༄༅། །གསེར་རྟ་ཆོལ་ཁོངས་གང་ལ་གཏོགས་མིན་སྐོར་ལ་མཁས་པའི་བཞེད་ཚུལ་འགའ།

 

བཞེད་མཁན།  ལུང་ཚིག  གསལ་བཤད།

 

          ༡། རྡོ་གྲུབ་ཆེན་སྐུ་ཕྲེང་དང་པོ་འཇིགས་མེད་འཕྲིན་ལས་འོད་ཟེར།

       "་་་གཡུ་སྒྲའི་རྣམ་སྤྲུལ་མདོ་ཁམས་སྨད་ནས་འབྱུང༌། ཆོས་ཀྱི་མིང་ཅན་རྫོགས་ཆེན་རྣལ་འབྱོར་བ། གསང་སྔགས་བསྟན་པའི་བདག་པོ་ཁྱད་འཕགས་འབྱུང༌།་་་"དབལ་ཤུལ་གསེར་རྟར་སྐུ་འཁྲུངས་པའི་མཁས་གྲུབ་ཆེན་པོ་མཁན་ཆེན་ཆོས་དབྱིངས་ཁྱབ་བརྡལ་ལུང་བསྟན་ཚུལ།

          ༢། བྲག་སྒོམ་པ་བསྟན་པ་རབ་རྒྱས།

          "་་་གེ་ལིའི་བུ་ཆུང་བན་ཞར་གྱི་མི་རྒྱུད་དབལ་ཤུལ་སྟག་སྐྱབས་ཀྱིས་མགོ་ལོག་ལ་ས་བསླངས་ནས་མཁར་གཞི་བཟུངས། འདི་ལ་བུ་གཉིས་ཡོད་པའི་ཆེ་བ་སྟག་ལྷ་འཕན་གྱི་བུ་ཤོས་ཁོག་ཏུ་རུ་བ་བྱས་ནས་བསྡད་པའི་རྒྱུད་པ་གསེར་ཐར་དཔོན་རིགས།་་་་་་ཆོས་ཤུལ་གྱི་རྒྱུད་པ་རྡོ་གྲུབ་ཆེན་འཁྲུངས།་་་དེ"་ལྟར་མདོ་སྨད་ཆོས་འབྱུང་དུ། མདོ་སྨད་ལྷོ་རྒྱུད་བཤད་སྐབས།མགོ་ལོག་གསེར་རྟའི་དཔོན་རབས་ལོ་རྒྱུས་བཀོད་པ་འདིས་གསེར་རྟ་སྔ་མོ་ཞིག་གིས་མདོ་སྨད་ཁོངས་སུ་གཏོགས་པ་གསལ་བས། དམུ་དགེ་བསམ་སོགས་ཀྱིས་ཀྱང་དེ་ལྟར་བཞེད་དོ།

          ༣། རྡོ་གྲུབ་ཆེན་སྐུ་ཕྲེང་གསུམ་པ་འཇིགས་མེད་བསྟན་པའི་ཉི་མ།

          "་་་མདོ་སྨད་ཀྱི་སྤྲང་སྨྱོན་ཆོས་སྨྲ་བ་འཇིགས་མེད་བསྟན་པའི་རྒྱལ་མཚན་དུ་འབོད་པས་གསེར་ཤོད་བླ་མ་རུང་དུ་སྦྱར་བ་དགེ་་ ཞེ"ས་དང༌། ་་་"འགུ་ལོག་གི་སྤྲང་ཕུག་ཀི་བོས་སྨྱོ་གཏམ་་་   "༡༨༦༥ལོར་དབལ་ཤུལ་གསེར་རྟ་རང་ལ་འཁྲུངས་པའི་ཡོངས་གྲགས་མཁས་གྲུབ་ཆེན་པོ་ཁོང་གི་ལྗགས་རྩོམ་དག་གི་མཇུག་བྱང་དུ་མདོ་སྨད་སྤྲང་སྨྱོན་ཞེས་ཡང་ཡང་གསུངས་སོ།

          ༤། མངའ་རིས་པཎ་ཆེན་པད་མ་དབང་གི་རྒྱལ་པོ།         

          "་་་ཀློང་ཆེན་སྤྲུལ་བ་གསང་སྔགས་མིང་མཐའ་ཅན༔ མདོ་སྨད་ལྕགས་སྦྲུལ་ནག་པོའི་ལྟོ་བར་འཁྱིལ༔་་་"༡༨༨༡ལོར་འཁྲུངས་པའི་གསེར་རྟའི་པད་མ་འགྲོ་འདུལ་གསང་སྔགས་གླིང་པ་ལུང་བསྟན་པའི་གཏེར་ལུང་གབ་སྦས་ཡང་བྱང་ལས།

