བོད་མི། ཁྲག་གིས་ལོ་རྒྱུས་བྲིས་ནས་དེང་གནས་ངོ་རྒོལ་བྱེད་པ

ཁྲིན་ཧོང་ཞིན་གྱིས་བརྩམས། ལྷ་སྡེ་གནམ་ལོ་ཡག་གིས་བསྒྱུར།

དོན་རྐྱེན་ལ་ཕྱི་མིག་ལྟ་བ།

       ཕྱི་ལོ་ ༢༠༡༡ ལོའི་ཟླ་ ༣ ནས་བཟུང་། རྒྱ་ནག་གི་སི་ཁྲོན་ཞིང་ཆེན་རྔ་བ་ཁུལ་དང་དཀར་མཛེས་ཁུལ་ནས་སྔ་རྗེས་སུ་བོད་ ཀྱི་དགེ་འདུན་པ་ ༡༡ ཙམ་གྱིས་རང་ལུས་མེར་བསྲེགས་ཀྱིས་རྒྱ་ནག་གཞུང་གིས་བོད་ཐོག་བཟུང་བའི་མི་རིགས་ དང་ཆོས་ལུགས་སྲིད་ཇུས་ལ་ངོ་རྒོལ་བྱས་འདུག དེའི་ཁྲོད་དུ་དགེ་འདུན་པ་ ༩ དང་བཙུན་མ་ ༢ འདུས་ཡོད་པ་དང་། ད་ལྟའི་ཆར་ཉུང་མཐར་ ༦ ལྷག་གྲོངས་ཡོད་ལ། དེའི་ནང་དུ་བཙུན་མ་ ༢ འདུས་ཡོད། གཞན་ ༦ ལྷག་གར་སོང་ཆ་མེད་དུ་གྱུར་འདུག  དགེ་འདུན་པ་ ༩ ཁྲོད་ནས་ ༦ སྐད་གྲགས་ཆེ་ཅན་གྱི་རྔ་པའི་དགེ་ལུགས་པའི་ཀིརྟི་དགོན་ནས་རེད། དགེ་འདུན་པ་དང་བཙུན་མ་རྣམས་ཀྱིས་རང་ལུས་མེར་བསྲེགས་ཀྱིས་ངོ་རྒོལ་གནང་སྐབས། “ང་ཚོར་ཆོས་དད་རང་དབང་དགོས། ” “ཏཱ་ལའི་བླ་མ་བོད་ལ་ཕེབས་དགོས། ” “ཏཱ་ལའི་བླ་མ་ཁྲི་ལོར་བརྟན་པར་ཤོག ” “བོད་ལ་རང་དབང་དགོས་པ་དང་རྒྱལ་ཁབ་སླར་གསོ་བྱེད་དགོས”སོགས་ཀྱི་འབོད་ཚིག་ བསྐྱོར་འདུག
རྒྱལ་ཕྱི་རྒྱལ་ནང་དུ་དོ་སྣང་ཤུགས་ཆེན་བསླེབས་པ།
            བོད་མིས་རང་ལུས་མེར་བསྲེགས་ཀྱི་ངོ་ རྒོལ་བསྟུད་མར་སྤེལ་བས།རྒྱལ་ཁབ་ཕྱི་ནང་དུ་དོ་སྣང་ཤུགས་ཆེན་སླེབས་ཡོད། ཕྱི་རྒྱལ་དུ་ཡོད་པའི་བོད་མིས་རྒྱབ་བསྐྱོར་ལས་འགུལ་ཆེན་པོ་སྤེལ་ཡོད་ལ། བཙན་བྱོལ་བོད་གཞུང་གི་བསྟི་གནས་ངྷ་རམ་སཱ་ལ་ནས་མི་གྲངས་སྟོང་ཕྲག་མང་བོས་ཕྱི་ ཟླ་ ༡༠ ཚེས་ ༡༨ དང་ ༡༩ ཉིན་གཉིས་རིང་ཏཱ་ལའི་བླ་མ་དབུ་བཞུགས་ཐོག་ཞལ་འདོན་བསྐྱོར་བ་དང་སྨྱུང་གནས་ སྲུང་བ། འདས་པོར་བསྔོ་སྨོན་མཆོད་འབུལ་གནང་འདུག  
            ཕྱི་རྒྱལ་ཁག་ཏུ་ཡོད་པའི་བོད་མི་དང་རྔ་པ་ ནས་ཡིན་པའི་བོད་མི་རྣམས་ཀྱིས་ཀྱང་ཞལ་འདོན་བསྐྱོར་བ་དང་སྨྱུང་གནས་སྲུང་བ་ བཅས་ཀྱི་ལམ་ནས་གདུང་སེམས་མཉམ་སྐྱེད་གནང་བཞིན་པ་དང་། བཙན་བྱོལ་བོད་གཞུང་གི་སྲིད་བློན་བློ་བཟང་སེངྒེ་ལགས་ཀྱིས་ཨ་རིའི་གཞུང་ལ་སི་ ཁྲོན་བོད་ཁུལ་དུ་བསྟུད་མར་བྱུང་བཞིན་པའི་རང་ཉིད་མེར་བསྲེགས་ཀྱི་དོན་ རྐྱེན་ཐད་རྒྱ་ནག་གཞུང་ལ་གནོན་ཤུགས་སྤྲད་དགོས་པའི་འབོད་བསྐུལ་གནང་ཡོད་པའི་ ཁར། དེ་དང་མཉམ་དུ་བཙན་བྱོལ་བོད་གཞུང་གིས་དགོས་འདུན་དྲུག་བཏོན་འདུག  
