༄།ངའི་ཕ་ཡུལ་གཉིས་པ་དྷ་ས།

 

 

 

 

 

 

 

མེ་སྒྱོགས་ཀྱི་མདེལ་ཆར་གྱིས་དེད་དེ།

ང་ཚོ་ཧི་མ་ལ་ཡའི་ཕར་རྒྱབ་འདིར་བརྫངས།

གལ་ཏེ་བྱམས་སེམས་ཆེ་བའི་རི་རྒྱུད་འདི་མེད་ན།

ང་ཚོ་རི་དྭགས་བཞིན་གང་ཞིག་ཏུ་འཁྱམས་ཏེ་ཇི་ལྟར་ཤི་ཡོད་ཨང༌།

དྷ་རམ་ས་ལ་མི་ཡུལ་ས་མཐའ་མ་ཡིན་ང་ཡི་ཕ་ཡུལ་གཉིས་པ་ཡིན།

 

མི་ལོ་བཞི་བཅུའི་ལོ་ཟླ་མཛུབ་མོས་བགྲངས་ཏེ།

མི་རབས་གཅིག་གི་ལང་ཚོ་འདི་རུ་ཟད་ན་ཡང༌།

ང་ཚོའི་འཚོ་བ་སྔར་ལས་ཕུན་སུམ་ཚོགས།

གལ་ཏེ་རྒྱ་གར་སྤུན་ཟླའི་འཛུམ་མདངས་མེད་གྱུར་ན།

ང་ཚོ་སྤྲང་འཁྱམས་བཞིན་དུ་ཇི་ལྟར་མི་སྐྱོ་འམ།

རྒྱ་གར་མི་དམངས་གཞན་མི་མ་ཡིན་ང་ཡི་ཕ་མ་གཉིས་པ་ཡིན།

 

འཕགས་བོད་མཛའ་མཐུན་ཚོགས་པའི་ལྗོན་བཟང་འདིའི།

ཆོས་འབྲེལ་ས་བོན་ལོ་སྟོང་སྔོན་ནས་བཏབ།

མཛའ་བརྩེའི་མྱུ་གུ་ད་ལྟའི་བར་དུ་རྒྱས།

ཞི་བདེའི་འབྲས་བུ་སྨིན་པའི་དགའ་སྟོན་དཔལ།

ཧི་མ་ལ་ཡའི་ཚེ་དང་མཉམ་གནས་ཤོག

རྒྱ་གར་འཕགས་ཡུལ་རྒྱལ་ཁམས་གཞན་མིན་ང་ཡི་རྒྱལ་ཁབ་གཉིས་པ་ཡིན། །