༄༅། །ཨ་རིའི་རྒྱལ་ས་ཝ་ཤིན་ཊོན་ཏུ་ྋགོང་ས་མཆོག་གིས་དཔལ་དུས་ཀྱི་འཁོར་ལོའི་དབང་ ཆེན་ཐེངས་ ༣༡ པ་སྩལ་རྒྱུའི་གྲ་སྒྲིག་ཞུ་བཞིན་ཡོད་པ་ལྟར། ྋགོང་ས་མཆོག་ཨ་རིར་ཆིབས་བསྒྱུར་བསྐྱངས་ཡོད་ལ། བོད་རིགས་སྤྱི་མཐུན་ཚོགས་པའི་གོ་སྒྲིག་འོག་ཁ་སང་ཚེས་ ༦ ཉིན་ཨ་རིའི་རྒྱལ་སའི་ཝེ་རི་ཛོན་(VERIZON CENTER) ཚོགས་ཁང་ཆེན་མོའི་ནང་ྋགོང་ས་མཆོག་ གི་འཁྲུངས་སྐར་གཟབ་རྒྱས་ཤིག་སྲུང་བརྩི་གནང་ཡོད། མཛད་སྒོའི་སྐུ་མགྲོན་གཙོ་བོ་ཨ་རིའི་མི་རིགས་ནག་པོའི་ཐོབ་ཐང་རྩོད་ལེན་པ་མཱར་ ཏིན་ལུ་ཐར་ཀིང་གསུམ་པ་ Mr. Martin Luther King III དང་། རྒྱ་གར་ནས་བདག་ཉིད་ཆེན་པོ་གྷན་དྷུའི་ཚ་བོ་ཨ་རུན་གྷན་དྷི་Arun Gandhi རྣམ་གཉིས་ཕེབས་ཡོད།ཐེངས་འདིའི་མཛད་སྒོའི་ཐོག་མི་གྲངས་ཉིས་ཁྲི་ལྷག་ཙམ་འདུ་ འཛོམས་བྱུང་ཡོད་ཅིང་། དེའི་ཁྲོད་ཡུ་རོབ་དང་། ཁེ་ཎ་ཌ། ཐེ་ཝན། ཨ་རིའི་ས་ཁུལ་ཁག་བཅས་ནས་བོད་པ་ལྔ་སྟོང་ཙམ་སླེབས་ཡོད། ྋགོང་ས་མཆོག་གི་ཆོས་གྲོགས་ཡིན་པའི་ལྷོ་ཨ་ཧྥི་རི་ཁའི་ཆོས་དཔོན་ཌེ་སེ་མཱན་ཊུ་ ཊུ་མཆོག་ཐེངས་འདིའི་སྐུའི་འཁྲུངས་སྐར་ལ་ཕེབས་ཐུབ་མེད་ཀྱང་། ཁོང་གིས་དྲ་བརྙན་བརྒྱུད་སྐུའི་འཁྲུངས་སྐར་ལ་རྟེན་འབྲེལ་ཤིས་ཚིག་ཕུལ་ཡོད། མཛད་ སྒོའི་ཐོག་ྋགོང་ས་མཆོག་གིས་བོད་ཀྱི་སྐད་ཡིག་གལ་གནད་ཆེ་སྐོར་གསུངས་དོན། གཞིས་ལུས་རྒྱ་ཆེའི་མི་མང་རྣམས་ལུས་པོར་རང་དབང་བྲལ་ཏེ་དཀའ་ངལ་འཕྲད་བཞིན་ཡོད་ ཀྱང་། བསམ་བློའི་ནང་གངས་ཅན་པ་ཟེར་བའི་བསམ་བློ་བརྟན་པོ་བསྡད་ཡོད། ཁྱེད་ཚོས་ངའི་སྐྱེས་སྐར་ཉིན་དྲན་གསོ་བྱེད་ཀྱི་ཡོད་པར་ཐུགས་རྗེ་ཆེ་ཞུ་རྒྱུ་ ཡིན། ངོས་ཀྱི་སྐྱེས་སྐར་གྱི་ལག་རྟགས་ཡག་ཤོས་ཁྱེད་ཚོས་སེམས་བཟང་པོ་བྱ་རྒྱུ་འདི་ ཡིན། བོད་མི་ཚོར་སྔར་ཆོས་རྒྱལ་བཀའ་དྲིན་ཅན་ཚོའི་སྐབས་ནས། ཐུན་མོང་མ་ཡིན་པའི་སོ་སོའི་ཡི་གེ་ཞིག་དང་། ཡི་གེ་དེ་དང་འབྲེལ་བའི་བོད་སྐད་ཅིག་ཡོད་པ་རེད། དེང་སང་འཛམ་གླིང་ཐོག་ནས་དོ་སྣང་གསར་པ་བྱེད་པའི་སངས་རྒྱས་ཀྱི་ཆོས་འདི་བོད་ ཡིག་ནང་ཡོད་པ་དང་། ཆོས་དེའི་ནང་ཐེག་པ་ཆེ་ཆུང་སྔགས་དང་བཅས་ཆ་ཚང་ཡོད།  ཚན་རིག་པས་སངས་རྒྱས་ཀྱིས་མདོ་དང་བསྟན་བཅོས་ནང་གསུངས་བའི་སེམས་ཀྱི་རྣམ་གཞག་ཐོག་དམིགས་བསལ་དོ་སྣང་བྱེད་ཀྱི་ཡོད་པ་དང། ནང་ ཆོས་ལ་ཆ་བཞག་ན། འཛམ་གླིང་ཐོག་ནང་པའི་རྒྱལ་ཁབ་མང་པོ་ཡོད་ལ། ནང་པའི་ཆོས་བྱེད་མཁན་ཡང་ས་ཡ་མང་པོ་ཡོད། ཡིན་ནའང་སངས་རྒྱས་ཀྱི་ཆོས་ཟབ་པ་དང་རྒྱ་ཆེ་བ་ཚད་མའི་གཞུང་དང་བཅས་ཡོད་པ་བོད་ ཡིག་གཅིག་པུ་ཡིན། བོད་མི་ཚོས་རང་གི་མེས་པོས་དཀའ་ལས་བརྒྱབ་སྟེ་བསྒྲུབས་པའི་སྐད་ཡིག་ཕྱུག་པོ་ འདི་ངེས་པར་དུ་རྒྱུན་འཛིན་བྱ་རྒྱུ་དང་། དེང་དུས་ཤེས་ཡོན་ཚད་ལོངས་པ་བྱེད་དགོས་རྒྱུ་གལ་ཆེན་པོ་ཆགས་ཡོད། དེ་བཞིན་སྐད་ཡིག་གཞན་པའང་ཤེས་པ་ཙམ་མ་ཡིན་པར་དུས་རབས་ཉེར་གཅིག་པ་དང་མཐུན་ པའི་དེང་དུས་ཤེས་ཡོན་ཆ་ཚང་ཤེས་པ་དགོས་པས་གཞིས་བྱེས་སློབ་ཕྲུག་ཚང་མས་དེའི་ ཐོག་ཤུགས་རྒྱག་དགོས།

བར་སྐབས་ནས་ང་ཚོར་འགྱུར་བ་ཕྱིན་ཡོད། ྋརྒྱལ་དབང་གི་བླ་བྲང་དགའ་ལྡན་ཕོ་བྲང་ཆགས་ཏེ། མི་ལོ་དྲུག་བརྒྱ་ཙམ་འགྲོ་བཞིན་ཡོད། དེ་ནི་ གཙོ་བོ་རྒྱལ་བ་དགེ་འདུན་རྒྱ་མཚོའི་སྐབས་ནས་བྱུང་བ་ཞིག་རེད། སྐུ་ཕྲེང་གོང་མ་བཞིའི་རིང་དགའ་ལྡན་ཕོ་བྲང་ལ་ཆོས་ཕྱོགས་ཀྱི་མཛད་འགན་ཙམ་ལས་ ཆབ་སྲིད་ཀྱི་མཛད་འགན་ཡོད་པ་མ་རེད། ྋགོང་ས་ལྔ་པའི་སྐབས་ནས་མི་ལོ་བཞི་བརྒྱ་མ་ཟིན་ཙམ་ཆོས་སྲིད་གཉིས་ཀྱི་དབུ་ ཁྲིད་གནང་ཡོད། འཛམ་གླིང་གི་ཕྱོགས་གང་ལ་བལྟས་ཀྱང་། སྔ་ཕྱི་མ་གཏོགས་འགྱུར་བ་འགྲོ་བ་ཐག་ཆོད་པ་ཞིག་རེད། འགྱུར་བ་གཏོང་རྒྱུ་དེ་འགྱུར་བ་མི་གཏོང་ཀ་མེད་ཅིག་གི་འོག་ནས་འགྱུར་བ་བཏང་ན་ དེ་ལ་དགོས་པ་ཡོད་པ་མ་རེད། ང་ལ་ྋརྒྱལ་བ་སྐུ་ཕྲེང་བཅུ་བཞི་པའི་མིང་ཞིག་ཐོབ་ཡོད་ལ། བོད་པར་ཆ་བཞག་ན་བརྒྱ་ཆ་དགུ་བཅུ་གོ་དགུས་ང་ལ་ཡིད་ཆེས་དང་མོས་པ་བྱེད་ཀྱི་ཡོད། འཛམ་གླིང་སྟེང་གི་མི་ས་ཡ་འགའ་ཤས་ཀྱིས་ངོས་རང་ངོ་ཤེས་ཏེ་དགའ་མོས་བྱེད་ཀྱི་ ཡོད། སྐབས་དེ་འདྲ་ཞིག་ལ། གཞན་རྐྱེན་འོག་འགྱུར་བ་བཏང་བ་མ་ཡིན་པར་རང་དབང་ཐོག་རང་གི་འདོད་པས་དང་དུ་ བླངས་ཏེ། སྔར་གྱི་ལུགས་སྲོལ་ཡོལ་ཚར་བ་དེ་དགའ་བཞིན་སྤྲོ་བཞིན་སྤོབས་པའི་ཐོག་འགྱུར་བ་ གཏོང་རྒྱུ་ཤིན་ཏུ་འོས་པ་ཞིག་ཏུ་མཐོང་སོང་། ང་རང་ཚོར་བཙན་བྱོལ་སྒྲིག་འཛུགས་ཟེར་ནའང་འདྲ། བོད་གཞུང་ཟེར་ནའང་འདྲ། ང་ཚོར་ཡོད་པ་དེ་སྲ་བརྟན་ཕུགས་འཕེར་དང་། དུས་ཡུན་རིང་པོར་སྡོད་ཐུབ་པའི་ཆེད་དུ་བསྒྱུར་བཅོས་བཏང་བ་ཞིག་ཡིན་པ་ལས། བོད་གཞུང་བསྡུ་གསོག་བརྒྱབ་པ་མ་རེད། ཏཱ་ལའི་བླ་མའི་བླ་བྲང་གི་མིང་ཐོག་ནས་ད་བར་བོད་གཞུང་གསལ་ལ་མ་གསལ་བར་ཕྱིན་ བསྡད་པ་རེད། དེར་དབྱེ་བ་གསལ་པོ་ཞིག་ཕྱེ་ཡོང་སྐབས། དེ་ལ་དཔག་པའི་བྱེད་ཐབས་ཡག་པོ་མ་བྱུང་ན་སྐྱོན་ཡོང་གི་ཡོད། རྒྱ་གར་གཞུང་དང་གཞན་ལུང་པ་མང་པོར་དཀའ་ངལ་འཕྲད་སྲིད་ཀྱི་རེད། དེའི་སྟབས་ཀྱིས་ང་ཚོར་མཐུན་འགྱུར་རོགས་རམ་གནང་མཁན་ཚོར་དཀའ་ངལ་མི་འཕྲད་པ་ ཞིག་དང་། ང་ཚོར་ཡང་ཕྱི་གསལ་ནང་གསལ་དང་། མ་འོངས་པར་སྡུག་པོ་མི་ཡོང་རྒྱུར་དམིགས་ཏེ་འགྱུར་བ་གསར་པ་ཞིག་བྱུང་བ་རེད། དེའི་ཐོག་གཞིས་ལུས་རྒྱ་ཆེའི་མི་མང་དང་། བཙན་བྱོལ་བོད་མི་ཚོར་བློ་བདེ་བོ་གནང་རོགས་ཞེས་ཞུ་འདོད་བྱུང་། དོན་དག་ངོ་མ་ཧ་མ་གོ་བར་མདའ་དཀྲུག་ཕུ་དཀྲུག་དང་མགོ་མ་འཚོས་པའི་དཀྲོག་གཏམ་ བཤད་བསྡད་ན་ཕན་ཐོགས་གང་ཡང་ཡོད་པ་མ་རེད། ཅེས་བཀའ་སྩལ།

