རང་དབང་འཚོལ་བ།
རྡོ་ལ་དར་གྱི་རི་རྩེ་ནས།
ཁ་བའི་འདབ་མ་ཐར་ཐོར་རེ།
ཁོ་བོའི་སྐེ་ཁུག་ནས་སྙིང་དབུས་སུ་ཞུ་ཐེངས་རེར།
བདག་གིས་ཆབ་བྲག་དབུ་རྩེ་མཐོང་ཞིང།
བདག་གིས་རྨ་ཆེན་གངས་རི་མཇལ།
དེ་བས། བདག་གི་མིག་ཟུང་ལས།
སླར་ཡང་ཁ་བའི་ཆུ་ཐིགས་འཐོར།
རྡོ་ལ་དར་གྱི་རི་འདབས་སུུ།
ཁོ་བོ། སྤྲ་དང་སྤྲེའུའི་རྩེད་འཇོའི་ཁྲོད།
ཤིང་ཏོག་གི་ཞིམ་མངར་མེད་པའི་ལྟོགས་ཐེངས་རེར།
གནའ་བོའི་ཡར་ཀླུང་རྩེད་ཐང་གི་ཟློས་གར་མཐོང་ཞིང༌།
དེ་རིང་གི་མཇུག་མ་མེད་པའི་སྤྲེལ་ཚོགས་མཐོང༌།
དེ་བས། ཁོ་བོའི་ལག་ཟུང་གིསྙིམ་མཐིལ་ནས།
སྔ་ན་མེད་པའི་དཔག་བསམ་གྱི་ལྗོན་པ་ཞིག་སྐྱེ་བར་སྨོན།
རྡོ་ལ་དར་གྱི་མཐའ་འཁོར་གྱི་ནགས་མའི་ཚལ་དུ།
གང་འདོད་དུ་འཕུར་བའི་འདབ་ཆགས་ཀྱི་ཁྱུ་དང༌།
ཅི་དགར་ཡན་པའི་རི་དྭགས་ཀྱི་ཚོགས་ཀྱིས།
ང་ཚོར་རང་དབང་གི་འཚོ་བ་ངོམ་ཐེངས་རེར།
བདག་གིས་སྙན་ངག་མེ་ལོང་གི
སྐབས་མིན་བསྟོད་པའི་དཔེ་དེ་དྲན་ཞིང༌།
སྨོན་ལམ་མ་ཡིན་པའི་སྨོན་སེམས་ཤིག་གིས།
གངས་སེང་འཚོལ་བའི་དྲན་བསྐུལ་གནང༌།
དེ་ལྟར། དུས་བཞིའི་ཁ་ངོ་མི་གསལ་བའི་རྫ་རི་འདིས།
ཁོ་བོར། སྐྱོ་འཛུམ་མི་གསལ་བའི་ངོ་གདོང་འདི་བྱིན་ནམ།
ཡང་ན། ཁོ་བོས་བཞིན་རས་ཟད་པོ་འདིས།
རྫ་རི་འདིར་ཞེན་ཁ་ལོག་བཅུག་གམ།
མ་གཞི། ཡུལ་གྱར་བའི་སྤྲེའུ་བདག
རི་དྭགས་གཞན་ལས་དོགས་འདྲོགས་ཆེ།
གཅན་གཟན་མངས་པོས་འཚེ་བ་རྒོད།
དེ་བས། ངས་རྟག་ཏུ་རང་ཉིད་སྲུང་ཞིང༌།
ངས་མུ་མཐུད་རང་དབང་འཚོལ་དགོས།།
༢༠༠༢།༡༠།༢༥།