༄།སྒྲོལ་མ་ལྷ་མོ།
སྒྲོལ་མ་ལྷ་མོ་ཕྱི་ལ་ཐོན་པ་ན།
ལམ་འགྲོ་རྣམས་ཀྱིས་སྙིང་རྗེའི་མིག་གིས་ལྟ།
གོས་དང་རྒྱན་དམན་ལུས་ཀྱི་སྟོབས་ཀྱང་ཞན།
ཡིན་ཡང་རང་སེམས་ཆོག་ཤེས་དགའ་བས་ཚིམ།
སྒྲོལ་མ་ལྷ་མོས་གང་བྱས་གར་སོང་ཡང༌།
དབང་ཆེན་ཕྱུག་པོ་མཁས་པའི་སྤྱན་ལམ་དང༌།
ན་མཉམ་ཕོ་གསར་ཀུན་གྱི་མིག་ན་མེད།
འོན་ཀྱང་ནང་གི་ཕ་མའི་ནོར་བུ་ཉིད།
ང་མཐོ་ང་ཕྱུག་ང་མཁས་ཟེར་བ་བརྒྱ།
མི་ཁོམ་ལས་བརྒྱས་སྨྱོས་པའི་མཐའ་མ་རུ།
ཁྲིམས་རའི་ཕྱི་ནང་ཀུ་ཅོས་འགེངས་པའི་དུས།
སྒྲོལ་མ་ལྷ་མོ་བདེ་བའི་གཉིད་དུ་ཡུར།།
སྙན་ཚིག་ཅིག་གི་ལྡོག་བྲིས
༢༠༠༧།༩།༨།ལ།