རྩོམ་པ་པོཿ ཝང་ལི་ཞུང་།
སྒྱུར་པ་པོཿ ཏྲེ་ཧོར་ཐུབ་བསྟན།

གཅིག

མིག་སྔའི་བོད། ཧ་ལམ་༢༠༠༨བསྐྱར་ལོག་བྱུང་བཞིན་པ་ལྟར་རེད། བསྐྱར་ ལངས་ལ་དོན་སྙིང་མེད་ཅེས་བརྗོད་མི་རུང་། ངོ་རྒོལ་ཡང་དང་བསྐྱར་དུ་བྱུང་བར་གལ་གནད་ཧ་ཅང་ཆེན་པོ་ལྡན། གནད་དོན་ངོ་རྒོལ་བའི་ཕྱོགས་སུ་མེད་ཅིང་། ངོ་རྒོལ་བྱེད་ས་དང་ངོ་རྒོལ་ཚབ་མཚོན་གྱི་ཕྱོགས་སུ་ཡོད། མི་ལོ་བཞིའི་དུས་ཚོད་ཐུང་ཐུང་མིན། ཕྱོགས་གཉིས་ཀའི་གོམས་ཤུགས་རྒྱུན་འཇགས་སུ་སོང་བས་དཀའ་གནད་ལས་གྲོལ་ཐུབ་མེད།
ངོ་ རྒོལ་བྱེད་སའི་ཕྱོགས་ཀྱིས་ངོ་རྒོལ་ལ་བརྟེན་ནས་ཅི་དགར་གྱིས་ཡོད་ཚད་སྔར་མུས་ བཞིན་དྲག་ཤུགས་ཁོ་ནས་བཙན་གནོན་བྱས་པ་དང་། ངོ་རྒོལ་ཚབ་མཚོན་པའི་ཕྱོགས། སྔར་བཞིན་ངོ་རྒོལ་གྱི་འགྲོས་དང་བསྟུན་ནས་མུ་མཐུད་དུ་ངོ་རྒོལ་བྱེད་པ་དང་ ཕྱོགས་འཐོར་རུ་འགྲོ་བཞིན་ཡོད། རང་སྲོག་བློས་བཏང་ལ་སྔར་ལྟར་འབྲས་བུ་སོན་མེད་ཅིང་། བློ་ཐག་རྦད་བཅད་ཀྱི་བྱེད་ཐབས་སྤྱོད་པ་ཙམ་རེད། ཕྱོགས་ གང་ཡིན་ལ་མ་ལྟོས་པར། གལ་ཏེ་༢༠༠༨ལོའི་རྗེས་སུ་ཐོལ་བརྒལ་ཞིག་བྱུང་ཡོད་ན། མིག་སྔར་འདི་ལྟ་བུའི་ཡང་བསྐོར་བསྐྱར་ཟློས་གྱི་ངོ་རྒོལ་བྱུང་མི་སྲིད། ལོ་ དེར་རྒྱ་ནག་དམར་ཤོག་སྐབས་དེའི་འགོ་ཁྲིད་ཀྱིས་སྣེ་འཁྲིད་སྐབས། གཡོན་ཕྱོགས་ནས་“རིག་གསར”སླངས་ ཏེ་ཆོས་ལུགས་རྩ་མེད་བཏང་བ་དང་། གཡས་ཕྱོགས་ནས་ཧུ་ཡཱང་པྭང་གོ་སར་ནས་ཕབ་སྟེ། བོད་ལ་འཛིན་པའི་སྲིད་ཇུས་འཕོ་འགྱུར་གྱི་མྱུར་ཚད་ལ་མི་རྣམས་ཧ་ལས་པ་རེད། ད་ལྟའི་རྒྱ་ནག་དམར་ཤོག་ནི་དཔོན་རིགས་རུ་ཁག་གི་འཕྲུལ་ཆ་ཞིག་ཏུ་འགྱུར་ཚར་བ་ དང་། འཕྲུལ་ཆ་ལ་གོམས་ཤུགས་རྒྱུན་འཇགས་གཅིག་པོའི་ནུས་པ་ཙམ་ལས་མེད། བོད་ཐོག་ལ་འཛིན་པའི་དྲག་ཤུགས་ཀྱི་བཙན་གནོན་དང་དཔལ་འབྱོར་གྱི་ཕེ་ཕན། གཉིས་ཀ་དཔོན་པོ་རུ་ཁག་གི་དྲག་ལས་ཐོན་སྐྱེད་ཡིན་པ་ལས། ཐོལ་བརྒལ་རྩ་བ་ནས་མིན།
བོད་ནང་གི་བོད་ མི་ཚོས་བཙན་གནོན་མྱོང་བཞིན་པ་དང་། རང་དབང་གིས་གནས་ཚུལ་མཁོ་གཏོང་གི་ཁོར་ཡུག་མེད། ཁོང་ཚོས་བྱེད་ཐུབ་པ་ཁོ་ན་ཁེར་རྒྱུགས་དང་ཡང་ན་མང་ཚོགས་འདུ་འཛོམས་ཀྱི་ངོ་ རྒོལ་ཡིན། རང་ལུས་མེར་བསྲེག་ནི་ངོ་རྒོལ་འདིའི་རིགས་ཀྱི་རྩེ་ཕུད་རེད། ཐོལ་བརྒལ་བྱེད་ཐུབ་མཁན་གཅིག་པོ་ནི་བོད་ཕྱི་ལོགས་ལ་ཡོད། དེ་རུ་སྒྲིག་འཛུགས་ཡོད་ཅིང་རྟེན་གཞི་ཡང་ཡོད། རང་དབང་དང་སློབ་སྦྱོང་ཡོད། ཆོས་ཀྱི་དབུ་ཁྲིད་དང་སྐྱེས་ཆེན་དམ་པ་ཡོད། ཚོགས་པ་སྒྲིག་འཛུགས་དང་གསར་འགྱུར་བརྒྱུད་ལམ་ཡོད། ད་དུང་རྒྱལ་སྤྱིའི་རྒྱབ་སྐྱོར་ཀྱང་ཡོད། གལ་ཏེ་བོད་ནང་གི་བོད་མི་གཅིག་པུའི་རྗེས་སུ་བསྙེག་ཏེ་གསལ་བསྒྲགས་ཙམ་སྤེལ་བ་ དང་། རྒྱབ་སྐྱོར་གྱི་རྔམ་སྟོན་ཁྲོམ་སྐོར་ཙམ་བྱེད་པ། མཆོད་འབུལ་བསྔོ་སྨོན་ཙམ་བྱེད་པ་དག ཡག་པོ་རེད། དགོས་མཁོ་ཡང་ཡོད་མོད། ཡིན་ནའང་ཐོལ་བརྒལ་ལ་གཏན་ནས་མི་བརྩི། བོད་ནང་གི་བོད་མི་ཚོར་མཁོ་བ་ནི་ཁ་ཕྱོགས་མངོན་གསལ་ཞིག་དང་། དངོས་ཡོད་དམིགས་འབེན་ཀྱི་ཐབས་ལམ་རེད།

