མ་འདྲེས་མཉེས་གཤིན་གྲོགས།

སུ་ཞིག་པད་དཀར་ལྡུམ་རའི་མཛེས་རྒྱན་སྟེ།

ལྷ་ཡི་ཕོ་ཉ་ཡིན་སྙམ་ཀུན་རྟོག་འཁྱམས།

༣

ཤེས་ཡོན་སྒྲོ་གཤོག་ལྷན་ཅིག་ཐོགས་པ་ཡི།

མ་གཅིག་བྱང་ཁོག་བརྒྱུད་འདྲའི་སློབ་གྲོགས་གཉིས།

མི་མཐུན་ཆོས་ཚོགས་དག་གི་འགལ་ཟླའི་ཁྲོད།

ལྟ་བའི་བར་ལ་རང་བྱུང་ལྕགས་རི་ཞིག

གྲུབ་པ་དེའང་ཅི་ལས་བྱུང་སྙམ་དཔྱད།

༤

སྔགས་འཆང་ཁི་རེས་ཤུ་ན་དྷ་ཡལ་གྱིས།

སེམས་དཀར་བཞིན་ནག་ཨ་ནན་དྷ་མོ་ཡེའར།

གངས་དཀར་རི་བོ་སྟག་ཤར་གྷོ་ར་འདི།

ཇི་ལྟར་བསྐྲུན་ནམ་སྙམ་པའི་སོམ་ཉིས་གཡོས།

འདི་ཡང་གར་བྱུང་མ་ཤེས་བྱི་འུ་ཞིག

༥

མེ་ཏོག་དཀར་པོས་དཀོན་མཆོག་མཆོད་པ་ཡི།

རྨི་ལམ་ནང་ལ་ལྷ་སྲས་དཀར་པོ་ཞིག

མཇལ་བ་མངོན་སུམ་གྲུབ་པའི་དངོས་གྲུབ་དེ།

དཀོན་མཆོག་ལྷ་ཡིས་གནང་བའི་ཕོ་ཉར་ཤེས།

འོན་ཀྱང་ཆོས་དང་མི་རིགས་མི་གཅིག་པའི།

ཁྱིམ་གཅིག་འབྲེལ་བ་འདི་ཡང་ཇི་ལྟར་དང༌།

ཅི་འགྱུར་མཐའ་འབྲས་ཅི་འབྱུང་སེམས་ཤིང་འཚབ།

༦

ཆེ་ཆུང་རབ་འབྲིང་མཐོ་དམའ་མི་འདྲའི་ཐོག

ལྟ་སྤྱོད་བསམ་འདུན་ཀུན་ཀྱང་མི་མཐུན་པའི།

འདྲ་མིན་མི་སྣ་མང་པོའི་འགལ་འབྲེལ་གྱི།

བྱུང་རིམ་ལུ་གུ་བརྒྱུད་ཀྱི་གཏམ་རྒྱུད་དག

རང་སྣང་བསླུ་བའི་སྒྱུ་རྩལ་ཞིང་ཁམས་ཤིག

 

ཁ

རྒྱུས་མེད་བྱ་ལ་རྗེས་འདེད་བྱེད་པའི་ཞོར།

པད་དཀར་ལྡུམ་རའི་མཛེས་སྡུག་འདི་ལྟར་མཐོང༌།

༡

མི་སྣ་རེ་རེ་མིག་ལ་མངོན་སུམ་དང༌།

གླེང་མོལ་གང་གང་རྣ་བར་ལྷང་ལྷང་ལྷང༌།

སེམས་ཁམས་རེ་རེའང་མངོན་སུམ་སྣང་བར་གྱུར།

༢

མཚམས་རེར་བྱམས་བརྩེ་དྭངས་མའི་བཞིན་རས་རེ།

སྐབས་རེར་མྱ་ངན་ཤུགས་ཀྱི་དབུགས་རིང་རེ།

ལ་ལར་བརྩེ་དུང་ཞིམ་པོའི་མངར་ཁ་རེ།

ཀུན་ལ་བློ་སྒོ་སྐྱེད་བྱེད་མན་ངག་རེ།

ཀུན་རྟོག་བསླུ་བའི་སྒྱུ་འཕྲུལ་ཀུན་ཏུ་མངས།

༣

མི་ཚང་རེ་གཉིས་ཤིག་གི་སྒོ་བྱང་ལས།

རྒྱ་གར་ཁྱིམ་ཚང་ཆེན་པོའི་ཕྱི་ནང་རྟོགས།

མི་སྣ་གཙོ་ཕལ་འགའ་རེའི་གཟུགས་བརྙན་ལས།

མི་ཚོགས་ཁྲི་སྟོང་ཞིག་གི་བསམ་འདུན་ཚོར།

༤

མི་སྣའི་སེམས་ཚོར་རང་བྱུང་ཁམས་ལ་འདྲེས།

རང་བྱུང་ཁོར་ཡུག་མི་སྣའི་སེམས་ལ་འདྲེས།

བྱེད་པོ་རང་ཡང་དེ་དང་ལྷན་དུ་སྟེ།

ཀློག་མཁན་བདག་ཀྱང་དེ་དག་ཁྲོད་དུ་ཐིམ།

 