            དེ་དག་ནི་ད་ ལྟ་བོད་ནང་རང་ལུས་མེར་བསྲེགས་གཏོང་མཁན་གྱི་བོད་མི་ཇེ་མང་དུ་འགྲོ་བཞིན་པའི་ སྐབས་འདིར། བོད་ནང་དམ་དྲག་མཚམས་འཇོག་བྱ་རྒྱུ་དང་སྨྲ་བརྗོད་རང་དབང་སྤྲོད་རྒྱུ། འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་རྒྱུ། ལྷག་པར་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ཐོག་འཛིན་པའི་སྲིད་ ཇུས་བསྐྱར་ཞིབ་གནང་རྒྱུ་དང་། བོད་མིའི་བསམ་འདུན་དང་མཐུན་པ་དང་སྤྱི་ཚོགས་ཞི་མཐུན་ལ་བསྐུལ་ཐུབ་པའི་སྲིད་ ཇུས་གསར་བ་ཞིག་གཏན་འབེབས་གནང་རྒྱུ། ཕྱོགས་མཚུངས་རྒྱལ་སྤྱིའི་ཚོགས་པ་ཁག་དང་གསར་འགོད་པ་རྣམས་ལ་བོད་ནང་དང་སྒོས་ སུ་ཀིརྟི་དགོན་གྱི་དངོས་ཡོད་གནས་ཚུལ་ཞིབ་འཇུག་ཆེད་སྐུ་ཚབ་འཕྲལ་མར་གཏོང་བར་ འབོད་སྐུལ་བཅས་རེད། 
            ཨ་རིའི་རྒྱལ་སྲིད་སྤྱི་ཁྱབ་ཁང་གི་མགྲིན་ཚབ་པ་ཁྲའོ་ཉིས(Mark Toner) ཀྱིས་ཕྱི་ཟླ་ ༡༠ ཚེས་ ༡༨ཉིན་གྱི་གསར་འགོད་པར་ལན་འདེབས་ཚོགས་ཐོག་ཏུ་བསྟན་དོན། “ང་ཚོས་བོད་ཀྱི་དགེ་འདུན་པས་རང་ཉིད་མེར་བསྲེགས་ གཏོང་བཞིན་པར་དོ་སྣང་བྱེད་ཀྱི་ཡོད་ལ། ཀྲུང་གོའི་བོད་རིགས་རྣམས་ལ་ཁོང་ཁྲོ་བསྟུད་མར་ཡོང་བཞིན་པའི་གཏིང་རིམ་ལ་དཔག་ ན། རྒྱ་ནག་རྒྱལ་ཁབ་དང་དབུ་ཁྲིད་པས་བོད་མིའི་ཁེ་དབང་ལ་བརྩི་བཀུར་གྱིས་བོད་ཁུལ་ ཁག་ཅིག་ལ་སྤེལ་བཞིན་པའི་སྲིད་ཇུས་ཀྱི་འགལ་ཆར་བསྐྱར་བཅོས་དང་། བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་བཅས་ལ་སྲུང་སྐྱོབ་བྱེད་དགོས།”  གཞན་འཇར་མན་ཕྱི་འབྲེལ་ལས་ཁུངས་ནས་ཕྱི་ཟླ་ ༡༡ ཚེས་ ༤ ཉིན་འབོད་བསྐུལ་དྲག་པོ་གནང་དོན། “རྒྱ་ནག་གིས་བོད་ཐོག་འཛིན་པའི་སྲིད་ཇུས་འགྱུར་བ་བཏང་ནས་ཛ་དྲག་གི་གནས་སྟངས་ ཞི་འཇམ་དུ་གཏོང་འོས།”
            ཕྱི་རྒྱལ་དུ་བོད་ཀྱི་གནད་དོན་ལ་དོ་སྣང་བྱེད་མཁན་གྱི་རྒྱ་ནག་གི་ཤེས་ཡོན་པ་ དང་འགྲོ་བ་མིའི་ཐོབ་ཐང་བརྩོན་ལེན་པ་ ༢༠༠ ལྷག་གིས་མིང་རྟགས་བཀོད་པའི“ང་ཚོས་བོད་ཀྱི་གནས་སྟངས་ལ་གསལ་བསྒྲགས་དང་འབོད་ བསྐུལ”ཨ་རིའི་སྲིད་འཛིན་ཨོ་བྷ་མའི་མཚན་ཐོག་ལ་ཕུལ་ནས་ཧ་ཝེ་ཡེ(Hawaii)ནས་ བསྐོང་བཞིན་པའི་འཛམ་གླིང་མཐོ་རིམ་དཔོན་རིགས་ཀྱི་ཚོགས་འདུའི་སྟེང་ནས་རྒྱ་ནག་ གི་གཙོ་འཛིན་ཧུའུ་ཅིན་ཐོ་ལ་བོད་ཀྱི་དགེ་འདུན་པ་དང་བཙུན་མ་མེར་བསྲེགས་ལས་ འཕྲོས་པའི་འགྲོ་བ་མིའི་ཐོབ་ཐང་གི་བརྗོད་གཞིའི་ཐོག་ནས་བསྐུལ་འདེད་གནང་དགོས་ པའི་འབོད་བསྐུལ་གནང་ཡོད།  ད་ དུང་དམངས་གཙོའི་ལས་འགུལ་གྱི་ཚོགས་པ་ཁག་གིས་ཀྱང་འབོད་བསྐུལ་ཞུས་འདུག་ལ། དཔེར་ན་ཨ་རིར་ཡོད་པའི་རྒྱ་ནག་དམངས་གཙོ་ཚོགས་པའི་རྒྱལ་ཡོངས་རྒྱུན་ཨུ་སོགས་ ཀྱིས་ཀྱང་བོད་མིར་རྒྱབ་སྐྱོར་དང་། བོད་ནང་གི་ཛ་དྲག་གནས་སྟངས་ཐད་དོ་སྣང་གིས་རྒྱ་ནག་གཞུང་གིས་ད་ལྟ་གྲངས་ཉུང་མི་ རིགས་ཐོག་སྤེལ་བཞིན་པའི་སྲ་མཁྲེགས་ཀྱི་སྲིད་ཇུས་ཀྱི་ཁ་ཕྱོགས་ལ་འགྱུར་བ་བཏང་ ནས་བོད་ནང་གི་བོད་མིའི་འདོད་བློ་དང་འཚམ་ཞིང་། སྤྱི་ཚོགས་དངོས་གནས་ཞི་མཐུན་ལ་བསྐུལ་ཐུབ་པའི་སྲིད་ཇུས་གསར་བ་ཞིག་གཏན་འབེབས་ ཡོང་བར་འབོད་བསྐུལ་བྱས་འདུག  
            ནུབ་ ཕྱོགས་རྒྱལ་ཁབ་ཀྱི་སྲིད་གཞུང་ཁག་དང་འགྲོ་བ་མིའི་ཐོབ་ཐང་ཚོགས་པ་ཁག་གིས་ཀྱང་ རྒྱ་ནག་གཞུང་ལ་ཛ་དྲག་གི་སྐྱོན་བརྗོད་དང་འབོད་བསྐུལ་གནང་ཡོད་པས། རྒྱ་ནག་ཕྱི་འབྲེལ་ལས་ཁུངས་ཀྱིས་ཐེངས་དུ་མར་དགེ་འདུན་པས་རང་ཉིད་མེར་བསྲེགས་ གཏོང་བ་ནི“ལྐོག་ལ་སྦས་པའི་དྲག་སྤྱོད་རིང་ལུགས་པ”ཡིན་ ཞེས་བརྗོད་ཡོད་པར་མ་ཟད། ཏཱ་ལའི་བླ་མས་ཡག་བསྒྱུར་གྱིས་བསྐུལ་མ་བྱས་པ་ཞིག་དང་། བོད་རང་བཙན་དྲིལ་བསྒྲགས་བྱས་པའི་མཇུག་འབྲས་ཡིན་པས། རང་ཉིད་མེར་བསྲེགས་དོན་རྐྱེན་གྱིས་རྒྱ་དམར་སྲིད་དབང་བཙོག་བསྒྱུར་བྱེད་ཀྱི་ ཡོད་ཚུལ་ལབ་བཞིན་ཡོད། 
            གནས་ཚུལ་ཡོང་ཁུངས་ལྟར་ན། རྒྱ་ནག་གཞུང་གིས“བྱ་བའི་ཚན་ཆུང”གི་མིང་ཐོག་ནས་ལས་བྱེད་མི་སྣས་དགོན་པར་དོ་ དམ་བྱེད་ཀྱིན་པར་མ་ཟད།རྔ་བར་བདེ་འཇགས་དམག་མི་མངགས་གཏོང་གིས་ཀིརྟི་དགོན་དང་། དགེ་འདུན་པ་དང་བཙུན་མ་མེར་བསྲེགས་བྱུང་ སའི་དགོན་པ་དང་རུ་སྡེ་ཁག་ལ་དམ་དྲག་ནན་མོ་བྱེད་ཀྱིན་པས། དགེ་འདུན་པ་དང་བཙུན་མ་མང་ཆེ་ཤོས་དགོན་པར་ཁ་བྲལ་དུ་བཅུག་ཡོད་ཅིང་། དྲ་རྒྱ་མཚམསས་འཇོག་དང་རྒྱ་ལམ་བཀག་འགོག་གིས་ས་གནས་རང་གི་མི་མ་གཏོགས་ཡུལ་དེར་ གཏོང་གི་མེད་པས། གསར་འགོད་པས་བཅར་འདྲི་རྩ་བ་ནས་བཀག་འདུག  
ཡི་གེ་ཁྲོད་ཀྱི་དེང་གནས།
