ལོ་སར་ཚང་མར་ལོ་སྐལ་གཅིག་འབུལ།
ཀ༽
ལོ་གསར་བཟང་། ཡང་ལོ་སར་ཞིག་རེད།
དེང་སང་ང་ལ་ལོ་གསར་མང་།
བོད་ཀྱི་ལོ་སར། རྒྱ་དཀར་ནག་དང་རྒྱལ་སྤྱིའི་ལོ་སར།
ལོ་གསར་གང་ཡིན་ཡང་ཟླ་ཚེས་ཀྱི་འགོ་འཛུགས་མི་འདྲ་བ་ཙམ་རེད།
ཚང་མ་ཟླ་བ་བཅུ་གཉིས་རེད།
ཉི་མ་སུམ་བརྒྱ་རེ་ལྔ་རེད།
ལོ་འཁོར་བཅུ་གཉིས་གང་རུང་གཅིག་རེད།
དེས་ན།
དོན་ངོ་མ་ལོ་སར་དེ་ལ་མི་རིགས་བྱེ་བྲག་པའི་ཁྱད་པར་མི་འདུག
རྒྱལ་ཁབ་མི་འདྲ་བ་ལ་ལོ་སར་དམིགས་བསལ་ཞིག་གཏན་ནས་མི་འདུག
ང་ཚོའི་ལོ་སར་གྱི་ཁ་གཡང་ཡང་གཅིག་སྟེ།
ལོ་གསར་བའི་ནང་དུ་ནད་མེད་བདེ་ཐང་ཡོང་བ་དང་།
འཚོ་བ་བདེ་སྐྱིད་ལྡན་པའི་སྨོན་འདུན་ཞུ་བ་དེ་མ་ཡིན་ནམ།
ཁ༽
ལོ་སར་བཟང་། ཚང་མའི་ལོ་གསར་བཟང།
ང་ཁ་སང་ཁྱོད་ཚོའི་ལོ་སར་ལ་རོལ།
ཁྱོད་ཀྱང་དེ་རིང་ང་ཚོའི་ལོ་སར་ལ་ཕེབས།
ང་ཚོ་ཚང་མ་འགྲོ་བ་མི་ཡིན།
ང་ཚོ་ཚང་མ་ཕ་མའི་བྱམས་སྐྱོང་ལས་འཚར་བ་ཡིན།
ང་ཚོ་ཚང་མ་སྐྱེ་རྒ་ན་འཆིའི་སྡུག་བསྔལ་གྱི་རང་བཞིན་དུ་གྱུར་ཡོད།
ང་ཚོ་ཚང་མ་སྡུག་བསྔལ་མི་འདོད་པ་དང་བདེ་སྐྱིད་འདོད་མཁན་རྐྱང་ཡིན།
ང་ཚོ་ཚང་མ་ས་གཞི་འདིའི་ཐོག་ནས་འབྱུང་བ་བཞི་ལ་རྟེན་ནས་འཚོ་དགོས།
དེ་བས།
ཕྱི་པགས་དང་སྐད་ཡིག་མི་འདྲ་བ་ཙམ་ནི་ང་ཚོའི་བར་ཁྱད་མིན།
མི་རིགས་དང་ཆོས་ལུགས། རྒྱལ་ཁབ་ཅེས་པ་དག་ནི་མིང་ཙམ་ཞིག་ཡིན།
ང་ཚོ་ཚང་མ་གོ་ལ་གཅིག་གི་རྐང་གཉིས་མི་ཡིན།
སྨྲ་ཤེས་དོན་གོ་ཡིན། བདེ་སྡུག་ཚོར་མཁན་ཡིན།
ང་ཚོ་ལ་འགྲོ་བ་མིའི་རིགས་ཞེས་ཟེར།
ག༽
ལོ་གསར་བསུ། ཡང་ལོ་སར་ཞིག་སྤྲོ་བས་བསུ།
རྒྱུ་མཚན་ནི།
བྱིས་པ་ཚོ་འཚར་ལོང་བྱུང་བའི་སྤྲོ་བ།
རྒན་པ་ཚོ་ཚེ་ཐག་རིང་བའི་སྤྲོ་བ།
གཞོན་སྐྱེས་ཚོ་བྱ་བ་གསར་བར་འཇུག་པའི་སྤྲོ་བ།
དར་མ་ཚོར་ལོ་གཅིག་གི་འབྲས་བུ་སྨིན་པའི་སྤྲོ་བ།
རྒན་དར་གཞོན་གསུམ་པོ་ལོ་སར་གྱི་དགའ་སྟོན་ལ་རོལ་བའི་སྤྲོ་བ་ཆེ།
དེ་ལྟར་ལོ་སར་གྱི་སྤྲོ་བ་དེ་དག་ནི་མི་རིགས་ཚང་མར་གཅིག་ཡིན།
དེ་ནི་ང་ཚོ་ཚང་མ་འགྲོ་བ་མི་གཅིག་ཡིན་པས་རེད།
དེ་བས་ངས་བོད་ཁ་བ་གངས་ཅན་པའི་ལོ་སར་ལ་རྟེན་འབྲེལ་ཞུ།
ངས་རྒྱ་དཀར་པོ་དང་ནག་པོ། རྒྱལ་སྤྱིའི་ལོ་སར་ལ་ཡང་རྟེན་འབྲེལ་ཞུས་ཡོད།
ངས་མི་རིགས་ཚང་མའི་ལོ་སར་ལ་བཀྲ་ཤིས་བདེ་ལེགས་ཞུ།
མི་ཚང་མ་འདྲ་མཉམ་བྱམས་བརྩེས་འགྲོགས་པའི་སྨོན་འདུན་ཞུ།