ག

རྒྱུས་མེད་བྱ་ཡི་རྐང་རྗེས་མ་རྙེད་གོང༌།

རྒྱུས་མེད་མི་འགའི་ངོ་གདོང་འདི་ལྟར་མཐོང༌།

༡

རང་གི་སྲོལ་རྒྱུན་རྗེས་ལུས་སྙིགས་མར་བསམས།

དབྱིན་ཇིའི་ལྟ་སྤྱོད་སྔོན་ཐོན་བཅུད་དུ་བསྒོམས།

ཡོད་ཚད་གསར་བརྗེའི་ལམ་དུ་ཨུ་ཚུགས་མཁན།

བྷ་རའོ་དྷ་ཡི་གསར་ཞེན་ཧོལ་རྒྱུགས་ཀྱི།

རྗེས་འབྲང་རང་རེའི་གཞིས་བྱེས་ཁྲོད་ནའང་མངས།

༢

ཀྲོག་ཀྲོག་ཚ་བའི་རང་སྣང་མི་མཐོ་ལ།

ཨ་མའི་བཙན་དབང་བཀའ་ལས་མི་འདའ་བའི།

སྣང་སྐྱིད་འགྲོགས་བདེ་བུ་མོ་ལཱ་བྷོན་ཡང༌།

བོད་ཀྱི་ཨ་མ་འགའ་རེའི་མདུན་རྒྱབ་ན།

རང་ཚུགས་མེད་པར་འགྲོ་བ་སུས་མ་མཐོང༌།

༣

རང་གི་རང་དབང་མ་ལའང་མི་འཆོར་ཅིང༌།

བདེན་པའི་གཏམ་དང་བསམ་འདུན་སྨྲ་སྤོབས་པ།

མི་ཁའི་རླུང་གིས་མི་འཁུར་ལཱོ་ལི་ཏཱ།

ལྷད་མེད་བརྩེ་དུང་ཟབ་པའི་མཛངས་མ་ནི།

བདག་གི་གཡས་དང་གཡོན་ན་རེ་གཉིས་ཙམ།

༤

བུ་མོ་རྣམས་དང་རྩེད་འཇོར་གཡེང་བ་ཡི།

སྤྲོ་སྣང་ཅན་གྱི་གཞོན་ནུ་སུའི་དྷེར་དང༌།

དེང་གི་གཞོན་ནུ་ཕལ་གྱི་བར་ཁྱད་ལ།

དུས་ཀྱི་སྔ་ཕྱི་ཙམ་ལས་ཅི་ཞིག་ཁྱད།

༥

རང་གི་འཁོར་ནང་རང་མཐོང་ཆེ་བ་ཡི།

རང་རིགས་མེད་ན་མེད་པའི་ཧཱ་རན་འདྲའི།

བརྩེ་དུང་མེད་ཀྱང་ཨུ་ཚུགས་ཚ་བོ་ཅན།

ཁ་སང་དེ་རིང་གཞིས་བྱེས་ཀུན་ན་མངས།

༦

རྨོངས་དད་རིགས་ཞེན་ཁོ་ནའི་མིག་དབང་གིས།

བཀུར་འོས་སྐྱེས་བུ་མཆོག་གི་ལྷར་སྣང་བའི།

ཨ་བྷི་ནཱ་ཨི་ཡཱ་ཡི་རྗེས་རབས་པ།

བོད་འདིར་གནའ་ནས་ད་བར་རྒྱུན་མ་ཆད།

༧

བཟའ་ཟླ་གཅིག་ཤི་གཅིག་བླངས་མྱ་ངན་མང།

ལྟ་སྤྱོད་གཅིག་བརྗེས་གཅིག་དོར་བརྟུལ་ཞུགས་མང༌།

བྱ་བ་གཅིག་ཐོག་གཉིས་བསྣན་ཁུར་བོ་ལྕི།

དགྲར་བསྟུན་གཉེན་སྐྱོང་འཁོར་བའི་སྣང་ཚུལ་བརྒྱས།

འཁོར་བར་ངེས་འབྱུང་ཐར་བའི་ལམ་འཚོལ་བ།

རྣལ་འབྱོར་ཁི་རེས་ཤུ་ན་དྷ་ཡལ་གྱི།

ཟླ་བོར་ཆས་པའི་ཆོས་པ་ཡོད་དམ་མེད།

༨

བྱིས་དུས་མནའ་མར་སོང་ནས་སྡུག་དགུ་མྱངས།

ཁྱོ་ག་བུ་གཉིས་རྐྱེན་ངན་ནད་ཀྱིས་གྲོངས།

བུ་མོ་ཁྱོ་བོས་མནར་ནས་ཚེ་སྲོག་ཤོར།

ཐ་མར་ཁྱབ་འཇུག་སྐུ་ལ་རེ་བཅོལ་བ།

ཁྱིམ་སྤང་བྱ་བྲལ་ཧཱ་རེས་མའོ་ཧིས་ནེས།

ལས་ངན་ཡུགས་མོའི་ལས་འཕྲོ་སྐྱོང་བ་ཡི།

སྐྱེ་བ་དམན་པའི་ལས་ཚུལ་ཀུན་ན་སྣང༌།

༩

ཞི་དུལ་བག་ཡོད་ཕྱི་ཐག་རིང༌།

