བོད་ལ་དྲིན་ཆེན་བྱས་ཀྱང་དྲིན་མི་གོ སྐལ་བཟང་རྒྱ་མཚོ། ཉེ་ཆར་བཙན་བྱོལ་བོད་མིའི་སྤྱི་ཚོགས་ཁྲོད་ཡིད་སྐྱོ་བའི་གནས་ཚུལ་ཞིག་གོ་རྒྱུ་ཡོད་པ་ནི་ ༧ གོང་ས་སྐྱབས་མགོན་ཏཱ་ལའི་བླ་མ་མཆོག་ཐུགས་ཕམ་བྱུང་བ་དེ་རེད། གུ་རུ་རིན་པོ་ཆེ་ཡིས་ “བོད་ལ་དྲིན་ཆེན་བྱས་ཀྱང་དྲིན་མི་གོ” ཅེས་སྡོམ་ཚིག་ཅིག་བཀོད་ཡོད་པ་དེར་བློ་གཟུ་བོར་གནས་པའི་བོད་མི་ཚོས་ངེས་པར་དུ་བསམ་གཞིག་ནན་གྱིས་བའི་དུས་སུ་སླེབས་འདུག་སྙམ། བོད་པ་རྣམ་དག་ཅིག་ཡིན་ཚེ་༧གོང་ས་མཆོག་གི་བཀའ་དྲིན་རྗེས་སུ་དྲན་དགོས་ངེས་ཤིག་ཡིན་ཞེས་ངས་སྤོབས་པའི་བཤད་སྙིང་འདོད། ཕྲན་གྱིས་བོད་པ་ཡིན་པར་ཁས་ཆེ་པ་ཚོས་རྒྱལ་བའི་བཀའ་དྲིན་རྗེས་སུ་དྲན་དགོས་པའི་རྒྱུ་མཚན་འགའ་དོན་ཚན་ ༡༡ དུ་བསྡུས་ཏེ་གླེང་རྒྱུ་ཡིན། ༼ ༡ ༽༡༩༥༠ ལོར་སྟག་བྲག་རིན་པོ་ཆེ་ཡིས་ཆབ་སྲིད་ཀྱི་འགན་དབང་༧གོང་ས་མཆོག་ལ་རྩིས་སྤྲོད་གནང་། ཀུན་གྱིས་མཁྱེན་གསལ་ལྟར་སྐབས་དེའི་བོད་གཞུང་ནི་ཁ་ཐོར་དགུ་ཐོར་དང་། འཆི་གསོན་ཉག་ཕྲ་བའི་གནས་སྟངས་འོག་ལྷག་ཡོད། གནས་སྟངས་འདིའི་འོག་ནས་༧གོང་ས་མཆོག་གིས་བོད་པའི་ཆབ་སྲིད་ཀྱི་ཐུགས་འགན་བཞེས་དགོས་བྱུང་ཡོད་ལ། སྐབས་དེར་གོང་ས་མཆོག་དགུང་ལོ་བཅུ་དྲུག་ལ་སོན་ཙམ་ཡིན། ༡༩༥༩ ལོའི་སྔ་རོལ་གྱི་བོད་སྤྱི་ཚོགས་དེ་སྐུ་དྲག་རིང་ལུགས་དང་ས་བདག་རིང་ལུགས་རེད་ཅེས་བརྗོད་ཆོག་ལ། ༧གོང་ས་མཆོག་གིས་ཆབ་སྲིད་ཀྱི་འགན་དབང་འཁུར་དུ་བཞེས་ཏེ་ཅུང་མ་འགོར་བར། བོད་སྤྱི་ཚོགས་རྙིང་པའི་ནང་གི་བྱ་སྤྱོད་མང་པོ་ཞིག་བཅོས་བསྒྱུར་དགོས་པར་གཟིགས་ཏེ། འཐུས་མི་ ༥༠ ལས་གྲུབ་པའི་བསྒྱུར་བཅོས་ཚོགས་པ་ཞིག་དང་རྒྱུན་ལས་ཚོགས་ཆུང་གསར་དུ་བཙུགས། ཚོགས་པ་དེའི་དམིགས་ཡུལ་མདོ་བསྡུས་ཏེ་བཤད་ན། བོད་སྤྱི་ཚོགས་རྙིང་པ་ལེགས་བཅོས་བཏང་སྟེ་དེང་རབས་ཚན་རིག་དང་མཐུན་པའི་དམངས་གཙོའི་སྤྱི་ཚོགས་གསར་བསྐྲུན་གནང་རྒྱུ་དེ་རེད། ༼༢༽ ༡༩༥༩ ལོར་༧གོང་ས་མཆོག་བོད་ནས་རྒྱ་གར་ནང་སྐྱབས་བཅོལ་དུ་འབྱོར་རྗེས། སློབ་གྲྭ་གསར་འཛུགས་དང་སེ་འབྲས་དགེ་གསུམ་གཙོས་དགོན་པ་གྲྭ་ཚང་གསར་རྒྱག བཙན་བྱོལ་བོད་གཞུང་གསར་འཛུགས་སོགས་སྔར་བོད་ཀྱི་ཆོས་སྲིད་དང་རིག་གཞུང་སོགས་ཉམས་རྒུད་དུ་ཕྱིན་པ་རྣམས་སླར་གསོ་མཛད་ཡོད། ༼༣༽ སྔོན་མ་ཡིན་ན་བོད་ནང་ཆོས་ལུགས་ཁག་གི་དབུ་ཁྲིད་ཚོ་ཕན་ཚུན་བར་འཁོན་འཛིན་དང་ཞེན་ཁོག་འཐེན་འཁྱེར་ཤུགས་ཆེན་ཡོད་མོད། ༧གོང་ས་མཆོག་རྒྱ་གར་ལ་ཞབས་ཀྱིས་བཅག་རྗེས་ཆོས་བརྒྱུད་ནང་ཁུལ་གྱི་འགལ་ཟླ་ཡོངས་རྫོགས་མེད་པ་བཟོས་ཏེ། བོད་བརྒྱུད་ནང་བསྟན་ཆོས་ལུགས་ནི་དཔལ་ནཱ་ལེན་དྲ་ནས་བོད་ལ་དར་བའི་སངས་རྒྱས་ཆོས་ལུགས་ཤིག་དང་། ཆོས་བརྒྱུད་ཁག་གི་དབུ་འཁྲིད་ཚོ་ནང་པ་སངས་རྒྱས་པའི་རྗེས་འབྲང་པ་ཡིན་པ་གཅིག་མཚུངས་ཡིན་པའི་ངོས་འཛིན་གསལ་བཤད་ཡང་ཡང་གནང་ཡོད། ལྷག་པར་དུ་དགོན་སྡེ་ཁག་ཚང་མའི་ནང་ཚད་མ་རིག་པ་དང་དེང་གི་ཚན་རིག་སློབ་སྦྱོང་བྱ་དགོས་པའི་ལམ་སྟོན་གནང་། ༧གོང་ས་མཆོག་ནས་གསར་གཏོད་ཀྱི་སྒོ་ནས་བོད་བརྒྱུད་ནང་བསྟན་ཆོས་ལུགས་དབྱེ་བ་གསུམ་བགོས་ཏེ། དང་པོ། ནང་པ་སངས་རྒྱས་པའི་ཆོས་དང་། གཉིས་པ། ནང་པ་སངས་རྒྱས་པའི་ལྟ་གྲུབ། གསུམ་པ། ནང་པ་སངས་རྒྱས་པའི་ཚན་རིག་བཅས་རེད། ༧གོང་ས་མཆོག་གི་བཀའ་དྲིན་ལ་