༄།མག་པ་དང་བག་མ
ཀ
མག་པར་འགྲོ་བ
སྟག་ཤར་བུ་ཞིག་གི་མདུན་ལམ་ཡིན་ནམ
གལ་ཏེ་ཡིན་ན
ང་ཚོ་མག་པར་འགྲོ་སའི་གནས་ཡུལ་དབེན
ང་ཚོར་མག་གོ་ཆོད་པའི་འཇོན་ཐང་དབུལ
བག་མར་འགྲོ་བ
སྨན་ཤར་མོ་ཞིག་གི་སྔོན་ལས་མིན་ནམ
གལ་ཏེ་མིན་ན
ཁོ་མོ་ཚོ་གང་དུ་སོང་ཡང་གནས་ཡུལ་དང
རིན་ཐང་མེད་པའི་མ་ཡུམ་ཡིན
ཁ
ང་ཚོའི་མག་པ་ཐོག་མ་དེ
སྟེང་ཕྱོགས་ལྷ་ཡུལ་ནས་ཕེབས་རབས་ཟེར
ང་ཚོའི་མག་པ་གོ་ཆོད་དེ
ལྷོ་ནུབ་རྒྱ་གར་ནས་བྲོས་རབས་ཟེར
གང་ལྟར་ང་ཚོའི་ཁྱིམ་བདག་རིན་པོ་ཆེ
གཉའ་ཁྲི་བཙན་པོ་ལགས
ཁྱེད་ཀྱི་བུ་རབས་ཚ་རྒྱུད་སུ་ཡང
མག་པར་དགའ་བའི་ཕ་སྲོལ་མེད
ཚང་མ་རང་ཁྱིམ་སྲུང་བའི་བདག་པོ་དང
དགྲ་བོ་འདུལ་བའི་དཔའ་རྒོད་ཡིན
ང་ཚོའི་བག་མ་ཐོག་མ་དེ
དག་པའི་ཞིང་ཁམས་ནས་འཕོས་རབས་ཟེར
ང་ཚོའི་བག་མ་གོ་ཆོད་དེ
རྒྱ་བལ་རྒྱལ་ཁབ་ནས་བསུས་རབས་ཟེར
གང་ལྟར་ང་ཚོའི་བཙུན་མོ་རིན་པོ་ཆེ
བལ་བཟའ་རྒྱ་བཟའ་ལགས
ཁྱེད་ཀྱི་མོ་རབས་ཚ་མོ་སུ་ཡང
བག་མར་དགའ་བའི་མ་སྲོལ་མེད
ཚང་མ་རང་ཁྱིམ་སྐྱོང་བའི་བདག་མོ་དང
བུ་ཕྲུག་གསོ་བའི་མ་ཡུམ་ཡིན།
༢༠༠༢།༢།༡༩