            མི་མང་བོ་ཞིག་གིས་ད་དུང་བརྗེད་ངས་བསྐུར་མེད་སྲིད་པ་ཞིག་ནི་ཟླ་ངོ་བཞིའི་ཡར་ སྔོན་ཏེ། ད་ལོའི་ཕྱི་ཟླ་  ༧ ཚེས་ ༡༩ ཉིན། ལྷ་སའི་པོ་ཏ་ལའི་མདུན་ཐང་དུ་གླུ་གར་གྱི་མཚོ་མོ་གཡོ་ཞིང་། ཚོན་ལྡན་ཤོག་སྦག་དང་ལྒང་བུའི་བར་སྣང་བཀང་ཡོད་ལ། སྐབས་དེར་རྒྱ་ནག་གི་གཙོ་འཛིན་གཞོན་པ་ཞུས་ཅིན་ཕེན་གྱིས་བོད་དང་རྒྱ། རྒྱལ་ཕྱི་རྒྱལ་ནང་གི་མི་རིགས་རྣམས་ལ་སྤྲོ་སེམས་འཁོལ་བའི་ལམ་ནས་བརྗོད་དོན། “བོད་བཅིངས་འགྲོལ་བྱས་ནས་ལོ་ངོ་  ༦༠ འཁོར་ བའི་རིང་དུ་མང་ཚོགས་ཀྱི་ཆོས་དད་རང་དབང་ལ་བརྩི་བཀུར་དང་སྲུང་སྐྱོབ་བྱས་ཡོད་ པའི་ཁར། བོད་མི་དམངས་ཀྲུང་གོ་གསར་བའི་བདག་པོ་གྱུར་ཡོད། ……” དེ་ མ་ཐག་ཏུ་རྒྱ་ནག་རྒྱལ་ཡོངས་ཀྱི་ཚགས་ཤོག་ཆེ་ཆུང་དང་བརྙན་འཕྲིན། རླུང་འཕྲིན་དང་དྲ་རྒྱ་སོགས་ཀྱི་བརྒྱུད་ལམ་བཀོལ་ཏེ་ཁ་དོག་སྣ་ལྔའི་བརྡ་ཆད་ ཀྱི་ལམ་ནས་བོད་ཀྱི་འཚོ་བའི་གནས་སྟངས་སམ། རྒྱལ་ཁབ་ཀྱི་བདག་པོའི་བདེ་སྐྱིད་ཀྱི་དེ་རིང་ལ་བསྟོད་བསྔགས་གནམ་ས་གཡོ་བ་ཞིག་ བྱས་ཡོད།  
            ད་ལོའི་ལོ་མགོ་ནས་བཟུང་། གཅིག་རྗེས་གཉིས་མཐུད་ཀྱི་རྩོམ་ཡིག་དང་བརྙན་འཕྲིན། གློག་བརྙན་བཅས་བཀོལ་ནས་ལོ་ངོ་ ༦༠ རིང་དུ་དབུས་སྲིད་གཞུང་གིས་བོད་མིར་སྐད་ཅིག་མའི་ནང་དུ་ལོ་ངོི་སྟོང་ཕྲག་གི་ ལོ་རྒྱུས་ཐོལ་བརྒལ་ཇི་ལྟར་བྱེད་དུ་བཅུག་ཚུལ་དང་། ཞིང་བྲན་ནས་བདག་པོར་ཇི་ལྟར་བསྒྱུར་ཚུལ། ད་དུང་རླབས་ཆེན་གཙོ་འཛིན་གྱི་བླ་མེད་ཐུགས་ཁུར་ཇི་ལྟར་གངས་ལྗོངས་སུ་འཕྲོས་ ཚུལ་སོགས་བསྒྲགས་ཡོད། 
ཡིན་ནའང་། མི་མང་བོ་ཞིག་གིས་འདི་ལྟར་འདྲི་སྲིད་དེ། ཅིའི་ཕྱིར“བདེ་སྐྱིད”ལྡན་པའི་བོད་མིས་རང་ཉིད་ཀྱི་གཅེས་སྲོག་མཇུག་བསྡུ་བའི་ ལམ་ནས“བདེ་སྐྱིད་ཀྱི་འཚོ་བ་རྒྱབ་ཏུ་དོར”བཞིན་ ཡོད་དམ། ཅིའི་ཕྱིར་ནང་ཆོས་དད་ཅིང་ཚེ་སྲོག་ལ་བརྩི་བཀུར་ཡོད་པ་དང་། ལོ་ངོ་བརྒྱ་ཕྲག་མང་བོར་འགྲན་སེམས་དོར་ནས་དགོན་པའི་ནང་ཆོས་ལ་ཉམས་ལེན་གནང་ བཞིན་པའི་དགེ་འདུན་པ་དག་གིས་གཅིག་རྗེས་གཉིས་མཐུད་ཀྱིས་རང་ཉིད་མེར་བསྲེགས་ ནས་ཚེ་སྲོག་མཇུག་བསྡུ་དགོས་ཐུག་པ་རེད་དམ། ཅིའི་ཕྱིར“བརྩི་བཀུར”ཐོབ་པའི“རྒྱལ་ཁབ་ཀྱི་བདག་པོ”ཚོས་རང་ཉིད“བདག་པོ”ཡིན་ པའི་ཐོབ་ཐང་མི་བཀོལ་བར་རང་ཉིད་མེར་བསྲེགས་ཀྱིས་དགོས་འདུན་འདོན་བཞིན་ཡོད་དམ། ཅིའི་ ཕྱིར་བདེ་སྐྱིད་ཀྱི་འཚོ་བར་ལོངས་སུ་སྤྱོད་ཀྱིན་པར་བསྒྲགས་པའི་བོད་མིར་ད་ དུང་དྭངས་ཐབས་མེད་པའི་ལེ་བདས་ཁེངས་ཡོད་དམ། དགེ་འདུན་པ་དང་བཙུན་མས་རང་སྲོག་ཕུལ་དོན་ཅི། ཟུངས་ཁྲག་བརྡོལ་དོན་གང་ཡིན་ནམ།
