དབུ་མའི་ལམ་གྱི་སྲིད་བྱུས་བཟུང་རིང་རང་ཕྱོགས་ཀྱི་འཐུས་ཤོར།
འདོན་སྤེལ། ༢༠༡༣/༡༡/༢༨
ཤར་ཕྱོགས་ཁུག་རྟ།
༄༅།།
དེང་འཛམ་གླིང་ཤར་ནུབ་ཀྱི་འབྲེལ་བ་ཉིན་རེ་བཞིན་ཇེ་ཆེར་འགྲོ་ཡི་ཡོད་པས།
རྒྱ་ནག་མི་མང་དང་གཞིས་ལུས་བོད་མི་ཚོས་དབུ་མའི་ལམ་ལ་རྒྱབ་སྐྱོར་གནང་ཤུགས་ཆེ་རུ་འགྲོ་བཞིན་ཡོད།
རྒྱབ་སྐྱོར་ཅི་ཙམ་ཐོབ་པ་དེའི་ཚོད་ཀྱིས་གྲུབ་འབྲས་ཀྱང་སྔར་ལས་མང་བ་འབྱུང་ངེས་པ་ནི་བཤད་མི་དགོས་ཀྱང་། སྐབས་བབ་བརྗོད་དོན་ནི་གྲུབ་འབྲས་བགྲང་རྒྱུ་དེ་མིན།
ཉེ་སྔོན་ཚོགས་མ་ཐག་པའི་གྲོས་ཚོགས་ཀྱི་གྲོས་གཞི་དང་འབྲེལ་ཏེ་ཚོགས་གཙོ་སྦྲེལ་བོ་དང་སྲིད་སྐྱོང་བཅས་༸གོང་ས་སྐྱབས་མགོན་ཆེན་པོར་མཇལ་བཅར་སྐབས།
''དབུ་མའི་ལམ་ནས་བདེན་མཐའ་མ་གསལ་བར་ངོས་ཀྱི་མི་ཚེས་འདང་ངེས་ཤིག་ཡོང་གི་རེད་''ཅེས་བཀའ་ཕེབས་འདུག་པ་དེ་བོད་ཀྱི་ལེགས་བྱང་གི་རྩི་མ་འགོས་པའམ་བོད་མི་ཕྱེད་ཀ་དག་གིས་ཡ་མཚན་དུ་མི་འཛིན་ཡང་།
འདི་འདྲའི་རྗེས་འཛིན་བརྩེ་ཆེན་ཤེས་རབ་ཀྱི་ཞགས་པས་བོད་མི་རིགས་ཀྱི་བདེན་དོན་ཐུགས་ལ་བརྣག་པའི་བཀའ་དྲིན་ནི་རང་ཅག་གིས་སྐྱེ་བ་སྟོང་དུའང་བསབ་ཐབས་ཡེ་ནས་མེད་པས།
དབུ་མ་པར་ཁས་འཆེ་བ་ང་དང་ང་ལྟ་བུ་དག་གིས་ནི་''རང་སྐྱོང་གནམ་<ནས་འབབ་རྒྱུར་''སྒུག་པའི་ཉོབ་གཤིས་དེ་ཅུང་ཙམ་བསྒྱུར་ཨེ་ཐུབ་ཀྱིས། གཞུང་དམངས་ཀྱིས་ད་བར་སྲིད་བྱུས་འདི་བཟུང་རིང་གི་འཐུས་ཤོར་རྣམས་ངོས་བཟུང་སྟེ།
སླད་མར་ནོར་འཛོལ་འདི་རིགས་བསྐྱར་དུ་མ་འབྱུང་བའི་སྒོ་ནས་དབུ་མའི་ལམ་གྱི་འཐབ་རྩོད་དངོས་གནས་ཤིག་ཨེ་འཁྱོངས་བྱ་རྒྱུ་དུས་ལ་བབས་འདུག་སྙམ་པས་བརྗོད་དོན་ངོ་མར་ཞུགས་ན།
༸གོང་ས་སྐྱབས་མགོན་ཆེན་པོའི་ཕུགས་རྒྱང་རིང་པོའི་གཉིས་སྨན་དགོངས་གཞི་རླབས་པོ་ཆེ་འདི་ནི་བཙན་བྱོལ་དུ་མ་འབྱོར་སྔོན་ནས་ཕྱག་བསྟར་གནང་ཡོད་ལ།
དོན་ཚན་བཅུ་བདུན་གཞི་རྩར་བཟུང་བའི་མེས་འཚིགས་མེར་གཏུག་གི་ལོ་ངོ་བདུན་ཙམ་ནི་དེའི་དཔེ་མཚོན་གསལ་ཤོས་དེ་རེད།
ཡིན་ནའང་།
སྐབས་དེར༸གོང་ས་ཆེན་པོའི་འཛམ་གླིང་སྤྱིའི་གནས་ཚུལ་ལ་གཞིགས་པའི་བསྒྱུར་བཅོས་རྣམས་ལམ་ལྷུང་མ་བྱུང་པ།
གཞུང་སའི་སྐུ་དྲག་མང་ཆེ་བས་རང་གི་གཞིས་ཀ་གྲ་རྒྱས་ཐབས་ལས་བོད་མི་རིགས་སྤྱིའི་བདེ་དོན་ལ་ཐུགས་འཁུར་མ་བཞེས་པ།
བཙན་དུ་བྱོལ་རྒྱུར་གྲ་སྒྲིག་ཚགས་ཚུད་བྱེད་མ་ཐུབ་པར་གློ་བུར་ཕེབས་དགོས་བྱུང་པ།
བཙན་བྱོལ་དུ་འབྱོར་མ་ཐག་བོད་མི་ཚོས་ཞེ་འཁོན་ནོན་ཐུབ་ཀྱི་མེད་པ།
བཙན་བྱོལ་ནང་གནས་ཅི་ལྟར་འཆའ་མིན། དུས་ཡུན་ཅི་ཙམ་གནས་དགོས་མིན།
ཕྱིར་ཕ་ཡུལ་དུ་ལོག་ཐུབ་མིན་བཅས་ཀྱི་གནས་སྟངས་འོག་༸གོང་ས་མཆོག་གི་གཉིས་སྨན་དགོངས་གཞི་མུ་མཐུད་ཕྱག་བསྟར་གནང་རྒྱུར་སྐུ་དྲག་དཔོན་རིགས་མི་མང་སུས་ཀྱང་གསོལ་འདེབས་ཞུ་རྒྱུ་དྲན་ཡུལ་དུའང་འཁོར་མི་འདུག་ཀྱང་། བཙན་བྱོལ་ལོ་དང་པོ་དེ་ག་རང་ལ་༸གོང་ས་ཆེན་པོས་ ''རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་'' ཞེས་ཐབས་མཁས་ཐུགས་རྗེ་ཆེན་པོ་དང་ལྡན་པའི་ལམ་སྟོན་སྩལ་ཞིང་། སྐུ་དྲག་དང་མི་མང་ཕལ་བའི་བློ་སྒོ་དང་བསྟུན་ནས།
རྒྱལ་སྤྱིའི་ཆབ་སྲིད་ནང་བོད་མིའི་མངོན་འདོད་གསལ་འདོན་བྱ་རྒྱུར་''རང་སྐྱོང་''དང་''རང་བཙན་''ཞེས་པའི་ཚིག་གང་ཞིག་བེད་སྤྱོད་གནང་རྒྱུར་སྐུ་ངལ་ལྷག་ཏུ་འཕྲད་འདུག་པ།
ཕྱིས་སུ་༸གོང་ས་ཆེན་པོ་རང་གི་ཞལ་ནས་ ''རང་བཙན་ཟེར་བའི་ཚིག་འདི་ལབ་ན་རྒྱ་མིའི་སྣང་བར་མི་འགྲོ་ཞིང་།