བརྟེན་ནས་བོད་བརྒྱུད་ནང་བསྟན་ཆོས་ལུགས་འདི་ཨེ་ཤི་ཡཱའི་རྒྱལ་ཁབ་ཁག་གཙོས་ནུབ་ཕྱོགས་རྒྱལ་ཁབ་ཕལ་ཆེ་བའི་ནང་དར་ཁྱབ་ཆེན་པོ་འགྲོ་བཞིན་ཡོད། དེང་སང་ཚན་རིག་པ་དང་ནུབ་ཕྱོགས་སེམས་ཁམས་རིག་པ་སྨྲ་པ་ཚོས་བོད་བརྒྱུད་ནང་བསྟན་ཆོས་ལུགས་བརྒྱུད་དེ་ང་ཚོ་འགྲོ་བ་མིའི་ཀུན་སྤྱོད་དང་སེམས་ཁམས་རིག་པའི་སྐོར་ཞིབ་འཇུག་བྱས་དང་བྱེད་བཞིན་ཡོད་ལ། ༧གོང་ས་མཆོག་སྒེར་གྱིས་ལོ་མང་རིང་འཛམ་གླིང་གི་མཚན་རིག་པ་གྲགས་ཅན་ཚོ་དང་སེམས་དང་ཚེ་སྲོག་སྐོར་ལ་བགྲོ་གླིང་གནང་སྟེ་བོད་ཀྱི་ནང་པ་སངས་རྒྱས་པའི་ཚན་རིག་འཛམ་གླིང་ཡོངས་ལ་ཁྱབ་ཡོད། ༼༤༽༧གོང་ས་མཆོག་གིས་བཀའ་དྲིན་ཁོ་ནར་བརྟེན་ཏེ་བོད་མདོ་དབུས་ཁམས་གསུམ་མཐུན་སྒྲིལ་གོང་བུ་གཅིག་གྱུར་ཆགས་ཡོད། སྔོན་ཆད་བཙན་བྱོལ་སྤྱི་ཚོགས་ནང་བོད་པ་མི་ཉུང་བ་ཞིག་གིས་ང་བོད་པ་ཡིན་ཟེར་རྒྱུར་ཡང་ངོ་གནོང་བའི་གནས་ཚུལ་ཡོད་ཀྱང་། དེང་སང་བོད་གཞིས་བྱེས་གཉིས་ཀ་ནས་བོད་པ་ཚོས་ལུང་ཚན་གྱི་འདུ་ཤེས་ལས་བརྒལ་ཏེ། ང་ཚོའི་བོད་དང་ང་རང་བོད་ཡིན་ཞེས་ཞེས་སྤོབས་པ་གཟེངས་སུ་བཏེགས་ཏེ་རྗོད་ཀྱི་ཡོད། འདི་ནི་༧གོང་ས་མཆོག་གི་བཀའ་དྲིན་ཁོ་ན་ལས་གཞན་སུ་གང་གི་བྱས་རྗེས་ལ་བགྲང་ས་མེད། ༼༥༽རྒྱ་ནག་དབུས་སྲིད་གཞུང་གིས་བོད་ཐོག་སྲིད་ཇུས་འདྲ་མིན་སྤེལ་ཏེ་མཐར་གཏུགས་ན་བོད་ཡུལ་རྒྱ་ཡུལ་དུ་སྒྱུར་གྱིན་ཡོད། ད་ལྟའི་བོད་ཀྱི་གནས་སྟངས་ནི་ཆེས་འཇིགས་སུ་རུང་བ་དང་། ཆེས་ཡ་ང་བ་ཞིག་ཏུ་གྱུར་ཡོད། ཛ་དྲག་གི་གནས་སྟངས་འདིའི་འོག་ནས་མགྱོགས་མྱུར་ངང་བོད་སྐྱོབ་ཐབས་བྱ་རྒྱུ་ནི་ང་ཚོ་མི་རེ་ངོ་རེའི་ཕྲག་ཏུ་བབས་