རྒྱ་ནག་གི་སྡུག་ཉེས།
རྩོམ་པ་པོ་ཧྥེས་ལན་ཡུང་།
སྒྱུར་མཁན་ནགས་ཤོད་སད་མི།
ང་ཚོ་ཧང་སང་བཞིན་གོ་ཡོང་བ་ནི། ཕྱི་ལོ ༢༠༡༡ ལོའི་ཟླ་བ ༡༠ པའི་ཚེས ༡༧ ཉིན།
རང་ལོ་ཉི་ཤུ་ལས་མེད་པའི་སི་ཁྲོན་རྔ་པ་ཁུལ་མ་མོས་བཙུན་དགོན་གྱི་ཨ་ནེ་བསྟན་ འཛིན་དབང་མོ་ལགས་ཀྱིས་རྒྱ་གུང་ཁྲན་པའི་གདུག་རྩུབ་སྲིད་དབང་ལ་རྒོལ་ལན་བསློག་ ཆེད། རང་ལུས་མཆོད་མེར་བསྒྲོན་ནས་བུད་སོང་།
འདི་ནི་ཕྱི་ལོ ༢༠༠༩ ལོའི་མེར་བསྲེག་དོན་རྐྱེན་ནས་བརྩིས་པའི་བོད་རིགས་སེར་མོ་བའི་ཚེ་སྲོག་གིས་ རྒྱ་ནག་གུང་ཁྲན་ལ་ངོ་རྒོལ་བགྱིས་པའི་དོན་རྐྱེན་ཐེངས་བཅུ་པ་དེ་རེད།
ཡིད་སྐྱོ་ཞིང་རྔམ་བརྗིད་ལྡན་པ་དང་དཀའ་སྡུག་གིས་བརྩེགས་པའི་བོད་རིགས་སྤུན་ ཟླའི་བློ་སེམས་འདིས། གནམ་འོག་གི་མི་ཡོད་དོ་ཅོག་ལ་སྐྱོ་བ་དང་གདུང་སེམས་ཞིག་སྐྱེ་རུ་བཅུག་ལ།
མི་ཚོར་དེ་དང་མཉམ་དུ་རྒྱ་ནག་གི་གཅིག་སྡུད་ཚོགས་པར་ཁོང་ཁྲོ་ཡང་ལངས་སུ་བཅུག
འཛམ་གླིང་ན་ཆེས་རྩ་ ཆེ་བ་ནི་ཚེ་སྲོག་རེད། ཚེ་སྲོག་ནི་མི་སུ་ལའང་རེ་རེ་ལས་མེད་པས། ང་ཚོས་ཚེ་སྲོག་གཅེས་འཛིན་དགོས་པར་ལྟ་གི་ཡོད། འཆི་བར་སྐུལ་བ་དང་།
རང་ལུས་མེར་བསྲེག་སོགས་ཡ་ང་བའི་རྣམ་པའི་སྒོ་ནས་ངོ་རྒོལ་འཐབ་རྩོད་བྱེད་པར་ ཡི་རང་བྱེད་ཀྱི་མེད། ཡིན་ནའང་། ང་ཚོས་ངེས་པར་དུ་དོན་གནད་གཉིས་ལ་ཞིབ་ལྟ་དགོས་པ་སྟེ། གཅིག་ནི།
གལ་ཏེ་མི་སུ་ཞིག་རེ་ཐག་རྦད་དེ་ཆད་མེད་ན། རང་ལུས་མེར་བསྲེག་གི་རྣམ་པའི་སྒོ་ནས་རང་ཉིད་ཀྱི་ཚེ་སྲོག་མཇུག་སྡུད་ཀྱི་མ་ རེད། གཉིས་སུ། རང་ལུས་མེར་བསྲེག་བ་ཚོའི་འཆད་ཁ་མའི་ཚེ་སྲོག་དེས་ཀྱང་ཞི་བ་རང་གི་སྒོ་ནས་ངོ་