ལམ་སེང་རང་སྐྱོང་ཟེར་བའི་ཚིག་འདི་བཏོན་ན་བོད་མིའི་རྣ་ལ་མི་འགྲོ་བ་བཅས་ཀྱིས།
བདེ་སྐྱིད་བྱུང་ན་འགྲིག་ཅེས་བཤད་པ་ཡིན་ཞེས་''ཕེབས།
གནས་ཚུལ་འདིས་ནི་གང་ཉིད་ཀྱིས་དབུ་ཁྲིད་པའི་གཞུང་ས་དགའ་ལྡན་ཕོ་བྲང་བཙན་བྱོལ་དུ་འབྱོར་ཡོད་ནའང་།
དོན་ཚན་བཅུ་བདུན་བཞག་རྗེས་བོད་ནང་རྒྱ་བོད་གཉིས་སྨན་གྱི་ལམ་བུ་ཞིག་ཐབས་འཚོལ་འབད་འབུངས་ལྷོད་མེད་གནང་པ་དེ་བཞིན།
བཙན་བྱོལ་ནང་དུའང་དགོངས་གཞི་དེ་ག་རང་ཐུགས་ཉར་གནང་འདུག་པ་ལས།
གཞན་ཐུགས་རྒྱུད་དུ་སྐབས་དེའི་རྒྱལ་སྤྱིའི་འགྱུར་འགྲོས་དང་བོད་མིའི་དངོས་ཡོད་གནས་ཚུལ་གྱི་རྒྱུ་དང་མི་མཐུན་པའི་འབྲས་(
རང་བཙན་ལྟ་བུ )བུ་ཞིག་འབྱུང་ངེས་པ་དང་།
རྩོད་སྒྲུབ་བྱས་ན་རྔོ་ཐོགས་པར་དགོངས་མེད་པ་ནི་རྗེན་པར་གསལ་ཞིང་།
མ་འོངས་སྔོན་དཔྱད་ཀྱིས་གཉིས་སྨན་ཐབས་ལམ་དེ་ཡང་གང་གི་སྐྱོབ་ཡུལ་བོད་མི་ཚོའི་བློ་སྒོ་དང་བསྟུན་ནས་གསར་གཏོད་དང་བསྟུན་མཁས་ཡ་མ་བྲལ་པར་གནང་འདུག་པ་ནི།
བཙན་བྱོལ་བོད་མི་ཆེ་ཕྲ་ཚང་མས་གསལ་རྟོགས་དགོས་ངེས་ཀྱི་དོན་གྱི་སྙིང་པོ་དེ་རེད།
ཚུལ་འདི་ལས་བརྩམས་ཏེ་གང་གི་མཁས་མཛངས་ལྡན་པའི་དབུ་མའི་ལམ་གྱི་དགོངས་གཞིར་བོད་ཕྱི་ནང་གི་ཤེས་ལྡན་སེར་སྐྱ་མཆོག་དམན་ཚང་མས་རྒྱབ་སྐྱོར་ཚད་མཐོ་བྱས་ཏེ་ད་བར་མི་ལོ་ཧྲིལ་བོ་
༤༠ འགོར་གྲབས་ཡོད་ལ། རྒྱབ་སྐྱོར་ཐོབ་པའི་གྲངས་འབོར་གྱི་ཆ་ནས་བཤད་ན་དམངས་གཙོའི་ཡུལ་ལུང་གཞན་དུ་མེད་པའི་ཁྱད་ཆོས་ཀྱང་གང་མང་འཛོམས་ཡོད།
སྤྱིར་བཏང་དམངས་གཙོ་ཤུགས་ཆེར་དར་ཡུལ་གནས་ཚང་རྒྱ་གར་དང་ནུབ་ཕྱོགས་ཨ་རི་ལྟ་བུར་མཚོན་ན།
འོས་ཤོག་གི་འགྲན་རྩོད་ནི་དམངས་ལ་དབང་བ་འདྲ་ཡང་།
གང་འདོད་ཅི་འདོད་ལྟར་བླུགས་ཆོག་པའི་འོས་ཤོག་ཕལ་མོ་ཆེ་ནི་སྐབས་འཚོལ་པ་དང་དཔལ་འབྱོར་གྱི་བྲན་དུ་འཕེན་བཞིན་པ་ནི་ཀུན་གྱིས་མཐོང་གསལ་འདི་ཡིན་མོད།
བཙན་བྱོལ་བོད་མི་ཚོས་དམངས་གཙོའི་ལམ་ནས་སྲིད་བྱུས་འདིར་རྒྱབ་སྐྱོར་བྱེད་སྐབས་གནོན་ཤུགས་དང་བསླུ་བྲིད་གང་ཡང་མེད་པར་རང་དབང་གིས་འདོད་མོས་བྱས་པ་དེ།
དེང་དམངས་གཙོ་ཞེས་ཀུན་གྱིས་ངོ་མཚར་དུ་འཛིན་པ་འདིའི་བྱུང་རབས་ནང་ཁྱད་དུ་འཕགས་ཡོད་པ་ཧ་ཅང་གསལ་བོ་རེད།
ལྷག་ཏུ་བསམ་ཚུལ་གང་བརྗོད་ལ་ཚད་བཀག་མེད་པའི་ང་ཚོའི་གྲོས་ཚོགས་ནང་ཡང་ནས་བསྐྱར་དུ་མང་མོས་དང་སྤྱི་མོས་ཀྱིས་སྲིད་བྱུས་འདི་ཉིད་གཞུང་འབྲེལ་གཏན་འབེབས་གནང་ཡོད་པ་འདིར།
ཕྱི་གླིང་པའི་མཁས་པ་དང་ཆབ་སྲིད་པ་མང་པོས་ཡིད་སྨོན་བླ་ལྷག་ཏུ་བྱས་ཡོད།
སྲིད་བྱུས་འདི་ཉིད་ཀྱི་སྔོན་འགྲོའི་རླབས་ཆེན་གྱི་དགོངས་གཞི་དང་།
དེ་བོད་མི་མང་གི་བསོད་ནམས་ཀྱི་ཡོལ་གོར་ཤོང་སྟེ་ཡང་དག་པའི་དམངས་གཙོའི་ལམ་ནས་གཏན་འབེབས་གྲུབ་ཟིན་ནའང་།
སྲིད་བྱུས་འདི་བཟུང་བའི་བརྒྱུད་རིམ་ཁྲོད་རང་ཕྱོགས་ལ་འཐུས་ཤོར་མ་བྱུང་བའང་མིན་ལ།
ལྷག་ཏུ་དེང་སྐབས་འཐུས་ཤོར་གྱི་སྒོ་ཅི་ཡོད་ཐེར་འདོན་གྱིས་སྲིད་བྱུས་འདིར་སྔར་ལྷག་ཉམས་ལེན་ཞུ་དགོས་པ་ནི་གནད་ཀྱི་དོན་པོ་ཡིན་སྟབས།
རང་ཕྱོགས་ལ་ནོར་འཁྲུལ་བྱུང་རིགས་ལྟ་ཀློག་བཤད་བདེའི་ཆེད་དུ་ཚན་ཁག་རེ་འགར་བགར་ནས་བཤད་ན།
དང་པོ།རང་གཞུང་ནས་དབུ་མའི་ལམ་གྱི་ནང་དོན་ཆ་ཚང་གཏན་འབེབས་གནང་རྒྱུར་རྒྱུན་རིང་འགོར།
དབུ་མའི་ལམ་གྱི་སྲིད་བྱུས་བཟུང་སྟེ་ལོ་ ༡༣
ཕྱིན་རྗེས་དེའི་སྲིད་བྱུས་ཀྱི་རིགས་པའི་གཞུང་ལུགས་༼
ཞི་བའི་གྲོས་འཆར་དོན་ཚན་ལྔ་དང་སི་ཏྲ་སི་སྦག་གི་<གསུང་བཤད།
