༄༅། །སྤྱི་འཐུས་ཤིག་གི་ཚད་གཞི།

          ང་རང་ཉེ་དུས་སྤྱི་འཐུས་སུ་སླེབས་སྐབས་དེ་ཙམ་གྱིས་དགའ་སྤོབས་དང་ཡང་ན་བློ་འཚུབ་ཀྱང་ཆེར་མ་བྱུང་མོད། “བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་ཀྱི་ཐོག་ནས། སྤྱི་འཐུས་ཀྱི་ལས་ཁུར་ཞུ་སྒོ་མཐའ་དག བཅའ་ཁྲིམས་ཀྱི་འབྲུ་དོན་འགལ་མེད་ཐོག རང་དོན་ཕྱོགས་ལྷུང་དང༌། འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས་རང་ནུས་གང་ཐེག་ཞུ་རྒྱུའི་མཆོག་གསུམ་དབང་བཙུགས་ཀྱི་དམ་བཅའ་བརྟན་པོ་ཞུ་རྒྱུ”ཞེས་སྤྱི་འཐུས་ཀྱི་ལས་ཁུར་དམ་བཅའ་འབུལ་སྐབས་གློ་བུར་དུ་བློ་འཚབ་ཅིག་བྱུང་ཡང་རིམ་པས་རང་སེམས་རང་གིས་བསྐུལ་ནས་སྤོབས་པ་བསྐྱེད་པ་ཡིན། དེ་ནས་སྔ་རྗེས་ཀྱི་གྲོས་ཚོགས་ཐེངས་གཉིས་ལ་ཞུགས་པའི་མྱོང་ཚོར་གྱིས་བློ་འཚབ་དེ་ཅུང་འཇགས་པར་གྱུར། རིམ་བཞིན་བློ་འཚབ་དེ་སླར་ཡང་ཆེ་རུ་འགྱུར་བཞིན་འདུག ད་ལྟའིབློ་འཚབ་དེ་ནི་ང་རང་གཅིག་པུའི་ཐོག་གི་མ་འདང་བའི་བློ་འཚབ་དེ་མིན་པར་སྤྱི་འཐུས་ཕྱག་རོགས་མི་ཉུང་བ་ཞིག་གི་ཞན་ཆ་མཐོང་བའི་སྤྱི་འདུས་ཀྱི་བློ་འཚབ་ཞིག་ཡིན། དེ་བས་བདག་གིས་སྤྱི་འཐུས་གསར་འདེམས་ལ་ཉེ་བའི་སྐབས་འདིར་མི་དམངས་ཀྱིས་ངེས་པར་ཚོད་ཐིག་དགོས་པའི་སྤྱི་འཐུས་ཤིག་གི་འོས་ཆོས་སམ་ཚད་གཞི་གཙོ་བོ་འགའ་གླེང་ན་འདོད།

          འདིའི་སྐོར་ལ་བསམ་ཚུལ་མི་འདྲ་བ་མང་ཡང༌། མདོར་བསྡུས་ན་གསུམ་སྟེ། དང་པོ་ནི། བཅའ་ཁྲིམས་ནང་བཏོན་པའི་སྤྱི་འཐུས་སུ་འགྲོ་ཆོག་པའི་མ་མཐའི་ཆ་རྐྱེན་དག་དང༌། གཉིས་པ་ནི། སྤྱི་འཐུས་ཀྱི་དམ་བཅའ་བརྩི་སྲུང་བྱ་ཐུབ་མཁན། གསུམ་པ་ནི། ཤེས་འཇོན་གྱི་ཚད་གཞི་བཅས་ཡིན། དང་པོ་ནི་བཅའ་ཁྲིམས་ཀྱིས་གཏན་ལ་ཕབ་པས་ངེས་པར་ཚང་དགོས་པ་བཤད་ག་ལ་དགོས།

          གཉིས་པ་སྤྱི་འཐུས་ཀྱི་དམ་བཅའི་ཚིག་བརྗོད་ནང༌། “རང་དོན་ཕྱོགས་ལྷུང་དང༌། འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས་རང་ནུས་གང་ཐེག་ཞུ་རྒྱུ”ཞེས་པ་འདི་རེད།

