༅།ནོར་བུ།

 

 

གཅིག

          དབྱར་ཁའི་ཉིན་ཞིག གཞོན་ནུ་ཕོ་མོ་གཉིས་རྩེ་ཀླུང་རིང་མོའི་ཁུགས་སོའི་མེ་ཏོག་སེར་ཆེན་གྱི་མལ་སའི་ནང་ན་འཐམ་འཁྱུད་ཀྱིས་འགྲེ་ལྡོག་བྱེད་ཀྱིན། ཞིམ་པོའི་འོ་དང་བདེ་བའི་དབྱངས། ལྡེམ་པའི་གཡོ་འགུལ་དང་བཅས་སྐྱིད་པའི་ཟློས་གར་ཐུང་ངུ་ཞིག་གི་འཁྲབ་ཚན་རྫོགས་རྗེས་གཉིས་ཀ་ཀན་རྒྱལ་དུ་ཉལ་ནས་སྐྱིད་སྣང་གི་འཛུམ་མདངས་ལྷུག་གེར་སྙིང་གཏམ་མངར་མོ་ཞིག་གི་མགོ་བརྩམས།

“ལྟོས་དང༌། ནམ་མཁའ་འདི་ཇི་འདྲའི་སྔོ་ཞིང་དྭངས་པ”

“ད་དུང༌། སྤྲིན་དཀར་ཚོམ་བུ་དེ་དག་ནི་དེ་འདྲའི་དཀར་ཞིང་མཛེས་པ”

“དེ་རིང་ངའི་སྣང་བ་ཡང་བར་སྣང་ཁམས་རེད། འདི་འདྲའི་སྐྱིད་སྣང་ཞིག་བྱུང་མ་མྱོང”

“རེད། ཁྱོད་ཀྱི་ནུ་བར་ལ་ལྷུང་ཐེངས་རེར་ངའི་སྣང་བ་ཡང་ལྷ་ཡུལ་ཁམས་རེད”

“ཧ་ཧ་ཧ། ཨེ་རེད། འོ་ན། ཁྱོད་གྲོང་ཁྱེར་གྱི་རྒྱ་མོ་ལྷ་མོ་ལྟ་བུ་དག་གི་ནུ་བར་ལ་ལྷུང་དུས། དེའི་ལྷག་ཅིག་ལོས་ཡིན”

“ངས་ཁྱོད་ཀྱི་མེ་ཏོག་བླངས་པ་ནས་བཟུང༌། ང་ངོ་མ་སུ་གཅིག་གི་ནུ་བར་ལ་ལྷུང་མ་མྱོང”

“ང་མི་རློམ་གི”

“ཁྱོའི་ཤ”

“ངའི་ཤ་ཡིས་མནའ་ཤ་ཉན་ནམ”

“ང་ལ་ཁྱོད་ལས་ལྷག་པའི་རྩིས་ཆེན་མེད། གལ་ཏེ་ཁྱོད་ཀྱི་ཤས་མནའ་ཤ་མི་ཉན་ན། ང་ལ་མནའ་རྟེན་གཞན་འཇོག་རྒྱུ་མེད། ལོ་གཅིག་གི་རྗེས་ནས་ངས་ཁྱོད་ལ་བདེན་དཔང་བྱེད་ཆོག”

“ངས་ཁྱོད་ཚོ་སློབ་གྲྭ་བའི་ཁ་ཤེད་ལ་འདང་ས་མ་རེད། གང་ལྟར་ང་ཁྱོད་ལ་དགའ། ངའི་ནོར་བུ། ང་ཁྱོད་ལ་ཡིད་ཆེས་ཡོད”

“ཡིད་ཆེས་དང་བརྩེ་དུང༌། ནམ་མཁའ་དང་སྤྲིན་དཀར། ཨ་ལ་ལ་ ཇི་འདྲའི་མཛེས་ལ་ཇི་འདྲའི་སྐྱིད་པ། འདི་ནི་ངའི་རེ་སྨོན་ཡིན་ལ། ངའི་བདེ་སྐྱིད་ཀྱང་ཡིན”