རྒོལ་མཐའ་སྐྱེལ་བྱས་པ་རེད། བོད་རིགས་སྤུན་ཟླས་རྒྱ་གུང་ཁྲན་གཞུང་ལ་རེ་ཐག་ཡོངས་སུ་ཆད་པ་དང་། འཚོ་བའིམདུན་ལྗོངས་ལ་རེ་ཞག་ཆ་ཚང་རྫོགས་པ་རེད། སྐད་ཆའི་ལམ་ནས་སུན་འབྱིན་ཙམ་བྱེད་པ་དང་། རྔམ་སྟོན་ཁྲོམ་སྐོར།
ངག་བསྡམ་ཟས་བཅད་སོགས་ཀྱི་ངོ་རྒོལ་བྱེད་པ་ལའང་། སྒེར་སྡེམ་ཚོགས་ཁག་འདིས་གདུག་རྩུམ་ཆེན་པོས་དྲག་གནོན་བྱེད། དེའི་ཕྱིར་ན། སྲོག་བསྡོས་ཀྱིས་རང་ལུས་མེར་བསྲེག་གི་རྣམ་པའི་སྒོ་ནས་ངོ་རྒོལ་འཐབ་རྩོད་མ་
བྱས་ཐུ་མེད་བཟོས་པ་རེད། འདིས་མཚོན་པ་ནི། རྒྱ་གུ་ཁྲན་པའི་དབང་སྒྱུར་འོག་བོད་མི་རིགས་ཀྱི་འགྲོ་མིའི་ཐོབ་ཐང་དང་ཆོས་ ལུགས་གནད་དོན་བཅས་ལ་ཤིན་ཏུ་ཐ་ཆད་པ་མངོན་ཡོད། ཁྲག་དམར་གྱི་བདེན་པ་འདིས།
རྒྱ་ནག་གིས་བརྗོད་ཀྱིན་པའི་འཆམ་མཐུན་སྤྱི་ཚོགས་ཟེར་བའི་གདོང་རས་དབྲལ་བ་རེད།
འདི་ལྟ་བུའི་གཞོན་ཤ་ ཅན་གྱི་ཚེ་སྲོག་དག་ རེ་རེ་བཞིན་སྐྱོ་ཆད་ངང་བུད་སོང་ན་ཡང་། རྒྱ་ནག་གུང་ཁྲན་པས་ད་དུང་ཡང་ཚེ་སྲོག་ལ་སྣང་ཆུང་དང་། དོན་དངོས་འཁྱོག་བརྗོད།
ནང་ཉེས་གཞན་འགེལ་སོགས་བྱེད་པ་ལས། སྒྲིག་གཞི་དང་། སྲིད་ཇུས། རུལ་སྲུང་སོགས་ལ་བདའ་འདེེད་བྱས་ནས་གནད་དོན་འབྱུང་རྐྱེན་ལ་རྩད་གཅོད་གཏན་ནས་ མེད་དུས། ང་ཚོས་དོན་གནད་འདིར་སྐྱོན་བརྗོད་ཤུགས་ཆེ་བྱེད་ཀྱི་ཡིན།
རྒྱ་གཞུང་མགྲིན་ཚབ་པས་བརྗོད་དོན། བོད་ནང་གི་མེར་བསྲེག་དོན་རྐྱེན་འདི་ཏཱ་ལའི་བླ་མའི་རྗེས་འབྲངས་པ་ཚཽས་བཟོས་པ་ རེད་ཟེར། འོ་ན། ང་ཚོས་འདྲི་རྒྱུར།
ནང་ས་རུ་རྒྱ་མི་ཅི་འདྲའི་མང་པོ་ཞིག་གིས་འོ་དོད་ངང་མེར་བསྲེག་བྱས་པ་དེ་ཚོ་ སུ་ཞིག་གིས་བཟོས་པ་རེད་དམ།
ང་ཚོ་ནི་བོད་མི་རིགས་ ཀྱི་གཅེན་གཅུང་ཡིན་པས། ཡ་ང་ཞིང་སྐྱོ་དུང་ཆེ་བའི་རྣམ་པ་འདི་རིགས་མུ་མཐུད་འབྱུང་རྒྱུར་ང་ཚོས་ལྟ་ བཟོད་ཀྱི་མེད།