༽བསྟན་ཡང་དེར་གོ་བ་ལེན་ཕྱོགས་གསལ་བོ་དང་གཅིག་གྱུར་ཞིག་མ་བྱུང་།
གཉིས་པ།རང་རེའི་མཐོ་རིམ་ལས་སྣེ་ཚོའི་ཁྲོད་དུ་དབུ་མའི་ལམ་གྱི་སྙིང་དོན་རྒྱལ་ཕྲན་མཉམ་འབྲེལ།
བོད་ཀྱི་འདོད་མོས་ལྟར་གྱི་རང་སྐྱོང། མཐུན་ཕྱོགས་མནའ་འབྲེལ་རྒྱལ་ཁབ།
རང་སྲིད་རང་སྐྱོང་བཅས་གོ་བ་སྣ་ཚོགས་ཆགས།
གསུམ་པ། ༡༩༩༡ །༩༢
གསུམ་དུས་གསུང་འཕྲིན་དང་ཨ་རིའི་ཡེལ་གཙུག་ལག་སློབ་གཉེར་ཁང་བཅས་སུ་སི་ཏྲ་སི་སྦག་གི་གསུང་བཤད་རང་བཞིན་ནུས་མེད་ཕྱིན་པ་གསལ་བསྒྲགས་གནང་ཡང་།
དེར་མི་མང་ལྟ་ཞོག་གནད་ཡོད་མི་སྣ་ཚོས་ཀྱང་དོ་སྣང་མ་བྱུང་བ་དང་དགོངས་དོན་མ་རྟོགས་པ་ཅི་རིགས་ཀྱིས་གོ་བ་སྣ་ཚོགས་པ་དེ་མུ་མཐུད་གནས།
བཞི་པ། ༡༩༨༧། ༡༢། ༡༧
ཉིན་བཙན་བྱོལ་བོད་གཞུང་གིས་འཐབ་ཕྱོགས་གཅིག་གྱུར་གྱི་མགོ་གཙོ་ཡན་མན་ཕུ་ལ་སྤྲད་པའི་ལན་འདེབས་ཚིག་ཐོ་ཞིག་གི་ནང་
''ང་ཚོས་བོད་ཆོལ་ཁ་གསུམ་ནང་ཁུལ་ཁ་བྲལ་མ་ཡིན་པར་ཆིག་སྒྲིལ་ཐོག་རང་གི་འགན་དབང་རང་གིས་བྱེད་པའི་མཐུན་ཕྱོགས་མནའ་འབྲེལ་རྒྱལ་ཁབ་མིང་དོན་མཚུངས་པ་ཞིག་དགོངས་པ་བཞེས་དགོས་ ''ཞེས་བཀོད་འདུག་པ་འདིས་འཛིན་སྐྱོང་དང་མི་མང་གཉིས་ཀར་གོ་བ་སྣ་ཚོགས་ཡོད་པ་དེ་བས་ཀྱང་བདེན་དཔང་བྱས་འདུག
ལྔ་པ། ༡༩༧༩ ལོའི་མཇུག་ནས་རྒྱ་ནག་དང་འབྲེལ་བ་གསར་དུ་མཐུད་པ་དེ་ ༡༩༩༣
བར་གནས་ཐུབ་ཡོད་ནའང་།
བརྒྱུད་རིམ་དེའི་ནང་བརྒྱུད་ལམ་མང་པོ་དང་གྲོས་གཞི་སྣ་ཚོགས་བྱུང་པ།
རྒྱ་ནག་གཞུང་གི་དཔོན་རིགས་ཚོའི་བོད་དོན་ལྟ་ཚུལ་དང་༸གོང་ས་སྐྱབས་མགོན་ཆེན་པོའི་དགོངས་གཞི་ཕན་ཚུན་བར་ཇི་བཞིན་སྐྱེལ་ཐུབ་མིན་བཅས་ཀྱི་དཀའ་ངལ་བྱུང་བ་མ་ཟད།
འབྲེལ་མཐུད་དུམ་བུ་དེའི་ཕར་སྤྲོད་ཚུར་ལེན་གྱི་ཡིག་འཇོག་དང་།
བཀའ་མོལ་ཅི་གནང་གི་སྒྲ་བཤུས་ཏེ་ལོ་རྒྱུས་ཀྱི་དཔང་རྟགས་རང་བཞིན་གྱི་ཡིག་ཚགས་ཉར་མེད་པས།
ཕྱིས་ ༢༠༠༢
ནས་བརྒྱུད་ལམ་གཅིག་དང་གྲོས་གཞི་གཅིག་གི་འབྲེལ་མོལ་གྱི་སྲིད་བྱུས་གཏན་འབེབས་གནང་བ་དེ།
ལོ་རྒྱུས་དང་དངོས་ཡོད་གཉིས་ཀར་འགན་འཁུར་ནས་གཏན་འབེབས་གནང་བ་མིན་ནམ་སྙམ་པ་རྣམ་དཔྱོད་ཅན་ཚོས་དཔྱད་པར་འཚལ།
གཞན་དུ་སྐབས་དེར་པཎ་ཆེན་བཅུ་པའི་དགོངས་རྫོགས་མཆོད་སྤྲིན་དུ་ ༡༩༨༩། ༢། ༧།
ཉིན་ནང་བསྟན་ཆོས་ཚོགས་ཀྱིས་མགྲོན་འབོད་བྱས་ཏེ་ཟླ་དེའི་ཚེས་ ༡༥
ཉིན་དགོངས་རྫོགས་མཆོད་འབུལ་ལ་ཆིབས་བསྒྱུར་གནང་རོགས་ཞུས་འདུག་པར་ཆིབས་བསྒྱུར་གནང་མ་ཐུབ་པའི་ཐད།
༸གོང་ས་ཆེན་པོས་དང་པོར་ཕེབས་འདུན་གནང་བ་དང་རྒྱ་ནག་གཞུང་གིས་མགྲོན་བརྡ་འབྱོར་བ་གཉིས་ཀ་དབུ་མའི་ལམ་གྱི་སྲིད་བྱུས་ལ་བརྟེན་ནས་བྱུང་བ་ཡིན་པར་ངེད་ནས་ངོས་འཛིན་བྱེད་ཀྱི་ཡོད།
དྲུག་པ།༡༩༩༤
ལོའི་གསུམ་དུས་གསུང་འཕྲིན་ནང་དབུ་མའི་ལམ་གྱི་སྲིད་བྱུས་བཏོན་པའི་རྒྱུ་མཚན་ལ་བོད་མི་ཚོས་རྒྱབ་སྐྱོར་བྱས་པར་དགའ་བསུ་དང་སྦྲགས།
ད་བར་ལོ་བཅུ་བཞིའི་རིང་དེར་གྲོས་མོལ་དོན་དང་ལྡན་པའི་གྲུབ་འབྲས་མ་བྱུང་ཞེས་རྒྱ་ནག་གཞུང་ལ་སྐྱོན་བརྗོད་གནང་བར།
དབུ་མའི་ལམ་ལ་གྲུབ་འབྲས་མ་ཐོན་པར་གོ་བ་བླངས་ནས་བཙན་བྱོལ་གྱི་ལོ་རྒྱུས་ནང་བྱུང་མ་མྱོང་བའི་ལས་འགུལ་བོད་བསྐྱོད་ཞི་བའི་གོམ་བགྲོད་1ཅིག་མགོ་འཛུགས་བྱས་པ་དེར་སེར་སྐྱ་རྒན་གཞོན་ཁྱོན་ ༥༠༨
ལྷག་ཙམ་བྱུང་། ལས་འགུལ་དེ་སྤེལ་དོན་ནང་''གཞིས་བྱེས་བོད་མི་རྣམས་འདི་མུར་སྡོད་ཐབས་འབད་བྲལ་གྱི་འཛམ་གླིང་སྤྱི་དང་།