“དེ་སྙན་དངགས་ཨེ་རེད། འོ་ན་ངས་ཀྱང་ཁྱོད་ལ་གླུ་ཞིག་ལེན”

“ཡ་ སྔོན་མ་ང་འགུགས་བྱེད་ཀྱི་ལ་གཞས་དེ་ ”

“ང་རྟ་ཞིག་མེད་མེད་རྟ་ཞིག་དགོས།

ཚུར་འཁོར་ན་མགོ་རྣ་ཡག་དགོས།

ཕར་འཁོར་ན་གྲུག་ཞེང་ཆེ་དགོས།

དེའི་མི་ཚད་གོམ་ལེགས་བདེ་དགོས།

ཁྱོད་དེ་འདྲའི་རྟ་ཞིག་ཡིན་ན།

ངས་གསེར་སྲང་སྟོང་ལ་འཇལ་ཆོག

ཚེ་གང་གི་ཞོན་རྟ་ཁྱོད་ཡིན།”

“ཁྱོས་ངོ་མ་ང་ཞོན་རྒྱུ་ཡིན་ནམ”

“ཧ་ཧ་ཧ་་་ཧི་ཧི་ཧི་”

          འགྱུར་ཁུགས་ལྡན་ཞིང་དྭངས་ཤིང་གསལ་བའི་དགོད་སྒྲ་ཞིག་རྩེ་ཀླུང་གི་བཞུར་སྒྲས་ཁྱེར་ནས་ཀླུ་ཡུལ་དུ་ཆས།

 

གཉིས།

 

          དཔྱིད་མགོའི་ཉིན་ཞིག ཕ་བུ་གཉིས་གཞིས་ཀའི་ཁང་བཟངས་མཐོན་པོའི་རྩེ་ན་བཟའ་བཏུང་ལ་ལོངས་སུ་སྤྱོད་ཀྱིན་ཐག་ཉེ་རིང་གི་ཁོར་ཡུག་ཚང་མར་མིག་བཤེར་དང་བཅས་གླེང་མོལ་བྱེད་ཀྱིན་འདུག འོན་ཀྱང་བུ་དེའི་གདོང་ན་སྤྲོ་སྐྱིད་ཀྱི་འཛུམ་བག་ཤུལ་ཙམ་ཡང་མི་འདུག

“བུ། ཁྱོད་ལ་ཅི་བྱུང་སོང༌། ཅིག་ན་གི་ཡོད་པ་མིན་ནམ”

“འདུག ན་ཚ་ཆེན་པོ་ཞིག་འདུག”

“ན་ཚ་ཅི་རེད། གང་ནས་ན་གི་འདུག”

“འདི་ནས། སྙིང༌། མ་རེད་སེམས”

“སེམས་སྡུག ཅི་ལ་སེམས་སྡུག་བྱེད་ཀྱི་ཡོད”

“འགྲོ་བ་ནད་པ་ཚང་མ་ལ”

“ཨོ་ དེ་འདྲ་བྱང་ཆུབ་སེམས་དཔའི་ན་ཚ་ཡིན་རྒྱུ་རེད་ འོ་ན་ཁྱོད་སྨན་པ་བྱེད་འདོད་ཡོད་པ་ཡིན་ནམ”

“གལ་ཏེ། འགྲོ་བ་ནད་པ་ཇི་སྙེད་པ། མྱུར་དུ་ནད་གྲོལ་ཐབས་ཤིག་ཡོད་ན། སྨན་པ་ལས་ལྷག་ཅིག་ཅི་ཡོད”