དེ་རྗེས། མཱར་ཏིན་ལུ་ཐར་ཀིང་གསུམ་པ་དང་། བདག་ཉིད་ཆེན་པོ་གྷན་དྷའི་ཚ་བོ་གཉིས་སོ་སོ་ནས་ྋགོང་ས་མཆོག་གི་སྐུའི་འཁྲུངས་ སྐར་ལ་བཅར་ཐུབ་པ་འདི་ཁོང་ཚོའི་སྔོན་ལས་དང་སྐལ་བ་བཟང་པོ་ཡིན་པ་དང་། ྋགོང་ས་མཆོག་ནི་འཛམ་གླིང་འཁྲུག་འཛིང་ཆེ་བའི་སྐབས་སུ་ཞི་བདེའི་སྣེ་ཁྲིད་མཁན་ ཞིག་དང་། འཛམ་གླིང་མི་མང་ས་ཡ་མང་པོའི་སེམས་ལ་ཞི་བདེ་བསྐྲུན་ཐུབ་མཁན་ཞིག་ཡིན་ཚུལ་གྱི་ གཏམ་བཤད་སོགས་གནང་ཡོད་པ་རེད།

   ཕྱི་ཚེས་ ༩ ཉིན་༧གོང་ས་མཆོག་དཔལ་རྒྱལ་བ་ཀརྨ་པ་མཆོག་གིས་དབུས་པའི་སྤྱི་འཐུས་ཚོགས་གཙོ་ དང་། བདམས་ཐོན་བཀའ་ཁྲི་བློ་བཟང་སེང་གེ་བཅས་ཀྱི་ཕེབས་བསུའི་འོག ཨ་རིའི་གྲོས་ཚོགས་མདུན་ཐང་ཆེན་མོ་ (West Lawn of The Capitol) ཆིབས་བསྒྱུར་བསྐྱངས་ཏེ། མི་མང་ཁྲི་ཚོ་བརྒལ་བར་༼འཛམ་གླིང་ཞི་བདེ་ཡོང་ཐབས་༽སྐོར་གྱི་བཀའ་སློབ་གནང་ཡོད་འདུག

སྐབས་དེར་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་ཀྱིས་དུས་དབང་གྲ་སྒྲིག་ཚོགས་ཆུང་དང་ཝ་ཤིན་ཊོན་ས་གནས་བོད་མིའི་ཚབ་ཞུས་ཏེ། ཐེངས་འདིའི་ལས་རིམ་ངོ་སྤྲོད་སྐོར་གནང་རྗེས་བོད་གཞུང་ཟློས་གར་ཚོགས་པ་དང་། ཨ་རིའི་གཞས་མ་གྲགས་ཅན་ཀེ་ལར་གེ་རེ་ (Skylar Grey)རྣམས་ཀྱིས་མང་ཚོགས་ལ་གླུ་གཞས་གཟིགས་འབུལ་སོགས་ཞུས་ཡོད།

མཛད་སྒོའི་སྟེང་༧གོང་ས་མཆོག་གིས་‘‘ཆོས་ཁས་ལེན་མིན་ལ་མ་ལྟོས་པར་མི་ཚང་མས་བདེ་སྐྱིད་ཀྱི་མི་ཚེ་ཞིག་འདོད་ཀྱི་ཡོད། དེ་འདྲ་ཞིག་ཡོང་མིན་གཙོ་བོ་སེམས་ཀྱི་ཞི་བདེར་རག་ལས་ཡོད། འཇིགས་སྣང་དང་དོགས་པ། ཞེ་སྡང་གི་ཚོར་ཤུགས་ཆེན་པོ་ཡོད་ན། རང་ཉིད་ཀྱི་མི་ཚེ་ལམ་ལྷོང་ཡོང་མེད། ཆོས་ལུགས་ལ་གཞི་མ་བཅོལ་བའི་ཐོག་ནས་སེམས་ཀྱི་ཞི་བདེ་བསྐྲུན་རྒྱུའི་ནུས་པ་དང་གོ་སྐབས་མང་པོ་ཡོད། ང་ཚོ་འགྲོ་བ་མི་ཞིག་ཡིན་པའི་ཆ་ནས་མིའི་ལུས་དང་ཚོར་བ། བསམ་བློ་བཅས་ཡོད་པ་གཅིག་མཚུངས་ཡིན་ལ། ཨ་མའི་མངལ་ལས་སྐྱེས་དུས་ནས་བདེ་བ་བསྒྲུབ་རྒྱུའི་ཐོབ་ཐང་གཅིག་མཚུངས་སུ་ཡོད། ངོས་ལ་ཆོས་ཀྱི་ཉམས་མྱོང་ཕྲན་བུ་ཡོད་པ་གཞིར་བཞག་ན། ཆོས་ལུགས་ཚང་མར་འགྲོ་བ་མིའི་ནང་གི་རིན་ཐང་གོང་མཐོར་གཏོང་རྒྱུའི་ནུས་པ་ཡོད་སྟབས། ཆོས་ལུགས་ཚང་མ་ཕན་ཚུན་མཐུན་སྒྲིལ་བྱ་རྒྱུ་ཧ་ཅང་གལ་ཆེན་རེད། ” ཅེས་གསུངས་འདུག

སྐབས་དེར་རང་ལོ་ ༡༤ ཡིན་ པའི་བྱིས་པ་ཞིག་གིས་ཞི་བདེ་ཇི་ལྟར་བསྐྲུན་དགོས་མིན་གྱི་བཀའ་འདྲི་ཞུས་པའི་ ལན་དུ། གཞོན་སྐྱེས་ཚོས་བྱམས་བརྩེའི་བསམ་བློ་རྨང་གཞི་བྱས་པའི་ཐོག་རང་ཉིད་ཀྱི་ཤེས་ ཚད་མཐོ་རུ་གཏོང་རྒྱུ་དང་། ལྷག་པར་དུ། གཞོན་སྐྱེས་ཚོར་དུས་རབས་ཉེར་གཅིག་པ་ཞི་བདེ་དང་བདེ་སྐྱིད་ཀྱི་འཛམ་གླིང་ཞིག་ བསྐྲུན་རྒྱུར་འགན་ཆེན་པོ་ཡོད་སྐོར་གསུངས་འདུག

རྒྱ་རིགས་སློབ་ཕྲུག་ཚོགས་པའི་གོ་སྒྲིག་འོག ཕྱི་ཚེས་ ༡༠ ཉིན་༧གོང་ས་མཆོག་པི་རིན་སི་ཊོན་དུ་ (Princeton) འཚོགས་བཞིན་པའི་༼དམངས་གཙོའི་རྒྱ་ནག་དང་བོད་ཀྱི་མ་འོངས་པ༽ཞེས་པའི། བོད་རྒྱ་མཁས་པའི་མཇུག་བསྡོམས་ ཚོགས་ཆེན་སྟེང་ཆིབས་བསྒྱུར་བསྐྱངས་ཏེ་བཀའ་སློབ་གནང་འདུག་ལ། མཛད་སྒོ་དེར་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་ མཆོག་དང་། བྱང་ཨ་རི་དང་ཁེ་ན་ཌ་བཅས་ནས་རྒྱ་རིགས་མཁས་པ་དང་དམངས་གཙོ་དོན་གཉེར་བ་ ༢༠༠ ཙམ་མཉམ་ཞུགས་བྱས་འདུག  