གཉིས།

རྨ་ཆུའི་འགྲམ་ གྱི་རྒད་པོ་ཞིག་གིས་འདི་ལྟར་བཤད། དེ་སྔོན་རྨ་ཆུའི་སྟོད་རྒྱུད་དུ་འགྲོ་ལམ་མེད། ཤིང་མཁན་ཚོས་གཙང་ཆུ་བེད་སྤྱོད་ནས་ཤིང་སྡོང་བོར་འདྲེན་དགོས་ཀྱི་ཡོད། རྨ་ཆུའི་བྲག་རོང་གི་ས་ཆ་ཁ་ཤས་ཧ་ཅང་གུ་དོག་པ་དང་། ག་ས་གང་དུ་ཆུ་རྡོའི་ཁེངས། མཚམས་རེར་ཤིང་གདུང་རྡོར་ཐོགས་ཏེ་འགག་འགྲོ་གི་ཡོད། གཅིག་འགག་ཚར་དུས་དེའི་རྗེས་ཀྱི་ཤིང་རྣམས་བཀག་སྟེ་ཇི་ཙམ་སྤུངས་པ་དེ་ཙམ་གྱིས་ མང་དུ་འགྲོ་བ་དང་། མཐར་ཤིང་རྩིག་ཆགས་ནས་ཆུ་ལམ་འགག་འགྲོ། དེའི་སྐབས་སུ་ངེས་པར་ཤེས་དགོས་པའི་ཐབས་ལམ་གཅིག་ནི། རྙོག་འཛིང་མཐུད་མཚམས་ཀྱི་ཤིང་གི་ཁྲོད་ནས་འགག་རྩའི་ཤིང་དེ་རྙེད་ཐུབ་དགོས། དེ་ནི་ཤིང་རྩིག་གི་ཡན་ལག་རེད། ཡན་ལག་དེ་གཅིག་པུ་བཏུབ་ན། ཤིང་རྩིག་འུར་འུར་ཆོམ་ཆོམ་གྱིས་འཐོར་ཞིག་ཏུ་བུད་འགྲོ་ཞིང། ཆུས་ཁུར་ཏེ་ཕྱོགས་སུ་གྱེས་འགྲོ།
བོད་ཀྱི་དཀའ་གནད་ལས་བཀྲོལ་དགོས་ན། དེ་ལྟ་བུའི་“ཡན་ལག”འཚོལ་ ཐུབ་མིན་བལྟ་དགོས། དེ་ ངེས་གཏན་གྱི་ཐབས་ལམ་ཞིག་ཡིན་པར་ང་ཡིད་ཆེས་ཡོད། དམིགས་འབེན་ཅི་ཞིག་གི་འོག། ཐབས་ལམ་ཇི་ལྟ་བུ་ཞིག་འཛིན་དགོས། སྤྱི་ཚོགས་ཀྱི་རྣམ་པ་མི་འདྲ་བར། མཐར་གཏུགས་ན་ཐབས་ལམ་དང་བྱེད་སྟངས་མི་འདྲ་བ་ཡོད། བཀས་བཀོད་རྒྱུད་འཛིན། སྤྱི་ཚོགས་རིང་ལུགས། དབང་ཆ་ཕྱེད་བགོས། གྲོས་ཚོགས་ལམ་ལུགས་ཚང་མ་ཐབས་ལམ་མིན་པ་གཅིག་ཀྱང་མེད། ཐབས་ལམ་མེད་ན། དམིགས་འབེན་སྟོང་པ་ཡིན་ཞིང་། སྤྱི་ཚོགས་འགྱུར་ལྡོག་བཏང་ནུས་པའི་ཐབས་ལམ་གྱི་ནང་དུ་དམིགས་འབེན་འདུས་ཡོད། འཛམ་གླིང་ལ་ཐབས་ལམ་མཁོ། བོད་ཀྱི་དཀའ་གནད་སེལ་བར། ཐོག་མར་ཐབས་ལམ་དགོས།

གསུམ།

ངས་བཤད་མྱོང་། ཏཱ་ལའི་བླ་མས་བཏོན་གནང་བའི་མི་རིགས་ས་ཁུལ་རང་སྐྱོང་། གྲོང་ཚོ་རང་སྐྱོང་ནས་འགོ་བཙུགས་ཆོག ངས་ཚོད་དཔག་ལྟར་ན་དྭོགས་པས་ཁེངས་ཡོང་།“རྒྱ་མིས་བྱེད་ཐུབ་པ་དེ་བོད་མིས་བྱེད་ མི་ནུས།”“ཁ་བྲལ་ལ་ཁག་དཀྲིས་ཏེ་བཙན་གནོན་བྱ་སྲིད”སོགས་ རེད། གནད་དོན་ཐུག་ས་ནི། འདི་མི་བསྒྲུབ་པའི་རྒྱུ་མཚན་རེད་དམ། ངོ་རྒོལ་ཁྲོམ་སྐོར་བྱས་ཀྱང་དྲག་གནོན་བྱས་པ་མ་རེད་དམ། ཅི་ཡང་མ་ལས་ན་མ་གཏོགས་གཞན་དྲག་གནོན་བྱ་ངེས། ད་དུང་སྔོན་གྱི་སྐད་ཆ་དེ་རེད། རང་ལུས་མེར་བསྲེག་ལའང་མི་སྐྲག་ན། བཙན་གནོན་ལ་འཇིགས་སམ།