བྱེ་བྲག་རྒྱ་དཀར་ནག་གི་མི་མང་ནས་བོད་མིའི་རང་བཙན་སླར་གསོའི་བདེན་རྒྱབ་འབོད་སྐུལ་ཡོང་སླད་ལས་འགུལ་སྣ་ཚོགས་སྤེལ་འཆར་ཁོངས་ནས་དང་ཐོག་ལྡི་ལི་ནས་ལྷ་ས་བར་ཞི་བའི་གོམ་བགྲོད་བྱ་རྒྱུ་གཏན་འཁེལ་ཟིན་ཡང་''
2སོགས་འཁོད་འདུག༼
གོ་བརྡ་མི་འཕྲོད་པ་ཡོད་ཀྱང་ཇི་བཞིན་བཀོད་པ་ལས་བཅོས་མེད། ༽
བདུན་པ།དབུས་གཙང་ཆོལ་ཁའི་ཚོགས་འདུའི་ཐོག་མགོ་བསླངས་པའི་ཞི་བའི་གོམ་བགྲོད་འདིར་ཚོགས་ཐོག་དེ་ག་རང་ནས་''རང་སྲོག་འདོར་ནུས་ཀྱི་དང་བླངས་མི་གྲངས་ ༡༧༠ བྱུང་''
3བ་སོགས་ཀྱིས་མགོ་འཛུགས་སྐབས་སྐད་གྲགས་ཆགས་པ་མ་ཟད།
རྒྱ་ཕྱོགས་ནས་ཀྱང་ལམ་དུ་མི་འགྲོ་ཆེད་ལས་དོན་སྣ་ཚོགས་བརྩམས་ཚུལ་གསལ།
༸གོང་ས་མཆོག་གིས་སྔ་ཕྱིར་ཀྲེབ་འཁོར་དང་ཡིག་ཐོག་ནས་ཁོང་ཉིད་བོད་ཀྱི་དབུ་ཁྲིད་ཡིན་པའི་འགན་བབ་ལྟར་ལམ་སྟོན་གནང་སྟེ་མཐའ་མའི་ཐག་གཅོད་ཞི་བའི་གོམ་བགྲོད་པ་ཚོར་གནང་།
གོམ་བགྲོད་པ་ཚོས་གྲོས་བསྡུར་བྱས་མཐར་གོམ་བགྲོད་འགྱུར་བ་བཏང་སྟེ་ངྷ་ས་ནས་ལྡི་ལིར་བསྐྱོད་རྒྱུ་དང་དུས་ཚོད་སྨིན་མཚམས་ལས་འགུལ་སྤེལ་རྒྱུའི་དམ་བཅའ་བརྟན་པོ་བཞག
༩༥
ལོའི་གསུམ་དུས་ཉིན་མགོ་བཙུགས་ཏེ་༸གོང་ས་མཆོག་གངས་སྐྱིད་བར་དུ་༼ཞབས་ཐང་༽གོམ་བགྲོད་དུ་ཕེབས་པ་དང་།
ཧི་མ་ཅལ་མངའ་སྡེའི་བློན་ཆེན་ཟུར་པ་ཤཱན་ཏ་ཀུ་མར་མཆོག་ནས་བོད་རང་བཙན་གྱི་གཏམ་བཤད་སྙིང་སྟོབས་གྱེན་དུ་འཕྱོ་བ་གནང་བ་བཅས།
སྐབས་དེའི་བཙན་བྱོལ་མི་མང་རྩ་དོན་ཐད་རྦ་རླབས་འཕྱུར་བ་ལྟར་གྱི་ཚོར་ཤུགས་དང་འགན་ལེན་བྱས་པ།
དེར་རྒྱལ་སྤྱི་དང་རྒྱ་ནག་གིས་དོ་སྣང་དམིགས་བསལ་བྱུང་བ་བཅས་ཕྱོགས་གང་ནས་བལྟས་ཀྱང་བོད་དོན་དྲིལ་བསྒྲགས་ཀྱི་ངོས་ནས་བཤད་ན་ད་བར་བཙན་བྱོལ་ནང་ལས་འགུལ་འདི་འདྲ་རླབས་ཆེ་བ་ཞིག་བྱུང་མི་འདུག
འོན་ཀྱང་སྐབས་དེར་གཞུང་གི་ལངས་ཕྱོགས་དབུ་མའི་ལམ་ལ་འགྱུར་བ་ཕྱིན་མེད་ཀྱང་།
གཞུང་འབྲེལ་མིན་པའི་ཚོགས་པས་སྣེ་ཁྲིད་དེ་མི་མང་དང་བླངས་ངང་ཐོན་པའི་ལས་འགུལ་དེ་ནི་''
བོད་ཀྱི་བདག་པོ་བོད་མིར་རྩིས་སྤྲོད་ཡོང་སླད་4 ''ཡིན་སྟབས།
སྐབས་དེའི་མི་མང་གི་ལས་འགུལ་རླབས་ཆེན་པོ་དེ་དབུ་མའི་ལམ་གྱི་དགོངས་དོན་དང་མཐུན་མེད་པ་མ་ཟད།
མི་ཚང་མ་ཚོར་བས་མེ་འབར་བ་ཡིན་ཙང་སྔ་གཞུག་གི་གནད་དོན་ལ་དབྱེ་ཞིབ་གནང་མི་འདུག
བརྒྱད་པ།༡༩༩༥ ། ༩༦ ལོའི་གསུམ་དུས་གསུང་འཕྲིན་ནང་འབྱུང་འགྱུར་ལངས་ཕྱོགས་ཅི་དགེ་མང་མོས་ཐག་གཅོད་འོས་བསྡུ་དགོས་རྒྱུ་ཕེབས་པ་བཞིན།
འོས་བསྡུ་མ་དགོས་པར་མི་མང་བརྒྱ་ཆ་ ༦༤
བརྒལ་བས་༸གོང་ས་མཆོག་གིས་ཐག་གཅོད་གནང་སྐྱོང་ཡོང་བར་ནན་སྐུལ་ཞུས་པ་ལྟར། ༩༧
ལོར་གྲོས་ཚོགས་ནང་སྤྱི་མོས་གཏན་འབེབས་གནང་ཐུབ་པ་བྱུང་ཡང་།
མང་མོས་ཐག་གཅོད་འོས་བསྡུ་དགོས་རྒྱུ་ཕེབས་དོན་སྐབས་དེའི་དཀྲུགས་ཤིང་རྒྱག་མཁན་ཚོའི་བྱེད་བབ་ལ་བརྟེན་ནས་མ་གཏོགས།
༸གོང་ས་མཆོག་རང་གི་ཐུགས་འདུན་ལ་གཞིགས་ན་དེ་ལྟར་བཀའ་གནང་དོན་མེད་པ་གཤམ་འོག་ནས་གསལ་རྟོགས་མ་ཐུབ་པས་མི་མང་ནང་དབུ་མའི་ལམ་དུ་འགྲོ་དང་མི་འགྲོའི་གླེང་ཕྱོགས་རྒྱ་ཁྱབ་དུ་བསྐྲུན་པ་དེས་གཞི་རྩའི་ཆ་ནས་སྲིད་བྱུས་རང་ལ་བཅངས་པའི་ཡིད་ཆེས་ཀྱི་སྣང་བརྙན་མོག་པོར་བྱས་ཡོད།
དགུ་པ།༡༩༩༧ ནས་ ༢༠༠༡
བར་གྱི་འཛིན་སྐྱོང་གི་ཆབ་སྲིད་བསྒྲགས་གཏམ་ཁག་དང་།
གཞུང་འབྲེལ་མིན་པའི་ཚོགས་པའི་སྡིངས་ཆ་སོགས་སུ་སྤེལ་བའི་སྐབས་དེའི་ཡིག་ཆ་རྣམས་སུ་རང་བཙན་རྩོད་ཀྱི་མེད་པའི་ཆབ་སྲིད་ཚིག་འགྲོས་རྩལ་དུ་ཐོན་པ་ཞིག་མེད་ཁར།