དྲི་བ་འདི་དག་གི་རྒྱབ་ལོགས་སུ་འཛམ་གླིང་མི་དམངས་ཀྱིས་མིག་མཐར་མཆི་མ་འཁོར་ ནས་ལོ་ངོ་ ༦༠ རིང་མཐོང་བའི་དོན་དངོས་ནི། བོད་ཀྱིས་མི་རབས་ལ་མི་རབས་བརྒྱུས་ཏེ་གཅིག་རྗེས་གཉིས་མཐུད་ཀྱི་ལམ་ནས་རང་ཉིད་ ཀྱི་ཚེ་སྲོག་དང་ཟུངས་ཁྲག་གིས་སྡུག་བསྔལ་དང་མགོ་མི་འདོག་པའི་བོད་མིའི་ལོ་ རྒྱུས་ཟིན་འགོད་བྱེད་ཀྱིན་པར་མ་ཟད། དེ་མཚུངས་སུ་རྒྱ་དམར་གཞུང་གིས་ཡི་གེར་ཕབ་པའི་དེང་གནས་དྲིལ་བསྒྲགས་ཀྱི་རྫུན་ གཏམ་ལ་ངོ་རྒོལ་བྱེད་ཀྱིན་པ་ཞིག་རེད།
དབང་ཡོད་དང་རྩུབ་སྤྱོད་ཀྱིས་ངུར་སྨྲིག་གི་བླ་གོས་མེ་རུ་བསྒྲོན་པ།
            ལོ་ ངོ་སྟོང་ཕྲག་གི་རིང་ལ་ནང་ཆོས་ཀྱིས་བོད་མིའི་རིན་ཐང་ལེན་ཕྱོགས་ཀྱི་ལྟེ་བ་ བསྐྲུན་ཡོད་པ་དང་། ཤེས་རིག་གི་དོན་སྙིང་གྲུབ་ཡོད། ཆོས་དད་ནི་གངས་ལྗོངས་བོད་མིའི་འཚོ་བའི་གྲུབ་ཆ་གལ་ཆེན་ཞིག་རེད་ལ། ནང་ཆོས་ཀྱི་དགོངས་པས་གངས་ཅན་མཐོ་སྒང་གཡོགས་ཤིང་། མི་རྣམས་ཀྱི་སེམས་ཁམས་སུ་འཐིམ་ཡོད།  
            ལོ་ངོ་ ༦༡ ཡར་སྔོན་གྱི་ཟླ་ ༡ ནང་། མའོ་ཙེ་ཏུང་གིས་མངོན་གསལ་གྱིས་བསྟན་དོན། “བོད་ཀྱི་མི་འབོར་ཉུང་ནའང་། རྒྱལ་སྤྱིའི་གནས་བབ་གལ་ཆེན་བཟུང་ཡོད་པས། ང་ཚོས་ངེས་པར་དུ་དབང་འོག་ཏུ་བཅུག་ནས་བསྒྱུར་བཅོས་ཀྱིས་མི་དམངས་དམངས་གཙོའི་ བོད་ཅིག་བསྐྲུན་དགོས།” སྐབས་དེ་ཤེད་ནས“བསྒྱུར་བཅོས”ཀྱི་མིང་ཐོག་ནས་བོད་མི་ས་ཡ་གཅིག་གི་ཚེ་སྲོག་ འཕྲོག་ཡོད་པ་དང་། དགོན་པ་ ༦༠༠༠ ལྷག་ལ་གཏོར་བཅོམ་ཕོག་ཡོད་པས། རིག་གསར་གྱི་རྗེས་སུ་སྒོ་འབྱེད་སྐབས་དགོན་པ་ ༡༣ ལས་ ལྷག་མེད། དུས་ཡུན་དེར་དགེ་འདུན་པ་དང་བཙུན་མ་བཙོན་འཇུག་དང་སྐྱ་སར་ཕབ་ནས་གཉེན་སྒྲིག་ ཏུ་བཅུག་པ། ལ་ལ་ཞིག་ལ་གཅར་རྡུང་གིས་སྲོག་ཐོག་བཏང་ཡོད།   
            དུས་རབས་སྔ་མའི་ལོ་ ༨༠ རྗེས་ ནས་དགོན་པ་མང་བོ་ཞིག་ལ་སླར་གསོ་བྱས་ཡོད་ནའང་། སྲིད་གཞུང་གིས་དགོན་པར་ཞུགས་མཁན་གྱི་ལོ་ཚོད་དང་སེར་མོ་བ་བྱེད་པར་ཆོག་མཆན་ ལེན་དགོས་པའི་སྲིད་ཇུས་ལག་བསྟར་བྱས་ཡོད་པར་མ་ཟད། ད་དུང“རྒྱལ་གཅེས་རིང་ལུགས་དང་ཁྲིམས་ལུགས་སློབ་གསོ”ནི་དགོན་པ་ཁག་གིས་ངེས་པར་ དུ་སློབ་སྦྱོང་བྱེད་པའི་སློབ་ཚན་དུ་བསྒྱུར་ཡོད་པ་དང་། དེའི་ནང་དུ་བོད་མིའི་སེམས་ཁུངས་སུ་བླ་ན་མེད་པའི་ཏཱ་ལའི་བླ་མ་མཆོག་ལ་སྐྱོན་ བརྗོད་བྱེད་རྒྱུ་ནི་སེར་མོ་བའི་བསམ་བློའི་འཁྱེར་ཕྱོགས་ལ་བརྟག་པའི་འགག་སྒོ་ ཞིག་ཏུ་བཟོས་འདུག                