མི་ འགའ་ཞིག་གིས་བཤད་པ་ལྟར་ན།“ཝུ་ཁཱང་གི་རྣམ་པ་ལྟ་བའི་རེ་འདུན་དེར་གྲོང་ཚོ་ སྤྱིའི་བློ་སྟོབས་དགོས། རང་ལུས་མེར་བསྲེག་མི་རེ་རེའི་སྙིང་སྟོབས་རེད་”ཟེར། དེ་ལྟར་ན། ངོ་རྒོལ་ལ་མཉམ་ཞུགས་བྱས་པའི་མི་དམངས་བརྒྱ་སྟོང་མང་པོ། མང་ཚོགས་ཀྱི་སྙིང་སྟོབས་མ་རེད་དམ། དེའང་མེ་མདའ་ལ་གདོང་གཏད་དགོས་པ་རེད། གྲོང་ཚོ་རང་སྐྱོང་བཟོ་བ་དང་བསྡུར་ན་སྙིང་སྟོབས་ཆེ། གྲོང་ཚོ་རང་སྐྱོང་རྒྱ་ནག་གི་རྩ་ཁྲིམས་དང་མཐུན་ཅིང་། མིང་དོན་མཚུངས་ན་གཏམ་ལུགས་དང་མཐུན་པ་རེད། རང་ལུས་མེར་བསྲེག་དང་ངོ་རྒོལ་ཁྲོམ་སྐོར་བསྡུར་ན་ཉེན་ཁ་ཆུང་། སྙིང་སྟོབས་ཆེན་པོས་ཉེན་ཁ་ཆུང་བ་ཞིག་ལ་ཁ་གཏད་བཅོག་ན། ཅིའི་ཕྱིར་མི་ཆོག
དྭོགས་པ་གཞན་ཞིག་ ཡོད་པ་ནི། རྒྱ་གཞུང་གིས་བོད་མིའི་གྲོང་ཚོ་རང་སྐྱོང་ལ་ཁས་ལེན་བྱ་མི་སྲིད་པ་དེ་རེད། དེའང་བདེན་པ་རེད། ཡིན་ན་ཡང་གསལ་པོར་ཤེས་དགོས། གྲོང་ཚོ་རང་སྐྱོང་ཡང་སྙིང་སུས་ཁས་ལེན་པའི་སུའི་གནད་དོན་རེད། གྲོང་ཚོའི་དབང་ཆ། མཐར་གཏུགས་ན་གྲོང་མིའི་ཁས་ལེན་མིན་ལ་ཐུག་ཡོད་པ་ལས། སྲིད་གཞུང་གི་ཁས་ལེན་མིན་ལ་ཐུག་མེད། གྲོང་མིས་རང་ཉིད་ཀྱི་ཁས་ལེན་དེ་མཐར་བསྐྱང་ཐུབ་པ་ཡིན་ན། མཇུག་མཐར་ཕྱིར་འཐེན་བྱ་མཁན་དེ་སྲིད་གཞུང་ཡིན་ངེས་༼དཔེར་ན།ཀྭང་ཏུང་ཝུ་ཁཱང་ གྲོང་ཚོ།༽གྲོང་མིའི་རང་སྐྱོང་མི་རིགས་ཆེན་པོའི་གནད་དོན་དང་འབྲེལ་བ་མེད་ ཅིང་། རྒྱ་ནག་གི་རྩ་ཁྲིམས་དང་མཐུན་གྱི་ཡོད། གྲོང་དམངས་རང་སྐྱོང་གི་ཚབ་བྱེད་ནས་ངོ་རྒོལ་སྐད་འབོད་དང་རང་ལུས་མེར་བསྲེག་ བཏང་ན། སྲིད་གཞུང་ལའང་ཁེ་ཕན་མེད་པ་གཏན་ནས་མ་རེད། མཐའ་གཅིག་ཏུ་ཁས་ལེན་མི་བྱ་བར་མི་སྲིད།
ཡིན་དང་ཡིན། རང་སྐྱོང་ནི་ཉིན་རྒྱུན་འཚོ་བའི་ནང་གི་ལས་ཀ་ཞིག་རེད། ཁྲོམ་གཞུང་ལ་ངོ་རྒོལ་བྱས་ཏེ་མི་སེམས་སྒུལ་བ་དང་མི་མཚུངས། མེ་མདས་བརྒྱབ་ཏེ་མི་སེམས་དཀྲོགས་པའི་གནས་ཚུལ་ཐོས་དང་མི་འདྲ། གནད་འགག་ནི་དོན་དག་ཅི་ཞིག་བསྒྲུབ་ཀྱང་དེའི་འཕྲོས་ཀྱི་བྱེད་ཕྱོགས་ལ་བསམ་བློ་ བཏང་དགོས། མུ་མཐུད་དུ་མདུན་སྐྱོད་བྱ་མིན་ལ་མ་ལྟོས་པར། དམིགས་འབེན་དང་ཐག་ཉེ་བའི་རྗེས་ཀྱི་གོམ་པའི་སྤོ་ཕྱོགས་དགོས། ཡང་ནས་བསྐྱར་དུ་རྗེས་སུ་སྤོ་དགོས། ངོ་རྒོལ་ཁྲོམ་སྐོར་རྗེས་ཀྱི་ལས་འགུལ་དེ་ཅི་ཞིག་ཡིན། དྲག་ལས་རེད་དམ། ཡར་ལངས་རེད། གསར་བརྗེ་རེད། སྲིད་གཞུང་བརྗེ་བསྒྱུར་རེད་དམ། ཡོང་སྲིད་དམ། རང་ལུས་མེར་བསྲེག་གི་གོམ་པ་རྗེས་མ་དེ་ཅི་ཞིག་ཡིན། འཛམ་གླིང་གི་དོ་སྣང་བྱ་ཡུལ་དུ་འགྱུར་རྒྱུ་དེ་རེད་དམ། རྒྱལ་སྤྱིས་རྒྱ་ནག་ལ་གནོན་ཤུགས་སྤྲད་རྒྱུ་དེ་རེད། བོད་ཀྱི་གནད་དོན་དེ་དག་ལ་བརྟེན་ནས་ཐག་བཅད་ཐུབ་བམ། སྲིད་དམ།
