སྐད་ཆ་ཚབས་ཆེན་ཞིག

སྤྱི་མི་ཡིན་པས་སྤྱི་དོན་གླེང་གིན་ཡོད། ཕྱོགས་སུ་ལྷུང་བ་འགའ་རེར་གནོད་ན་ཐང།

སྤྱི་ལ་ཕན་ན་སྒེར་ལ་གནོད་ཀྱང་བླ། མཚང་ལ་ཕོག་གིན་ཡོད་ན་དེ་བས་དགའ།

            དེང་སང་བོད་མི་ལ་ལས"མི་ཚོང་རྒྱག་པ"ཟེར་བ་ཞིག་ཤོད་ཀྱིན་པ་འདི་སྐད་ཆ་ཚབས་ཆེན་ཞིག་རེད། དེ་ནི་བྲན་གཡོག་སྤྱི་ཚོགས་སྐབས་ཀྱི་ཉོ་ཚོང་ཞིག་གི་མིང་གི་རེད། ། དེ་ནི་མཐོང་ཆུང་དང་བཙན་དབང། མགོ་སྐོར་ཅི་རིགས་པའི་བྱ་ངན་འགྲོ་བ་མིའི་ཐོབ་ཐང་དང་ཡོངས་སུ་འགལ་བའི་ཆེས་ཉེས་ཆེན་གྱི་ནག་ཚོང་ཞིག་རེད

            དེང་སང་བོད་མི་སོགས་ཕྱི་རྒྱལ་དུ་འགྲོ་བ་འདི་ཁོ་ཚོའི་རེ་སྨོན་ཞིག་ཡིན་ལ་རང་དབང་ཡང་ཡིན། དེ་ལྟར་འགྲོ་ཐུབ་པ་དེས་ཁོ་ཚོའི་འཚོ་བར་ཡང་ཕན་ཆེན་པོ་ཐོགས་ཀྱིན་ཡོད། དེ་བས་དེ་དག་གཏོང་སྟངས་དེ་ནི་དོན་ངོ་མ་རོགས་རམ་ཞིག་ཡིན། དེ་ནི་སུ་ལའང་བཙོང་བ་ཞིག་མིན་ལ། སུས་ཀྱང་ཉོས་པ་ཞིག་གཏན་ནས་མིན། གལ་ཏེ་ཡིན་པའི་དབང་དུ་བཏང་ནའང། དེ་ནི་ཁོ་རང་གིས་ཁོ་རང་ཉིད་བཙོང་བ་ཞིག་ལས་མ་འདས་པས། དེ་ལ་ཉེས་ཁྲིམས་ཅི་ཞིག་འབབ་ཀྱང་ཐོག་མར་འགྲོ་མཁན་ཁོ་རང་ཚོར་འབབ་ངེས།

བཙོང་མཁན་ཉོ་མཁན་གང་ཡང་མེད་པ་ལ། ཉོ་ཚོང་ཞེས་པའི་ཐ་སྙད་ཇི་ལྟར་འཐད།

རང་དང་སྤྱི་ཚོགས་གཉི་གར་ཕན་པ་ཞིག གལ་ཏེ་ཁྲིམས་དང་འགལ་ཡང་ཅིས་མི་རིགས།

            རྒྱ་བལ་གྱི་བོད་མི་ག་ཚོད་ཅིག་ཐབས་ཤེས་སྣ་ཚོགས་ཀྱིས་ཕྱོིར་སྐྱོད་བྱས་དང་བྱེད་ཀྱིན་པ་དང། གལ་ཏེ་ཕྱི་རྒྱལ་ཞིག་ནས་སྡེབ་གཅིག་ལེན་མཁན་ཞིག་བྱུང་ན་ཕལ་ཆེ་བས་འཚང་ཁ་རྒྱག་ངེས་པ་དང། ད་བར་ཕྱིན་ཟིན་པ་ཚོས་ཀྱང་ཕྱིར་རང་གི་ནང་མི་དང་བོད་དོན་ཐད་ལའང་དགེ་མཚན་ཐོན་གྱིན་པའི་དངོས་ཡོད་གནས་ཚུལ་འདི་རིགས་ཚང་མས་གསལ་བོ་ལོས་ཤེས། དེས་ན་ང་ཚོ་ལ་ཁེ་ཕན་ཡོད་པའི་རོགས་ཕན་འདི་རིགས་ལ་མ་དགའ་བ་བྱེད་དོན་ཅི་ཡིན་ནམ། འདི་ཡང་ང་ཚོས་ས་མཐའི་བདེ་བ་འཚོལ་ཐབས་ཤིག་མ་ཡིན་ནམ། བསམ་བློ་ཡག་པོ་ཐོངས།

            གལ་ཏེ་སུ་ཞིག་གིས་ཁྲིམས་འགལ་གྱི་བྱ་བ་ཚབས་ཆེན་དང། བོད་མི་དམངས་ལ་གནོད་པ། སྤྱི་ཚོགས་ལ་གནོད་པའི་ཉེས་དོན་གསོག་གིན་ཡོད་པ་ཤེས་ན། བདེན་པ་ཁུངས་སྐྱེལ་གྱི་གནས་ཚུལ་ཞིབ་གསལ་དུ་འབྲི་དགོས་ལ། བོད་ཀྱི་ཁྲིམས་ཞིབ་ཁང་དང། རྒྱ་གར་ཁྲིམས་ཁང་ལའང་གཏུགས་བཤེར་བྱ་འོས། དེ་འདྲའི་གདེང་ཚོད་མེད་ན་ཁྱོད་ཀྱི་སྐད་ཆ་དེ་དག་ནི་ཉོག་གཏམ་དང་དཀྲུག་ཤིང་ལས་མ་འདས་པས་ཅིས་ཀྱང་གཟབ་ན་འོས།

            དོན་ངོ་མ་བོད་དོན་བསམ་མཁན་ཞིག་ཡིན་ན་ཉེས་མེད་ལ་ཉེས་འདོགས་དང། སྐྱོན་ཆུང་ཆེ་སྒྱུར། སྒེར་སྐྱོན་སྤྱི་སྐྱོན་དུ་མ་བརྗོད་རོགས། གནས་ཚུལ་གང་ཡིན་ཡང་དེའི་དགེ་སྐྱོན་གསལ་རྟོགས་ཐུབ་པའི་སྒོ་ནས་བསམ་ཤེས་དང་ཕན་སེམས་ཀྱི་སྐད་ཆ་རེ་བཤད་ན་ཅིས་མི་དགའ།

རང་སེམས་ན་ཉེས་པ་མེད་ན། གཤིན་ཡུལ་ན་འཇིགས་པ་མེད་པས།

ཅི་ཙམ་གྱིས་སྨད་ར་ཐོངས་དང། དེ་ཙམ་གྱིས་གུ་ཡངས་གཏོང་ཆོག

"བདག་ལ་གཞན་གྱིས་ཕྲག་དོག་གིས། གཤེ་སྐུར་ལ་སོགས་མི་རིགས་པས།

གྱོང་ཁ་རང་གིས་ལེན་པ་དང། རྒྱལ་ཁ་གཞན་ལ་འབུལ་བར་ཤོག །"