བུ་ཁེར་སྐྱེས་མཐུ་སྟོབས་དམངས་ཀྱིས་བསྐྱེད།
གངས་ཅན་མགོན་པོ་སྤྱི་གཙུག་རྒྱན་དུ་བཞུགས།།
ཆོས་སྐྱོང་སྲུང་མ་བསྟན་སྲིད་གྲོགས་སུ་བསྟེན།།
གཞུངས་དྲང་མི་མང་མཐུན་ལམ་ཆིག་བསྒྲིལ་གྱིས།།
བོད་དོན་བདེན་མཐའ་གསལ་བའི་ཐབས་ལ་གཞོལ།།
སྤྱིར་ན་བོད་འདི་འཛམ་གླིང་ཏོག།
སྒོས་སུ་དེང་སང་རྒྱལ་སྤྱིའི་སྤུན།།
ལྷག་པར་ཐུབ་བསྟན་སྲོག་ཤིང་སྟེ།།
འགྲོ་བ་མི་ཡི་རྒྱན་གཅིག་ལགས།།
དེ་ཡང་སྤྱན་རས་གཟིགས་དབང་མཆོག།
རྣམ་སྤྲུལ་བསྟན་འཛིན་རྒྱ་མཚོ་ཡི།།
ཐབས་མཁས་ཐུགས་རྗེའི་མཛད་བརྒྱ་ཡི།།
དགེ་ལེགས་འབྲས་བུ་སྨིན་པས་སོ།།
ལྷག་པར་བཙན་བྱོལ་བོད་འབངས་ཡོངས།།
བྱམས་བརྩེའི་གདུགས་དཀར་ཁྱིམ་གཅིག་ཏུ།།
ལེགས་བསྡུམས་དམངས་གཙོའི་ལམ་སྲོལ་མཆོག།
དུས་དང་འཚམ་པར་སྐལ་དུ་སྦྱིན།།
མི་ལོ་དྲུག་ཅུའི་ལོ་ཟླ་བརྒྱུད།།
བཅའ་ཁྲིམས་གཏན་འབེབས་མང་གཙོ་ཡི།།
ཀ་ཆེན་གསུམ་པོ་བརྟན་པོར་བསླངས།།
བདེན་དོན་འཐབ་རྩོད་རྩ་བ་བཙུགས།།
དམངས་བསྐོས་བཀའ་བློན་ཁྲི་པ་སྟེ།།
ཟམ་གདོང་གླང་པོས་ལོ་བཅུའི་རིང་།།
ཐབས་མཁས་སྣ་ཞགས་རིང་པོ་ཡིས།།
གཞུང་དམངས་ཚད་མཐོའི་རི་རྩེར་བསྐྱལ།།
ལོ་དང་བློ་གཉིས་གཞོན་པའི་དཔུང་།།
ཨ་གསར་རྟ་ལ་ཞོན་དྲགས་ཏེ།།
སེང་གེའི་ཕྲུ་གུ་ཁྲི་ཁར་བསུས།།
ལོ་བཅུར་སེང་ཕྲུག་མཐུ་རྩལ་ངོམ།།
ཕྱི་རོལ་དགྲ་ཟླར་གད་བརྒྱངས་བསྒྲགས།།
ནང་གི་སྤུན་ཟླར་མཆེ་སྡེར་བགྲད།།
ཁྲིམས་ཀྱི་གཡུལ་སར་རལ་བ་བསྙིལ།།
མཐའ་མར་ཝ་སྤྱང་གྲོགས་སུ་བསྡེབས།།
མངའ་རིས་སྟོད་ཀྱི་བླ་འབྲོང་གང།།
སེང་གེའི་ཁྲི་ལ་ཁུགས་སྙམ་ཡང་།།
སྤྱི་མཐུན་བསོད་ནམས་མཐུ་ཆུང་བས།།
གཡང་གི་སྒོ་ཟོག་རི་རྩེར་ལུས།།
འོན་ཏེ་སྣང་རའི་དཔའ་བོའི་རྒྱུད།།
བྱེས་ཀྱི་གཡག་རྒོད་དར་མ་གང།།
མང་མོས་འཕྲུལ་གྱི་ཞགས་པ་དེ།།
འཕེན་ཐེངས་གཅིག་གིས་སེང་ཁྲིར་བཀུག།
སྤྱི་ཕན་མེད་པའི་དཔོན་རིགས་གཅིག།
ཁྲིམས་ལ་རྨོངས་པའི་སྤྱི་འཐུས་གཉིས།།
རི་བོང་ཅལ་འདྲོགས་རྗེས་འཇུག་གསུམ།།
ལྷན་སྡེབ་དམངས་གཙོའི་ཀ་ཆེན་བསྒྱེལ།།
ཟམ་གདོང་ཅང་ཤེས་འཚེར་སྐད་ཀྱིས།།
