རྙོག་གླེང་གི་འབྱུང་རྩ་རེག་གླེང་དང་། དོན་དམ་ཆིག་སྒྲིལ་འབོད་སྐུལ།  

རིག་འབྱུང་བློ་བཟང་ཆོས་འབྱོར། 

བཙན་བྱོལ་བོད་མིའི་བྱུང་རབས་ལ་བལྟས་ཚེ་བོད་ནས་འབྱོར་མ་ཐག་འཛམ་གླིང་གི་གནས་ཚུལ་མ་མཐོང་བ་དང། དུས་ཀྱི་འགྱུར་འགྲོས་དང་ལེན་བྱེད་འདོད་མེད་པ་ཅི་རིགས་ཀྱིས་༧གོང་ས་མཆོག་གི་རླབས་ཆེན་དགོངས་གཞིར་ལམ་དུ་ལྷོང་རྒྱུར་བར་ཆད་བྱས་ཡོད་ནའང། བར་ཆད་དེ་དག་ལྷག་བསམ་རྨ་མེད་པ་ལས་བྱུང་བ་ཡིན་སྟབས་སྤྱི་ཚོགས་ལ་བརྡབ་གསིག་ཆེན་པོ་བྱུང་མེད་ཅེས་ན་མི་ཆོག་པ་མེད། ཡིན་ནའང། བར་ལམ་ཞིག་ནས་བཙན་བྱོལ་ས་ཐོག་གི་སྡོད་སའི་གནས་དྲོ་ཟ་རྒྱུའི་ཟས་ཞིམ་ཏེ་གྲོད་ཁོག་ཅུང་ཙམ་རྒྱགས་ཤིང། དཀའ་སྡུག་སྐྱོ་གདུང་གི་སྨྲེ་སྔགས་ཀྱང་རྣ་བར་སྒྲུང་གི་མཚུངས་ཟླར་གྱུར་སོང་བ་དང་མཉམ། རིམ་པར་མང་གཙོ་དང་ཆབ་སྲིད། ད་དུང་ཁྲིམས་དང་ཐོབ་ཐང་ཟེར་བ་སོགས་ཀྱི་ཚིག་འདི་རྣམས་གོ་ཡོང་སྐབས། བོད་མི་ཉུང་ཤས་ཤིག་གིས་སྔ་རྒྱུད་དར་རྒུད་ཀྱི་གནས་བབ་བརྗེད་སོང་བ་ལྟ་བུའམ། ཡང་ན་སུ་གང་ལའང་བསྟུན་མི་དགོས་པར་རང་ཉིད་ཀྱི་རང་ཤེད་མཁྲེགས་གཟུགས་ཀྱིས་འཛིན་རྒྱུར་དང་དོད་ཤིན་ཏུ་ཆེན་པོ་བྱས་ཤིང། དེའི་ཆེད་དུ་ཕྱོགས་ཁག་སྒྲིལ་ཏེ་བསམ་བཞིན་ཤེས་བཞིན་ཁྱད་གསོད་ཟུར་འབུད་ཀྱི་རྣམ་པ་ཤུགས་ཆེན་པོར་བསྟན་པས། རྒྱ་ནག་གཞུང་གི་ཆེས་མི་འདོད་པའི་ཆོལ་གསུམ་ཆིག་སྒྲིལ་གྱི་གཞི་རྩའང་རྨ་ཁ་བཏོད་ཡོད་པ་རེད། བསམ་ཕྱོགས་འདི་དག་ལ་ཆེད་མངགས་ཞིབ་འདེད་མཐའ་དཔྱོད་བྱས་པ་ཡིན་ན། བོད་སིལ་བར་འཐོར་རྗེས་ཀྱི་མི་ལོ་བརྒྱ་ཕྲག་འགའི་རང་ཤེད་བག་ཆགས་མུ་མཐུད་འཁྱོག་ལམ་དུ་སོང་བ་དང། རྒྱ་བསྐྱེད་རིང་ལུགས་ཀྱི་གཡའ་མ་དག་པའི་དབང་གིས་རྒྱུ་མཚན་ཚད་ལྡན་ས་ཆེན་པོ་དང་གནམ་སྔོན་པོ་ལྟར་མདུན་དུ་བསྟར་ཡང། བྱས་པར་གོམས་པའི་བློའི་རྨོངས་མུན་གྱི་འཐོམས་ལས་མ་གྲོལ་བ་ནི་ཕལ་ཆེར་ཐག་བཅད་ཆོག་པ་ཞིག་རེད་འདོད། བོད་ཀྱི་ཉེ་བའི་བཞུད་ལམ་ཀྱག་་ཀྱོག་ལ་བལྟས་པ་ཡིན་ན། ༧གོང་ས་ཆེན་པོ་ན་རིམ་དང་ལྷག་པར་༧བཅུ་བཞི་པ་ཆེན་པོ་མེད་ན་ཡོངས་རྫོགས་བོད་ལྗོངས་རང་དབང་གཙང་མ་སྒྲུབ་པའི་རླབས་ཆེན་དབུ་ཁྲིད་ཅིག་དུས་འགྱུར་རླུང་འཚུབ་ཀྱིས་ཡུལ་བྱོལ་བྱེད་དགོས་པའི་སྐབས་སུ་ཡོང་རེ་མེད་པ་གསལ་བོ་ཡིན་ནའང། རྒྱ་སྡེ་བོད་སྡེར་ཞེན་པའི་སྐུ་དྲག་འཁྱོག་མིག་ཅན་རེ་འགའ་མ་བྱུང་མིན་ལ། བྱུང་རབས་དེབ་ཐེར་དུ་གསལ་བ་ལྟར་མང་གཙོའི་ལམ་ལུགས་དབུ་བརྙེས་དུས་༧གོང་ས་ཆེན་པོར་ཅི་ཙམ་དཀའ་ངལ་འཕྲད་པ་དག་ནི་ང་ཚོས་ངེས་པར་དུ་ཤེས་དགོས་པ་ཞིག་རེད། འདི་ལྟར་འགལ་ཟླའི་རྣམ་འགྱུར་ཐོན་སྐབས་ལུས་ངག་ཡིད་གསུམ་༧གོང་ས་ཆེན་པོའི་རླབས་ཆེན་ལམ་སྟོན་འོག་འགྲོ་མཁན་མེད་པ་མིན་ཡང། འགྲོ་མ་ཤེས་པ་དང། འགྲོ་རྒྱུའི་གནས་ཚད་མ་འདང་བ། ཤེས་བཞིན་མ་སོང་བ་སོགས་ཀྱིས་བོད་ནང་ལས་ཀྱང་ཕྱི་རུ་འཚར་ལོངས་བྱུང་བའི་མི་རབས་གསར་བའི་ཁྲོད་ཕྱོགས་འཐེན་གྱི་དྲི་མ་ཧ་ཅང་ངན་པ་བགས་ཡོད། རྩ་དོན་སྒྲུབ་ཀྱིན་སྒྲུབ་ཀྱིན་རྩ་དོན་སྒྲུབ་པར་ཁ་བསྙད་ཀྱིན་བསྙད་ཀྱིན་ང་ཚོ་བོད་མིའི་ནང་ཁུལ་ལ་མི་དགོས་པའི་རྣམ་འགྱུར་འདི་རིགས་ད་དུང་ཡང་གནམ་མཁའ་གཡའ་དྭགས་པ་ལྟར་སེལ་ཐུབ་མེད་པ་ཧ་ཅང་གསལ་བོ་རེད། དེང་གི་དུས་ན་དེ་བས་ཀྱང་འཇིགས་སྐྲག་ཞེད་སྣང་ཡོང་གཞི་ཞིག་ནི། སྔ་མོའི་མ་ཤེས་རྨོངས་པ་དང་རྣམ་རྟོག་གི་གཞན་དབང་ནས་ཐོན་པའི་འགལ་ཟླ་འདི་རིགས་ད་ནི་བསམ་བཞིན། ༧གོང་ས་ཆེན་པོའི་རླབས་ཆེན་མཛད་འཕྲིན་དང་རང་རེའི་སྒྲིག་འཛུགས་ཀྱི་ཁ་གཏད་དུ་ལངས་རྒྱུའི་རྣམ་འགྱུར་ཐོན་གྱིན་ཡོད། ང་ཚོས་ཐད་ཀར་བལྟས་ན། སྒྲིག་འཛུགས་ཤིག་ལ་བློ་གཏོད་མི་འདུག་ཟེར་མཁན་འཇམ་དབྱངས་ནོར་བུ་དང། བོད་གཞུང་གི་མཚན་དང་ལས་ཐམ་སོགས་ལ་བདག་པོ་བརྒྱབས་ནས་མ་འོངས་པར་བོད་ཀྱི་བདག་པོར་ཕུལ་རྒྱུ་ཡིན་ཟེར་བའི་གཞོན་ནུ་སོགས་ནི་སྒྲིག་འཛུགས་ཙམ་དང་སྒེར་བ་རེ་ཟུང་ཡིན་ནའང་། རྣམ་འགྱུར་འདིས་རྩ་བའི་ཆ་ནས་དབུས་བོད་མིའི་སྒྲིག་འཛུགས་གཞིས་བྱེས་ཚབ་མཚོན་