སྐབས་དེ་དུས་ཀྱི་གཞུང་གིས་འཛིན་པའི་ལངས་ཕྱོགས་དང་མི་མཐུན་པའི་གཏམ་བཤད་བསྒྲགས་གཏམ་སྤེལ་བ་སོགས་ནི་བློ་ལྡན་དག་གིས་གཟིགས་ན་ཤེས་ནུས་པས་འདིར་ཡིག་ཚོགས་ལ་འཇིགས་ནས་རེ་རེ་བཞིན་མ་དྲངས།
མདོ་དོན། ༡༩༧༤ ནས ༢༠༠༡ བར་ཅུང་སྤོམ་ཚིག་དང་བཅས་ཏེ་སྡོམ་ཚིག་ལྟ་བུར་ཞུས་ཆོག་པ་ཞིག་ནི།
༸གོང་ས་མཆོག་གི་དགོངས་གཞི་མ་རྟོགས་པ་དང་།
ཇི་ལྟར་རྟོགས་ཀྱང་ཚུལ་བཞིན་སྒྲུབ་བརྩོན་གནང་མི་འདུག་ཅེས་བཤད་ན།
དབུ་མའི་ལམ་གྱི་འཕྲིན་ལས་ཆེས་ཆེར་རྒྱས་དུས་ཀྱི་རྒྱགས་གཏམ་ཙམ་དུ་ཟད་ཅེས་མཐོང་ཆུང་བྱེད་སྲིད་མོད་ཞིབ་ཏུ་བསམས་ན་བློ་ལ་འབབ་རྒྱུ་ཞིག་ཡོད་ཅིང་།
ཕྱིས་སུ་བརྒྱུད་ལམ་གཅིག་དང་གྲོས་གཞི་གཅིག་གི་འབྲེལ་མོལ་བསྐྱར་མཐུད་སྐབས་རྒྱ་ནག་གི་དབུ་ཁྲིད་ཚོས་སྔ་མོར་བྱུང་བའི་<འབྲེལ་མོལ་སྐབས་ཀྱི་ཚིག་ཐོའི་ནང་དོན་བཤད་སྐབས།
ཧང་སངས་དགོས་པའི་གནས་ཚུལ་ཡོད་པ་དེས་བདེན་དཔང་བྱེད་ཐུབ་སྙམ།
བཅུ་པ།༢༠༠༢
ནས་དབུ་མའི་ལམ་གྱི་སྲིད་བྱུས་དང་མཐུན་པའི་གཞུང་གི་བྱེད་སྒོ་རྣམ་གསུམ་རྩལ་འདོན་བྱས་ཡོད་ནའང་།
གཞུང་འབྲེལ་གྱིས་ཆེད་མངགས་དེའི་གོ་རྟོགས་སྤེལ་རྒྱུར་ལས་བྱེད་གང་མང་གསོ་སྐྱོང་གིས་གཞིས་ཆགས་ཁག་ལ་དུས་ནས་དུས་སུ་གོ་བརྡ་གསལ་བོ་ཞིག་སྤྲོད་ཐུབ་རེ་ཆེ་མོད།
ཕྱི་དྲིལ་དབུ་མའི་ལམ་གྱི་ལས་བྱེད་གནས་བབ་ད་བར་ཡར་རྒྱས་ཕྱིན་མེད་ལ། ༢༠༠༥།༧།༡༧
ཉིན་བཀའ་ཤག་སྐབས་བཅུ་གསུམ་པས་གཞུང་ཞབས་གསོལ་ཚིགས་ཁང་གི་ཡང་སྟེང་དུ་གཞུང་ཞབས་ཚོའི་དབུ་མའི་ལམ་གྱི་གནས་ཚད་ཡར་རྒྱས་གཏོང་དགོས་པར་ནན་བརྗོད་གནང་ཡོད་པ་མ་ཟད།
སྐབས་དེར་བཀའ་ཁྲི་མཆོག་གིས་'' དོན་དམ་དུ་དབུ་མའི་ལམ་གྱི་ངོ་སྤྲོད་དང་གསལ་བཤད་ལོ་ ༢༦
གོང་ནས་བྱེད་ཐུབ་པ་ཞིག་དང་།
བོད་མི་མང་ཚོགས་ནས་དབུ་མའི་ལམ་གྱི་གནས་ཚུལ་རགས་པ་ཙམ་ར་འཕྲོད་པ་བཟོ་དགོས་པའི་གནས་སྟངས་རེད།
ཡིན་ནའང་དེ་བཟོ་ཐུབ་མེད་ཅེས་༼ སྐབས་ ༡༢
པའི་བཀའ་ཁྲི་གནང་སྐབས་གསུང་བཤད་དང་ལམ་སྟོན་གལ་ཆེ་ཕྱོགས་བསྡུས། VoL2 ཞེས་པའི་ཤོག་ངོས་ ༤༠༦ གསལ། ༽ ཕེབས་འདུག
བཅུ་གཅིག༢༠༠༨
ལོར་༸གོང་ས་མཆོག་གི་སྐུ་ཚབ་ཀྱིས་དབུ་མའི་ལམ་ནས་རང་སྲིད་རང་སྐྱོང་ནང་དོན་ཞིབ་ཚགས་རྒྱ་ནག་གཞུང་ལ་སྤྲད་པར།
རང་ཕྱོགས་ཀྱི་དཀྲུགས་ཤིང་གི་ཆེད་དུ་མི་ལུས་བླངས་པ་ལྟ་བུ་རེ་གཉིས་ཀྱིས་ཆེད་དུ་''གྲོས་ཚོགས་ལ་མ་བསྟན་པའི་ཡིག་ཆ་''ཞེས་དཀྲོག་གཏམ་སྣ་ཚོགས་བཟོས་ཏེ་རྒྱ་ནག་གི་ངོས་ལེན་བྱེད་འདོད་མེད་པའི་ལན་འདེབས་བྱེད་རྒྱུར་མཐུན་འགྱུར་བྱས་པ།
འཕོས་མ་ཐག་པའི་གཞོན་ནུའི་སྐབས་གཉིས་ཀྱི་མགོ་གཙོ་གཉིས་ཕྱོགས་གྱེས་ཀྱིས།
རྩ་དོན་དང་འབྲེལ་མེད་ཀྱི་ལས་དོན་ཆོ་མེད་སྣ་ཚོགས་ཀྱིས་སྤྱི་ཚོགས་བག་མི་ཕེབས་པར་བཟོས་པ།
གཞན་ཡང་སྟོང་ལོ་གསར་པའི་ནང་བཀའ་ཟུར་ལྷན་ཚོགས་ཀྱི་ཚོགས་འདུ་དེས་ཀྱང་སྤྱི་ཚོགས་ནང་སྐད་ཆ་བཟོས་པ་དང་ཚགས་ཤོག་སོགས་སུ་དང་བླངས་ཀྱིས་བཅའ་འདྲི་སྤྲད་པ།
གྲོས་ཚོགས་འཐུས་མི་རེ་ཟུང་གིས་༸གོང་ས་མཆོག་དང་བཀའ་ཤག་གི་དབུ་མའི་ལམ་ཞེས་བཤད་པ་སོགས་ནི་མདོ་དོན་སྙིང་བོར་དབུ་མའི་ལམ་གྱི་སྲིད་བྱུས་ལ་དོན་འབྲས་འབྱུང་རྒྱུར་འགོག་རྐྱེན་དུ་སོང་ཡོད།
བཅུ་གཉིས་པ། གོང་དུ་བརྗོད་ཟིན་པ་ལྟར་བཙན་བྱོལ་བོད་མིའི་སྙིང་སྟོབས་དང་སེམས་ཤུགས།
བློས་གཏོང་རྣམས ༡༩༥༩ ལོའི་སྐབས་ལྟར་དགུ་བཅུ་གོ་གྲངས་བར་གནས་ཡོད་ནའང་།
དེའི་རྗེས་གཞི་རིམ་བཙན་བྱོལ་བོད་མི་ཚོས་མཐོ་རིམ་དཔོན་རིགས་རེ་འགའ་ལྟར་ནང་མི་ཚང་མ་ཕྱི་རྒྱལ་དུ་འགྲོ་རྒྱུར་འབད་བརྩོན་བྱས་པ་མ་ཟད།
