ཏཱ་ལའི་བླ་མ་འདས་རྗེས་ཀྱི་ལྷིང་འཇགས་བྲོ་བ་རྒྱ་ནག་གིས་མྱོང་གི་ཡོད།

མཱར་ཊེ་ན་(Michael Martina)དང་རཱོ་ཌི་(Brian Rhoads)གཉིས་ཀྱིས་བརྩམས།

འཕྲིན་ལས་རྒྱ་མཚོས་བསྒྱུར།

འདས་པའི་ལོ་ངོ་འདི་དག་གི་རིང་ལ་རྒྱ་ནག་གིས་ཏཱ་ལའི་བླ་མ་ནི་གྲྭ་ཆས་གྱོན་པའི་སྤྱང་ཀི་ཞིག་དང་། ཁ་བྲལ་ལས་དོན་སྤེལ་བའི་ཟློས་གར་འཁྲབ་འཁྲིད་པ། ད་དུང་ཉེ་བའི་ཆར་བོད་མི་ཚོས་རང་ལུས་མེར་བསྲེགས་བཏང་བ་དང་། དེ་མིན་གྱི་ངོ་རྒོལ་ལས་འགུལ་རིགས་ལ་སྐུལ་འདེད་གཏོང་མཁན་དང་ལོག་ཇུས་འདིང་མཁན་ཡིན་པའི་སྐྱོན་བརྗོད་དང་ཁ་རྡུང་བཏང་ཡོད།

ཡིན་ནའང་། ཏཱ་ལའི་བླ་མའི་དགོངས་པ་གཞན་དོན་དུ་གཤེགས་རྗེས་རྒྱ་གཞུང་གི་ལྟ་བ་མཁྲེགས་པོ་ཅན་གྱི་མགོ་ཁྲིད་ཚོར་ཁོང་དྲན་པའི་རྒྱུ་མཚན་ཞིག་འབྱུང་སྲིད། ལོ་ན་རྒས་པའི་ཆོས་ཀྱི་དབུ་ཁྲིད་འདི་ཉིད་བཞུགས་པའི་བཀའ་དྲིན་དང་ཁོང་གི་འཚེ་བ་མེད་པའི་ལམ་སྟོན་འོག་ད་ལྟའི་བར་དུ་ཟིང་འཁྲུག་གི་མགོ་མནན་ཡོད་མོད། ནམ་ཞིག་ཁོང་མ་བཞུགས་པའི་ཉིན་མོར་དེ་མ་ཐག་གནས་སྟངས་རྣམས་ཇེ་སྡུག་ཏུ་འགྲོ་སྲིད། འདི་ལོའི་སྤྱི་ཟླ་དང་པོར་སི་ཁྲོན་ཞིང་ཆེན་འོག་གི་བོད་མིའི་ས་ཁུལ་དུ་ངོ་རྒོལ་སྐད་འབོད་བྱུང་པ་ནི་འདས་ལོའི་ནང་དུ་གྲྭ་བ་དང་བཙུན་མ་གཙོ་བྱས་པའི་བོད་མི་བཅུ་དྲུག་གིས་རང་ལུས་མེར་བསྲེགས་བཏང་སྟེ། ཕྱི་ལོགས་སུ་བཞུགས་པའི་ཏཱ་ལའི་བླ་མ་བོད་དུ་གདན་འདྲེན་ཞུ་དགོས་པ་དང་བོད་ལ་རང་དབང་དགོས་པའི་ངོ་རྒོལ་མཇུག་སྐྱོང་བྱས་ཡོད།

རྒྱ་ནག་གིས་རང་ལུས་མེར་བསྲེགས་གཏོང་མཁན་ཚོར་འཇིགས་སྐུལ་དྲག་སྤྱོད་རིང་ལུགས་པའི་མིང་བཏགས་ཡོད་པ་མ་ཟད། དེ་མཚུངས་སུ་གཟའ་ལྷག་པའི་ཉིན་རྒྱ་གཞུང་གིས་ཁ་བྲལ་པའི་དཔུང་ཚོགས་ཀྱིས་མིའི་བར་ལ་ཞེ་འཁོན་སློང་བཞིན་ཡོད་པ་དང་། རྒྱ་ནག་གི་དམག་དཔུང་གིས་མགོན་གནོན་བྱས་པའི་ངོ་རྒོལ་དག་ཀྱང་ཁ་བྲལ་བ་ཚོས་ངན་སྐུལ་བྱས་ཞིག་རེད་ཅེས་ཁ་རྡུང་བཏང་ཡོད།

