གངས་ཅན་མགོན་པོར་གུས་བཏུད་ནས།།

གངས་རིའི་དཔའ་བོར་མྱ་ངན་ཞུ།།

གང་གི་མཁྱེན་བརྩེའི་འོད་ཞགས་ཀྱིས།།

གང་དག་ལམ་སྣ་འདྲེན་པར་མཛོད།།

 

དམར་གཞུང་སྲིན་པོའི་སྡེར་ཁྱིམ་ནས།།

དམར་ཆུང་སྲོག་དེ་ཤོར་བས་ཕངས།།

དཀར་ཕྱོགས་ལྷ་དང་མི་རྣམས་ཀྱིས།།

དཀར་པོའི་ལམ་དེར་སྐྱེལ་མ་མཛོད།།

 

བདེན་སྟོབས་རླུང་གིས་བསྐྱོད་པ་ཡིས།།

འཇིགས་མེད་རྒྱ་མཚོ་འཕྱུར་བའི་རླབས། །

མ་ཁོག་ཤར་ནུབ་འཕྱོ་བ་འདིར།།

ངོ་མཚར་བསྔགས་པའི་རོལ་མོ་འཁྲོལ།།

 

འཕགས་ཡུལ་ཉེན་ཁས་བརྒྱུད་པ་དེ།།

གནས་མཇལ་ལྟ་སྐོར་ག་ལ་ཡིན།།

ཆོས་སྲིད་དོན་གྱི་བདག་པོ་ལ།།

དད་འདུན་རེ་བ་བཅོལ་བ་ལགས།།

 

ས་བྱི་ཞི་རྒོལ་ཆེན་པོའི་སྐབས།།

གནས་ཚུལ་རླུང་གི་འཕྲིན་ལ་བསྐུར།།

དཀའ་སྡུག་ཟིན་ཐོ་ཁྲག་བྲིས་མ།།

དམྱལ་ཁམས་གསར་བའི་གསང་བ་ཡིན།།

 

དམྱལ་བ་ལྟ་བུའི་བཙོན་ཁང་དུ།།

མནར་གཅོད་དྲག་པོས་མ་ཐུལ་བ།།

འཇིགས་པ་མེད་པའི་མགོ་རིལ་གང།།

བདེན་པའི་སྟོབས་ཀྱི་སྐྱེས་བུ་ལགས།

 

མི་འཇིགས་སྤོབས་པ་མཐོ་བ་དེ།།

དགྲ་ཞེས་ཞེ་ནས་སྡང་བས་མིན།།

དྲང་བདེན་སྐྱོང་བའི་མི་དམངས་ལ།།

བདེན་པ་བདར་བའི་སྙིང་སྟོབས་ཡིན།

 

བོད་ལ་དགའ་ཞེན་ཆེ་བ་དེ།།

གཉེན་ཞེས་ཞེན་ཆགས་ཙམ་དེ་མིན།།

དམ་ཆོས་སྐད་དང་ཡི་གེ་སོགས།

ཀུན་ཕན་རིག་གཞུང་སྐྱོབ་ལ་རངས།།

 

ལུས་སྲོག་བློ་ཡིས་བཏང་བ་དེ།།

དཔའ་བོའི་མཚན་སྙན་ཐོབ་ཕྱིར་མིན།།

བསྟན་སྲིད་རང་རིགས་རང་དབང་སླད།།

རང་སྲོག་རིན་ཐང་བསྐྲུན་པ་ལགས།།

 

དཔའ་མཛངས་དམ་པ་ཁྱེད་ཅག་གི།

འཚེ་མེད་བདེན་དོན་རྩོད་པའི་ལམ།།

འདི་ན་གངས་རིའི་རྗེས་རབས་པས།།

རང་གི་སྙིང་ལ་པར་དུ་འདེབས།།

 

བསྟན་སྲིད་སྲི་ཞུའི་བྱེད་པོ་རྣམས།།

སྤྱན་རས་གཟིགས་ཀྱིས་མི་བསླུ་ཞེས།།

གངས་ཅན་མགོན་པོའི་བདེན་ཚིག་གིས།།

སྐྱེས་བུ་ཁྱེད་ཅག་རྒྱལ་གྱུར་ཅིག།