གྲོང་ཚོ་རང་ སྐྱོང་རྗེས་ཀྱི་གོ་རིམ་ཧ་ཅང་གསལ་པོ་རེད། རང་སྐྱོང་རྒྱུན་བསྐྱང་རྒྱུ་དེ་ཡིན། རང་སྐྱོང་ནི་དམིགས་ཡུལ་རེད། གྲོང་མི་རང་ཉིད་ལ་དབང་བ་ལས་མི་གཞན་ཞིག་གིས་གནང་སྦྱིན་གྱི་མཇུག་འབྲས་ཤིག་ མིན། གྲོང་ཚོ་རང་སྐྱོང་མངོན་ཏུ་གྱུར་ན། གྲོང་ཁུལ་དེའི་ནང་གི་རིག་གཞུང་སྲུང་སྐྱོབ། ཆོས་ལུགས་དང་ཁོར་ཡུག དེ་ལྟ་བུའི་གྲོང་པ་མང་དུ་སོང་ན། སྲུང་སྐྱོབ་བྱ་སའི་སྒྲོམ་གཞི་མུ་མཐུད་རྒྱ་ཆེར་འགྲོ་བ་དང་། འགོ་གྲོང་ཚོ་རང་སྐྱོང་ནས་ས་ཁུལ་རང་སྐྱོང་གི་རྣམ་པ་མི་འདྲ་བ་ཙམ་རེད། གྲོང་ཁུལ་༼ཤྭང་༽གཅིག་ནང་གི་གྲོང་ཚོ་མང་པོའི་རང་སྐྱོང་མངོན་དུ་གྱུར་ན། གྲོང་པའི་འགོ་ཁྲིད་འོས་འཕེན་ཏེ་གྲོང་ཁུལ་གྱི་རྒྱུན་ལས་ཁང་བཙུགས། གྲོང་ཁུལ་རང་སྐྱོང་འཛུགས། རྫོང་གཅིག་ནང་གི་གྲོང་ཁུལ་མང་པོར་རང་སྐྱོང་མངོན་ཏུ་གྱུར་མཚམས། གྲོང་ཁུལ་གྱི་འགོ་ཁྲིད་བདམས་ཏེ་རྫོང་རྒྱུན་ལས་ཁང་འཛུགས་ཏེ་རྫོང་རང་སྐྱོང་ བསྒྲུབ་པ་དང་། མཐར་མི་རིགས་ས་ཁུལ་རང་སྐྱོང་མངོན་ཏུ་འགྱུར་བར་བྱ་ཆོག
གལ་ ཏེ་རྡ་རམ་ས་ལར་འབོད་སྐུལ་འདྲ་ཞུ་རྒྱུ་ཡོད་ན། བོད་ནང་གི་བོད་མི་ཚོས་སྔོན་ནས་ལོ་སར་མི་གཏོང་བ་ལྟ་བུ་དག་ཡིན་མི་འོས། གོན་པ་ཅི་ཞིག་གོན་དགོས་མིན་དང་མཚོན་རྟགས་ཅི་ཞིག་འདོགས་དགོས་མིན་སོགས་སྔར་ ལྟར་བསྐྱར་བཤད་དང་སླར་ཟློས་དགོས་པ་མ་རེད། དེ་དག་ཐམས་ཆད་རྣམ་པ་ཙམ་རེད། སྔོན་དུ་ཐེངས་ཅི་ཙམ་བྱས་ཟིན། ད་དུང་རྒྱ་ནག་སྲིད་གཞུང་དང་ཁ་གཏད་དུ་གྱུར་པ་དང་། ཕྱི་རྒྱལ་ནས་བོད་ནང་དུ་ངན་སྐུལ་བྱས་པ་ཡིན་པའི་སྐྱོན་བརྗོད་བྱས་ཡོད། ངས་ལྟས་ན། འདི་ལྟ་བུའི་འབོད་སྐུལ་གྱིས་བོད་ནང་གི་གྲོང་ཚོ་རེ་རེར་བཞིན་རང་སྐྱོང་མངོན་ ཏུ་འགྱུར་ཐུབ་ན། མིག་སྔའི་དཀའ་གནད་མང་པོ་ཞིག་ལས་ཐར་ཐུབ། རྡ་རམ་ས་ལའི་ངོས་ནས་དེའི་སྐོར་ལ་ཞིབ་འཇུག་ལས་དོན་འཛུགས་ཏེ་ཚོད་ལྟ་བྱ་ཆོག ད་དུང་མི་སྣ་གསོ་སྐྱོང་བྱས་ཏེ་བོད་ནང་དུ་བཏང་དགོས། བྱེད་ཐབས་ལ་མ་ལྟོས་པར། ཚང་མས་རྒྱ་ནག་རང་ཉིད་ཀྱི་རྩ་ཁྲིམས་དོན་ཐོག་ཏུ་འཁྱོལ་རྒྱུའི་ཆེད་དུ་རོགས་ བྱེད་པ་དང་། རྒྱ་ནག་སྲིད་གཞུང་དང་མཉམ་འབྲེལ་བྱེད་པ་ལས་ཁ་གཏད་གཅོག་པ་མ་རེད། པེ་ཅིང་དང་བོད་ཁུལ་སྲིད་གཞུང་གི་མཐུན་འགྱུར་ཡིན་པ་ལས་ཁ་གཏད་མ་རེད། དེར་བརྟེན། ད་ནས་དེ་ལྟར་གཡས་གནོད་གཡོན་ཕོགས་ཀྱི་ཀར་ཀོར་ནར་འགྱངས་བཏང་དགོས་དོན་མེད། ཏཱ་ལའི་བླ་མའི་དབུ་མའི་ལམ་ཀྱང་གོ་རིམ་དེར་བརྟེན་ནས་དོན་དུ་ཁེལ་བར་བྱ་དགོས།
ཡིན་ དང་ཡིན། མི་སུས་ཀྱང་རྒྱ་ནག་སྲིད་གཞུང་གི་དྲིན་དུ་ཚོར་བར་རེ་མི་སྲིད་ཀྱང་། རྒྱ་ནག་མི་དམངས་ཀྱིས་གདུང་སེམས་མཉམ་བསྐྱེད་དང་རྒྱབ་སྐྱོར་བྱ་ངེས་ཡིན། རྒྱུ་མཚན་ཁོང་ཚོས་ཀྱང་གཅིག་མཚུངས་ཀྱི་རང་སྐྱོང་བརྩད་ལེན་བྱེད་བཞིན་པ་དང་། མ་འོངས་པའི་རྒྱ་ནག རྒྱ་ནག་མི་དམངས་ལ་དབང་། གལ་ ཏེ་༢༠༠༨ལོའི་རྗེས་ནས་འགོ་བཟུང་ཏེ་འདི་ལྟར་བྱས་ཡོད་ན། དེ་རིང་གི་རྣམ་པ་འདི་ལྟར་ལྡབ་སྐྱོར་རྒྱག་མི་སྲིད།འོན་ཀྱང་གལ་ཏེ་དེ་རིང་ནས་ ད་དུང་འགོ་མ་བཙུགས་ན། རྗེས་མར་རྒྱུན་མཐུད་དེ་བསྐྱར་ཟློས་ཡོང་ངེས།