སྐྱེས་སྦྱང་རིག་པའི་ཁོ་ལག་རྫོགས།

ཀུན་གྱི་སྙིང་སྡུག་ཅང་ཤེས་རྟ།

དེང་གི་བྷི་ནའོ་འདི་འོ་ཞེས།

ཁ་བ་ཅན་ན་ཁ་ཁེར་ཙམ།

༡༠

གཞུངས་བཟང་ཕ་མར་སྲི་ཞུ་ཆེ།

ལུགས་དང་སྲོལ་ལ་གུས་པ་ཆུང༌།

རང་གི་རིགས་ལ་ལར་ཞེན་སྦོམ།

ནོར་དང་འདོད་ལ་འདུན་པ་ཕྲ།

དོན་དམ་ཞི་བའི་ཆོས་ལ་མོས།

མཛེས་མཛངས་ཤེས་རབ་ཀུན་འཛོམས་པའི།

སུའུ་ཆར་རས་ཏཱ་ཀུན་བཟང་མོ།

འཛམ་གླིང་མཛེས་མའི་ཁྲོད་ན་དཀོན།

༡༡

དགའ་སྡུག་ཆགས་སྡང་ཉོན་མོངས་མཐའ་ལ་དེད།

དཀོན་མཆོག་དངོས་གྲུབ་ཏིང་འཛིན་ཀློང་ལ་བསྡུས།

ཞི་དུལ་བག་ཡངས་བྱམས་བརྩེའི་ཐུགས་དཀྱེལ་ཡངས།

ཆོས་ལུགས་རིས་མེད་སློབ་དཔོན་ཕེ་རེ་ཤུ

དེང་ཡང་འཛམ་གླིང་ཞི་བདེའི་དེད་དཔོན་གྱི།

རྣམ་པར་སྤྲུལ་བ་རེ་འགའ་བཞུགས་པ་སྤྲོ།

༡༢

རིགས་རུས་ལྕགས་སྒྲོག་གཏོར་བའི་དཔའ་མོ་དང༌།

ཁྱིམ་གྱི་ལས་ཀུན་བྱེད་པའི་བདག་མོ་སྟེ།

དྭ་ཕྲུག་དག་གི་ཡུམ་ཆེན་ཀུན་སྙོམ་མ།

ངེས་དོན་ལྷ་མོ་ཨ་ནན་དྷ་མའོ་ཡེའ།

པད་དཀར་ལྡུམ་ར་ཁོ་ནའི་ཞིང་ཁམས་ལས།

མི་ཡུལ་འདི་ན་མི་ཡི་རྣམ་རོལ་སུ།

༡༣

རྙེད་བཀུར་སྙན་གྲགས་མི་ཆོས་རིང་དོར་ཡང༌།

རིགས་ཞེན་ལ་རྒྱའི་ཁུ་ཚུར་ལྕགས་ལས་མཁྲེགས།

རང་གི་རྒྱལ་ཁབ་རང་གི་སྲོག་ལས་གཅེས།

ཡུལ་དུས་གནས་སྐབས་བྱ་བའི་འཇུག་ལྡོག་མཁས།

འཚེ་མེད་རྒྱལ་གཅེས་དཔའ་རྒོད་གྷོར་མའོ་ཧན།

ལྷ་ཡི་ཕོ་ན་ལྷ་ལྡན་ཞིང་ཁམས་འདིར།

རེ་རེས་མི་འོང་བརྒྱ་ཕྲག་འབྱོན་གྱུར་ཅིག

 

ང

རྒྱུས་མེད་བྱ་ལ་རྗེས་འདེད་བྱས་བྱས་ནས།

པད་དཀར་ལྡུམ་རའི་ལྟད་མོ་གཞན་ཡང་མཐོང༌།

༡

མི་སྒེར་ཤ་འཁོན་རྩོད་པ་མི་མཐོང་ཡང༌།

མི་རིགས་རྒྱལ་ཁབ་འཐབ་རྩོད་མངོན་པར་གསལ།

མདའ་མདུང་མཚོན་གྱི་འཇིགས་པ་འདིར་མེད་ཀྱང༌།

འགལ་ཟླའི་ལྟ་གྲུབ་རྣོ་ངར་ཁོང་ན་འབར།

༢

དྲག་པོ་དམག་གི་བཙན་འཛུལ་མཐུ་ཆུང་ཡང༌།

ཞི་བ་ཆོས་རིག་ཤུགས་རྐྱེན་གཞན་ལས་བཙན།

གཉའ་གནོན་བཤུ་གཞོག་གདུག་རྩུབ་མི་ཆེ་ཡང༌།

གཡོ་ཁྲམ་ཁྲིམས་ཀྱི་གཉའ་ཤིང་ལྗིད་རེ་ཆེ།

༣

བླ་གྲྭ་སྟོང་གི་དགོནསྡེ་མི་སྣང་ཡང༌།

ཆོས་དད་ཆོས་ཚོགས་འདུ་ལོང་རྣམ་པ་མངས།

རང་སྲུང་རྒོལ་ལན་དམག་གི་དཔུང་མེད་ཀྱང༌།

ངེས་དོན་དཔའ་མཛངས་རྒྱལ་གཅེས་བློ་སྟོབས་རྒོད།

 