བཀའ་ཤག་ནས་ཆེད་མངགས་''བོད་མི་ཆིག་སྟོང་གཞིས་བསྐྱོད་''ཟེར་བ་ལྟ་བུའི་ལས་འགུལ་བརྩམས་ཏེ།
གཞིས་ཆགས་རྣམས་ཁ་འཐོར་ཡ་བྲལ་དུ་བཏང་སྟེ་བཙན་བྱོལ་བོད་མི་མི་ཉུང་བ་ཞིག་དེང་སང་ཕྱི་རྒྱལ་དུ་བསྐྱོད་ཕྱིར་བོད་མིའི་སྐྱེ་བ་བླངས་པ་འདྲ་བའི་གནས་སྟངས་ཡི་མུག་པ་འདི་བྱུང་ཞིང་།
དེའི་ཉེར་ལེན་གྱིས་བོད་མིའི་སྲིད་འབྱོར་རིག་གསུམ་གང་དུའང་ལྟ་ས་རྟེན་ཡུལ་བྲལ་བ་ཞིག་ཆགས་འགྲོ་ཡི་ཡོད་པ་མ་ཟད།
བོད་མིའི་ངོ་རྟགས་རིགས་རུས་དང་བཅས་པ་ཉམས་བཞིན་པ་ལག་པ་དང་ཁར་བཞག་ན་༸གོང་ས་ཆེན་པོ་དང་གཞིས་ལུས་མི་མང་ལ་ངོ་ནོངས་དགོས་པ་ཞིག་ཡིན་ཡང་བཤད་ནས་ཅི་ཕན།
བཅུ་གསུམ་པ། ༸གོང་ས་རྒྱལ་མཆོག་ཐམས་ཅད་མཁྱེན་པ་ཆེན་པོས།
དྲུག་ཅུ་རེ་གྲངས་ནས་རྒྱ་རིགས་དང་འབྲེལ་མཐུད་དགོས་གནད་ཕེབས་པ་ད་དུང་ཡང་མཚམས་བཞག་མྱོང་མེད་ཀྱང་། བཀའ་སྤྱི་གཉིས་ཀྱིས་མཚོན་པའི་དབུ་འོག་འགན་ཡོད་ཚོས་''འཚེ་མེད་ཞི་བ་གྲོས་མོལ་གྱིས་དཀའ་ངལ་སེལ་བའི་''དགོངས་གཞི་ལེགས་འགྲུབ་བྱ་རྒྱུར་དེ་ཙམ་ཞབས་འདེགས་ཁུར་དུ་བླངས་མི་འདུག་ཅིང།
ལྷག་པར་བོད་ནས་གསར་དུ་འབྱོར་བའི་རིགས་ལ་ཡང་དག་པའི་སྲིད་བྱུས་ཤིག་འཛིན་མ་ཐུབ་པ་དེས།
རྒྱ་རིགས་འབྲེལ་མཐུད་དུས་ལྟར་དོན་འཁྱོལ་མ་སོང་པ་མ་ཟད།
གཞུང་ཞབས་ཀྱི་སྤུས་ཚད་དང་སློབ་གྲྭ་ཁག་གི་ཤེས་ཡོན།
དྲང་པོའི་<ལམ་ནས་རང་ཁ་རང་གསོ་བྱེད་ཕྱོགས།
གཞིས་དང་བྱེས་ཀྱི་གཞི་རིམ་བོད་མི་ཚོས་སོ་སོའི་གནས་སྟངས་རྒྱུས་ལོན་ཡག་པོ་མ་ཐུབ་པ་བཅས་ཀྱི་འཐུས་ཤོར་ལས་བོད་མི་མི་ཉུང་བར་རང་བཞིན་གྱིས་རྩ་དོན་ལ་དོ་སྣང་བརླག་པ་དང་བྱེད་མི་འདོད་པ་ཆགས་པ།
དེ་བཞིན་རང་གི་གཞུང་དང་སྒྲིག་འཛུགས་ལ་ཡིད་ཆེས་དང་ཤ་ཞེན།
བརྩེ་བ་སླེབས་མ་ཐུབ་པ་བཅས་ནི་མ་འོངས་བོད་ཀྱི་མདུན་ལམ་སྟེང་གེགས་རྡོ་ཆེན་པོ་ཞིག་ཏུ་གྱུར་ཡོད།
བཅུ་བཞི་པ། གསུམ་བཅུའི་དུས་དྲན་ལས་འགུལ་གྱིས་མཚོན་གཞུང་འབྲེལ་ལས་འགུལ་གང་སར་མཛད་སྒོར་གཟབ་འཆོར་སྤྲས་པ་ཙམ་ལས་ད་བར་གཞུང་མང་མཉམ་འབྲེལ་གྱིས་གཞི་རྒྱ་ཆེ་བའི་དབུ་མའི་ལམ་གྱི་ལས་འགུལ་གཅིག་ཀྱང་སྤེལ་ཐུབ་མེད།
མི་མང་གི་སྐད་འབོད་ཁྲོམ་བསྐོར་བྱེད་ཕྱོགས་ལ་གཞུང་གི་སྲིད་བྱུས་དང་མཐུན་པའི་གཅིག་གྱུར་མཚོན་རྟགས་ཡོད་པའི་བཀོད་ཁྱབ་ནན་པོ་མ་གནང་བས།
བཙན་བྱོལ་བོད་མིའི་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་ལས་འགུལ་སྤེལ་སྟངས་ར་མ་ལུག་དངོས་གནས་དེ་ཆགས་ཤིང་།
དེ་ལ་བརྟེན་ནས་གཞི་རིམ་མི་མང་གི་ཆབ་སྲིད་ལས་འགུལ་སྤེལ་སྐབས་ཀྱི་ཁུར་ལེན་སྟངས་ལ་ཚོད་དཔག་གིས་ཁ་གཏད་ནས་དེར་བསྟུན་གྱི་ཡ་ལན་བྱེད་པ་གསལ་བོ་རེད།
༸གོང་ས་ཆེན་པོས་ཀྱང་ '' བོད་མིའི་གཤིས་ཀ་རང་ལ་ཚུར་གཉའ་ལ་མ་བབས་པར་ཡམ་ཡོམ་ངང་འཁྱོལ་ཐུབ་བྱེད་པ་དང་། རང་གི་གཉའ་ལ་བབས་དུས་མེས་འཚིགས་པ་ནང་བཞིན་བྱེད་ཀྱི་འདུག '' ཅེས་སྤྱི་སྡོམ་མཛད་པ་ནི་ཅི་འདྲའི་དོན་ལ་གནས་པ་ཞིག་ཡིན་ཨང་།
བཅོ་ལྔ་པ།༸གོང་ས་ཆེན་པོས་གཞུང་གི་ཆབ་སྲིད་དང་འཛིན་སྐྱོང་འགན་དབང་ཆ་ཚང་རྩིས་སྤྲོད་གནང་རྗེས།
ཆབ་སྲིད་ཐད་གལ་གནད་ཆེ་བའི་རང་སྲེག་སོགས་ལ་བཅར་འདྲི་གནང་སྐབས་ཀྱང་''ངོས་རང་ཤི་བ་ནང་བཞིན་འདུག་གི་ཡིན་''ཅེས་བཀའ་ཕེབས་ཏེ་ཐུགས་རེ་ཡོད་ཚད་མི་མང་གིས་འོས་འདེམས་བྱས་པའི་མགོ་ཁྲིད་ལ་གཏད་ཡོད་ཀྱང་། ཉེ་བའི་ལོ་གཅིག་གཉིས་ནང་ལ་དྭགས། ཨི་ཌ་ལི།
