༄།ཀ་བཤད་ག་མེད་འདི་མེད།
ཀ་མད་སུམ་ཅུར་འགྲོགས་འདྲིས་མེད།
ཁ་བ་ཅན་ལ་དུངས་སེམས་མེད།
ག་ཞ་འཛུམ་གྱི་བསུ་བ་མེད།
ང་རང་ཡིན་སྙམ་ང་རྒྱལ་ཅན།
ཁྱོད་ལ་དགའ་མཁན་སུ་ཞིག་ཡོད།
ཅ་ཅོ་མ་གཏོགས་གཏམ་སྙན་མེད།
ཆ་བྱད་མ་གཏོགས་ཆ་ལུགས་མེད།
ཇ་ཆང་མ་གཏོགས་ལོངས་སྤྱོད་མེད།
ཉ་མ་སློབ་མ་ཅང་མེད་ཚོ།
ཁྱོད་ལ་ཡོན་ཏན་ཅི་ཞིག་ཡོད།
ཏ་རེ་མ་ཎིའི་ཚིག་ཙམ་མེད།
ཐ་མག་ཆང་དང་འབྲལ་བ་མེད།
ད་རིང་སང་གི་འཆར་གཞི་མེད།
ན་ནིང་ལོ་ཡི་གྲུབ་འབྲས་མེད།
ཁྱོད་ཀྱི་མི་ཚེར་སྙིང་པོ་ཅི།
པ་སངས་ལྟར་དཀར་བསམ་པ་མེད།
ཕ་ལམ་རྡོ་རྗེའི་དམ་ཚིག་མེད།
བ་མོ་འདོད་འཇོའི་ལོངས་སྤྱོད་མེད།
མ་རབས་ལས་ལ་རྫོགས་མཐའ་མེད།
ཁྱོད་ལ་རེ་བ་ཅི་ཞིག་ཡོད།
ཙ་ན་ཡིན་ཡང་སྤྱི་དོན་མེད།
ཚ་གྲང་དཀའ་བར་བཟོད་སྲན་མེད།
ཛ་དྲག་གནས་ལ་ཚོར་སྣང་མེད།
ཝ་ལོང་རྒྱན་ལས་གཅེས་ནོར་མེད།
བུད་མེད་ཁྱོད་ཚོར་འཇོན་ཐང་ཅི།
ཞ་ར་ཞ་མོར་སྙིང་རྗེ་མེད།
ཟ་འཐུང་གཉིད་ལ་ཆོག་ཤེས་མེད།
འ་འུར་འདོད་གཏམ་ཚར་དུས་མེད།
ཡ་རབས་ལུགས་ལ་རྩིས་ཐང་མེད།
ཁྱོད་ཚོ་དགོས་མཁན་སུ་ཞིག་ཡོད།
ར་མ་ལུག་དང་ཁྱད་པར་མེད།
ལ་ལུང་ཉུལ་ལ་འགྲན་ཟླ་མེད།
ཤ་རུས་གཅིག་གི་ངོ་ཚ་མེད།
ས་མཐའ་འཁྱམ་གི་ཟ་ལེ་རྒྱ།
ལ་ལ་ཞིག་ལ་ཅི་ཡང་མེད།
ཧ་ཅང་བསྔགས་འོས་བྱས་རྗེས་མེད།
ཧ་ལས་དགོས་པའི་ཡོན་ཏན་མེད།
ཨ་ལགས་མང་པོར་དད་པ་མེད།
ཨ་མདོ་བ་ཡི་རྣ་འབྱོག་མེད།
ང་རང་ལ་ཡང་ཅི་ཞིག་ཡོད། །
༢༠༠༧།༨།༨།