ཁྲིམས་ལ་རྨོངས་རྣམས་གཉིད་ལས་བསླངས།།
ལོག་སྨྲའི་ཝ་ཚོགས་སྡུག་སྐད་ཤོར།།
གཟུར་གནས་སྐྱེ་བོས་ཐལ་མོ་སྦྱར།།
ཁྲིམས་འགལ་གྲོས་ཆོད་ཁྲིམས་ཀྱིས་མནན།།
ཁྲིམས་ཞིབ་རྣམ་གསུམ་ཁྲི་ལ་བཞུགས།།
སྲིད་སྐྱོང་གསར་བ་སྲིད་ཁྲིར་བསུས།།
སྲིད་སྐྱོང་ཟུར་པས་སྲིད་ཐམ་གནང།།
སྤྱི་ལྷན་ལྷག་མས་སྤྱི་དོན་དོར།།
ཁས་ལེན་མེད་པའི་ཀུ་ཅོ་བསྒྲགས།།
སྤྱི་གསར་ཉེར་གཉིས་ལོགས་སུ་བུད།།
ཁྲིམས་འགལ་དམ་བཅས་ཟློས་གར་འཁྲབ།།
བཅའ་ཁྲིམས་མ་བརྩིས་ཁྲིམས་མཐུན་མེད།།
མང་མོས་མ་བཀུར་ཆིག་སྒྲིལ་མེད།།
སྤྱི་དོན་མི་བསམས་སྤྱི་འཐུས་མིན།།
གཏོར་རྒྱུ་སླ་སྟེ་འཛུགས་རྒྱུ་དཀའ།།
སེང་ཕྲུག་རྩེན་ཤུལ་ཁང་སྟོང་དུ།།
གཡག་རྒོད་གང་ཁྱེད་མ་བསྒྱིངས་ན།།
བཙན་བྱོལ་བོད་མིའི་སྒྲིག་འཛུགས་འདི།།
རེ་ཞིག་མཚེར་ཤུལ་ལྟ་བུར་གྱུར།།
༸གོང་ས་མཆོག་གི་བཀའ་སློབ་གཅིག།
སྲིད་ཞི་བདེ་སྐྱིད་གཞུང་ཐམ་གཉིས།།
མང་མོས་དམངས་ཀྱི་རེ་འདུན་གསུམ།།
སྲིད་སྐྱོང་གཅིག་པུའི་ཁུར་དུ་ལྕི།།
ལྷ་སྲུང་དཔུང་རོགས་བཅོལ་བ་ལེགས།།
མི་དམངས་གྲོགས་སུ་བསྡེབས་པ་ལེགས།།
སྐབས་དོན་འོས་འགན་སྒྲུབ་པ་ལེགས།།
ལེགས་པ་གསུམ་པོས་ཁྱེད་ལ་བསྔགས།།
སྤྱི་དོན་ལྷག་བསམ་བཅོས་མིན་དགོས།།
གཟུར་གནས་ཁོག་རྒྱ་ཡངས་པོ་དགོས།།
མི་མང་དགའ་བས་རྒྱབ་སྐྱོར་དགོས།།
ད་གཟོད་མཐུ་སྟོབས་རྒྱས་པར་འགྱུར།།
བཅའ་ཁྲིམས་ལས་ལྷག་དམངས་ཁྲིམས་མེད།།
ཁྲིམས་ཞིབ་ཁང་ལས་ཁྲིམས་དཔོན་མེད།།
སྲིད་སྐྱོང་ཉིད་ལས་བཀའ་ཤག་མེད།།
ཀ་ཆེན་རྣམ་གཉིས་བརྟན་གྱུར་ཅིག།
དཀར་ཕྱོགས་སྐྱོང་བའི་ལྷ་མིའི་ཚོགས།།
ཆིག་སྒྲིལ་ནུས་པ་རྡོ་རྗེ་ཡིས།།
དམར་ཤོག་ནག་ཕྱོགས་མཐའ་དག་ལས།།
རྣམ་པར་རྒྱལ་བའི་བཀྲ་ཤིས་ཤོག། །།
ཁ་སྣོན།
འུ་ཐུག་ཐབས་ཟད་མཐའ་མ་ལ།།
ཡིད་བཞིན་ནོར་བུར་སྐྱབས་འཇུག་ཞུས།།
བཅའ་ཁྲིམས་གཞིར་བཟུང་ལམ་སྟོན་སྩལ།།
སྤྱི་མོས་གོང་བཀུར་དམ་བཅའ་བཞག།
སྤྱི་ལྷན་ཚོགས་གཙོ་བགྲེས་གཞོན་བདམས།།
བཀའ་བློན་བུད་མེད་རྣམ་གསུམ་བདམས།།
གྲོས་ར་ཚོགས་ཐེངས་ཐོག་མ་ཡི།།
གོམ་པ་དང་པོ་ཁྱར་ཁྱོར་སྤོས།།