སྔོན་མ་སྐབས་ཤིག་ལ་ཞི་བདེ་ལྷིང་འཇགས་ཡིན་པའི་བོད་ཡུལ་མཐོ་སྒང་དུ་ངོ་རྒོལ་སྐད་འབོད་བྱུང་ཞིང་། རྒྱ་ནག་དང་བཙན་བྱོལ་བོད་གཞུང་གཉིས་བར་གྲོས་མོལ་གྱི་རེ་བ་ཇེ་ཕྲ་རུ་ཕྱིན་པ་དང་ལྷན་དུ། ཏཱ་ལའི་བླ་མའི་དགོངས་པ་གཞན་དོན་དུ་གཤེགས་པའི་ཉིན་དྲག་པོའི་ལས་འགུལ་འབྱུང་བའི་སེམས་ཁྲལ་ཆེ་རུ་འགྲོ་བཞིན་ཡོད། གལ་ཏེ་འགྱུར་བ་གང་ཡང་མ་ཕྱིན་ཚེ་རྒྱ་ནག་གིས་མུ་མཐུད་དུ་དྲག་པོའི་ཐབས་ལམ་ལ་བརྟེན་ངེས་ཡིན།

ཐའེ་ཝན་དུ་བཞུགས་པའི་ཏཱ་ལའི་བླ་མའི་ཚ་བོ་དོན་འགྲུབ་ལགས་ཀྱིས་བཤད་རྒྱུར། “ད་ལྟ་ལྟ་བ་དང་གནས་བབ་མཁྲེགས་པོ་ཆགས་ཚར་པ་རེད།” ཅེས་དང་། “ སྤྱིར་བཏང་ཏཱ་ལའི་བླ་མའི་འཚེ་མེད་ཞི་བའི་ལམ་སྟོན་གྱིས་བོད་ཀྱི་གཞོན་སྐྱེས་རྣམས་ཞི་འཇམ་དུ་གནས་སུ་འཇུག་ཐུབ་ཡོད” དོན་གྲུབ་ལགས་ནི་བཙན་བྱོལ་གཞུང་གི་ཚོགས་མི་ཟུར་བ་ཞིག་ཡིན་པ་དང་གཞུང་འབྲེལ་གྲོས་མོལ་གྱི་ཆེད་དུ་རྒྱ་ནག་ལ་ཐེངས་བཅོ་ལྔ་ཙམ་འགྲོ་མྱོང་མོད། དེའི་རྗེས་སུ་གྲོས་མོལ་ལ་དོན་ཕན་མ་བྱུང་བར་མཚམས་ཆད་པ་རེད།

དོན་འགྲུབ་ལགས་ཀྱིས་བཤད་པ་ལྟར་ན། དགུང་ལོ་ ༧༦ ལོ་སོན་པའི་གྲྭ་བ་ཁོང་གི་སྐུ་གཟུགས་བདེ་ཐང་ཡིན་པ་མ་ཟད། ཁོང་གིས་ཉིན་ལྟར་རྒྱུག་རྩལ་འཕྲུལ་ཆས་སྤྱད་དེ་ལུས་རྩལ་སྦྱོང་པ་དང་སྨན་པ་ཡང་ལག་ཐོག་ཏུ་ཡོད་ཟེར། ཉེ་ཆར་ལྡི་ལི་གསར་པར་ཁོང་གི་མིག་ལ་གཤག་བཅོས་ཕྲན་བུ་བྱས་ཡོད་ན་ཡང་ད་དུང་ལོ་ཉི་ཤུ་ལྷག་ལ་བཞུགས་པའི་རེ་བ་རྒྱག་གི་ཡོད། དོན་འགྲུབ་ལགས་ཀྱིས། “༧གོང་ས་མཆོག་ཇི་སྲིད་འཚོ་བའི་བར་དུ་ང་ཚོ་འཚེ་མེད་ཞི་བ་ཡིན་ལ་ཚང་མས་ཁོང་གི་དགོངས་ཚུལ་ལ་བརྩི་བཀུར་བྱེད། གལ་ཏེ་༧གོང་ས་མཆོག་གློ་བུར་དུ་མ་བཞུགས་པའི་གནས་ཚུལ་བྱུང་ན་རྒྱ་ནག་གཞུང་ལ་དཀའ་ངལ་ལྷག་མ་མང་པོ་ཞིག་འཕྲད་ངེས་ཡིན།” ཟེར།