༢༠༡༡lལོའི་2པའི་ཚེས་8ལ།

མ་རྩོམ་ཡོང་ཁུངས། http://woeser.middle-way.net/2012/02/blog-post_3210.html#comment-form
བསྒྱུར་ མཁན་གྱི་མཆན། རྒྱ་ཡིག་གི་མ་རྩོམ་ཁ་བྱང་“བོད་ལ་ཐབས་ལམ་མཁོ”ཞེས་འཁོད་འདུག་མོད། ཡིན་ནའང་ཡིག་བསྒྱུར་བས་གསལ་ཁ་དོད་ཕྱིར་“བོད་ཀྱི་དཀའ་གནད་སེལ་བར་ཐབས་ལམ་ མཁོ”ཞེས་བསྒྱུར།

ཝང་ལི་ཞུང་།
ཟླ་བ་གཞོན་ནུས་བསྒྱུར།
གཅིག
ང་རང་ལུས་མེར་ སྲེག་བཏང་ བའི་བོད་མི་རྣམས་ལ་མཐའ་གཅིག་ཏུ་རྒྱབ་སྐྱོར་ཡོད། རང་ལུས་མེར་སྲེག་གཏོང་མཁན་དག་གི་དམིགས་ཡུལ་མངོན་འགྱུར་ངེས་པར་དུ་འབྱུང་མི་ སྲིད་པ་དང་དམིགས་ཡུལ་ལ་སླེབས་ཐུབ་མིན་མི་ངེས་ཀྱང་། ཁོང་ཚོས་གསལ་བོར་མཁྱེན་ཡོད་མེད་གང་ལྟར། ཁོང་ཚོ་སྤྱི་ཡོངས་ཀྱི་ནུས་པ་དེ་ཁོང་ཚོས་མི་རིགས་ཤིག་གི་སྙིང་སྟོབས་ལ་སྐུལ་ ལྕག་བཏང་བ་དེའི་སྟེང་ལ་བྱུང་ཡོད་པ་རེད། སྙིང་སྟོབས་ནི་རིན་ཐང་བྲལ་བའི་ཐོན་ཁུངས་རིགས་ཤིག་ཡིན། ཐོན་ཁུངས་དེ་དམིགས་བསལ་གྱིས་དབང་ཆུང་བའི་ཕྱོགས་ནས་བཤད་ན། སྙིང་སྟོབས་དེ་ཏག་ཏག་གཉོམ་ཆུང་བཙན་པོ་ལས་རྒྱལ་བའི་གནད་འགག་ཏུ་འགྱུར་བ་རེད། རང་ལུས་མེར་སྲེག་གཏོང་བ་ལ་སྙིང་སྟོབས་ཧ་ཅང་ཆེན་པོ་ཞིག་དགོས་པ་རེད། བོད་ནང་གི་གནམ་འོག་ཧད་དུ་འཇུག་པའི་བོད་མི་བཅུ་དྲུག་པོའི་སྙིང་སྟོབས་དེ། ཨ་མདོ་མགོ་ལོག་གི་བསོད་བྷ་རིན་པོ་ཆེས་སྐུ་ལུས་ཞུགས་འབུལ་གནང་བ་དང་སྦྲགས་ཏེ་ རྩེ་མོའི་རྩེ་མོར་སླེབས་པ་རེད། མི་རིགས་ཀྱི་སྙིང་སྟོབས་ལ་སྐུལ་ལྕག་གཏོང་བའི་ཕྱོགས་ནས་བཤད་ན། བདག་གིས་ད་ནི་དེ་གྲུབ་ཟིན་པར་འདོད།
ད་ལྟའི་གནད་དོན་ ནི་འདི་ ལྟ་བུའི་རིན་ཐང་བྲལ་བའི་སྙིང་སྟོབས་འདིས་ཅི་ཞིག་བྱེད་དགོས་སམ་ཞེས་པ་དེ་ཆགས་ ཡོད། མུ་མཐུད་དེ་རང་ལུས་མེར་སྲེག་གཏོང་ངམ། སྙིང་སྟོབས་དེ་མེ་ཡིས་བསྲེག་ན་ངས་ད་ནས་བཟུང་དེ་ཆུད་ཟོས་རེད་བསམས། སྔོན་གཤེགས་དཔའ་བོ་དག་གིས་སྐུལ་ལྕག་གནང་བའི་སྙིང་སྟོབས་དེ་གྲུབ་འབྲས་ཐོན་པ་ ཞིག་ཏུ་བྱས་པ་ཡིན་ན་དེ་ནི་ད་གཟོད་ཁོང་རྣམ་པ་ཚོའི་རེ་བ་རེད། དེ་ནི་ད་གཟོད་ཁོང་ཚོའི་རིན་ཐང་ཡོད་ས་དེ་རེད།
གཉིས།
ནམ་ཡང་གཞན་ལ་འཚེ་ བ་མི་ བྱེད་པའི་ཕྱོགས་ནས་བལྟས་ན། རང་ལུས་མེར་སྲེག་གཏོང་མཁན་དག་གིས་འདི་ལྟར་རང་ལུས་བློས་གཏོང་ཕོད་པ་སྟེ་རང་ ཉིད་ཁོ་ན་མེད་བརླག་ཏུ་གཏོང་བ་འདི། འཚེ་མེད་ཞི་བའི་སྙིང་སྟོབས་ཀྱི་རྩེ་མོར་ཐོན་འདུག་ཅེས་བརྗོད་ཆོག་པར་འདོད། འོན་ཀྱང་། རང་ལུས་མེར་སྲེག་གཏོང་བ་དེ་ཡང་འཚེ་བ་རེད། དེར་ཙམ་མ་ཟད། འཚེ་བ་ཧ་ཅང་ཚབས་ཆེན་རེད། ཡིན་ནའང་འཚེ་བ་བྱེད་ས་དེ་རང་ཉིད་ཡིན་པ་རེད།