          ༥།གསེར་རྟའི་ྋམཁན་ཆེན་འཇིགས་མེད་ཕུན་ཚོགས་རིན་པོ་ཆེ།

          "་་་མདོ་ཁམས་སྨད་ཀྱི་ས་ཆ་རུ།མ་གླིང་བཟའ་གཡུ་ཡི་མཚོ་མོ་དང༌། ཕ་འདན་མ་པད་མའི་སྡོང་པོའི་རྩེར།འདན་ལྷ་སྲས་སྤྲུལ་བའི་ཟློས་གར་བསྒྱུར།་་"རང་རྣམ་འདན་སྲས་ཀྱི་རྟོགས་བརྗོད་ཅེས་པའི་ནང༌།

          ༦། རྫོང་སར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས།    ཁམས་སྡེ་དགེ

          "་་་སྨོན་པའི་འབྲས་བུ་མདོ་སྨད་དུ། གསེར་སྟོད་སྙི་མཚོའི་ཉེ་འདབས་སུ།་་་"          ༡༩༢༧ལོར་འཁྲུངས་པའི་གསེར་རྟའི་ྋསྐྱབས་རྗེ་ཨོ་རྒྱན་རིག་འཛིན་པད་མ་འགྲོ་འདུལ་གསང་སྔགས་གླིང་ལུང་བསྟན་ཚུལ་ལས།

          ༨།ནམ་མཁའི་ནོར་བུ།

          "་་་གསེར་ཐ་ནི་མགོ་ལོག་གི་ནང་ཚན་ཚོ་བ་བཙན་ཤོས་ཤིག་ཡིན་པ་རེད།་་་"ཁོང་གིས་བརྩམས་པའི་བྱང་འབྲོག་གི་ལམ་ཡིག་ནང༌།

          ༩། ཛེ་སྨད།

           "མདོ་སྨད་ཨ་མདོ་མགོ་ལོག་གི་ལོ་རྒྱུས་ནི་མགོ་ལོག་ཁང་རྒན་ཤོག་ཆེན་སྡེ་མི་ཚང་ལྔ་སྟོང་ཙམ་ཡོད་པ་དེའི་དཔོན་དབང་གཅེས།གཉིས་པ་མགོ་ལོག་གོང་མ་ཚང།་་་་་་བདུན་པ་མགོ་ལོག་ཝ་ཤུལ་གསེར་ཐ་སྡེ་མི་ཚང་ཉིས་ཁྲི་ཙམ་ཡོད་སྐད་་"ཁོས་བརྩམས་པའི་བསིལ་ལྡན་ཁ་བ་རི་བའི་བརྟན་གཡོའི་ཡུལ་སྣང་རགས་པ་ཤར་བའི་བརྗེད་བྱང་ཀུན་གསལ་དངུལ་དཀར་མེ་ལོང་ལས།

          ༡༠།ཉག་རོང་ཨ་བརྟན།

          "་་་དེ་ནས་འགུ་ལོག་བསེ་ཐར་ཕྱོགས་སོང་བ་ཡིན། དེར་སླེབས་དུས་སྔར་མགོ་ལོག་གསེར་ཐར་ནང་ཡོད་པའི་བྲག་མགོ་དགུ་མདའ་ཚང་ཚོ་ཁག་དང་ཐུག་བྱུང་་་་ "    བོད་གཞུང་ཤེས་རིག་ལས་ཁུངས་ཀྱིས་དཔར་དུ་བསྐྲུན་པའི་ཉག་རོང་ཨ་བརྟན་གྱི་མི་ཚེའི་བྱ་བཞག་དངོས་མྱོང་མ་འོངས་དྲན་བསྐུལ་ཞེས་པའི་ནང༌།

          ༡༡། བདེ་སྲུང་བོད་གནས་ཉམས་ཞིབ་ཁང༌།

          "་་་མདོ་སྨད་ཕྱོགས་སུ།རྨ་ཆེན་སྦོམ་ར། གངས་དཀར་ཕྱོགས་ལས་རྣམ་རྒྱལ། གསེར་རྟའི་འབྲོང་རི་སྨུག་པོ། གཉན་པོ་གཡུ་རྩེ་ལ་སོགས་་་"  ༡༩༩༡ ལོར་བཏོན་པའི་ཡིད་དུ་འོང་པའི་བོད་ཅེས་པའི་ནང༌།