འབྱུར་འགྱུར་གྱི་བྲོ་བ་ཞིག

ཉེ་བའི་ཆར་རྒྱ་གཞུང་གིས་བོད་ཐོག་ལག་བསྟར་བྱས་པའི་དྲག་སྤྱོད་དེ་ནི་ ༢༠༠༨ ལོར་རྒྱ་ནག་གིས་བོད་ཀྱི་ས་ཁུལ་དག་ཏུ་ཟིང་འཁྲུག་བྱུང་སྟེ། མ་མཐར་ཡང་མི་བཅུ་དགུའི་ཚེ་སྲོག་ཤོར་བའི་དོན་རྐྱེན་གྱི་རྗེས་སུ་བྱུང་བའི་གནས་ཚུལ་ཚབས་ཆེ་ཤོས་དེ་ཡིན། རྒྱ་ནག་གིས་བཤད་བཞིན་པའི་བོད་རང་སྐྱོང་ལྗོངས་ནི་ད་དུང་ཡང་དྲག་གནོན་ཤུགས་ཆེན་འོག་གནས་ཡོད། ཕྱི་རྒྱལ་ཁག་གི་བོད་དོན་རྒྱབ་སྐྱོར་ཚོགས་ཚོས་བཤད་པ་ལྟར་ན། སི་ཁྲོན་དུ་ངོ་རྒོལ་སྐད་འབོད་བྱུང་སྐབས་ཉེན་རྟོག་པས་དྲག་གནོན་བྱས་ཏེ་བོད་མི་ ༧ མེ་མདའི་འོག་ཏུ་རྐྱེན་འདས་སུ་སོང་ཡོད་པ་དང་མི་ ༦༠ ལ་རྨས་སྐྱོན་བྱུང་ཡོད་འདུག རྒྱ་གཞུང་གིས་གསར་ལམ་ཁག་ཏུ་ཉེན་རྟོག་པས་མེ་མདའ་བརྒྱབ་པའི་རྒྱུ་མཚན་ནི་རང་ཉིད་སྲུང་སྐྱོབ་ཆེད་རེད་ཟེར།

དུས་དེ་ནས་བཟུང་རྒྱ་གཞུང་གི་བདེ་འཇགས་མི་སྣས་བོད་ཀྱི་མཁའ་དབྱིངས་ཆེན་པོ་དེ་ཡོངས་སུ་བཀབ་སྟེ་གནས་ཡོད། སི་ཁྲོན་ནང་དྲག་སྤྱོད་ཀྱི་ལས་ཀྱི་གནས་ཚུལ་བྱུང་བའི་ས་ཁུལ་ལས་སྤྱི་ལེ་བརྒྱ་ཕྲག་གི་མཚམས་སུ་ཡོད་པའི་དན་པ་ཞང་དུ་ཡང་ཉེན་རྟོག་དམག་དཔུང་གིས་ཡོངས་སུ་བསྐོར་ཡོད་པ་མ་ཟད། ཞིབ་དཔྱོད་ས་ཚིགས་ཆེད་དུ་བཙུགས་ཏེ་བོད་པའི་ངོ་རྒོལ་ལས་འགུལ་འདི་ས་ཆ་གཞན་དུ་མི་ཁྱབ་པ་དང་། ཕྱི་རྒྱལ་གྱི་གསར་འགོད་པ་ནང་དུ་མི་གཏོང་རྒྱུར་ཤུགས་སྣོན་བྱེད་བཞིན་ཡོད། ཉེན་རྟོག་དམག་དཔུང་གིས་བཙུགས་པའི་འགག་སྒོ་དེ་དག་གིས་བོད་ཀྱི་དགོན་སྡེ་རྣམས་བཟང་བཙོན་ལྟ་བར་བཞག་ཡོད་པ་མ་ཟད། གཞུང་གི་ལས་ཚོས་ལམ་ཁ་བདེ་འཇགས་མིན་ཚུལ་བཤད་དེ་གསར་འགོད་པ་རྣམས་ཕྱིར་སློག་གཏོང་གི་ཡོད།