རང་ཉིད་ལ་འཚེ་བ་བྱེད་པ་ ནི་རེ་ཆད་ཀྱི་ངོ་རྒོལ་ལས་བྱུང་བ་དང་ཡང་ན་རྩིས་ཐང་ལ་སྡིག་པ་མིག་བཙུམ་གྱིས་ སྲུང་སྐྱོབ་བྱས་པ་རེད། གལ་ཏེ་ཕན་ནུས་འབྱུང་བ་ཞིག་འདོད་ན། གནྡྷིས་“ང་ཚོས་མྱངས་པའི་སྡུག་བསྔལ་ཆེས་མི་བཟད་པ་བརྒྱུད་ནས་སྲིད་གཞུང་ལ་ཤུགས་རྐྱེན་སྤྲད་ཆོག་”ཅེས་གསུངས་པ་དང་། མཱ་ཋིན་ལུ་ཐིར་ཁཱིན་གྱིས་“ང་ ཚོས་རང་ཉིད་ཀྱིས་སྡུག་བསྔལ་སྲོན་པའི་ནུས་པས་ཁྱོད་ཚོས་སྡུག་བསྔལ་བཟོ་བའི་ ནུས་པ་ལ་འགྲན་རྒྱུ་ཡིན། ང་ཚོས་རང་ཉིད་ཀྱིས་སྡུག་བསྔལ་སྲོན་པའི་ནུས་པས་ཁྱོད་ཚོའི་འཁོན་སེམས་ཟད་དུ་ འཇུག་རྒྱུ་ཡིན། ང་ཚོས་རང་ཉིད་ཀྱིས་སྡུག་བསྔལ་སྲོན་པའི་ནུས་པས་ཁྱོད་ཚོར་སྙིང་རྗེ་སྐྱེས་སུ་ འཇུག་རྒྱུ་ཡིན།”ཞེས་གསུངས་མྱོང་།
འདི་ལྟ་བུའི་རེ་ འདོད་ འགྲུབ་པ་ལ། སྔོན་འགྲོ་ནི་སྙིང་རྗེ་ཡོད་དགོས་པ་རེད། སྲིད་དབང་སྒེར་འཛིན་པའི་འཕྲུལ་ཆས་ལ་རྣོ་ལྕགས་རང་བཞིན་གྱི་གྲུབ་སྟངས། ཡ་ང་སྙིང་རྗེ་མེད་པའི་གཏན་ཚིགས་དང་དཔོན་ངན་དག་གི་ཁེ་ཕན་ལས་ཅི་ཡང་མེད། སྔོན་མར་བྱིས་པ་སྟོང་ཕྲག་འགས་གནམ་བདེ་སྒོ་མོ་ཆེའི་ཐང་ཆེན་དུ་འཆི་བ་ལ་ཐུག་ པའི་ཟས་བཅད་ངོ་རྒོལ་བྱས་ཀྱང་། སུ་ཞིག་གིས་དེའི་སྙིང་རྗེ་རིག་མྱོང་ཡོད་དམ།
དེ་སྔའི་འཚེ་མེད་ ཞི་བའི་ བཀག་རྒྱ་ནི་འདི་ན་ཡོད་པ་སྟེ། འདིའི་མཇུག་འབྲས་ཅི་འདྲ་ཞིག་འབྱུང་མིན་འགོག་རྒོལ་བྱེད་མཁན་གྱི་ཕྱོགས་ལ་རག་ མི་ལས་པར་དབང་འཛིན་པའི་ཕྱོགས་ལ་རག་ལས་པ་རེད། འགོལ་རྒོལ་བྱེད་མཁན་གྱི་ཕྱོགས་ནས་གནོན་ཤུགས་སྤྲོད་པའི་ནུས་པ་གཅིག་བུ་ཐོན་ ཐུབ། བཙན་དབང་གིས་ལམ་ཁ་མ་བྱིན་ན་གོང་འཕེལ་དུ་འགྲོ་ས་ཡོད་པ་མ་རེད། དེ་བས་མིག་སྔར་གྱི་བོད་དེ་དཀའ་ངལ་གྱི་ཁྲོད་དུ་ལྷུང་ངེས་པ་ཞིག་ཡོད།
གསུམ།
དཀའ་ངལ་ལས་བུད་ རྗེས། ཁ་ཕྱོགས་གང་ན་ཡོད་ཅེས་པ་འདི་ངས་བསམས་ན་ཐོག་མར་ལན་རྒྱག་དགོས་པ་དེ་རེད་འདོད། ཁ་ཕྱོགས་མེད་ན་མུན་ནག་ནང་ལ་མགོ་བཏང་བ་ལྟ་བུ་རེད། རང་ལུས་མེར་སྲེག་བཏང་བའི་དཔའ་རྒོད་དག་ཡིན་པའི་ཆགས་བཞག་ནའང་དེས་མི་ལ་ཕལ་ཆེ་ བར་ཡིད་ཆད་དུ་འཇུག་ངེས་ལ། རང་ལུས་མེར་སྲེག་ལ་ཕྱོགས་ཡོངས་ནས་གདོང་གཏད་དུས། སེམས་ཁམས་འཚབ་བེ་འཚུབ་བེ་ཆགས་པ་ལས་གཞན་གནས་ཚུལ་རང་ངོས་ཀྱི་ཐོབ་ཤོར་ནི་ཅི་ ཡིན་འདི་ཡིན་མི་ཤེས་པ་ཞིག་འདུག
རང་ལུས་མེར་སྲེག་ གཏོང་ མཁན་དག་ལ་སྙིང་སྟོབས་འདུག་ཀྱང་བློ་རིག་མི་འདུག་ཅེས་ན་དྲང་བདེན་མ་རེད། བློ་རིག་ནི་མི་ཚེ་འཁྱོལ་ཐབས་བྱེད་པའི་ཐབས་རྩལ་དེ་མ་ཡིན་པར། དེ་ནི་བོད་དཀའ་ངལ་གྱི་ར་བ་ལས་ཕྱི་ལ་ཁྲིད་པའི་མིག་རྒྱང་རིང་བོ་དེ་རེད། དེ་ནི་མི་སེར་དཀྱུས་མ་ཞིག་གིས་ཁུར་དུ་ལེན་རུང་བ་ཞིག་དང་ཁུར་དུ་ལེན་ཐུབ་པ་ ཞིག་མ་རེད་ལ། སྲིད་ཀྱི་ཕྱག་ལས་མཚམས་བཞག་ཟིན་པའི་ཏཱ་ལའི་བླ་མ་བློ་རིག་ཡོད་ཚད་ཀྱི་མགོ་ ཁུངས་ལྟ་བུ་ཞིག་ལ་བརྩིས་ན། དེ་ནི་འགན་མ་ཁུར་བ་རེད། ཏཱ་ལའི་བླ་མས་འཚེ་མེད་ཞི་བའི་རྩ་དོན་དང་དབུ་མའི་ལམ་ཕྱོགས་གཏན་འཁེལ་གནང་ཟིན་ པ་རེད། དེ་ཇི་ལྟར་མངོན་འགྱུར་བྱེད་མིན་ཆབ་སྲིད་པ་རྣམས་ཀྱིས་བློ་རིག་བཏོན་ན་འོས་པ་ ཞིག་ཡིན།