རྒྱ་ནག་གུང་ཁྲན་པས་བོད་རིགས་སྤུན་ཟླ་གཏོར་བརླག་བྱེད་པར་ང་ཚོས་ངོ་རྒོལ་བྱེད་ རྒྱུ་ཡིན། ང་ཚོས་ཚེ་སྲོག་གཅེས་པར་འཛིན་དགོས་པ་འབོད་སྐུལ་ཞུ་རྒྱུ་ཡིན། ང་ཚོས་རྒྱ་ནག་གུང་ཁྲན་ལ་རེ་སྐུལ་ནན་མོ་ཞུ་རྒྱུ་ནི།
རང་ལུས་མེར་བསྲེག་གི་དོན་རྐྱེན་འདིའི་འབྱུང་གཞི་གང་ཡིན་པ་དང་། སྡིག་ཉེས་སློང་མཁན་དང་འགན་ཁུར་བར་ཆད་གཅོད་ནན་མོ་བྱས་ཏེ། སྤྱི་ཚོགས་ལ་ཕྱི་གསལ་ནང་གསལ་དང་། དྲང་བདེན།
མི་གཤིས་བྲོ་བའི་ཨ་ལན་ཞིག་འདེབས་རོགས་གྱིས།
ང་ཚོས ༸ སྐྱབས་མགོན་ཏཱ་ལའི་བླ་མ་མཆོག་དང་བོད་མི་རིགས་ཀྱི་འཚེ་བ་མེད་པའི་ལས་འགུལ་ལ་ རྒྱབ་སྐྱོར་ཡོད།
ང་ཚོས་བོད་མི་རིགས་ཀྱི་གཞི་རྩའི་འགྲོ་མིའི་ཐོབ་ཐང་དང་ཆོས་དད་རང་མོས་བཅས་ལ་ གུས་བཀུར་དགོས་པར་འབོད་སྐུལ་ཞུ་གི་ཡོད། གུང་ཁྲན་པས་བོད་དུ་འཛིན་པའི་བཙན་མཁྲེགས་སྲིད་ཇུས་མཚམས་བཞག་ནས།
བོད་མིའི་རེ་འདོད་དང་འཚམས་ཞིང་། རྒྱ་བོད་གཉིས་ཕན་གྱི་སྲིད་ཇུས་ཞིག་གཏན་ལ་འབེབས་དགོས།
འཆམ་མཐུན་སྤྱི་ཚོགས་ འཛུགས་བསྐྲུན་བྱ་དགོས་པའི་འབོད་སྒྲ་དེ་ནི་ནོར་འཕྱུག་མེད་པ་རེད་དེ།
དྲག་རྩུབ་ལ་བརྟེན་ནས་ངོ་རྒོལ་གྱི་སྐད་སྒྲ་འཇོམས་གྱིན་པ་འདི་ནི་ཡོངས་སུ་ནོར་ བའི་ལག་ཐབས་ཞིག་རེད། འགྲོ་མིའི་ཐོབ་ཐང་ལ་བཙན་འཛུལ་བྱས་ཏེ་སྒེར་སྡེམ་དབང་ཤེད་ལ་སྲུང་སྐྱོབ་བྱ་
ཚུལ་འདིས་འཆམ་མཐུན་སྤྱི་ཚོགས་ཤིག་བསྐྲུན་ཐུབ་རྒྱུར་མི་དཔེ་མི་སྲིད། བྱེད་བབ་འདིས་སྤྱི་ཚོགས་ནང་ཉིན་རེ་བཞིན་རུལ་སྲུང་བ་ཇེ་མང་དང་། མུན་པ་ཇེ་ནག ཁ་བྲལ་ཇེ་རིང་། རྙོག་ཟིང་ཇེ་རྒོད་ལས་མེད་དོ། །
མ་རྩོམ་དྲ་ཐག http://www.xizang-zhiye.org
༢༠༡༡ ལོའི་ཟླ་བ ༡༠ པའི་ཚེས ༡༩ ལ།