རྨི་ལམ་ནང་གི་མངོན་སུམ།
གླིང་ཆེན་པོའི་འགྱུར་བ་མིག་གིས་མཐོང།།
བོད་ཆེན་པོའི་ལས་སྐལ་སེམས་ཀྱིས་མཐོང།།
དེ་མཐོང་ཞིང་བསམ་བཞིན་གཉིད་ལ་ཤོར།།
གཉིད་སྐྱིད་པོའི་རྨི་ལམ་འདི་ལྟར་བྱུང།།
གངས་དཀར་པོའི་རྩེ་ལ་སྤྲིན་ཞིག་ལྷུང།།
སྤྲིན་འཇའ་ཚོན་འདྲེས་མས་གངས་རི་བཀླུབས།།
སེང་དཀར་མོ་ཞིག་གིས་གཡུ་རལ་སྤྲུགས།།
གསུང་གད་རྒྱངས་འདྲ་ཞིག་འདི་ལྟར་བསྒྲགས།།
གནས་ལྷ་ས་སྔོན་གྱི་རྒྱལ་ས་ཡིན།།
བོད་ཁ་བའི་བླ་མཁར་སྨུག་པོ་ཡིན།།
བོན་ཆོས་རྒྱལ་དུས་སུ་ལུགས་གཉིས་དར།།
མཚན་སྙན་གྲགས་རྒྱལ་ཁམས་ཀུན་ཏུ་ཁྱབ།།
དབྱངས་གསལ་བྱེད་སོ་བཞིའི་འཕྲུལ་ཡིག་གིས།།
ཆོས་མདོ་སྔགས་འཕགས་པའི་ཡུལ་ནས་བསུས།།
མི་མཁས་པའི་སྐྱེས་རབས་གཙང་པོའི་རྒྱུན།།
ས་འཛམ་གླིང་སྐྱེ་དགུའི་གསོས་སུ་བཞུར།།
ཡུལ་ཆེན་པོར་རི་རྒྱ་ཀླུང་རྒྱ་བསྡམས།།
མི་ཀུན་ལ་རྒྱལ་ཁྲིམས་ཆོས་ཁྲིམས་བཅས།།
བོད་སྣོད་བཅུད་དགེ་མཚན་བསམ་མི་ཁྱབ།།
དེ་གནའ་རབས་བོད་ཀྱི་ལོ་རྒྱུས་ཡིན།།
སྲིད་དབང་ཆར་རྔམ་པའི་བླ་དཔོན་ཚོས།།
ཆོས་དགོན་སྡེ་དམག་གི་རྫོང་མཁར་བྱས།།
སྟོད་རྒྱ་གར་ཆོས་ལམ་དཀར་པོ་བཅད།།
སྨད་རྒྱ་ནག་ཇག་ལམ་དམར་པོ་ཕྱེས།།
རྒྱ་གོང་མའི་ཐམ་ག་གནམ་ལ་ཕྱར།།
ཧོར་ཆེན་པོའི་དམག་གི་ལམ་སྣ་དྲངས།།
བོད་ནང་ཁུལ་དབང་ཆ་འཕྲོག་རེས་བྱས།།
ཆོས་ཆབ་སྲིད་འདྲེས་མས་ལུགས་བཟང་བསླད།།
གླིང་ཆེན་པོའི་འགྱུར་རླབས་མ་མཐོང་གཅིག།
རྒྱ་དམར་པོའི་གཡོ་བྱུས་མ་རྟོགས་གཉིས།།
ནང་སྤུན་ཟླའི་དཔུང་གདང་འཐོར་བ་གསུམ།།
བོད་ཕམ་ཁའི་ཕྱི་ནང་འགལ་རྐྱེན་མང།།
བོད་མཐའ་མཚམས་སོ་སྲུང་མེད་པའི་ཐོག།
རྒྱ་ཇག་དམག་གདོང་འཐབ་མ་ནུས་པར།།