ཅ

རྒྱུས་མེད་བྱ་ཡི་བྱ་སྐད་ཡིན་ནམ་ཅི།

ལྷ་ཡི་ཕོ་ཉའི་ལུང་བསྟན་གསུང་འགའ་ཐོས།

༡

ཨུ་ཚུགས་རྙིང་ཞེན་མགོ་མཁྲེགས་རྒན་རབས་ཚོས།

ལུགས་སྲོལ་ཁོ་ནས་ལམ་གསར་འགོག་ཉེས་ན།

དུས་རབས་གསར་བའི་འཚོ་ལམ་མི་རྙེད་གསུངས།

༢

ཨ་གསར་རྟ་རྒྱུག་ཅོལ་ཆུང་གསར་བུ་ཚོས།

རང་གི་རིགས་ཀྱི་ཞབས་འདྲེན་མངས་གྱུར་ན།

རང་རིགས་རང་མགོ་ཐོན་པའི་དུས་མེད་གསུངས།

༣

ཕ་མ་དག་ཀྱང་བུ་དང་བུ་མོ་རྣམས།

རང་དབང་རང་མོས་གཉེན་ལམ་བཀག་པ་ན།

བདེ་སྐྱིད་གསར་བའི་ཁྱིམ་གཞི་མི་འགྲུབ་གསུངས།

༤

བུད་མེད་ཀུན་ཀྱང་དུས་ཀྱི་འགྲོས་བཞིན་དུ།

ཤེས་རིག་ལག་རྩལ་ཐོབ་ཐང་མ་བརྩད་ན།

ཕོ་མོ་འདྲ་མཉམ་གོ་འཕང་མི་འཐོབ་གསུངས།

༥

ཆོས་པ་རྣམས་ཀྱང་ཕྱོགས་ཞེན་མ་གནང་བར།

ཆོས་ལུགས་རིས་མེད་མཐུན་པར་འགྲོགས་ཤེས་ན།

འདི་ཕྱི་གཉི་གའི་དོན་ཆེན་འགྲུབ་པར་གསུངས།

༦

ཁྲིམས་དཔོན་སོགས་ཀྱང་དཀར་ནག་མི་བསྲེ་བར།

ཉེ་རིང་མེད་པར་ཁྲིམས་ལུགས་ཀུན་སྙོམ་ན།

སྤྱི་ཚོགས་བདེ་འཇགས་གཞི་རྩ་ཡིན་པར་གསུངས།

༧

མི་རབས་གསར་བས་རང་སྲིད་རང་སྐྱོང་འགན།

ཕྲག་ཏུ་བླངས་ཏེ་དུས་རྗེས་སྙོག་ཅིག་དང༌།

ལོ་རྒྱུས་གསར་བའི་འཁོར་ལོ་སྐོར་ནུས་གསུངས།

༨

མདོར་ན་འགྲོ་བ་མི་རྣམས་འདྲ་མཉམ་དང༌།

ཆོས་ལུགས་མཐའ་དག་སེམས་ཀྱི་གཟུངས་སྔགས་དང༌།

ཆོས་སྲིད་ལུགས་གཉིས་ཐུན་མོང་ལམ་ཆེན་དུ།

ཤེས་ནས་ཞི་བདེའི་དཔལ་ལ་ལོངས་སྤྱོད་གསུངས།

 

ཆ

ཉི་དབང་མགོན་པོའི་ཉིན་བྱེད་བློ་མཆོག་གིས།

རབ་བསྐྱེད་པད་དཀར་ལྡུམ་རའི་མཚར་སྡུག་གཟུགས།

བདག་ཅག་སྐལ་བའི་ལོངས་སྤྱོད་གསར་བ་རུ།

ཆོས་གྲགས་སོར་མོའི་འདུ་བྱེད་ངལ་བའང༌།

དོན་དང་བཅས་སྙམ་དགའ་བ་ཁོང་ནས་འཛུམ།

 

རྒྱུས་མེད་བྱ་ཡི་རྗེས་ཀྱང་ཆོད་ནས་བྱུང༌།

ལག་རྗེས་རྐང་རྗེས་ཀུན་ཀྱང་རྒྱུས་ཡོད་གྱུར།

འོན་ཀྱང་བྱ་ཚོགས་དུ་མའི་མཚོ་གླིང་ན།

བྱ་འཁྱམ་ཁྱུ་ཞིག་འཕུར་ལམ་མ་མཐོང་སྐྱོ།

 

ལྷ་ཡི་ཕོ་ཉ་ཐང་དཀར་རྒོད་པོའི་རྩལ།

ཆབ་བྲག་ཕོ་ཉ་བྱི་འུས་འདི་ཙམ་འཇལ།

ཀློག་ཐེངས་གཅིག་གི་བཟི་གཏམ་ཐོར་བུ་འདིར།

ཉེས་པ་ཅི་མཆིས་ལྷ་ཡི་ཕོ་ཉས་གཟིགས། །

 

༢༠༠༤།༡༡།༨།