བཞི་བའི་ཉེར་ལྔ།

 

རྒན་རྒན་སྟོན་པ་ཞིག་གི་འདས་ལོག་ཉིན་མོ།

ཆུང་ཆུང་སྤྲུལ་སྐུ་ཞིག་གི་འཁྲུངས་སྐར་ཉིན་མོ།

དགའ་དགའ་ངོ་མཚར་ཞིག་གི་ཕྱིར་དྲན་ཉིན་མོ།

སྐྱོ་སྐྱོ་ལོ་རྒྱུས་ཤིག་གི་དྲན་གསོ་ཉིན་མོ།

དེ་རིང་ཕྱི་གླིང་ཞིག་གི་རང་དབང་གཡར་ནས།

རང་ཡུལ་བཙོན་ར་ཞིག་གི་གཏམ་རྒྱུད་གླེང་འདོད།

དང་བོར་དྲག་པོས་དཔུང་གིས་དབང་དུ་བསྡུས་ཤིང།

བར་དུ་གཡོ་ཐབས་སྟོང་གིས་ཡོད་ཚད་བསླུས་ཏེ།

ད་ལྟ་འཆི་བར་ཕྱོགས་པའི་ཕ་ས་སྨུག་པོ།

ཐ་མའི་ཞལ་ཆེམས་ཡོད་ན་འབྲི་རན་ཡིན་པ།

ཁ་ལྕེ་ཐོགས་ཀྱང་བཤད་དབང་མེད་ས།

རྐང་ལག་ཡོད་ཀྱང་འགུལ་དབང་མེད་ས། 

ཁྲ་ཆུང་མིག་གིས་ལྟ་དབང་མེད་ས།

དར་ལུང་རྣ་བས་ཉན་དབང་མེད་ས།

གངས་ཅན་བོད་ཀྱི་ལས་དབང་སྡུག་པ།

སྡུག་གཏམ་བཤད་ནས་གདུང་སེམས་བསྐྱེད་ཀྱང།

གདོན་སེམས་ཅན་གྱི་དྲག་པོའི་དམག་གིས།

སྡུག་ཐོག་སྡུག་གི་ཁུར་བོ་བརྩེགས་དུས།

སྡུག་བསྔལ་སེལ་མཁན་སྐྱབས་གཅིག་མེད་པ།

སྤྱིར་ན་དེ་རིང་བཀྲ་ཤིས་ཉི་མ།

དགའ་སྐྱིད་རྩེད་འཇོར་རོལ་ན་འོས་ཀྱང། 

 ཕ་ཡུལ་དམྱལ་ཁམས་སེམས་ལ་ཆགས་པས།

བདེ་བའི་དབུགས་དབྱུང་ཐོབ་དུས་མེད་པ།

ཕ་ཡུལ་སྡུག་གི་རྒྱ་མཚོ་ཆེན་པོའི།

རླབས་ཕྲེང་འགའ་ཞིག་འདི་ནས་་འཕྱུར་སོང།

སྡུག་གི་ཟེགས་མ་ཐར་ཐོར་འགའ་རེ།

ལས་སྐལ་གཅིག་པའི་སྤུན་ཟླས་མཆོད་རོགས།

སྟོན་པ་ཡེ་ཤུ་བདེན་པ་གཅེར་བུ་དེ།

སྨྱོན་པ་ནག་པོའི་ཚོགས་ཀྱིས་ཁྲིམས་ལ་སྦྱར།

པཎ་ཆེན་ཆུང་སྲིད་གངས་རིའི་གཅེས་ཕྲུག་དེ།

དམར་པོའི་གཞུང་གིས་ནག་པོའི་བཙོན་དུ་བཅུག

ཡེ་ཤུ་བཀྲོངས་ཀྱང་སླར་ཡང་གསོན་པ་དེས།

བདེན་པ་རྣམ་པར་རྒྱལ་བ་མཚོན་བདེན་ན།

བདེན་དོན་རང་དབང་བརྩོན་པའི་གངས་ཅན་པའི།

འཚེ་མེད་ཞི་བའི་ཐབས་ཚུལ་ཅི་ལ་མི་རྒྱལ།།