གཅིག་བྱས་ན་འདི་ནི་འབྱུང་འགྱུར་གྱི་བྲོ་བ་ཞིག་ཡིན་ངེས།

འགྲོ་བ་མིའི་ཐོབ་ཐང་ལྟ་རྟོག་ཚོགས་པའི་ཉམས་ཞིབ་པ་ནེ་ཁོ་ལ་སི་ (Nicholas Bequelin) ལགས་ཀྱིས། “བོད་མི་ཚོས་གཅིག་གྱུར་ཐོག་ཏཱ་ལའི་བླ་མ་བོད་ནང་གདན་འདྲེན་ཞུ་འཇུག་དགོས་པའི་འབོད་ཚིག་སྒྲོག་བཞིན་པར་གཞིགས་ན། ཏཱ་ལའི་བླ་མ་ཕྱི་ལོགས་ནས་སྐུ་གཤེགས་པའི་ཉིན་མོར་ཚོད་དཔག་བྱེད་དཀའ་བའི་ངོ་རྒོལ་གྱི་རྦ་རླབས་ཤིག་འཕྱུར་སྲིད་ལ། དེ་ནི་ ༢༠༠༨ ལས་ལྷག་པ་ཞིག་ཡིན་ངེས་པར་མ་ཟད། རྒྱ་ནག་གི་དྲག་གནོན་ཡང་དེ་ལས་གཏུམ་སྤྱོད་ཆེ་བ་ཞིག་ཡིན་ངེས།” ཞེས་བརྗོད་འདུག

རྒྱ་ནག་ནི་འདས་པའི་ལོ་མང་རིང་རླབས་ཆེ་བའི་དབུ་ཁྲིད་ཏིན་ཞོ་ཕིན་དང་འདི་ལོའི་ལོ་མཇུག་ལ་མགོ་ཁྲིད་བརྗེ་སྒྱུར་གྱིས་རྒན་ཡོལ་ཞུ་བཞིན་པའི་སྲིད་འཛིན་ཧུའུ་ཅིན་ཐོ་གཉིས་ཀྱི་འཛུགས་སྐྲུན་དང་གཉའ་གནོན་ཟུང་དུ་འབྲེལ་བའི་ལག་ལེན་ཞིག་ལ་བརྟེན་ཏེ་བསྡད་པ་རེད། ༡༩༨༨ ནས་ ༨༩ ལོའི་བར་བོད་རང་སྐྱོང་ལྗོངས་ཀྱི་དམར་ཕྱོགས་ཚོགས་པའི་ཚོགས་གཙོ་བྱས་མྱོང་བའི་ཧུའུ་ཅིན་ཐོ་ཡིས་ཏན་ཏན་འགྲོ་ལུགས་ཤིག་བཙུགས་ཡོད། ༡༩༨༩ ལོའི་སྤྱི་ཟླ་གསུམ་པའི་ནང་དུ་བོད་ལ་རྒྱ་ནག་གི་མགོ་ཁྲིད་ཚོས་དྲག་གནོན་གྱི་ཁྲིམས་ཡིག་བསྒྲགས་པ་མ་ཟད། སྔོན་ཏཱ་ལའི་བླ་མ་བྲོས་བྱོལ་དུ་འགྲོ་དགོས་ཐུག་པའི་ལས་འགུལ་ཏེ། བོད་མིའི་སྒེར་ལངས་ཆེན་མོའི་དུས་དྲན་ཐེངས་སུམ་ཅུ་པ་མུ་མཐུད་དུ་འགྲོ་བཞིན་ཡོད་པ་ལ་རྒྱ་ནག་གིས་ཁྲག་དྲི་བྲོ་བའི་དྲག་གནོན་བྱས།

