མ་ཎི་གཅིག
༡
མ་ཎི་གཅིག་འདོན་རོགས།
མ་ཎི་བཅུ་འདོན་རོགས།
མ་ཎི་བརྒྱ་དང་མ་ཎྀ་སྟོང།
མ་ཎི་ཁྲི་འབུམ་གསོལ་འདེབས་གཅིག
འདས་ཟིན་པའི་རྣམ་ཤེས་གྲངས་ལས་འདས།
བཞུར་བཞིན་པའི་ཁྲག་དྲོན་ཆད་པ་མེད།
དེ་བས།ཁྱོད་ཀྱི་མ་ཎི་རེ་རེ།
གདུང་སེམས་དང་སྙིང་རྗེ་ཚད་མེད།
བྱམས་བརྩེ་དང་སྨོན་ལམ་ལྷད་མེད།
༢
དཔལ་འབར་གཅིག་སྒྲོན་རོགས།
དཔལ་འབར་བཅུ་སྒྲོན་རོགས།
དཔལ་འབར་བརྒྱ་དང་དཔལ་འབར་སྟོང།
དཔལ་འབར་ཁྲི་འབུམ་འོད་སྣང་གཅིག
ཡུན་རིང་འཐིབས་པའི་མུན་པ་གནག
ཆར་རླུང་དྲག་པོའི་བཙན་འཛུལ་རྩུབ།
དེ་བས།ཁྱོད་ཀྱི་དཔལ་འབར་རེ་རེ།
དྲང་བདེན་ཞི་བདེའི་འོད་སྣང་དམ་པ།
རང་དབང་དམངས་གཙོའི་དྲོད་ཁོལ་ཆེན་པོ།
༣
ལག་འཇུ་གཅིག་གནང་རོགས།
ལག་འཇུ་བཅུ་གནང་རོགས།
ལག་འཇུ་བརྒྱ་དང་ལག་འཇུ་སྟོང།
ལག་འཇུ་ཁྲི་འབུམ་སེམས་པ་གཅིག
རང་ཡུལ་བོར་ནས་ས་མཐར་འཁྱམས།
བོད་རྒྱ་མཛའ་བཤེས་མནའ་ཡིས་སྦྲེལ།
དེ་བས།ཁྱོད་ཀྱི་ལག་འཇུ་རེ་རེ།
མཛའ་བརྩེ་དང་མཐུན་སྒྲིལ་གཙང་མ།
ཡིད་ཆེས་དང་ལྷག་བསམ་རྣམ་དག
༤
ཀྱེ།འཛམ་གླིང་གི་སྤུན་ཟླ་རྣམས།
མ་ཎི་རེ་འདོན་རོགས།
དཔལ་འབར་རེ་སྒྲོན་རོགས།
ལག་འཇུ་རེ་གནང་རོགས།
འདི་དག་ནི་རོགས་ཕན་ཆུང་ཆུང་ཞིག་མིན།
ཨ། མ་ཎི་རེ་རེའི་གདུང་དབྱངས་འདར་འདར།
དཔལ་འབར་རེ་རེའི་འོད་སྣང་ཆེམ་ཆེམ།
ལག་འཇུ་རེ་རེའི་དྲོད་ཁོལ་ལམ་ལམ།
འདི་དག་ནི་རྒྱལ་ཁ་ཆུང་ཆུང་ཞིག་མིན།
༢༠༠༩།༦།༡།