མི་ཚང་མས་སྐྱིད་སྡུག་མཉམ་མྱོང་དང་ཕན་སེམས་ཡར་སྐྱེད་ཐུབ་པའི་སྨོན་འདུན་ཞུ།
མི་ཚང་མར་ལེགས་ཉེས་རྣམ་འབྱེད་ཀྱི་ཤེས་རབ་འཕེལ་བའི་སྨོན་འདུན་ཞུ།།
མི་ཡུལ་སྣོད་བཅུད་འདི་ལ་དཔྱིད་དཔལ་གསར་བས་རྣམ་པ་ཀུན་ཏུ་ཁྱབ་གྱུར་ཅིག།
ལྕགས་ཕོ་བྱི་བའི་ལོ་སར་ལ།
ངའི་ལོ་སྐལ་སྙན་དངགས་ཡིན།
ཀ༽
དེ་རིང་གནམ་ལོ་གསར་ཚེས་ཀྱི་ཉི་ཟེར་དང་འགྲོགས་ཏེ།
ང་རྫུ་འཕྲུལ་གྱི་གླག་རྒོད་ཅིག་ལ་སྤྲུལ་ནས་ཐག་རིང་གི་ཕ་ཡུལ་དུ་འཕུར།
ངའི་ཕ་ཡུལ་ནི་རྒྱང་རིང་གངས་རི་དཀར་པོའི་འདབས་རོལ་ན་ཡོད།
ང་འཕུར་ཐེངས་གཅིག་གིས་རི་རྒྱལ་ཇོ་མོ་གླང་མའི་ཡང་རྩེ་ལ་བབས་ནས།
ངས་གངས་སེང་དཀར་མོའི་འོ་མས་མཆོད་ཅིག་འཕངས།
གངས་རིའི་སྲུང་མ་ཡོངས་ལ་འཕྲིན་ཞིག་བཅོལ།
གངས་ཅན་སྣོད་བཅུད་ཉམས་ཆག་སེལ་རོགས་ཞུས།
གངས་སེང་གངས་རིར་བསུ་བའི་རེ་བ་ཞུས།
གངས་ལྗོངས་ཆོས་སྲིད་དར་བའི་སྨོན་ལམ་བཏབ།
ཁ༽
དེ་རིང་ལོ་གསར་བའི་བསིལ་རླུང་དྭངས་མ་ཞིག་དང་འགྲོགས་ཏེ།
ང་རྫུ་འཕྲུལ་གྱི་ཕུག་རོན་དཀར་པོ་ཞིག་ལ་སྤྲུལ་ནས་ཐག་རིང་གི་བླ་མཁར་དུ་འཕུར།
ངའི་བླ་མཁར་ནི་རྒྱང་རིང་འཕགས་པའི་ཞིང་ཁམས་ཀྱི་རི་རྩེ་ཞིག་ན་ཡོད།
ང་འཕུར་ཐེངས་གཅིག་གིས་ལྷ་རྒྱལ་རོལ་བའི་ཐོང་འོག་ལ་བབས་ནས།
ངས་སྦྲང་དཀར་རྩམ་པས་ལྷ་བསང་ཞིག་ཕུལ།
སྲུང་མ་དམར་ནག་གཉིས་ལ་འཕྲིན་གསོལ་བྱས།
གངས་ལྗོངས་བསྟན་སྲིད་རྒུད་པ་སེལ་རོགས་ཞུས།
གངས་ཅན་མགོན་པོའི་སྲི་ཞུ་གནང་རོགས་ཞུས།
འཛམ་གླིང་ཞི་བདེ་ཡོང་བའི་སྨོན་ལམ་བཏབ།།
ག༽
དེ་རིང་ལོ་གསར་བའི་གླུ་སྐད་སྙན་མོ་ཞིག་དང་འགྲོགས་ཏེ།
ང་གཟུགས་མེད་ཀྱི་དྲྭ་ལམ་གར་སྟེགས་འདི་རུ་ཞུགས་ཡོད།
ང་ངའི་སྙན་དངགས་ལ་སྤྲུལ་ཏེ་དབྱངས་ཅན་མའི་དངོས་གྲུབ་ཞུ་རུ་ཡོང་ཡོད།
ངའི་སྙན་དངགས་ནི་དབྱངས་གསལ་སོ་བཞིའི་རྫུ་འཕྲུལ་ཡིན།
ངའི་རྣམ་དཔྱོད་ནི་ངའི་སྙན་དངགས་ཀྱི་སྲོག་ཤིང་ཡིན།
དེ་བས་ང་མེད་ན་ངའི་སྙན་དངགས་མེད་ལ།
ངའི་སྙན་དངགས་མེད་ན་ང་ཡང་ཅི་ལྟར་མཐོང་།
དེ་བས་ངས་དེ་རིང་སྙན་དངགས་ཀྱིས་ལོ་སར་བསུ་གི་ཡོད།
དེ་བས་ངས་དེ་རིང་ལོ་སྐལ་ལ་སྙན་དངགས་འབུལ་གྱིན་ཡོད།
ལོ་སྐལ་གྱི་སྙན་དངགས་ནི་སུ་ཡང་དགའ་བའི་སྨན་ཆང་ཞིམ་པོ་དེ་ཡིན།
སྙན་དངགས་ཀྱི་ལོ་སྐལ་ནི་ནམ་ཡང་རུལ་མི་སྲིད་པའི་མཆོད་པ་མཆོག་དེ་ཡིན།།