༄།བཙོན་གླུ།
༡
རྒྱལ་བ་བསྟན་འཛིན་རྒྱ་མཚོར།
སྐྱབས་འཇུག་སྨོན་ལམ་བརྒྱབ།
ཆོལ་གསུམ་བོད་མི་ཡོངས་ལ།
ཁས་ལེན་དམ་བཅའ་ཕུལ།
རང་སྲོག་འབེན་ལ་བཞག་ནས།
མི་རིགས་ཁེ་ཕན་སྒྲུབ།
༢
དཔའ་ངར་དཔུང་བ་བརྟན་པོས།
རྒྱལ་དར་མཁའ་ལ་བསྒྲེངས།
ཞུམ་མེད་སྐད་གསངས་མཐོན་པོས།
རང་བཙན་འབོད་སྒྲ་བསྒྲགས།
འཚེ་མེད་ཞི་བའི་ལམ་ནས།
མི་རིགས་རང་དབང་བརྩད།
༣
རྒྱ་དམར་སྲིན་པོའི་དམག་གིས།
མཚོན་གྱི་འཁོར་ལོ་བསྐོར།
རྐང་ལག་ལྕགས་སྒྲོག་བརྒྱབ་ནས།
མུན་དོང་བཙོན་དུ་བཅུག
ཁུ་ཚུར་དམ་པོར་བཅངས་ཏེ།
བདེན་པའི་ཨུ་ཚུགས་ངོམས།
༤
རྒྱ་དམག་གཤིན་རྗེའི་ལས་མཁན།
ཡ་ང་སྙིང་རྗེ་མེད།
རྡུང་རྡེག་མནར་གཅོད་དྲག་པོས།
ཤི་མིན་རོ་མིན་བཏང།།
ཟུངས་ཁྲག་དྲོན་མོའི་རྒྱུན་གྱིས།
འཆི་ཁའི་ཁ་ཆེམས་བྲིས།
༥
ཁྱེད་ནི་ལྕགས་དྲར་བཅུག་པའི།
གངས་ཀྱི་སེང་གེ་ཡིན།
ཁྱེད་ནི་གཟི་བརྗིད་ཆེ་བའི།
བོད་ཀྱི་དཔའ་རྒོད་ཡིན།
ང་ཚོ་ཁྱེད་རྗེས་འབྲངས་ཏེ།
རང་དབང་རྒྱལ་ཁ་བསུ། །