ཐའེ་ཝན་དང་མཚུངས་པར། རྒྱ་ནག་གི་དཔོན་རིགས་ཚོས་བོད་ལ་འཛིན་པའི་སྲིད་ཇུས་ལ་འགྱུར་པ་མེད་ལ། ཁོང་ཚོའི་བསམ་པར་བོད་ནི་ཁོང་ཚོར་བདག་དབང་ཡོད་པའི་ས་ཁུལ་ཞིག་ཡིན། ད་ལྟའི་རྒྱ་ནག་གི་སྲིད་འཛིན་གཞོན་པ་དང་འབྱུང་འགྱུར་གྱི་སྲིད་འཛིན་ཞི་ཆེན་ཕིན་གྱིས་གུ་ཡངས་འཛིན་སྲིད་པའི་རྣམ་འགྱུར་ཅན་གྱི་ལས་དོན་གང་ཡང་བསྒྲུབས་མེད་པ་མ་ཟད། ལོ་སྔོན་མའི་ནང་ཚོགས་པའི་བོད་ཞི་བས་བཅིངས་གྲོལ་བཏང་ནས་ལོ་འཁོར་ ༦༠ འཁོར་པའི་དུས་དྲན་སྟེང་ཁོང་གིས་ཁ་བྲལ་བར་དྲག་གནོན་བྱ་རྒྱུའི་དམ་བཅའ་བཞག་ཡོད།

བོད་པའི་ཆོས་ཀྱི་དབུ་ཁྲིད་ཏཱ་ལའི་བླ་མའི་ཡང་སྲིད་ཀྱི་གནད་དོན་དཀའ་མོ་དེ་ཡང་ད་དུང་ཐག་གིས་བཅད་མེད། འདི་ལ་རྒྱ་ནག་གཞུང་གིས་ཐེ་གཏོགས་འགོག་ཕྱིར། ཏཱ་ལའི་བླ་མ་རང་ཉིད་ཀྱིས་སྲོལ་རྒྱུན་ལམ་ལུགས་དོར་ཏེ་དམངས་གཙོའི་རང་བཞིན་ལྡན་པའི་འོས་ཤོག་ལ་བསྐུལ་བ་དང་། ཡང་ན། རང་གི་ཡང་སྲིད་རང་གིས་ངོས་འཛིན་བྱ་སྲིད་པའི་བརྡ་བསྟན་ཡོད། རྒྱ་ནག་གཞུང་གིས་ཏཱ་བླ་མ་གཅིག་གིས་ཏཱ་ལའི་བླ་མ་གཞན་ཞིག་འདེམས་པ་ནི་ལོ་རྒྱུས་རང་བཞིན་ལྡན་པའི་ཆོས་ལུགས་ཀྱི་ལག་ལེན་དང་འགལ་ཡོད་ཚུལ་ཤོད་བཞིན་ཡོད་པ་མ་ཟད། ཡང་སྲིད་ངོས་ལེན་བྱེད་པའི་དབང་ཚད་ཁོ་རང་ཚོར་ཡོད་སྐོར་ཤོད་ཀྱི་ཡོད། ཡང་སྐོར་ཞིག་གིས་རྒྱ་གཞུང་གིས་གང་འདོད་དུ་ཏཱ་ལའི་བླ་མའི་སྤྲུལ་སྐུ་ཞིག་ངོས་འཛིན་བྱེད་པ་དང་བསྟུན་ནས། བོད་ཕྱི་ལོགས་སུ་གནས་པའི་ཏཱ་ལའི་བླ་མ་གཅིག་དང་བོད་ནང་དུ་ཡོད་པའི་ཏཱ་ལའི་བླ་མ་གཅིག་ཆགས་ཏེ་བོད་མི་རྣམས་ཕྱོགས་གཉིས་སུ་གྱེས་རྒྱུར་ཞེད་སྣང་བྱེད་ཀྱི་ཡོད།