བོད་ཆོས་ལྡན་ཀླ་ཀློའི་བྲན་ཏུ་གྱུར།།
དེ་ཉེ་རབས་བོད་ཀྱི་ཕམ་ཁ་ཡིན།།
ལྷ་ཆོས་སྐྱོང་སྲུང་མའི་ལུང་བསྟན་གནང་།།
རྗེ་རྒྱལ་བའི་ཡེ་ཤེས་དབྱིངས་དཔྱད་གནང་།།
བུ་རྒོད་པོའི་དཔུང་གི་སྲུང་སྐྱོབ་བཅས།།
བོད་བཙན་བྱོལ་དུམ་ཞིག་རྒྱ་ལས་ཐར།།
གནས་རྒྱ་གར་ཡུལ་མིས་དགའ་བསུ་བྱས།།
ཕྱི་རྒྱལ་ཁབ་དུ་མས་རྒྱབ་སྐྱོར་བྱས།།
བོད་བཙན་བྱོལ་གཞུང་གི་གནས་གཞི་བཅས།།
བོད་གཞིས་བྱེས་རེ་བའི་གཞི་མ་ཆགས།།
རྗེ་རྒྱལ་བའི་ཐབས་མཁས་ཐུགས་རྗེ་མཐུས།།
སྲིད་དམངས་གཙོའི་ལམ་བཟང་ཡུན་གྱིས་བསྐྱངས།།
ཆོས་རིག་གནས་རྒྱུན་འཛིན་དར་སྤེལ་གནང།།
བོད་སེང་དར་རྒྱལ་ཁམས་ཡོངས་སུ་ཕྱར།།
དེ་དེང་སང་བོད་ཀྱི་གནས་བབ་སྟེ།།
དོན་དེ་དག་བློ་ལ་ངེས་པའི་ཐོག།
དུས་ད་ལྟའི་འོས་འགན་སྒྲུབ་པ་ལ།།
སེང་དཀར་མོའི་རེ་བ་ཚིག་གསུམ་ཞུ།།
བོད་དུམ་བུར་ཆད་ཀྱང་ཁྱིམ་ཚང་གཅིག།
སྐད་རིག་གནས་ཁྱིམ་རྒྱུད་ནོར་བུ་ཡིན།།
ནང་དམ་ཚིག་ནང་མིའི་གསོན་ཤུགས་ཡིན།།
བོད་མི་རེའི་ཡིད་ལ་ཉིན་རེར་སྒོམས།།
རྗེ་རྒྱལ་བ་འཚོ་གཞེས་སྐལ་བཟང་འདིར།།
གསུང་ཚད་མར་བཟུང་ནས་རྗེས་སྙེགས་དང་།།
རྩེ་ཕོ་བྲང་རི་བོ་གྲུ་འཛིན་ནས།།
སྐྱིད་ཉི་མ་འཆར་ལ་ཡུན་མི་རིང་།།
རྗེ་སྲིད་སྐྱོང་དམངས་ཀྱིས་བསྐོས་པ་དེས།།
དུས་ད་ལྟའི་སྲིད་སྐྱོང་འོས་གཞི་རྣམས།།
བློན་ཆེན་པོའི་དཔུང་རོགས་བདམས་གྱུར་ན།།
ནང་བཀྲ་ཤིས་ཕྱི་ཡི་དོན་ཡང་འགྲུབ།།
གསུང་གད་རྒྱངས་འདྲ་འདིས་སེམས་རྩ་དྲོས།།
འདི་མངོན་སུམ་ཡིན་ནམ་རྨི་ལམ་ཡིན།།
དེ་སྙམ་པའི་མོད་ལ་གཉིད་ལས་སད།།
ངའི་གློག་ཀླད་ངོས་ནའང་རྩོམ་ཞིག་གྲུབ།།
འདི་རྨི་ལམ་མངོན་སུམ་གཉིས་ག་ལགས།།
༢༠༢༠་ ༡༡་ ༠༧