༄།ཨ་ཕ་ལགས།

 

      ཨ་ཕ་ལགས། བྱམས་བརྩེ་ཆེ་བའི་པ་ཕ་ལགས། ཨ་མ་ཁྱེད་དང་བྲལ་བ་ནས། གྲིབ་ནག་གིས་འཇིགས་སྣང་བསྐུལ། ཨ་མའི་མ་ཎིའི་དབྱངས་རྟ་རེ་རེ། དཀོན་མཆོག་ལ་བཅོལ་བའི་རེ་འབོད་དང། ཁྱེད་ཉིད་དྲན་པའི་གདུང་དབྱངས་ཡིན།

     ཨ་ཕ་ལགས། ཁྱེད་ཀྱིས་གསན་ཨེ་བྱུང། ཁྱེད་རང་གང་དུ་ཕེབས། ཁྱེད་རང་གང་དུ་བཞུགས། མགྱོགས་པོ་ལོག་ཤོག ཨ་མའི་མིག་ཆུས་ཁྱེད་ལ་ཕེབས་བསུ་ཞུས་ཡོད།

     ཨ་ཕ་ལགས། བཀའ་དྲིན་ཆེ་བའི་ཨ་ཕ་ལགས། བུ་ཆུང་ཁྱེད་དང་བྲལ་བ་ནས། རི་སྤྱང་གིས་འཕྱ་སྨོད་བྱེད། བུ་ངའི་ཀི་བསྭཱུའི་དཔའ་སྐད་རེ། དགྲ་བོ་ལ་རྒོལ་བའི་སྙིང་སྟོབས་དང། ཁྱེད་ཉིད་དྲན་པའི་འབོད་སྒྲ་ཡིན།

     ཨ་ཕ་ལགས་ ཁྱེད་ཀྱིས་གསན་ཨེ་བྱུང། ཁྱེད་རང་གང་དུ་ཕེབས། ཁྱེད་རང་གང་དུ་བཞུགས། མགྱོགས་པོ་ལོག་ཤོག བུ་ཆུང་གི་ངུ་ངག་གིས་ཁྱེད་ལ་ཕེབས་བསུ་ཞུས་ཡོད།

     ཨ་ཕ་ལགས། ཁྱེད་རང་མ་ཕེབས་ན། ང་དང་ཨ་མའི་འཇིགས་སྣང་སུ་ཡིས་སེལ། ཨ་ཕ་ལགས། ཁྱེད་རང་མ་མཇལ་ན། ང་དང་ཨ་མའི་སྐྱོ་གདུང་ཇི་ལྟར་སངས།

     ཨ་ཕ་ལགས། ཁྱེད་ཀྱིས་གསན་ཨེ་བྱུང། མགྱོགས་པོ་ལོག་ཤོག ང་དང་ཨ་མའི་པང་ལ་ལོག་ཤོག །

༄།ངའི་བརྩེ་བའི་ཨ་ཕ།

 
     ཨ་ཕ་ལགས། ཁ་སང། ཁྱེད་ཀྱི་ཐུགས་སེམས་ལས། བྱམས་བརྩེ་ཡི་འོད་མདངས་འཕྲོས། ང་དང་ཨ་མའི་སེམས་པ་དྲོད་ལམ་ལམ། དྲོད་ལམ་ལམ་གྱི་སེམས་ཁོང་ན། ཁྱེད་ཀྱི་འཛུམ་པའི་མེ་ཏོག་བཞད།
     ཨ་ཕ་ལགས། དེ་རིང། ཁྱེད་ཀྱི་སྤྱན་ཟུང་ལས། དྲན་གདུང་གི་ཆར་བ་བབས། ང་དང་ཨ་མའི་སེམས་པ་གྲང་ཤུར་ཤུར། གྲང་ཤུར་ཤུར་གྱི་སེམས་ཁོང་ན། ཁྱེད་ཀྱི་སྤྱན་ཆབ་འཁྱགས་པས་བཟུང།
     ཨ་ཕ་ལགས། སང་ཉིན། ཁྱེད་ཀྱི་ཕྱག་ཟུང་ལ། དྲིན་ལན་གྱི་ཁ་བཏགས་འབུལ། ང་དང་ཨ་མའི་སེམས་པ་སྐྱོ་ལྷང་ལྷང། དྲོ་གྲང་མི་སྙོམ་པའི་སེམས་ཁོང་ནས། ང་ཚོའི་ལས་དབང་གི་རླུང་རྟ་འཕུར་ངེས། །