རྒྱ་ནག་གིས་བོད་རླག་བཞིན་ཡོད་དམ།

ཀོ་ལིམ་བྷི་ཡ་མཐོ་སློབ་ཀྱི་བོད་རིག་པའི་མཁས་པ་བྷར་ནཱད་ཁྲི (Robbie Barnett) ལགས་ཀྱིས་བཤད་རྒྱུར། ཏཱ་ལའི་བླ་མ་ཡུལ་གྱར་གནས་སྟངས་འོག་འདས་གྲོངས་སུ་ཕྱིན་ན། དེ་ནི་བོད་པ་རྣམས་ལ་མཚོན་ན་ཧ་ཅང་གལ་ཆེ་བའི་གནད་དོན་ཞིག་ཡིན་སྟབས། རྒྱ་བོད་གཉིས་བར་འགྲིག་མཐུན་ཚད་ལྡན་ཞིག་ཡོང་བའི་རེ་བ་ཡོད་ཚད་མེད་བརླག་ཏུ་བཟོ་ངེས། ཁོང་གིས་མུ་མཐུད་དུ་བཤད་རྒྱུར། “གལ་སྲིད་གནད་དོན་གང་ལ་ཡང་ཐག་གཅོད་མ་བྱུང་བར་ཏཱ་ལའི་བླ་མ་འདས་གྲོངས་སུ་ཕྱིན་པ་ཡིན་ན། ཡིད་ཆེས་བསྐྱར་གསོ་བྱེད་པ་ལ་དུས་རབས་གཅིག་གི་ཕྱེད་ཀ་དགོས་ངེས་ཡིན།” ཞེས་བཤད་འདུག

དྲག་པོའི་ཐབས་ལ་ཤུགས་ཆེན་བརྟེན་པ་ཡིན་ན་རྒྱལ་སྤྱིའི་སྤྱི་ཚོགས་ལ་སེམས་ཁྲལ་བསླང་ངེས་ལ། དེ་ཡིས་རྒྱ་ནག་དང་ནུབ་ཕྱོགས་རྒྱལ་ཁབ་ཁག་གི་བར་ཆབ་སྲིད་ཀྱི་དཀའ་རྙོག་བསླང་སྲིད་པ་མ་ཟད། བཙན་བྱོལ་བོད་གཞུང་ལ་སྡོད་གནས་མཁོ་སྤྲོད་བྱེད་བཞིིན་པ་དང་མཐའ་མཚམས་ཀྱི་རྩོད་རྙོད་ཡོད་པའི་ཁྱིམ་མཚེས་རྒྱལ་ཁབ་རྒྱ་གར་ལའང་ཆབ་སྲིད་ཀྱི་རྩོད་རྙོག་བསླང་སྲིད།

བྷར་ནཱད་ཁྲི་ལགས་ཀྱིས་མུ་མཐུད་དུ་བཤད་རྒྱུར། “རྒྱ་ནག་གི་གཞུང་འཛིན་པ་ཚོའི་ནང་དུ་དྲག་པོའི་ཐབས་ལ་བརྟེན་ཏེ་གནད་དོན་འདི་དག་རེ་ཞིག་ཐག་གཅོད་བྱ་ཐུབ་པར་ཡིད་ཆེས་བྱེད་མཁན་ཡོད་ལ། ཚད་ངེས་ཅན་ཞིག་ལ་དེ་ནི་བདེན་པར་འགྲུབ། འོན་ཀྱང་། དེ་ལྟར་རྒྱུན་རིང་དུ་སོང་བ་ཡིན་ན་འགྲོ་གྲོན་གྱི་དཀའ་ངལ་འཕྲད་ངེས་པར་མ་ཟད། རྒྱ་ནག་གཞུང་ལ་ཡིད་ཆེས་བྱེད་མཁན་མེད་པར་འགྱུར་བ་དང་རྒྱལ་སྤྱིའི་སྟེང་དུ་མཇུག་འབྲས་ཚབས་ཆེན་འབྱུང་ངེས་ཡིན།” ཞེས་བརྗོད་ཡོད། རྒྱ་ནག་གཞུང་གིས་ཤུགས་ཀྱིས་སྒྲོག་བཞིན་པ་ནི། ཁོང་ཚོས་རྒྱ་སྒོར་དུང་ཕྱུར་ ༡༦༠༠ ལྷག་བཏང་སྟེ་བོད་དབུལ་ཕོངས་ལས་བསྐྱབས་པ་མ་ཟད། འདས་པའི་ལོ་ངོ་ ༦༠ ནང་དུ་བོད་ལ་རོགས་སྐྱོར་དེ་ལས་མང་བ་བྱས་ཏེ་ལོ་ངོ་བཅོ་བརྒྱད་ཀྱི་རིང་ལ་བསྟུད་མར་ཨང་ཀི་གཉིས་ཅན་ཀྱི་དཔལ་འབྱོར་ཡར་རྒྱས་སུ་སོང་བ་འདི་ཡིན།

