ཏཱ་ལའི་བླ་མར་ཐུག་འཕྲད།

    སི་ཌན་ངལ་སེལ་ཚོགས་པའི་གོ་སྒྲིག་འོག ཕྱི་ཚེས་ ༡༦ ཉིན་༧གོང་ས་མཆོག་གིས་སི་ཌན་སོ་ཊོཀ་ཁོམ་ཝ་ཊར་ཕ་རན་ཌི་གྲོས་ཚོགས་ཚོགས་ཁང་དུ། ཡུལ་མི་སུམ་སྟོང་ལྷག་ལ༼ཏཱ་ལའི་བླ་མར་ཐུག་འཕྲད་༽ཅེས་པའི་བརྗོད་གཞིའི་ཐོག་བཀའ་སློབ་གནང་སྐབས། "དེ་སྔོན་ངོས་རང་བོད་དུ་ཡོད་དུས་དམངས་གཙོའི་ལམ་ལུགས་སུ་མཐའ་གཅིག་ཏུ་རྒྱབ་སྐྱོར་བྱེད་མཁན་ཞིག་ཡིན། ༡༩༥༣ལོར་ངོས་ཀྱིས་བོད་དུ་སྒྱུར་བཅོས་ཚོགས་པ་ཞིག་གསར་འཛུགས་བྱས་ཡོད་ཀྱང་། རྒྱ་གཞུང་གིས་གུང་ཁྲན་ཏང་གི་ལམ་སྲོལ་ལྟར་བཅོས་བསྒྱུར་གཏོང་རྒྱུ་ཡིན་ཚུལ་བརྗོད་སྟབས། སྒྱུར་བཅོས་བྱེད་སྟངས་ཏག་ཏག་རྒྱབ་འགལ་དུ་སོང་ཡོད། རྒྱུ་རྐྱེན་དེ་དག་ལ་བརྟེན་ཏེ་ ༡༩༥༩ ལོར་བོད་མི་ཆིག་འབུམ་ལྔ་ཁྲི་ཙམ་རྒྱ་གར་ལ་བྲོས་བྱོལ་དུ་ཡོང་དགོས་བྱུང་ཡོད།" ཅེས་དང་། "ངོས་རང་ལོ་མང་རིང་བོད་ཀྱི་ཆོས་སྲིད་གཉིས་ཀྱི་མགོ་ཁྲིད་བྱས་ཡོད་དུས། ཆོས་སྲིད་ཀྱི་འཛིན་སྐྱོང་ཐ་དད་བྱ་དགོས་ཞེས་བརྗོད་ན་ཏོག་ཙམ་ཁྱད་མཚར་ཞིག་འདུག་ཀྱང་། ༢༠༠༡ ལོར་བོད་མི་ཚོས་ཆབ་སྲིད་མགོ་ཁྲིད་ཐད་ཀར་འོས་བསྡུའི་ལམ་ནས་བདམས་ཐོན་བྱས་པ་ནས་བཟུང་སྟེ། ངོས་ཀྱི་གནས་སྟངས་ཕྱེད་རྒན་ཡོལ་དུ་གྱུར་ཡོད། ངོས་རང་ཕྱེད་རྒན་ཡོལ་བྱས་ཏེ་ལོ་ངོ་བཅུ་ཙམ་བསྡད་པ་འདང་ངེས་ཤིག་ཆགས་ཡོད། ངོས་རང་ལའང་འགྲོ་བ་མིའི་ཐོབ་ཐང་དགོས་ཀྱི་ཡོད་པ་རེད།" ཅེས་གསུངས་ཡོད།