ཚོགས་འདུའི་ཐོག་༧གོང་ས་མཆོག་གིས་རྒྱ་བོད་གཉིས་ཀྱི་ལོ་རྒྱུས་ནས་མགོ་བཙུགས་ཏེ། ‘‘དེ་རིང་རྒྱ་རིགས་གྲོགས་པོ་ཚོར་ཐུག་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང། བོད་རྒྱ་མི་རིགས་གཉིས་ལ་ལོ་ངོ་སྟོང་ཕྲག་ལྷག་གི་འབྲེལ་བ་ཡོད་ཅིང་། སྐབས་རེར་གཉེན་དང་མཆོད་ཡོན་གྱི་འབྲེལ་བ་བྱུང་སྟེ། དུས་རབས་མང་པོར་མཛའ་མཐུན་མཉམ་གནས་བྱུང་ཡོད་པ་དང་།ཡང་སྐབས་རེར་ཕྱོགས་གཉིས་བར་དམག་འཁྲུག་ཕྲན་བུ་རེའང་བྱུང་ཡོད་ ” ཅེས་གསུངས་བཞིན།༡༩༥༤ ལོར་རྒྱ་ནག་རྒྱལ་ས་པེ་ཅིན་དུ་བསྐྱོད་དེ་དམར་ཤོག་མགོ་ཁྲིད་ཚོར་ཐུག་སྐབས། མར་ལེ་རིང་ལུགས་ཀྱི་ལྟ་བར་མོས་པ་བྱུང་སྟེ། དམར་ཤོག་ཚོགས་པར་ཞུགས་འདོད་བྱུང་ཡོད་སྐོར་གྱི་བརྒྱུད་རིམ་ནས་མཐའ་མ་བོད་ས་མ་ཤོར་བར་གྱི་ལོ་རྒྱུས་དང་། ཆབ་སྲིད་ཀྱི་འགྱུར་བའི་གནས་སྟངས་སྐོར་གསུངས་འདུག་ལ། རྒྱ་ནག་དམར་ཤོག་གིས་རྒྱ་རིགས་མང་ཚོགས་ཁྲི་སྟོང་མང་པོའི་ངོ་ཚབ་མཚོན་མི་ཐུབ་པའི་ཐད་ལ།  ‘‘ ༡༩༥༩ བོད་ལ་དུས་འགྱུར་བྱུང་ཡོད་སྟབས། ད་ལྟ་ང་ཚོར་དཀའ་ངལ་ཞིག་འཕྲད་བཞིན་ཡོད། དཀའ་ངལ་དེ་བོད་པ་གཅིག་པུའུ་དཀའ་ངལ་མ་རེད། གྲངས་ཉུང་མི་རིགས་དང་རྒྱ་རིགས་ཚོར་ཡང་དཀའ་ངལ་དེ་འཕྲད་བཞིན་ཡོད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དཀའ་ངལ་དེ། རྒྱ་ནག་མི་མང་རང་གིས་སེལ་དགོས་རྒྱུ་ལས་ཕྱི་ནས་སེལ་མཁན་ཡོང་གི་མ་རེད། འཛམ་གླིང་འདི་འཛམ་གླིང་མི་མང་ལ་དབང་གི་རེད་ལ། རྒྱ་ནག་དེ་ཡང་རྒྱ་ནག་མི་མང་ལ་དབང་བ་ལས་མགོ་ཁྲིད་རེ་ཟུང་ལ་དབང་གི་མ་རེད་ ”ཅེས་གསུངས་ཡོད་འདུག  

ཕྱི་ཚེས་ ༡༣ ཉིན་ནས་ ༡༥ བར༧གོང་ས་མཆོག་གིས་དཔལ་དུས་ཀྱི་འཁོར་ལོའི་བཀའ་དབང་གི་དངོས་གཞིའི་བཀའ་ཆོས་སྩོལ་རྒྱུ་ཡིན་པ་དང་། ཐེངས་འདིའི་དུས་དབང་ལ་རྒྱལ་ཁབ་ཁག་འདྲ་མིན་ནས་ཕྱི་ནང་དད་ལྡན་པ་ཁྲི་ཚོ་བརྒལ་བ་ཕེོབས་ཡོད་འདུག