འོན་ཀྱང་། གནས་ཚུལ་དབྱེ་ཞིབ་པ་དག་གིས་བཤད་པ་ལྟར་ན། རྒྱ་ནག་གཞུང་གིས་རང་དབང་ལ་བཀག་སྡོམ་བྱེད་བཞིན་དཔལ་འབྱོར་འཛུགས་སྐྲུན་ལ་ཤུགས་གནོན་བྱས་པར་གྲུབ་འབྲས་ལྡོག་ཕྱོགས་ནས་ཐོན་ཡོད། སྲིད་ཇུས་འདི་ལ་བོད་རང་སྐྱོང་ལྗོངས་ཀྱི་བོད་མི་ཚོའི་རྒྱབ་སྐྱོར་ཐོབ་མེད་པ་མ་ཟད། དེའི་མཐའ་འཁོར་དུ་གནས་པའི་ཞིང་ཆེན་ཁག་ནང་གི་བོད་མི་རྣམས་ཏཱ་ལའི་བླ་མ་དང་བློ་ཐག་ཉེ་རུ་བཏང་ཡོད། བརྒྱད་ཅུ་གྱ་གྲངས་དང་དགུ་བཅུ་གོ་གྲངས་ནང་ལྷ་ས་དྲག་པོའི་ལས་འགུལ་ནང་ཡོངས་སུ་གཡོགས་ཡོད་ན་ཡང་། སི་ཁྲོན་དང་མཚོ་སྔོན་སོགས་ལྷིང་འཇགས་སུ་གནས་ཡོད། ད་ནི་སི་ཁྲོན་ནང་དུ་ཡང་དྲག་པོའི་ལས་འགུལ་བྱུང་ཟིན་པ་དང་སྲོལ་རྒྱུན་དག་ཀྱང་འགྱུར་བཞིན་ཡོད།

བྷར་ནཱད་ཁྲི་ལགས་ཀྱིས་བཤད་ན། བོད་ཤར་ཕྱོགས་ཁུལ་དུ་གནས་པའི་བོད་མི་རྣམས་ཀྱིས་ནམ་རྒྱུན་རྒྱ་ནག་སྤྱི་དང་དུས་གཅིག་ཏུ་ལོ་སར་ལ་རོལ་བཞིན་ཡོད་མོད། ད་ནི་བོད་མི་དེ་དག་གིས་ཀྱང་ལོ་སར་ཕྱིར་འགྱངས་བྱས་ཏེ་ལོ་ངོ་བརྒྱ་ཕྲག་འགའ་ལ་ཏཱ་ལའི་བླ་མ་དང་ཐག་ཉེ་བའི་དབུས་ཁུལ་གྱི་ལོ་སར་དང་དུས་བསྟུན་བྱེད་བཞིན་ཡོད།

ཁོང་གིས་མུ་མཐུད་དུ་བཤད་རྒྱུར། “རྒྱ་ནག་གིས་བོད་ཀྱི་མཐོ་སྒང་གི་ས་ཁྱོན་རྒྱ་ཆེན་པོ་ཞིག་བོད་ཀྱི་རྒྱལ་གཅེས་ཚོར་ཤུགས་ཀྱི་ནང་ལ་ཚུད་དུ་བཅུག་པ་རེད།” དེས་ན། “ཅིའི་ཕྱིར་ང་ཚོས་རྙོག་དྲ་ཆེན་པོ་མེད་པའི་བོད་ཤར་ཕྱོགས་ཁུལ་དུ་སྲིད་ཇུས་འདི་གཏན་འབེབས་བྱས་པ་རེད། ངས་ཚོས་ཅིའི་ཕྱིར་དེ་ལྟར་བྱས་པ་དང་། ང་ཚོའི་ལག་ནས་བོད་ཤོར་བའི་རྒྱུ་མཚན་ཅི་ཡིན། ཞེས་འབྱུང་འགྱུར་གྱི་ལོ་རྒྱུས་པ་དག་གིས་དྲི་བ་འདི་འདྲི་ངེས་ཡིན”

༼ ཟླ་འདིའི་ཕྱི་ཚེས་ ༣ ཉིན་རེའུ་ཊིར་(Reuters) གསར་ཁང་གི་དྲ་ཚིགས་སྟེང་སྤེལ ༽