གྱི་སྲིད་གཞུང་ཡིན་མིན་ལ་ཟུར་ཟ་དཀྲོགས་གཏམ་སྤེལ་འདོད་ཡོད་པ་དེ་རེད་ལ། དེར་གྲུབ་འབྲས་ཡག་པོ་གང་ཡང་ཐོན་རྒྱུ་མེད་པ་གསལ་བོ་ཡིན་ནའང། རང་གཞན་གཉིས་མེད་ཆགས་སོང་ན་འགྲིག་པ་འདྲ་བའི་བྱ་སྤྱོད་འདི་རིགས་ནི་ཤིན་ཏུ་ནས་ཐབས་སྐྱོ་བོ་ཞིག་ཡིན་པ་འདིས། ང་ཚོར་གསལ་བཤད་གཞན་ཅི་ཞིག་བྱེད་ཀྱི་ཡོད་པ་རེད་ཟེར་ན། མི་འདི་དག་དང་འདིའི་སྐྱེད་བྱེད་རྣམས་ནི་ཁྲིམས་དང་མང་གཙོའི་ལོངས་སྤྱོད་ལ་བརྩི་བཀུར་བྱེད་ཐུབ་མཁན་ཞིག་མིན་པ་དང། དེ་ལས་ཀྱང་ཆབ་སྲིད་ཐད་ཀྱི་དམིགས་དོན་ཅི་ཡིན་ལ་དོགས་གཞི་ཆེན་པོ་ཡོད་པ་ནི་རིག་པས་བརྡར་ཤ་གཅོད་མི་ཐུབ་པ་ཞིག་མིན་པ་དེ་རེད། དེས་ན་རང་གཞན་རོགས་གསུམ་གཞན་གྱི་བསླུ་བྲིད་འོག་འགྲོ་མི་དགོས་རྒྱུར་འབད་བརྩོན་བྱས་ཏེ། ཆོལ་གསུམ་ཆིག་སྒྲིལ་ལ་ཡིད་ཆེས་རྩེ་གཅིག་ཞུ་རྒྱུ་ནི་རྩ་དོན་རེད་འདོད་ན། ལར་ནས་༧གོང་ས་སྐྱབས་མགོན་ཆེན་པོའི་རླབས་ཆེན་དགོངས་གཞིར་སྐུར་འདེབས་ལོག་འགྲེལ་མི་བྱེད་པ་དང། བཀའ་བློན་ཁྲི་པས་ཟླ ༨ ཚེས ༣༡ ཉིན་ཡོག་ཐོག་དང་མང་གཙོའི་དུས་དྲན་ཉིན་ངག་ཐོག་ནས་གསལ་བཤད་ཞིབ་གནང་ཟིན་པ་ལྟར། བོད་གཞུང་གི་ཁྲིམས་མཐུན་གྱི་རྒྱུན་མུ་མཐུད་གནས་ཡོད་པ་ཚོར་བ་ཙམ་མིན་པར་རིག་པའི་གཞུང་ལུགས་ཀྱིས་གསལ་འགྲེལ་ལམ་སྟོན་གནང་བ་དེ་འདྲ་སླད་མར་བོད་མི་རང་ལ་ཕེབས་དགོས་ཚེ་དངོས་གནས་ཐབས་སྐྱོ་བོ་རེད། གང་ཡིན་ཟེར་ན། བོད་གཞུང་གི་ཁྲིམས་མཐུན་རྒྱུན་མེད་པ་རེད་ཟེར་མཁན་བོད་མི་ཡིན་ཟེར་མཁན་དག་གིས་དཀྲོགས་གཏམ་སྤེལ་བ་ཡིན་ཙང། དངོས་གནས་བྱས་ན་མི་རིགས་གཞན་དང་རྒྱ་ནག་གི་མདུན་སར་ཤིན་ཏུ་ངོ་ཚ་དགོས་པའི་གནད་དོན་ཞིག་རེད། དེས་ན་བོད་མི་དྲག་ཞན་ཚང་མས་ལམ་ནོར་ལྡོག་ཤེས་བྱ་རྒྱུ་དང། དཔལ་ལྡན་བཀའ་ཤག་གི་ཚིག་ཐག་ཆོད་པོའི་ལངས་ཕྱོགས་ལ་རྗེས་སུ་ཡི་རངས་དང། བདེན་པའི་གནང་སྟངས་འདི་འདྲར་སྙིང་ཁུངས་རུས་པའི་སྟེང་ནས་བརྩི་བཀུར་ཞུ་བཞིན་ཡོད།། །།
༢༠༡༢། ༩། ༣། ཉིན་ཤར་མར་བགྱིས།།