“བུ་བློ་མང་གི་དོན་མི་འགྲུབ་ཟེར། ཁྱོད་ཁྱིམ་གྱི་ནོར་བུ་ཡིན། ངས་ཁྱོད་ཀྱི་རེ་བ་བཞིན་ཆུང་དུས་ནས་སློབ་གྲྭ་འགྲིམས་བཅུག་ནས་ད་མཐོ་སློབ་ཐོན་པ་རེད། ངས་བལྟས་ན་ད་མནའ་མ་ཞིག་བླངས་ནས་གཞིས་ཀ་སྐྱོང་ན་བཟང༌། ང་ཡང་ལོ་ན་མཐོ་བས་ཕྱིའི་ཚོང་ལས་ཁག་དང༌། ནང་གི་ཟ་ཁང་དང་མགྲོན་ཁང་ཚང་མར་ལྟ་རྟོག་བྱེད་པར་དཀའ་ལས་འདུག”

“ཨ་ཕ། ང་ཐག་རིང་ཞིག་ལ་འགྲོ་འདོད་འདུག”

གང་ལ། པེ་ཅིན་ལ་ཨེ་རེད། ད་དུང་སློབ་གྲྭ་འགྲོ་རྒྱུ་ཡིན་ནམ། ཁྱོད་ཀྱི་དམིགས་ཡུལ་རྗེས་མ་དཔོན་ཆེན་ཞིག་བྱ་འདོད་པ་ཨེ་ཡིན”

“མིན། ང་ལ་དབང་དང་རྒྱུ་གཉིས་ཀ་མི་མཁོ”

“འོ་ན། ཁྱོད་ལ་ཅི་མཁོ”

“ང་ལ་ཞི་བདེ་མཁོ”

“ཞི་བདེ། དེ་ཅི་ཟེར་རམ། དེང་སང་སྤྱི་ཚོགས་ལྷིང་འཇགས་རེད། འཚོ་བ་བཟང༌། ཆོས་དར། ད་ཁྱོད་མ་སྐྱིད་མ་བདེ་བ་ཅི་འདུག”

“ཨ་ཕ། ངས་ནང་སེམས་ཀྱི་ཞི་བདེ་ངོ་མ་དེ་ཟེར་བ་ཡིན། དེ་བས་ང་འཛམ་གླིང་གི་ཞི་བདེའི་དེད་དཔོན་ཆེན་མོ་མཇལ་བར་འགྲོ་རྒྱུ”

“ཨ་་་ ཞི་བདེའི་དེད་དཔོན་ཆེན་མོ། ཨོ། ཁྱོད་རྒྱ་གར་ལ་སོང་ནས་རབ་ཏུ་འབྱུང་རྒྱུ་ཟེར་རམ

“ཨ་ཕ། ང་ལ་དེང་སང་རྟག་པར་རྨི་ལམ་ངོ་མཚར་དེ་འདྲ་རྨི་གིན་འདུག”

“ཁྱོད་་་ ཁྱོད་ངོ་མ་་་”

“་་་ ་་་”

གསུམ།

 

          ཁ་བ་འབབ་པའི་ཉིན་ཞིག སྦྲ་ནག་ཟད་པོ་ཞིག་གི་ནང་ནས་མ་སྨད་གཉིས་ཀྱི་སྐད་ངག་གཉོམ་པོ་ཞིག་གྲང་རླུང་ཁྲོད་དུ་འདར་བྱུང༌།

“ཨ་ཡོ། ཨ་མ་་་ ནོར་བུ་སློབ་མཐར་ཕྱིན་ནས་དགུན་གནང་ལ་ཡོང་རན་གྱིན་འདུག ད་ང་མགྱོགས་པོ་དྲག་སོང་ན་བསམ་གི”

“བུ་མོ། ནོར་བུ་ཟེར་བ་དེ་ངོ་མ་ནོར་བུ་འདྲ་བོ་ཞིག་ཨེ་ཡོད་ན། གཅིག་བྱས་ན་ཁྱོད ཁྱོད་བརྗེད་སོང་ཡོད་རྒྱུ་རེད”

“ཨ་མ། ཁོ་ངའི་ནོར་བུ་ངོ་མ་ཡིན། ང་གཉིས་ཕན་ཚུན་ལ་ཞེ་འདང་ཆེ། ཁྱོད་སེམས་ཁྲལ་མ་བྱེད། ཨ་ཡོ་་་”

