བཅོ་ལྔའི་མཆོད་བཤགས་རང་སེམས་དགའ་སྐྱེད།
བླ་མ་སངས་རྒྱས་བསྟན་འཛིན་རྒྱ་མཚོའི་མགོན།།
དད་པའི་ཁྲི་ལ་བསུས་ཏེ་ཕྱག་འཚལ་མཆོད།།
རང་གི་སྒོ་གསུམ་སྡིག་ཚོགས་དབྱིངས་སུ་བཤག།
གཞན་གྱི་དགེ་བ་ཀུན་ལ་རྗེས་ཡི་རང།།
འདི་ཕྱིའི་ལེགས་ལམ་རྟག་ཏུ་སྟོན་པར་མཛོད།།
སྐུ་ཚེ་རྡོ་རྗེའི་ཁམས་སུ་བརྟན་པར་གསོལ།།
བྱང་ཆུབ་སེམས་ཀྱི་རིན་ཆེན་རིལ་བུ་གང།།
སྟོང་ཉིད་བདུད་རྩིས་འཐུང་ལ་ངོམ་མེད་ཤོག།
བདག་གི་སྒོ་གསུམ་དགེ་བ་མར་མེའི་འོད།།
རང་གཞན་གཏི་མུག་མུན་པ་སེལ་ཕྱིར་སྤྲོ།།
འཕྲལ་ཕུགས་བདེ་དགའི་དཔལ་ལ་ལོངས་སྤྱོད་ཅིང།།
གཏན་བདེ་བྱང་ཆུབ་གོ་འཕང་འཐོབ་ཕྱིར་སྔོ།།
མཆོད་ཁང་ནང་དུ་སེམས་ཅན་ཐམས་ཅད་ཅེས།།
སྨོན་ལམ་འདེབས་པ་སྐད་ཅིག་ཙམ་ནས་བརྗེད།།
རྒྱལ་ཁབ་གཞན་ལ་སྐྱབས་བཅོལ་གནས་ན་ཡང།།
བོད་དང་ཆོལ་ཁའི་ཕྱོགས་ཞེན་འདོར་བར་དཀའ།།
སེམས་ཅན་མཐའ་དག་གཉེན་དུ་བསུ་དགོས་པའི།།
སེམས་མཆོག་བསྐྱེད་ཀྱང་རང་ཉིད་གཅེས་འཛིན་བློ།།
ཟློག་དཀའ་རྦབ་རྡོ་འདྲ་འདི་འགོག་དཀའ་བས།།
བདག་ཅག་འབངས་རྣམས་ཕན་ཚུན་འཁང་ཞིང་གཤེ།
ཀླུ་མཁར་བྱམས་དང་ཨོ་རྒྱན་སྟོབས་རྒྱལ་སོགས།།
དུས་ཀྱི་སྟོན་པར་སྒྲོ་སྐུར་བྱེད་རྣམས་ཀྱི།།
བྱ་བ་སྤྱོད་པར་དགག་གཞག་སྤྲོས་པ་ཡང་།།
གང་ཟག་ཉིད་ལ་དགྲ་བཞིན་བཟུང་བས་མིན།།
ཆོས་ལྡན་བོད་མི་བྱ་ཁྲས་བྱིའུ་ཚོགས་ལྟར།།
བསད་ཅིང་གཏོར་བའི་རྒྱ་དམར་དགྲ་ལ་ཡང།།
འཚེ་མེད་ཞི་བའི་གྲོས་ཁ་བསྡུར་དགོས་ན།།
སྤྱོད་ངན་སྤུན་ཟླར་བཟོད་སྲན་ལོས་ཀྱང་དགོས།།
འོན་ཀྱང་མ་རྟོགས་ལོག་རྟོག་ཅི་རིགས་ཀྱི།།
ཚུལ་མིན་གཏམ་ལ་ཚུལ་མཐུན་དགག་པའི་གཏམ།།
ཡིན་སྙམ་སྤོབས་པས་བཤད་ཅིང་འབྲི་བ་འདིར།།
ནོངས་པ་མཆིས་ན་སྤུན་ཟླས་བཟོད་པར་གསོལ།།
ཁ་སང་ཀླུ་མཁར་བྱམས་ལ་ཁ་བརྡ་བྱས།།
དྲྭ་ལམ་བརྒྱུད་དེ་ཐུག་པ་དགའ་ཡོད་ཟེར།།
ལྟ་ཚུལ་མི་མཐུན་ན་ཡང་བསམ་ཚུལ་དག།
བཤད་རེས་ཉན་རེས་བྱས་ན་བཟང་ཞེས་ཟེར།།
༧གོང་ས་མཆོག་དང་སྐྱེས་ཆེན་དམ་པ་ཚོར།།
ཁ་གཏོང་འབངས་སེམས་རྨ་ཁ་བཟོ་བ་ནོར།།
ཤེས་ཡོན་ཅན་ལ་བྱ་གཞག་མང་ཞེས།།
རེ་སྐུལ་ཚིག་འགའ་བྲིས་པར་ལགས་སོ་ཟེར།།
