༄།གྱི་ལིང།
ཀ
བྱ་དང་བྱི་འུས་རྒུན་འབུ་བཏུས་ནས་རང་གི་ཚང་མལ་སྙེག་པའི་དུས།
ཐང་དཀར་རྒོད་པོས་བྲག་ཐེམ་བསྐྱུར་ནས་ཡངས་པའི་མཁའ་ལ་ལྡིང་སྐོར་རྒྱག
བྲག་རི་འཇིག་པའི་ཉེན་ཁ་མཐོང་ངམ་རང་དབང་མཁའ་མཐའ་འཚོལ་ལམ་ཅི།
ལགས་སོ་ལགས་སོ་རྒོད་པོའི་གཤོག་ཟུང་རང་ལུས་སྟོད་པའི་གསེར་ཁྲི་མིན།
ཡངས་པའི་གནམ་མཐའ་ཡུད་ཀྱིས་བསྐོར་ནས་བྲག་རིར་གསེར་གྱི་སྐ་རགས་འཆིང།
ཁ
རི་སྐྱེས་རྣམས་ནི་རང་ཁ་གསོ་བཞིན་བཙན་པོའི་གནས་ཤིག་འཚོལ་བའི་དུས།
སེང་གེ་དཀར་མོས་གངས་རི་བཞག་ནས་ལྷོ་རྒྱལ་ནགས་མའི་རྒྱལ་ཁམས་འགྲིམས།
གངས་དཀར་ལྷུན་པོ་ཞི་ཉེན་མཐོང་ངམ་རང་རྩལ་ཡོད་ཚད་སྤྲུག་པའི་ཕྱིར།
ལགས་སོ་ལགས་སོ་གངས་སེང་ང་རོ་རང་སེམས་སྐྱོ་བའི་ངུ་ངག་མིན།
སྤྲིན་རུམ་གཡུ་འབྲུག་ས་ལ་གཡུགས་ཏེ་གངས་རིར་ཁ་བའི་མེ་ཏོག་མཆོད།
ག
གཡང་དཀར་ནོར་གནག་དགུན་དཔྱིད་བར་ན་ཤི་མ་གསོན་དུ་ལུས་པའི་དུས།
གྱི་ལིང་རྐྱང་རྒོད་མགོ་འཕང་བསྟད་དེ་རྡུལ་ནག་འཚུབ་བེར་འཕུར་བ་འདི།
རྩྭ་ཐང་འཇིག་པའི་སྔ་ལྟས་མཐོང་ངམ་རིགས་མཐུན་ཁྱུ་ལམ་འཚོལ་བའི་ཕྱིར།
ལགས་སོ་ལགས་སོ་གྱི་ལིང་བང་རྩལ་རང་ཤེད་ངོམ་པའི་ཁེངས་རྩེད་མིན།
འཇིག་རྟེན་གཞན་གྱི་དབྱར་དཔལ་བསུས་ནས་འབྲི་མོའི་ནུ་རྩ་རྒྱས་བར་བྱེད། །
ཨཀྱཱ་རིན་པོ་ཆེ་ཚང་ལ་ཕུལ་བ།