 

          ༡༢།ལོ་རྒྱུས་ཉམས་ཞིབ་པ་བཀྲ་ཤིས་ཚེ་རིང༌།

          "་་་བོད་ཁམས་སྨྲ་རྫ་ཟལ་མོ་སྒང་གི་སའི་ཐིག་ལེའི་ཆར་འཁོད་པའི་ལྕགས་མོ་མགོ་ལོག་གི་དབལ་ཤུལ་གསེར་ཐ་འདི་ལ་ནང་གསེས་སུ་གཡུ་ཁོག གསེར་ཁོག རྡོ་ཁོག་གསུམ་དང་་་་"ཨ་མྱེ་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གིས་བཏོན་པའི་ལྗང་གཞོན་དུས་དེབ་འདོན་ཐེངས་བརྒྱད་པའི་ནང༌།

          ༡༣། གསེར་རྟའི་དཔོན་ཆེན་དབལ་ཤུལ་ལུ་གུའམ།དབལ་ཤུལ་ཚེ་སྒྲུབ་མགོན།

          "་་་སྤྱིར་ང་ཚོ་གསེར་རྟ་འདི་མགོ་ལོག་རེད།དེ་གཅིག་ཡིན།གཉིས་ནས་ངེད་ཤུལ་དཔོན་ཚང་གི་ཕ་ཁུ་ཆེ་རྒན་ཚོའི་རིང་ནས་ང་ཚོ་མདོ་སྨད་ཨ་མདོ་ཡིན་གསུང་རྒྱུ་རེད་མ་གཏོགས་མདོ་སྟོད་ཡིན་ཁམས་ཡིན་གསུང་རྒྱུ་མ་རེད།་་་་་་༡༩༥༩རྗེས་ནས་ང་ཚོ་དཀར་མཛེས་བོད་རིགས་རང་སྐྱོང་ཁུལ་གྱི་ངོས་ལ་སྦྱར་ཡོད་པར་བརྟེན་དེའི་རྒྱུ་མཚན་གྱིས་ཁམས་རེད་ཟེར་བ་བ་རེད། དེ་ཙམ་མ་གཏོགས་གཞན་རྒྱུ་མཚན་ཅི་ཡང་ཡོད་པ་མ་རེད།"

          ༢༠༠༥ ལོའི་ཟླ་༡༠པའི་ཚེས་མགོར་བཅར་འདྲི་ཞུས་པའི་གསུང་ལན་ནང་དེ་སྐད་གསུང་འདུག་ལ། ཁོང་ནི་༡༩༥༩ལོར་རྒྱ་བོད་དམག་འཁྲུག་སྐབས་སྐུ་སྲོག་བློས་བཏང་བའི་དབལ་ཤུལ་དཔོན་ཆེན་རིག་འཛིན་དོན་གྲུབ་མཆོག་གི་སྲས་ཆེ་བ་ཡིན།

          ༡༤།གསེར་རྟའི་སངས་ཚང་དུང་དཀར་དགོན་པའི་བླ་ཆེན་དབོན་པོ་དགེ་འདུན་རྒྱ་མཚོ།

          "་་དབལ་ཤུལ་གསེར་རྟའི་དབུ་ན་བཞུགས་པའི་དབལ་ཤུལ་དཔོན་ཚང་དང༌།ངེད་སངས་ཚངས་དདུང་དཀར་དགོན་པ་མཆོད་ཡོན་གཉིས་ཀྱིས་དབལ་ཤུལ་གསེར་རྟ་མདོ་སྨད་ཨ་མདོ་ཡིན་པར་མཐའ་གཅིག་ཏུ་ཐག་བཅད་ཐུབ་རྒྱུ་རེད།་་་ཛྲཅེས་དང༌།ཛྲ་་་གཞན་སུ་ཞིག་ལ་ཐག་ཅོད་རྒྱུའི་དབང་ཚད་ཡོད་པ་མ་རེད།་་་"     ༢༠༠༥།༡༠།༡༨ཉིན་ཁོང་ལ་བཀའ་འདྲི་ཞུས་པའི་བཀའ་ལན་ནང་དེ་སྐད་གསུང་འདུག་ལ། ཁོང་ནི་དགོན་པ་དེའི་ནང་གི་བླ་ཁག་ཐམས་ཅད་ནང་ནས་དབལ་ཤུལ་དཔོན་རབས་ཚོའི་དབུ་བླ་གཙོ་བོ་ཡིན་ཞིང་དགུང་ལོ་བདུན་ཅུ་ལྷག་རེད།