ས་ལུ་གྷར་སོགས་སུ་ཐུགས་ཕམ་ཚད་མེད་ཀྱིས་དབུ་མའི་ལམ་གྱི་སྲིད་བྱུས་སྐོར་ནན་བརྗོད་གནང་པ་ནི་འཛིན་སྐྱོང་ནས་ལས་འགན་སྒྲུབ་ནུས་ཡོད་པ་རྣམས་ཏག་ཏག་མ་སྒྲུབ་པས་ཡིན་སྟབས།
ད་བར་རྒྱ་ཕྱོགས་ནས་ཀྱང་ཡ་ལན་རྣམ་འགྱུར་སྤུ་རྩེ་ཙམ་ཡང་མ་བསྟན་པར།
བོད་མིའི་ལོ་རྒྱུས་ནང་བྱུང་མ་མྱོང་བའི་རང་སྲེག་ལས་འགུལ་འདི་འདྲའི་ཛ་དྲག་གི་སྐབས་སུའང་། འབྲེལ་མོལ་གནང་རྒྱུ་ལྟ་ཞོག
ངྷ་རམ་སཱ་ལར་བོད་མིའི་རང་དབང་རྩོད་པའི་སྒྲིག་འཛུགས་ཤིག་ཡོད་མེད་ཀྱང་ཤེས་ཀྱི་ཨེ་ཡོད་བསམས་བསམས་ཤིག་འདུག་པ་འདི་ནི།
༸རྒྱལ་བའི་དགོངས་པ་དང་དམ་པའི་རྗེས་སུ་མ་འབྲངས་པ།
དབུ་མའི་ལམ་ལ་ཧུར་ཐག་འབད་ཐག་དང་།
ལྷག་བསམ་རྣམ་དག་ཐབས་ཤེས་ཡོད་དགུ་རྩལ་དཀྲུགས་མ་བྱས་པས་ཡིན་པ་ས་རིས་ཐང་གསལ་རེད།
བཅུ་དྲུག་པ། བཀའ་ཤག་གསར་པའི་འབྲེལ་མོལ་ཐད་དེ་ཙམ་རྣམ་འགྱུར་གསལ་སྟོན་གནང་མ་ཐུབ་པ་དང་།
ཨེ་ཤ་ཡ་རང་དབང་རླུང་འཕྲིན་ཁང་གི་ཨམ་སྐད་སྡེ་ཚན་གྱི་གསར་འགོད་པ་ཞིག་གིས་བཅར་འདྲི་ཞུ་སྐབས།
''སྐུ་ཚབ་བསྐོ་བཞག་བྱེད་དགོས་མིན་ལྟ་ཡི་ཡིན་''སོགས་བཀའ་ཤག་གི་མགོ་པས་གསུངས་ཡོད།
དེ་བཞིན་བར་སྐབས་སྐབས་འཚོལ་པ་མི་ཉུང་པས་དབུ་མའི་ལམ་ཐད་བཤད་ཡམས་སྤེལ་པར༸གོང་ས་ཆེན་པོས་མི་མང་ལ་ལམ་སྟོན་ནན་བརྗོད་གནང་དགོས་ཐུག་པ་གོང་གསལ་ལྟར་དང་།
ཐའེ་ཝན་བོད་རང་བཙན་རྒྱབ་སྐྱོར་པར་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་མཇལ་འཕྲད་ཞུས་པ་སོགས་ནི་འགན་བབ་དང་མི་མཐུན་ལ།
དབུ་མའི་ལམ་རྒྱུན་སྐྱོང་གནང་རྒྱུར་དམ་བཅས་ཏེ་འོས་ཤོག་ཐོབ་པའི་མི་མང་གི་ཐུགས་རེ་ལའང་གཏན་ནས་མཐུན་ཐབས་མེད།
འབྲེལ་མོལ་ཡོང་ཐབས་ནི་དབུ་མའི་ལམ་གྱི་སྲིད་བྱུས་ཉག་གཅིག་ལ་བརྟེན་ནས་༸གོང་ས་མཆོག་གི་སྐུ་ཚབ་མཉམ་གནང་དགོས་སྟབས་གྲ་སྒྲིག་ཨང་གསར་གྱིས་ཁ་གསལ་པོས་རྒྱ་ནག་གཞུང་ལ་རེ་འདུན་ཞུ་དགོས་ཀྱང་དེ་ལྟར་གནང་མེད་པ་ཡིག་ཆ་ཁག་ཏུ་གསལ་བོ་རེད།
༢༠༡༣ ལོའི་འཁྲུངས་སྐར་གཏམ་བཤད་ནས་ཚིག་གསར་པ་ཞིག་སྟེ་''དང་པོར་ནུས་ཤུགས་ཕྱོགས་སྒྲིལ། བར་དུ་ལས་འགུལ་སྤེལ་རྒྱུ།
མཐའ་མའི་འབབ་ས་འབྲེལ་མོལ་ཟེར་བ''་ཞིག་བཟོས་གནང་སྟེ་འབྲེལ་མོལ་གྱི་ཆོད་སེམས་བསྟན་ཡང་དེས་མི་རྣམས་མགུ་མི་སྲིད།
བཀའ་ཤག་གིས་འབྲེལ་མོལ་དང་སྐུ་ཚབ་ལ་ལྟ་སྟངས་སྐོར་སྐུ་ཞབས་ཀྲུའུ་ཝེ་ཆོན་གྱིས་''སྤྱིར་སྐུ་ཞབས་རྒྱ་རི་བློ་གྲོས་དང་ངེད་གཉིས་ཀྱི་ལྟ་བ་གཅིག་མཐུན་མིན་མོད།
འོན་ཀྱང་ངས་ཁོ་ལ་བརྩི་བཀུར་ཆེན་པོ་བྱེད་ཀྱིན་ཡོད།
ཁོ་ནི་དོན་དངོས་སུ་བློ་བཟང་སེང་གེ་སོགས་ཀྱིས་གྲོས་མོལ་གོ་གནས་ནས་མཐར་བསྐྲད་པ་རེད།''ཅེས་བཤད་ཡོད། སྐབས་ ༡༥
པའི་གྲོས་ཚོགས་ཚོགས་དུས་དྲུག་སྟེང་བཀའ་ཟུར་ཐུབ་བསྟན་ལུང་རིགས་མཆོག་གིས་བཀའ་ཤག་གི་གསལ་བསྒྲགས་ཁག་དང་ཐག་གཅོད་རིགས་ལ་བཀའ་ཤག་ལྷན་རྒྱས་གྲོས་བསྡུར་ལྷུག་པོ་གནང་དགོས་པ་རྒྱ་ཁྱབ་ཀྱིས་བཀའ་གནང་ཡོད།
བཅུ་བདུན་པ། བོད་ཀྱི་བདེན་མཐའ་མ་གསལ་བར་བཙན་བྱོལ་བོད་མིའི་སྒྲིག་འཛུགས་སྲ་བརྟན་གནས་དགོས་ཤིང་།
སྒྲིག་འཛུགས་ཀྱི་རྟེན་ཡུལ་གཙོ་བོ་གཞིས་ལུས་བོད་མི་ཚོས་ལ་ཚུར་རྒྱབ་ལ་བཅངས་པའི་ཡིད་ཆེས་ཁོ་ནར་ཐུག་ཡོད།
འོན་ཀྱང་། འདི་ནས་ད་དུང་མུ་མཐུད་''བོད་མི་ལྔ་སྟོང་ཨ་རིར་གཞིས་བསྐྱོད་''ཟེར་བར་ཨུ་ཚུགས་བསྐྱོན་ཏེ་ཁ་འཐོར་ཡ་འཐོར་བཏང་བ་ཡིན་ན།
ད་ལྟའི་བཙན་བྱོལ་བོད་མི་ཚོའི་སྤུས་ཚད་ལ་བལྟས་ན་འཇིགས་སུ་རུང་པའི་ཁོར་ཡུག་གི་དབང་བསྒྱུར་ཁ་གཏད་ནས་བོད་ཀྱི་ངོ་བོ་འཛིན་པའི་ནུས་སྟོབས་མེད་པ་ཧ་ཅང་གསལ་བོ་ཡིན་ཁར།
