ང་ཚོ་ཚང་མའི་བོད།

འཛམ་གླིང་གི་ཡང་རྩེ་གངས་ཅན་ལྗོངས། ས་བཟང་ཆུ་བཟང་ཚང་མ་བཟང།

བོད་ཡུལ་འདི་ང་ཚོ་ཚང་མའི་ཡིན། སྲུང་སྐྱོབ་གནང་རོགས་བདག་པོ་རྒྱག་རོགས།

བོད་ཡུལ་འདི་ང་ཚོ་ཚང་མའི་ཡིན། སྲུང་སྐྱོབ་གནང་རོགས་བདག་པོ་རྒྱག་རོགས།

ཡ་རབས་ཀྱི་ཡང་རྩེ་བོད་མི་རིགས། ཆོས་བཟང་སེམས་བཟང་ཚང་མ་བཟང།

མི་རིགས་འདི་ང་ཚོའི་མི་རིགས་ཡིན། ལ་རྒྱ་འཛིན་རོགས་མིག་དཔེ་སྟོན་རོགས།

མི་རིགས་འདི་ང་ཚོའི་མི་རིགས་ཡིན། ལ་རྒྱ་འཛིན་རོགས་མིག་དཔེ་སྟོན་རོགས།

ཞི་བདེ་ཡི་དེད་དཔོན་ཏཱ་ལའི་བླ་མ། གསུང་བཟང་མཛད་བཟང་ཐམས་ཅད་བཟང།

བླ་མ་འདི་ང་ཚོ་ཚང་མའི་ཡིན། གསུང་ལ་ཉན་རོགས་གསོལ་བ་འདེབས་རོགས།

བླ་མ་འདི་ང་ཚོ་ཚང་མའི་ཡིན། གསུང་ལ་ཉན་རོགས་གསོལ་བ་འདེབས་རོགས།

རི་མཐོན་པོ་ཧི་མ་ལ་ཡ།

རི་མཐོན་པོ་གཅིག་དང་མཐོན་པོ་གཉིས།

རི་མཐོན་པོ་ཧི་མ་ལ་ཡ་རེད།

འདིའི་རྩེ་མོ་སྤྲིན་དཀར་ཀློང་ལ་ཟུག

དགུང་ཉི་མ་ཟླ་བས་དབུ་རྒྱན་བཞེས།

ཆོས་བསྟན་པ་དར་བའི་རྟེན་འབྲེལ་རེད།

འདི་སྔར་ལས་མཐོ་བའི་སྨོན་ལམ་འདེབས།

འགྲོ་ཀུན་ལ་དགེ་བསོད་འཕེལ་བར་ཤོག

ཆུ་ཆེན་པོ་གཅིག་དང་ཆེན་པོ་གཉིས།

ཆུ་ཆེན་པོ་རྨ་ཀླུང་རིང་མོ་རེད།

འདིའི་ཆུ་རྔ་རྒྱ་མཚོའི་གཏིང་ལ་ཟུག

ནོར་རིན་ཆེན་གཏེར་གྱི་བང་མཛོད་ཕྱེས།

སྲིད་མངའ་ཐང་དར་བའི་རྟེན་འབྲེལ་རེད།

འདི་སྔར་ལས་རིང་བའི་སྨོན་ལམ་འདེབས།

འགྲོ་ཀུན་ལ་བདེ་སྐྱིད་ལྡན་པར་ཤོག།

སྐད་ཡིག་གཅིག་གི་མི་རིགས།

ང་ཚོ་བོད་འབྲུག་ལ་དྭགས།

ཧི་མ་ལ་ཡ་ཡི་སྤུན་སྲིང།

ས་ཆུ་གཅིག་ལ་མཉམ་སྤྱོད།

གནའ་ནས་ད་བར་ཁྱིམ་གཅིག

ང་ཚོ་བོད་འབྲུག་ལ་དྭགས།

སྟོན་པ་གཅིག་གི་སློབ་མ། 

སྡིག་སྤོང་དགེ་སྒྲུབ་ཆོས་གྲོགས།

ཇི་སྲིད་བྱམས་བརྩེ་མཉམ་གནས།

ང་ཚོ་བོད་འབྲུག་ལ་དྭགས།

སྐད་ཡིག་གཅིག་གི་མི་རིགས།

རིག་གཞུང་གཅིག་གི་སྤུན་ཟླ།

ནམ་ཡང་འགྱུར་མེད་དར་རྒྱས།

 

འབྲུག་ལོའི་ཤིས་སྨོན།

 

སྙན་ལྷང་ལྷང་ལྷང་ཞིག་དགུང་ནས་གྲགས།

བོད་གནམ་ལོ་གསར་བའི་རྟེན་འབྲེལ་རེད།

འབྲུག་ལྗང་ལོའི་ངར་སྐད་ལྡིར་ལྡིར་འདིས།

རྐྱེན་བར་གཅོད་ཐམས་ཅད་ཟློག་པར་སྨོན།

 

དམར་ལམ་ལམ་ལམ་ཞིག་བོད་ནས་འབར།

བོད་རང་དབང་སླར་གསོའི་རྟེན་འབྲེལ་རེད།

སྲོག་དམར་པོའི་མཆོད་མེའི་ཕྲེང་བ་འདིས།

སྡུག་མུན་དགུ་སེལ་བའི་བཀྲ་ཤིས་ཤོག

 

འོད་ཆེམ་ཆེམ་ཆེམ་ཞིག་ཤར་ནས་འཕྲོས།

ནུབ་མུན་གླིང་གསལ་བའི་རྟེན་འབྲེལ་རེད།

རྗེ་བླ་མའི་བྱིན་རླབས་འོད་སྟོང་གིས།

 

གླིང་ཆེན་པོར་བདེ་དགའ་རྒྱས་པར་སྨོན།།