“ཞེ་འདང་ཆེ་ན་ཡང༌། ནོར་བུ་ཚང་ནོར་ལྷ་ལྟར་ས་འདིའི་ཁྱིམ་ཚང་ཕྱུག་ཤོས་རེད། གལ་ཏེ་ཁོང་ཚང་གིས་མོས་མཐུན་མ་བྱས་ན་ཅི་བྱེད”

“ངས་ཀྱང་དེ་འདྲ་དྲིས་མྱོང། ཁོས། བྱངའི་ཨ་ཕ་སྙིང་རྗེ་ཅན་ཆོས་སེམས་ཡོད་མཁན་ཞིག་ཡིན། ལྷག་པར་ང་ལ་བརྩེ་འདང་ཆེ་བས་ངའི་འདོད་ཐོག་ལ་འཇོག་གི་རེད། གལ་ཏེ་མ་བཞག་ན་ང་གཉིས་གཞན་ཞིག་བྲོས་འགྲོབྱཞེས་བཤད་མྱོང༌། ཨ་”

“ཨོ། ད་དེ་འདྲ་ཞིག་ཡིན་པར་སྨོན”

“ཨ་ ཨ་ཡོ་ ཨ་མ། ང་ལ་གཟེར་རྒྱག་གི”

“ཡག་པོ་མར་ཉོལ་སྡོད”

“ཨ་ཡོ། ཨ་ཡོ་་་”

“བརླ་བར་ཕྱེས་དང༌། ཡ་ད་མགོ་ཆུ་ཐོན་འདུག སྐྱེ་རྒྱུ་རེད”

“ཨ྄་ཡོ་ ཡོ་”

“སྲོན། སྐད་མ་རྒྱག”

“ཨ་ མ་ངས་སྲན་ཐུབ་ཀྱི་མི་འདུག”

“ཤུགས་ཆེན་པོས་མར་ཚུར”

“ཨ་ཡོ། ཨ་མ་”

“དབུགས་ཁོག་ལ་བཅུག་ནས་ཚུར”

“ཨ་མ། ང་ ཤི་ས་རེད། ཨ་ཡོ་ ཨ་”

“བུ་མོ། བུ་མོ། དྲན་པ་སོས་དང༌། ངའི་བུ་མོ་་་”

          ཨ་མའི་ངུ་སྐད་ཆེན་པོ་དེ་རླུང་དམར་གྱི་ཁྲོད་དུ་ཁྱབ་ནའང༌། བུ་མོའི་སྡུག་སྐད་དང་ཕྲུ་གུའི་ངུ་སྐད་ཅི་ཡང་ཐོས་རྒྱུ་མེད་པར་གྱུར།

 

བཞི།

 

          འབྲས་ལྡན་སྟོན་གྱི་ཉིན་ཞིག རྒྱ་གར་འཕགས་པའི་ཡུལ་གྱི་གནས་མཆོག་དྷ་རམ་ས་ལའི་རི་རྩེ་དཀར་པ་གངས་དང་རི་སྐེད་ནགས་ཀླུང་སྨུག་གིས་བཟུང་པའི་རྫ་རི་སྨུག་པོ་རྡོ་ལ་དར་གྱི་པང་ཁུག་ཅིག་ན། ཨ་ཁུ་མཚམས་པ་བ་ཞིག་ལ་ཚན་རིག་པ་ཞིག་གིས་བཅར་འདྲི་གནང་གིན་འདུག

“ཁྱེད་རང་སྒོམ་བརྒྱབ་ནས་ལོ་ཅི་ཙམ་སོང”

“ང་རི་འདིར་འབྱར་ནས་ལོ་ཉི་ཤུ་ཙམ་འགོར”

 “ཁྱེད་ཀྱི་རྩ་བའི་བླ་མ་སུ་ཡིན། སློབ་གཉེར་ཇི་ལྟར་གནང”