ཉེ་བའི་ལོ་གཅིག་གཉིས་ནས་སྣེ་ལེན་ཁང་ནས་མགོ་བཙུགས་ཏེ་ཆོས་སྡེ་ཁག་གི་གྲྭ་རྒྱུན།
སློབ་གྲྭ་ཁག་གི་སློབ་མ་བཅས་བོད་ནས་ཡོང་མཁན་མེད་པའི་གནས་སྟངས་ཤིག་ཏུ་འགྱུར་བཞིན་ཡོད།
ཛ་དྲག་གི་སྐབས་མགོ་ཁྲིད་ཚོས་བཙན་བྱོལ་བོད་མིའི་སྒྲིག་འཛུགས་ཀྱི་ལས་དོན་རྣམས་རང་ལ་འོས་ཤོག་ཐོབ་ཆེད་དུ་གནང་པ་དང་།
ཡང་ན་གཞིས་ལུས་བོད་མི་གཙོས་བོད་མི་ཚོའི་འཐབ་རྩོད་སྙིང་སྟོབས་གསོན་པོར་འཛིན་མི་ཐུབ་པའི་གནས་བབ་ཅིག་ཏུ་གྱུར་མཚམས།
ཉིན་དེ་ནས་བཙན་བྱོལ་སྒྲིག་འཛུགས་འཐོར་ཟིན་པར་ངོས་འཛིན་བྱས་ཆོག་པས།
ལྟོ་གོས་ཀྱི་དཀའ་ངལ་གཙོ་བོར་འཛིན་པའི་ཅོལ་ཆུང་རིང་ལུགས་པ་དང་། མི་རིགས་ཀྱི་ཁྱད་ནོར་ངོས་མི་ཟིན་ཞིང་།
གང་ཅིར་བཟོད་བསྲན་སྙིང་རུས་བྲལ་པའི་འཐབ་རྩོད་པ་རྫུན་མ་ཞིག་མི་བྱེད་རྒྱུར་དབུ་ཁྲིད་ཚོས་ངེས་པར་དུ་མི་རབས་གསར་པར་འགན་འཁུར་དགོས་པ་རེད་ལ།
གནད་དོན་འདིར་ཕྱག་ལས་ཁ་ཚ་དགོས་གཏུག་མ་གནང་དུས་ད་ལྟ་ཉེན་ཁ་ཆེན་པོའི་མགོ་བཙུགས་ཟིན་པ་མཐོང་གསལ་རེད།
བཅོ་བརྒྱད་པ། འཐུས་ཤོར་འདི་དག་ཐམས་ཅད་ལས་ཀྱང་ཚབས་ཆེ་བ་ཞིག་ནི།
བོད་མི་རེ་ཟུང་གིས་དམངས་གཙོའི་འགྲོ་ལུགས་དང་མི་མཐུན་ཁར། རྒྱུ་མཚན་ཡང་དག་གི་སྒྲུབ་བྱེད་ཀྱིས་ཕོངས་བཞིན།
བོད་ཀྱི་ལེགས་བྱང་གིས་བསྐྱེད་པའི་བཟང་པོའི་གོམས་གཤིས་དང་གཏན་འགལ་དུ་གྱུར་བའི་ངང་༸གོང་ས་ཆེན་པོར་མཚན་སྨོད་ཟུར་ཟ་བྱེད་པ་འདི་རེད།
༸རྒྱལ་མཆོག་བཅུ་བཞི་པ་ཆེན་པོའི་ཡང་དག་པའི་ལམ་སྟོན་དང་དགོངས་གཞིར་རྒྱུ་མཚན་ལྟར་སྣང་གི་ལོག་འགྲེལ་གྱིས་སྤྱི་ཚོགས་བག་མ་ཕེབས་པར་བཟོ་པ།
ཡང་ན་གང་གི་དགོངས་གཞི་དང་ལམ་སྟོན་ཡང་དག་དང་ཚད་ལྡན་མ་རེད་མདོག་མདོག་བྱེད་པ་བོད་མི་རེ་ཟུང་གི་བྱེད་བབ་འདི་ནི་ཆོལ་གསུམ་ཆིག་སྒྲིལ་གྱི་རྨང་གཞི་སླར་ཡང་འཐོར་ཞིག་ཏུ་འགྲོ་བའི་རྒྱུ་ཁོ་ནར་ཟད་ཅིང་།
༧གོང་ས་མཆོག་གི་རླབས་ཆེན་དགོངས་གཞི་དང་ལམ་སྟོན་ཁག་དང་བྲལ་བའི་བོད་མིའི་སྤྱི་ཚོགས་ཤིག་འཛུགས་བསྐྲུན་བྱ་རྒྱུ་ལས་རང་ཉིད་སྤྱི་ཚོགས་དེ་དང་དམིགས་ཡུལ་དེ་ལྟར་འཛིན་པ་དག་དང་འབྲེལ་མཚམས་གཅོད་ངེས་པ་བོད་མི་བརྒྱ་ཆ་དགུ་བཅུ་གོ་གྲངས་ལ་དམ་བཅའ་བརྟན་པོ་ཡོད་པ་བཞིན།
མི་རེ་ཟུང་གི་ལོག་སྤྱོད་འོག་དུས་ནམ་ཡང་ཚུད་མི་ཉན་པ་ནི་གནད་ཀྱི་དོན་པོ་དང་མི་རེ་ཟུང་དེས་ནམ་ཡང་བོད་ལ་བདེ་སྐྱིད་ཅིག་བསྐྲུན་མི་ཐུབ་པའང་ཤེས་དགོས་པའི་གནད་དུ་མཐོང་།
མཇུག་ཏུ་ལོ་ངོ་བཞི་བཅུར་ཉེ་བའི་འཐུས་ཤོར་རྣམས་འདི་ལྟར་ཡི་གེར་བཀོད་མཚམས།
ངེད་ལ་སེམས་ཁྲལ་ཕྲན་བུ་བྱུང་པ་ནི་བཙན་བྱོལ་བོད་མིའི་སྒྲིག་འཛུགས་ཀྱི་ཆབ་སྲིད་ཀྱི་བྱུང་རབས་ལ་རྒྱུས་མངའ་མེད་མཁན་ཚོར་གོ་ལོག་འདྲ་ཨེ་འབྱུང་བསམས་པ་དེ་རེད།
ཡིན་ནའང་༸གོང་ས་སྐྱབས་མགོན་ཆེན་པོའི་སྐུ་ཚེ་འདི་དག་ཅི་ཙམ་རིན་ཐང་གཞལ་མེད་ཡིན་པ་དང་གང་གི་གདུལ་བྱ་བོད་གཞིས་བྱེས་མི་མང་གི་གནས་བབ་གང་དུ་འགྱུར་མིན་ལ་བསམ་གཞིགས་ཀྱིས་གཉིད་ཀྱང་བོར་བའི་སྤྲང་འཁྱམས་པ་ཆོས་ལུགས་ཀྱི་ཕྱོགས་རིས་དང་ལུང་ཚན་གྱི་ཆགས་སྡང་མ་འཇོན་པས་ངྷ་སའི་ཆེ་རྒུའི་མི་གྲལ་ནས་བུད་པ་རེབ་གོང་པ་བློ་བཟང་ཆོས་འབྱོར་རམ་ཤར་ཕྱོགས་ཁུག་རྟས་ལས་ཞོར་དང་འུག་སྐད་མུན་པར་འདྲེས་པའི་སྐལ་བར་འཐམས་ཏེ་མཇུག་གྲུབ་པ་བགྱིས་ཁུལ་བྱས་པའི་ཚུལ་འདིའི་ཚིག་དོན་གཉིས་ཆར་འཛོལ་བ་ཅི་འཚལ་མཁྱེན་སྤྱན་ཡངས་པ་དག་གིས་ཐེར་དུ་འདོན་པར་ཞུ་ཞུ།།
།།
༢༠༡༣། ༡༡། ༡༥། དགུང་མོར།། མངྒ་ལམ། །