པའི་འོས་འགན་ཉག་ཅིག་ཆགས་ཡོད། ༧གོང་ས་མཆོག་གིས་ཛ་དྲག་གི་གནས་སྟངས་འདི་ལས་སྐྱོབ་ཐབས་སུ་བོད་རྒྱ་གཉིས་ཀར་ཕན་པའི་དབུ་མའི་ལམ་གསར་བཏོད་མཛད། དབུ་མའི་ལམ་གྱི་སྲིད་བྱུས་ལ་རྒྱ་ནག་སྐམ་ས་ཆེན་མོའི་རྒྱ་རིགས་གཙོས་འཛམ་གླིང་ཡུལ་གྲུ་གང་སར་རྒྱབ་སྐྱོར་གནང་དང་གནང་བཞིན་ཡོད། ༼༦༽འཛམ་གླིང་རྒྱལ་ཁབ་ཁག་གི་དམངས་གཙོའི་ལོ་རྒྱུས་འཕེལ་རིམ་ལ་ཕྱིར་མིག་བལྟས་ན། མི་རྣམས་ཀྱིས་སོ་སོའི་རྒྱལ་ཁབ་ཀྱི་སྲིད་གཞུང་དམངས་གཙོར་བསྒྱུར་ཆེད་ནང་ཁུལ་དམག་འཁྲུག་དང་མི་གསོད་ཁྲག་སྦྱོར། རང་ཉིད་ཀྱི་གཅེས་པའི་ལུས་སྲོག་ཚུན་བློས་གཏོང་གནང་ཡོད་ཀྱང་། ང་ཚོ་བོད་ཀྱི་དམངས་གཙོའི་འཕེལ་རིམ་ནི་༧གོང་ས་མཆོག་གིས་ཐད་ཀར་བོད་མི་ས་ཡ་དྲུག་ལ་གསོལ་རས་སུ་བསྩལ་པ་ཞིག་རེད། ༼༧༽བོད་རང་དབང་འཐབ་རྩོད་ཀྱི་ཐབས་ལམ་ནི་འཚེ་མེད་ཞི་བ་ཡིན། འཚེ་མེད་ཞི་བའི་ལྟ་གྲུབ་ཟེར་བ་འདི་བདག་ཅག་གི་སྟོན་པས་ལོ་ངོ་ ༢༦༠༠ གོང་ལ་གསུངས་པ་ཞིག་རེད། ༧གོང་ས་མཆོག་ནས་བོད་མི་ཚོར་བོད་རང་དབང་འཐབ་རྩོད་བྱེད་པར་འཚེ་མེད་ཞི་བའི་ཐབས་ལམ་ལ་བརྟེན་དགོས་པའི་འབོད་སྐུལ་ཡང་ཡང་གནང་བར་བརྟེན། ༡༩༨༩ ལོར་ནོ་བྷེལ་ཞི་བདེ་གོ་སྒྲིག་ཚོགས་ཆུང་གིས་༧གོས་ས་མཆོག་ལ་ཞི་བདེ་གཟེངས་རྟགས་ཕུལ་ཡོད། འདི་ནི་རྒྱལ་དབང་རིམ་བྱོན་གྱི་ལོ་རྒྱུས་ནང་སྔར་བྱུང་མ་མྱོང་བའི་ལོ་རྒྱུས་ཀྱི་དན་རྟགས་གལ་འགངས་ཆེན་པོ་ཞིག་དང་། མ་འོངས་པའི་བོད་པའི་མི་རབས་ནས་མི་རབས་ཀྱི་གཟི་བརྗིད་དང་སྤོབས་པ་རེད། དེ་བཞིན་དུ་ ༢༠༠༨ ལོར་ཨ་རི་གྲོས་ཚོགས་ནས་༧གོང་ས་མཆོག་ལ་གསེར་གྱི་རྟགས་མ་ཕུལ་ཏེ། བོད་མི་ཚོའི་སེམས་ཁུངས་ན་ང་ཚོ་བོད་ཀྱི་དབུ་ཁྲིད་ཅེས་དགའ་དད་སྤྲོ་གསུམ་གྱིས་ཁེངས་ཡོད། ༼༨༽བོད་མི་ཚོ་དུས་རབས་ཉེར་གཅིག་པའི་ནང་པ་བྱེད་དགོས་པ་དང་། གངས་ཅན་པ་རྣམས་ཀྱིས་དེང་དུས་ཤེས་ཡོན་དང་བོད་བརྒྱུད་ནང་བསྟན་གཉིས་ལ་སློབ་སྦྱོང་བྱས་ཏེ་སོ་སོའི་རྒྱལ་ཁབ་གཙོས་འཛམ་གླིང་སྤྱི་ལ་ཞབས་འདེགས་བསྒྲུབ་ཐུབ་ན་དེ་ནི་དུས་རབས་ཉེར་གཅིག་པའི་ནང་པ་རེད་ཅེས་༧གོང་ས་མཆོག་གིས་ནན་གྱིས་གསུངས་ཏེ། དགོན་པ་གྲྭ་ཚང་ཁག་ཚང་མའི་ནང་ཚན་རིག་གི་སློབ་སྦྱོང་སྲོལ་གཏོད་གནང་། ༼༩༽༢༠༡༡ ལོར་༧གོང་ས་མཆོག་བོད་པའི་ཆབ་སྲིད་ལས་བགྲེས་ཡོལ་ཆ་ཚང་གནང་སྟེ། བོད་གཞུང་དགའ་ལྡན་ཕོ་བྲང་གི་མཚན་བྱང་ཡང་བཅོས་བསྒྱུར་གནང་། ༧གོང་ས་མཆོག་གིས་བཙན་བྱོལ་བོད་གཞུང་གི་མིང་ཚབ་ཏུ་༼ གངས་ལྗོངས་རང་དབང་དམངས་གཙོའི་སྒྲིག་འཛུགས༽ ཞེས་པ་དང་། བཀའ་བློན་ཁྲི་བའི་མིང་ཚབ་ཏུ་༼ སྲིད་སྐྱོང་བ ༽ ཞེས་མཚན་བསྩལ་ཡོད་ཀྱང་། ངོ་མཚར་བ་དང་ཡ་མཚན་པ་ཞིག་ལ། བོད་མི་མང་སྤྱི་འཐུས་ལྷན་ཚོགས་གཙོ་བྱས་ཏེ་གནད་ཡོད་མི་སྣ་ཁག་ཅིག་གིས་དབུས་བོད་མིའི་སྒྲིག་འཛུགས་ཟེར་བའི་མིང་གཞན་ཞིག་བཏགས་པ་དང་། སྲིད་སྐྱོང་བ་ལ་ད་དུང་བཀའ་བློན་ཁྲི་བ་ཅེས་འབོད་ཀྱིན་ཡོད། ༼༡༠༽༧གོང་ས་མཆོག་གི་སྐུ་ཚེའི་ནང་ལྷག་བསམ་གྱིས་བཅིངས་བའི་འགན་ཁུར་གསུམ་ཡོད་དེ། དང་པོ། འགྲོ་བ་མིའི་རིན་ཐང་དང་བཟང་སྤྱོད་ཁྱབ་སྤེལ་བྱ་རྒྱུ། གཉིས་པ། འཛམ་གླིང་གི་ཆོས་ལུག་ཁག་ཕན་ཚུན་བར་འབྲེལ་ལམ་ཇེ་ལེགས་སུ་གཏོང་རྒྱུ། ཆོས་ལུགས་ཁག་ལ་ལྟ་བ་དང་གྲུབ་མཐའ་སྣ་ཚོགས་ཡོད་ཀྱང་། གཞི་རྩའི་བྱམས་པ་དང་བརྩེ་བ། བཟོད་