“ང་ལ་རྩ་བའི་བླ་མ་ཟེར་ན་དགེ་བའི་བཤེས་གཉེན་ཟེར་ན་ྋསྐྱབས་མགོན་རྒྱལ་བ་བསྟན་འཛིན་རྒྱ་མཚོ་གཅིག་པུ་ཡིན། ཁོང་གི་གསུང་ཆོས་ཅི་གནང་ཚང་མར་ཉན་ཁུལ་བྱས། ལྷག་པར་ལམ་རིམ་ཁག་ལ་ཞིབ་མཇལ་གྱིས་སྒོམ་སྒྲུབ་ཉམས་ལེན་ལ་འབད་ཁུལ་བྱེད་ཀྱིན་ཡོད”

“འདི་ལྟར་སྒོམ་སྒྲུབ་བྱས་ན་དཀའ་ལས་འདུག་གམ”

“ཐོག་མར་ཚ་གྲང་དང་ལྟོགས་སྐོམ་ཅུང་བྱུང་ན་ཡང༌། སེམས་ལ་འདོད་ཆགས་ཞེ་སྡང་གིས་གཙེ་བའི་དཀའ་ངལ་མི་འདུག སྤྱིར་ན་མཚམས་ལ་འདུག་པ་འདི་དཀའ་བ་ཆེད་དུ་སྤྱད་པའི་བཟོད་སྒོམ་གྱི་ཉམས་ལེན་ཞིག་ཡིན་པས་བདེ་བར་བསྡད་ན་མི་འགྲིགས། སྟོན་པ་ཐུགས་རྗེ་ཅན་དང་རྗེ་བཙུན་མི་ལའི་རྣམ་ཐར་སྐྱོང་ཁུལ་བྱས་པས་ལུས་སེམས་ཀྱིས་དཀའ་བ་སྤྱད་ན་མཐར་ལུས་སེམས་ལ་བདེ་བ་ཐོབ་པ་མྱོང་བས་གྲུབ”

“ཁྱེད་ཐོག་མར་རབ་ཏུ་བྱུང་ཚུལ་སྐོར་ཅིག་གསུང་རོགས” “ང་ལོ་བཅུའི་ཐོག་ཨ་མ་གྲོངས་པས་ཆུང་དུས་ནས་སྐྱོ་སྣང་ཞིག་དང་འབྲལ་མ་མྱོང་ལ། ཉིན་ཞིག་ངས་དྭགས་པོ་ལྷ་རྗེའི་རྣམ་ཐར་མཇལ་ནས་མིག་ཆུ་ཤོར་སོང༌། སྐབས་དེར་བསམ་ཡུལ་ལས་འདས་པ་ཞིག་ལ་ང་དགའ་སའི་བུ་མོ་ཞིག་ཡོད་པ་ཕྲུ་གུ་སྐྱེ་མ་ཐུབ་པར་མ་བུ་གཉི་ག་མ་འཚམས། འདི་ལས་རེད་ཟེར་ཆོག དེ་ནས་ང་ལ་འཁོར་བར་ངེས་འབྱུང་གི་བློ་བཟློག་མེད་ཅིག་སྐྱེས་ནས་རྒྱ་གར་ལ་ཡོང་ནས་ྋརྒྱལ་བ་རིན་པོ་མཆོག་གི་མདུན་ནས་རབ་བྱུང་བསྒྲུབས། ང་ལ་འཇིག་རྟེན་འཁོར་བའི་བདེ་སྐྱིད་ཀྱི་སྐལ་ཆད་པས། ངས་བདེ་སྐྱིད་ངོ་མ་དེ་ནང་སེམས་ཀྱི་འཇིག་རྟེན་ན་ཡོད་པར་ཡིད་ཆེས་ཀྱིས་སེམས་ཀྱི་ཞི་བདེ་འཚོལ་སྙེག་བྱས། ད་ཆ་ང་ལ་སྡུག་བསྔལ་ཅི་ཡང་མེད”

“ཁྱེད་ལ་གཏུམ་མོ་མེ་འབར་ཟེར་བ་སོགས་ཀྱི་ནུས་པ་ཁྱད་པར་བ་ཡོད་ཟེར། ང་ཚོས་བརྟག་དཔྱད་ཅིག་བྱས་ན་འགྲིག་གམ”

