༄།ཀ་བཤད་ཡ་མེད་རིལ་བུ།

 

 

 

ཀ་ཡི་གེ་སུམ་ཅུ་ཐམ་པ་བོ།

ཁ་དུང་སོ་སུམ་ཅུའི་རྒྱན་ཆ་ཡིན།

ག་གཞན་ལ་མེད་ཀྱང་ང་ལ་ཡོད།

ང་ཀ་ཁ་འཚོ་བའི་རྫི་བོ་ཡིན།

ང་རྫི་བོ་གངས་རིའི་གླུ་བ་ཡིན།

 

ཅ་རིལ་རིལ་ལྟ་བུའི་ཕོ་བའི་ཆེད།

ཆ་ཡོད་མེད་ཚང་མ་སྨྱོ་ལ་ཁད།

ཇ་རྩམ་པ་གཉི་ག་ཡོད་ས་ནས།

ཉ་ཉུངས་མ་ལ་སོགས་དགོས་པ་མེད།

ང་མགོ་ནག་རྩམ་གཟན་འགྱུར་མེད་ཡིན།

 

ཏ་ཏིས་རིན་རྒྱ་དཔོན་ཆེ་ཆུང་ཚོས།

ཐ་མ་ཏི་ཟེར་ནས་སྤྱོ་ན་ཡང༌།

ད་རང་གི་མི་རིགས་མདུན་ལམ་ཆེད།

ན་འཆི་བ་མི་འཛེམས་འཐབ་ན་འདོད།

ང་དཔའ་ཞིག་མེད་ཀྱང་དཔེ་ཞིག་འཇོག

 

པ་ཞིམ་པོས་གཅེས་སའི་བུ་ཚ་དང༌།

ཕ་མི་གཅིག་སྤུན་དང་སྲིང་ཆུང་ཚོ།

བ་འབྲི་མོ་འཚོ་ཞོར་བཞོ་ཞོར་ལ།

མ་དྲིན་མོ་ཆེ་ལ་བདག་རེ་བྱོས།

ང་ས་ཐག་རིང་ཡང་སེམས་ཐག་ཉེ།

 

ཙ་ཡ་མེད་དེང་སང་མང་རབས་ཟེར།

ཚ་མེ་མདའ་འཕེན་མཁན་ཡོད་རབས་ཟེར།

ཛ་ཛོ་རེའི་ནང་དམེ་མ་གཏོགས་པ།

ཝ་འཕར་སྤྱང་བསད་པ་མ་མཐོང་བས།

ང་ཁོ་ནག་གཏིང་ནས་ཆད་དེ་ཡོད།

 

ཞྭ་ཤོག་ཞྭ་བསྐོན་དུས་ནག་ཞྭ་ཡིན།

ཟྭ་ལྕགས་སྒྲོག་བརྒྱབ་དུས་ཉེས་ཅན་ཡིན།

འ་ཡོ་ཡོ་ཤོར་དུས་དཔའ་བོ་མིན།

ཡ་མི་བྱེད་ཡ་བོ་ཁ་ཁེར་རེད།

ང་སྨོན་སའི་དཔའ་བོ་དེ་འདྲ་མིན།

 

རྭ་ལྡེམ་མེ་སྒྱིང་ནོ་བྲེ་སར་འབྲོང༌།

ལ་ལབ་ཙེ་སྟོད་ནོ་ལ་རྒྱ་ཅན།

ཤ་ཁྲག་ལ་རྔམ་ནོ་དམར་ཡག་སྟག

ས་རང་ཡུལ་སྲུང་ནོ་རྒྱ་སྟག་ཁྱི།

ངས་བསྟོད་སའི་སྟག་ཤར་མི་མང་གི

 

ཧ་ལས་ན་ཚེ་སྲོག་འཆོར་རྒྱུ་རེད།

ཡང་མིན་ན་ཁྲིམས་སྒོར་སྦྱོར་རྒྱུ་རེད།

ཨ་ལ་ལའི་གྲུབ་རྟགས་མེད་ན་ཡང༌།

བུ་སྐྱེས་ཀི་མྱིང་ཞིག་ལོས་ཀྱང་འཇོག

ང་ཤི་ཡང་བསམ་དོན་གྲུབ་པ་ཡིན། །

༢༠༠༧།༨།༨