༄།བྱུར་སྡོང་སྐམ་པོ།
༡
བྱུ་རུ་ལ་རིན་ཐང་མེད
རིན་ཐང་མེད་པའི་ས་རྡོ་ཡིན
༢
བྱུ་རུ་ལ་རིན་ཐང་བྲལ
རིན་ཐང་བྲལ་བའི་རིན་ཆེན་ཏེ
ན་ཆུང་བུ་མོའི་མགྲིན་རྒྱན་དང
ལྷ་སྐུ་བརྗིད་པོའི་ཡང་རྒྱན་ཡིན
༣
ལྟོས་དང། བྱུ་རུ་ས་ཁར་སྐྱེས་བྱུང།
ཚར་དུ་དངར་བའི་བྱུར་སྡོང་ཕྲེང་བ་ཞིག
རྩྭ་ཐང་སྒེག་མོའི་བཞིན་རས་སུ་འཁྱིལ་བྱུང།
ཕྲེང་ཐག་མེད་པའི་རྒྱན་ཕྲེང་འདིར
ཕྲེང་རྡོག་རེ་རེར་གྱུར་བའི་བདག་གི་ཨ་མ་དང་ཨ་ཆེ
ད་དུང་ཕུ་བོ་དང་ནུ་བོ་སོགས
མགོ་འཕང་མཐོན་པོས་བར་སྣང་དུ་འཕྱོ་སྟེ
རང་ཉིད་གང་དུ་སླེབས་པ་དང
རང་ཉིད་སུ་ཞིག་ཡིན་པ་བརྗེད་ཅིང
དུས་རབས་ཀྱི་བར་སྣང་ན་འཕུར་བའི
ལྷ་དང་ལྷ་མོར་རློམ
༤
མི་ལུས་རིན་པོ་ཆེ
བྱུ་རུ་ལས་ལྷག་དོན་ཅི
ཁྱེད་རང་བྱུར་སྡོང་དུ་གྱུར་ན་ཡང།
འཇིག་རྟེན་ལྷ་མོའི་ཞབས་སོར་གཅིག་ལའང་མི་དོ
༥
བྱུར་སྡོང བསྐལ་བ་ནས་ཆགས་པའི་ས་རྡོ
བྱུར་སྡོང རྩྭ་ཐང་ནས་སྐྱེས་པའི་མི་གསོབ
ལོ་རབས་རེ་རེ་རྒོད་པོ་བཞིན་ལྷ་ཡུལ་ལ་གཞོགས་དུས
བྱུར་སྡོང་གིས་མགོ་བོ་དུད་དེ
ས་འོག་ལ་བེམ་གཟུགས་སྦ་བའི་སྦར་འབྲད་བྱེད
༦
འཚོ་བ་ནི་རང་ཉིད་བྱུར་སྡོང་དུ་འགྱུར་རེ་མིན་ལ
བྱུ་རུ་བཞིན་དུ་གཞན་གྱི་བེད་དུ་འགྱུར་རྒྱུའང་ག་ལ་ཡིན
ང་ཚོ་ནི་རྒས་འཁོགས་ཀྱི་བྱུར་སྡོང་སྐམ་པོ་ཞིག་གམ
ཡང་ན བྱུ་རུ་ནི་བྱུར་འདྲེན་སྣ་དགུའི་རུ་འདྲེན་བཞིན།
༢༠༠༣།༡།༢