ཀུ་ཤུ་ཁ་པར།

 

 

 

ཁུ་བྱུག་སྔོན་མོ་ཡིས། ཁོ་རང་གི་ལག་གི་ཀུ་ཤུ་ཁ་པར་ལ་འོ་ཞིག་བྱས་ཏེ། ཁུ་བྱུག་རྩེད་ར་ཞེས་པའི་སྐད་འཕྲིན་ཚོམས་སྒོ་ཕྱེས་ཏེ་ཁུ་བྱུག་སྔོན་མོའི་འགྱུར་ཁུགས་འདི་ལྟར་འཐེན། 

ཨ་ལ་རོགས་ལོ་་་་ལ་ཡ་་་ལ་་་ཡ་ལ་ཡ་ལ་་་ཡེ་་་་

ང་འདང་ཆེན་དྲིན་ཆེན་གཉིས་ཡོད།

ངའི་ལག་གི་ཁ་པར་འདང་ཆེན་ཡིན།

ས་འཛམ་གླིང་མིག་ལ་བཤམ་འཇོག་གི

སྐད་སྣ་ཚོགས་རྣ་སྒོར་བཀུག་འཇོག་གི

ངའི་མཐོང་རྒྱ་ཐོས་རྒྱ་སྐྱེད་འཇོག་གི

ངའི་འདང་ཆེན་ཁ་པར་བཀའ་དྲིན་ཆེ།

ང་ཁྱོད་དང་འགྲོགས་ནས་ཤི་ན་ཤི

 

ང་འདང་ཆེན་དྲིན་ཆེན་གཉིས་ཡོད།

ངའི་ངག་གི་ལ་ཡས་འདང་ཆེན་ཡིན།

ངོ་མི་ཤེས་རོགས་བརྒྱ་བཀུག་འཇོག་གི

ཚིག་སྙན་དགུས་མཛའ་སེམས་སྦྲེལ་འཇོག་གི

ངའི་ལུས་སེམས་བདེ་བ་སྐྱེད་འཇོག་གི

ངའི་འདང་ཆེན་ལ་གཞས་བཀའ་དྲིན་ཆེ།

ང་ཁྱོད་དང་འགྲོགས་ནས་འཆི་གི་ཡིན།།

 

ཁོས་སྐད་ངག་ལྷོད་མོ་ཞིག་གིས་དེ་ལྟར་བླངས་པ་དང་ཁ་པར་ལག་ནས་ཤོར་སོང་བའི་ཁྲོག་སྒྲ་ཞིག་དང་ཨ་མ་་ཞེས་པའི་འབོད་སྒྲ་ཞིག་ལྷན་དུ་ཅི་ཡང་གོ་རྒྱུ་མེད་པར་གྱུར།

 

ཉིན་འགའི་རྗེས་སུ། ཁུ་བྱུག་རྩེད་ར་ནང་ན་ཁུ་བྱུག་སྔོན་མོ་གློ་བུར་དུ་འཕུར་སོང་ཟེར།

ཁོའི་ཀུ་ཤུ་ཁ་པར་ཆག་སོང་ཟེར། དེ་བས་སེམས་ཁྲལ་གྱིས་ཤི་སོང་ཟེར། 

 

གང་ལྟར་ཁུ་བྱུག་གྲག་རྒྱུ་མེད་པར་ཟླ་གཅིག་འགོར། ཡིན་ན་ཡང་ཚང་མས་ཁུ་བྱུག་གི་ལ་གཞས་གསར་རྩོམ་དེ་བོད་ཀྱི་སྲོལ་རྒྱུན་དང་མཐུན་མིན། ཐ་སྙད་བཀོལ་ཚུལ་འོས་མིན་སོགས་ལ་ཉི་ཚེ་བའི་གླེང་མོལ་དུ་མ་ཞིག་བྱས།