            གལ་སྲིད་སུ་ཞིག་གིས་དེ་ལ་མ་དགའ་བའི་རྣམ་འགྱུར་བཟུང་ཚེ“ཁ་བྲལ་བའི”ཞྭ་ མོ་གཡོགས་ཀྱི་ཡོད་ཅིང་།སྐྱོན་ཆ་ཡང་མོའི་རིགས་སྐྱ་སར་ཕབ་ནས་དགོན་པ་ནས་ཕྱི་ལ་བསྐྲད་ཀྱིན་པ་དང་ལྕི་ མོའི་རིགས་བཙོན་ཁང་དུ་བཅུག་ཡོད། དགོན་པ་ཆེ་ཆུང་ཀུན་ལ“བྱ་བའི་ཚན་ཆུང”གི་མིང་ཐོག་ནས་ལས་བྱེད་མི་སྣ་བཀྲམས་ནས་ ཡོད་པའི་ཁར།  རང་ འགུལ་པར་ལེན་འཕྲུལ་ཆས་གང་སར་བཙུགས་ཡོད་པ་དང་ཉེན་རྟོགས་དམག་མི་དུས་ངེས་མེད་ ནང་དགོན་པའི་ནང་འཛུལ་ཆོག་གི་ཡོད་ལ། ཐ་ན་སྤྱི་ཚོགས་ནག་པོའི་བྱེད་སྟངས་བཀོལ་ནས་དྲག་གནོན་དང་གཅར་རྡུང་། མི་བསད་རྗེས་ངོས་ལེན་མི་བྱེད་པ་བཅས་ལག་བསྟར་བྱེད་ཀྱིན་འདུག  
            མཐའ་མཇུག་བོད་མི་ཞིག་གིས་ཁ་ཆེམས་ནང་མཐོང་བ་ནི། “ང་རང་རྒྱ་ནག་གི་གཉའ་གནོན་གྱི་འོག་ཏུ་འདུག་འདོད་མེད་ལ། ཉིན་གཅིག་ལའང་འདུག་འདོད་མེད་པའི་ཁར། ཐ་ན་སྐར་མ་གཅིག་ལའང་འདུག་འདོད་མེད། ”གཞན་དགེ་འདུན་པ་ལོང་བ་ཞིག་སྐུ་གྲོངས་ཁར་ནང་མིར་བཤད་དོན། “འདི་ལྟ་བུའི་འཚོ་བ་ཞིག་མིག་ཡོད་མཁན་ཞིག་གིས་བསྲན་ག་ལ་ཐུབ། ང་རང་ལྟ་བུའི་མིག་ལོང་བར་གྱུར་ཡོད་མཁན་ཞིག་གིས་ཀྱང་བསྲན་ཐུབ་ཀྱི་མི་འདུག ”
            དེ་ ལྟར་བོད་ཁུལ་གྱི་ལོ་རྒྱུས་ཐོག་སྔར་བརྒྱུད་མ་མྱོང་བའི་སྡུག་བསྔལ་གྱིས་བོད་ མི་བསྲན་ཐབས་མེད་པའི་གནས་སུ་དེད་ནས་ངུར་སྨུག་གི་བླ་གོས་མེ་རུ་བསྒྲོན་འདུག བཤད་མ་དགོས་པ་ཞིག་ལ་མེ་རྟ་ནི་དབང་དྲག་དང་རྩུབ་སྤྱོད་རེད། འོད་དུ་འབར་བའི་ཚེ་སྲོག་གིས་མི་རྣམས་ཀྱི་སེམས་པར་འབོད་བསྐུལ་དྲག་ཏུ་བྱེད་ ཀྱིན་པ་དང་། ཡ་ང་བ་དང་སྡུག་བསྔལ་གྱིས་ལྕགས་ཀྱི་སེམས་ཁམས་གྲུབ་པའི་དབང་དྲག་མི་སྣར་གཡོ་ འགུལ་བྱེད་ཐབས་མེད་ནའང་། བོད་མིའི་མཐུན་སྒྲིལ་དང་སྙིང་སྟོབས་ཀྱི་སྲ་བརྟན་ལ་བསྐུལ་ལྕག་ཚད་མེད་ཐེབས་ ངེས་རེད།  
            རྒྱ་ དམར་གཞུང་གིས་སྤེལ་བའི་རྒྱབ་ཤ་དཀར་བོའི་དེབ་ནང་དུ་བོད་མིར་རྩ་བའི་ཐོབ་ཐང་ སྣ་ཚོགས་ཡོད་པར་བཤད་ཡོད་པའི་ཁར། བདེ་སྐྱིད་ཀྱི་འཚོ་བར་རོལ་བཞིན་པར་བྲིས་འདུག དོན་དངོས་སུ་འདི་ལྟ་བུའི“བདེ་སྐྱིད་ཀྱི་འཚོ་བའི”ནང་ དུ་ལོ་མང་རིང་བོད་ཐོག་ལག་བསྟར་བྱས་པའི་དྲག་གནོན་གྱི་བྱེད་ཐབས་འདུས་ཡོད་ལ། ཁྲིམས་འགལ་གྱི་འཛིན་བཟུང་དང་ཡང་དག་མ་ཡིན་པའི་བཅད་ཁྲའང་འདུས་ཡོད། མི་འགྱངས་པའི་ཡར་སྔོན།རྒྱ་དམར་གཞུང་གི་མ་འོངས་ཆེས་མཐོའི་ གཙོ་འཛིན་ཞིས་ཅིན་ཕེན་གྱིས་ལྷ་སར་འཚམས་འདྲི་བྱེད་སྐབས། བོད་མིར་ཐུག་འཕྲད་བྱས་མེད་ལ། དགོན་པའི་ནང་དུའང་བསྐྱོད་མེད། དེ་ལས་ལྡོག་ནས་ས་གནས་ཀྱི་ཉེན་རྟོགས་པ་དང་བོད་སྡོད་དམག་མི། ཆབ་སྲིད་མི་སྣ་དང་ཁྲིམས་འཛིན་དཔོན་རིགས་ལ་ཐུག་འཕྲད་བྱས་ཡོད། བྱེད་ཐབས་འདི་སྤྱད་ནས་རྒྱ་དམར་གཞུང་གིས་བོད་ཐོག་དྲག་རྩུབ་གཉའ་གནོན་གྱི་ཆོད་ སེམས་ཕྱི་ལ་བསྟན་ཡོད། 
            ཡིན་ནའང་། ཆོད་སེམས་ལས་སྲ་མཁྲེགས་ལྡན་པ་ནི་ཚེ་སྲོག་ཡིན་པས། བོད་མི་དུས་རབས་སྔ་མའི་ལོ་རབས་  ༥༠ ནང་རྒྱ་དམར་དམག་དཔུང་གི་རྩུབ་སྤྱོད་དང་མེ་སྒྱོགས་ཀྱི་ཁ་གཏད་དུ་ལངས་པ་ནས་ བཟུང་། དུས་རབས་ཕྱེད་ཀའི་རིང་རང་ཉིད་ཀྱི་བླ་ན་མེད་པའི་ས་གཞི་དང་ཆོས་དད། ལོ་ངོ་སྟོང་ཕྲག་རིང་གི་ཤེས་རིག མི་རིགས་ཀྱི་བརྒྱུད་འཛིན་བཅས་ཀྱི་ཆེད་དུ་ངོ་རྒོལ་མཚམས་འཇོག་ བྱེད་མྱོང་མེད་ལ། མི་རབས་ནས་མི་རབས་མཐུད་ནས་མགོ་འདོགས་ཡལ་བར་དོར་ནས་ཚེ་སྲོག་དང་ཟུངས་ཁྲག་གི་ རིན་དོད་ལ་མི་ཕངས་པར་གུས་བསྟོད་དང་མིག་ཆུ་འཆོར་བའི་བོད་མིའི་ལོ་རྒྱུས་ཀྱི་ ཤོག་ལྷེར་ཤོག་ལྷེ་མཐུད་ནས་འབྲི་བཞིན་ཡོད།  
ལོ་མཇུག་ལ་སླེབས་ལ་ཉེ་བའི་སྐབས་འདིར་ང་ཚོའི་སེམས་པ་རེ་རེ་ཕྱི་ལོ་ ༢༠༡༡ ལོར་བོད་ཀྱི་དཔའ་བོ་རྣམ་པས་ཟུངས་ཁྲག་གིས་བྲིས་པའི་ལོ་རྒྱུས་སྟེང་བརྐོས་ཡོད། དཔའ་བོ་རྣམ་པའི་མཚན་གཞུང་གཤམ་གསལ།
བློ་བཟང་ཕུན་ཚོགས། ལོ ༢༠  ཨ་མདོ། དེང་གི་སི་ཁྲོན་རྔ་པ་ཁུལ་ཀརྟི་དགོན་པའི་དགེ་འདུན་པ།  ཕྱི་ལོ་  ༢༠༡༡ ལོའི་ཟླ་ ༣ ཚེས་ ༡༦ཉིན།
ཚེ་དབང་ནོར་བུ། ལོ་ ༢༩ ཁམས། དེང་གི་སི་ཁྲོན་དཀར་མཛེས་ཁུལ་ཉ་མཚོ་དགོན་པའི་དགེ་འདུན་པ། ཕྱི་ལོ་  ༢༠༡༡ ལོའི་ཟླ་ ༩ ཚེས་ ༢༦ཉིན།
དློ་བཟང་སྐལ་བཟང་། ལོ་ ༡༨ ཨ་མདོ། དེང་གི་སི་ཁྲོན་རྔ་བ་ཁུལ་ཀརྟི་དགོན་པའི་དགེ་འདུན་པ། ཕྱི་ལོ་  ༢༠༡༡ ལོའི་ཟླ་ ༩ ཚེས་ ༢༦ ཉིན།
བློ་བཟང་དཀོན་མཆོག ལོ་ ༡༨ ཨ་མདོ། དེང་གི་སི་ཁྲོན་རྔ་བ་ཁུལ་ཀརྟི་དགོན་པའི་དགེ་འདུན་པ། ཕྱི་ལོ་  ༢༠༡༡ ལོའི་ཟླ་ ༩ ཚེས་ ༢༦ཉིན།
སྐལ་བཟང་དབང་ཕྱུག ལོ་ ༡༧ ཨ་མདོ། དེང་གི་སི་ཁྲོན་རྔ་བ་ཁུལ་ཀརྟི་དགོན་པའི་དགེ་འདུན་པ། ཕྱི་ལོ་  ༢༠༡༡ ལོའི་ཟླ་ ༡༠ཚེས་ ༧ཉིན།
ཆོས་འཕེལ། ལོ་ ༡༩ ཨ་མདོ། ༢༠༡༠ ལོར་བྱ་བའི་ཚན་ཆུང་གིས་དགོན་པ་ནས་བསྐྲད་དེ་བཙན་ཚུགས་ཀྱིས་སྐྱ་སར་ཕབ་པའི་ ཀརྟི་དགོན་པའི་དགེ་འདུན་པ་ཟུར་བ། ཕྱི་ལོ་ ༢༠༡༡ ལོའི་ཟླ་ ༡༠ ཚེས་ ༧ ཉིན།
མཁའ་དབྱིངས། ལོ་ ༡༨ ཨ་མདོ། ༢༠༡༠ ལོར་བྱ་བའི་ཚན་ཆུང་གིས་དགོན་པ་ནས་བསྐྲད་དེ་བཙན་ཚུགས་ཀྱིས་སྐྱ་སར་ཕབ་པའི་ ཀརྟི་དགོན་པའི་དགེ་འདུན་པ་ཟུར་བ། ཕྱི་ལོ་ ༢༠༡༡ ལོའི་ཟླ་ ༡༠ ཚེས་ ༧ ཉིན།
ནོར་བུ་དགྲ་འདུལ། ལོ་ ༡༩ ཨ་མདོ། ༢༠༡༠ ལོར་བྱ་བའི་ཚན་ཆུང་གིས་དགོན་པ་ནས་བསྐྲད་དེ་བཙན་ཚུགས་ཀྱིས་སྐྱ་སར་ཕབ་པའི་ ཀརྟི་དགོན་པའི་དགེ་འདུན་པ་ཟུར་བ། ཕྱི་ལོ་ ༢༠༡༡ ལོའི་ཟླ་ ༡༠ཚེས་ ༡༥ཉིན།
བསྟན་འཛིན་དབང་མོ། ལོ་ ༢༠ ཨ་མདོ། དེང་གི་སི་ཁྲོན་རྔ་བ་ཁུལ་མ་མའི་བཙུན་དགོན་གྱི་བཙུན་མ། ཕྱི་ལོ་  ༢༠༡༡ ལོའི་ཟླ་ ༡༠ ཚེས་ ༡༧ཉིན།
ཟླ་བ་ཚེ་རིང་། ལོ ༣༨ ཁམས། དེང་གི་སི་ཁྲོན་དཀར་མཛེས་ཁུལ་དཀར་མཛེས་དགོན་པའི་དགེ་འདུན་པ། ཕྱི་ལོ་ ༢༠༡༡ ལོའི་ཟླ་ ༡༠ ཚེས་ ༢༥ ཉིན།
དཔལ་ལྡན་ཆོས་མཚོ། ལོ་ ༣༥ ཁམས། དེང་གི་སི་ཁྲོན་དཀར་མཛེས་ཁུལ་རྟའུ་བྱང་ཆུབ་ཆོས་གླིང་དགོན་པའི་བཙུན་མ། ཕྱི་ལོ་ ༢༠༡༡ ལོའི་ཟླ་ ༡༡ཚེས་ ༣ ཉིན།  
རྩོམ་ཡིག་འདི་བྲིས་ནས་མཇུག་རྫོགས་ལ་ཉེ་སྐབས། བོད་ཕྱི་ལོགས་སུ་བོད་མི་གཉིས་ཀྱིས་རང་ཉིད་མེར་བསྲེགས་ལ་ བཏང་ནས་ངོ་རྒོལ་བྱས་པའི་གནས་ཚུལ་ཐོས་སོང་ལ། ང་ཚོའི་སྐྱོ་སེམས་དང་གུས་བརྩི་ཧི་མ་ལ་ཡ་བརྒྱུད་ནས་ཁོང་གཉིས་ཀྱི་འགྲམ་དུ་ སྐྱེལ་རྒྱུ་ཡིན། ཁོང་རྣམ་གཉིས་ནི།  
ཤེས་རབ་རྡོ་རྗེ། བོད་ཀྱི་གཞོན་ནུ་ལྷན་ཚོགས་ཀྱི་ལྡི་ལི་ས་གནས་གཞོན་ནུ་ཚོགས་པའི་ཟུང་དྲུང་། ཕྱི་ལོ་ ༢༠༡༡ ལོའི་ཟླ་ ༡༡ ཚེས་ ༤ ཉིན་གྱི་ཞོགས་པའི་ཆུ་ཚོད་ ༡༠ སྟེང་ལྡི་ལིར་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་རང་ལུས་མེར་བསྲེགས་ ཀྱིས་ངོ་རྒོལ་གནང་ཡོད་ཅིང་། སྐབས་དེར་རྒྱ་གར་ཉེན་རྟོགས་པས་འཇུས་ནས་མེ་བསད་ཡོད་པ་དང་ལྡི་ལི་སྨན་ཁང་ཞིག་ ཏུ་བསྐྱལ་འདུག
གཞན་མིང་མི་ཤེས་པའི་དགེ་འདུན་པ་ཞིག་གིས་ཕྱི་ལོ་ ༢༠༡༡ ལོའི་ཟླ་ ༡༡ ཚེས་ ༡༠ ཉིན་གྱི་ཞོགས་པའི་ཆུ་ཚོད་ ༧ ཡས་མས་ཙམ་ལ་བལ་ཡུལ་རྒྱལ་སའི་མཆོད་རྟེན་བྱ་རུང་ཁ་ཤོར་གྱི་འགྲམ་དུ་རང་ལུས་ མེར་བསྲེགས་ཀྱིས་ངོ་རྒོལ་གནང་འདུག འོན་ཀྱང་། གནས་ཚུལ་ཞིབ་ཕྲ་ལག་སོན་བྱུང་མ་སོང་།  

བསྒྱུར་མཆན།
ཁྲིན་ཧོང་ཞིན་ནི་ད་ལྟ་ཨོ་སི་ཁྲི་ལི་ཡར་བཞུགས་ཀྱིན་པའི་རྒྱ་མོ་མཁས་པ་ཞིག་དང་རྒྱ་ནག་གི་དེང་རབས་སྲིད་དོན་ལ་ཞིབ་འཇུག་གནང་བཞིན་ཡོད།