མིག་སྔར་ད་དུང་ བློ་རིག་ འདི་ལྟ་བུ་ཞིག་རིག་སར་མི་འདུག རྒྱ་ནག་གི་ཕྱོགས་ནས་ཁ་ཁོག་མི་མཐུན་པ་དང་། བོད་ཀྱི་ཕྱོགས་ནས་གལ་ཏེ་བཙན་བྱོལ་བོད་གཞུང་འཐུས་ཚབ་ཡིན་པའི་ཆགས་བཞག་ན་ཡང་། གསལ་བསྒྲགས་སྤེལ་བ་མ་གཏོགས་ཅི་ཞིག་བྱེད་འོས་མིན་ཤེས་འདུག་པ་ཞིག་ཏུ་མཐོང་མ་ སོང་།
དཔའ་ངར་ལྡན་པའི་ བོད་མི་ རྣམས་ལ། ཁོང་ཚོས་ཅི་ཞིག་བྱེད་རུང་མིན་བཤད་རོགས། ཅི་ཞིག་བྱེད་རུང་བ་དང་ཅི་ཞིག་བྱེད་ཆོག་པ་ཤེས་སོང་ན། ཁོང་ཚོ་མུ་མཐུད་དུ་གསོན་པོར་འདུག་པ་ལས། ཡིད་སེམས་གདུང་བར་བྱེད་པའི་རང་ལུས་མེར་སྲེག་གི་ལས་ཀ་དེ་སྨྱན་བྱེད་དག་གི་ སྐད་ཅིག་མའི་དུས་ཚོད་དེ་ལ་བརྗེ་ནི་མ་རེད།
བཞི།
ཏཱ་ལའི་བླ་མས་ ཐུགས་གཏན་ འཁེལ་བའི་དམིགས་ཡུལ་ནི་བོད་ལ་མིང་དོན་མཚུངས་པའི་རང་སྐྱོང་འཐོབ་རྒྱུ་དེ་རེད། གལ་ཏེ་མགོ་མ་ནས་མི་རིགས་ས་ཁུལ་གྱི་རང་སྐྱོང་འདོད་པ་ཡིན་ན། རྒྱ་ནག་སྲིད་གཞུང་གིས་སྙིང་རྗེ་བསྒོམ་རྒྱུར་བརྟེན་པ་ཁོ་ན་ལས་ཐབས་གཞན་མེད། སྔོན་ཆད་འདིའི་ཆེད་དུ་འབད་བརྩོན་བྱས་པ་ཐ་དག་གིས་དེ་ནི་སྟོང་བསམ་ཡིན་པ་བདེན་ དཔང་བྱས་པ་རེད།
ཏཱ་ལའི་བླ་མར་དགོས་པ་དེ་ རྒྱ་ནག་གི་རྩ་ཁྲིམས་སྒྲོམ་གཞིའི་ནང་གི་རང་སྐྱོང་དེ་ཡིན་ན། རྒྱ་ནག་གིས་སྔོན་ནས་སྡེ་དམངས་རང་སྐྱོང་གི་ལམ་ལུགས་ལག་བསྟར་བྱེད་ཀྱིན་ཡོད་ པས། བོད་ཀྱི་མིང་དོན་མཚུངས་པའི་རང་སྐྱོང་རྩོད་ན། ཅིའི་ཕྱིར་བོད་མིའི་གྲོང་སྡེ་རེ་རེ་ནས་བཟུང་སྟེ་མགོ་བཙུགས་མི་ཆོག་པ་ཡིན་ནམ།
མིང་དོན་མཚུངས་ པའི་རང་ སྐྱོང་ནི་དངོས་གནས་བྱས་ན་ཆེས་དམའ་རིམ་ནས་མགོ་འཛུགས་དགོས་པ་ཡིན། འོག་རིམ་ནས་གོང་རིམ། རིམ་པ་རེ་རེ་བཞིན་རང་སྐྱོང་བྱས་ཏེ་མཐའ་མར་མི་རིགས་ས་ཁུལ་རང་སྐྱོང་བྱེད་ཐུབ་ པ་ཡིན། དམའ་རིམ་གྱི་རང་སྐྱོང་གི་མགོ་རྩོམ་ཐུབ་པ་ཡིན་ན། མི་རིགས་ས་ཁུལ་རང་སྐྱོང་གི་མ་འོངས་པ་ཞིག་ལ་ཁ་ངེས་པར་ཕྱོགས་ཐུབ་པ་ཡིན།
གྲོང་སྡེ་རང་ སྐྱོང་། སྡེ་དམངས་དཀྱུས་མ་རེ་རེ་མཉམ་ཞུགས་བྱས་པ་བརྒྱུད་མངོན་དུ་འགྱུར་ཐུབ། འདིས་མི་དམངས་རང་འགུལ་བ་བྱེད་དུ་བཅུག་སྟེ། མུ་མཐུད་དེ་མགོ་ཁྲིད་ཀྱི་སྐུལ་མ་བྱེད་ཡུལ་དུ་གྱུར་ཏེ་ཡུན་རིང་ཞིང་གྲུབ་ འབྲས་མེད་པའི་ཞི་མོལ་ལ་སྒུག་དགོས་མི་ཡོང་ལ། ཡང་ན་མེ་མདའི་འོག་ནས་རྔམ་སྟོན་དང་ཐ་ན་མེའི་གཞུང་དུ་རང་ལུས་སྲེག་པ་སོགས་བྱས་ ཏེ་མུ་མཐུད་དེ་མཐོ་རིམ་ལ་རྒྱ་རྡོ་སྣོན་དགོས་དོན་ཡོད་པ་མ་རེད།
ལྔ།
ངས་བལྟས་ན། བོད་དཀའ་ངལ་གྱི་ར་བ་ལས་བརྒལ་བ་ལ་སྡེ་དམངས་རང་སྐྱོང་ནས་མགོ་འཛུགས་དགོས་འདུག་སྙམ།