          ༡༥།ྋགོང་སྋསྐྱབས་མགོན་བཅུ་བཞི་བ་ཆེན་པོ།

          "་་་མདོ་སྨད་གསེར་ཐང་བླ་རུང་ལྔ་རིག་ནང་བསྟན་སློབ་གླིང་གི་མཁན་པོ་འཇིགས་མེད་ཕུན་ཚོགས་་་"        ༡༩༩༣ལོར་མཛད་པའི་ྋ་མཁན་པོ་འཇིགས་མེད་ཕུན་ཚོགས་མཆོག་གི་ཞབས་བརྟན་གསོལ་འདེབས་ལས།

          གཞན་ཡང༌། ཨ་མདོ་བླ་བྲང་བཀྲ་ཤིས་འཁྱིལ་བར་ཡོད་པའི་གསེར་རྟའི་གྲྭ་རྒྱུན་ཚོར་ད་བར་དུ་མགོ་ལོག་གསེར་རྟ་བ་ཞེས་འབོད། མདོར་ན་གནའ་ནས་ད་བར་མཁས་བླུན་ཚང་མས་ཨ་མདོ་མགོ་ལོག མགོ་ལོག་གསེར་རྟ་ཞེས་པ་འདི་ཡོངས་སུ་གྲགས་སོ།

          ཡིན་ཡང༌། རྒྱ་ནག་གཞུང་གིས་ཆོལ་གསུམ་ཁ་བྲལ་གྱིས་གསེར་རྟ་ཁམས་དཀར་མཛེས་ཁུལ་དུ་སྦྱར་བས།ང་ཚོ་རྗེས་རབས་པ་ལོ་རྒྱུས་ཡག་པོ་མི་ཤེས་མཁན་ཁ་ཤས་དང༌།ཡང་ན་དགོས་དབང་ཞིག་གིས་གསེར་རྟ་ཁམས་སུ་གཏོགས་ཚུལ་བཤད་པ་རེ་འགའ་ཡོད།

          འོན་ཀྱང་གཙོ་བོ་གསེར་རྟ་མི་མང་གིས་ད་དུང་སྔར་བཞིན་ཨ་མདོ་ཡིན་པ་བརྗེད་མེད་ལ། ཉེ་ཆར་དུས་འཁོར་དབང་ཆེན་ཞུ་བར་ཕེབས་མཁན་སེར་སྐྱ་རྒན་གཞོན་བཅུ་ལྷག་ཅིག་གསེར་རྟ་མི་མང་གི་སྐུ་ཚབ་བྱས་ནས་འོས་བསྡུ་ལས་ཁང་དུ་བཅར་ནས་ཀྱང་གསེར་རྟ་ཨ་མདོ་ཡིན་ཚུལ་ཞུས་འདུག་ལ། མདོ་སྨད་མི་མང་གིས་ཀྱང་གསེར་རྟ་ཨ་མདོ་ཡིན་ཤག་གིས་ད་ལོར་འོས་འདེམས་བྱས་ཡོད།

 

          དེས་ན་ལོ་རྒྱུས་ཀྱི་རྒྱབ་རྟེན་དང་གསེར་རྟ་མི་མང་གི་མངོན་འདོད་ལ་དང་ལེན་བྱེད་དགོས་པ་ནི་ང་ཚོ་དམངས་གཙོའི་གཞུང་གི་འོས་འགན་ཡིན་པས། བཀའ་སྤྱི་དང་འོས་བསྡུ་ཁང་བཅས་ཀྱིས་བར་སྡོད་དམ་ཡང་ན་གཅིག་འགན་གཅིག་དཀྲི་ལྟ་བུ་མི་བྱ་བར་ཐག་གཅོད་ཡང་དག་གནང་དགོས་པ་ནི་ཆོལ་གསུམ་ཆིག་སྒྲིལ་དམ་དུ་གནས་པའི་གཞི་རྩ་ཡིན་ལ། རྒྱ་གཞུང་གིས་ཆོལ་གསུམ་དཀྲུགས་པའི་ཐོག་ལ་ང་ཚོས་ཀྱང་རོགས་འདེགས་ལྟ་བུར་ནང་ཁུལ་ཇ་དཀྲུག་མི་རྒྱག་པའི་རེ་བ་མཁས་བླུན་ཀུན་ལ་ཞུ་བ་ལགས་སོ། །༢༠༠༦།༩།༢། དགེའོ།།