“བརྟག་དཔྱད་བྱས་ནས་ཅི་བྱེད། ཁྱེད་ཚོ་ཡིད་མི་ཆེས་སམ”

“ཡིད་མི་ཆེས་མཁན་མང་པོ་ཡོད། གལ་ཏེ་ང་ཚོས་བརྟག་དཔྱད་ཀྱིས་ར་སྤྲོད་བྱས་ན་ནང་ཆོས་ཀྱི་ནུས་པ་ཚང་མས་ཤེས་ནས་ཆོས་ལ་དད་པ་བྱེད་མཁན་ཡང་མང་དུ་འགྲོ་གི་རེད”

“ཁྱེད་རང་གི་ཀུན་སློང་དང་དམིགས་ཡུལ་བཟང་པོ་རེད། འོན་ཀྱང་རྩ་རླུང་ཐིག་ལེ་སྒོམ་སྟོབས་ཀྱི་ནུས་པ་འདི་དག་བདེ་སྤྱོད་ལོག་ཏུ་སོང་ན་ཉེས་པ་ཆེ། དོན་དག་འདི་ྋརྒྱལ་བ་རིན་པོ་ཆེ་ལ་ཞུས་ནས་བཀའ་འཁྲོལ་ཐོབ་སོང་ན་ཁྱེད་ཚོས་ང་ལ་ཅི་བྱས་ཀྱང་ཆོག”

“ལགས་སོ། ཐུགས་རྗེ་ཆེ། རྗེས་མ་མཇལ་ཡོང”

          མི་རིང་བར་སྒོམ་ཆེན་བསྟན་འཛིན་ནོར་བུ་ཟེར་བ་ཞིག་གི་མཚན་སྙན་འབྲུག་ལྟར་གྲགས། ཁོང་ལ་ཆོས་ཚོགས་ཤིག་འཛུགས་རྒྱུ་དང༌། དགོན་པ་ཞིག་བཞེངས་རྒྱུ་སོགས་ཀྱི་རེ་བ་འདོན་མཁན་མང་དུ་བྱུང་མོད། ཁོང་གིས་དེ་དག་ལ“ངའི་དགོན་པ་ནི་རི་ཁྲོད་ཡིན། ཆོས་ཚོགས་ཀྱང་དགོས་ན་དེ་ནས་ཚུགས་ཆོག”ཅེས་གསུངས་པས་ལ་ལ་ཞིག་གིས་ཚོད་ལྟ་རེ་བྱས་ཀྱང་ཁུངས་མ་ཁྱོལ། ཡིན་ནའང་ཚན་རིག་པ་མང་པོ་ཞིག་གིསབྱབོད་ཀྱི་ནོར་བུབྱའདི་ལསབྱནོར་བུུབྱགསར་བ་ཞིག་བརྙེད་དེ་མིའི་ལུས་སེམས་ཀྱི་གསང་བ་མང་པོ་ཞིག་ལ་ཞིབ་འཇུག་གསར་བའི་སྒོ་འཕར་བྱས་པ་དང་དུས་མཉམ་མགོ་སེར་མིག་ལྗང་ལ་སོགས་པའི་གདུལ་བྱ་མང་པོ་ཞིག་ནང་ཆོས་ལབྱདགའ་དད་མཚརབྱགསུམ་ཅི་རིགས་ཀྱིས་འཇུག་བཞིན་ན་ཡང༌། བོད་ཀྱི་གྲྭ་བ་མི་ཉུང་བ་ཞིག་ལོ་རེ་ནས་ཟླ་རེ་བཞིན་གྲྭ་ས་ནས་གྲོང་ཁྱེར་འགྲིམས་པ་དང༌། དམར་སེར་ནས་སྐྱ་ཐལ་དུ་འགྱུར་བཞིན་ནོ།།

 

ས་ཟླའི་བཅོ་ལྔའི་ཉིན།