འདི་ལ་བསམ་བློ་ཞིབ་ཏུ་གཏོང་རྒྱུ་ཡོད། བདག་གིས་གོ་བ་འདི་ལྟར་བླངས་ཡོད།

༡༽ཁོའི་རྒྱུན་ལྡན་གྱི་མི་ཚེ་སྐྱེལ་སྟངས་ཆ་ནས་རང་དོན་ཧམ་སེམས་མེད་པའམ་མི་ཆེ་བ།      

༢༽རང་སྡེའམ་ཆོལ་ཁ་དང་ཆོས་ལུགས་སོགས་ཀྱི་ཕྱོགས་ཞེན་མེད་པའམ་མི་ཆེ་བ། 

༣༽མི་དམངས་ཀྱི་ཆེད་དུ་བཤད་ཕོད་ལ་སྒྲུབ་ཀྱང་ཕོད་པའི་འཇིགས་པ་མེད་ལ་དཀའ་ངལ་གང་ལའང་མགོ་མི་སྒུར་བའི་ཞུམ་མེད་སྙིང་སྟོབས་ལྡན་པ། 

༤༽དགའ་ཉེ་སོགས་ལ་ཆགས་པའི་ཕྱོགས་ཞེན་དང༌། རྒྱུ་དང་དབང་ལ་ཆེས་ཆེར་ཆགས་ཏེ་ཐ་ན་རྒྱལ་འཚོང་པའང་བྱེད་སྲིད་པ་ལྟ་བུའི་རིགས་མ་ཡིན་པ། 

༥༽རང་མི་དགའ་བ་ཙམ་རྒྱུ་མཚན་དུ་བྱས་ཏེ་གཞན་ལ་འཁོན་སེམས་འཆང་བ་དང༌། ཐ་ན་གྲོས་ཚོགས་ནང་ནས་ཀྱང་ཕན་ཚུན་བར་ལ་ངར་ངར་རྫིག་རྫིག་གི་དཔའ་གཏམ་བཤད་པའི་རླུང་ཁམས་ཅན་མ་ཡིན་པ། 

༦༽དངོས་ཐོག་བདེན་འཚོལ་གྱི་དྲང་བདེན་སྐྱོང་བ།

༧༽མི་དམངས་དང་རྒྱལ་ཁབ་ལ་བློ་དཀར་ལྷག་བསམ་ཆེ་བ།

༨༽ནམ་རྒྱུན་སྤྱི་ཚོགས་ལ་རང་ནུས་གང་ཡོད་འདོན་ཐུབ་པ་བཅས།

        མདོར་ན། བཅའ་ཁྲིམས་རིན་པོ་ཆེར་བརྩི་སྲུང་འགལ་མེད་ཐོག་སྤྱི་འཐུས་ཀྱི་ལས་ཁུར་ཞུ་སྒོ་མཐའ་དག་ལ་བློ་དཀར་གཞུངས་དྲང་གིས་སྒྲུབ་མཁན་ཞིག་ཡིན་དགོས། གལ་ཏེ་ཁྱད་ཆོས་དེ་དག་གི་གང་རུང་ཞིག་མ་ཚང་ནའང་སྤྱི་འཐུས་མཚན་ཉིད་པར་འགྱུར་དཀའ་སྟེ། རང་གི་ཁས་ལེན་གཙང་མའམ་མཆོག་གསུམ་དཔང་བཙུགས་ཀྱི་རྩ་བའི་དམ་བཅའ་དང་མ་མཐུན་པའམ། ཡང་ན་འགལ་བའི་ཉེས་པའང་ཡོད་པས་སོ།

          གསུམ་པ་ཤེས་ཚད་དང་འཇོན་ཐང་གི་འོས་ཆོས་ཀྱང་ཤིན་ཏུ་གལ་ཆེ། དེ་ཡང་ཤེས་ཚད་ཅེས་པ་ནི་མཐོ་སློབ་སོགས་ཀྱི་ལག་འཁྱེར་ཡོད་པ་ཙམ་ཞིག་ལ་གོ་མི་འོས་ལ། སྙན་དངགས་པའམ་རྩོམ་པ་པོ་ཞིག་ཡིན་དགོས་པའི་ངེས་པ་དེ་བས་ཀྱང་མེད། དེ་ནི་དཔེ་དེབ་ལས་ཀྱང་སྤྱི་ཚོགས་ལ་ཆ་རྒྱུས་ཆེ་བ་དང༌། ཆོས་ཀྱི་བློ་སྦྱོང་ལས་ཀྱང་ཆབ་སྲིད་བསམ་བློའི་གོ་རྟོགས་མཐོ་བ་གལ་ཆེ་བས། སློབ་སྦྱོང་དང་སྤྱི་ཚོགས་ཀྱི་ལག་ལེན་ཟུང་འབྲེལ་གྱིས་བསམ་བློ་ཡོངས་སུ་སྨིན་པའི་ཤེས་ཚད་ཅིག་ངེས་པར་མཁོ།