ཐུབ་བསྟན་ལེགས་བཤད་ཟེར་བའི་བརྙན་ཐུང་ཞིག།
ལག་སོན་ལེགས་བཤད་འདོད་དེ་བསྟོད་བཅས་བསྐུར།།
དགྲ་བོ་ཡིན་ཡང་དྲང་བདེན་གཏམ་སྨྲས་ན།།
དང་ལེན་ཐུབ་པ་ཕོ་རབ་རྣམས་ཀྱི་གཤིས།།
ཆོལ་ཁ་གསུམ་པོ་ཁྱིམ་གཅིག་ཡིན་བདེན་ན།།
བོད་མི་ཚང་མ་སྤུན་ཟླ་ཡིན་འདོད་ན།།
རིགས་དང་ཕྱོགས་སུ་བཅད་ནས་དགྲ་ཟླ་ལྟར།།
སྡང་བའི་སྤྱོད་ཚུལ་དེ་དག་ཅིའི་ཕྱིར་སྟོན།།
བསམ་བཞིན་གནག་པའི་སྐྱོན་ཆ་མ་གཏོགས་པའི།།
མ་ཤེས་འཁྲུལ་བ་བཤགས་ན་འདག་འགྱུར་བས།།
རང་སྐྱོན་རང་གིས་ཤེས་ནས་བཤགས་པ་ཚོར།།
ཡི་རང་སྤུན་ཟླའི་མཛའ་སེམས་བདག་ལ་ཡོད།།
ལོ་ངོ་འགའ་ལ་ཁ་ལག་ཚོད་བཟུང་ནས།།
ཇོ་བཟང་ཚུལ་བཟུང་གནས་པས་མ་ཕན་པས།།
ད་ནི་གཟུར་གནས་རྣམ་དཔྱོད་རལ་གྲི་དེ།།
ལན་ཅིག་མ་འཕྱར་དགོས་པ་མ་གྲུབ་སྙམ།།
སྤྱི་ཕན་ལྷག་བསམ་ཆེན་པོ་མེད་ན་ཡང།།
སུ་ལ་གནག་འདོད་ནམ་ཡང་མ་སྐྱེས་མོད།།
ཕྲག་དོག་ཕྱོགས་ཞེན་ཅན་ཚོར་ཕོག་ཐུག་རེ།།
བཟོ་དགོས་བྱུང་ན་བཟོད་པ་གནང་རོགས་ཀྱེ།།
ཚིགས་སུ་བཅད་པ་འདི་ཡང་སེམས་གཏམ་སྟེ།།
ཅུང་ཟད་ཉེས་པ་མཆིས་ན་རྒྱལ་བས་གཟིགས།།
རང་སེམས་རང་གནོང་མེད་པའི་དགའ་བ་འདི།།
དགེ་བའི་རང་བཞིན་ཡིན་པས་བདག་སྤྲོ་ཨང་།།
ཉེ་ལམ་ངོ་དེབ་སོགས་དྲྭ་ལམ་གྱི་དྲྭ་གྲོགས་འགའ་རེར་ཕོག་ཐུག་ཅུང་རེ་སོང་བའི་རྐྱེན་བྱས་ཏེ་རང་གནོང་མེད་པའི་སེམས་གཏམ་ཞིག་གི་ཚུལ་དུ་ཤར་མར་བྲིས་པའོ།།༢༠༢༠ ༦ ༥ ས་ག་ཟླ་བའི་ཚེས་༡༥
ས་ཟླར་བསྒྲོན་པའི་མཆོད་མེ་ཚར་བདུན།
ཆུ་མོ་སྟག་ལོའི་ས་ཟླའི་ཚེས་༡༥ལ།
ཕྱག་སྟོང་ཕྱག་བཞི་ཕྱག་ཟུང་གཅིག་འདུས་སྐུ།།
བྱང་སེམས་སྟོང་ཉིད་ཟླ་བ་རྡོ་རྗེའི་ཐུགས།།
གང་ལ་དེར་འདུལ་ཞི་བསིལ་སྙན་པའི་གསུང།།
བླ་མ་འཕགས་པ་སྤྱན་རས་གཟིགས་ལ་འདུད།།
རང་གཞན་དགེ་བའི་དཀྱིལ་འཁོར་རྒྱ་མཚོས་མཆོད།།
བདག་སོགས་སྒོ་གསུམ་ཉེས་ཀུན་མཐོལ་ལོ་བཤག།
མགོན་པོ་ཉིད་ཀྱི་མཛད་བརྒྱར་རྗེས་ཡི་རངས།།
སྐུ་ཚེ་ཞབས་བརྟན་ཆོས་སྦྱིན་ཟད་མེད་མཛོད།།
བདག་གི་ཐོས་བསམ་དགེ་ཚོགས་མ་ལུས་པ།།
འགྲོ་ཀུན་ཞི་བདེའི་དཔལ་ལ་ལོངས་སྤྱོད་ཅིང་།།
མཐར་ཐུག་བྱང་ཆུབ་སྙིང་པོ་འཐོབ་ཕྱིར་བསྔོ།།
དཀོན་མཆོག་གསུམ་པོས་རྟག་ཏུ་ཤིས་གྱུར་ཅིག།