༄།འདྲེ་དཀར་པོ།

    ངའི་མིང་ལ་འདྲེ་དཀར་པོ་ཟེར། ང་འདྲེ་ཡིན་པས་ང་ཤ་ལ་དགའ་ཞིང་ཁྲག་ལ་མོས། ངའི་དྲོད་ཁོག་ལྟོགས་ན་སུ་ཡང་གསོད་ལ་སུ་ཡང་ཟ། ཡིན་ཡང་སུ་ཞིག་གིས་ང་ལ་རང་ལུས་སྦྱིན་ན། དེ་ཁོ་ན་ངའི་བཀུར་འོས་པའི་གཉེན་ཡིན།

    ང་མི་ལོ་གོ་དགུའི་རིང་ལ་རང་ལུས་སྦྱིན་མཁན་སུ་གཅིག་ལ་ཡང་ཐུག་མ་མྱོང༌། དེ་བས་འཇིག་རྟེན་འདིར་ང་ལ་བྱམས་པའི་གཉེན་སུ་ཡང་མེད་པར་བསམས། འོན་ཀྱང༌། ང་རང་ལོ་བརྒྱ་ལོན་པའི་དེ་རིང་ང་ལ་བརྩེ་བའི་གཉེན་ཞིག་ཐོབ།
    ངའི་གཉེན་དེས། ཁོ་རང་ངས་ཡིན་གཅིག་མིན་གཅིག་ལ་ཟ་དགོས་པའི་རེ་བ་བཏོན། དེ་བས་ངས་ཁོའི་རེ་བ་དོན་ཆེན་དུ་བརྩིས་ཏེ་བཟས་པ་ཡིན། ཁོང་གི་ཤ་ནི་ཞིམ་པ་ལ་ད་བར་དེ་འདྲའི་ཞིམ་པོ་ཟ་མྱོང་མེད།
    ངས་ནམ་ཡང་རེ་བ་བྱེད་པ་ནི་ང་ཤ་ལ་མི་དགའ་བ་ཞིག་ཏུ་འགྱུར་རྒྱུ་དང༌། ཡང་ན་ང་ཟས་ལ་བརྟེན་མི་དགོས་པའི་དྲི་ཟ་ལྟ་བུར་གྱུར་ན་བསམས། ངའི་རེ་བ་དེ་དཀོན་མཆོག་ལའང་ཡང་ཡང་ཞུ་གིན་ཡོད། འོན་ཀྱང་ངའི་རང་བཞིན་འདིར་འགྱུར་བ་སྤུ་ཙམ་ཡང་མ་སོང།
    ངའི་བཀྲེས་སྐོམ་གྱི་སྡུག་བསྔལ་འདི་གཞན་དག་གི་སྡུག་བསྔལ་གང་གིས་ཀྱང་མཚོན་ ཐབས་མེད་པ་ཞིག་རེད། ང་རང་སྡུག་བསྔལ་འདི་ལས་ཐར་ཙམ་རེ་བྱེད་རྒྱུ་དེ་ནི་ངས་ཁྱོད་ཀྱི་ཤ་ཁྲག་ཟ་འཐུང་ དགོས་པ་དེ་ཡིན། དེ་བས་ང་ལ་བཟོད་སྒོམ་གནང་རོགས། ང་ལ་སྙིང་རྗེ་གནང་རོགས། ང་ལ་ཤ་ཁྲག་གི་སྦྱིན་པ་གཏོང་རོགས།

    ཡིན་ཡང་ང་འདྲེ་དཀར་པོ་ཡིན། གལ་ཏེ་འདྲེ་ནག་པོ་ཡིན་ན་ལྟོ་དོན་མིན་པར་ཡང་ཚེ་སྲོག་གི་རོལ་རྩེད་བྱེད་ངེས་སོ། །

༄།ང་སུ་རེད།

ཀ

ང་རང་མི་ཡུལ་གྱི་ལུང་པ་ཁུག་ཀྱོག་ཅིག་ཏུ་སྐྱེས་པ་ནས་ད་བར་མི་ལོ་ཉི་ཤུའི་རིང་ལ་རི་སྒང་གི་རི་ལམ་མང་པོ་ཞིག་བརྒྱུད་དེ་མཐར། ལུང་གསུམ་གྱི་བཞི་མདོ་འདིར་སླེབས། དེ་རིང་གཞི་ནས་ངས་ང་རང་གི་རྐང་ལམ་མེད་པ་ཤེས་ཤིང༌། གཞུང་ལམ་གང་དུ་འགྲོ་བའི་གདེང་ཚོད་མེད་པ་ཡང་ཚོར།
ཁ

དེ་རིང་གཞི་ནས་ངས་ང་རང་སུ་ཡིན་པའི་བརྟག་དཔྱད་ཐེངས་དང་པོ་དེ་བཏང་བ་ཡིན། ངས་ད་བར་དུ་གཞན་དག་ལ་བརྟག་དཔྱད་བྱེད་པ་ལས་རང་ཉིད་ལ་བརྟགས་མ་མྱོང༌། དེ་ཡང་ངས་མི་མང་པོ་ཞིག་ལ་བརྟག་དཔྱད་བྱས་པ་བརྒྱུད་རིམ་བཞིན་ངས་ང་རང་ལ་ཡང་དཔྱད་པ་ཞིག་བྱེད་དགོས་པའི་ཚོར་རྟོག་བྱུང༌།  ངས་རང་ཉིད་ལ་བརྟག་གིན་བརྟག་གིན་ཡ་མཚར་སྐྱེས་པ་མ་ཟད་སྐབས་རེར་འཇིགས་སྣང་བྱུང༌། ངོ་མ་ངས་རང་ཉིད་ཅི་ཞིག་ཡིན་མིན་གྱི་དོགས་པ་ཐོག་མ་སྐྱེས།
ག

ང་མི་ཡིན་ནམ། མི། ཡང་སྙིང་མི་ངོ་མ་ཡོད་དམ།