          འཇོན་ཐང་ཞེས་པ་ཡང་ངེས་པར་བྱ་བའི་ཉམས་མྱོང་དང་གྲུབ་འབྲས་ཀྱིས་ཚད་གཞི་བྱེད་དགོས་པ་ཞིག་སྟེ། དོན་དམ་གྱི་འཇོན་ཐང་ཟེར་བ་དེ་ནི་མདོར་ན་བྱས་རྗེས་ཀྱི་ཆེ་ཆུང་ཞིག་ལ་ངོས་འཛིན་འོས་པས་སོ། དེས་ན་སྤྱི་ཚོགས་ཀྱི་ལས་ཀ་ཅི་རིགས་ཁྲོད་ཉུང་མཐར་ཡང་ལོ་བཅུ་ཙམ་ལ་ཞབས་ཞུ་སྒྲུབ་མྱོང་མཁན་ཞིག་མིན་ན་གཟེངས་སུ་ཐོན་པའི་གྲུབ་འབྲས་ཤིག་ཀྱང་ཡོད་དཀའ། དེ་བས་ན་སློབ་ཐོན་གྱི་ཤེས་ཚད་མཐོ་ཡང་ལག་ལེན་གྱི་ཉམས་མྱོང་དང་བྱ་བའི་གྲུབ་འབྲས་སྟོན་རྒྱུ་མེད་པའི་རིགས་ནི་ད་དུང་སྤྱི་འཐུས་ཀྱི་ཚད་གཞིར་སླེབས་མེད་དེ། སྤྱི་འཐུས་གྲོས་ཚོགས་ནི་ཚོད་ལྟའམ་སྦྱོང་བརྡར་སྤྲོད་ས་ལྟ་བུ་ཞིག་བྱེད་མི་རུང་ངོ༌། ཡང་སྤྱི་འཐུས་སུ་བསླེབས་ཟིན་པ་གང་ཞིག་ལ་རེ་བ་ཡོད་མཁན་ཞིག་ཡིན་ན་མུ་མཐུད་སྡོད་རྒྱུ་ཡང་གལ་ཆེ་བས། སྤྱི་འཐུས་རྙིང་པ་མང་ཙམ་དང་གསར་བ་ཉུང་ཙམ་གདམ་རྒྱུ་དེ་ཡང་ལས་དོན་ཐོག་གནད་འགག་ཅིག་ཆགས་ཡོད་ཚུལ་ཤེས་དགོས།

          གོང་གི་ཚད་གཞི་དེ་དག་གིས་རང་ཉིད་ལ་གཅིག་བལྟས་ན། བདག་ལྟ་བུ་ནི་རང་དོན་ཕྱོགས་ཞེན་མི་ཆེ་བ་ཙམ་ལས་མེད་པ་ཞིག་མིན་ལ། འཇིགས་ཞུམ་ཆགས་སྡང་ཡང་ཆུང་བའམ་ཉུང་བ་ཙམ་ལས་མེད་པ་ཞིག་གཏན་ནས་མིན། བཅའ་ཁྲིམས་ཀྱི་དགོངས་དོན་ལྟར་དྲང་བདེན་ཟོལ་མེད་ཀྱིས་སྤྱི་འཐུས་ཤིག་གི་འོས་འགན་སྒྲུབ་རྒྱུའི་ལས་ཁུར་དག་ལ་འབད་པས་ཞུགས་ཐུབ་ཙམ་ཞིག་ལས་གཞན་ཤེས་ཚད་དང་ལྷག་པར་འཇོན་ཐང་གི་འོས་ཆོས་ཀྱང་ཞན་པས་སྤྱི་འཐུས་ཚད་ལྡན་ཞིག་ཅིས་ཀྱང་འོང་དཀའ་བ་ནི་རང་བློ་རང་ལ་ལྐོག་ཏུ་མ་གྱུར་པའི་མཐོང་ཆོས་ཡིན་པའང་རྒྱ་ཆེ་བའི་མི་དམངས་ཀྱིས་མཁྱེན་པར་མཛོད་ཅིག །

༢༠༠༥།༨།༢༥།

<<བོད་ཀྱི་དུས་བབ>>ནང་བཀོད།