སྒོམ། ཆོག་ཤེས། ཚུལ་ཁྲིམས་བཅས་ཆོས་ལུགས་ཚང་མའི་ནང་ཡོད་པ་གཅིག་མཚུངས་ཡིན། གསུམ་པ། བོད་ཀྱི་གནད་དོན་ལ་ཐུགས་ཁུར་དང་། དྲག་ཤུཊ་ཆེ་བའི་རྒྱ་ནག་གི་སྲིད་བྱུས་འོག་ནས་འཚོ་བཞིན་པའི་བོད་མི་རྣམས་ཀྱི་རང་དབང་གི་མགྲིན་ཚབ་པ་ཞིག་གནང་རྒྱུ་བཅས་རེད། ༼༡༡༽སེམས་ཅན་ཐམས་ཅད་བདེ་བ་འདོད་པ་དང་། སྡུག་བསྔལ་མི་འདོད་པ་གཅིག་མཚུངས་ཡིན། དེར་བརྟེན། འཛམ་གླིང་ཞི་བདེ་དང་། འགྲོ་བ་མི་རྣམས་བདེ་སྐྱིད་སྐྲུན་པ་ལ་༧གོང་ས་མཆོག་ནས་འཇིག་རྟེན་ཀུན་ཁྱབ་ཀྱི་འགན་ཁུར་ཞེས་པ་འཛམ་གླིང་ཡོངས་ལ་གསལ་བོར་བསྒྲགས། ༧གོང་ས་མཆོག་ནི་བོད་མིའི་དབུ་འཁྲིད་ཙམ་མ་ཡིན་པར་འཛམ་གླིང་སྤྱི་ལ་དབང་བའི་ཞི་བདེ་དབུ་འཁྲིད་ཅིག་ཆགས་ཡོད། ལྷག་པར་དུ་འཛམ་གླིང་ནང་པའི་རྒྱལ་ཁབ་ཁག་གི་དབུ་འཁྲིད་གཅིག་པུ་དེ་ཡིན་སྟབས། ང་ཚོ་བོད་མིའི་དབུ་འཁྲིད་ཅེས་བརྗོད་ཚེ་དགེ་སྐྱོན་གཉིས་ལས་སྐྱོན་གྱི་ཆ་ཆེ་བར་མཐོང་གི་ཡོད། བོད་སྤྱི་བོ་གནམ་བསྟན་ཡོངས་ཀྱིས་མཁྱེན་དགོས་པ་ཞིག་ལ། དགོས་པ་རྒྱུ་མཚན་ལྡོག་དུ་མེད་པ་ཞིག་གི་དབང་གིས་༧གོང་ས་མཆོག་གིས་དགའ་ལྡན་ཕོ་བྲང་ངམ་ཏཱ་ལའི་བླ་མའི་བླ་བྲང་གི་མཚན་བྱང་བརྗེ་བསྒྱུར་གནང་པ་མ་གཏོགས་བོད་གཞུང་བསྡུ་གསོག་བརྒྱབ་སྟེ་སྒམ་ནང་བཅུག་ནས་ཟྭ་བརྒྱབ་པ་ཞིག་གང་དུའང་མེད། མདོར་ན་༧གོང་ས་སྐྱབས་མགོན་ཏཱ་ལའི་བླ་མ་མཆོག་གིས་བོད་མི་རྣམས་བྱ་མའི་བྱ་ཕྲུག་རུམ་རུམ་བྱས་པ་ལྟར་དགུང་ལོ་ ༡༦ ནས་ད་ལྟའི་བར་བྱམས་དང་བརྩེ་བའི་བསྐྱངས་དང་སྐྱོང་བཞིན་པའི་བཀའ་དྲིན་ལ་བསམ་ཤེས་ཀྱིས་བོད་ལ་དྲིན་ཆེན་བྱས་པ་དྲིན་དུ་གོ་བར་བགྱིས་ཤིག།།