ཡང། "ད་ཆར་ངོས་ཀྱིས་ཏཱ་ལའི་བླ་མའི་ཆབ་སྲིད་ཀྱི་འགན་དབང་ཆ་ཚང་བ་དེ་མང་ཚོགས་ཀྱིས་འོས་འདེམས་བྱས་པའི་སྒྲིག་འཛུགས་ལ་དགའ་སྤྲོ་དང་སྤོབས་པ་ཆེན་པོའི་ཐོག་ནས་རྩིས་སྤྲོད་བྱས་ཡོད། དེའི་སྟབས་ཀྱིས་ལོ་ངོ་བཞི་བརྒྱ་ཙམ་སོང་བའི་ཏཱ་ལའི་བླ་མའི་བོད་མིའི་ཆབ་སྲིད་མགོ་ཁྲིད་བྱ་རྒྱུའི་ལམ་སྲོལ་དེ་གཟི་བརྗིད་ངང་མཇུག་བསྒྲིལ་པ་རེད། ཕྱི་ཟླ་ ༣ ཚེས་ ༡༩ ཉིན་ཏེ། ངོས་ཀྱིས་སྲིད་དབང་མང་ཚོགས་ཀྱིས་འོས་འདེམས་བྱས་པའི་སྒྲིག་འཛུགས་ལ་རྩིས་སྤྲོད་བྱས་པའི་དགོང་མོ་དེར་གཉིད་ཧ་ཅང་སྐྱིད་པོ་ཞིག་ཁུག་བྱུང་།"ཞེས་གསུངས་འདུག

     ཡུལ་དེའི་ཉིན་གསུམ་རིང་གི་མཛད་འཕྲིན་སྐབས་༧གོང་ས་མཆོག་གིས། སྙན་གྲགས་ཅན་གྱི་ནོ་བྷེལ་འགྲེམས་སྟོན་ཁང་ལ་ Nobel Museum  ཞིབ་གཟིགས་གནང་མཐར་སྨྱུ་གུ་གཅིག་དང་སྤྱན་ཤེལ། སྤྱོད་འཇུག་གི་ཕྱག་དཔེ་ཞིག་བཅས་བསྩལ་ཡོད་འདུག་ལ། སྐབས་དེར་ས་དེ་གའི་སོག་རིགས་མང་ཚོགས་ལའང་དམིགས་བསལ་བཀའ་སློབ་ཞིག་གནང་ཡོད་པ་རེད། ཕྱི་ཚེས་ ༡༧ ཉིན་གྱི་སྔ་དྲོར་གོང་ས་མཆོག་གིས་ལུན་ཌ་གྲོང་ཁྱེར་གྱི་སློབ་གྲྭ་ཞིག་ཏུ། གྲོང་ཁྱེར་ཁག་ ༥༠ ནས་བཅར་བའི་སློབ་ཕྲུག་ཚོར་བཀའ་སློབ་གནང་ཡོད་འདུག་ལ། དེའི་རྗེས་གྲོང་ཁྱེར་དེའི་ཡེ་ཤུའི་ཚོགས་ཁང་ཆེན་པོ་ཞིག་ཏུ་འཚོགས་བཞིན་པའི་གསོལ་འདེབས་སྨོན་ལམ་ཞིག་གི་ཐོག་ཕེབས་ཏེ། ཚོགས་ཞུགས་པ་༡༠༠༠ ལྷག་ལ་བཀའ་སློབ་གནང་སྟེ།" ངོས་རང་དམིགས་བསལ་སྨོན་ལམ་ཚོགས་ཆེན་སྟེང་བཅར་ཐུབ་པ་འདི་གཟི་བརྗིད་ཅིག་ཏུ་ཚོར་བྱུང་། ཚོགས་ཆེན་འདིའི་རིགས་ཀྱིས་ཆོས་ལུགས་མཐུན་སྒྲིལ་ཡོང་རྒྱུར་ཕན་ཐོགས་ཡོང་གི་ཡོད། ཆོས་དད་བྱ་རྒྱུ་དེ་ལྷ་ཁང་ནང་ཙམ་མིན་པར་ལྷ་ཁང་གི་ཕྱི་ལའང་ཁྱབ་ཐུབ་པ་ཞིག་དགོས། ཆོས་དད་ལྷ་ཁང་ཁོ་ནར་ལུས་པ་ཡིན་ན་དེ་ཙམ་གྱི་ནུས་པ་ཐོན་ཐུབ་ཀྱི་མེད།" ཅེས་གསུངས་ཡོད། སི་ཌན་གྱི་ཆིབས་བསྒྱུར་ལེགས་པར་གྲུབ་རྗེས། ཕྱི་ཚེས་༡༧ ཉིན་ཌན་མག་ཏུ་ཕེབས་ཏེ་མཛད་འཆར་ཁག་མུ་མཐུད་སྐྱོང་བཞིན་ཡོད་དོ།