སྡེ་དམངས་རང་སྐྱོང་ལ་ མཚོན་ནས་བཤད་ན། ཐོག་མར་མི་རིགས་ཀྱི་གནད་དོན་ལ་དོ་ཕོག་མི་འབྱུང་བར། འགྲོ་བ་མིའི་ཐོབ་ཐང་དང་། གཏེར་ཁ་སྔོན་འདོན། ཁོར་ཡུག་སྲུང་སྐྱོབ། ཆོས་ལུགས་བྱེད་སྒོ་ཁག་ལ་སོགས་པའི་གནད་དོན་ལ་དམིགས་པའི་བདག་དབང་སྲུང་འཛིན་(དབང་སྲུང)ཡིན། འདི་མི་རིགས་རིང་ལུགས་ཀྱི་འགལ་བ་དེ་ལ་གཡོལ་ཐུབ་པར་ཡང་ཕན་པ་ཡོད། རྒྱ་ནག་གིི་དམངས་ཁྲོད་དབང་སྲུང་ལས་འགུལ་དང་མཉམ་འབྲེལ་བྱས་ཏེ་རྒྱ་ནག་གི་དབང་ སྲུང་ལས་འགུལ་གྱི་ཆ་ཤས་ཤིག་ཆགས་པ་བྱས་ན། དེ་ནས་རྒྱ་ནག་མི་དམངས་ཀྱི་རྒྱ་ཁྱབ་ཀྱི་རྒྱབ་སྐྱོར་ཐོབ་ངེས་རེད།
ཀོའང་ཏུང་ཝུའུ་ ཁན་ནི་མིག་ དཔེར་འཇོག་ས་གསར་བ་ཞིག་ཡིན། སྡེ་མིས་མཉམ་དུ་དབང་འཛིན་ལས་ཁུངས་ཀྱི་དྲུང་ཡིག་དང་སྡེ་བའི་མགོ་དཔོན་བྲོས་ བྱོལ་དུ་ཕྱིན་པའི་རྗེས་བསྙེགས་ཤིང་། ཁྱིམ་རྒྱུད་རེ་རེ་ནས་འཐུས་མི་རེ་བདམས་ཏེ། དེ་ནས་ཁྱིམ་རྒྱུད་འཐུས་མིའི་ཁྲོད་ནས་སྡེ་བའི་ལས་འཛིན་ལྷན་ཚོགས་བདམས། འདི་ལྟ་བུའི་རང་སྐྱོང་སྒྲིག་འཛུགས་ཀྱིས་སྡེ་བའི་གནད་དོན་དག་གོ་རིམ་ལྡན་པ་ ཞིག་ཏུ་བྱེད་ཐུབ་ཡོད་པར་མ་ཟད། སྲིད་གཞུང་གི་དྲག་གནོན་དང་དམག་མིས་བསྐོར་དུས་སྡེ་མིའི་རང་གཅུན་དང་གྲོང་ སྡེའི་ས་ཁུལ་གྱི་གོ་རིམ་སོགས་ལ་འགན་ལེན་ཡང་བྱེད་ཐུབ་ཡོད། མཐའ་མར་དབང་འཛིན་ལས་ཁུངས་དང་ཞི་མོལ་བརྒྱུད་དེ། ཞང་ཀང་སྨྱན་བྱེད་རྒྱུད་ལམ་ཁག་གིས་བསྟོད་བསྔགས་ཐོབ་སའི་“གཞུང་ཕྱོགས་ནས་ཐོག་དང་བོར་ཁས་ལེན་བྱས་པའི་དབང་སྲུང་དམངས་འདེམས་སྒྲིག་འཛུགས་”སུ་གྱུར།
བོད་ཀྱི་སྡེ་མི་དང་སྡེ་བར་འདི་དང་འདྲ་བའི་ལེགས་འགྲུབ་འབྱུང་ངམ་མི་འབྱང ? ཝུའུ་ ཁན་ལ་ཡོད་པའི་ཆ་རྐྱེན། བོད་ཀྱི་གྲོང་སྡེ་དག་ལའང་མི་ཉུང་བ་ཞིག་ཡོད། སྡེ་བ་གཅིག་ལ་རྒྱལ་ཁ་ཐོབ་སོང་ན། བོད་ལ་དར་ཆ་ཡོད་སོང་བ་རེད། སྡེ་བ་བཅུ་ལ་ལེགས་འགྲུབ་བྱུང་ན། མཚན་གུང་ལ་སྐྱ་མདའ་བཏང་བ་རེད། སྡེ་བ་བརྒྱ་ལ་ལེགས་འགྲུབ་བྱང་ན། མིང་དོན་མཚུངས་པའི་མི་རིགས་ས་ཁུལ་རང་སྐྱོང་ནི་རྒྱང་རིང་གི་གནམ་མཐའ་ནས་མིག་ མདུན་དུ་སླེབས་འོང་གི་རེད།
བཤད་ནས་འདིར་ སླེབས་དུས། རྒྱ་མིས་བྱས་ཆོག་པ་བོད་པས་བྱས་ཆོག་གི་མ་རེད་དང་། ཁ་བྲལ་བའི་ཉེས་མིང་བཀལ་ཏེ་དྲག་གནོན་བྱེད་པ་རེད་ལ་སོགས་པ་ལ་སོགས་པའི་རྣར་ བྱང་བའི་དོགས་འདྲི་དེ་ངེས་པར་སླེབས་འོངས་པར་བདག་ལ་ཡིད་ཆེས་ཡོད། དོགས་འདྲི་འདི་རིགས་ལ་ངས་ད་བར་དུ་ཉན་ནས་ཡོང་བ་ཡིན། ཐེངས་མ་གང་མང་ཞིག་ལ་ཉན་མྱོང་། འདི་ལ་ལན་ཚིག་རྐང་གཅིག་གིས་བརྒྱབ་ཆོག་སྟེ། རང་ལུས་མེར་སྲེག་གཏོང་རྒྱུར་ཡང་མི་སྐྲག་ན། ད་ཅི་ཞིག་ལ་སྐྲག་དགོས་སམ?

འབྲེལ་ཐག
བདག་དབང་སྲུང་འཛིན་ལ་འདི་ནས་གཟིགས།
ཝུའུ་ཁན་དོན་རྐྱེན་ལ་གཟིགས་ན་འདི་ནོན།
མ་རྩོམ་ལ་འདི་ནས་གཟིགས།